Novembari

Jehova kiffartoratsigu Adamip Evallu annaasaat tamaasa, naassaanngitsumik inuunissamik periarfissaq ilanngullugu, pilluaqqussutisiarisinnaavavut. Adami Evalu Jehovamut asanninnermik ineriartortitsinnginnamik aalajangerput taanna kiffartorfiginiarnagu. Taamaakkaluartoq meerartaarsinnaaniassammata inuuinnarnissaat meeqqaminnillu qanoq perorsaaniarlutik namminneq aalajangiinissaat Jehovap akueraa. Sivitsunngitsoq erserpoq Adamip Evallu Jehovamit siulersorneqarumanatik aalajangernerat sianiitsuliornerusoq. Ernerat angajulleq nukkaminik pisuussuteqanngitsumik toqutsivoq, piffissallu ingerlanerani inuit akornanni nakuuserneq namminissarsiornerlu atugaalerput. (1 Mos 4:8; 6:11-13) Aallaqqaammulli Adamip Evallu kinguaavinik imminut kiffartorusuttunik annaassinissaminut Jehova aqqutissiuussivoq. (Joh 6:38-40, 57, 58) Jehovap kamagittarnera asanninneralu pillugit ilinniarnerujartortillutit ilimanarpoq taassumunnga asanninnerujartussasutit. Adamip Evallu aalajangiinerattut aalajangiinavianngilatit, Jehovamulli tunniulluinnarusussaatit. w19.03 qupp. 2 § 3; qupp. 4 § 9

Misiginneqataaneq ineriartortinniarlugu pissutsit ilaquttavit uppeqativillu atugaat paasiniarsarikkit. Ilagiinni inuusuttuaqqat, napparsimasut, utoqqaat asasaminnillu toqukkut annaasaqarsimasut soqutigalugit ersersiguk. Qanoq innersut aperikkit qanorlu misiginerminnik oqaluttuarneranni tusarnaarluarlugit. Misigitikkit pissutsit atugaat ilumut paasisinnaallugit, pisinnaagaangavillu ikiortakkit. Tassa asanninneq ilumoortoq iliuuseqarnikkut ersersinneqartoq. (1 Joh 3:18) Allanik ikiuiniarnitsinni naleqqussarsinnaasariaqarpugut. Sooq? Inuit artorsaatinut assigiinngitsumik qisuariartarmata. Ilaat oqaloqateqarusuttartut allat tunuarsimaarnerusarput. Taamaattumik ikiuiniarnitsinni peqqusiileqilersitsisunik apeqquteqarnissarput mianersuutigisariaqarparput. (1 Th 4:11) Imaassinnaavoq allat oqaloqatigitillugit paasigipput isumaqatiginagit. Taamaattorli akuerisariaqarparput taakku taamatut misigisut. ‘Tusarasuartartoorusuppugut, kisianni oqalukkumaataartuulluta.’ – Jaak 1:19; Matt 7:1. w19.03 qupp. 19 § 18-19

Sallusuissut tamanut oqaluussissutigigaangakku annilaangasarpit? Nehemia eqqaamajuk. Kunngi pissaanilik kiffartuuppaa. Jerusalemimi pallittaalisat isaaffiillu aserorterneqarsimanerat tusarlugu nikallungavoq. (Neh 1:1-4) Takorlooruk qanoq annilaartigisimassanersoq kunngimit aperineqarami sooq taama nikallungatiginerluni! Nehemia qinupallappoq akissuteqarlunilu. Kunngip akillugu Guutip innuttai ikiorniarlugit iliuuseqangaarpoq. (Neh 2:1-8) Aamma Jona eqqarsaatigiuk. Jehovap Ninevemiunut oqaluusseqqummani Jona annilaangangaarami illuatungeqqinnaanut qimaavoq. (Jon 1:1-3) Jehovalli ikiuineratigut Jonap suliani naammassivaa. Oqaasiilu Ninevemiut iluaqutigeqaat. (Jon 3:5-10) Nehemiamit ilikkarparput akinnginnitsinni qinunissaq. Jonamillu ilikkarparput qanorluunniit annilaangatigigaluarutta Jehovap kiffartornissamut ikiorsinnaagaatigut. w19.01 qupp. 11 § 12

Ilikkakkavut Biibilimeersut malerualeraangatsigit ikinngutitsinnut ilaquttatsinnullu attaveqarnerput allanngorsinnaavoq. Tamatumunnga pissutaasoq paaseqqullugu Jiisusip ajoqersukkani pillugit ima qinuvoq: “Sallusuissutikkut illernarsisikkit; oqaatsitit sallusuissutaapput.” (Joh 17:17) “Illernarsisikkit” isumaqarsinnaavoq “immikkoortikkit”. Najoqqutassiat Biibilimeersut malerualeratsigit silarsuarmit immikkuulerpugut. Ikinngutitsinnut ilaquttatsinnullu ajunngitsumik attaveqarniartuaraluaruttaluunniit upperisartaarput pissutigalugu immaqa ilaasa nuannarivallaarunnaassavaatigut akerlilersulerlutaluunniit. Tamanna tupaallaatiginngilarput, Jiisusimi ima oqarpoq: ‘Angutip inoqutini akerarilissavai.’ (Matt 10:36) Jiisusili aamma neriorsuivoq sallusuissut pillugu qanorluunniit pilliuteqaraluarutta pilliutigisatsinnit annerungaartumik piumaartugut! w18.11 qupp. 12 § 11

