Februaari

Nikallujuinneq uatsinni “suliamik” qanoq naammassisitsisinnaagami? Misilinneqarnitsinni imaassinnaavoq paasileripput kamagittarnermut, qujamasunnermut asanninnermulluunniit tunngatillugu ‘inorsartugut’. Misilinneqarnitsinnilu pinertusaarutta pissuserineqartussat taakkua ersersinnerunissaat ilikkassavarput, taamaalillutalu kristumiuulluarnerulissaagut. Pinertusaarneq kristumiuulluarnerulissutigisaratsigu misilinneqarnerput unitsinniaannarlugu Jehovap inatsisaa unioqqutikkusunngilarput. Assersuutigalugu kinguaassiuutitigut ajortuliornissamik eqqarsaatikkut akiugaqaruit ussernartumut tunniutiinnaqinak! Eqqarsaatipiluit itigartinnissaannut Jehovamut ikioqqugit. Ilaquttannit akerlilersorneqarpit? Tunniutiinnaqinak! Jehovap kiffartorfigiuarnissaa aalajangiusimajuk. Eqqaamajuk: Guutimit iluarisaassagutta pinertusaartariaqarpugut. – Rom 5:3-5; Jaak 1:12. w16.04 2:15, 16

Jehova isumaqanngilaq inuit arlaat allanit pitsaanerusut. Taassumunnga tamatta naligiippugut. Soorunami Jehovap tamatta assigiinngitsuutilluta pinngortippaatigut, assigiinngitsuunerpullu nuannaarutigisinnaallugulu alutorisinnaavarput. Jehovap kissaatiginngilaa kulturerput sumiginnassagipput. Aammali isumaqaqqunngilaatigut uagut allanit pitsaanerusugut. (Rom 10:12) Nunagisarput inuiaassuserpulluunniit tulluusimaarutigivallaalerlugu allanit pitsaanerusorilissanngilagut. Taamatut misigilerutta kalluunnaveersaartuarnissaq ajornakusoortorujussuanngorsinnaavoq. Kristumiut siulliit nalaanni taama pisoqarpoq. Qatanngutit hebræeriusut ilaasa uillarnerit grækeriusut naapertuilluanngitsumik pisalersimavaat. (ApS 6:1) Taamatut isiginnittaaseqalersimanerluta qanoq paasisinnaavarput? Qatanngutip allamiup arlaannik siunnersorpatit ingerlaannaq ima eqqarsassavit: ‘Uagut ajunnginnerusumik periaaseqarpugut,’ siunnersuutaalu itigartillugu? Taamaappat ullormut allassimaffimmi siunnersuut pitsaasoq eqqaamajuk. w16.04 4:12, 13

Jiisusip “Guutip naalagaaffianik iivangkiiliu” oqaluussissutigaa ajoqersukkanilu aamma taamaaliornissaat piumasaralugu. Kikkut tusarliussaq tamanna tamanut oqaluussissutigaat? (Matt 28:19) Jehovap Nalunaajaasui kisimik! Palasi ajoqersuiartortitaq nunani assigiinngitsorpassuarni najugaqarsimasoq Jehovap Nalunaajaasuisa ilaannut oqaluttuarpoq nunani tikitamini Nalunaajaasut aperisarsimallugit tusarliussaq suna oqaluussissutigisarneraat. Ima oqarpoq: “Tamarmik sianiingaaramik assigiimmik akisarput: ‘Guutip Naalagaaffia pillugu nutaarsiassaq nuannersoq.’” Palasilli oqaasii sianiinnginnitsinnut kristumiutulli ilumoortutut ataasioqatigiinnitsinnut uppernarsaataapput. (1 Kor 1:10) Aamma atuagassiaq Napasuliaq Alapernaarsuiffik Jehovap naalagaaffianik tusarliussisoq Guutip naalagaaffiata pingaaruteqassusianik erseqqissaavoq. Atuagassiaq oqaatsini 254-ini agguaqatigiissillugu qaammatit tamaasa 59 millioninngorlugu naqiterneqartarpoq, nunarsuaq tamakkerlugu atuagassianit allanit tamanit naqiterneqarnerpaatut inissisimalluni! w16.05 2:6

