Aggusti

Jehovap Jiisusillu uagut pilluta iliuusaannik ataatsimiinnerni eqqaasinneqartarpugut. Qujamasukkatta Jiisusi ullut tamaasa inuunitsinni ilaarniartarparput. (2 Kor 5:14, 15) Aamma utertitsissummik pilersitsinera pissutigalugu Jehova unnersiutigerusunnerulertarparput. Unnersiutiginninnissamut ilaapput ataatsimiinnerni akissuteqartarneq. Jehovamik erneranillu qanoq asannitsiginerput ersersissinnaavarput taakku pillugit pilliuteqarusunnitsigut. Ataatsimiinnernut najuukkusulluta assigiinngitsunik pilliuteqartariaqarpugut. Ilagiit amerlasuut sulereernerup kingorna, qularnanngitsumik inuit qasuneranni, ataatsimiittarput. Ataatsimiinneq alla sapaatip-akunnerata naanerani inuit qasuersaarfianni pisarpoq. Qularutigissanngilarput qasugaluarluta ataatsimiigiartarnerput Jehovap maluginiartaraa. Iliuuseqarnerugaangattami Jehovap imminut asanninnerput pingaartinnerulertarpaa. – Mark 12:41-44. w19.01 qupp. 29 § 12-13

Artorsaatit inuit misigisartagaasa ilaat Jiisusip nammineq misigai. Assersuutigalugu Jiisusi ilaqutariinni piitsuugunartuni peroriartorpoq. Ataatarsiani Josefi suleqatigitillugu nukersornartumik suliaqarneq ilikkarpaa. (Matt 13:55; Mark 6:3) Jiisusi kiffartulinngikkallarami Josefi toqusimagunarpoq. Taamaattumik ilimanarpoq asasamik toqukkut annaasaqarnerup annernartua Jiisusip misigigaa. Aamma uppeqatiginngisamik ilaqutaqarneq qanoq innersoq Jiisusip nalunngilaa. (Joh 7:5) Pissutsit taakku allallu atorsimasani inuit unamminiarnartitaannik misigissusiinillu paasinnissinnaanissaminut Jiisusip iluaqutigisimassavai. Jiisusip misiginneqataanera ingammik tupinnartulioraangat ersertarpoq. Taamaaliortariaqarnini pinnagu inuit naalliuuteqartut ‘nalligingaaramigit’ tupinnartuliortarpoq. (Matt 20:29-34; Mark 1:40-42) Jiisusi inunnik misiginneqataagami ikiuerusuttarpoq. – Mark 7:32-35; Luk 7:12-15. w19.03 qupp. 16 § 10-11

Jiisusi nunarsuarmi inuunerani unnummi kingullermi qanoq nanertisimatiginersoq takorlooruk. Toqussi tikillugu aalajaattuassava? Taamaanngippat inuit milliardillit neriuutissaqassanngikkaluarput. (Rom 5:18, 19) Pingaarnertullu, iliuusii Ataatami tusaamaneqarneranut sunniuteqartussaapput. (Job 2:4) Ikinngutini qaniginerpaasani naggammik unnukkorsioqatigigamigit apustilit “kina arlartik ilaminit annerusutut naatsorsuunneqassanersoq” ‘oqqassutigilerpaat’. Qinngaritsaassinnginnera maluginiarnarpoq. Jiisusip maniguulluni aammaarluni qanoq isiginnittaaseqartariaqarnerat inussiarnersumik, aalajangersimarpaluttumilli, nassuiarpaa. Taamaalioreerami ikinngutini imminik ilumoorfiginninnerat pillugu nersualaarpai. (Luk 22:24-28; Joh 13:1-5, 12-15) Tamatta allat qinngarisaannik oqaaseqartarlutalu iliuuseqartarnerput eqqaamagutsigu nanertisimagaluarluta Jiisusi ilaarlugu saamasumik pissuseqarsinnaavugut. (Uss 12:18; Jaak 3:2, 5) Allallu pissusii nuannersut pillugit nersualaarniartakkit. – Ef 4:29. w19.02 qupp. 11-12 § 16-17

Mosesip Inatsisai pissutigalugit inuup eqqunngitsumik unnerluunneqarnissaa ilimanannginnerussaaq. Unnerluussaasup unnerluussisumi kinaanera paasinissaanut pisinnaatitaavoq. (5 Mos 19:16-19; 25:1) Pisuusutullu eqqartuunneqannginnerani ilisimannittut uppernarsaasinnaasut marluusariaqarput. (5 Mos 17:6; 19:15) Israelikkuusummi ajortuliornera ilisimannittup ataasiinnaap takusimappagu? Ajortuliortoq eqqarsassanngilaq ajortuliani pillugu pillarneqarnaviarani, Jehovammi ajortuliaa takuaa. Jehova naapertuilluarnermik maligassiuilluarnerpaavoq. Taassuma najoqqutassiaminik aalajaallutik maleruaasut pilluaqqusarpai, pissaanerminnilli atornerluisut pillartarlugit. (2 Sam 22:21-23; Ez 9:9, 10) Inuit ilaat ajortuliartik pillugu pillaatissinneqarpasinneq ajorput, Jehovalli piffissanngortoq aalajangerpagu eqqartuunneqarnissaat isumagiumaarpaa. (Uss 28:13) Peqqissiminngikkunillu paasilissavaat ‘Guutip uumasup assaanut tigusaritinnissaq amiilaarnaqisoq’. – Hebr 10:30, 31. w19.02 qupp. 23-24 § 20-21