Apustilip Paulusip qatanngutit eqqartoraangamigit qujamasuutigalugit ersersittarpaa. Kisimiilluni qinugaangami taakku pillugit Guuti qutsavigisarpaa. Aamma qujamasunnini allakkatigut ersersittarpaa. Romamiunut allakkat kapitali 16-imi versini siullerni 15-ini kristumioqatini 27-t atiisigut taavai. Priska Akvilalu nammineq pilluni ‘inuunerminnik navianartorsiortitsisutut’ Føbelu “qasseerpassuarnut”, aamma Paulusimut, ‘ikiuuttarsimasutut’ immikkut eqqaavai. Qatanngutini asasani tamaviaarlutik kiffartortut nersualaarpai. (Rom 16:1-15) Paulusip nalunngikkaluarlugu qatanngutini naammalluinnanngitsuusut pissusii ajunngitsut pingaartinneruai. Paulusip allatai ilagiinni atuarneqarmata qatanngutit qiimmaallaatigisimassagaat takorloorsinnaavarput. Qularnanngitsumik Paulusi ikinngutigilluarnerulersimassavaat. Illit ilagiinniittut iliuusiisa oqaasiisalu qujamasuutiginerat akulikitsumik ersersittarpiuk? w19.02 qupp. 16 § 8-9

Eqqarsassaagut assuarnaakkumalluta naammalluinnartuusariaqarluta? Tamattami misigisarunarpugut kukkoqattaartarluta. Jehovap kukkussutivut isiginiarneruneq ajorpai. Oqaasiani paasivarput: “Illit Naalagaq, ajortuliat naatsorsuutigissagaluarukkit kina atassagaluarpa taava, Naalagaq?” (Tuss 130:3) Naammalluinnanngitsuusugut ajortiliusugullu nalunngilaa, aamma isumakkeerfiginnikkumasarpoq. (Tuss 86:5) Aamma Jehovap pisinnaasatta killeqarnerat nalunnginnamiuk sapikkatsinnik piumasaqarfigineq ajorpaatigut. (Tuss 103:12-14) Jehovap kiffai assuarnaakkumallutik asannittariaqarput. Guutimik asanninnerput Ataatatsinnullu qilammiusumut ilumoorfiginnilluta tunniusimanerput tamarmiusariaqarlunilu minguitsuusariaqarpoq. Allaat misilinneqarnermi taamatut asannittuarutta assuarnaassaagut. (1 Nal 28:9; Matt 22:37) Jehovap najoqqutassiaasa naapertuilluartuunerat nalunngilarput Ataatatsinnillu qilammiusumit iluarisaarusulluta. Asagatsigu aalajangiinnginnitsinni eqqarsaatigeqqaartuaannarparput taamaalillutalu assuarnaatsuuneput ersersittarlugu. w19.02 qupp. 3 § 4-5

Eqqortuliornerup iluaqutissartai misigigaangatsigit tamatigut uppernerput nakussatsittarpoq. (Jaak 1:2, 3) Nalerisimaalertarpugut nalunnginnatsigu Jehova tulluusimaartoq qitornamisut taasinnaalluta, taassumanngalu iluarisaanissamik kissaaterput sakkortunerulertarpoq. (Uss 27:11) Misilinneqarnerit tamarmik tunniusimalluinnarluta Ataatatsinnut asannittumut kiffartornitsinnik ersersitsinissamut periarfissanngortarput. (Tuss 119:113) Uppernarsartarparput uummatikkut iluunngarluta Jehova asallugu, tassa naalannissamik piumasaatullu iliornissamik aalajangiusimannilluinnartumik uummateqarluta. (1 Kng 8:61) Soorunami naammalluinnanngitsuugatta kukkusassaagut. Naakkiukkutta kunngip Hizkijap maligassiaa eqqaamassavarput. Taanna kukkusarpoq. Peqqissimivorli ‘uummatikkullu iluunngarluni’ Jehova kiffartorfigalugu. (Es 38:3-6; 2 Nal 29:1, 2; 32:25, 26) Taamaattumik Saatani eqqarsartaatsitsinnik ajortumik sunniiniartoq akiortigu. Uummammik malussarissumik, tassa naalattumik, ineriartortitsinissarput qinnutigisartigu Jehovamullu aalajaattuarluta. – 1 Kng 3:9; Tuss 139:23, 24. w19.01 qupp. 18-19 § 17-18

