Oktobari

Jehova Jiisusilu assiginagit uagut inuit uummammiui takusinnaanngilavut, taamaattorli allat misigissusii pisariaqartitaalu paasiniarsinnaavavut. (2 Kor 11:29) Silarsuarmi inuit namminissarsiortut assiginagit sapinngisatsinnik uagut ‘immikkut nammineq iluaqutissarput piinnarnagu aammattaaq inoqatitta iluaqutissaat isumaginiartarpavut’. (Fil 2:4) Pingaartumik ilagiinni utoqqaanertat misiginneqataasariaqarput. Nalunngilaat Jehovap savaataasa paarinissaanut akisussaaffeqarlutik. (Hebr 13:17) Uppeqatitik ikiorniarlugit utoqqaanertat paasinnittuusariaqarput. Qanoq misiginneqataanertik ersersissinnaavaat? Utoqqaanertap misiginneqataasup kristumioqatini piffissaqarfigisarpai. Soqutiginnilluni aperisarpoq erinitsajuillunilu tusarnaaqqissaarluni. Tamanna pingaaruteqangaartarpoq uppeqatimi ilaata piumagaluarluni misigissutsiminik eqqarsaatiminillu oqaasertaliinissani ajornartikkaangagu. (Uss 20:5) Utoqqaanertap piumassuseqarluni qatanngutini piffissaqarfigigunigit tatigeqatigiinnertik, ikinngutigiinnertik asaqatigiinnertillu ineriartortissavaat. – ApS 20:37. w19.03 qupp. 17 § 14-17

Misigigaangatta qujamasuffigineqarluta nuannaartarpugut. Qujamasunnermik ersersitsigaangatta allat nuannaartittarpavut. Inuup qujamasunnermik ersersitsivigisatta paasissavaa ikiorniarluta iliuuserisimasaa tunniussimasaaluunniit pingaartikkipput. Tamatumalu kingunerisaanik ikinngutigiilluarnerulissaagut. Ullormut allassimaffimmi allassimasutut qujamasunnermik ersersitsinerput naleqangaarpoq. Takorlooruk iipili kuultimik sanaaq sølvimik tunuliaqutalik qanoq kusanartigisoq. Qularnanngitsumik naleqangaarpoq. Taama ittumik tunineqaraluaruit qanoq misigissavit? Qujamasullutit ersersitsinitit allanut taama naleqartigisinnaapput. Ilumoortoq una eqqarsaatigiuk: Iipili kuultimit sanaaq naassaanngitsumik atasinnaavoq. Taamatuttaaq inuup qujamasunnermik ersersitsivigisavit immaqa iliuutsit pingaartillugulu inuunermi sinnerani eqqaamassavaa. w19.02 qupp. 15 § 5-6

Adami Evalu paarnamik orpimmit ajunngitsumik ajortumillu ilisimalersitsisumit nerigamik paatsuugassaanngitsumik ersersitsipput: Jehova tatiginngilaat najoqqutassiaalu tutsuiginagit. Namminneq suut ajortuunerannik suullu ajunngitsuunerannik najoqqutassiorniarlutik aalajangerput. Annaasaallu eqqarsaatigeriaruk. Jehovamik ikinnguteqarnertik annaavaat. Aamma naassaanngitsumik inuunissaraluartik annaavaat ajorti toqulu kinguaaminnut ingerlateqqillugit. (Rom 5:12) Adamip Evallu iliuuseqarnerat kunngip atorfilittaata Filipimit oqaluussiffigineqartup iliuuseqarneranut naleqqiuguk. Jehovap Jiisusillu iliuusiinut qujamasungaarami kunngip atorfilittaa ingerlaannaq kuisippoq. (ApS 8:34-38) Guutimut tunniulluinnarutta kunngillu atorfilittaa assigalugu kuisikkutta ersersissavarput Jehovap Jiisusillu uagut pilluta iliuuserisaannut qujamasulluta. Aamma ersersissavarput Jehova tatigalutigu taassumalu kisimi suut ajortuunerannik suullu ajunngitsuunerannik najoqqutassiortussaanera akueralugu. w19.03 qupp. 2 § 1-2

Guutip kiffai assuarnaassutsimik qanoq ersersitsisarpat? Jehovamik uummatikkut iluunngarluta kipitinneqarsinnaanngitsumillu asanninnikkut, tamannalu pissutigalugu iluarisaatut iliortuarnikkut. Biibilimi oqaaseq hebræerisooq ‘assuarnaassutsimik’ nutserneqartoq ima isumaqarpoq: Tamarmiusoq peqqissorlu. Assersuutigalugu uumasut Jehovamut pilliutigineqartut innarluuteqartussaanngillat. (3 Mos 22:21, 22) Guutip innuttai uumasumik niumik, siutimik isimilluunniit amigaatilimmik ajoqutilimmilluunniit pilliuteqaqqusaanngillat. Uumasup tamarmiusup peqqissullu pilliutigineqarnissaa Jehovap pingaartippaa. (Mal 1:6-9) Jehovap tamarmiusunik peqqissunillu pingaartitsinera paasisinnaavarput. Arlaannik pisigaangatta, soorlu naatitamik, atuakkamik sakkumilluunniit, ajoquteqassasoq amigaateqassasorluunniit kissaatigineq ajorparput. Tamarmiussasoq kissaatigisarparput. Taamatuttaaq Jehovap kissaatigaa tamakkiisumik minguitsumillu pissutiginiagaqarluta asassagitsinni ilumoorfigissagitsinnilu. w19.02 qupp. 3 § 3

