Septembari

Jiisusip Martha Marialu misiginneqatigai. Taakkua qatanngummik toqunera pillugu aliasungaartut takugamigit “Jiisusi qissaserpoq”. (Joh 11:32-35) Ikinngutiminik qanigisaminik annaasaqarnini pissutigiinnarlugu qianngilaq, nalunngilaami Lazarusi makitikkumaarlugu. Asasamili aliasunnerat paasigamiuk tamanna sunnerneqaatigalugu Jiisusi qialerpoq. Jiisusip inunnik misiginneqataanera pillugu ilinniarnerput qiimmassaataavoq. Misiginneqataalluni allanik pinnittarnera asanissaanut killinneqaatigisarparput. Maannalu Guutip naalagaaffiani kunngiusoq nalunagu qiimmaallannarpoq. Qanittukkut naalliuutit tamaasa atorunnaarsissavai. Nammineq inuttut nunarsuarmiinnikuugami naalliuutinit anniaatinillu Saatanip aqutsinerata kingunipiluinit aniguisitsinissamut Jiisusi piukkunnarnerpaavoq. ‘Qajannassutsitsinni naakkiginnissinnaasumik’ naalagaqarnerput pilluaqquneqaatigaarput. – Hebr 2:17, 18; 4:15, 16. w19.03 qupp. 17 § 12-13

Guuti pillugu ilinniartitsinermi ikiuutaangaarsinnaavugut, suliamili tamatumani pingaarnerpaanngilagut. (1 Kor 3:6, 7) Jehovami inunnik kajungilersitsisuuvoq. Aamma inuit uummammiui apeqqutaallutik nutaarsiassaq nuannersoq akuerisarpaat akuerinaguluunniit. (Matt 13:4-8) Eqqaamajuk Jiisusi nunarsuarmi inuusimasuni ilinniartitsillaqqinnerpaajugaluartoq inuit amerlanersaasa taassuma tusarliussaa itigartimmassuk. Taamaattumik inuit ikiorusutatta ilarpassui tusarliussatsinnik tusarnaarusunngikkaluarpata nikallussanngilagut. Oqaluussinermi misiginneqataanermik ersersitsinerput iluaqutaassaaq. Oqaluussinerput nuannaarutiginerulissavarput tunisinerullu pilluarnarnerunera misigalugu. Aamma “eqqortumik isiginnittaaseqarnertik pissutigalugu naassaanngitsumik inuulersinnaasut” nutaarsiassamik nuannersumik akuerinninnissaat ilimanarnerussaaq. (ApS 13:48, NW) “Taamaattumik piffissaqarallartilluta tamanut ajunngitsuliorniarta.” (Gal 6:10) Taamaalilluta Ataatatta qilammiusup naalannarsisinnera nuannaarutigissavarput. – Matt 5:16. w19.03 qupp. 25 § 18-19

Kunngi Daavi allappoq: “Angingaarpoq Naalagaq unnersiutigineqangaarlunilu.” (Tuss 145:3) Daavip Jehova asavaa, asanninninilu ‘katersorsimasuni’ Guutimik ‘unnersiutiginninnissaminut’ kajumississutigalugu. (1 Nal 29:10-13; Tuss 40:6) Nalitsinni Jehovamik unnersiutiginneriaatsitta ilaat tassaavoq kristumiut ataatsimiinnerini akisarneq. Ataatsimiinnitsinni akissutit assigiinngisitaartut tamatta nuannaraavut. Meeqqat unneqqarillutik naatsunnguamik akigaangata nuannaartarpugut. Arlaat eqqortoq paaseqqammisani pillugu nuannaarluni akisoq qiimmaallaatigisarparput. Aamma ilaat ittooraluarlutik oqaatsitsinnilluunniit ilinnialeqqammiinnarlutik sapiillutik akisut alutorisarpavut. (1 Th 2:2) Akinerannut qanoq qujamasunnitsinnik ersersitsisinnaavugut? Ataatsimeereernermi qiimmaallaataasumik akinerat pillugu qujaffigisinnaavavut. Aamma nammineq akinitsigut taamaaliorsinnaavugut. Taava ataatsimiinnerni uagut qiimmassarneqaannarata aamma allat qiimmassarsinnaavavut. – Rom 1:11, 12. w19.01 qupp. 8 § 1-2; qupp. 9 § 6

Angutit qulit ilungersunartorsiorput – pupissuupput aaqqinnissamullu neriuuteqaratik. Ilaannili Ajoqersuisorsuaq, Jiisusi, ungasianit takulerpaat. Tusarsimavaat Jiisusip inuppassuit napparsimasut ajorunnaarsissimagai. Taamaattumik ima nillerput: “Jiisusi ajoqersuisoq, naakkigitigut!” Jiisusip ajunngisaarfigalutik ajorunnaarsimmatik angutit qularnanngitsumik qujamasungaalersimassapput. Ataaserli qujamasuttutut misigiinnarnani Jiisusimut qujamasunnini ersersippaa. Angutip taassuma Samariamiup “nipituumik Guuti unnersiutigaa.” (Luk 17:12-19) Samariamiu ilaarlugu uaguttaaq ajunngitsuliortunut qujamasunnerput ersersikkusupparput. Jehova, ilaatigut iluarisaminik akissarsisitsisarnermigut, qujamasunnermik ersersitsinissamut tunngatillugu uagutsinnut maligassiuivoq. (2 Sam 22:21; Tuss 13:6; Matt 10:40, 41) Biibilimi ima kajumissaarneqarpugut: “Guuti maligassarisiuk taassumunnga qitornaasutut asasaasutut.” (Ef 5:1) Tassa Jehovamik ilaarserusunnerput qujamasunnermik ersersitserusunnitsinnut pingaarnertut pissutaavoq. w19.02 qupp. 14 § 1-2, 4