Mosesi Jehovamut siulersortissarsiortartoq qularutissaanngilaq. Biibilimi allassimavoq ‘takussaanngitsumik isigisaqarlunilusooq pinertusaartoq’. (Hebr 11:24-27) Israelikkut Egyptenimit aallarnerminniit qaammatit marluk qaangiutinngitsulluunniit qaqqamut Sinajimut suli apuutinngitsut ilungersunartumik pisoqarpoq. Inuit imissaqannginnertik naammagittaalliuutigilerpaat. Mosesip naammagittaalliorfigalunilu kamaatingaalermanni Jehova “torlorfigaa oqarluni: ‘Inuit uku qanoq iliorfigissavakka? Ujaqqanik milluunngersaalerpaannga!’” (2 Mos 17:4) Jehovap Mosesi erseqqissumik ilitsersorpaa. Oqarfigaa Horebimi qaarsoq ajaappissaminik anaassagaa. Biibilimi ima allassimavoq: “Mosesi taamaaliorpoq Israelikkut utoqqaanertaat isigitillugit.” Taava ajornartorsiut aaqqillugu imeq kuulerpoq Israelikkut naammattumik imissaqartilerlugit. – 2 Mos 17:5, 6. w18.07 qupp. 10 § 4-5

Jehovap asanninnerminik nakussatsinniarluta ilagiit aamma atortarpai. Qatanngutivut asagaangatsigit Jehovamut asanninnerput uppernarsartarparput. Qatanngutitta pingaaruteqarnerannik Jehovamillu asaneqarnerannik paasitinniarlugit sapinngisatsinnik iliortarpugut. (1 Joh 4:19-21) Apustili Paulusi allappoq: “Taamaattumik tuppallersaqatigiigitsi ineriartorteqatigiigitsilu – soorluttaaq taamaaliortartusi.” (1 Th 5:11) Utoqqaanertat taamaaliorsinnaasutuaanngillat. Tamatta immikkut Jehova Jiisusilu ilaarlugit qatanngutitsinnik tuppallersaasinnaavugut. (Rom 15:1, 2) Ilagiinniittut ilaat naalliuttut isumatsassimangaarlutilluunniit ernumanermik nappaateqartut imaassinnaavoq nakorsanit ikiorneqartariaqartut. (Luk 5:31) Utoqqaanertat ilagiinniittullu allat nakorsatut ilinniagaqannginnertik nalunngilaat, taamaattorli ikiuinerat tuppallersaanerallu pingaarutilerujussuuvoq. Ilagiinniittut tamarmik ‘tuppallersaasinnaapput ernumasunik, isumaginnissinnaapput sanngiitsunik, tamaasalu nikallujuisaarfigisinnaallugit.’ – 1 Th 5:14. w18.09 qupp. 11 § 10-11

Jehova ilisarisimanerulerneratigut tatiginerulertarparput. Aatsaat Biibilimik atuaqqissaarnikkut atuakkattalu eqqarsaatigeqqissaarnerisigut Guuti ilisarisimallualersinnaavarput. Itsaq Jehova innuttaminik qanoq illersuisarsimanersoq Biibilimi tutsuiginartunik allassimasoqarpoq. Maanna qanoq isumassuiumaarneranik taakku isumallualissutigaavut. Jehovap uagutsinnik illersuisarneranik assersuusiaq Esajap allagaaniittoq eqqarsaatigiuk. Jehova savanik paarsisutut kiffaalu savanut assersuuppai. Jehova pillugu Esaja allappoq: “Savaatini paarsisutut paarai, talerminik katersorpai; savaaqqat pakkuppai.” (Es 40:11) Jehovap taliinit nukittuunit pakkunneqartutut misigigaangatta illersorneqartutut toqqissisimasutullu misigisarpugut. Ajornartorsiuteqaraluarlutit ullormut allassimaffimmi allassimasut tuppallernartut eqqarsaatigeqqissaarukkit eqqissisimaannarnissannut iluaqutigissavat. Taakku siunissami unamminiagassannut nakussatsissutigissavatit. w19.01 qupp. 7 § 17-18

Maanna sulissutigisannik anguniagaqarpit? Immaqa Biibili ullut tamaasa atuartalerniarlugu ataatsimiinnerniluunniit akillaqqinnerulerniarlutit pisassaqartillutilluunniit ilinniartitsillaqqinnerulerniarlutit anguniagaraat. Oqaluussinermiluunniit Biibilimik atuillaqqinnerulerusupputit. Ajunnginnerusunik kinguneqarnera malugigaangakku allanilluunniit oqarfigineqaraangavit qanoq misigisarpit? Nuannaartarunarputit, pissutissaqarluarpormi! Sooq? Jiisusip pineratut Jehovap iliuusereqqusaanik ilioravit. (Uss 27:11) Anersaakkut anguniakkat aallukkaangakkit nuannaalissutigisannik inuuninnilu siunertaqarlualissutigisannik suliaqartarputit. Paulusi siunnersuivoq: “Aalajaalluinnaritsi, qatanngutikka asasakka. Tamaviaarlusi Naalagaq kiffartuussiuk, ilisimagassiuk suliniarnersi Naalakkami asuliinnaassanngitsoq.” (1 Kor 15:58) Inuilli silarsuarmi anguniakkat, soorlu aningaasarsiorneq tusaamasanngornerluunniit, aallukkaangamikkit pillualivinneq ajorput. Iluatsikkaluaraangamilluunniit qamuuna imaqanngitsutut misigisarput. – Luk 9:25. w18.12 qupp. 18 § 12-13