Uummaterput paariumallugu ajortumik sunniuteqartartunut matuinnarnagu ajunngitsumik sunniuteqartartunut ammaattariaqarparput. Itsaq illoqarfimmut qarmarsualimmut akeqqat isaannginniassammata matunik paarsisup matut matusarpai, ilaannikkulli nerisassat atortussallu eqqunneqarniassammata matut ammartarpai. Matut ammanngisaannarpata illoqarfimmi innuttaasut kaalissapput. Taamatuttaaq uummaterput Guutip eqqarsartaasianit sunnerneqarniassammat ammakulasariaqarparput. Jehovap eqqarsartaasia Biibilimi atuarneqarsinnaavoq, taamaattumik Biibilimik atuarnerit tamaasa Jehovap eqqarsartaasianit eqqarsartaatsikkut, misigissutsikkut iliuutsikkullu sunnertittarpugut. Biibilimik atuarnerput qanoq tamakkiisumik pissarsiaqarfigisinnaavarput? Qinuneq pingaaruteqarluinnarpoq Jehovap oqaasiini ‘tupinnartut ittut’ takussagutsigit. (Tuss 119:18) Aamma atuakkavut eqqarsaatigeqqissaartariaqarpavut. Qinugaangatta, atuaraangatta eqqarsaatiginneqqissaaraangattalu Guutip oqaasia ‘uummatitta ilorpiaanut’ (Testamentitoqaq) pisarpoq, Jehovallu eqqarsartaasia nuannarilertarparput. – Uss 4:20-22. w19.01 qupp. 18 § 14-15

Pissutsit atukkavut piginnaasattalu assigiinnginnerat Jehovap nalunngilaa, pilliutigisinnaasavullu pingaartingaarpai. Israelikkunnit pilliutit akuerisai eqqarsaatigikkit. Israelikkut ilaasa sava savaasarluunniit pilliutigisinnaavaat. Piitsulli “tuit quluartartut marluk imaluunniit tuit piaqqat marluk” pilliutigisinnaavai. Tuilli marluk akissaqartinngippagit “qajuusat aseqqorissut” annertuallaanngitsut pilliutitut Jehovap akuerai. (3 Mos 5:7, 11) Qajuusat akikinnerupput, ‘aseqqorissuuppatali’ Jehovap pilliut tamanna qujamasuutigissavaa. Guuterput asannittoq aamma nalitsinni taamatut isiginnittaaseqarpoq. Akissuteqaraangatta imaanngilaq piumasarigaa tamatta Apollositulli oqalloritsiginissarput Paulusitulluunniit qularunnaarsitsillaqqissasugut. (ApS 18:24; 26:28) Pisinnaasavut najoqqutaralugit tamatta pitsaanerpaamik akinissarput Jehovap kissaatigiinnarpaa. Uillarneq aningaasannguanik marlunnik pilliuteqartoq eqqaamajuk. Sapinngisaminik pitsaanerpaat pilliutigimmagit Jehovamut erlinnartuuvoq. – Luk 21:1-4. w19.01 qupp. 8-9 § 3-5

Kristusip ajoqersugaasut uumigineqarnissarput naatsorsuutigaarput. Jiisusip ajoqersukkani siulittuiffigai ullussani kingullerni sakkortuumik malersugaajumaartut. (Matt 24:9; Joh 15:20) Esajap siulittuutaanit mianersoqquneqarpugut akerlilersortitta uumigiinnarata sakkut assigiinngitsut uagutsinnut atorumaaraat. Sakkut taakkua ilagaat salloqittaaneq sakkortuumilluunniit akerlilersuineq. (Matt 5:11) Akerlilersortivut sorsukkunnaartinniarlugit sakkunik taakkuninnga atuinissaannik Jehovap unitsinnavianngilai. (Ef 6:12; Saqq 12:17) Ersisariaqanngilagulli. Jehova oqarpoq uagutsinnut ‘sakkugineqartut atorsinnaassuseqassanngitsut’. (Es 54:17) Soorlu qarmaq anorersuarluni sialussuarmit illersuutigisaripput Jehovap ‘nakuusertut kamannerannit’ illersussavaatigut. (Es 25:4, 5) Akeraasut ataavartussamik ajoqusiinngisaannassapput. (Es 65:17) Guutip innuttaanut akeraasut tamarmik “nungussapput suujunnaarsitaallutik”. – Es 41:11, 12. w19.01 qupp. 6-7 § 13-16