Niviarsiaraq atuarfimmi nalliuttorsiornermut Guutip iluarinngisaanut ataqqinnilluni peqataajumanngilaq. Angutip inuusuttup matumiit matumut oqaluussitilluni atuaqatimi ilaat Jehovap Nalunaajaasuinik illaruaatiginnittareersimasoq kasuttorfigaa. Angut tamaviaarluni ilaquttaminik pilersuisoq ittuminit unneqqaserluttumik inerteqqutaasumilluunniit ilioqquneqarpoq. Soraarsitaasinnaagaluarluni angutip nassuiarpaa Guutip kiffami unneqqarinnissaannik inatsisinillu maleruaanissaannik piumasaqarnera pissutigalugu taamaaliorsinnaanani. (Rom 13:1-4; Hebr 13:18) Inuit pingasut taakku qanoq ittumik pissuseqarpat? Arlallit, soorlu sapiissuseq unneqqarissuserlu, immaqa maluginiarpatit. Pissuserli ataaseq erlinnartoq ersarilluinnarpoq – assuarnaassuseq. Tamarmik Jehova ilumoorfigaat, Guutip najoqqutassiai unioqqutikkusunngilaat. Assuarnaassuseq pissutigalugu iliuuseqarput. Taamatut tamarmik immikkut pissuseqarmata Jehovap tulluusimaarutigisimassavai. Uaguttaaq Ataatarput qilammiusoq tulluusimaartikkusupparput. w19.02 qupp. 2 § 1-2

Imminnut illersoriarsinnaanngitsut Inatsisinit immikkut illersorneqartarput. Taakkununnga ilaapput angajoqqaaqanngitsut, uillarnerit takornartallu. Israelimi eqqartuussisut ima piumaffigineqarput: “Takornartanut iliarsunnullu eqqartuussutissaq mumissanngilat uillarnerulluunniit atisai sallunaveeqqutissatut tigussanagit.” (5 Mos 24:17) Innuttaasuni qajannarnerpaat Jehovap immikkut soqutiginninnermik ersersitsivigisarpai, taakkuninngalu ajortumik pinnittut pillartarlugit. (2 Mos 22:21-23) Akisussaaffilerneqarsimasut asannillutik nakkutigisaminnik soqutiginnissasut Jehovap piumasaraa. Kinguaassiuutitigut pinerlunnerit uumigai kikkullu tamarmik, pingaartumik qajannarnerpaat, illersorneqarlutillu naapertuilluartumik pineqarnissaat qulakkeerusullugu. Jehova asanerulissavarput qularutiginngilluinnarutsigu naapertuilluartumik pisaraatigut. Aamma Guutimik asanninnerput najoqqutassiaanillu naapertuilluartunik nuannarinninnerput allat asanissaannut naapertuilluartumillu pinissaannut kajumississutigisarpavut. w19.02 qupp. 24-25 § 22-26

Saatanip eqqarsartaasianut immitsinnut qanoq illersorsinnaanitsinnik assersuut eqqarsaatigiuk. Jehovap ilinniartippaatigut ‘kinguaassiuutitigut inuunerlunneq mingunnartullu suulluunniit taaneqassanngitsut akornatsinni’. (Ef 5:3) Atuaqatittali suleqatittaluunniit kinguaassiuutitigut inuunerlunnermut tunngasut eqqartulerpatigit susariaqarpugut? Alapernaarsuisuutitaq, nalunngeqatiginnissuterput, immaqa kalerrisaarissaaq. (Rom 2:15) Tusarnaassavarpulli? Immaqa paarlattuanik peqatitta tusarnaarnissaannut imaluunniit assit avitseqatigisaasa isiginnaarnissaannut ussernartorsiussaagut. Allanik eqqartuilernikkut allamukarnikkulluunniit navianartut nigortariaqarpavut. Eqqunngitsumik eqqarsaateqarnissamut iliuuseqarnissamulluunniit peqatitsinnit tatineqarneq akiussagutsigu sapiittariaqarpugut. Qularinngissinnaavarput Jehovap iliuutsivut takugai, aamma Saatanitut eqqarsartaaseqarnerup akiornissaanut pisariaqartumik nakussatsissallutalu ilisimassuseqalersissavaatigut. – 2 Nal 16:9; Es 40:29; Jaak 1:5. w19.01 qupp. 17-18 § 12-13