Immaqa pionerinngorusupputit. Inuuninni allannguisimavutit oqaluussinermi piffissaqarnerusinnaaqqullutit. Sulili nalornivutit aningaasaatikinneruleruit pigisakinneruleruillu nalerisimaarsinnaanersutit. Soorunami Biibilimi allassimanngilaq Jehova kiffartorfigiumallugu pioneriusariaqartugut. Aalajaalluta oqaluussisartutut kiffartorfigiuarsinnaavarput. Paarlattuanilli Jiisusi oqarpoq Guutip naalagaaffia pillugu pilliuteqartut Jehovap pilluaqqusarai. (Luk 18:29, 30) Aamma allassimavoq sapinngisarput tamaat Jehova unnersiutigigutsigu taassuma iluarissagaatigut, nuannaarlutalu kiffartorfigissagitsinni kissaatigaa. (Tuss 119:108) Tamakku pillugit qinullutalu eqqarsaatiginneqqissaarutta nammineq atukkatsinnut naleqquttumik Jehovap pilluaqqusinnaasaanik aalajangiisinnaavugut. w16.05 3:13

Kristumiut inersimasut Biibililersaarutinik inuusuttunut paasissutissartalinnik atuarnissartik tunuarsimaarutigissanngilaat. Ajornartorsiutit ilarpassui allaaserisani tamakkunani sammineqartut kristumiunut tamanut tunngapput. Assersuutigalugu tamatta upperisarput illersortariaqarparput, misigissutsivut aquttariaqarpavut, ilagisartakkanik tatineqarneq akiortariaqarparput, sunniutipiloqartunillu peqateqarnaveersaarlutalu aliikkutaqarnaveersaartariaqarpugut. Taamaattumik atuakkat allaaserisallu tamakku inuusuttunut allataagaluartut paasissutissat Biibiliminngaanneerput kristumiunullu tamanut iluaqutaasinnaallutik. Atuakkat allaaserisallu inuusuttunut allataasut inuusuttut Jehovamik ikinnguteqarnerminnik nakussatsitsinissaminnut aamma iluaqutigisinnaavaat. Inersimasuttaarli aamma iluaqutigisinnaavaat. – Oqal 12:13. w16.05 5:15, 16

“Jehova Guuterput Jehova ataasiuvoq.” Oqaatsit kajumissinassusii! Eqqaasitsissut tamanna Israelikkut nunap neriorsuutigisap tiguarnerani ajornartorsiutimik naammagalugit atornissaannut nakussatsissutigaat. Aamma uagut oqaatsit taakku nakussatsissutigalugit annikilliornartussarsuarmi aniguisinnaallutalu Paratiisissami eqqissinermik siuarsaaqataasinnaassaagut. Jehova tunniusimalluinnarfigiuartigu. Taamaaliorsinnaavugut uummatikkut isumakkullu iluunngarluta nukivullu tamakkerlugit Jehova asallugulu kiffartorfigalugu aamma ataasiussuseqarluta qatanngutivut eqqisseqatigiuarumallugit ilungersorluta. Taamaaliortuarutta Jiisusip savatut eqqartuutissavaatigut, oqaasiisalu ukua eqquunnerat takussavarput: “Qaagitsi, ataatama pilluaqqusai, naalagaaffik silarsuup tunngavilerneqarneraniit ilissinnut pisassarititaasoq kingornussarisiuk.” – Matt 25:34. w16.06 3:2, 20

Makitaneq kukkussutitsinnik nassuerutiginninnissatsinnut akornutaasinnaavoq. Taamatut pissuseqartilluta marrartut aqitsutut ikkunnaarsimassaagut. Uppeqammit ajuallatsinneqarnikuuit? Ilagiinni immikkut pisinnaatitaaffeqarunnaarnerit nikalluutiginikuuiuk? Taava suit? Makitaniarpit, imaluunniit uppeqatinnik eqqisseqateqarnissaq Jehovamullu ilumoorfiginnittuarnissaq pingaarnerpaatippigit? (Tuss 119:165; Kol 3:13) Inuk ajortuliortuaannaruni allaallu iliuutsiminik isertuiguni siunnersuutinik Guutimeersunik akueriuminaatsitsisinnaavoq. Taamaakkuni ajortuliornissani ajornannginnerutissavaa. (Oqal 8:11) Qatanngut angut, pornografiinik isiginnaarnermik ileqquliussisimasoq, kingornatigut ima oqarpoq: “Imminut maluginiarpunga utoqqaanertanik isornartorsiueqqajaallunga.” Ileqquni Jehovamut attaveqarluarunnaassutigaa. Ileqquni pillugu allanit paasisaagami utoqqaanertanit ikiorneqalerpoq. Tamatta naammalluinnanngitsuuvugut. Guutili ikioqqulluta isumakkeerfigeqqullutalu saaffiginagu uagutsinnik siunnersuisunik isornartorsiueqqajaalerutta kukkusimanitsinnilluunniit utoqqatsissutissarsiortarutta uummaterput manngertunngulersimassaaq. w16.06 2:5, 6

