Marsi

Jeftap qatanngutaasa taanna sinngagalugulu uumigigamikku nunamit agguagarsiaanit qimaatippaat. (Eqq 11:1-3) Taamaakkaluartoq ikioqqullutik kimigiiserfigimmanni ingerlaannaq ikiorpai. (Eqq 11:4-11) Jeftap Jehovap aqqa pillugu sorsunnissani misigissutsimininngarnit pingaarnerutippaa. Uppernikkut iliuuseqartuarnissani aalajangiusimavaa. Taamatut isiginnittaaseqarami Jehovamit pilluaqqusaavoq Israelikkullu pilluaqqusaatillugit. (Hebr 11:32, 33) Jeftap maligassiaa ilinniarfigerusupparput? Qatanngutitta kristumiut pakatsisippatigut qatanngutitsinnilluunniit ajortumik pineqartutut misigigutta qanoq iliussaagut? Misigissutsikkut annersinneqarsimanerput Jehovamut kiffartorunnaassutigissanngilarput. Kristumiut ataatsimiinnerinut takkutissaanngisaannassaagut ilagiinniittulluunniit ilagissaassanagit. Jehovamut naalannitsigut Jefta ilaartigu. Tamanna unamminiarnartut qaangernissaannut, taamaalillutalu uaguttaaq maligassaalluarsinnaanissatsinnut, iluaqutigissavarput. – Rom 12:20, 21; Kol 3:13. w16.04 1:7, 9, 10

Naggatissaq tikillugu, piffissami aalajangersimasuinnaanngitsumi, pinertusaartariaqarpugut. Umiarsuaq kivilersoq takorlooruk. Ilaasut annakkumallutik nunamut naluttariaqarput. Nalulluni aallartilaaginnarluni uniinnartoq ipilluni toqussaaq. Taamatulli nunamut apuutilivilluni uniinnartoq aamma ipissaaq. Silarsuartaassami inoorusukkutta pinertusaartuartariaqarpugut. Apustilitut Paulusitut isumalluartuusa, taanna ima allappoq: “Nikallunngilagut.” (2 Kor 4:16) Paulusitulli upperilluinnarparput Jehovap naggatissamut pinertusaarnissatsinnut ikiussagaatigut. Paulusi ima allappoq: “Asasitsigut taassumuuna ajugaalluinnaqaagut. Qularinngilluinnarparami toqulluunniit inuunerulluunniit, inngililluunniit pissaaneqaqataasaluunniit, maannakkut ittulluunniit piumaartussalluunniit, pissaanerilluunniit, qutsissulluunniit atsissulluunniit pinngortitalluunniit allat avissaartissinnaanngikkaatigut Guutip asannissusianit Kristusi-Jiisusimi Naalakkatsinni.” – Rom 8:37-39. w16.04 2:17, 18

Kalluunnaveersaartuujuarnissamik ajornartitsisinnaasumik atugaqalissagaluaruit tamatuma paasinissaanut ilisimassusermik Jehova qinnuigiuk. Pissutsillu taamaatsillugit eqqortumik iliuuseqarsinnaaqqullutit Jehovamut ikioqqugit. Jehovamik ilumoorfiginninnerit pissutigalugu parnaarussaasinnaavutit allatulluunniit pillarneqarlutit. Taamaattoqarpat kalluunnaveersaartuunerpit erseqqissumik allanut nassuiarnissaanut sapiissuseqarnissaq qinnutigiuk. Pinertusaarsinnaaqqullutit Jehovap ikiorumaaraatit upperilluinnarsinnaavat. (ApS 4:27-31) Jehovap nakussatsinniarluta Biibili uagutsinnut tunniuppaa. Allassimaffiit kalluunnaveersaartuujuarnissannut iluaqutaasut eqqarsaatigeqqissaakkit. Taakkulu alanngaarsinnaalikkit Biibileerutissagaluaruit iluaqutigissagakkit. Aamma siunissaq pillugu neriuutit Biibilimit nakussatsinneqarsinnaavoq. Malersorneqarnermi pinertusaassagutta Biibilimeersumik neriuuteqartariaqarpugut. (Rom 8:25) Allassimaffiit silarsuartaassami iliuusererusutannut tunngasut toqqakkit tassanilu inuunissat takorloorlugu. w16.04 4:14, 15