Salomo, inuusimasuni pisuujunerpaat pissaaneqarnerpaallu ilaat, misiliiniarluni aalajangerpoq. Imminut oqarfigaaq: “Misileriassagiga nuannaarluni pilluarlunilu inuuneq.” (Oqal 2:1-10) Salomo illorujussualiorpoq, naatsiiviliarsuit ilusilersorlugit piumasanilu suulluunniit iliuuserisarlugit. Nalerisimaartutut pilluartutullu misigiva? Iliuuserisimasani kingumut qiviarlugit ullormut allassimaffimmi allassimasoq oqaatigaa. Salomop misilittagaa ilinniutigaajuk? Inuit ilaat aatsaat kukkugaangamik kingunipiluilu naalliuutigereeraangamikkit ilikkagaqartarput. Jehovap tamanna ilinnut kissaatiginngilaa. Tusarnaassaginni naalassaginnilu kissaatigaa. Taamaaliussagaanni upperneq pisariaqarpoq, inuuninnili uppernerit pissutigalugu aalajangikkatit peqqissimissutiginngisaannassavatit. Jehovallu ‘asanninnerit aqqanut takutissimasat’ puiunngisaannassavaa. (Hebr 6:10) Taamaammat upperluartuujumallutit ilungersorit. Taamaalioruit inuuninni ajunngitsunik aalajangiillutillu paasissavat Ataatappit qilammiusup pitsaanerpaaq ilinnut kissaatigigaa. – Tuss 32:8. w18.12 qupp. 18 § 14-15

Inuk anersaakkut ittunik pingaartitsisoq Guutimut upperlunilu Guutip isiginnittaasia pigiliunniartarpaa. Inuunermini Jehovamit siulersortittarpoq taassumunngalu naalannissani aalajangiusimallugu. (1 Kor 2:12, 13) Daavi anersaakkut pingaartitsisuunermut tunngatillugu maligassiuilluarpoq. Ima erinarsorpoq: “Naalagaq, illit tassaasutit pisassara.” (Tuss 16:5) Daavi ‘pisassani’, Guutimut qanittumik attaveqarnini, pillugu qujamasuppoq taassumunngalu qimarnguffissarsiorluni. (Tuss 16:1) Taamaammat oqarsinnaavoq: ‘Tarniga qiimmattarpoq’. (Tuss 16:9, 11) Inuit aningaasanik aliikkutanilluunniit pingaarnerpaatitsisut Daavitulli nuannaartigisinnaanngillat. (1 Tim 6:9, 10) Jehovamut uppernermik ineriartortitsillutillu kiffartuukkukku siunertaqarluartumik nalerisimaarnangaartumillu inuuneqassaatit. Uppernerulerumallutit qanoq iliorsinnaavit? Jehova peqatigisariaqarpat, tassa oqaasianik atuartariaqarputit, pinngortitaa qimerloorlugu taassumalu pissusii ilinnullu asanninnera eqqarsaatigalugit. – Rom 1:20. w18.12 qupp. 22-23 § 7-8

Paulusip katissimaneq pillugu taama oqarnera oqaaseqalaaginnarnerunngilaq. Kristumiut allaffigai aappariinneq ataqqisariaqaraat, tassa erlinnartutut isigisariaqaraat. Pingaartumik illit aappaqaruit aappariinneq taamatut isiginnittaaseqarfigaajuk? Aappariinneq erlinnartutut isigigukku maligassiuilluartut ilaarpatit. Jiisusip aappariinneq ataqqivaa. Farisiiarit avittarneq pillugu aperimmanni Guutip aappariinneq siulleq pillugu oqaasiinut innersuussivoq: “Tamanna pillugu angutip ataatani anaananilu qimassavai ... taakkulu marluk uininngussapput ataaseq.” Jiisusi nangippoq: “[Guutip] ataqatigiilersitai inuup avissaartissanngilai.” (Mark 10:2-12; 1 Mos 2:24) Aappariinnerup Guutimit pilersinneqarnera ataavartuusariaqarneralu Jiisusip isumaqataaffigaa. Guutip aappariinneq siulleq pilersikkamiuk Adami Evalu avissinnaanerannik oqarfiginngilai. Taakkuli “marluk” naassaanngitsumut ataqatigiittuarnissaat siunertaraa. w18.12 qupp. 9-10 § 2-4

Sallusuissut ilinniaqqaaleratsigu Jehovap tunngaviusumik peqqussutaasa naalattarnissaat qanoq pingaaruteqartigisoq paasivarput. Anersaakkulli siumukartilluta Jehovap eqqarsartaasia – nuannarisai, nuannarinngisai assigiinngitsunullu tunngatillugu isiginnittaasia – ilikkariartortarparput. Tamannalu aalajangikkatsinnut iliuutsitsinnullu sunniuteqassaaq. Jehovatut eqqarsarnissap ilinniarnera nuannarisinnaagaluarlugu naammalluinnanngitsuugatta ilaannikkut unamminiarnarsinnaavoq. Assersuutigalugu ileqqussatigut minguitsuuneq, pigisalerituneq, oqaluussineq, aammik atornerluineq allallu pillugit Jehovap isumaa nalunngilarput. Ilaannikkulli sooq taama isiginnittaaseqarneranut pissutaasut paasiuminaatsissinnaavavut. Jehovap eqqarsaatai nammineq pigiliunniarnerini siumukarniarluta qanoq iliorsinnaavugut? Eqqarsartaaserput nutaanngortittariaqarparput. Tassa Guutip oqaasia atuaqqissaartariaqarparput, eqqarsaatai paasiniarlugit eqqarsaatigeqqissaartariaqarpavut taassumalu eqqarsartaasia pigiliunniartariaqarparput. w18.11 qupp. 27-28 § 2-4

