Olyelye Omuudi womailikano?
NGEENGE oku na Omuudi womailikano, osha yela kutya oye yo Omushiti. Mbela ope na ngoo umwe ta dulu okushiiva omadiladilo oye ehe fi ashike Omushiti wouluvi? Ope na ngoo umwe vali ta dulu okunyamukula omailikano nokupa ovanhu ekwafo olo va pumbwa ehe fi Omushiti? Ndele otashi dulika u lipule kutya, ‘Oshi li ngoo pandunge okwiitavela Omushiti?’
Ovanhu vamwe ohava diladila kutya opo omunhu a itavele Omushiti, ke na okudimina oumbangi wounongononi wokunena. Ashike epopyo olo kutya okwiitavela muKalunga otaku kondjifafana nounongononi ola puka. Natu ka tale koshihopaenenwa.
◼ Omakonakono oo opo a ningwa e na sha novahongwanhu 1 646 moinima yopaunongononi vokeeunivesiti 21 odo da talika ko da denga mbada mOilongo ya Hangana otaa ulike kutya omunhu ashike umwe vomovanhu vatatu ha popi sha yukilila kutya ina itavela muKalunga.
Oushili oyoo kutya ovanongononi vahapu ova itavela kutya Kalunga oko e li.
Oumbangi oo tau ulike kutya oku na Omushiti
Mbela otu na ashike okudimina ngahenya kutya oku na Omuudi womailikano nopehe na oumbangi washa? Hasho nandenande! Ediladilo olo kutya eitavelo olo okudimina oshinima shonhumba nopehe na oumbangi washa ola puka. Ombibeli oya popya kutya eitavelo olo ‘elineekelo la pama okulineekela osho tashi teelelwa nokuliukifa painima ihe wetike.’ (Ovaheberi 11:1) Pashihopaenenwa ihatu dulu okumona omhepo, ashike ohatu mono kutya oku na omhepo ngeenge tai linyengifa omafo omiti eshi tai pepe. Onghee hano, otwa dimina kutya oku na omhepo. Sha faafana, nonande ihatu mono Omuudi womailikano, ohatu dulu okulihonga kombinga youmbangi muhapu wa yela oo tau dulu oku tu kwafela tu itavele kutya oko e li.
Openi hatu dulu okuhanga oumbangi oo tau ulike kutya Kalunga oko e li? Otwa pumbwa ashike okutala momudingonoko wetu. Ombibeli oya ti: “Osheshi keshe tuu eumbo oli nomutungi walo, ndelenee omutungi waaishe oKalunga.” (Ovaheberi 3:4) Mbela oto tu kumwe noushili weendjovo odo? Otashi dulika ngeenge to dilonga kelandulafano olo li li meshito, kunghee ovanhu va shitwa ile kouluvi womunhu oo wa kitakana neenghono u dule oinima aishe oyo i li kombada yedu, oho diladila kutya ope na sha shinene shi dule ovanhu.a
Ndele eshito itali tu hongo oinima aishe kombinga yaKalunga. Okutala oumbangi oo tau ulike kutya Kalunga oko e li meshito okwa fa ashike okuuda eenghatu domunhu ta ende e li konima yomuvelo wa idila. Oto ka kala u udite kutya oku na omunhu, ndele ku shii kutya olyelye. Ashike opo u shiive kutya olyelye, owa pumbwa okuyeulula omuvelo. Nafye otwa pumbwa okuninga oshinima sha yukila oko opo tu shiive kutya olyelye a shita oinima aishe.
Ombibeli otai dulu oku tu kwafela tu shiive kombinga yaKalunga. Ngeenge owe i lesha nokukonakona omaxunganeko amwe ayo nosho yo nghee a wanifwa, oto ka mona oumbangi oo tau ulike kutya Kalunga oko e li.b Kakele kaasho, ondjokonona i na sha nanghee Kalunga a li a ungaunga novanhu otai ulike kutya Omuudi womailikano oo okwa tya ngahelipi.
Omuudi womailikano okwa tya naanaa ngahelipi?
Ombibeli otai ti kutya Omuudi womailikano omunhu oo to dulu okushiiva. Omunhu oye ashike ta dulu okupwilikina ta ulike oukwao wananghali. Ombibeli otai tu hekeleke tai ti: “Oove, Omuudi womailikano, ombelela aishe i nokuuya kuove.” (Epsalme 65:3) Kalunga oha pwilikine kwaavo tava ilikana kuye ve na eitavelo. Oku na yo edina. Ombibeli oya ti: “Omwene [“Jehova,” NW] e li kokule novahenakalunga, ndelenee [ta] udu eindilo lovayuki.”— Omayeletumbulo 15:29.