Ataatsimiinnerni akigaangatta nammineq iluaqutigisarparput. (Es 48:17) Qanoq? Siullertut, akissamaaraangatta ataatsimiinnermut piareersarluarnissamut kajumissuseqarnerusarpugut. Piareersarluaraangatta Guutip oqaasia paasilluarnerusarparput. Paasinnilluaraangattalu ilikkakkavut atoriaannaanerusarlutigit. Aappaattut, eqqartuinermi peqataagutta ilimanarpoq ataatsimiinneq nuannarinerussagipput. Pingajuattut, akineq iliuuseqarnerummat ataatsimiinneq naareeraluartoq eqqartukkavut eqqaamanerusarpavut. Uppernerpullu ersersikkaangatsigu Jehova nuannaartittarparput. Ilimagisinnaavarput Jehovap tusarnaarlutalu ataatsimiinnerni akisarnivut pingaartingaarai. (Mal 3:16) Nuannaartikkumallugu ilungersoraangatta pilluaqqusinermigut pingaartitsinini ersersittarpaa. (Mal 3:10) Erseqqippoq ataatsimiinnerni akinissatsinnut pissutissaqarluartugut. w19.01 qupp. 8 § 3; qupp. 10 § 7-9

Jehova uagutsinnut pinnittarnermini ilisimassuseqangaarpoq. Inatsiserpassuarnik tuninata asanninnermik inassutip malinnissaanut kamagittarluni ilinniartippaatigut. Najoqqutassiami malillugit inuunissamut ajortullu uumiginissaannut ilinniartippaatigut. Ernerata, Jiisusip, qaqqami oqaluutsimini inuit ajortuliortarnerannut pissutaasut nassuiarpai. (Matt 5:27, 28) Silarsuartaassamilu Guutip naalagaaffiani kunngisut Jiisusip eqqortup eqqunngitsullu suunerannik immisut isiginnittaaseqarnissamut ilinniartittuassavaatigut. (Hebr 1:9) Aamma timikkut isumakkullu naammalluinnartunngortissavaatigut. Takorlooruk, ajortuliornissamut ussernartorsiornatalu naammalluinnanngissuseq pissutigalugu naalliussanngilagut. Naggataatigut ‘naalannarsiffissami kiffaanngissuseq’ Jehovap neriorsuutigisaa nuannaarutigissavarput. (Rom 8:21) Silarsuartaassami kiffaanngissuserput suli killeqassaaq. Qanoq? Guutimik inoqatitsinnillu asanninnerput kajumississutigiuaannartussaagatsigit. w18.12 qupp. 19-20 § 19-20

Angutip Israelikkuusup nuliani “kanngunartumik nassaarfigalugu” avissinnaavaa. ‘Kanngunartup’ suusinnaaneranik inatsisini nassuiarneqanngilaq. Arrannerinnaanani kannguttaatsumik pissusilersornerusimassaaq imaluunniit maajunnartuliornerulluni mingunnartuliornerulluniluunniit. (5 Mos 23:15) Ajoraluartumilli Jiisusip nalaani juuterpassuit nuliatik ‘suugaluartumilluunniit patsiseqarlutik’ avittarpaat. (Matt 19:3) Taakkua isiginnittaasiat pigiliukkusunngilarput, ilaa? Pruffiiti Malakip nalaani angutip nuliaminut siullermut avittarnera nalinginnaavoq, immaqa arnamut inuusunnerusumut Guutimik nalusumut katikkumalluni. Avinnerli pillugu Guutip isummani erseqqissarpaa. Oqarpoq: “Avinnermi uumigaara.” (NW) (Mal 2:14-16) Aappariinnermut tunngatillugu Guutip aallaqqaammulli isiginnittaasia allanngorsimanngilaq: “[Angutip] nuliani attavigissavaa, uiniulissappullu ataaseq.” (1 Mos 2:24) Jiisusillu Ataatami aappariinnermut isiginnittaasia ima oqarami tapersersorpaa: “[Guutip] ataqatigiilersitai inuup avissaartissanngilai.” – Matt 19:6. w18.12 qupp. 11 § 7-8

Qatanngutit ilaat oqaluussisartunik pisariaqartitsiffiusumut nuussinnaapput. Pruffiiti Esajamut assingusumik isiginnittaaseqarput. Jehova ima aperimmat: “Kina aallartissavara, kia oqariartuukkumavaatigut?” Akivoq: “Piareersimavunga, aallartinnga!” (Es 6:8) Jehovap peqatigiissortaanut ikiuunnissamut pisinnaallutillu piumassuseqarpit? Oqaluussineq ajoqersuiartortitsinerlu pillugit Jiisusi ima oqarpoq: “Taamaattumik katersuinermi naalagaasoq qinnuigisiuk katersuisussanik aallartitseqqullugu.” (Matt 9:38) Pisariaqartitsiffiusumut nuussinnaavit, allaat immaqa pioneritut kiffartorlutit? Imaluunniit alla taamaaliornissamut ikiorsinnaaviuk? Qatannguterpassuit misigipput Guutimik tullerminnillu asanninnerminnut ersersitseriaaseq pitsaanerpaaq tassaasoq pisariaqartitsiffiunerusumi pioneriuneq. Kiffartorninni allatigut iliuuseqarsinnaanerlutit eqqarsaatigisinnaaviuk? Taamaalioruit pilluassaatit. w18.08 qupp. 25-26 § 14-15