Piffissami unamminiarnangaartumi Habakkuki inuuvoq. Inuit nalimini inuusut ajortuullutillu nakuuserumatuujummata isumatsaqqangaarpoq. Nunaqqatai imminnut ajortumik naapertuilluanngitsumillu pisarput. Habakkuki ima eqqarsarsimassaaq: ‘Qaqugu ajortoqarunnaassagami? Sooruna Jehova iliuuseqarnissaminut taama utaqqitigisoq?’ Ikiortissaaruttutut misigigami Jehova iliuuseqaqqullugu qinnuigaa. Habakkuki immaqa eqqarsalerpoq Jehovap innuttani soqutigiunnaarsimallugilluunniit iliuuseqarnianngitsoq. Taama misiginikuuit? Jehova neriorsuutaalu tatigiunnaarsimagamigit Habakkuki taama aperiva? Taamaanngilaq! Isumakuluutini ajornartorsiutinilu pillugit Jehovamut ikioqquneranit erserpoq neriuutaarunnani Guuti suli tatigigaa. Isumakulullunilu nalornissuteqarpoq. Paasinngilaa sooq Jehova iliuuseqarnissaminut utaqqillunilu Habakkukip taama naalliutsiginissaa akuerigaa. w18.11 qupp. 16 § 4-5

Petrusi Andreasilu aalisartuupput, ajoqersuganngoqqullutilli Jiisusimit kajumissaarneqaramik aalisartuujunnaarput. (Matt 4:18-20) Soorunami ullumikkut sallusuissummik ilinniartut amerlanerit suliffimminnit soraaginnarsinnaanngillat. Ilaquttat pilersorumallugit suliffeqartariaqarpoq. (1 Tim 5:8) Sallusuissulli ilikkarakku nunap piinut tunngasut pillugit eqqarsartaatsit allanngortippat. Inuunermi suna pingaaruteqavinnersoq paasivat. Mariap misigisimasaa eqqarsaatigeriaruk. Mariap golferneq inuussutissarsiutigalugu pisuunngornissani siunertaraa. Taava Biibilimik atuaqqissaartalerpoq. Ilikkakkani nuannarai inuunerminilu malerualerlugit. Mariap paasivaa Jehovamut attaveqarnini timersornermillu inuussutissarsiuteqarneq ataatsikkut pingaartissinnaanagit. (Matt 6:24) Taamaattumik golfimik inuussutissarsiuteqarniarnini siunertariunnaarpaa. Maria ullumikkut pioneriuvoq, oqarporlu tamanna “pilluarnarnerpaajullunilu nalerisimaarnarnerpaasoq”. w18.11 qupp. 6 § 9-10

Oqaluussineq pingaarnerpaajusoq nalunnginnamiuk Jiisusi 30-nik ukioqarluni sanasuujunnaarluni ilinniartitsisalerpoq. Oqarpoq nunarsuarmut Guutimit aallartinneqarnerminut Guutip naalagaaffianik nutaarsiassamik nuannersumik oqaluussissutiginninneq pissutaasut ilagigaat. (Matt 20:28; Luk 3:23; 4:43) Jiisusip tamatuminnga oqaluussissutiginninneq inuunermini pingaarnerpaatillugulu allat oqaluusseqataasalernissaat kissaatigaa. (Matt 9:35-38) Amerlanersavut sanasuunngillat, tamattali nutaarsiassamik nuannersumik allanut ilinniartitsisuuvugut. Suliaq tamanna pingaaruteqaqimmat Guuti suleqatigaarput. Aap, ‘Guutip suleqataatut’ taaneqarpugut. (1 Kor 3:9; 2 Kor 6:4) Tussiaasiortup oqaasii uku isumaqatigaavut: “Oqaatsivit isumaviat tassa sallusuissut.” (Tuss 119:159, 160) Taamaammat “oqaatsimik sallusuissutaasumik eqqortumik” (NW) atuinissarput qulakkeerusupparput. (2 Tim 2:15) Biibilimik – Jehova, Jiisusi Naalagaaffillu pillugit ilinniartitsinitsinni atortumik pingaarnerpaamik – atuillaqqinnerulerusuppugut. w18.10 qupp. 9 § 1-2

