OSHITWA 10

Okupopya to lundulula ewi

Omayeletumbulo 8:4, 7

ENGONGO: Eendjovo detu otadi ka kala tadi kumu omaliudo ovapwilikini nokuyandja eityo li li mondjila ngeenge ohatu lundulula oule wondaka yetu, onhapo ile omutono wewi letu.

NGHEE U NA OKU SHI NINGA:

Lundulula oule wondaka yoye. Kala ho yelula ondaka ngeenge to popi oitwa oyo ya fimana nongeenge to ladipike ovapwilikini va ninge sha. Weda ko kewi ngeenge to lesha omishangwa odo tadi londwele shi na sha netokolo ile tu tye ehanauno. Shunifa ewi pedu ngeenge to popi opo u ningife ovanhu va kale va teelela osho tashi shikula ko ile ngeenge to holola onghalo yonhumba itilifi.

Ondaka yoye inai kala ya yeluka oule wefimbo opo shiha ningife ovapwilikini voye va kale ve udite tava tanguninwa. Henuka okukala to yukifa elitulemo kwoove mwene mokukala to popi wa fa to dana oshinyandwa.
Lundulula omutono wewi loye. Ngeenge otashi shiiva melaka loye, lundulula omutono wewi loye eshi to popi nexwamo, nge to udike ounene woshinima ile woshinano. Popya nondaka i li pedu, ngeenge oto popi oshinima shinyikifa oluhodi.
Lundulula onhapo yewi loye. Ngeenge oto popi oshinima shitunhula, popya to endelele. Popya to ende kanini eshi to popi oitwa oyo ya fimana.

Henuka okuhalukifa ovapwilikini voye mokulundulula onhapo yewi loye wa fa wa halukifwa. Ou na yo okuhenuka okupopya to endelele neenghono molwaashi ito ka dula okutumbula nawa oitya monghedi i uditike.