Jiisusip inunngorneranit oqaluttuamit erserpoq pigisanut tunngatillugu Jehova qanoq eqqarsartaaseqarnersoq. Josefi Marialu, aningaasaaterpassuaqanngikkaluartut, ernerminik perorsaasussatut Guutip nammineerluni toqqarpai. (3 Mos 12:8; Luk 2:24) Jiisusi inunngormat Mariap taanna “[immullugu] nersutaatit nerisarfiannut ilivaa akunnittarfimmi inissaqannginnamik”. (Luk 2:7) Jehovap piumaguni Jiisusip ajunnginnerungaartumi inunngornissaa isumagisinnaagaluarpaa. Ilaqutariinnili anersaakkut ittunik pingaartitsisuni Jiisusip peroriartornissaa Jehovap pingaarnerpaatippaa. Pigisat tungaatigut Jehova qanoq isiginnittaaseqarnersoq oqaluttuamit ilinniarfigaarput. Angajoqqaat ilaasa qitornamik pitsaanerpaanik pigisaqarnissaat piumasarisarpaat, allaat Jehovamut attaveqarnerannut ajoqutaassagaluarpat. Erseqqipporli anersaakkut ittut Jehovap sunit tamanit pingaarnerpaatikkai. Jehovap tamatumunnga tunngatillugu isiginnittaasia nammineq pigiliunnikuuiuk? Iliuutsitit sumik ersersitsippat? w18.11 qupp. 28-29 § 7-8

Jehova pilluarnermut pilerfiuvoq, pilluarnissarput kissaatigaa nuannaarnissatsinnullu pissutissarpassuarnik tunisarluta. (5 Mos 12:7; Oqal 3:12, 13) Kisiannili sooq silarsuarmi ullutsinni pilluarnissaq ajornakusoorsinnaava? Anigoruminaatsunik nalaataqarutta pilluarnissaq ajornakusoorsinnaavoq, soorlu asasatsinnik toqusoqarpat ilaajunnaarsitaasoqarpalluunniit, aappatsinnit avikkutta suliffippulluunniit annaagutsigu. Aamma angerlarsimaffitsinni eqqissiviilliortoqarpat akerleriittoqartuarlunilu, suleqatitsinnit atuaqatitsinnilluunniit illaruaatigineqarutta imaluunniit uppernerput pillugu malersorneqarutta parnaarussaaguttaluunniit pilluarnissarput ajornakusoortissinnaavarput. Immaqaluunniit peqqiilliulerpugut, nakorsarneqarsinnaanngitsumik nappaateqalerpugut isumatsaqqangaarnermilluunniit naalliuuteqarpugut. Eqqaamajulli Jiisusip Kristusip, “pilluartup naalagaasutuaasup”, inuit tuppallersassallugit nuannaalersissallugillu nuannarimmagu. (1 Tim 6:15; Matt 11:28-30) Saatanip silarsuaani ajornartorsiuterpassuaqaraluarluta pillualernissamut pissusit ilaat iluaqutigisinnaasavut Jiisusip qaqqami oqaluutsimini eqqaavai. w18.09 qupp. 15 § 1-3

Ileqqunik Biibilimut naapertuutinngitsunik taamaatitsinissaq sapernarnerpaat ilagaat. (Uss 23:23) Ileqqut taamaattut pillugit Jehova qanoq misiginersoq paasereeraluarluguluunniit inuit ilaasa taamaatitsinissaq sapernartittarpaat. Ilaquttatik, suleqatitik ikinngutitilluunniit qanoq qisuariassanersut isumakuluutigisarsimavaat. Nalunngilaat ileqqut, soorlu ilaquttanik toqusimasunik ataqqinninneq, misigissuseqarfiungaartartut. Pisariaqartumik allannguinissamut suna iluaqutigisinnaavarput? Efesosimi inuit angakkuarniartarsimasut kristumiunngoramik suppat? Biibilimi ima nassuiarneqarpoq: “Atuagaatitik nassarpaat tamarmillu takkuanni ikuallallugit. Naatsorsuutigineqarpoq tamakkua tamarmik aningaasanik sølviusunik 50.000-inik naleqartut.” (ApS 19:19, 20) Kristumiut aalajaatsut taakkua atuakkat akisuut kajumillutik ikuallappaat, tamannalu pillugu Jehovamit pilluaqquneqarput. w18.11 qupp. 7-8 § 15-16

Israelikkut Jordani ikaaqqammeraallu Josvap angut panalik naapippaa. Angut ‘Jehovap katersaarsuinut naalagaanertaatitaanerarmat’, inngili Guutip innuttaanik illersuinissaminut piareersimasoq, Josva tupaallappoq. (Jos 5:13-15) Jeriko tiguarumallugu Josva qanorpiaq iliussanersoq inngilip oqaluttuuppaa. Aallaqqaammut ilitsersuussutit immaqa eqqumiippasissinnaapput. Assersuutigalugu sakkutuut kipineqarnissaat pillugu Josva peqquaa. Tamanna isumaqarpoq ullualuit sorsugiarsinnaassanngitsut. (1 Mos 34:24, 25; Jos 5:2, 8) Immaqa sakkutuut eqqarsarput, ‘akeqqatta tammaarfipput saassutissappassuk ilaquttavut qanoq illersussagatsigit?’ Ilimaginngisamilli pisoqarpoq! Israelikkut saassunnagit Jerikomi sakkutuut ersilerput. Ima allassimavoq: “Jerikop inuisa illoqarfiup isaaffii matoqqatippaat parnaarsimatillugillu Israelikkunnik isertoqaqqunagu; anisoqarsinnaanngilaq isertoqarsinnaananilu.” (Jos 6:1) Tusagartik Guutip siulersuineranik Israelikkut tatiginninnerulissutigisimassavaat! w18.10 qupp. 17 § 5-7