Uiusoq niaqquminik, Jiisusimik Kristusimik, asannittumik ilaarsippat nuliata qamannga pisumik ataqqinissaa ajornannginnerutissavaa. (Ef 5:22-25, 33) Nuliaasup ataqqinnittup uimi misigissusii paasiniassavai. Angajoqqaat imminnut innimittartumik pisarunik meeqqaminnut maligassaalluassapput. Aamma meeqqatik allanut innimittarnissamik ilinniartittariaqarpaat. Assersuutigalugu angajoqqaat meeqqatik naalagaaffilersaarfimmi arpattannginnissamik ilinniartissinnaavat. Imaluunniit katerisimaarnerni meeqqatik oqarfigisinnaavaat utoqqaat siulliullutik nerisassanik tigusisassasut. Meeraq innimittaraangat, assersuutigalugu matumik ammaakkaangatigut, nersualaartassavarput. Tamanna meeqqap nuannaalissutigissavaa ‘tunisinerullu tigusinermit pilluarnarnerunerata’ paasinissaanut iluaqutigissallugu. w18.09 qupp. 28 § 5-6

Kristusimit, Kunngitsinnit, siulersorneqarnerput maanna siunissamilu iluaqutigissavarput. Qanittukkunni allannguutini naleqqussarnerit qanoq iluaqutigisimallugu eqqarsaatigiuk. Ataatsimiinnerni oqaluussinermiluunniit allannguutit qanoq iluaqutigisimanerlusigit ilaqutariittut atuaqqissaarnissinni eqqartorsinnaavasi. Jehovap peqatigiissortaanit ilitsersuussutit maleruarnerisa ajunngitsorpassuarnik kinguneqartarnera eqqaamagutsigu ilitsersuussutip malinnissaa nuannaarnissarlu ajornannginnerussaaq. Assersuutigalugu siornatigutut naqiterisariaqannginnerput aningaasatigut sipaarutigaarput. Teknologiikkullu atortorissaarutit atornerisigut inuit amerlanerusut nutaarsiassamik nuannersumik tusarlersinnaavavut. Nammineq Biibililersaarutit elektroniskiusut atornerusinnaavavut? Taamaaliornikkut Kristusi, peqatigiissortatta pigisaanik silatusaartumik atuerusuttoq, tapersersorsinnaavarput. Kristusip siulersuinera tapersersoraangatsigu qatanngutivut uppernerulernissaannik ataasiussuseqarnerulernissaannillu ikiortarpavut. w18.10 qupp. 20-21 § 17-19

Jehovatut qanilaartuugaangatta qatanngutitta qinnutigisaatut tuppallersaasinnaavugut. (2 Kor 1:3-6) Qatanngutivilli naammalluinnartuunissaat naatsorsuutigissanngilat. Piviusorsiortuugit. Qatanngutivit kukkunngisaannarnissaat naatsorsuutigigukku pakatsissaatit. (Oqal 7:21, 22) Jehovap uagutsinnit piumasaqaatimigut piviusorsiortuunera eqqaamajuk. Taamaattumik allat kamagittarfigisariaqarpavut. (Ef 4:2, 32) Qatanngutivut iliuuseqarpianngitsutut misigilersikkusunnagillu allanut sanilliukkusunngilavut. Qiimmassarlugilli iliuusaat ajunngitsut pillugit nersualaarpavut. Tamanna Jehovamik kiffartornerminni nuannaarnissaminnut iluaqutigisinnaavaat. – Gal 6:4. w18.09 qupp. 13 § 16-17

Guutip piumasaatut iliorneq Jiisusip nerinertut isigaa. Peqqinnartunik nerinitta nalerisimaartitsisarneratut timitsinnillu nakussatsitsisarneratut Guutip piumasaatut iliornerput nalerisimaalissutigalugulu uppernikkut nakussatsissutigisarparput. Jehovap piumasaatut iliorutta ilisimassuseqassaagut. (Jaak 3:13) Ilisimassuseqartut ajunngitsorpassuarnik atugaqartarput. “Pilluarpoq inuk ilisimassusermik pissarsisoq, inuk siuneqarluartunngorsimasoq. ... Ilisimassut sapanngarissunit erlinnarneruvoq, pisuussutivit suugaluartulluunniit allat nallersinnaanngilaat. ... Aalajangiussisiminut tamanut orpiuvoq inuunartoq, pilluarput taassuminnga iperaanaveersaartut.” (Uss 3:13-18) Jiisusi oqarpoq: “Tamanna ilisimagussiuk taava pilluassaasi taamaaliorussi.” (Joh 13:17) Ajoqersukkat Jiisusip peqqusineratut iliortuarunik pilluassapput. Ilinniartitsissutaanik maligassiaanillu maleruaaneq inooriaaserilerpaat. w18.09 qupp. 4 § 4-5

Adamip Evallu naatsiivimmi Edenimi marluinnaagaluarlutik allat eqqarsaatigisussaagaluarpaat. Sooq? Jehovamit suliassinneqaramik. Nunarsuaq qitornaminnik tamakkissagaat paratiisinngortissagaallu taassuma piumasaraa. (1 Mos 1:28) Adamip Evallu qitornartaassatik pilluarnissaat kissaatigisussaagaluarpaat, soorlu Jehovap tamarmik pilluarnissaat kissaatigigaa. Tamarmiullutik nunarsuaq paratiisinngortillugu suleqatigiittussaagaluarput. Tamanna suliassarujussuussagaluarpoq nuannersoq! Inuit naammalluinnartut nunarsuaq paratiisinngortinniarlugu Jehovallu piumasaa naammassiumallugu taanna aamma qanimut suleqatigisariaqarpaat. Taamaaliornikkut taassuma qasuersaarfianut isissagaluarput. (Hebr 4:11) Suliap tamatuma qanoq nalerisimaarnartigissagaluarnera nuannertigissagaluarneralu takorlooruk! Taakku namminissarsiunnginnerannut allanullu isumaginnittuunerannut Jehovap pilluaqqungaarsimassagaluarpai. w18.08 qupp. 15 § 2; qupp. 17 § 8-9