Inuusuttuusutit, Jehovap kiffaanngissuseq nuannaraa, aamma illit kiffaanngissusermik nuannarisaqartillutit pinngortippaatit. Piumasaraali kiffaanngissutsit silatusaartumik illersuutigisannik atussagit. Immaqa allat pornografiimik isiginnaartarput, kinguaassiuutitigut inuunerluttarlutik, timersuutit ulorianartut peqataaffigalugit ikiaroornartorlu imigassarluunniit atornerluttarlugit. Immaqa aallaqqaammut taakku nuannerunarpasissinnaallutillu pissanganarsinnaapput, amerlanertigulli kingunipiloqartarput, soorlu nappaateqalernikkut aamma pinngitsuuisinnaajunnaarnikkut. Allaammi ilaat toqusarput. (Gal 6:7, 8) Inuusuttut taamaaliortartut immaqa isumaqarput kiffaanngissuseqarlutik, imminulli salloqittarneruvoq. (Tit 3:3) Tamatumunnga naleqqiullugu, Jehovamut naalanneq iluaqutigaarput. Peqqissutsitsinnut iluaqutaallunilu piviusumik kiffaanngissuseqalissutigaarput. (Tuss 19:8-12) Kiffaanngissutsit silatusaartumik atorukku, tassa Guutip inatsisai najoqqutassiaalu naammalluinnartut naalanniarlugit aalajangerukku, Guutimut angajoqqaannullu takutissavat akisussaassuseqarluartuullutit. Ilimanarpoq angajoqqaannit tatigineqarnerullutillu kiffaanngissuseqarnerulissasutit. – Rom 8:21. w18.12 qupp. 19 § 16-17

Adami ajortuliormat sorpassuit allanngorput. Ilaatigut tassaavoq inuit toqusalernerat, tamannalu aappariinnermut sunniuteqarpoq. Apustili Paulusi kristumiunut nassuiaavoq toqup aappariinneq kipitittaraa qimagaasorlu kateqqissinnaasoq. (Rom 7:1-3) Inatsisit Guutip Israelikkunnut tunniussai aappariinnermut paasissutissaqarput. Assersuutigalugu angut Israelikkuusoq arlalinnik nuliaqarsinnaatitaavoq. Guutip Inatsisit pilersinngikkallaramigilli tamanna ileqqorineqarpoq. Inatsisitigulli arnat meeqqallu illersugaapput. Assersuutigalugu Israelikkuusoq inussiamik katillunilu kingusinnerusukkut allamik nuliaqqikkuni, nuliami siulliup pisariaqartitai ileqqumisut matussusertariaqarpai. Nuliani illersortuarlugulu isumassortuassagaa Guutip piumasaraa. (2 Mos 21:9, 10) Mosesip inatsisai uagutsinnut atuutinngillat, aappariinnerli Guutip erlinnartutut isigigaa ilinniarparput. Tamanna aappariinnerup ataqqinissaanut iluaqutigaarput. w18.12 qupp. 9 § 3; qupp. 10 § 5-6

Isumakuluutimi Jehovamut oqaluttuarereerlugit Habakkukip eqqarsaatigisimasinnaavaa Jehova qanoq qisuariassanersoq. Ataatatut asannittutut Jehovap taanna qanoq misiginersoq paasivaa. Nalunngilaa naalliullunilu ikioqqusoq. Taamaammat avoqqaarinagu oqaluttuuppaa juutit naalasseriitsut ungasinngitsukkut qanoq iliuuseqarfiginiarnerlugit. Imaassinnaavoq taakkua pillaatisiassaasa qanillineranik Habakkuki siulliullugu Jehovap oqarfigigaa. Iliuuseqarnissamut piareersimanerminik Jehovap Habakkuki nassuiaappaa. Judami inuit ajortut nakuusertullu pillarniarpai. Oqarnermigut “ullussinni”, Jehovap ersersippaa taanna nunaqqataaluunniit inuutillugit eqqartuussineq piumaartoq. Jehovap akissutaa Habakkukip naatsorsuutigisimanngilluinnarpaa. w18.11 qupp. 17 § 7-8

Inuit sallusuissummik suli paasinnissimanngitsut qanoq isumaqarfigaagit? Apustilip Paulusip juutit Jehova pillugu ilisimasaqalaareersut oqaluussiffigai. Inuilli guutipilunnik pallorfiginnittut aamma oqaluussiffigai. Paulusi ajoqersuiartortitatut angalanermini siullermi Barnaba ilagalugu illoqarfimmut Lystramukarpoq. Lykaoniamiut Paulusi Barnabalu pissaanilissuartut pivaat guutimillu ilumuunngitsut atiinik, Zeusimik Hermesimillu, taallugit. Paulusi Barnabalu usorsisimaalerpat? Illoqarfinni marlunni siuliini tikeraakkaminni malersorneqaramik pissutsit pitsaanerulersoraat? Eqqarsarpat taamatut pineqarnertik inunnut amerlanerusunut nutaarsiassamik nuannersumik oqaluussinissamut periarfissaassasoq? Naamik! Tupapput imalu suaarlutik: “Arraa ukorsii! Suleqaasiuna? Ilissitulliuna inuinnaasugut.” – ApS 14:8-15. w18.09 qupp. 5 § 8-9

Sallusuissut akuerissagutsigu najoqqutassiallu Biibilimeersut maleruassagutsigit eqqarsartaatsikkut iliuuserisartakkatigullu allannguerusussuseqartariaqarpugut. Apustili Petrusi ima allappoq: “Meeqqatut naalattutut nalusuugallarassi kajungerisasi ileqquliunniaqinasigit.” Imalu nangippoq: “Ilississaaq inuunissigut tamatigut illernartuussaasi.” (1 Petr 1:14, 15) Itsaq illoqarfimmi Korinthimi inuppassuit inuunerluttuupput. Tassani najugallit Jehovap isaani minguitsuujumallutik inuunerminni allannguerujussuartariaqarsimapput. Nalitsinni sallusuissummik paasinnittut aamma taamatut allannguisut amerlapput. Petrusip tamanna ima allaatigaa: ‘Naammaqaaq ulluni inuuffigeriikkassinni Guutimik nalusut piumasaat naammassisimagassigit inuunerlullusi, pileritsapiluttarlusi, imerujuupiluttarlusi, nuannaapiluttarlusi, ernguttarlusi guutipilussiornerillu ileqqussaanngilluinnartut ileqqoralugit.’ – 1 Petr 4:3. w18.11 qupp. 7 § 13