Paulusitut maniguunnerput ersersissinnaavarput. Misiginngisaannarpugut oqaluussinissamik suliassarput imaluunniit Jehovap ikiuineratigut naammassisavut pissutigalugit immikkuullarissuulluta. Imminut ima aperisinnaavugut: ‘Oqaluussiffigisartakkavut qanoq isiginnittaaseqarfigaakka? Inuit eqimattat aalajangersimasut pillugit siumut isummiussereeqqasarpunga?’ Jehovap Nalunaajaasuisa nunarsuaq tamakkerlugu nutaarsiassamik nuannersumik tusarusuttut ujartortarpaat. Ilaasa allaat inuit allanit nikanartutut isigineqartut oqaasii ileqquilu ilinniartarpaat. Misiginngisaannarpulli oqaluussiffigisaminnit pitsaanerullutik. Inuilli sapinngisamik amerlanerpaat Naalagaaffimmik tusarliussamik akuersinissaannut ikiorsinnaajumallugit tamaasa immikkut paasiniartarpaat. w18.09 qupp. 5 § 9, 11

Judasi Romamiunit toqutaavoq. Judasi ingasaassiniartullu allat eqqaassanngikkaanni juutit amerlanersaasa Missiarsip tikiunnissaa erinigaat. Isumaqarput Missiarsip Romamiunit aniguisissagaatsik Israelikkullu inuiassuanngorteqqillugit. (Luk 2:38; 3:15) Juuterpassuit upperaat Missiarsi nunami Israelimi naalagaaffimmik pilersitsissasoq. Tamanna pippat juutit tamarmik nunani allani najugallit Israelimut utissapput. Allaat Johannesip Kuisisup Jiisusi ima aperaa: “Illit taannaavit tikiuttussaq allamilluunniit utaqqissanerpugut?” (Matt 11:2, 3) Immaqa Johannesip juutinik aniguisitsisussamik allamik takkuttoqassanersoq eqqarsaatigaa. Kingusinnerusukkut ajoqersukkat marluk Emmausimut aqqutaatigoortillutik Jiisusi makissimasoq naapippaat. Oqarput neriussimagaluarlutik Jiisusi tassaasoq Israelimik aniguisitsisussaq. (Luk 24:21) Tamatuma kinguninngua apustilit Jiisusi ima aperaat: “Naalagaq, maannakkununa Israelikkunnut naalagaaffik kingumut pilersinniarit?” – ApS 1:6. w18.06 qupp. 4 § 3-4

Pingaartumik Jehovap innuttai pillugit oqaluttuat tusaraangatsigit mianersortariaqarpugut. Eqqaamajuk akerarput Saatani ‘qatanngutitta unnerluutiginnittaanik’ taaneqarmat. (Saqq 12:10) Jiisusip akerlilersuisut uagut pilluta sallullutik ‘tamanik ajortunik oqaaseqartarnissaat’ mianersoqqussutigaa. (Matt 5:11) Mianersoqqussut taanna pimoorukkutsigu Jehovap innuttai pillugit oqaluttuanik eqqumiitsunik tusagaqaraangatta tupaallattassanngilagut. Ikinngutitit e-mailikkut SMS-ikkulluunniit allaffigissallugit nuannaraajuk? Nutaarsiassani oqaluttuaq soqutiginartoq takugaangakku oqaluttuarluunniit immikkuullarissoq tusaraangakku misigisarpit tusagassiortutut ingerlaannaq ingerlatitseqqiisariaqarlutit? E-mailimik SMS-imilluunniit nassiussinnginninni imminut aperigit: ‘Oqaluttuaq ilumoornersoq qulakkeereerpara? Ilumut pissutsit piviusut ilisimavakka?’ Nalorniguit immaqa salluliuutinik siammarterissaatit. Oqaluttuaq ilumoornersoq ilumuunnginnersorluunniit nalugukku nassiunnagu nunguteruk! w18.08 qupp. 3 § 3; qupp. 5 § 6-7