Kristumiuunerartut palasiisa Guutip naalagaaffia oqaluussissutiginngilaat. Guutip naalagaaffia pillugu eqqartuigaangamik amerlasuut inuup uummataaniinnerartarpaat. (Luk 17:21) Guutilli naalagaaffiata Jiisusimit kunngiuffigineqarlunilu qilammi naalakkersuiffiviunera ilinniartitsissutigineq ajorpaat, aatsaalli juullip poorskillu nalaanni Jiisusi eqqartornerusarlugu. Guutip naalagaaffiata inuit ajornartorsiutaannut tamanut aaqqiissutissatuaanera nunarsuarmilu ajussutsimik tamanik piuneerutsitsisussaanera nassuiarneq ajorpaat. (Saqq 19:11-21) Erserpoq Jiisusip Guutip naalagaaffiani kunngisut iliuusissai kristumiuunerartut siuttuisa ilisimanngikkaat. Jiisusip ajoqersugai aningaasarsiornissartik kusanartunilluunniit illorsualiornissartik kajumississutigalugit oqaluussissutiginnittussaanngillat. Oqaluussineq niuerniutaanngilaq. (2 Kor 2:17) Jiisusip ajoqersugaasa oqaluussinertik aningaasarsiutiginiartussaanngilaat. – ApS 20:33-35. w16.05 2:7, 8

Immaqa atisalersoriaaseq aalajangersimasoq torragaat, nalunngilalli taamatut atisaqaruit ilagiinniittut ilaasa narrujuummissutigisinnaagaat. Atisalersoriaaseq tamanna pillugu Biibilimi allassimasoqanngilaq. Taava Jehova qanoq isumaqarnersoq qanoq nalunngissinnaaviuk? Biibilimi allassimavoq “arnat isornaatsunik perroorniutaanngitsunillu atisaqassasut, nutsat eqqumiikajaamik kusassagaasut, kuultit sapanngallu atisalluunniit akisuut pinnagit, ajunngitsuliornerilli arnanut Guutimik mianerinninnerminnik nassuerutiginnittunut naleqquttut pinnersaatigalugit”. (1 Tim 2:9, 10) Soorunami tamatuma ilinniutissartaa Jehovap kiffaanut tamanut, aamma angutinut, atuuppoq. Imminuinnaq eqqarsaatiginngikkutta atisalersoriaatsitsinnut tunngatillugu inuit allat qanoq misigisimasinnaanersut eqqarsaatigisassavarput. Qatanngutivummi asagatsigit ajuallatsinnaveersaartarpavut. – 1 Kor 10:23; Fil 3:17. w16.05 3:14

Adami Pinngortitsisiminut pikitsitsigami Guutimut erniujunnaarpoq. Adamilli kinguaarpassuisa Jehova Naalakkamissut toqqarpaat. (Hebr 12:1) Pinngortitsisiminnut maniguullutik naalannermikkut ersersippaat taanna, Saatani pinnagu, Ataatamissut Marriortussamissullu toqqarsimallugu. (Joh 8:44) Guutimut ilumoorfiginnittut taakku ullormut allassimaffimmi allassimasutut isiginnittaaseqarput. Ullumikkut Jehovamik pallorfiginnittut ilumoortut sapinngisartik tamaat taamatorpiaq maniguullutillu naalanniartuupput. Jehova Ataatamissut taassallugu ataqqinaataatippaat Marriortussamissullu kissaatigalugu. Immersakkatut akimasutullusooq ilersinnaajumalluta marrartut aqitsutut Guutimit ilusilersortikkusuppugut? Qatanngutivut immikkut tamarmik suliatullusooq ineriartortutut, tassa Guutimit suli ilusilersorneqartutut, isigaavut? w16.06 1:2, 3

Silarsuassap nutaap tikiutingajalernerani inuugatta aamma uagut uppernerput misilinneqarpoq. Taamaattumik uppernermiinnerluta imminut misissortariaqarpugut. Upperluartuunerluta qanoq qulakkeersinnaavarput? Jiisusip oqaasiinut Matthæusip iivangkiiliuani 6:33-mi allassimasunut isiginnittaaserput misissorsinnaavarput. Imminut ima aperigit: ‘Anguniakkama aalajangertakkamalu uppernarsarpaat Jiisusip oqaasii ilumut upperigikka? Aningaasarsiornerorusullunga ataatsimiinnerit oqaluussisarnerillu peqataaffiginngitsoorusuppakka? Suliffiga piffissartornarnerulerpat nukinnillu atuinarnerulerpat qanoq iliussaanga? Silarsuarmit matumannga ilusilersorneqarumavunga immaqalu allaat Jehova kiffartorfigiunnaarlugu?’ Biibilimi ikinngutipalaaqarneq, ilaajunnaarsitaaneq imaluunniit aliikkutaqarneq pillugit allassimasut maleruanngikkutsigit uummaterput manngertissinnaavoq. Malugilerukku taamaalilerlutit qanoq iliussavit? Uppernerit nalilersortariaqarpat! Imminut ilumoorfigigit Guutillu oqaasiata atuaqqissaarneratigut eqqarsartariaatsit allanngortillugu. w16.06 2:8, 9