“Eqqortumik isiginnittaaseqarnertik pissutigalugu naassaanngitsumik inuulersinnaasut” qanoq nassaarisinnaavavut? Kristumiut siulliit nalaanni inuit taakku naninissaannut oqaluussineq periarfissatuaavoq. Jiisusip ajoqersukkani ima oqarfigai: “Illoqarfimmut illoqarfeeqqamulluunniit pigaangassi, taava paasiniaasassaasi kina ilissinnik najugaqartitsinissamut naleqquttuunersoq.” (Matt 10:11) Ullumikkuttaaq taamaaliortariaqarpugut. Soorunami inuit makitallutilluunniit Guutimik ilumoorlutik soqutiginninngippata nutaarsiassamik nuannersumik tusarnaarnissaat ilimaginngilarput. Inuit ilumoorlutik soqutiginnittut, maniguuttut sallusuissummillu tusarusuttut ujartarpavut. Inunnik ujarlernerput Jiisusip sanasuugallarami iliuuserisartagaanut sanilliussinnaavarput. Pequsiornissamut, matuliornissamut ersuusiornissamut allamilluunniit sananissamut qisuk naleqquttoq siullertut nassaareqqaartariarpaa. Taava sannataasivini qaqittarpaa piginnaaninilu atorlugit sanalerluni. Aamma uagut inuit ilumoorlutik soqutiginnittut nassaareqqaassavavut, taava atortuvut piginnaanivullu ajoqersuganngortitsinissamut ikiuinermi atorsinnaalissavavut. – Matt 28:19, 20. w18.10 qupp. 10 § 3-4

Iivangkiiliulersaartoq Filipi inuunerminik qanorluunniit allanngortoqartillugu kiffartornerminik pingaartitsiuarnermigut maligassaalluarpoq. Jerusalemimi piffissat ilaanni suliassinneqarpoq. (ApS 6:1-6) Pissutsilli tassani allanngorput. Stefanusip toqutaanerata kingorna kristumiut sakkortuumik malersugaaleramik Jerusalemimit qimaasariaqalerput. Filipili Jehovamut kiffartornermini ulapputeqaannarusukkami Samariamukarpoq inuit nutaarsiassamik nuannersumik tusarlerneqarnissaminnik pisariaqartitsisut ornillugit. (Matt 10:5; ApS 8:1) Filipi Guutip anersaavata siulersuinera naapertorlugu sumulluunniit aallariaannaavoq. Taamaattumik inuit nutaarsiassamik nuannersumik suli tusarlerneqarsimanngitsut illoqarfiinut Jehovap oqaluussiartortillugu aallartittarpaa. Juuterpassuit Samariamiut nikagisarpaat ajortumillu pisarlugit. Filipili kinaassusersiortuunngilaq, kajumillunili nutaarsiassaq nuannersoq taakkununnga oqaluussissutigisarpaa. Samariamiullu “tamarluinnarmik” Filipi tusarnaarpaat. (ApS 8:6-8) Pissutsit allanngoraluartut kiffartornerminik ulapputeqartuaannarpoq, Jehovallu Filipi ilaqutaalu pilluaqqujuarpai. – ApS 21:8, 9. w18.10 qupp. 25 § 14-16

Taamaalluni Jiisusi Dekapolisimiittoq inuit “tusilartoq oqalunneq sapingajattoq” aggiuppaat. (Mark 7:31-35) Jiisusip ajorunnaarsippaa, inuilli allat isigitinnagit. Sooq? Angutip tusilartuugami imaassinnaavoq inuppassuit akornanniissalluni toqqissisimanarinngikkaa. Jiisusip misigissusii paasigamigit ‘inunnit nigorteriarlugu’ inoqanngitsumi ajorunnaarsippaa. Soorunami uagut tupinnartuliorsinnaanngilagut, qatanngutittali pisariaqartitaat misigissusiilu innimigisariaqarpavut inussiarnersuullutalu. Jiisusip angut tusilartoq qanoq misigisoq paasivaa inussiarnersumillu pillugu. Uaguttaaq utoqqarnut innarluutilinnullu innimittartariaqarpugut. Kristumiut ilagiivisa naammassisaqarsinnaaneq taamaallaat ilisarnaatiginagu asanninneq pingaarnertut ilisarnaatigaat. (Joh 13:34, 35) Asanninneq kajumississutigalugu qatanngutivut utoqqaat innarluutillillu ataatsimiinnermut oqaluussinissamullu peqataaqqullugit sapinngisatsinnik iliuuseqartarpugut. Pisariunera allaallu ikiukkatta iliuuseqarpiarsinnaannginnerat apeqqutaatinnagit taamaaliortarpugut. – Matt 13:23. w18.09 qupp. 29 § 7-8