Jiisusip tukkortuunikkut nuannaalernissarput kissaatigaa. Tukkortuugaangatta inuppassuit aamma tunisiumanerulertarput. Soorunami inuit tamarmik qujamasuttarnavianngillat. Ilaalli qujamasuppasinngikkaluarpataluunniit tunisiuarit. Ataasiaannarluniluunniit tukkorluni tunisineq ilimaginngisamik kinguneqarluarsinnaavoq. Ilumoorlutik tukkortut namminneq tunineqarnissartik naatsorsuutiginngikkaluarlugu tunisisarput. Jiisusi oqarpoq: “[Nerersuartitsiniaruit] piitsut, iloqiaat, nukillaarsimasut tappiitsullu qaaqqukkit. Taava pilluassaatit, taakkumi akillutit neriartoqqussallutit akissaqanngimmata.” (Luk 14:13, 14) Biibilimi allaqqavoq: “Pilluaqqusaassaaq allanut ajunngitsuliortoq.” Aamma: “Pilluarpoq sanngiitsumik isumassuisoq.” (Uss 22:9; Tuss 41:2) Allanik ikiuukkusukkatta tukkortuusariaqarpugut. w18.08 qupp. 19 § 15-16

Ullumikkut paasissutissat tutsuiginartut pissarsiarinissaat eqqortumillu nalilersornissaat sapernartorujussuuvoq. Sooq? Paasissutissat pissarsiarineqarsinnaasut amerlanerit ilaannakuullutilluunniit ilaannakuusumik ilumoormata, aamma naammalluinnanngitsuugatta. Suut iluaqutigisinnaavavut? Guutip oqaasiani najoqqutassiat! Assersuutigalugu najoqqutassiami ataatsimi paasitinneqarpugut pissutsit piviusut tusaqqaarnagit akineq sianiitsorpallannerusoq. (Uss 18:13) Allami kajumissaarneqarpugut oqaatigineqartut ilumoornerannik paasiniaaqqaarnata tusakkavut tamaasa upperissanngikkivut. (Uss 14:15) Aamma qanorluunniit sivisutigisumik Jehovamut kiffartorsimagaluarluta nammineq paasisimasaqassuserput tatigisinnaanngilarput. Paasissutissat tutsuiginartut atorlugit eqqortumik inerniliisarutta silatusaartumillu aalajangiisarutta najoqqutassiat Biibilimeersut illersuutigissavavut. w18.08 qupp. 8 § 19

Kuisinnikkut kikkut tamarmik takusinnaalissavaat Jehovap pigigaatigut taannalu naalakkusukkipput. Jiisusi kuisikkami tamatumunnga assingusumik iliorpoq. Guutimut ima oqarporlusooq: “Guuti, piumasat malillugu iliornissaq tassa kajungerisara.” (Tuss 40:8, 9) Jiisusi kuisimmat Jehova qanoq misigiva? Biibilimi allassimavoq: “[Jiisusi] kuisereerluni erniinnaq imermit qaqimmat qilaat qulaagut ammarput, takuaalu Guutip anersaavata tuisut illuni aqqarfigigaani quliminut pilluni, nipilu qilannit tutsiuppoq: ‘Tassa ernera asasara, nuannarisara.’” (Matt 3:16, 17) Jiisusi Guutimit pigineqareerpoq. Jehovalli nuannaarutigaa takullugu Jiisusip kisimi kiffartorfigerusukkaani. Jehovap aamma tunniulluinnarnerput nuannaarutigisarpaa, pilluaqqussavaatigullu. – Tuss 149:4. w18.07 qupp. 22 § 4-5

Mosesi taama oqarami imminut Aronimullu innersuussigunarpoq. Mosesip taama oqarnera ataqqinninngitsuliorneruvoq, tupinnartuliamummi tunngatillugu Jehova tamanut ataqqinaatissinngilaa. Tussiaat 106:32, 33-mi allassimavoq: “Naalagaq kamassaarpaat Meribap puilasuini, taakkulu pisuullutik perlutsitaavoq Mosesi, naalasseriiffigigamikku mianersuaalliorluni oqalulersillugu.” (4 Mos 27:14) Mosesip Jehova ataqqinaatissaraluanik ataqqinaatissinngilaa. Jehovap Mosesi Aronilu ima oqarfigai: ‘Peqqusinera naalanngilarsi.’ (4 Mos 20:24) Tamanna ingasattumik ajortuliorneruvoq! Siusinnerusukkut Israelikkut imminut pikitsitsimmata kinguaariit tamarmiusut nunamut neriorsuutigisamut isernissaat Jehovap akuerinngilaa. (4 Mos 14:26-30, 34) Taamaammat Jehovap Mosesimut assingusumik pillaanera naapertuilluarneruvoq. Mosesi nunamut neriorsuutigisamut iseqqusaanngilaq. w18.07 qupp. 11 § 9; qupp. 12 § 12-13

Nalunngikkutsigu kristumioqatitta nalunngeqatiginnissutini tunngavigalugu imigassartorusunngitsoq imigassartorsinnaatitaagaluarluta imigassartunnginnissatsinnut kajumissuseqartariaqarpugut. Imaassinnaavoq qatanngut sallusuissummik ilikkannginnermini imigassamik pinngitsuuisinnaannginnikuusoq taamaattumillu aalajangersimasoq imigassartoqqinngisaannarniarluni. Taassuma imigassamik ajornartorsiuteqaqqilerneranik kinguneqartumik sunilluunniit iliuuseqarusunngilagut. (1 Kor 6:9, 10) Taamaattumik qatanngut taanna pulaartorigutsigu naaggaaraluartoq imigassartornissaanut kimigiiserfiginavianngilarput. Timotheusip inuusuttup kipineqarnissani annernaraluartoq akueraa. Nalunngilaa juutit oqaluussiffigisassani kipineqarnermik pingaartitsisuusut. Timotheusi Paulusitulli allanik mamiatsatsitserusunngilaq. (ApS 16:3; 1 Kor 9:19-23) Allat ikiorusullugit illit piumasatit kingulliukkusuppigit? w18.06 qupp. 18 § 12-13