Jiisusip nalunngilaa ajoqersukkami suna nerissanerlugu, suna imissanerlugu sunalu atissanerlugu isumakuluutigigaat. Jiisusip paasitikkusuppai sooq tamakkuninnga tamanik isumakuluuteqassanngitsut. Nalunngilaa allaat pisariaqartilluinnakkaminnik isumakuluuteqarpallaarunik inuunermi suna pingaarnerusoq puiorsinnaagaat. Jiisusip ajoqersukkani isumassungaaramigit ulorianartoq tamanna pillugu qaqqami oqaluutsimini suli sisamariarluni mianersoqquai. (Matt 6:27, 28, 31, 34) Jiisusip nalunngilaattaaq inuit suut pisariaqartikkaat. Nalunngilaa “ullussani kingullerni” ajoqersukkami piffissaq atugarliungaarfiusoq inuuffigilerumaaraat. (2 Tim 3:1) Ullumikkummi inuppassuit suliffissaqanngillat sunalu tamarmi akitsoraluttuinnarluni. Nunarpassuarni inuit piitsuusorujussuupput nerisassaqalaaginnarlutilluunniit nerisassaqanngivittarput. Jiisusilli aamma nalunngilaa inuuneq nerisassaqarnermit timilu atisassaqarnermit pingaarnerusut. w16.07 1:8, 9

Jehova naalaqqissaarsinnaannginnatsigu taassumannga ajunngisaarfigineqartussaanngikkaluarpugut. Aap, toqusussaagaluarpugut. Kunngi Salomo ima allappoq: “Nunami ima iluassuseqartigisumik inoqanngilaq ajunngitsuliuinnavilluni ajortuliunngisaannarlunilu inuusumik.” (Oqal 7:20) Kingusinnerusukkut apustili Paulusi ima allappoq: ‘Tamarmik ajortuliorput Guutimit naalannassuseq pigiunnaarlugu’ aamma ‘ajortip akissarsiarititaa tassa toqu’. (Rom 3:23; 6:23a) Jehovap inuit asangaaramigit “ernituani” uagut pilluta toqusussatut aallartippaa. Tamanna saammaassilluni iliuusiuvoq annerpaaq. (Joh 3:16) Paulusi allappoq Jiisusi “anniartitaanini toquninilu pissutigalugit ataqqinaammik naalannaammillu niaqoruserneqarsimasoq, tassa toqumik misigisaqarnera Guutip saammaanneratigut tamanut iluaqutaasussaammat”. (Hebr 2:9) Aap, Guutip “saammaannermit tunissutaa tassaavoq inuuneq naassaanngitsoq Kristusi-Jiisusimi Naalakkatsinni”. – Rom 6:23b. w16.07 3:3, 4

Inuit aappanittarnerat nalinginnaavoq. Aappariinnerli qanoq aallartippa? Aappariinnerullu suna siunertaraa? Tamatuminnga ilisimanninneq aappariinnermut eqqortumik isiginnittaaseqarnissatsinnut aappariinnerullu pilluaqqussutissartaanik nuannaarutiginninnerunissatsinnut iluaqutigissavarput. Guutip angut siulleq Adami pinngortippaa uumasunillu taaguusersueqqullugu. Adamip uumasut tamarmik aappaqartut malugaa, “imminulli tulluartumik ikiortissarsinngilaq”. Taamaattumik Guutip Adami itisuumik sinitsippaa, najungasuisalu ilaat tigullugu arnaliorpoq. Jehovap arnaq Adamimukaappaa nuliarilerniassammagu. (1 Mos 2:20-24) Taamaattumik aappariinneq Jehovamit tunissutaavoq. Jehovap naatsiivimmi Edenimi oqaasii Jiisusip ukiorpassuit qaangiummata issuarpai: “Angutip ataatani anaananilu qimassavai nulianilu attavigalugu, taakkulu marluk uininngussapput ataaseq.” (Matt 19:4, 5) Guutip arnaq siulleq Adamip najungasuanik pinngortimmagu aappariit ataqatigiilluinnartussaallutik paasisimassavaat. Jehovap kissaatiginngisaannarpaa uiusoq nuliaasorlu avissasut arlariinnilluunniit ataatsikkut aappaqartoqartassasoq. w16.08 1:1, 2