Nunarsuarmi peqatigiissortaqarpoq immikkut ittunik, peqatigiissortallu taakkua Jehova asallugulu kiffartorfigerusuppaat. Taakku tassaapput Jehovap Nalunaajaasui. Kukkussuteqartaraluartut Jehovap anersaani illernartoq atorlugu siulersorpai. 1914-imi inuit Jehovamik pallorfiginnittut ikittuararsuupput. Taakkuali oqaluussinerat Jehovap pilluaqquaa. Tamatuma kingunerisaanik inuit millionillit sallusuissut Biibilimeersoq paasisimavaat Nalunaajaasunngorsimallutillu. Amerliartupiloorsimaneq tamanna Jehovap ullormut matumunnga allassimaffimmi oqaatigaa. Imalu nangippoq: “Uanga tassa Naalagaq; piffissanngorpat pilertortumik tamanna naammassissavara.” Ullumikkut erseqqippoq siulittuut tamanna eqquussimasoq. Jehovap innuttai inuiassuartut ipput. Aap, Jehovap Nalunaajaasui nunarsuarmi inuiaat amerlasuut innuttaannit amerlanerupput. w16.06 4:1, 2

Jiisusip qularutiginngilluinnarpaa Ataatami timmiaaqqat isumagisinnaagunigit aamma inuit isumagisinnaassagai. (1 Petr 5:6, 7) Kisianni timmissatulli eqiasuitsuusariaqarpugut. Nerisassatsinnik naatitsiniarluta pisiniutissaqarniarlutalu sulisariaqarpugut. Jehovap ilungersornivut pilluaqqusinnaavai. Naammattunik aningaasaateqanngikkaluarutta nerisassaqanngikkaluaruttaluunniit pisariaqartitatsinnik tunisarsinnaavaatigut. Assersuutigalugu allat uagutsinnik avitseqatiginnissinnaapput. Aamma Jehovap timmissat inissaannik isumagisarpai. Ulluliorsinnaatippai, ulluliornissaannullu atortussaqartippai. Taamatuttaaq aamma uagut ilaqutariittut najugassaqarnissatsinnik ikiorsinnaavaatigut. Jiisusip ullormut allassimaffimmi allassimasut oqaatigigamigit eqqarsaatigigunarpaa inuit tamaasa pillugit ungasinngitsukkut inuunini tunniutissallugu. (Luk 12:6, 7 naleqqiuguk). Aap, Jiisusi timmiaaqqat pillugit toqunngilaq uagulli naassaanngitsumik inuusinnaaniassagatta toquvoq. – Matt 20:28. w16.07 1:11-13

Sooq ajortiliullutalu toqusarpugut? Biibilimi allassimavoq ‘inuup ataatsip unioqqutitsinera pissutigalugu toqu naalagaalersoq’. Tassa Adamip kinguaarimmatigut naammalluinnanngitsuullutalu toqusarpugut. (Rom 5:12, 14, 17) Taamaakkaluartoq ajorti naalagariunnaarniarlugu, tassa taassumannga aqunneqarunnaarniarluta, aalajangersinnaavugut. Qanoq taamaaliortoqarsinnaagami? Kristusip utertitsissutitut pilliutaa upperigutsigu Jehovap saammaassinera iluaqutigissavarput. (Rom 5:20, 21) Sulili ajortiliugaluarluta ajorti uagutsinnut naalagaatittariaqanngilarput. Taamaattumik ajortulioraangatta Jehovamut isumakkeerfigeqqusarpugut. Taavami Guutip saammaannera qanoq iluaqutigisinnaavarput? Paulusi ima nassuiaavoq: ‘Guutip saammaanneratigut perorsarneqarpugut naaggaarsinnaassalluta iluaatsuussusermut silarsuarmiullu kajungerisaannut, silatusaarluta peqqusersuillutalu Guutimillu mianerinnittuulluta silarsuarmi matumani inuusinnaaqqulluta.’ – Tit 2:11, 12. w16.07 3:5, 6

Aappariit siulliit Adami Evalu Jehovamut naalanngikkamik aappariinnerliulerput. ‘Pulateriaarsutoqqap’, Saatanip Diaavulup, Eva nakutippaa oqarluni ‘orpiup ajunngitsumik ajortumillu ilisimalersitsisup’ paarnaanik nerineq immikkut ittumik ilisimasaqalissutigissagaa. Saatani oqarpoq Evap orpik neriffigiguniuk suna ajunngitsuunersoq sunalu ajortuunersoq nammineq nalilersinnaalissagaa. Evap Adami isumasioqqaarnagu paarnamik neriniarluni aalajangerami taanna ittuusutut ataqqinngilaa. Adamilu nuliani akueralugu paarnamik nerigami Guutimut naalanngippoq. (Saqq 12:9; 1 Mos 2:9, 16, 17; 3:1-6) Jehovap nassuiaaqqummatik Adamip nuliani pisuutippaa. Evallu pulateriaarsuk ussiisoq pisuutippaa. (1 Mos 3:12, 13) Adami Evalu naalannginnertik pillugu utoqqatsissutipalaaqarput, Jehovallu pikitsitsisut taakku eqqartuuppai. Aap, maligassiuinerlunnerat uagutsinnut mianersoqqussutaavoq! Aappariilluartoqassaguni uiusup nuliaasullu Jehova naalattariaqarlugulu iliuutsitik pillugit allat pisuutinnagit nammineq akisussaaffigisariaqarpaat. w16.08 1:1, 4, 5

