Okuyandja oikwafa mounyuni u na “oita neenghundana di na sha noita”

Momafiku aa axuuninwa otwa teelela okuuda “oita neenghundana di na sha noita.” (Mateus 24:6) Ashike nande ongaho, ngeenge ovamwatate va taalela eenghalo didjuu omolwoita ohava mono ekwafo olo va pumbwa. Olaporta yOlutuwiliki yomo 2022 #3 oye tu pa ouyelele tau kumu omutima kombinga yanghee ovo va kumwa koita muEuropa lokOushilo va pewa oikwafa. Oikwafa oyo otai yandjwa ngahelipi nokuli nonande ope na oita? Osho osha kwafela ngahelipi ovamwatate moUkraine?

Oshike sha pumbiwa? Ohashi twalwa ngahelipi?

Mo 24 Februali 2022, mefiku omo oita ya hovela moUkraine, Okomitiye yOvaunganeki oya li ya dimina ku yandjwe oikwafa, opo i ka kwafele ovamwatate moUkraine. Oshitaimbelewa shaUkraine osha hovela diva okulanda oinima moshitukulwa, ndele tave i yandje tava longifa Eekomitiye 27 dOkuyandja Oikwafa odo da nangekwa po.

Opo oshitaimbelewa shaUkraine shi kwafelwe, ovamwatate kEembelewa da kula dEendombwedi daJehova ova li va hovela diva okudiladila kunghee tava dulu okukwafela. Okomitiye yOvaunganeki nosho yo Okomitiye yOkunyanyangida yOlutuwiliki oya li ya pula Oshikondo shOkulanda shomOunyuni Aushe shi longele kumwe naavo va hoololwa moshitaimbelewa shaUkraine naPoland va dule okukundafana osho shi na okuningwa po. Ovamwatate vokOshikondo shOkulanda, shOkutuma Oinima nosho yo shOinima yoPaveta koshitaimbelewa keshe, oshilyo shOkomitiye yOshitaimbelewa shaUkraine nosho yo ovo hava longo kOshikondo shOkulanda mOunyuni Aushe ohava shakene efiku keshe, opo va unganeke oikwafa.

Jay Swinney, ha longo kOshikondo shOkulanda mOunyuni Aushe, okwa ti: “Tete otwa li tu na okutala kutya oshike sha pumbiwa. Otwa li twa hala okuyandja oikulya nosho yo oinima oyo tai va kwafele va kaleke po oukoshoki, oyo ovamwatate vomoshitukulwa ve shii. Ashike osha li eshongo okutokola kutya oshike sha pumbiwa. Otwa li yo tu na okutala kutya oinima otai twalwa ngahelipi koUkraine ku na oita tashi ningwa meameno nodiva.”

Mo 9 Marsa 2022, okwa li kwa monika kutya ovamwatate novamwameme koUkraine ova pumbwa shike. Omapakete oikulya, ngaashi ombelela yomeendoxa nosho yo eeshi, oilya, olwishi nomakunde oya li tai yandjwa pamwe noinima yokukaleka po oukoshoki, ngaashi eefewa nosho yo eetoyileta. Pefimbo opo, okwa li kwa tengenekwa kutya oipumbiwa yomunhu umwe, tai wa na oivike inhe, otai kosho eedola daNamibia 994. Molwaashi ovamwatate vahapu otava ka pumbwa oinima oyo, Okomitiye yOvaunganeki oya li ya pitika ku longifwe oshimaliwa shihapu. Ndele mbela ovamwatate ova li tava dulu ngahelipi okutwala oinima kwaavo ve na omhumbwe nopehe na okutula eemwenyo davo moshiponga inashi pumbiwa?

Mo 13 Marsa, ovamwatate vavali vokoPoland ova li va ninga omalolelo okutwala oinima ketungo lokutuvikila oinima li li popepi naLviv shaUkraine okudja koshitaimbelewa shaPoland. Omafiku oo a tetekela ofimbo inava ya, ovamwatate novamwameme vokoshitaimbelewa shaPoland naUkraine ova li va kwafela ovaliyambi ovo vavali ve lilongekidile olweendo lavo. Oshitaimbelewa osha li sha longekida eembapila odo da pumbiwa okupita peengaba, opo ku ka yandjwe oikwafa, ova li va shilipaleka kutya otuwa yovamwatate oi na omadidiliko oo taa ulike kutya ove uya okuyandja oikwafa, nova li va longela kumwe novamwatate vomoshitukulwa moUkraine, opo va dule okulombwela ovamwatate ondjila oyo i li popepi, ngeenge ova tauluka eengaba. Molwaashi opa li pa ningwa omalongekido mawa, na Jehova okwa li a nangeka noupuna eenghendabala odo, oipumbiwa oya li ya yandjwa kOkomitiye yOkuyandja Oikwafa meni ashike leevili 24 eshi ya fika koLviv, novamwatate ova li va shuna koPoland ve li meameno.