Jiisusip inuppassuit ataatsimoortut oqaloqatigiinnarnagit inuit ataasiakkaat inussiarnersumik oqaloqatigisarpai. Assersuutigalugu arnaq illoqarfiup Sykarip eqqaani puilasumut imertartoq soqutiginartumik oqaloqatigaa. (Joh 4:5-30) Jiisusip aamma Matthæusi Levi, ilanngaaserisoq, oqaloqatigigamiuk maleqqulluni kajumissaarpaa. Matthæusi akuersivoq kingusinnerusukkullu Jiisusi allallu angerlarsimaffimminut neriartoqqullugit. Tassani Jiisusip inuppassuit oqaloqatigai. (Matt 9:9; Luk 5:27-39) Jiisusip aamma Nathanaeli Nazaretimiut pillugit ajortumik oqaaseqaraluartoq inussiarnersumik oqaluuppaa. Nathanaelip inussiarnersumik oqaluunneqarami Jiisusi, Nazaretimiu, pillugu isummani allanngortippaa. Aamma Nathanaeli Jiisusi pillugu ilinniarnerorusulerpoq. (Joh 1:46-51) Inuit inussiarnersumik oqaluuttarutsigit tusarnaarusunnerulissasut Jiisusip maligassiuineranit ilikkarparput. Oqaluussisartunngorlaat taamatut oqaluttarnissaannik ilinniartikkutsigit oqaluussineq nuannarinerulissavaat. w16.08 4:7-9

Aappariinneq pimoorussassaavoq. Averuserneq ajornartorsiutinut ingasattunut aaqqiissutaasinnaarpasikkaluarluni amerlanertigut ajornartorsiortitsineruliinnartarpoq. Jiisusi aappariinneq pillugu Guutip oqaasii issuariarlugit ima nangippoq: ‘Guutip ataqatigiilersitai inuup avissaartissanngilai.’ (Matt 19:3-6; 1 Mos 2:24) Tassa Jehovap kissaatigaa uiusoq nuliaasorlu aappariittuassasut. (1 Kor 7:39) Tamatta eqqaamasariaqarparput iliuutsivut pillugit Jehovamut akisussaalluta. Tamanna iluaqutigisinnaavarput ajornartorsiutit ajornerulertinnagit aaqqinniapallattarnissaannut. w16.08 2:10, 11

Eqqumaniartuartariaqarpugut. Sooq? Ilimaginngisatsinni sanngiinnitsinniluunniit saassunneqarsinnaagatta. Ajortumut akiuuttuarutta ajugaasinnaavugut! Imminulli illersorunnaarluta akiuukkunnaarutta Saatanip, taassuma silarsuaata sanngiissutittalu ajugaaffigisinnaavaatigut. Taamaattumik tunniutiinnanngisaannarit. Nikalloqinak assatillu sarliaannarnagit! (1 Petr 5:9) Ajugaajumalluta sooq akiuunnerluta eqqaamasariaqarparput. Akiuuppugut Guutimit iluarisaarusullutalu pilluaqquneqarusukkatta. Hebræerit 11:6-imi ima allassimavoq: “[Guutimut] pisup upperisariaqarpaa taanna tassaareersoq ujarlersinilu akissarsisissagai.” Jehovamik ujarlerneq taassumannga iluarisaarusulluni tamaviaarnertut paasisariaqarpoq. – ApS 15:17. w16.09 2:4,5

Guutimut ataqqinaataasumik silatusaartumik aalajangiisarnissamut Biibili iluaqutigaarput. Taamaakkaluartorli atisavut inuttut nuannarisatsinnik ersersitsisarput. Atisalersoriaatsit nuannarisavut atisallu akissaqartitavut allanit allaanerusinnaapput. Atisavulli pikatattuunatik ipiitsuussapput, isornaatsuussapput, pissutsinut naleqqutuussapput illoqarfitsinnilu akuerinartuussallutik. Atisanik isornaatsunik naleqquttunillu pissarsinissaq ajornakusoorsinnaasarpoq. Pisiniarfippassuit taamaallaat atisanik mutinik tuniniaasarput. Taamaattumik atequtinik, kjolenik, tujuuluaqqanik angutinullu assuutinik attuumavallaanngitsunik isornaatsunillu ujarlerneq piffissartornarsinnaallunilu ilungersornarnerusinnaavoq. Qatanngutittali kusanartunik naleqquttunillu atisarsiumalluta iliuuserisavut maluginiartarlugillu qujamasuutigisarpaat. Ataatatsinnik qilammiusumik asannittumik ataqqinarsisitsinerup nalerisimaarnartua iliuuserisanit allanit tamanit nallernissaqanngilaq. w16.09 3:15, 16