Sallusuissummiinngitsumik naapitaqaqqaaraangavit taanna pillugu qanoq ilisimasaqartigisarpit? Immaqa taamaallaat atia isikkualu nalunngilatit. Sallusuissummiittumilli naapitaqaqqaaraangavit allaanerujussuuvoq. Nalunngilat Jehova asagaa, Jehovallu ajunngitsortaa takusimagaa anersaakkullu ilaqutarisaminut ilannguteqqullugu qaaqqusimagaa. (Joh 6:44) Taanna allatut tunuliaqutaqaraluarpat, nunamit kulturimilluunniit allameersuugaluarpat taanna pillugu annertuumik ilisimasaqareerputit, taannalu illit pillutit ilisimasaqarluareerpoq! Allamik Nalunaajaasumik naapitsiinnarlutit pingaarnerpaat assigiissutigereerpasi. Nalunngilat assigiinngitsunilluunniit oqaaseqaraluarlusi sallusuissummi ‘oqaatsit minguitsut’ oqaaseralugit. Tamanna isumaqarpoq marluullusi Guuti upperigissi, ileqqussatigut maleruagassat assigiit malikkisi siunissamilu assigiimmik neriuuteqartusi. Tamakku immissinnut tatigeqatigiinnissamut naassaanngitsumullu ikinngutigiilluarnissamut iluaqutigaasi. w18.12 qupp. 17-18 § 9-10

Kristumiut juutiunngitsut kipineqartariaqannginnerat erseqqissarniarlugu Kristusip siulersuisoqatigiit atorpai. (ApS 15:19, 20) Ukiulli arlallit qaangiuttut kristumiorpassuit juutiusut ernitik suli kipineqartittarpaat. Taamaattorli immaqa eqqarsaatigaarput kipineqartarneq sooq taama sivisutigisumik ajornartorsiutaanissaa Jiisusip akuerisimagaa, naak Jiisusi toqummalli Mosesip inatsisai atorunnaaraluartut. (Kol 2:13, 14) Paasinnittaatsimut nutaamut naleqqussarniarneq sivisusinnaavoq. Kristumiut juutiusut ilaasa inatsisit atuukkunnaarnerat sungiunnissaanut piffissaqartariaqarput. (Joh 16:12) Kipineqarnerup immikkut ittumik Guutimik attaveqarnermik ersiutaanera sungiusimavaat. (1 Mos 17:9-12) Allat ernumagaat juutit inuiaqatigiivinit allaaneruneq pissutigalugu malersugaalernissartik. (Gal 6:12) Piffissalli ingerlanerani Paulusip allagai aqqutigalugit Kristusi siulersuivoq. – Rom 2:28, 29; Gal 3:23-25. w18.10 qupp. 18-19 § 10-12

Kajfasip unnuanngorseeriarlugu Jiisusi sakkutuunit tigusaritikkiartorpaa. Jiisusilli toqunniarneqarnini nalunngilaa. Taamaattumik apustilini naggammik nereqatigitillugit pananik pissarseqqullugit oqarfigai. Pingaarutilimmik ilinniartinnissaannut panat marluk naammapput. (Luk 22:36-38) Unnuami tamatumani kingusinnerusukkut inuit Jiisusi tigusariartorpaat, Petrusillu naapertuilluanngitsuliorneq kamaatigalugu panaminik angutit ilaat saassuppaa. (Joh 18:10) Jiisusilli Petrusi ima oqarfigaa: “Panat puuanut manguguk. Panalersortummi tamarmik pannamik toqunneqassapput.” (Matt 26:52, 53) Jiisusi sunniuteqarluartumik sumik ilinniartitsiva? Tassa ajoqersugai silarsuarmut ilaassaanngillat. Unnuami tamatumani siusinnerusukkut Jiisusip tamanna qinnutigaa. (Joh 17:16) Guuti kisimi naapertuilluannginnernik akiuisinnaatitaavoq. Taamaattumik uagut eqqisseqatigiillutalu ataasiussuseqarpugut. Jehovap silarsuarmi inuit qanoq avissaartuutsiginersut takugaangamiuk innuttami ataasiussuseqarnerat nuannaarutigingaartarsimassavaa. – Sef 3:17. w18.06 qupp. 7 § 13-14; qupp. 8 § 16