Jehovap kiffai tamarmik taassumunnga Jiisusimullu erlinnartuupput. (Gal 2:20) Qatanngutivut asagatsigit saamasumik pissusilersorfigisariaqarpavut. “Taamaattumik eqqissinartut ineriartorteqatigiinnerlu noqqaassutiginiartigit.” (Rom 14:19) Paratiisimi inuunissaq qilanaaringaarparput, kinaluunniimmi nikallunganissaminut pissutissaqassanngilaq! Sorsuttoqarnanilu napparsimasoqassanngilaq. Ajorti pissutigalugu kingornussamik inunnik toqusoqaqqissanngilaq, malersugaasoqassanngilaq, ilaqutariinnikkut ajornartorsiortoqaqqinnanilu pakatsisoqassanngilaq. Ukiut 1.000-t naappata inuit tamarmik naammalluinnartuussapput. Misilinneqarnermi kingullermi aalajaatsut nunarsuarmi Jehovamit qitornavissiatut pigineqalissapput ‘Guutillu qitornaasa naalannarsiffissami kiffaanngissuseq’ pigilissallugu. (Rom 8:21) Taamaammat tamatta nakussatsissutaasumik asannillutalu Guutip silarsuartaassaanut nuannersumut annannissamut ikioqatigiikkisa. w18.09 qupp. 11 § 10; qupp. 13 § 18

Guutip oqaasianik atuaqqissaarneq sukkasuumik atuapallannerunanilu apeqqutit akissutaannik titartuinerinnaanngilaq. Atuaqqissaaraangatta Jehovap qanoq ittuunera, iliuuserisai qanorlu eqqarsartaaseqarnersoq eqqarsaatigisarparput. Jehovap taama peqqusineranut inerteqquteqarneranullu pissutaasut paasiniartarpavut. Aamma inuunitsinni eqqarsartaasitsinnilu qanoq allannguisariaqarnerluta eqqarsaatigisarparput. Soorunami atuaqqissaaraangatta tamakku tamaasa tamatigut eqqarsaatigeqqissaarsinnaanngilavut. Kisianni atuaqqissaarnitsinni piffissap affaa eqqarsaatiginneqqissaarnermut atortarutsigu pitsaassaaq. Guutip oqaasianik eqqarsaatiginneqqissaartarutta Jehovap eqqarsartaasia naammalluinnartuusoq ‘paasillualertarparput’. Taassuma isiginnittaasia paasiartulertarparput isumaqatiginerulertarlugulu. ‘Eqqarsartaaserput nutaanngortitaasarpoq.’ (Rom 12:2, NW) Piffissap ingerlanerani Jehovap eqqarsaatai nammineq pigiliukkiartortarpavut. w18.11 qupp. 28 § 5-6

Paulusi allappoq nammineq kristumioqatinilu oqaluussillutillu inunnik sallusuissut pillugu ilinniartitsigamik tassaallutik “Guutip suleqatai”. (1 Kor 3:6) Aamma uagut ‘Guutimut suleqataasinnaavugut’ kajumilluta oqaluussinermi piffissatsinnik, nukitsinnik atuinitsigut pigisatsinnillu Guutip suliassiissutaanut tapersiinitsigut. Tamanna ataqqinaataangaarpoq! Oqaluussinermi ajoqersuinermilu piffissatsinnik nukitsinnillu kajumingaarluta atuinerput nuannaalissutigisarparput. Qatannguterpassuit Biibilimik atuaqqissaaqateqartarsimasut aamma taama isumaqarput. Atuaqqissaaqatigisatta Biibilimi sallusuissutit paasillugit qiimmattaraangata, upperneruleraangata, inuunerminni allannguigaangata ilikkakkatillu allanut ingerlateqqikkaangatigit nuannaangaartarpugut. Jiisusi oqaluussisartut 70-it aallartitani misigisatik pillugit ‘nuannaarlutik utermata’ aamma nuannaarpoq. – Luk 10:17-21. w18.08 qupp. 18 § 11-12

Nammineq paasisimasaqassuserput tatigilersinnaavarput. Isumaqalersinnaavugut paasissutissat tamaasa ilisimanngikkaluarlugit pissutsit nalunagit. Tamanna ulorianarluinnarpoq! Aamma qatanngut qanippallaanngisarput pineqaraangat pissutsit eqqortumik nalilersornissaat sapernarsinnaavoq. Assigiinngissutivut eqqarsaatigiuarutsigit qatannguterput pasillilersinnaavarput. Taanna pillugu ajortumik tusakkavut, ilumoornerannut uppernarsaateqanngikkaluartoq, immaqa uppererusussavavut. Tamanna qanoq ilinniutissartaqarpa? Qatannguterput pillugu ajortunik misigissuseqartuarutta pissutsit piviusut tunngaviginagit eqqunngitsumik inerniliisinnaavugut. (1 Tim 6:4, 5) Misigissutsit ajortut, soorlu usorunneq sinnganerlu, uummatitsinni ineriartortissanngilavut. Puiunngisaannaruk Jehovap qatanngutitsinnik asanninnissarput uummammillu pisumik isumakkeerfiginninnissarput kissaatigigaa. – Kol 3:12-14. w18.08 qupp. 7 § 15; qupp. 8 § 18