Assersuusiornikkut qitornatit takorluuilersissinnaavatit. Tamanna ilinniartitsissutigisavit eqqarsaatiginissaanut, paasilluarnissaanut eqqaamanissaanullu iluaqutigissavaat. Aamma ilinniarnertik nuannarilissavaat. Biibilimi allassimasut tamarmik eqqortuunerannik qitornatit ilinniartinniarlugit assersuusiorsinnaavutit. Assersuutigalugu ullormut allassimaffik atuarsinnaavat. Qitornat oqarfigiinnassanngilat allassimaffimmi paasissutissaq Jehovameersuusoq. Takorluuisinniarluguli ikiussavat. Oqarsinnaavutit Jobip nalaani inuppassuit nunarsuup silaannarsuarmi qangatanera upperinngikkaat. Nalunngilaat sunaluunniit, soorlu arsaq ujarallu, arlaannik tunngaveqartariaqartoq. Taamani qinnguteqaranilu avataarsualiartaateqanngimmat nunarsuup silaannarsuarmi qangatanera uppernarsineqarnikuunngilaq. Qitornavit taamaalilluni paasissavaa Biibilimi allassimasut itsaq allanneqaraluartut Jehovameersuugamik eqqortuujuaannartut. – Neh 9:6. w16.09 5:9, 12

Jehovamut Jiisusimullu upperumalluta uagut pilluta iliuusaat ilisimaannarnagit ilitsersuutaat malillugit inuunissarput qamannga pisumik kissaatigisariaqarparput. Inoqativullu taakku pillugit ilinniarneranni ikiorusungaarpavut. Guutip silarsuassaani nutaami naassaanngitsumik inuuneq nuannaarutigiumallugu uppertariaqarlutalu upperluartuartariaqarpugut. Upperneq naasutut ippoq. Naasoq peqqissuussappat alliartussappallu imertertuartariaqarparput. Naammattumilli imerterneq ajorutsigu toquliulissaaq. Taamatuttaaq uppernitta ‘peqqissuullunilu’ ‘alliartortuarnissaa’ qulakkeertariaqarparput. – Tit 2:2; 2 Th 1:3; Luk 22:32; Hebr 3:12. w16.10 4:4, 5

Danieli ikinngutaalu Babylonimi aallarussaaqqallutik Babylonimiut kulturiannik upperisaannillu akuersinissamut pinngitsaaliniarneqarput. Qanoq? ‘Kaldæerit oqaasiinik’ ilinniartinneqarlutillu Babylonimiutut atserneqarput. (Dan 1:3-7) Danielip atia Belimut, Babylonimi guutit pingaarnersaannut, innersuussutaavoq. Taamaattumik imaassinnaavoq kunngip Nebukadnesarip Danieli isumaqalersinniaraa Babylonimiut guutiat taassuma Guutianit, Jehovamit, pissaaneqarnerusoq. (Dan 4:5) Danieli Babylonimi kunngip nerisartagaanik mamartunik neqeroorfigineqaraluarluni uummammigut “aalajangerpoq” Guutip inatsisai unioqqutinniarnagit. (Dan 1:8) Allakkat Illernartut, hebræerisut allanneqarsimasut, atuaqqissaartuaramigit nunami allami najugaqarnermini Jehovamut attaveqarluartuarpoq. (Dan 9:2) Allaat Babylonimut pinermi kingorna ukiut 70-it missiliorlugit qaangiuttut suli hebræerisut atimigut, Danielitut, ilisimaneqarpoq. – Dan 5:13. w16.10 2:7, 8