Daavip piffissaq inuit nunarsuarmiittut tamarmik Guutip najoqqutassiaanik naapertuilluartunik maleruaaffissaat innersuussutigaa. (2 Petr 3:13) Esaja 65:22-mi allassimavoq: ‘Innuttakka orpiup pisoqaassusiatut utoqqaatigilissapput.’ Tamatumannga erserpoq Jehovap silarsuassaani nutaami taassumunnga kiffartortut ukiuni tuusintilinni inuussasut. Saqqummersitat 21:1-4 naapertorlugit Guutip inuit pilluaqqussavai, pilluaqqussutillu taakkua ilaat tassaavoq ‘toqup peerukkumaarnera’. Adamip Evallu paratiisimi naassaanngitsumik inuunissamik immikkut pisinnaatitaaffik annaavaat, nunarsuarli paratiisinngoqqissaaq. Guutip neriorsuineratut inuit nunarsuarmi pilluaqquneqassapput. Daavi allappoq qanilaartut iluartullu nuna kingornutissagaat tassanilu najugaqassallutik naassaanngitsumik. (Tuss 37:11) Esajallu allagaani siulittuutit pissutigalugit nunarsuarmi paratiisimi alianaatsumi inuunermik nuannaarutiginninnissarput qilanaarisinnaavarput. (Es 11:6-9; 35:5-10; 65:21-23) Qaqugu tamanna pissava? Jiisusip pinerluttumut neriorsuutaa eqquuppat. (Luk 23:43) Illit paratiisimi tassani inuusinnaavutit. w18.12 qupp. 8 § 22-23

Silarsuarmi eqqarsartaaseq pinngitsoorluinnarsinnaavarput? Naamik, silarsuarmi inuugatta eqqarsartaasianik tusarlerneqartassaagut. (1 Kor 5:9, 10) Allaat oqaluussigaangatta inuit kukkusumik isumallit eqqunngitsumillu upperisallit tusaasarpavut. Isumat eqqunngitsut tamakkiisumik pinaveersaarsinnaanngikkaluarlugit eqqarsaatigiuartariaqanngilavut. Saatanip uagutsinnut eqqarsaatigeqqusai Jiisusitulli itigartipallattariaqarpavut. Silarsuup eqqarsartaasianut pisariaqanngitsumik tusarnaannginnitsigut imminut illersorsinnaavugut. Assersuutigalugu ikinngutitsinnik toqqaaniaraangatta mianersortariaqarpugut. Biibilimi mianersoqquneqarpugut Jehovamik pallorfiginninngitsunik qanimut ikinnguteqarniarluta aalajangerutta taakkua eqqarsartarnerattut eqqarsartalissasugut. (Uss 13:20; 1 Kor 15:12, 32, 33) Aamma aliikkusersuutit pinngoriartuaarnermik isumalinnik nakuusernermillu kinguaassiuutitigulluunniit inuunerlunnermik siuarsaasut itigartikkutsigit ‘Guutimik ilisimasaqarnermut assortuisunik’ eqqarsartaaserput immersussanngilarput. – 2 Kor 10:5. w18.11 qupp. 25 § 16-17

Sallusuissummiittuarumanerput aalajangiusimanerulerumallugu suna iluaqutigisinnaavarput? Ilaatigut sallusuissut Biibilimeersoq sapinngisannik allanut ilinniartitsissutigineratigut. Biibili panamut assersuunneqarpoq. Soorlu sakkutuujulluartup panani tigulluartitaarsimasaraa uaguttaaq Guutip oqaasia tigulluartitaarsimasariaqarparput. (Ef 6:17) Tamatta ilinniartitsillaqqinnerulersinnaavugut ‘oqaatsimik sallusuissutip pianik tunioraalluartutut’. (2 Tim 2:15, tastamantitâĸ) Allanik ilinniartitsinitsinni Biibili atoraangatsigu sallusuissut ilisimanerulerlugulu nuannarinerulertarparput sallusuissummiittuarnissarpullu aalajangiusimanerulertarlutigu. Sallusuissut Jehovamit tunissutaavoq erlinnartoq Ataatatsinnullu qilammiusumut qanimut attaveqalernissamut periarfissaqalersitsisoq. Sunit tamanit naleqarnerpaavoq. Jehovap sorpassuarnik ilinniartereerpaatigut, naassaanngitsumullu ilinniartittuarumalluta neriorsorpaatigut. Taamaattumik sallusuissut sapanngarissutut naleqangaartutut erligiuk. “Pisiariniaruk sallusuissuseq, akigeqinagulu.” – Uss 23:23. w18.11 qupp. 9 § 2; qupp. 13-14 § 15-17