Inunnik pinngortitsisuugami Jehovap tamatta pigaatigut. (Tuss 100:3; Saqq 4:11) Inuilli inuusimasut ilaannaat Guutip immikkut ittumik pigisassamisut toqqarpai. Assersuutigalugu Tussiaat 135-mi itsaq Israelimi Jehovamik aalajaallutik pallorfiginnittut ‘immikkut ittumik pigisarineqartutut’ taaneqarput. (Tuss 135:4, NW) Aamma Hoseap Israelikkuunngitsut Jehovamut innuttanngornissaat siulittuutigaa. (Hos 2:25) Jehovap Israelikkuunngitsut Kristusi ilagalugu qilammi naalakkersuisussat toqqartalermagit siulittuut taanna eqquuppoq. (ApS 10:45; Rom 9:23-26) Anersaamik illernartumik tanitat taakku ‘inuiaqatigiinnik illernartunik’ taaneqarput. Taakku Jehovap ‘immikkut ittumik pigai’. (1 Petr 2:9, 10, NW) Nalitsinnimi kristumiut aalajaatsut nunarsuarmi naassaanngitsumik inuunissamik neriugisallit? Jehovap aamma taakku ‘innuttamisut qinikkamisullu’ taavai. – Es 65:22. w18.07 qupp. 21 § 1-2

Jiisusi, tukkortuusinnaanermut maligassiuisoq naammalluinnartoq, ilaarsinnaavarput. Imminut ima aperisinnaavugut: ‘Jiisusip maligassiaa suli annerusumik ilaarsinnaavara?’ (1 Petr 2:21) Jehovap Jiisusillu maligassiaat ilaaraangatsigit Jehovap iluarisarpaa. Taamaaliortarpugut inunnik soqutiginninnikkut taakkualu pisariaqartitaannik eqqumaffiginninnikkut. Jiisusip Samariamiu naakkinnittoq pillugu assersuusiorami tamatuma pingaaruteqassusia ersersippaa. (Luk 10:29-37) Ajoqersukkani allanik, kikkuugaluartunik suminngaanneersuugaluartunillu, ikiuisarnissaannik ilinniartippai. Sooq Jiisusi taama oqaluttuarnersoq eqqaamaviuk? Angutip juutiusup ima aperimmani: “Kinami tulleraara?” Jiisusip akissutaanit erserpoq Jehovamit iluarisaarusukkutta Samariamiutulli tukkortuusariaqartugut. w18.08 qupp. 16 § 5-6

Maria aalajaalluni Jiisusimik perorsaallunilu isumaginnimmat Jehovap iluariuarpaa? Aap. Mariap oqaasiisa iliuusiisalu ilaasa Biibilimut ilanngunneqarnissaat Guutip qulakkeerpaa. Jiisusip ukiuni pingasuni affarmilu oqaluussinerani Mariap angalaqatigisinnaasimagunanngilaa. Immaqa uillarnerugami Nazaretimiiginnartariaqarpoq. Allat misigisaat nuannersorpassuit misiginngitsoorpai. Jiisusili toqummat najuuppoq. (Joh 19:26) Kingusinnerusukkut Jiisusip ajoqersugai piinsip ulluani anersaamik illernartumik taninneqarmata Maria najuuppoq. (ApS 1:13, 14) Ajoqersukkatut allatulli taninneqarunarpoq. Taamaappat naassaanngitsumik Jiisusip qilammeeqatiginissaanut periarfissaqarpoq. Aalajaalluni kiffartorneranut akissarsiap nuannissusia! w18.07 qupp. 6 § 11; qupp. 7 § 14

Najoqqutassiat atorlugit Jiisusip ajoqersukkani ilinniartippai isiginnittaatsit iliuutsillu aalajangersimasut qanoq kinguneqartartut. Assersuutigalugu ilinniartitsivoq kamanneq nakuusernermik kinguneqarsinnaasoq aamma pilerissusipiloqarluni eqqarsarneq allasiornermik kinguneqarsinnaasoq. (Matt 5:21, 22, 27, 28) Jehovap najoqqutassiaanit siulersortikkutta nalunngeqatiginnissuterput ilinniartinneqarluassallunilu Guutimut ataqqinaataasumik aalajangiisinnaassaagut. Allaat kristumiut Biibilimit ilinniartinneqartumik nalunngeqatiginnissuteqaraluarlutik aalajangersimasutigut assigiinngitsunik aalajangiisinnaasarput. Imigassartorniarnerluni aalajangiineq assersuutigeriartigu. Biibilimi imigassartorneq assuarineqanngilaq, imigassartorpallaarnerli aalakoornerlu assuarineqarput. (Uss 20:1; 1 Tim 3:8) Imaappa kristumiu imigassartorniarluni aalajangeruni imigassartorpallaannginnissani kisiat eqqumaffigissagaa? Naamik. Nammineq nalunngeqatiginnissutini naapertorlugu imigassartorsinnaagaluarluni allat nalunngeqatiginnissutaat eqqumaffigisariaqarpaa. w18.06 qupp. 18 § 10-11