Nonande osha li sha enda nawa pehovelo, ovamwatate ova li ashike va twala oinima i li koshi yotona imwe. Okwa li pa tengenekwa kutya opa pumbiwa natango oinima yeetona 200. Oinima i fike opo oya li tai dulu ngahelipi okutwalwa nokuyandjwa diva ngaashi tashi dulika?

“Oshiwana shoye oshe lilongekidila nehalo liwa unene”

Konima eshi vahapu mounyuni aushe va lesha eelaporta ko jw.org kombinga yanghee ovamwatate tava mono oixuna omolwoita oyo i li moUkraine, ova li va halelela okukwafa. Vahapu ovo ve li kokule ova li va yandja omayambidido opashimaliwa koilonga yomounyuni aushe yEendombwedi daJehova, ve shii kutya oimaliwa otai ka longifwa nawa. Vamwe ovo ve li poushiindalongo ova li va longifa efimbo lavo, eenghono davo nosho yo oiniwe yavo, opo va kwafele. Tala koihopaenenwa tai shikula.

MoPoland, ovaliyambi ova li va pakela oipakete omayovi omilongo i na oikwafa, nounona ova li va faneka oukalata. Bartosz, oshilyo shOshikondo shOkulanda moshitaimbelewa shaPoland, okwa ti: “Luhapu ohandi lesha Epsalme 110:3 olo tali ti kutya oshiwana shaJehova ‘oshe lilongikidila nehalo liwa.’ Ndele paife onda mona oushili womushangwa oo, eshi nda mona ovamwatate novamwameme vahapu ve liyamba nehalo liwa opo va kwafele.”

Umwe womEendombwedi daJehova, oo e na okambani oyo hai twala oinima koilongo i lili noku lili, okwa li a yandja omaloli aye nosho yo omahooli. Okwa ti: “Ei oya li omhito yokuulikila ovamwatate nosho yo Jehova ohole. Onda hafa neenghono eshi nda dula okukwafela.” Otaku tengenekwa kutya okwa yandjwa eelitela domahooli di dulife 7 700, novamwatate ova li va longifa efimbo lavo nosho yo eenghono davo, opo va shinge eekilometa 48 000 va twale oikwafa!

Omolwomaliyambo nosho yo oilonga yopahole yovamwatate novamwameme, eshi 28 Marsa a fika, omafiku 15 konima eshi oinima yotete ya twalwa, koUkraine okwa twalwa eetona 100 doikulya, oinima yokukaleka po oukoshoki nosho yo oinima yopaunamiti. Molwaashi ovamwatate nosho yo vamwe ova li va yandja omayambidido oikwafa, oimaliwa oyo ya li ya nuninwa okulanda oikwafa oya li ya shuna pedu. Fiyo opapa, Eendombwedi daJehova oda li da tumina koUkraine oikwafa i dulife peetona 190. Ongahelipi oikwafa oyo ya kwafela ovamwatate?

“Oya ulika yo kutya omu tu hole!”

Konima eshi oipakete yoikwafa ya fika moLviv, Eekomitiye dOkuyandja Oikwafa oda li de i yandja kwaavo ve na omhumbwe moUkraine. Oipakete yoikwafa oya li ya tuminwa keedolopa da yoolokafana, dimwe odi li kokule naLviv eekilometa di dulife 1 300. Nonande oilonga oyo oya li ya longwa diva ngaashi tashi shiiva, oya li ya pula efimbo.a

Markus Reinhardt, oshilyo shOkomitiye yoshitaimbelewa shaUkraine, okwa ti: “Pefimbo eli loita, ovamwatate vahapu ova mona nghee Jehova e va ulukila ohole nova mona nghee sha fimana okushikula omalombwelo oo taa di kehangano laJehova, fimbo nokuli oshiponga inashi holoka. Pashihopaenenwa, keshe umwe okwa ladipikwa a kale e na oikulya meumbo laye nosho yo omeva taa wana oivike yonhumba. Omukulunhuoangalo, wokoshitukulwa shaKyiv, okwa popya kombinga yaasho a ti: ‘Ehangano laJehova ole tu kwafela tu lilongekidile eenghalo didjuu notwe shi pandula neenghono. Eshi twa kala tu na oikulya, omeva nosho oradio oshe tu kwafela.’ Otwa pandula neenghono ovamwatate eshi va shikula ewiliko olo va pewa, molwaashi osha pa oshitaimbelewa omhito, opo shi longekide oikwafa.”