Allat illit pillutit salluliorpata qanoq iliorsinnaavit? Jiisusi Johannesilu Kuisisoq taama pineqarput. (Matt 11:18, 19) Jiisusi qanoq iliorpa? Piffissani nukinilu tamaasa atorlugit oqaluttuat taakkua ilumuunnginnerannik inuit qularunnaarsinnianngilai. Inuilli pissutsinik piviusunik paasiniaaqqullugit kajumissaarpai. Iliuutsiminik ilinniartitsissutiminillu maluginiaassasut kissaatigaa. Ima oqarpoq: “Ilisimassuseq eqqortuutitaavoq suliamigut.” Jiisusi pingaarutilimmik ilinniarfigisinnaavarput. Inuit uagut pilluta naapertuilluanngitsumik ajortumilluunniit oqaaseqarsinnaasarput, tamannalu tusaamanerlugaalernitsinnik kinguneqassanersoq isumakuluutigisinnaavarput. Qanorpiarli ittuunerluta inooriaatsitsigut allanut takutissinnaavarput. Jiisusip maligassiaanit ilikkakkatsitut pissuserinnitsigut ilaannakuusumik ilumoortut unnerluussutilluunniit eqqunngitsut inooriaatsitta uppernarunnaarsissinnaavai. w18.08 qupp. 6-7 § 11-13

Kaini, Salomo Israelikkullu naalanngikkaluartut peqqissiminissamut pissuserisaminnillu allannguinissamut periarfissaqarput. (ApS 3:19, 20) Ersarippoq Jehovap innuttani kukkunerat piinnarlugu immineerneq ajorai. Aronimik qanoq isumakkeerfiginnittoq eqqarsaatigiuk. Ullumikkut Jehovap ajortuliunnginniassagatta asannilluni mianersoqqusarpaatigut. Biibili, Biibililersaarutit allaallu kristumioqativut atortarpai. Jehovap mianersoqqussutai eqqumaffigisarutsigit nallittorumaaraatigut qularinngissinnaavarput. Jehovap pisassarinngisaraluamik ajunngisaarnera siunertaqarpoq. (2 Kor 6:1) Tamatumuunakkut “iluaatsuussusermut silarsuarmiullu kajungerisaannut” naaggaarnissamut periarfissaqarpugut. (Tit 2:11-14) Pissutsit aaqqissuussaaneranni matumani Jehovamik ilumoorfiginninnitsinnut misilinneqaataasumik pisoqartuassaaq. Jehovamut naalattuarnissat aalajangiusimajuk! w18.07 qupp. 20 § 20-21

Silarsuarmit iluarisaarusukkunnaassutigisatsinnik Jehovamit iluarisaarusunneq qanoq aalajangiusimanerulersinnaavarput? Ilumoortut pingaarutillit marluk eqqaamasariaqarpavut. Siullermik, Jehovap aalajaallutik kiffartorfiginnitsini tamatigut iluarisaanerminik ersersitsivigisarpai. (Hebræerit 6:10; 11:6). Jehovap kiffani aalajaatsut tamarluinnaasa pingaartikkamigit taakkua arlaat sumiginnaruniuk ‘iluaatsuliornertut’ isigissavaa. “Iluartut aqqutaat nalunngilaa” qanorlu annaatissanerlugit nalunagu. (Tuss 1:6; 2 Petr 2:9) Aappassaanik, Jehovap ilimaginngilluinnakkatsinnik iluarisaanermik ersersitsivigisinnaagaatigut. Inuit allanit nersorneqarniaannarlutik ajunngitsuliorpata Jehovap akilernavianngilai. Sooq? Jiisusip oqarneratut akissarsiassartik pereerpaat. (Matt 6:1-5) Ajunngitsuliaminnilli ataqqinaaserneqanngitsut Jehovap, “isertortumut isigisup”, takusarpai. Qanoq iliorneri malugalugillu akilertarpai. w18.07 qupp. 5 § 8, 10

Petrusip takorruuisitaanermi kingorna nipi tusakkani paasinngilaa. Taava Corneliusip aallartitai tikiupput. Anersaap illernartup Corneliusip illuanukaqqummani Petrusip aallartitat uteqatigai. Petrusi “qallikkut ittut tunngavigalugit” eqqartuussisimasuuguni Corneliusip angerlarsimaffianukarnavianngikkaluarpoq. Juutit Guutimik nalusut inaannut isinngisaannarput. Taava sooq Petrusi taamaaliorpa? Guutimik nalusut pillugit siumut isummiussereeraluarluni takorruuisinneqarami anersaamillu illernartumit siulersorneqarami eqqarsartaatsini allanngortippaa. Corneliusi tusarnaareerlugu Petrusi ima oqarpoq: “Ilumut paasilerpara Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.” (ApS 10:34, 35) Paasinnittaaseq nutaaq taanna kristumiunut tamanut sunniuteqassammat Petrusip pissanganartippaa. w18.08 qupp. 10 § 3-4