Sooq aappariit ilaat ingasattumik ajornartorsiorpat? Ilaat aappariinnermut neriuutigisamittut misiginnginnamik pakatseqqapput kamassaqarlutilluunniit. Amerlanertigut ajornartorsiutit aappariit peroriartornermut tunngasutigut misigissutsikkulluunniit qisuariartarnermikkut assigiinnginnerannit pissuteqartarput. Aamma sakikkut, aningaasat qanoq atornissaat qitornanillu perorsaaneq pillugit isumaqatigiinngissutit ajornartorsiortitsilersinnaapput. Aappariilli kristumiut amerlanerit Guutimit siulersortikkamik ajornartorsiutitik aaqqissinnaasaraat takullugu nuannerpoq. Ingasattumik ajornartorsiuteqartillugu aappariit utoqqaanertanut ikiortissarsiortariaqarput. Angutit misilittagaqarluartut taakkua aappariit Guutip siunnersuutaanik maleruaasinnaaqqullugit ikiorsinnaavaat. Aappariillu anersaaq illernartoq Jehovamut qinnutigigaangamikku Biibilimi najoqqutassianik maleruaanissaminnut kristumiutullu pissuserineqartussanik ersersitsinissaminnut iluaqutigisinnaavaat. – Gal 5:22, 23. w16.08 2:11-13

Jiisusip ulapikkaluarluni inuit tusarnaarusuttut piffissaqarfigisarlugillu assigiinngitsorpassuarnik ilinniartittarpai. Assersuutigalugu inuppassuit taamaallutik tasersuup sinaani tusarnaarumallutik katersuummata Petrusip umiatsiaanut ikeriarluni Jiisusip ajoqersulerpai. Tamatuma kingorna Petrusi aamma ilinniartinniarlugu aalisagarpassuarnik tupinnartuliornikkut pisaqartereerlugu ullormut matumunnga allassimaffimmi allassimasutut oqarfigaa. Petrusip ilagisaasalu ingerlaannaq ‘tamaasa qimallugit [Jiisusi] malippaat’. (Luk 5:1-11). Aamma Nikodemusi Jiisusimit ilikkagaqarnerorusuppoq. Killisiuisoqatigiinnulli ilaasortaagami Jiisusimik oqaloqateqarnini pillugu inuit qanoq oqassanersut annilaanngatigigamiuk Jiisusi unnuakkut pulaarpaa. Jiisusip ingerlaannaq taanna anisinnagu piffissaqarfigalugu sallusuissutinik pingaarutilinnik ilinniartippaa. (Joh 3:1, 2) Jiisusip inuit sallusuissummik ilinniartikkumallugit uppernikkullu nakussatsikkumallugit piffissaqarfigisarpai. Uaguttaaq inuit piffissaqarluartillugit alakkarusullugillu Biibilimik paasinninnissamik ikiorniarlugit piffissaqarfigisarpavut. w16.08 4:10, 11

Maniguulluta nassuerutigaarput Jehova minguillunilu illernartuummat taassuma najoqqutassiaanik maleruaaneq uagutsinnut pitsaanerujuaannartoq. Maniguukkusukkutta najoqqutassiai inuunitsinni maleruassavavut. Aamma maniguukkutta allat misigissusii isumaallu ataqqissavavut. Atisalersoriaatsitsigut Jehovamut kiffaanerput takuneqarsinnaasariaqarpoq. Jehovap najoqqutassiai qutsissut maleruassallugit nuannaraarput. Qatannguterpassuit isikkorissartarnertik pissuserissaarnertillu pillugu nersualaarneqartariaqarput. Tamanna inuit eqqortuliorusuttut Biibilip tusarliussaanut annassutaasinnaasumut kajungilissutigisarlugulu Jehovamut ataqqinaataallunilu nuannaarutaasarpoq. w16.09 3:18-20

Jaaku aalajangersimalluinnarpoq, pilluaqquneqarumallunilu tamaviaarpoq! (1 Mos 32:25-27) Jehovap Jaaku pinertusaarmat pilluaqquaa Israelimillu, ‘Guutimut akiuuttumik’ isumalimmik, atserlugu. Jaakup Jehovamit iluarisaaneq pilluaqquneqarnerlu akissarsiarai, uaguttaaq taamatut akissarserusuppugut. Jaakup nuliata asangaagaata, Rakelip, uiminut Jehovap neriorsuutaa qanoq eqquutissanersoq paaserusungaarpaa. Rakelili ernisuitsuuvoq. Biibilip nalaani tamanna arnanut erloqissutaangaartarpoq. Rakeli erloqigaluarluni qanoq pinertusaarpa? Neriuttuarlunilu Jehovamut akulikinnerusumik qinusalerpoq. Ilumoorluni qinnutai Jehovap tusaramigit Rakeli meeqqanik pilluaqquaa. – 1 Mos 30:8, 20-24. w16.09 2:6, 7