1919-imi Jiisusip inussiaq aalajaallunilu silatooq Biibilimi ilinniartitsissutigineqartunik paasinninnissamut maleruaanissamullu tunngatillugu Guutip innuttaanik ikiuisartussatut toqqarpaa. (Matt 24:45-47) Biibilip naalanneratigut ilagiittut minguitsuullutalu eqqisseqatigiittarlutalu ataasiussuseqartarpugut. Imminut ima aperigit: ‘Jiisusi ilumoorfigalugu inussiap aalajaatsup ilitsersuutai malillugit iliuuseqartarpunga?’ Biibilimi paasivarput Jehovap qilammi kiffai aamma aaqqissuussaasut. Assersuutigalugu Ezekielip takorruuinikkut takuaa Jehovap qamutini sukkasuut sumulluunniit piumasaminut ingerlatittarai. (Ez 1:4-28) Qanittukkut Kristusip inngilillu silarsuaq ajortoq suujunnaarsippassuk Jehovamik taassumalu atianik naalakkersueriaasianilluunniit uparuaasoqartarunnaassaaq! w16.11 3:9, 10

Jiisusip ajoqersugai assigalugit ataatsimoortarpugut ilinniartinneqarumalluta kajumissaarneqarumallutalu. (1 Kor 14:31) Allaat ukiorpassuarni Jehovamut kiffartorsimasut kajumissaarneqarnissartik pisariaqartittarpaat. Josva eqqarsaatigiuk. Israelikkut nunamut neriorsuutigisamut isingajalersut Jehovap Josva siulersuisussatut toqqarpaa. Josvalli ukiorpassuarni kiffartorfigisimagaluaraani Jehovap Mosesi taassuminnga ima kajumissaareqquaa: “Josva siulersuisunngortiguk sapiissuseqalersillugu pissatsillugulu! Taassuma Israelikkut siulersorlugit ikaartissavai, nunalu maanna takusassat taakkununnga pissarsiaritissavaa.” (5 Mos 3:27, 28) Inuiaqatigiit sorsoqattaartussaammata allaallu ikinnerpaamik ataasiarlutik ajorsartussaammata Josvap kajumissaarneqarnissani pisariaqartippaa. (Jos 7:1-9) Uaguttaaq utoqqaanertat ilagiinnilu nakkutilliisut, Guutip innuttaanik isumassuiniarlutik tamaviaarlutik kiffartortut, kajumissaarsinnaavavut. – 1 Th 5:12, 13. w16.11 1:12, 13

Biibilimik Atuaqqissaartartut upperisarsiornermik eqqunngitsumik tapersersuiunnaarnermik ilaquttaminnut, ikinngutigilluakkaminnut oqaluffimmullu ilaasortanut oqaatiginissaa naammanngitsoq nalunngilaat. Babylonersuup upperisarsiornikkut atortittartuunera nunarsuaq tamakkerlugu ilisimaneqalissasoq kissaatigaat! Taamaattumik 1917-imi decembarimiit 1918-ip aallartinneranut Biibilimik Atuaqqissaartartut tuusintialuit naqitaaraq “Babylonip uppikaanera”-mik qulequtalimmik allaaserisalik 10 millioninngorlugu aallussilluarlutik agguaappaat. Kristumiuunerartut pillugit ilumoortoq naqitaaqqami qulaarneqarpoq. Takorloorsinnaasattut oqaluffiup siuttui kamangaalerput! Biibilimilli Atuaqqissaartartut qunulernatik oqaluussiuarnissartik ‘Guutillu inunnit naalattariaqarnerunera’ aalajangiusimavaat. (ApS 5:29) Tamanna sumik ersersitsiva? Ersersinneqarpoq sorsunnersuup siulliup nalaani kristumiut angutit arnallu taakku upperisarsiornermit eqqunngitsumit tigusatut aallarussaanatik avissaariartulerlutillu allat tassannga avissaaqqullugit ikioraat. w16.11 5:2, 4

Inuit ilaat isumaqartarput Paulusip kristumiuunngitsut kristumiullu allaatigigai. Matumanili Paulusip kristumiut, ‘illernartooqqullugit qaaqqusaasut’, allaffigai. (Rom 1:7) Taamaattumik “uinik malillugu inuusut” aamma ‘anersaaq malillugu inuusut’ kristumiuupput. Paulusi allappoq: “[Taamani] uinimmiikkallaratta pilerissutsit ajortuliuutaasut inatsisit saqqummersitaasa avativut sunnertarpaat.” (Rom 7:5) Matumani Paulusip nassuiarpaa “uinik malillugu inuusut” tassaasut pilerissusipiluminnik eqqarsaatiginnittuartut piumasaannarmittullu iliortartut. w16.12 2:5, 7

