OSHITWA 2

Okupopya monghedi yeenghundafana

2 Ovakorinto 2:17

ENGONGO: Okupopya monghedi yopaushitwe osha kwatela mo nghee u udite kombinga yoshikundafanwa novapwilikini voye.

Lilongekida noukeka pamwe neilikano. Ilikana opo u yandje elitulemo ketumwalaka, ponhele yokuyandja elitulemo kwoove mwene. Yandja elitulemo koitwa ya fimana oyo wa pumbwa okupopya kombinga yayo. Yelifa oitwa noitya yoye mwene; ndele ino pumbwa okukala wa mangwa kwaasho sha shangwa.

Ngeenge owa diladila oku ka lesha mOmbiibeli odikilila ile moshishangomwa shonhumba, liendifa po komesho yefimbo opo u ka leshe nawa. Ngeenge oto lesha etofwemo lonhumba, lesha nomaliudo, ashike shi ninga pandjele, ndele hakukala unene wa fa omunhu ta dana oshinyandwa.
Popya tashi di komutima. Diladila kutya omolwashike ovapwilikini voye va pumbwa okuuda etumwalaka. Yandja elitulemo kuvo. Oto ka ulika kutya ou na ohamu nosho yo oukaume okupitila monghedi omo wa fikama, omaudi oo to ningi nosho yo omalinyengo oye okoshipala.

Okupopya monghedi yopaushitwe itashi ti okupopya wa fa uhe na ko nasha. Etumwalaka loye otali ka udiwa ko nawa ngeenge oho wilikwa keemhango delaka nokupopya oinima ya yela.
Tala kovapwilikini voye. Tala ovapwilikini voye momesho nonande otashi dulika shi kale shidjuu. Ngeenge to yandje oshipopiwa, kala to tale komunhu umwe poshikando, ponhele yoku va tala aveshe poshikando shimwe.