Qitornavit aatsaat Biibilimi allassimasunik maleruaanikkut pilluarsinnaanerannik ilinniartinnissaat pingaaruteqarpoq. (Tuss 1:1-3) Assersuutigalugu qitornatit qeqertamut nuuttussaallutik kikkut ilagissanerlugit namminneq aalajangertussaallugu inunnik qanoq ittunik ilagisaqarusussanersut aperisinnaavatit. Taava Galatiamiut 5:19-23 atuarsinnaavatit Jehovap silarsuassami nutaami inuit qanoq ittut inuussasut kissaatigigaa takutinniarlugu. Taamaalillutit qitornatit marlunnik pingaarutilinnik ilinniartissavatit. Siullertut, pillualeqqulluta allanillu eqqisseqateqaqqulluta Jehovap ilinniartittarpaatigut. Aappaattut, silarsuassami nutaami inuunermut piareersarluta ilinniartippaatigut. (Es 54:13; Joh 17:3) Aamma qatanngutitta Biibili qanoq iluaqutigisimaneraat qitornannut oqaluttuarisinnaavat. Assersuutigalugu Biibililersaarutitsinni misigisalikkersaarutit, soorlu Napasuliaq Alapernaarsuiffik-mi allaaserisat “Biibili inuit inuunerannik allannguisitsisarpoq”, takutissinnaavatit. w16.09 5:13, 14

Ulapittaraluarluta tamatta nammineq ilaqutariittullu atuaqqissaarnissamut piffissaqartariaqarpugut. (Ef 5:15) Quppernerpassuarnik atuarnissarput ataatsimiinnermilu akinissamut piareersarnissarput kisiisa anguniagarinagit uppernerput nakussatsinniarlugu Guutip oqaasianit killitsinnissarput anguniagarisariaqarparput. Oqimaaqatigiissumik isiginnittaaseqartariaqarpugut. Atuaqqissaaraangatta allat pisariaqartitaat eqqarsaatigiinnarnagit nammineq pisariaqartitavut eqqarsaatigisariaqarpavut. (Fil 1:9, 10) Paasisariaqarparput ataatsimiinnermut, oqaluussinermut oqalugiarnissamulluunniit piareersaraangatta ilaannikkut atuakkavut nakussatsissutigineq ajoratsigit. Assersuutigalugu igasup iganermini nerisassiat ussillattaartaraluarlugit inuussutigisinnaanngilai. Peqqissoorusukkuni imminut peqqinnartunik iggattariaqarpoq. Taamatuttaaq Jehovamut attaveqarnerput nakussatsikkumallugu akulikitsumik Biibilimik atuaqqissaartariaqarpugut. Taamatut itisiliilluni atuaqqissaarneq pisariaqartitatsinnik matussusiisarpoq. w16.10 2:10, 11

Hebræerit 11:1-imi upperneq nassuiarneqarpoq. (1) Upperneq tassaavoq “neriugisamik tatiginnilluinnarneq”. Guutip siunissamut neriorsuutai neriugisatta ilagaat. Assersuutigalugu ajussuseqarunnaarnissaa silarsuullu nutaap pilersinneqarnissaa qularinngilluinnarpavut. (2) Upperneq tassaavoq “takunngisamik qularuteqannginneq”. Jehova Guuti, Jiisusi Kristusi, inngilit qilammilu Naalagaaffik takusinnaanngikkaluarlugit piviusuusut nalunngilarput. Guutip neriorsuutai takusinnaanngisavut upperilluinnarlugit qanoq ersersissinnaavarput? Taamaaliorsinnaavugut inooriaatsitsigut oqaloriaatsitsigullu. w16.10 4:6

Jehovap Jiisusillu Naalagaaffimmut attuumassuteqartut pillugit allaat kissaatigisatsitut iliuuseqartigisinnaanngikkaluarluta iliuutsivut nuannarisarpaat. (Luk 21:1-4; 2 Kor 8:12) Assersuutigalugu utoqqartatta asasatta ataatsimiigiarumallutik akulikitsumillu oqaluussiumallutik iliuuseqangaartariaqarnerat nalunngilarput. Iliuuserisaat pillugit qiimmassartarlugillu nersualaartarpavut? Sapinngisamik allat kajumissaarniartakkit. Kinaluunniit ajunngitsuliortoq nersualaartaruk. Paulusi Barnabalu Antiokiami Pisidiamiittumi synagogimi pisortanit ima oqarfigineqarput: ‘Angutit qatanngutivut ukorsii, inuit kajumissaarneqaatissaannik oqaasissaqarussi oqarniaritsi.’ (tastamantitâĸ) Paulusip periarfissaq tamanna allanik kajumissaarinissamut atorpaa. (ApS 13:13-16, 42-44) Ilimanarpoq allat kajumissaarutsigit kajumissaassagaatigut. – Luk 6:38. w16.11 1:3, 15, 16