Ulersuup nalliutinnginnerani suujunnaarsinneqarnissamik mianersoqqussut Noap inunnut oqariartuutaata ilagisimassavaa. Jiisusi ima oqarpoq: “[Ulluni] taakkunani ulersuaq sioqqullugu nerillutik imerlutillu nuliartaarlutillu uinitsitsisarput ulloq Noap umiarsuarmut ikiffia tikillugu; aatsaallu paasisaqalerput ulersuaq nalliummat tamaasalu nungutillugit. Taamatuttaaq aamma Inuup Ernerata tikiuffissaani ikkumaarpoq.” (Matt 24:38, 39) Inuit amerlanerit soqutiginninngikkaluartut Noap aalajaalluni Jehovamit mianersoqqussut oqaluussissutigaa. Nalitsinni Guutip naalagaaffia pillugu oqaluussisarpugut inuit Guutip inuiannut qanoq iliorumaarnera pillugu ilinniarnissaannik periarfissikkusukkatsigit. Inuit oqariartuut tusassagaat ‘inuuginnassasullu’ Jehovatut kissaatigingaarparput. (Ez 18:23) Illumit illumut tamanullu oqaluussigaangatta sapinngisatsinnik inuit amerlanerpaat silarsuup ajortup matuma Guutip naalagaaffianit suujunnaarsinneqangajalerneranik mianersoqqusarpavut. – Ez 3:18, 19; Dan 2:44; Saqq 14:6, 7. w18.05 qupp. 11 § 8-9

Nunagisanni oqaluussineq inerteqqutigineqaleraluarpat qatanngutitillu pillugit oqartussaasunit killisiorneqaraluaruit qanoq iliussavit? Ilisimasatit tamaasa oqaluttuarissavigit? Jiisusi Romamiut naalakkersuisuannit apersorneqarami sua? Biibilimi najoqqutassiaq ‘nipangersimaffissaqarlunilu oqaluffissaqartoq’ Jiisusip ilaannikkut oqaaseqannginnermigut maleruarpaa. (Oqal 3:1, 7; Matt 27:11-14) Assingusumik nalaataqarutta qatanngutivut navianartorsiortinnginniassagatsigit silatusaarluta oqaatsivut mianersuuttariaqarpavut. (Uss 10:19; 11:12) Ilagiinniittormi arlaat ingasattumik ajortuliorsimappat illillu tamanna nalunagu? ‘Eqqortumik oqalugit.’ Isertuarnak ilumoortoq ilisimasat tamaat oqaluttuarinissaa akisussaaffigaat. Pineqartup Jehovamik attaveqarluaqqilernissaanut ikiuilluarsinnaaniassagamik utoqqaanertat paasissutissanik ilisimatinneqartussaapput. – Jaak 5:14, 15. w18.10 qupp. 7-8 § 17-18

Allat qanoq asanninnermi ineriartortissinnavavut? Ilaatigut tusarnaarluarnikkut. (Jaak 1:19) Misiginneqataalluni tusarnaarneq asanninnermik ersersitsineruvoq. Qatanngutivit misigissusii paasilluarneruniarlugit saamasumik aperisarit. Taassuma ilumoorluni soqutiginninnerit takusinnaassavaa, aamma kiinnavit isikkuatigut. Oqaluttuarneranilu erinitsajuillutit akornuseqinagu. Tusarnaarluarnikkut inuttaa paasilluarnerulissavat ilinnillu tatiginnilernissaanut ikiussallugu. Taava illit ikiuiniarninni oqaasissannut tusarnaarnissaa ajornannginnerulissaaq. Allanut ilumoorlutit soqutiginnikkuit tuppallersaataangaarsinnaavutit. w18.09 qupp. 11 § 10; qupp. 12 § 13

Guutip naalagaaffiata tusarliussaanik tusarnaarneq, Biibilimik Biibililersaarutinillu atuarneq, Jehovap Nalunaajaasuinit Biibilimik atuaqqissaaqatigineqarneq, ataatsimiinnissaannut piareersarneq ataatsimiigiartarnerlu piffissartornarput. Tamakku tamaasa piffissaqarfigissagutsigit iliuuserisartakkat pingaaruteqannginnerusut piffissakiffiginerusariaqarpavut. (Ef 5:15, 16) Sallusuissutit tunngaviusut Biibilimeersut ilinniassagaanni qanoq sivisutigissava? Inummiit inummut assigiinngilaq. Jehovap ilisimassusia, aqqutigeqqusai iliuuserisimasaalu pillugit ilinniarsinnaasavut killeqanngillat. (Rom 11:33) Napasuliaq Alapernaarsuiffik-mi saqqummersumi siullermi sallusuissut “naasumut mikisunnguamut” assersuunneqarpoq imalu allassimalluni: “Sallusuissutip naasua ataaseq naammageqinagu. Ataaseq naammassimagaluarpat allanik naasoqarsimassanngikkaluarpoq. Naasunik katersuiuarit, allanik ujaasigit.” Naassaanngitsumilluunniit inuugaluarutta Jehova pillugu ilikkagaqartuaannarsinnaassaagut. Maannakkulli pingaaruteqarpoq sapinngisarput tamaat taanna pillugu ilinniarnissamut piffissaqarnissarput. w18.11 qupp. 5 § 7