Jiisusip eqimattat taakku pingasut ‘seernarsaataannut’, tassa farisiiarit, saddukiiarit Herodesimillu tapersersuisut ajoqersuutaannut, ajoqersukkani mianersoqquai. (Matt 16:6, 12) Soqutiginarpoq Jiisusi inunnit kunnginngortinniarneqaraluarnermi kingunitsianngua taama mianersoqqusimmat. Upperisarsiortut politikkikkut arlaannik tapersersuileraangata nakuusernermik kinguneqarajuppoq. Jiisusip ajoqersukkani ilinniartippai akuliunnaveersaaqqissaassasut. Ilaatigut tamanna pissutigalugu palasiunerit farisiiarillu Jiisusi toqukkusuppaat. Annilaanngatigaat inuit taanna tusaalissagaat malikkunnaassagaatsillu. Taama pisoqarpat upperisarsiornikkut politikkikkullu pissaanertik annaassavaat. Ima oqarput: “Taamaaliortarnera ilaginnarutsigu tamarmik upperfigilersussaassavaat, Romamiullu naalaffipput inuiaqatigiiusugullu tiguariartussavaatigut.” (Joh 11:48) Taamaattumik palasiunerup Kajfasip Jiisusimik toqutsinissaq pilersaarusiorpaa. – Joh 11:49-53; 18:14. w18.06 qupp. 7 § 12-13

Saatanip neqitaq atortagaasa ilaat tassaavoq anersaarsiornernik alapernaassuseq. Ullumikkut upperisarsiorneq eqqunngitsoq aliikkutassallu atorlugit inuit anersaapilunnik soqutiginnilersinniartarpai. Isiginnaagassiat, spillit aliikkutassallu allat anersaarsiornermik pissanganarsaarisarput. Neqitaq tamanna qanoq ingalassimasinnaavarput? Aliikkutassat suut ajunngitsuunerannik ajortuunerannillu allattorsimaffimmik Guutip peqatigiissortaannit tunineqarnissarput naatsorsuutigissanngilarput. Jehovap najoqqutassiai tunngavigalugit pitsaasumik aalajangiisinnaajumalluta nalunngeqatiginnissuterput sungiusartariaqarparput. (Hebr 5:14) Guutimillu asanninnerput ‘pisuusaarnerunngippat’ silatusaartumik aalajangiisassaagut. Inuk ilumoortuusaartoq oqaatsini malillugit iliorneq ajorpoq. Taamaattumik aliikkutassanik toqqaaleraangatta imminut aperisarsinnaavugut: ‘Najoqqutassiat allanut ilinniartitsissutigisakka malippakka? Biibilimik atuaqqissaaqatigisartagara oqaluussiffigisartakkakkaluunniit allat aliikkutakka takugunikkit qanoq eqqarsassappat?’ Najoqqutassiat allanut ilinniartitsissutigisartakkavut maleruarutsigit Saatanip neqitaata nigorsimanissaa ajornannginnerutilissavarput. – 1 Joh 3:18. w18.05 qupp. 19 § 13

Paulusi qanoq ilaarsinnaavarput? Siullertut, inuit “eqqortumik isiginnittaaseqarnertik pissutigalugu naassaanngitsumik inuulersinnaasut” nassaarinissaat kissaatigingaassavarput. Aappaattut, Jehova qinnuigisarparput inuit eqqortuliorusuttut oqaluussiffigisatta uummataat ammaqqullugit. (ApS 13:48, NW; 16:14) Silvana ukiut 30-t pallillugit pioneriusoq taama iliortarpoq. Ima oqarpoq: “Oqaluussiffigisartakkanni illumukannginninni Jehova qinnuigisarpara isumalluartumik isiginnittaaseqarnissamut ikioqqullunga.” Aamma inuit tusarnaarusuttut nassaariniassagatsigit qinnutigisarparput inngilinit ikiorneqarnissarput. (Matt 10:11-13; Saqq 14:6) Robert ukiut 30-t sinnerlugit pioneriusoq oqarpoq: “Inngilinik, inuit qanoq atugaqarnerannik ilisimannittunik, suleqateqarneq pissanganartuuvoq”. Pingajuattut, inuup ajunngitsortai Jehovamullu kiffanngorsinnaanera isiginiarnerusarpavut. Carl utoqqaanertaq ima oqarpoq: “Inuup ajunngitsumik isiginnittaaseqarneranut takussutissaarannguit, immaqa qungujunnera, inussiarnerpasinnera imaluunniit ilumoorluni aperinera, maluginiartarpakka.” Taamaaliorutta Paulusitut ‘nikallujuilluta inerititaqarsinnaavugut’. w18.05 qupp. 6 § 13; qupp. 7 § 15

Siusinnerusukkut ikiorsimasatta aalajaattuarnerat tusarlugu nuannaarutigisarparput. Apustili Johannesi ima allappoq: “Qitornakka sallusuissummi inuusut tusarlugit tassa tamanit uannut nuannernerpaaq.” (3 Joh 4) Pionerit amerlasuut sallusuissummik ilinniartissimasamik aalajaallutik Jehovamut kiffartortuarnerat, immaqa allaat pioneriunerat, tusarlugu nuannaarutigingaartarpaat. Taamaattumik pionerit nikallungappata allat ikiorniarlugit ajunngitsuliarpassui pillugit eqqaasissinnaavavut. Ilagiinnik nakkutilliisut amerlasuut oqarput ilagiinnut tikeraareerlutik allakkamik qujassummik nassitsivigineqarnertik nuliatillu qiimmaallaatigisarlugu. Tamanna aamma utoqqaanertanut, ajoqersuiartortitanut, pionerinut Betelimilu kiffartortunut, Jehovamut aalajaallutik kiffartortunut tamanut, atuuppoq. Qutsaviginerisigut immaqa nalusatsinnik qiimmaallatsingaarsinnaavavut. w18.04 qupp. 24-25 § 14-15

