Okuninga exulifo tali ti sha

OTASHI dulika wa konga ouyelele nowa unganeka nawa osho to ka popya moshipopiwa. Otashi dulika yo wa longekida etwalemo tali pendula ohokwe. Ashike owa pumbwa sha natango; owa pumbwa okuninga exulifo tali ti sha. Ino diladila kutya exulifo loshipopiwa shoye inali fimana. Osho ho popi lwaxuuninwa osho hashi ka dimbulukiwa oule wefimbo. Ngeenge ino xulifa oshipopiwa shoye nawa, nokuli noinima oyo wa popya metetekelo loshipopiwa shoye oshi na oupu iha kume lela ovapwilikini.

Diladila kombinga yaashi: Josua okwa li a pa ovakulunhu vomuIsrael oshipopiwa shihe fi okudimbuwa lwopexulilo lokukalamwenyo kwaye. Konima eshi Josua a popya shi na sha nonghedi omo Jehova a li a ungaunga nOvaisrael okudja ngoo pefimbo laAbraham, mbela okwa li ashike a ngonga oitwa oyo ya fimana? Ahowe, ponhele yaasho, okwa li a ladipika oshiwana ta popi nomufindo a ti: “Tileni hano paife Omwene noku mu longela mouyuki nomoshili.” Lesha shi na sha nexulifo loshipopiwa shaJosua muJosua 24:14, 15.

Oshipopiwa vali shimwe shididilikwedi otashi hangwa mOilonga 2:14-36, osho omuyapostoli Petrus a li a yandja kongudu yovanhu muJerusalem pOshivilo shOpentekoste 33 O.P. Tete, okwe va yelifila kutya ova mona nghee exunganeko laJoel li na sha nokutililwa omhepo iyapuki yaKalunga la wanifwa. Shitivali, okwe va yelifila nghee exunganeko olo la li la pambafana nomaxunganeko opaMessias oo e li mOmapsalme oo a xunganeka shi na sha nokunyumunwa kwaJesus Kristus nokuya kwaye meulu a ka kale kolulyo laKalunga. Opo nee pexulilo loshipopiwa, okwa popya sha yukilila oshinima osho ovapwilikini vaye aveshe va li ve na okudimina. Okwa ti: “Hano eumbo alishe laIsrael nali shiive shili, Jesus tuu ou, mwe mu valela [komuti womahepeko], Kalunga okwe mu ninga Omwene naKristus.” Ovanhu ovo va li po ova li va pula va ti: “Ovalumenhu nye ovamwatate, fye otu nokuninga ngahelipi”? Petrus okwa li e va nyamukula a ti: “Liveleni ombedi, nakeshe umwe womunye na ninginifwe medina laJesus Kristus.” (Oil. 2:37, 38, yelekanifa NW.) Mefiku tuu olo, ovanhu 3 000 lwaapo vomwaavo va li pomhito oyo ova li va tambula ko oshili i na sha naJesus Kristus, ve linyengifwa koshipopiwa osho.

Oitwa oyo u na okukaleka momadiladilo. Osho to popi pexulilo loshipopiwa shoye nashi kale sha pambafana filufilu nenenediladilo loshipopiwa shoye. Pexulilo loshipopiwa shoye, ngonga monghedi ya yela oitwa ya fimanenena oyo wa kundafana momukokomoko woshipopiwa. Ngeenge owa hala okutumbula oitya imwe ya fimanenena yomoshipalanyole shoye, osha hanga kwoove mwene.

Luhapu, omupopi oha popi nelalakano lokuladipika ovapwilikini va katuke eenghatu donhumba metwokumwe nouyelele oo e va pa. Exulifo loshipopiwa ola nuninwa okukwafela ovapwilikini va mone kutya ove na okuninga po shike. Eshi wa hoolola oshipalanyole nosho yo oitwa ya fimanenena oyo to ka longifa, mbela owa li ngoo wa diladila moule kutya omolwashike ouyelele oo tau ka kala wa fimana kovapwilikini nonokutya owa hala okuhanga elalakano lilipi eshi to ka yandja ouyelele oo? Ngeenge osho wa li wa ninga ngaho, ou shii onghatu oyo wa hala va katuke. Owa pumbwa nee oku va yelifila kutya onghatu oyo oilipi, nonokutya ongahelipi tava dulu oku i katuka.

Kakele kokuyelifila ovapwilikini voye kutya ove na okuninga shike, eshi to xulifa oshipopiwa shoye, tumbula oinima oyo i na oku ve linyengifa va katuke eenghatu. Exulifo loshipopiwa shoye oli na okukwatela omatomheno opandunge e na sha nokukatuka eenghatu odo to ladipikile ovapwilikini va katuke nosho yo omauwa oo tava dulu okumona ngeenge ova katuka eenghatu odo. Ngeenge eendjovo daxuuninwa oda diladilwa nawa noda popiwa nawa, otadi ka koleka oshipopiwa shoye.