Biibilimi allassimavoq uiusut nuliaminnut innimittartuusariaqarlutillu paasinnittuusariaqartut. (1 Petr 3:7) Uiusup paasinnittuusup naluneq ajorpaa assigiinngitsorpassuartigut nuliaminit allaanerugaluarluni pitsaanerunani. (1 Mos 2:18) Nuliami misigissusii innimigisarlugillu ataqqinnittuusarpoq. Uiusoq nuliami misigissusiinut innimittartoq arnanut allanut qaninniarujoorneq ajorlunilu naleqqutinngitsumik inuttut, internetikkut attaveqaqatigiittarfitsigullu soqutiginninnermik ersersitsineq ajorpoq. (Job 31:1) Internetikkut attaveqaqatigiittarfiit qaninniarujoornissamut atorneq ajorlugillu nittartakkat naleqqutinngitsut isiginnaarneq ajorpai. Aap, nuliani Jehovalu asagamigit ajortullu uumigigamigit nuliani ilumoorfigiuarpaa. – Tuss 19:15; 97:10. w18.09 qupp. 28 § 3-4

Sooq Guutip oqaasiani ilikkakkatta maleruarnissaat sapernartarpa? Eqqortumik iliorumalluta maniguuttariaqarnerput tamatumunnga pissutaasut ilagaat. ‘Ulluni kingullerni’ makkunani inuit tassaammata “namminissarsiortut, aningaaserituut, usorsitsaartut, anneruniartut” aamma “imminut naalakkersinnaanngitsut” (NW) maniguunnissaq sapernartarpoq. (2 Tim 3:1-3) Guutimut kiffaagatta nalunngilarput pissusipalaat taakku ajortuusut, pissusipalaaqartulli immaqa ingerlalluarpasittarlutillu inuunerminnik assut nuannaarutiginnippasittarput. (Tuss 37:1; 73:3) Allaat eqqarsarsinnaavugut: ‘Allat pisariaqartitaat uanga pisariaqartitannit ilumut pingaarnerutittariaqarpakka? Maniguukkuma allat suli ataqqissavaannga?’ Silarsuup namminissarsiortumik isiginnittaaseqarneranit sunnertikkutta qatanngutitsinnut attaveqarluarnerput innarlersinnaallugulu allat kristumiuunerput takujuminaatsilersinnaavaat. Guutilli kiffai aalajaatsut pillugit oqaluttuat atuaqqissaarutsigit ilaarlugillu angusaqarluassaagut. w18.09 qupp. 3 § 1

Jehova pinngortitsinngikkallarami kisimiikkaluarluni imminuinnaq eqqarsaatiginngilaq. Inuunermimmi tunissut silassorissunut, anersaanut inunnullu, tunniuppaa. ‘Guutip pilluartup’ ajunngitsunik tunisinissani nuannaraa. (1 Tim 1:11; Jaak 1:17) Jehovallu pilluarnissarput kissaatigigamiuk aamma uagut tukkortuunissatsinnik ilinniartippaatigut. (Rom 1:20) Guutip imminik assililluni inuit pinngortippai. (1 Mos 1:27) Tassa taassuma pissusiinik pissuseqarsinnaatilluta pinngortippaatigut. Pilluarumalluta Jehovamillu pilluaqqusaajumalluta taassuma maligassiaa malittariaqarparput. Inunnik allanik soqutiginnittariaqarlutalu tukkortuusariaqarpugut. (Fil 2:3, 4; Jaak 1:5) Sooq? Taamatut Jehovap pinngortissimammatigut. Naammalluinnanngitsuugaluarluta Jehova ilaarsinnaallugulu tukkortuusinnaavugut. Jehovap ilaassagitsinni kissaatigigamiuk tukkoraangatta nuannaartarpoq. – Ef 5:1. w18.08 qupp. 15 § 1-2; qupp. 16 § 4

Ajoqersukkat Jiisusimut tusarnaarnertik ersersittarpaat oqaasii tusarnaaginnarnagit aammali taakku malillugit iliuuseqarnikkut. ‘Inuunerup matuma piinik isumakuluutinit’ allamut saasarneqarneq ajorput. (Luk 21:34) Jiisusilli peqqussutaanik naalannissaq, ajornaraluarpalluunniit, pingaarnerutippaat. Qanorluunniit nalaataqaraluarlutik qatanngutivut Jehovamut aalajaattuarput. Jiisusimut tusarnaarnerput aamma allatigut ersersissinnaavarput, tassa qatanngutit angutit siulersuisussatut Jiisusip toqqagaasa suleqatiginerisigut. (Hebr 13:7, 17) Ukiuni kingullerni Guutip peqatigiissortaani allannguinerit arlaliusimapput, soorlu oqaluussinitsinni periaatsit atortullu nutaat, ulluinnarni ataatsimiinnerput, naalagaaffilersaarfitsinnik sanaartoriaaseq, iluarsartuusseriaaseq aserfallatsaaliueriaaserlu. Siulersueriaaseq tamanna uagutsinnut iluaqutaavoq Guutillu peqatigiissortaanit asaneqarnitsinnut uppernarsaataalluni. Tamannalu qujamasuutigingaarparput! Peqatigiiffiup piffissaq eqqorlugu ilitsersuutai maleruarniartuarutsigit Jehovap pilluaqqujumaaraatigut qularutigissanngilarput. w19.03 qupp. 10-11 § 11-12