Jehovap peqatigiissortaanut ilaasinnaanerput Guutillu piumasaanik ilisimanninnerput immikkut pisinnaatitaaffiupput. Soorunami Guuti qanoq nuannaartissinnaallugu nalunnginnatsigu naalannissaq eqqortuliornissarlu akisussaaffigaavut. Inuppassuillu ajortuliortaraluartut Jehovap peqqusineratut ‘ajortoq uumigisariaqarparput’. (Tuss 97:10) “Ajortumik ajunnginneraasut ajunngitsumillu ajorneraasut” assigilinngisaannassavavut. (Es 5:20) Jehovamit iluarisaarusukkatta sutigut tamatigut minguitsoorusuppugut. (1 Kor 6:9-11) Biibilimi Jehovap peqqussutai tamarmik uagutsinnut iluaqutaapput. Taanna asallugulu ilumoorfigerusukkatsigu ilitsersuutai angerlarsimaffitsinni, ilagiinni, suliffitsinni, atuarfitsinni sumiluunniillu malikkusuppavut. w16.11 3:13

Biibilimik Atuaqqissaartartut eqqortuliorusupput. Ukiulli 1914-ip 1919-illu nalaanni Jehovap naalakkersuisunut naalatsigitinnissaq pillugu oqaasii paasilluannginnamikkit minguiarneqartariaqarput. Eqimattatut isigalugit sorsunnermut ilaannikkut akuusarput. Assersuutigalugu USA-mi præsidentip innuttani peqqummagit 1918-imi maajip 30-anni eqqisseqatigiittoqarnissaa pillugu qinussasut Napasuliaq Alapernaarsuiffik-mi Biibilimik Atuaqqissaartartut taamaaliornissamut kajumissaarneqarput. Qatanngutit ilaat aningaasanik sorsunnermut tapersiipput allaallu amerlanngitsut sakkutuunngoriarlutik sorsugiarlutik. Sorsunnersuulli siulliup nalaani upperisarsiornerup eqqunngitsup naalagaaffissuanit avissaariartulereersimagamik minguiarneqartariaqarnertik pissutigalugu Babylonersuarmit tigusaasariaqartutut isigigutsigit kukkunerussaaq. – Luk 12:47, 48. w16.11 5:9

Sooq Paulusip kristumiut tanitat ‘uinik malillugu inuuneq’ pillugu mianersoqquai? Aamma sooq nalitsinni kristumiut mianersoqqussut taanna eqqarsaatigisariaqarpaat? Guutimut kiffartortup aalajaatsup kialuunniit pilerissutsini inuunermini pingaarnerpaatilersinnaagamigit. Assersuutigalugu Paulusi allappoq Romami qatanngutit ilaasa kajungerisatik ‘kiffartorfigigaat’. Taamatut allannermigut atoqatigiinnermik, nerinermik allanilluunniit inuunerminni pingaarnerpaatitsilernerat pisimasinnaavaa. (Rom 16:17, 18; Fil 3:18, 19; Jud 4, 8, 12) Aamma piffissap ilaani Korinthimi ilagiinni qatanngut angut ‘ataatami nulia inooqatigalugu’ kinguaassiuutitigut inuunerluttarpoq. (1 Kor 5:1) Kristumiut ‘uinik malillugu inuuneq’ pillugu Paulusimit mianersoqquneqartariaqarnerat paasinarpoq. (Rom 8:5, 6) Mianersoqqussut taanna aamma nalitsinni atuuppoq. w16.12 2:5, 8, 9

Tatigisamik isertuarnani unneqqarissumillu oqaloqateqarneq isumakulunninni iluaqutigisinnaavat. Aappavit, ikinngutigilluakkavit ilagiinniluunniit utoqqaanertap isumakuluutigisannik paasinnilluaqqullutit ikiorsinnaavaatit. Biibilimi aamma ima allassimavoq: “Isumalioqatigiittoqanngikkaangat pilersaarutit asuliinnartarput, amerlasuunilli siunnersuisoqarsimagaangat iluatsittarput.” (Uss 15:22) Ilagiit ataatsimiittarneri isumakuluppallaannginnissamut aamma iluaqutigisarpavut. Sapaatit-akunneri tamaasa ataatsimiinnerni qatanngutitit ilinnik isumassuisut kajumissaarerusuttullu peqatigisarpatit. (Hebr 10:24, 25) Taamatut ‘kajumissaaqatigiinneq’ nakussatsissutigissallugulu eqqississutigissavat. – Rom 1:12. w16.12 3:17, 18