Ovamwatate ova li ve udite ngahelipi eshi oikwafa ya fika? Mykola naZinaida, ovo hava di moKharkiv, ova popya osho va li ve udite va ti: “Oshe tu kuma komitima neenghono. Otwe mu pandula unene eshi mwe tu pa oikulya nosho yo omiti. Osha yela kutya Jehova oye te tu file oshisho.” Valentyna, oo ha di moshitukulwa sha faafana, okwa ti: “Okudja ashike pehovelo loita, meefitola omwa li hamu kala mu na omikweyo dile dovanhu. Haalushe wa li to dulu okulanda osho wa pumbwa. Jehova okwa li a mona oupyakadi oo. Okwa li a nangeka po ovamwatate, opo ve tu etele oikwafa pomaumbo etu, noikwafa oyo oya li i na ashishe osho twa pumbwa! Ngeenge u li meenghalo odo didjuu, oho tale ko omafiloshisho oo taa di kuJehova nosho yo kehangano laye e likalekelwa. Oshitunhula alushe okumona nghee he tu kwafele noku tu yambidida.”

Yevhen, Iryna naMykyta, ovo va ya onhapo okudja koMariupol, ova ti: “Otwa pandula neenghono eshi mwa fila oshisho nokuyambidida oukwaneumbo wetu. Omwe tu kwafela pefimbo la wapala. Potete otwa li ashike hatu diladila kutya moipakete omu na ashike oipumbiwa yetu, ndele eshi twe i patulula, oya ulika yo kutya omu tu hole!”

Kape na omalimbililo kutya otwa mona nghee Jehova a longifa omhepo yaye iyapuki, opo a yandje omalombwelo koshiwana shaye, shi dule okuyandja oikwafa pefimbo ‘loita neenghundana di na sha noita.’ Omayambidido oilonga yomounyuni aushe, oo mahapu a yandjwa ko donate.jw.org, okwa dana onghandangala ya fimana. Ohatu mu pandula omolwomayambidido eni ehalo liwa!

Okuyandja oikwafa diva ngaashi tashi shiiva tashi ningwa meameno

1. 

   24 Februali 2022: Okomitiye yOkuunganeka oya li ya pitika ku longifwe oimaliwa oyo ya nuninwa okuyandja oikwafa moUkraine, osho osha pitika oshitaimbelewa shi hovele okuyandja oikwafa

2. 

   24 Februali–8 Marsa 2022: Oshitaimbelewa shaUkraine osha landa oipumbiwa imwe moshitukulwa nosha hovela oku i yandja tashi longifa Eekomitiye dOkuyandja Oikwafa. Oshitaimbelewa osha li yo she lilongekida okutambula nosho yo okuyandja oikwafa tai di koPoland

3. 

   9 Marsa 2022: Okomitiye yOkuunganeka oya li ya pitika oikwafa i tuminwe koUkraine

4. 

   10–12 Marsa 2022: Opwa ningwa omangela, opo ku ningwe omalolelo okutumina oikulya nosho yo oinima imwe koLviv moUkraine okudja koPoland

5. 

   13 Marsa 2022: Oikulya nosho yo oinima imwe oya li ya tuminwa koLviv moUkraine okudja koPoland

6. 

   14–16 Marsa 2022: Ovaliyambi vOshikondo shOkuduta nOkutunga shomOshitukulwa ova li va longekida oikulya nosho yo oinima yokukaleka po oukoshoki, polupale loyoongalele lili popepi naPoznan moPoland

7. 

   17 Marsa 2022: Konima yomafiku ane eshi omalolelo oo a ningwa a pondola, eetona13 doikwafa oda li da hovela okutuminwa keengaba daUkraine

8. 

   21–27 Marsa 2022: Oipakete yoikwafa oyo ya xupa po oya li ya longekidilwa moPoland, ndele tai tuminwa koUkraine oko ya tuminwa koitukulwa oyo i na omhumbwe meni leevili 24

9. 

   28 Marsa 2022: Meni ashike lomafiku 20, konima eshi kwa yandjwa epitikilo, eetona 100 doikulya, oinima yokukaleka po oukoshoki nosho yo oinima yopaunamiti oya li ya tuminwa koUkraine

Fiyo opapa, Eendombwedi daJehova oda tuma eetona di dulife 190 doikwafa koUkraine.