Saatanip Jehova ilumoorfigiunnaarniassagatsigu qunulersinniartarpaatigut annilaangalersinniartarlutalu. Assersuutigalugu oqaluussinerput inerteqqutaaleqqullugu naalakkersuisut sunnersinnaavai. Suleqativut atuaqativulluunniit Biibilimi najoqqutassianik maleruaanerput pillugu illaruaatiginneqqullugit sunnersinnaavai. (1 Petr 4:4) Saatanip allaat ilaquttavut allamik upperisallit, ajunngitsumik isumaqaraluarlutik immaqa ataatsimiigiaqqusisanngitsut, sunnersinnaavai. (Matt 10:36) Saatanimit qunusaarneqaraluarluta qanoq aalajaattuarsinnaavugut? Saatani sorsunnermi akioratsigu saassunneqarnerput tupaallaatigissanngilarput. (Saqq 2:10) Aamma pingaarnerusoq eqqaamassavarput: Saatani oqarpoq aatsaat ajornanngikkaangat Jehovamut kiffartortartugut artorsaleruttalu Guuti ajattussagipput. (Job 1:9-11; 2:4, 5) Kingullertut, Jehova nakussatseqqulluta qinnuigiuartariaqarparput. Eqqaamajuk Jehovap imminiinngisaannassagaatigut. – Hebr 13:5. w18.05 qupp. 19 § 14

Tusarnaarusuttoqarpasinngikkaluartoq oqaluussinitta inunnut qanoq sunniuteqarsinnaanera puiunngisaannartariaqarparput. Inuit isiginnaartarpaatigut. Atisarissaarnerput, pissuserissaarnerput aamma inussiarnernerput maluginiartarpaat. Tamanna ajasoorutigisinnaavaat, piffissallu ingerlanerani uagutsinnik ajortumik isiginnittaaseqarsimasut ajunnginnerusumik isiginnittaaseqarfigilersinnaavaatigut. Sergiop Olindallu pioneriusut ima oqarput: “Napparsimasimanerput pissutigalugu sivisulaartumik sumiiffigisartakkatsinniinngilagut. Uterattali inuit sanioqquttartut aperipput. ‘Susoqarami? Kipilluta.’” Guutip naalagaaffia pillugu inuit allat oqaluttuunneranni ‘assavut sarliaannanngikkutsigit’ ‘inuiannut tamanut’ nalunaajaanermi pingaarutilimmik iliuuseqassaagut. (Matt 24:14) Pingaarnerusumik, Jehova nuannaartillugu ilisimagatsigu nuannaangaarsinnaavugut. Taassuma “nikallujuillutik inerititaqartut” tamaasa asavai! – Luk 8:15. w18.05 qupp. 8 § 16-18

Inuit ajortuliormatali naammalluinnartuujunnaarmatalu Jehovap Guutiulluni qiimmassaajuartoq uppernarsarpaa. Allaat Adami Evalu Guutimut pikitsitsinerisa kingunitsianngua Jehovap siulittuut, siunissami inunngortussanit paasineqaruni qiimmassaataallunilu neriuuteqalersitsisussaq, oqaatigaa. Siulittuummi tassani Mosesimik allakkat siulliit 3:15-imi allassimasumi neriorsuutigineqarpoq Saatani Diaavulu ajortuliaalu tamarmik suujunnaarsinneqassasut. (1 Joh 3:8; Saqq 12:9) Jehova kiffaminik Noamik qanoq qiimmassaasoq eqqarsaatigiuk. Taamani inuit nakuusertarlutillu kinguaassiuutitigut inuunerluttut akornanni Noa ilaqutaalu kisiartaallutik Jehovamik pallorfiginnipput. Noa nikallorsimasinnaagaluarpoq. (1 Mos 6:4, 5, 9, 11; Jud 6) Jehovalli silarsuaq ajortoq suujunnaarsinniaramiuk Noa nassuiaappaa ilaquttanilu aniguiumalluni qanoq iliortariaqartoq. (1 Mos 6:13-18) Jehova Noamut Guutiuvoq qiimmassaasartoq. w18.04 qupp. 15 § 1-2

Taavami allat qanoq misigissuseqarfiginerlugit oqarfigissallugit sapernartikkutsigu? Allanik qiimmassaaneq sapernarpallaanngilaq. Misilillugu allat qungujuffigikkit. Qungujuffiginngippatsit immaqa ajornartorsiuteqarput oqaloqateqarnissamillu pisariaqartitsillutik. Tusarnaaginnarnerisigut tuppallersarsinnaavatit. (Jaak 1:19). Tamatta qatanngummik tuppallersarneqarnissamik pisariaqartitsisumik qiimmassaasinnaavugut. Kunngi Salomo ima allappoq: “Ila ajunngittassusia oqaasissat piffissaasigut anillugit! Isit qaammarinnerata uummat nuannaalersittarpaa, tusakkap nuannersup timi nakussatsittarpaa.” (Uss 15:23, 30) Aamma Paulusip erinarsuutit Naalagaaffilersaarutit qiimmassaatigisinnaagivut ilinniartitsissutigaa. (Kol 3:16; ApS 16:25) Jehovap ullua qanilliartortillugu qiimmassaqatigiinnissarput suli pingaaruteqarnerulissaaq. – Hebr 10:25. w18.04 qupp. 25 § 16; qupp. 26 § 18-19