Peqqiilliuuteqaraangatta arlaannilluunniit allanngortissinnaanngisatsinnik atugaqaraangatta isumakuluutivut Jehovamut pisittarpavut isumassorumaaraatigullu tatigisarlutigu. (1 Petr 5:6, 7) Aamma kristumiut ataatsimiittarneri aaqqissuussallu allat Jehovap peqatigiissortaaneersut iluaqutiginiarlugit sapinngisatsinnik iliuuseqartarpugut. (Hebr 10:24, 25) Angajoqqaammi aalajaatsut Jehovamut kiffartorunnaarsimasunik qitornallit? Pruffiitip Samuelip ernini inersimasut Guutimik ilumoorfiginneqqullugit pinngitsaalisinnaanngilai. (1 Sam 8:1-3) Pisut Jehovap assaanut tunniuttariaqarpai. Samuelili Guuti ilumoorfigiuarniarlugu Ataatanilu qilammiusoq nuannaartinniarlugu sapinngisaminik iliuuseqarpoq. (Uss 27:11) Nalitsinni kristumiut angajoqqaat tamatumunnga assingusumik atugaqarput. Jehovap ajortuliortut peqqissimisut tikilluaqqoqqinnissaannut piareersimajuaannarnera tatigaat. (Luk 15:20) Taamatut pisoqarserlugu angajoqqaat Jehovap ilumoorfiginissaa eqqarsaatiginerusarpaat maligassiuinertillu qitornaasup Jehovamut uternissamut kajumississutigissagaa neriuutigalugu. w17.01 1:15, 16

Inuk maniguuttoq amerlanertigut anneruniajuitsuusarpoq. Maniguulluni pisinnaasami killeqarnerat kukkussutinilu nassuerutigisarpai. Allat isumaat tusarnaarusuttarlugillu ilinniarfigerusuttarpai. Inuk maniguuttoq Jehovamit iluarineqangaartarpoq. Inuup anneruniajuitsup imminut ilisimalluarnera aalajangersimasunillu iliuuseqarsinnaannginnerminik iliuuseqarsinnaatitaannginnerminillu nassuerutiginnittarnera Biibilimit ersersinneqarpoq. Tamanna allanut ataqqinninnissamut inussiarnernissaminullu iluaqutigisarpaa. Sianiginngisatsinnilli makitasuutut eqqarsalersinnaavugut. Qanoq? Immaqa ilagiinni aalajangersimasunik akisussaaffeqaratta imaluunniit ilisarisimalluakkavut akisussaaffeqarmata allanit pingaarnerusutut misigilersinnaavugut. (Rom 12:16) Imaluunniit allanit maluginiaqqulersinnaavugut. (1 Tim 2:9, 10) Allaat allat qanoq iliortariaqarnersut iliussannginnersulluunniit oqarfigisalersinnaavavut. – 1 Kor 4:6. w17.01 3:6-8

Nalitsinni oqaluussineq annertusiartuinnarmat sapinngisamik amerlanerpaat nutaarsiassamik nuannersumik tusarlerniarlugit atortorissaarutit nutaaliat Jehovap peqatigiissortaani atorneqartarput. Ilaannikkulli periutsit nutaat ilinniarnissaat utoqqaanerusut sapernartissinnaasarpaat. (Luk 5:39) Aamma inuit utoqqaliartornerminni pisinnaasaat annikilliartortarput. Taamaattumik Jehovap peqatigiissortaani akisussaaffeqarnerulernissamut tunngatillugu utoqqaanerusut inuusunnerusunik ilinniartitsisarnerat asannittuliornerullunilu pissusissamisoorpoq. (Tuss 71:18) Oqartussaassusillit inuusunnerusunut akisussaaffimmik ingerlatitseqqiinissartik sapernartissinnaasarpaat. Qatanngutit angutit suliap nuannarilluinnakkamik isumagiunnaarnissaa aliasuutigisarsinnaavaat. Imaluunniit suliaq nakkutigiunnaarunikku eqqortumik isumagineqarunnaarnissaa isumakuluutigisinnaavaat. Immaqa allanik ilinniartitsinissamut piffissaqanngitsutut misigipput. Tamatumalu saniatigut angutit inuusunnerusut annerusumik akisussaaffilerneqanngikkunik erinitsajuittariaqarput. w17.01 5:3, 4

Jiisusi inunngorami Adamitut naammalluinnartuuvoq. (Joh 1:14) Adamili assiginagu Jehovap najoqqutassiat inummut naammalluinnartumut maleruaqqusai Jiisusip malippai. Allaat sakkortunerpaamik misilinneqarnermi Guutip inatsisai unioqqutinngisaannarpai. Jiisusip inuttut naammalluinnartutut toqunermigut inuit ajortimit toqumillu annaassinnaavai. Adami naammalluinnartoq assiginagu Jiisusip Guuti ilumoorfigilluinnarlugulu naalalluinnarpaa. (1 Tim 2:6) Uagut pilluta toquvoq, pilliutaalu angutit, arnat meeqqallu tamarmik naassaanngitsumik inuunissamut periarfissaqalissutigaat. (Matt 20:28) Utertitsissut Guutip siunertaata eqquunnissaanut pingaaruteqarluinnarpoq. – 2 Kor 1:19, 20. w17.02 1:15, 16