Guutip uumigisai iliuuserinngisaannassavavut. Taavami qanoq iliussaagut arlaannut aalajangersimasoq pillugu Biibilimi inatsiseqanngippat? Qanoq paasisinnaavarput Guutip suna piumasarigaa? Nalunngeqatiginnissuterput Biibilimit ilinniartinneqarpat silatusaartumik aalajangiisinnaassaagut. Jehovap asagamisigut najoqqutassianik nalunngeqatiginnissutitsinnik siulersuisinnaasunik tunivaatigut. Ima nassuiaavoq: “Uanga tassa Naalagaq, Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq.” (Es 48:17, 18) Najoqqutassiat Biibilimiittut eqqarsaatigeqqissaaraangatsigit uummammiuliukkaangatsigillu nalunngeqatiginnissuterput aaqqittarparput. Tamannalu silatusaartumik aalajangiinissatsinnut iluaqutigisinnaavarput. Najoqqutassiaq tassaavoq ilumoortoq tunngaviusoq eqqarsartaatsitsinnik siulersuisinnaasoq, silatusaartumik aalajangiinissatsinnut iluaqutaasoq. Jehovap najoqqutassiai iluaqutigalugit taassuma eqqarsartaasia uagutsinnullu inatsisiliorneranut pissutaasut paasisinnaavavut. w18.06 qupp. 16 § 5; qupp. 17-18 § 8-10

Jiisusi Romamiut naalagaaffissuannut akeraasutut unnerluutiginiassagamikku ‘Herodesimik tapersersuisut’ neriuutigaat Jiisusi oqassasoq akileraarut tamanna akilerneqartariaqanngitsoq. Jiisusili oqarpat akileraartariaqartut taava taanna inunnit malinneqarunnaarsinnaavoq. Jiisusi tamatumani akuliunnaveersaaqqissaarpoq. Jiisusip nalunngilaa akileraartitsisartorpassuit peqquserluttuusut, tamannali isiginiarnerunnginnamiuk inuiaat ajornartorsiutaannik aaqqiissutissaq, Guutip naalagaaffia, pingaartinneruaa. Jiisusip maligassippaatigut. Politikkikkut arlaannilluunniit illersuissanngilagut, aamma arlaat eqqortuusorinarlunilu naapertuilluartuusorinaraluarpalluunniit. Kristumiut Guutip naalagaaffia Guutillu eqqortuuneragaa pingaarnerutissavaat. Tamanna pissutigalugu politikkikkut naapertuilluanngitsuliornerit sakkortuumik isummerfigisassanngilagut akerliuffigalugilluunniit. (Matt 6:33) Jehovap Nalunaajaasuisa amerlasuut politikkikkut siornatigut isummiussimasatik sakkortuut iluatsittumik iperarsimavaat. w18.06 qupp. 6 § 9-11

Kinguaassiuutitigut inuunerlunneq atorlugu ussiinerup saniatigut Saatanip immaqa aamma inngilit pikitsitsisut neriorsorpai inuit tamaasa pissaaneqarfigilissagaat. Saatanip taamaalilluni immaqa ‘arnap kinguaassaa’ pillugu Jehovap siulittuutaata eqquunnissaa akornuserniarpaa. (1 Mos 3:15) Taassumali iluatsinnissaa Jehovap akuerinngilaa. Ulersuartitsivoq Saatanip anersaapiluillu pilersaarutaat maangaannartillugit. Kinguaassiuutitigut inuunerlunneq makitanerlu neqitaapput sunniuteqarluartartut. Inngilit Saatanimut ililiuttut ukiorpassuit Guuti qilammi najorpaat! Taamaakkaluartoq amerlasuut pilerissusipilunnik ineriartortitsipput naggataatigut sakkortoorujussuanngortunik. Eqqaamajuartariaqarparput Jehovamut qanorluunniit sivisutigisumik kiffartorsimagaluarutta pilerissusipiluit uummatitsinni sorlanikkiartorsinnaammata. (1 Kor 10:12) Taamaattumik uummaterput misissortuartariaqarparput eqqarsaatillu kinguaassiuutitigut inuunerlunnermut namminissarsiorlunilu makitanermut tunngasut piiarlugit! – Gal 5:26; Kol 3:5. w18.05 qupp. 18 § 11-12