Oqaluttuaq ilaannakuusumik ilumoortortaqartoq tutsuigineqarsinnaanngilluinnarpoq! Josvap nalaani Israelikkut kuussuup Jordanip kitaatungaani najugaqartut misigisaat ilinniarfigisinnaavavut. (Jos 22:9-34) Tusarpaat Israelikkut kangiatungaani najugaqartut angisuumik pilliiviliorsimasut. Oqaluttuap taannartaa ilumoorpoq, sinnerali tusanngilaat. Taamaattumik Israelikkut kitaatungaani najugaqartut kangiatungaani qatanngutitik Jehovamut pikitsitsilersorigamikkit sorsukkumallugit katersuupput. (Jos 22:9-12) Israelikkulli kitaatungaani najugallit saassussinnginnerminni angutit paasiniaajartortillugit aallartippaat. Angutit qanoq paasisaqarpat? Israelikkut kangiatungaani najugallit guutipiluit pilliuteqarfiginiarlugit pilliiviliunngillat. Pilliiviliorsimapput Jehovamik pallorfiginninnertik kikkut tamarmik ilisimaniassammassuk. Israelikkut qatanngutiminnut sorsugiannginnerminni pissutsinik piviusunik paasiniaaqqaarnertik nuannaarutigisimassavaat. w18.08 qupp. 6 § 9-10

Paulusip erseqqissarpaa allaat Jehovamik pallorfiginnittut ajortuliulersinnaasut. Immaqa allaat eqqarsarput Jehovamit suli iluarisaallutik. Inulli Jehovamik ikinnguteqarusuttoq ilumoorfiginninnerartorluunniit imaassinnaavoq Jehovamit iluarisaanngitsoq. (1 Kor 10:1-5) Israelikkut Mosesi naatsorsuutigisamittut atiaanngimmat annilaangalerput. Uaguttaaq pissutsit aaqqissuussaanerat matuma naggatissaa naatsorsuutigisatsitut nalliutiaanngippat annilaangalersinnaavugut. Eqqarsalersinnaavugut Jehovap siunissamut neriorsuutai nuannersut nalliukkallarnavianngitsut uppernanngitsulluunniit, aamma Jehovap piumasai pinnagit piumasavut eqqarsaatiginerulersinnaavavut. Mianersunngikkutta Jehovamit ungasilliartulersinnaavugut takorloorsimanngisaannakkatsitullu iliuuseqarluta. w18.07 qupp. 19 § 17-18

Jehovap ilisarisimasinnaavaatigut. Jehova ikinngutigiumallugu susariaqarpugut? Taanna asallugulu inuunerput taassumunnga tunniulluinnartariaqarparput. (1 Kor 8:3) Ataatatsinnilli qilammiusumik ikinnguteqarnerput naleqangaartoq pingaartittuartariaqarparput. Kristumiut siulliit Galatiamiittut assigalugit ‘sanngiinnermit nallinnaannartunut’, ilaatigut silarsuarmit iluarisaaniarnermut, inussiaataajunnaartariaqarpugut. (Gal 4:9) Qatanngutit Galatiamiittut Guuti ilisarisimalereerpaat, Guutillu taakku ilisarisimareerpai. Paulusili allappoq qatanngutit taakku suunngitsut ‘uterfigigaat’. Allatut oqaatigalugu ima aperai: ‘Sooq uterniarpisi suunngitsunut atorsinnaanngitsunullu inussiaataaqqilerlusi?’ w18.07 qupp. 4 § 5-6

Suut eqqortuunersut suullu eqqunngitsuunersut paasiumallugit Guutip inatsisaanik unioqqutitsinerup kingunipilui misigeqqaartariaqanngilavut. Itsaq inuit kukkussutaat Biibilimi allaatigineqartut ilinniutigisinnaavavut. Guutiuna ilisimasaqalersitsisuusoq, siunnersuutaalu pitsaanerpaapput! Assersuutigalugu eqqarsaatigiuk Daavi Batsebamik allasiorfiginnilluni Jehovamut naalanngikkami qanoq naalliuuteqartigilersoq. (2 Sam 12:7-14) Oqaluttuaq tamanna atuartillugu imminut ima aperigit: ‘Daavip naalliuutit taakku qanoq pinaveersaarsinnaagaluarpai? Pisumi taamaattumi uanga qanoq iliussagaluarpunga? Kinguaassiuutitigut assuarnartuliornissamut usserneqaraluaruma Daavitut imaluunniit Josefitut iliussagaluarpunga?’ (1 Mos 39:11-15) Ajortuliornerup kingunipilui eqqarsaatigeqqissaarutsigit ‘ajortoq uumigineruleraluttuinnassavarput’. – Am 5:15. w18.06 qupp. 16 § 5, 7