Takorlooriaruk sullorsuakkut takisoorujussuakkut taartuinnaasukkut pisuttariaqartutit. Immaqa eqqarsarputit qaamaneq takoqqissallugu. Inuuneq angalanertut taamaattutut issinnaavoq. Imaassinnaavoq ajornartorsiutitit artorsaatigalugit taarsiortutut misigisutit. Aamma Jiisusi taamatut misigisimasinnaavoq. Nappakkami anniartitaaffimmi toqutaalerluni mitaatigineqarpoq anniangaarlunilu. Inuunerani tamanna artornarnerpaasimassaaq! (Hebr 12:3) Taamaakkaluartoq pinertusaarpoq. Jiisusip pinertusaarnermi akissarsiassartai eqqarsaatigai, tassa Jehovap aqqanik illernarsisitseqataanissani taassumalu kisimi oqartussaanerata eqqortuuneranik uppernarsaaqataanissani pingaarnerpaatippai. Nalunngilaa misilinneqarnini qaangiutissasoq qilammilu akissarsiassani naassaanngitsumik atasussaasoq. Ullumikkut misilinneqarninni artukkerluinnarneqartutut misigisinnaavutit, qaangiukkumaartorli eqqaamajuk. w16.04 2:10

Ullumikkut inuppassuit ajortulioraangamik ilerasunneq ajorput, taamaattumik inuit utertitsissummik pisariaqartitsinerat paasisinnaanngilaat. Paasinngilaat ajorti suunersoq, ajortip qanoq sunnertarneraatigut tamatumanngalu inussiaataajunnaarumalluta qanoq iliortariaqartugut. Inuit eqqortuliorusuttut qujamasuttarput ajortimit toqumillu aniguisinniarluta Jehovap erni nunarsuarmut aallartissimagaa paasigaangamikku. Jehovap asanningaarnini saammaanninilu pissutigalugit taamaaliorpoq. (1 Joh 4:9, 10) Kristusip utertitsissutitut pilliutaa Guutip uagutsinnik asanninneranut uppernarsaataavoq annerpaaq saammaanneranullu angingaartumut ersiutaalluni. Jiisusip pilliutaanik upperinninnikkut ajortitsinnik isumakkeerfigineqarlutalu ilerasuutaarussinnaasugut paasillugu oqiliallannaqaaq! (Hebr 9:14) Ilumut nutaarsiassaavoq nuannersoq allanut oqaluttuarineqartussaq! w16.07 4:6, 7

Jehovap utertitsissummik upperinninnerput tunngavigalugu ajortitta ‘piiarneqarnissaannik’ neriorsorpaatigut. Ajortitsinnik isumakkeerfigilluinnarsinnaavaatigut. (ApS 3:19-21) Utertitsissut tunngavigalugu Jehovap inuit ilaat, tanitat, qilammi ernerilersinnaanngorpai. (Rom 8:15-17) ‘Savanullu allanut’ ilaasut Jehovap ilaquttaminut nunarsuarmiittunut ilannguteqqullugit kajumissaarpai. Taakku naammalluinnartunngoreerunik naggammik misilinneqassapput. Imminik ilumoorfiginnippata Jehovap aamma taakku qitornavissiartaarissavai. (Rom 8:20, 21; Saqq 20:7-9) Jehovap qitornani tamaasa asajuassavai. Utertitsissutip iluaqutissartai naassaanngitsumik atassapput. Jehovap tunissummik tamatuminnga erlinnangaartumik tunivaatigut, tamatuminngalu kimilluunniit arsaarneqarsinnaanngilagut. w17.02 2:15, 16

Jehovap imminut kajungilersikkamisit nalunngereerpaa kukkussuteqartarlutillu sanngiissuteqartutit sulilu kukkusassasutit. Taamaakkaluartoq Jehovap ikinngutigerusuppaatit. Jehovap asangaaramisigut erlinnangaartumik tunivaatigut. Erni nunarsuarmut aallartippaa Jiisusip inuunini ajortitta utertinneqaatissaattut tunniuteqqullugu. (Joh 3:16) Kukkussuteqaraangatta isumakkeerfigeqqulluta Jehovamut qinusinnaavugut. Utertitsissullu pissutigalugu naammalluinnanngitsuugaluartugut isumakkeerfigissagaatigut taannalu ikinngutigiuarsinnaagipput qularinngilarput. – 1 Tim 1:15. w16.05 4:6, 7