Paulusip juutit Naalagaaffik pillugu nutaarsiassamut ajortumik qisuariarnerat nikallussutigaa. Taamaattorli Paulusi oqaluussiuarpoq. Juutinut taakkununnga qanoq misiginini ima allaatigaa: “Uummatikkut iluunngarlunga annaanneqarnissaat kissaatigaara Guutimullu qinnutigalugu. Taakkumi pillugit nalunaajaasariaqarpunga Guuti ilungersuutigigaat, kisianni silaqassuseqarnatik [eqqorluartumilli ilisimasaqarnatik, NW].” (Rom 10:1, 2) Paulusip eqqaavaa juutinut oqaluussisarluni ‘uummatikkut iluunngarluni annaanneqarnissaat kissaatigigamiuk’. (Rom 11:13, 14) Paulusip Jehova kimigiiserfigaa juutit ataasiakkaat ikiussagai Naalagaaffik pillugu oqariartuut akueriniassammassuk. Paulusip eqqaavaa taakkua “Guuti ilungersuutigigaat”. Inuit ajunngitsortaat Jehovamullu kiffanngorsinnaanerat Paulusip takusinnaavai. Nammineq misilittakkani tunngavigalugit nalunngilaa juutit taakku ilungersuussisut Kristusimut ajoqersuganngorsinnaasut aallussilluartut. w18.05 qupp. 4 § 4; qupp. 6-7 § 13, 14

Tamatta allat ikiorsinnaajumallugit pisariaqartitaat eqqumaffigisariaqarpavut. Paulusip kristumiut hebræerit ima allaffigai: “Assaat qasusut seeqqullu nukillaartut pissatsissigit, narlumuinnarlu pisullusi ingerlagitsi nukillaarsimasoq pilluttooqqunagu ajorunnaarsitaaqqulluguli.” (Hebr 12:12, 13) Tamatta, allaat meeraagaluarutta, oqaatsitigut nakussatseqatigiissinnaallutalu qiimmassaqatigiissinnaavugut Paulusi ima siunnersuivoq: “Kristusimi tuppallersagaaneq pingaaruteqarpat, asannittumik qiimmassaasoqarpat, Anersaakkut ilagiissoqarpat, asannittumik misiginneqataaneq pingaaruteqarpat, taava tipaatsussusera naammatsissiuk ataasiusumik isumaliorlusi, ataasiusumik asannissuseqarlusi, isummassigullu ataasiullusi. Namminissarsiorneq imminulluunniit angisuutinneq tunngavigalugit iliuuseqartaqinasi, makitajuitsuunissigulli allat ilissinnit annerutissigit. Tamassi immikkut nammineq iluaqutissarsi pinnagu inoqatississaaq iluaqutissaat isumagisiuk.” – Fil 2:1-4. w18.04 qupp. 23 § 10; qupp. 24 § 12

Inuunerput tamaat Guutimut kiffartornermut atorniassagatsigu Jehovap Jiisusi aqqutigalugu ajortimut toqumullu inussiaajunnaarsippaatigut. Jehovamut kiffartornermi piffissarput nukivullu tamakkiisumik atorutsigit kiffaanngissuserput pitsaanerpaamik atussavarput. Tamanna silarsuarmi anguniagaqarnerup namminerlu pilerisatta inuunitsinni pingaarnerpaatinnginnissaannut iluaqutigissavarput. (Gal 5:16) Noa ilaqutaalu qanoq iliornersut eqqarsaatigiuk. Silarsuarmi inuunerluffiusumi nakuuserfiusumilu inuupput. Nunaqqatimilli anguniagaannut iliuuserisartagaannullu maleruutinngillat. Jehovap suliassiissutai – umiarsualiornissaq, nerisassanik uumasullu nerukkaatissaannik katersuinissaq inuillu allat ulersuarnissaanik mianersoqqunissaat – ulapputiginiarlugit aalajangerput. “Noa Guutip peqqusineratorluinnaq iliorpoq.” (1 Mos 6:22) Tamatuma kingunerisaanik Noa ilaqutaalu taamani silarsuup piuneerussaanerani aniguipput. – Hebr 11:7. w18.04 qupp. 5 § 8; qupp. 6-7 § 11-12

Saatanip anersaapiluillu aamma upperisarsiorneq eqqunngitsoq niuernerullu silarsuaa atorlugit ‘silarsuaq tamaat’, tassa inuiaat tamaasa, ‘tammartinniartarpaat’. (Saqq 12:9) Saatanip Jehova pillugu salluliuutit siammarternissaannut upperisarsiorneq eqqunngitsoq atortarpaa, aamma allaat Guutip atia puiortinniarsarisarpaa. (Jer 23:26, 27) Tamatuma kingunerisaanik inuit eqqortuliorusuttut Guutimik pallorfiginnissorisut anersaapilunnik pallorfiginnittarput. (1 Kor 10:20; 2 Kor 11:13-15) Saatanip aamma niuernerup silarsuaa atorlugu salluliuutit, soorlu aningaasat inunnik pillualersitsisarnerat pillugu salluliuut, siammartertarpai. (Uss 18:11) Inuit salluliuummik tamatuminnga upperinnittut inuunertik Guutimut kiffartornermut atornagu ‘Mammoni’, tassa pisuussutit, kiffartorfigisarpaat. (Matt 6:24) Allaat Guutimik asannissimagaluarlutik pigisanik pingaartitsingaaramik Guuti asajunnaarsimavaat. – Matt 13:22; 1 Joh 2:15, 16. w18.05 qupp. 16-17 § 6-7