Inuit naapertuilluanngitsuliornernut takunnittuugaangamik politikkimut akuliukkajuttarput. Jiisusip nalaani akileraartarneq inuppassuit politikkikkut arlaannik illersuilissutigisarpaat. Romamiunut akileraarutissat amerlapput, soorlu pigisat, nunaatit illullu pillugit akileraarutit. Aamma akileraartitsisartut pissutsinik ajornerulersitsillutik peqquserlungaartuupput. Ilaannikkut atorfinikkumallutik pisortani atorfillit akilertarpaat taavalu pissaanertik aningaasatigut iluanaarniutigisarlugu. Zakæusi, Jerikomi akileraartitsisartut ittuat, pisuunngorpoq inuit aningaasarpassuarnik akiliisittaramigit. (Luk 19:2, 8) Jiisusimut akeraasut akileraarutinik akiliisarneq pillugu taanna akuliutitinniaraluarpaat. “Akileraartarneq”, denarimik ataatsimik akileraarut juutit tamarmik akiligassaat, pillugu aperaat. (Matt 22:16-18) Akileraarut tamanna juutinit nuannarineqanngilluinnarpoq, tamanna Romamiut naalakkersuisuinit aqunneqarnerminnut eqqaassutigisaramikku. w18.06 qupp. 6 § 8-10

Saatanimut ililiunneq tamatigut ajortumik kinguneqartarpoq. Iluamik iluaqutissartaqanngilaq! (Job 21:7-17; Gal 6:8) Saatanip silarsuarmik aqutsinerata ilisimanera uagutsinnut sooq iluaqutaava? Naalakkersuisut eqqortumik isiginnittaaseqarfiginissaannut iluaqutigalugulu nutaarsiassap nuannersup oqaluussissutiginissaanut kajumississutigigatsigu. Nalunngilarput Jehovap kissaatigigaa naalakkersuisut ataqqissagivut. (1 Petr 2:17) Taakkua inatsisaannik, najoqqutassiaminut akerliunngitsunik, maleruaanissarput peqqussutigaa. (Rom 13:1-4) Aammali nalunngilarput politikkikkut partiimik inummilluunniit naalakkersuisumik tapersersuinngisaannassalluta. (Joh 17:15, 16, NW; 18:36, NW) Nalunnginnatsigu Saatani Jehovap aqqanik isertuiniartoq Jehovamillu tusaamanerlutsitsiniartoq sapinngisatsinnik Guuterput pillugu sallusuissut inunnut ilinniartitsissutiginiartarparput. Aqqanik taaguuteqarnerput atuinerpullu tulluusimaarutigaarput. Guutimik asanninneq aningaasanik pigisanilluunniit pingaartitsinermit erlinnarnerungaarpoq. – Es 43:10, 21; 1 Tim 6:6-10. w18.05 qupp. 17 § 8-9

Aappariinnerliornermi averusernissamut pissutissaqarpa? Biibilimili averusernissamut pissutissat eqqaaneqanngillat. Paulusi allappoq: “[Arnaq] uppertuunngitsumik ueqaruni taassumalu najuinnarumappani, taava avinngikkiliuk.” (1 Kor 7:12, 13) Tamanna aamma ullumikkut atuuppoq. Uiusulli ilaat ‘uppertuunngitsut’ nuliatik ‘najuinnarusunnagit’ ersersissimavaat. Assersuutigalugu immaqa uiusoq ingasattumik timikkut persuttaasarpoq, allaat peqqissusianik inuuneranilluunniit ulorianartorsiortitsilluni. Nuliaminik ilaquttaminilluunniit pilersuiumanani nulianiluunniit Guutimik kiffartorsinnaajunnaarsillugu. Taamatut pisoqartillugu kristumiu nuliaasoq nammineerluni aalajangersinnaavoq uini qanorluunniit oqaraluartoq taanna ‘najuinnarnissamut’ piumanngitsoq averusernissarlu pisariaqartoq. Kristumiulli ilaat assingusumik atugaqartut aappariiginnarniarlutik aalajangersimapput. Pinertusaarput aappariilluarnerulernissartillu sulissutigalugu. w18.12 qupp. 13 § 14, 16, 17

Jiisusip siaruarterisumik assersuusiamini Lukasip iivangkiiliuani kapitali 8-mi nassuiarpaa naatsiiassat tassaasut “Guutip oqaasia”, imaluunniit Guutip naalagaaffia pillugu oqariartuut. (Luk 8:5-8, 11-15) Issoq tassaavoq inuup uummataa. Naatsiiassat issorissumut tuttut sorlanipput, naajartorput ‘100-riakkanillu inerititaqalerlutik’. Naatsiiassaq ineriartortarpoq inerititaqarnissami tungaanut. Soorlu karrit eqqaaneqartut nutaanik karrininnatik nutaanik naatsiiassanittartut, taamatuttaaq uagut inerititavut tassaanngillat ajoqersukkat nutaat tassaallutilli naatsiiassat nutaat. Qanoq taamaaliortarpugut? Oqartoqarsinnaavoq Guutip naalagaaffia pillugu allanut oqaluussigaangatta uummatitsinniititatsinnik naatsiiassanik amerlisitsisarlutalu siaruarterisartugut. (Luk 6:45; 8:1) Tassa Guutip naalagaaffia pillugu oqariartuut oqaluussissutigiuartillutigu ‘nikallujuilluta inerititaqartuarpugut’. w18.05 qupp. 5-6 § 10-11