Salomop inatsit taanna unioqqutippaa. Naggataatigut 700-nik nuliarlunilu 300-nik panerfaqalerpoq! (1 Kng 11:3) Arnat taakkua amerlasuut allamiuupput guutipilunnik pallorfiginnittut. Taamaattumik arnanik allamiunik nuliartaannginnissaq pillugu Guutip inatsisaa Salomop unioqqutippaa. (5 Mos 7:3, 4) Jehovap inatsisai Salomop nuannariunnaariartorpai. Naggataatigut ajortorujussuarnik iliuuseqartalerpoq. Guutipilummut arnamut Astartemut aamma guutipilummut Kemoshimut pilliiviliorpoq nulianilu ilagalugit taakku pallorfigalugit. Salomop allaat pilliiviit taakkua Jerusalemimi Jehovap naalaffiata sanaami akiani qaqqami sanavai. (1 Kng 11:5-8; 2 Kng 23:13) Immaqa Salomo imminut salloqittarluni eqqarsarpoq naalaffimmi pilliuteqartaruni ajortuliani Jehovap soqutiginngitsuusaassagai. Jehovalli ajortuliornerit soqutiginngitsuusaanngisaannarpai. w18.07 qupp. 16-17 § 7-9

Saatanip ‘qarsut ikumasut’ qanoq ittut atorlugit eqqoriarsinnaavaatit? Immaqa Jehova pillugu salluliuutit atorlugit saassuttarpaatit. Saatanip Jehovamit asaneqanngitsutut allanillu soqutigineqanngitsutut misigitikkusuppaatit. Ida, 19-inik ukiulik, ima oqarpoq: “Misigisarpunga Jehovap ungasikkaanga ikinngutigerusunngikkaangalu.” Taamatut misigigaangami qanoq iliortarpa? “Ataatsimiinnerit uppernikkut assut nakussatsissutigisarpakka. Isumaqartarama qanoq oqaasissaqartunga soqutigineqanngitsoq akinngisaannarpunga. Maannali ataatsimiinnernut piareersartarpunga marloriarlungalu pingasoriarlungaluunniit akiniartarlunga.” Sakkutuup eqqortinnaveeqqutaata angissusia allanngorneq ajorpoq. Idalli misigisaanit paasivarput uppernerput taamaanngitsoq. Uppernerput allisinnaavoq qumarsinnaallunilu, nakussatsissinnaavoq sanngiillisinnaallunilu. Uagut apeqqutaaginnarpugut. (Matt 14:31; 2 Th 1:3) “Uppernerup eqqortinnaveeqqutaa” illersuutigissagutsigu anginerulersittariaqarlugulu mattunerulersittariaqarparput! w18.05 qupp. 25 § 12-14

Parnaarussanik paarsisup nunap sajunnerata kingorna aatsaat isiginnittaatsini allanngortippaa ikioqqullunilu. (ApS 16:25-34) Taamatuttaaq inuit ilaat oqariartuummik Biibilimeersumik tusarnaarusussimanngitsut inuunerminni alianartumik pisoqarnera pissutigalugu isumartik allanngortissinnaavaat ikiortissarsiorlutillu. Ilaat immaqa suliffimmit soraarsitaanertik pissutigalugu qanoq iliuusissaarussinnaapput. Allat perulunnartumik nappaateqalernertik imaluunniit qanigisamik toqukkut annaasaqarnertik aliasuutigingaarsinnaavaat. Taakkua inuuneq pillugu apeqqutit eqqarsaatigisimanngisaannakkatik apeqqutigisalersinnaavaat. Immaqa allaat eqqarsartarput: ‘Qanoq iliussaanga annaanneqarumallunga?’ Imaassinnaavoq neriuut pillugu oqariartuutitsinnut aatsaavissuaq tusarnaarusulersut. Taamaattumik aalajaalluta oqaluussiuarutta inuit tuppallersarneqarnissamut piareertut attavigeriaannaassavaatigut. – Es 61:1. w18.05 qupp. 12 § 10-12

Nalitsinni inuppassuit Saatanimit tappiillisinneqaramik naluaat upperisarsiornermut eqqunngitsumut, nunap piinut politikkikkullu aaqqissuussanut inussiaallutik. (2 Kor 4:4) Uagut inuit allat Jehovamik, Guutimik kiffaanngissuseqartitsisumik, ilisarisimannilernissamik pallorfiginnilernissamillu ikiornissaat Jiisusitut immikkut pisinnaatitaaffigaarput. (Matt 28:19, 20) Allanut oqaluussineq imaannaanngilaq. Sumiiffiit ilaanni inuit soqutiginninngillat, allaat ilaat oqaluussiffigineqaraangamik kamattarput. Jehovalli oqaluussinissatsinnik peqqummatigut imminut ima aperisariaqarpugut: ‘Kiffaanngissusera Jehovamut kiffartornermi iliuuseqarnerunissamut atorsinnaavara?’ Jehovap innuttaasa ilarpassuisa naggatissap qanillinera paasisimagaat inuunerminnillu pisariillisaaniarlutik pionerinngorniarlutillu aalajangersimanerat qiimmaallannarpoq. (1 Kor 9:19, 23) Ilaat illoqarfimminni pioneriupput allallu ilagiinnut pisariaqartitsiffiusunut nuussimallutik. Jehovamut kiffartornermut kiffaanngissutsiminnik taamatut atuinerat nuanningaarami! – Tuss 110:3. w18.04 qupp. 7-8 § 13-14