Ilaannikkut inuit siusinnerusukkut kukkussutigisimasatik isumakuluutigisarpaat. Kunngi Daavi ilaannikkut kukkussutini pillugit nikallungangaartarpoq. Ima nassuerpoq: “Uummatima eqqissiveerunneranit nilliavunga.” (Tuss 38:4, 5, 9, 19) Tamatumani Daavip silatusaarluni Jehovap nallittussagaani isumakkeerfigissagaanilu tatigilluinnarpaa. (Tuss 32:2, 3, 5) Immaqa ilaanneeriarlutit pissutsit atukkatit isumakuluutigisarpatit. Assersuutigalugu Daavip Tussiaat 55 allakkamiuk toqutaanissani siooragaa. (Tuss 55:3-6) Isumakulunninili pissutigalugu Jehova tatigiunnaanngilaa. Ajornartorsiutiminut tunngatillugu Jehovamut ikioqqulluni kimigiiseraluarluni Daavip nammineq iliuuseqartariaqarnini pingaaruteqartoq nalunngilaa. (2 Sam 15:30-34) Daavi ilinniarfigisinnaavat. Isumakulunneq pissutigalugu sapilersutut misigilernak ajornartorsiut aaqqinniarlugu sapinngisannik iliuuseqariarlutit Jehovap isumagiumaaraatit tatigiuk. w16.12 3:14, 15

Daavip Jehovap pruffiiti Natani aqqutigalugu naqqiissutaa akueraa. Daavip aamma Jehovamut qinunikkut ajortuliani nassuerutigigamiuk taassumannga iluarisaaqqilerusunnini ersersippaa. (Tuss 51:3-19) Imminut pisuutinnini pissutigalugu sapilersutut misigilernani Daavip kukkussutini ilinniutigai. Ingasattumik ajortuliani iliuusereqqinngisaannarpai. Ukiut arlallit qaangiuttut Jehovamit aalajaatsutut eqqaamaneqarluni toquvoq. (Hebr 11:32-34) Daavi qanoq ilinniarfigisinnaavarput? Ingasattumik ajortuliorutta ilumoorluta peqqissimisariaqarpugut Jehovamullu ajortuliavut nassuerutigeriarlugit isumakkeerfigeqqulluta. (1 Joh 1:9) Aamma utoqqaanertat Jehovamut attaveqarluaqqileqqulluta ikiorsinnaammatigut oqaloqatigisariaqarpavut. (Jaak 5:14-16) Jehovap ikiuinera akuerigutsigu isumakkeerfiginiarluta neriorsuutaa upperalugu ersersissavarput. Tamatuma saniatigut kukkussutivut ilinniutigisariaqarlugillu siunissamut isumalluarluta Jehovamut kiffartortuartariaqarpugut. – Hebr 12:12, 13. w17.01 1:13, 14

Makitasuut qanoq pissuseqarpat? Immaqa utaqqisinnaassuseqannginnamik anneruniartuugamilluunniit pisussaatitaaffiginngisamittut iliuuseqartarput. Tamatta naammalluinnanngitsuugatta ilaannikkut taamaaliortarpugut. Kunngili Sauli pillugu oqaluttuamit ersersinneqartutut tamanna ileqqorilerutsigu Jehovamit iluarisaajunnaassaagut. Tussiaat 119:21 naapertorlugu Jehovap “anneruniartut” avoqqaarisarpai. Sooq? Siullertut, makitalluta iliuuseqarutta Jehova, Guuterput Naalakkersuisorpullu, ataqqinagu ersersissavarput. Aappaattut, pisussaaffiginngisatsitut iliuuseqaraangatta allanik assortuuteqateqalernissarput isumaqatigiinngissuteqalernissarpullu ilimanarnerulissaaq. (Uss 13:10) Pingajuattut, makitalluta iliuuseqarnerput allanit paasineqarpat immaqa kanngusulissaagut. (Luk 14:8, 9) Jehovap anneruniajuitsuunissarput piumasarimmagu paasinarpoq. w17.01 3:4, 5