Jehova oku na omaliudo. Oye “Kalunga kohole” nosho yo ‘Kalunga omunelao.’ (2 Ovakorinto 13:11; 1 Timoteus 1:11) Ombibeli oya popya shi na sha nanghee Kalunga a li e udite eshi oukolokoshi wa li wa hapupala unene, ya ti: “[Okwa] yahama momutima waye.” (Genesis 6:5, 6) Epopyo olo kutya Kalunga oye ha etifa okumona oixuna opo a yeleke ovanhu kali li paushili. Ombibeli oya ti: “Kalunga oku li kokule nouhenakalunga.” (Job 34:10) Ndele otashi dulika u lipule kutya: ‘Ngeenge Kalunga Omushiti omunaenghono adishe, omolwashike a efa okumona oixuna ku twikile?’
Jehova okwa pa ovanhu emanguluko lokuninga omatokolo, naasho otashi ulike kutya ye oKalunga a tya ngahelipi. Mbela otwa lenga ngoo emanguluko olo tu na lokuhoolola onghedi yokukalamwenyo oyo twa hala? Ndele shinyikifa oluhodi, ovanhu vahapu ohava longifa nai emanguluko lavo nohava etele vakwao nosho yo vo vene okumona oixuna. Otwa pumbwa okudiladila moule kepulo olo kutya: Ongahelipi Kalunga ta ka xulifa po okumona oixuna nopehe na okukufa ovanhu emanguluko lavo? Osho otashi ka kundafanwa moshitukulwa tashi landula.
[Omashangelo opedu]
a Opo u mone ouyelele muhapu oo tau ulike kutya Kalunga oko e li, tala okambo The Origin of Life—Five Questions Worth Asking nosho yo embo Is There a Creator Who Cares About You? ya nyanyangidwa kEendombwedi daJehova.
b Tala okambo A Book for All People nosho yo embo The Bible—God’s Word or Man’s? oyo ya nyanyangidwa kEendombwedi daJehova oku ku kwafela u konakone oumbangi oo tau ulike kutya Ombibeli oya nwefwa mo kuKalunga.
[Oshimhungu shi li pepandja 5]
Mbela omalongelokalunga okwe ku tula momalimbililo?
Shinyikifa oluhodi, omalongelokalunga okwa ningifa ovanhu va kale va limbililwa ngeenge oku na ngoo Omuudi womailikano omunalukeno. Eshi omalongelokalunga haa kufa ombinga moita, moukulo nohaa efa ounona tava hepekwa, osha ningifa nokuli novanhu ovo va li ve hole okwiilikana va popye kutya inava itavela muKalunga.
Omolwashike omalongelokalunga luhapu haa ningifa ovanhu va longe owii? Oku shi popya paunafangwa, ovakolokoshi ohava longo owii medina lelongelokalunga. Ombibeli oya xunganeka kutya ovanhu vamwe otave ke litya kutya Ovakriste notava ka longa osho shi li omhinge nehalo laKalunga. Omuyapostoli Paulus okwa li a lombwela ovapashukili Ovakriste a ti: “Munye tamu di yo ovalumenhu tava popi oinima inai yuka, ve lishilile ovalongwa.”— Oilonga 20:29, 30.
Kalunga oku tonde omalongelokalunga oipupulu. Eendjovo daKalunga, Ombibeli, oda popya kutya omalongelokalunga oipupulu oku na ondjo ‘yohonde yaaveshe va dipawa kombada yedu.’ (Ehololo 18:24) Omalongelokalunga oku na ondjo yohonde pataleko laKalunga molwaashi okwa dopa okuhonga ovanhu kombinga yaKalunga kashili, oo ohole oyo oukwatya waye wa tongomana.— 1 Johannes 4:8.
Omuudi womailikano oku uditile onghenda ovanhu ovo tava hepekwa komalongelokalunga. Mafiku, ohole yaKalunga yokuhola ovanhu otai ke mu linyengifa a tokole omalongelokalunga aeshe oipupulu okupitila muJesus. Jesus okwa ti: “Efiku olo vahapu otava ti kuame: Omwene, Omwene, hafye tuu ovo twa xunganekele medina loye? . . . Ndelenee Ame ohandi va lombwele: Inandi mu shiiva nandenande; djeni po puame, onye ovakolokoshi!”— Mateus 7:22, 23.