Paulusip qatanngutini pillugit ‘suna tamaat atorumavaa allaat nungulluni atorneqarumalluni’. (2 Kor 12:15) Taamatuttaaq utoqqaanertat qatanngutitik oqaatsimikkuinnaanngitsoq kisianni aamma iliuutsimikkut qiimmassarlugillu tuppallersartariaqarpaat. Tamatumannga uagutsinnik soqutiginningaarnerat erserpoq. (1 Kor 14:3) Qatanngutit nakussatsikkumallugit ilaannikkut utoqqaanertat naqqiisariaqartarput. Utoqqaanertat qiimmaallaataasumik qanoq taamaaliorsinnaanerlutik Biibilimi paasisinnaavaat. Jiisusi toqunermi kingorna makititaareerluni Asiaaqqami ilagiit tusarleramigit naqqiinermut tunngatillugu maligassaalluarpoq. Efesosimi, Pergamonimi Thyatiramilu ilagiit sukannersumik naqqippai. Naqqiinnginnerminili ajunngitsuliarpassui pillugit nersualaaqqaarpai. (Saqq 2:1-5, 12, 13, 18, 19) Utoqqaanertat naqqiigaangamik Kristusi ilaarniartarpaat. w18.04 qupp. 23 § 8-9

Angajoqqaajususi, qularnanngitsumik meeqqasi nappaatinit tunillatseqqunagit sapinngisassinnik iliuuseqartarpusi. Angerlarsimaffissi eqqiluitsuutittarparsi aamma ilissinnik meeqqassinnillu napparsimalersitsisinnaasut suulluunniit igittarlugit. Taamatuttaaq meeqqasi isiginnaagassianut, aallakaatitassianut, pinnguaatinut elektroniskiusunut nittartakkanullu Saatanip eqqarsartaasianik siammarterisunut illersortariaqarpasi. Jehovap meeqqassi anersaakkut peqqissusaannik isumassuisussatut pisussaaffilerpaasi. (Uss 1:8) Taamaattumik ilaquttassi Biibilimi najoqqutassianik tunngaveqartunik malittarisassiuunnissaat tunuarsimaarfigeqinasiuk. Meeqqasi mikisut oqarfigisarsigit suut isiginnaaqqusaallugillu isiginnaaqqusaanngikkaat aalajangiussassinnullu pissutaasunik paasinninnissaannut ikiortarlugit. (Matt 5:37) Meeqqasi perorneruppata namminneerlutik Jehovap najoqqutassiai tunngavigalugit suup eqqortuuneranik suullu eqqunngitsuuneranik aalajangiinissamut sungiusarsigit. (Hebr 5:14) Eqqaamasiullu meeqqassi iliuutsisi ilinniarfiginerusarmatigit. – 5 Mos 6:6, 7; Rom 2:21. w19.01 qupp. 16 § 8

Inuusuttuuguit ilagiinni qatanngutit utoqqaanerit ikinngutigilersinnaavatit. Apersukkit ukiorpassuarni Jehovamut kiffartortuarnissamut suna iluaqutigisimaneraat. Ilinniarfigisinnaasannik naleqangaartunik oqaluttuussinnaavaatsit. Tamanna taakkununnga ilinnullu qiimmassaataassaaq! Aamma tamatta, inuusukkaluarutta utoqqaagaluaruttaluunniit, naalagaaffilersaarfitsinnut alakkaasut tikilluaqqusaasutut misigitissinnaavavut. Katersuutsitsisarnissamik suliassinneqarsimaguit utoqqaanerusut qaamanerminnik qaamatitsiuarnissaannut ikiortarsinnaavatit. Angalaarfigisassaasa taakkununnga tulluartuunissaat qulakkeeruk. Inuusunnerusunik oqaluusseqateqarnissaat pilersaarusioruk. Qatanngutit angutit arnallu peqqiilliuuteqartut siornatigutulli oqaluussikulatigiunnaarnertik amerlasuutigut nikallungassutigisarpaat. Nuannaajallaatigissavaalli paasillugu isumassorisi atugaannillu paasinnittusi. Qanorluunniit utoqqaatigigaluarpata qanorlu sivisutigisumik sallusuissummiissimanerat apeqqutaatinnagu inussiarnisaarnerit aallussilluarlutik oqaluussiuarnissaminnut kajumississutigissavaat. – 3 Mos 19:32. w18.06 qupp. 23-24 § 10-12

Jehovap ajortimut toqumullu inussiaanermit uagutsinnik aniguisitsinera puiunngisaannartariaqarparput. Utertitsissut pissutigalugu Guuterput ilerasuuteqarata kiffartorfigisinnaavarput, tamannalu nuannaarutaangaarpoq. (Tuss 40:9) Qujamasunneraannarata nammineq aalajangiisinnaatitaanerput erlinnartoq atornerlunngisaannassavarput. Assersuutigalugu apustilip Petrusip oqaaqqissaarpaatigut kiffaanngissuserput eqqunngitsuliornissamut utoqqatsissutissatut atoqqunagu. Oqaaqqissaarut tamanna Israelikkut inoqajuitsumi qanoq nalaataqarnerannik eqqaasitsissutigaarput. Aamma nalitsinni immaqa suli annerusumik oqaaqqissaarneqarnissarput pisariaqartipparput. Saatanimit silarsuaanillu atisanik, nerisassanik, imigassanik aliikkutassanillu pilerinartorpassuarnik neqeroorfigineqartarpugut. Pilerisaarusiullaqqissut inuit pinnersut atorlugit isumaqartinniartarpaatigut pisariaqartinngisatsinnik pisisariaqartugut. Kiffaanngissutsimik eqqunngitsumik atuinissamut uukapaatinneqariaannaavugut. w18.04 qupp. 4-5 § 7-8