Adami naammalluinnanngitsunngorami Jehovap pissusiinik tamakkiisumik ilaarsisinnaajunnaarpoq. Adamip qitornani aamma naassaanngitsumik inuunissamut periarfissaqarunnaarsippai. Naammalluinnanngissuseq, ajorti toqulu taamaallaat qitornaminut ingerlateqqissinnaavai. (Rom 5:12) Adami Evalu naammalluinnartunik meerartaarsinnaajunnaarput, aamma qitornaat naammalluinnartunik meerartaarsinnaassanngillat. Saatanip Diaavulup Adami Evalu Guutimut akerlilersuilersikkamigilli inuit tamarmik akerlilersuilersinniarlugit sunnerniartualerpai. (Joh 8:44) Jehovap inuit suli asavai. Adamip Evallu qimakkaluaraanni suli kissaatigaa inuit attaveqarluarfigissagaanni. Taakkuami arlaannaataluunniit toqunissaa kissaatiginngilaa. (2 Petr 3:9) Taamaattumik Guuti inuit ikinngutigileqqinniassammanni ingerlaannaq iliuuseqarpoq. Najoqqutassianilu unioqqutinnagit taamaaliorpoq. – Joh 3:16. w17.02 1:12-14

Jehovap pisarneratut allat ajunngitsortaat isiginiarnerusarutsigit anneruniajuinnerulersinnaavugut. Allanit malugeqqusaarnata imaluunniit allat qanoq iliussanerannik oqarfigisarnagit siunnersoqqulluta aperisassallugillu isumaat akuerisassavavut. Qatanngutivut immikkut ittumik suliassinneqaraangata nuannaartarpugut. Aamma Jehovap tamatta imminut kiffartorsinnaatimmatigut qutsavigisarparput. (1 Petr 5:9) Aamma Jehovatut isiginnittaaseqarneq ilikkarutsigu Guutip iluarisaatut aalajangiisalersinnaavugut. Atuaqqissaartarnitsigut, qinusarnitsigut ilikkakkavullu malillugit iliornitsigut nalunngeqatiginnissuterput nukittunerulissaaq. (1 Tim 1:5) Allat salliunnissaat ilikkartarparput. Taamaaliortarutta Jehovap ilaatigut anneruniajuinnerulernissamut ‘piginnaanngortissavaatigut’. – 1 Petr 5:10. w17.01 4:17, 18

Qatanngutivut tamaasa ataqqisussaavavut. Ingammik ataqqineqartussat tassaapput qatanngutit angutit siulersuisut, soorlu utoqqaanertat, ilagiinnik nakkutilliisut, Immikkoortortaqarfiup Ataatsimiititaliaanut ilaasortat Siulersuisoqatigiinnullu ilaasortat. Tamarmik Guutip innuttaasa pisariaqartitaannik isumaginnittarput Biibilimilu inunnik tunissutaasutut allaatigineqarlutik. (Ef 4:8) Taamaammat inuiaassusiat, ilinniagaqarnerat, inuiaqatigiinni inissisimaffiat aningaasaqarnikkullu atugaqarnerat apeqqutaatinnagit ataqqinninnermik ersersitsivigineqarnissaat pissusissamisoorpoq. Kristumiut siulliit uagutsinnut maligassiuilluarput. Angutit siulersuisut ataqqivaat, soorlu aamma uagut ataqqinnittugut. Angutit taakku peqatigigaangatsigit inngilitut isigineq ajorpavut. Ilungersorlutilli sulinerat maniguunnerallu pillugit ataqqisarpavut. – 2 Kor 1:24; Saqq 19:10. w17.03 1:13

Herodesi Agrippa I, Judæami siulersuisunngortoq, Jiisusimit allaanerulluinnartumik isiginnittaaseqarpoq. Taamaalluni immikkut ittumik ataatsimiinnermi Herodesi kusanaqisunik akisuunillu kunngisut atisalerpoq. Inuit takugamikku tusaagamikkulu ima suaartalerput: “Oqaluttoq guutiuvoq, inuunngilaq!” Herodesip nersorneqarnini nuannaraa. Susoqarpali? Ingerlaannaq Jehovap inngilianit pillarneqarpoq “Guuti ataqqinaatissinngimmagu. Quperlunillu nerineqarpoq toqullunilu.” (ApS 12:21-23) Jehovap Herodesi siulersuisutut toqqarsimanngikkaa ersarippoq. Jiisusilli Guutimit toqqarneqarsimanini uppernarsarlugulu Jehova innuttaminut Siulersuisorsuartut ataqqinarsisittuartarpaa. Jehovap Jiisusi ukiualuinnarni siulersuissasoq kissaatiginngilaa. Jiisusip makititaanermi kingorna ajoqersukkani ima oqarfigai: “Qilammilu nunamilu pissaaneq tamarmi uannut tunniussaavoq.” Imalu nangippoq: “Takuallu, ullut tamaasa najorpassi silarsuup naggatissaanut allaat.” – Matt 28:18-20. w17.02 3:20, 21