Kaleka momadiladilo kutya oshipopiwa shoye otashi xulu. Onghee hano, osho to popi nashi ulike kutya oto xulifa oshipopiwa shoye. Ou na yo okukala to popi ponhapo ya yeleka. Ino popya ashike to endelele, nokuxulifa oshipopiwa nopehe na euliko la twa kutya oto shi xulifa. Mepingafano naasho, ondaka yoye inai fiilila. Ou na yo okulongifa ewi la yeleka. Omatumbulo oye axuuninwa naa kale e liwetikile kutya oto xulifa oshipopiwa shoye. Naa holole yo kutya ou na ondjungu nokuulika kutya owa tomhwa. Ino kala ino liendifa po pexulifo loshipopiwa shoye ngeenge to lilongekida oshipopiwa shoye.

Mbela exulifo loshipopiwa shoye oli na okukala lile shi fike peni? Exulifo loshipopiwa ihali ufwa ashike kefimbo lokondadalunde. Ashike kali na okukala lilelile. Onghedi omo tali kumu ovapwilikini voye oyo tai ka ufa kutya oli na okukala lile shi fike peni. Ovapwilikini ohava hafele alushe exulilo loshipopiwa olo li li paunafangwa, la yela notali tungu. Oto ka pondola yo ngeenge owa longifa exulifo lile kanini olo la kwatela mo efaneko li li pauxupi nola ngongwa nawa. Yelekanifa exulifo li li pauxupi lembo lOmuudifi, olo li li mOmuudifi 12:13, 14, naalo loshipopiwa shEudifo lokOmhunda osho shixupi kembo lOmuudifi, olo tali hangwa muMateus 7:24-27.

Moukalele. Moukalele omo unene hatu kala twa pumbwa okuninga exulifo konima eshi twa mana eenghundafana novanhu. Ohatu ka dula okupondola neenghono, ngeenge otwe lilongekida nohatu ulikile ovanhu kutya otu na ko nasha navo shili. Omayele oo a yandjwa pomapandja oo a tetekela otaa dulu yo okulongifwa unene tuu ngeenge hatu ningi eenghundafana novaneumbo.

Eenghundafana otadi dulu okukala pauxupi, molwaashi pamwe omunhu oo hatu popi naye okwe lipyakidila. Otashi dulika ashike tu popye naye oule womunute umwe. Ngeenge otashi shiiva, oto dulu okutya: “Ondi wete kutya owe lipyakidila, ndele onda hala ndi ku lombwele oshinima shihokwifa. Ombibeli otai yelifa kutya Omushiti wetu okwa lalakanena okuninga edu oparadisa omo ovanhu tava dulu okukala nomwenyo fiyo alushe. Nafye ohatu dulu oku ka kala mOparadisa oyo, ndele otwa pumbwa okulihonga kombinga yoiteelelwa yaKalunga.” Ile oto dulu okupula omuneumbo ngeenge oto dulu okwaaluka pomhito imwe tai wapalele.

Ngeenge omuneumbo okwa kangheke eenghundafana mokupopya nonya ile nehandu, natango oto dulu okuninga po sha osho tashi eta ouwa. Kaleka momadiladilo omayele oo taa hangwa muMateus 10:12, 13 nosho yo Ovaroma 12:17, 18. Ngeenge owa popi naye nombili, otashi dulika a ka lundulule etaleko laye li na sha nEendombwedi daJehova. Kungaho, owa pondola sha.

Mepingafano naasho, otashi dulika wa li wa ninga eenghundafana diwa nomuneumbo wonhumba. Oto dulu okweendulula oitwa ya fimanenena oyo wa hala a koneke. Mu ladipika a ninge po sha shi na sha naasho mwa kundafana.

Ngeenge ou wete kutya oto ka dula okutwikila eenghundafana naye pomhito vali imwe, mu lombwela sha osho tashi mu ningifa a kale a teelela nodjuulufi u aluke. Mu pula epulo, tashi dulika nande ololo la pamba oshinima osho sha kundafanwa membo Reasoning From the Scriptures ile mokambo Oipalanyole yeenghundafana dopaMbibeli ile moshishangomwa osho sha nuninwa okukonakona Ombibeli novanhu. Kaleka momadiladilo elalakano letu lokuya moukalele, olo Jesus a popya muMateus 28:19, 20.

Ongahelipi to dulu okuxulifa pekonakonombibeli? Ngeenge owa endulula oshipalanyole, oto ka kwafela omukonakoni a dimbuluke osho mwa kundafana. Omapulo eendululo otaa ka kwafela omukonakonimbibeli a koneke oitwa oyo ya fimanenena, naunene tuu ngeenge eendululo ola ningwa nefimbo. Ngeenge owa pula omukonakonimbibeli epulo kutya ota ka longifa ngahelipi ouyelele oo mwa konakona opo a mone ouwa ile kutya ota ka dula ngahelipi okulombwela vamwe kombinga yao, otashi dulu oku mu kwafela a diladile nghee ta dulu okutula moilonga osho e li honga. — Omayel. 4:7.

Dimbuluka kutya exulifo loshipopiwa shoye otali dana yo onghandangala ya fimana moshipopiwa shoye.