Juuli

Ulluni ‘atugarliungaarfiusuni’ inuuvugut. (2 Tim 3:1) Jehovallu silarsuarmik ajortumik matumannga suujunnaarsitsinissaa nunarsuarmillu piviusumik eqqissisitsinissaa sioqqullugu pissutsit suli ajornerulissapput. Taamaattumik imminut ima aperisariaqarpugut: ‘Ikiortissarsiorlungalu siulersortissarsioraangama kina isigisarpara?’ Itsaq Biibilimik allattut ilaat nassuiaavoq ikiorneqartariaqaraangatta Jehovamut isigaluta taassumunnga ikiortissarsiortarnissarput qanoq pisariaqartitsigineripput. (Tuss 123:1-4) Allappoq Jehovamut isigigaangatta kiffap naalakkaminik isiginninneratut ittartugut. Qanoq? Kiffap naalakkami nerisaqartillunilu illersussagaani tatigisarpaa. Aammali naalakkami qanoq iliortikkumagaani paasiumallugu taanna nakkutigiuartarpaa piumasaatullu iliorluni. Taamatulli uagut Guutip oqaasia ullut tamaasa atuaqqissaartariaqarparput Jehovap qanoq iliortikkusukkaatigut paasiumallugu piumasaatullu iliorluta. Aatsaat taamaaliorutta Jehovap ikiorneqartariaqarfitsinni ikiussagaatigut qulakkeersinnaavarput. w18.07 qupp. 9 § 1-2

Jiisusip ajortimut inussiaanermit, naqisimaneqarnermit inuit misigisimasaannit ajornerpaamit, aniguisinneqarneq pivaa. Ajortip ajortuliortittarpaatigut sunalu eqqortuusoq nalunngikkaluarlugu eqqunngitsuliortittarluta sapinngisatsinnilluunniit iliunngitsoortittarluta. Taamaattumik ajortimut inussiaavugut, tamatumalu kingunerisarpaa pakatsineq, naalliunneq toqulu. (Rom 6:23) Aatsaat ajorti peerulluinnarpat Adamip Evallu aallaqqaammut misigisaattut piviusumik kiffaanngissuseqalissaagut. Oqaatsinit “oqaasera aalajangiussimajuarussiuk”-mit erserpoq Jiisusimit inussiaajunnaarsinneqarusukkutta iliuuseqartariaqartugut. (Joh 8:31) Kristumiuugatta tunniulluinnarsimasut imminut tunulliuppugut Jiisusillu ajoqersukkaminut killiliissutai akueralugit. (Matt 16:24) Jiisusip neriorsuineratulli siunissami utertitsissutitut pilliutaata iluaqutissartai tamaasa iluaqutigilerutsigit inussiaajunnaavissaagut. w18.04 qupp. 8 § 14-16

Innuttani kukkusumik isiginnittaaseqaraluartut taakkua misigissusii Jehovap soqutigingaarpai. Pruffiiti Jona eqqarsaatigiuk. Guutip Ninevemiut eqqartuussummik nalunaarfigiartoqqullugit aallartippaa. Ninevemiut peqqissimimmata Jehova aalajangerpoq inuuinnartinniarlugit. Tamannali Jonap iluarinngilaa. Piuneerunneqarnissamik eqqartuussut tusarliussimasani eqquutitinneqanngimmat Jona kamangaalerpoq. Jehovalli kamagittarluni eqqortumik isiginnittaaseqaqqullugu ikiorpaa. (Jon 3:10-4:11) Kingorna Jehovap ilinniartitsissutiginiagaa Jonap paasilerpaa oqaluttuarlu uagut iluaqutiginiassagatsigu allatsillugu. (Rom 15:4) Jehovap innuttaminut iliuuserisimasaanit paasivarput kiffani misiginneqatigisarai. Tamattami erloqissutivut naalliuutivullu nalunngilai. Eqqarsaativut misigissutsivullu tamaasa pisinnaasattalu killeqarneri ilisimavai. ‘Artukkatsinnillu usserneqarnissarput akuersaarumanngilaa.’ (1 Kor 10:13) Tamanna nalunagu tuppallernangaarami! w19.03 qupp. 16 § 6-7

Mosesip inatsisaasa atuunneranni utoqqaanertat toqqarneqarsimasut anersaakkut ittunik eqqartuussiinnaratik aamma inuttut ajornartorsiutinut pinerluttuliornernullu tunngatillugu eqqartuussisarput. Israelikkuusoq toqutsisoq toqutaasussatut ingerlaannaq eqqartuunneqarneq ajorpoq. Toqumik pillaaneq naleqqunnersoq aalajangiiffiginnginnerani illoqarfimmi utoqqaanertat qanoq pisoqarsimaneranik misissueqqissaartarput. (5 Mos 19:2-7, 11-13) Israelikkut ulluinnarni inuunerannut tunngasunik, assersuutigalugu pigisat pillugit isumaqatigiinngitsoqaraangat imaluunniit aappariinni ajornartorsiuteqartoqaraangat, aamma utoqqaanertat eqqartuussisarput. (2 Mos 21:35; 5 Mos 22:13-19) Utoqqaanertat naapertuilluartumik eqqartuussinerat Israelikkullu inatsisinik maleruaanerat tamanut iluaqutaasarpoq, taamatullu inuiattut Jehova ataqqinaatissittarpaat. (3 Mos 20:7, 8; Es 48:17, 18) Tamatuma takutippaa Jehovap soqutigingaaraatigut. Naapertuilluartuussasugut asannittuussasugullu kissaatigaa. Qanorlu oqalunnersugut iliornersugulluunniit, aamma angerlarsimaffitsinni kisimiikkaangatta, naluneq ajorpaa. w19.02 qupp. 23 § 16-18

Nanertisimanermi maniguunnissaq sapernartarpoq. Immaqa soqqusaatsumik oqalullutalu pissuseqalertarpugut. Nanertisimasutut misiginikuuguit Jiisusip maligassiaa eqqarsaatigiuk. Jiisusi nunarsuarmi inuunermini qaammatini kingullerni nanertisimangaarpoq. Nalunngilaa toqutaasussaallunilu naalliungaartussaalluni. (Joh 3:14, 15; Gal 3:13) Toqunissani qaammatialuit sioqqullugit oqarpoq nanertisimalluni. (Luk 12:50) Toqunissani ullualuit sioqqullugit Jiisusi oqarpoq: ‘Tarniga siooravoq.’ Misigissutsini qinunikkut oqaatigimmagit maniguunnera Guutimullu naalannera ersarippoq. (Joh 12:27, 28) Piffissaq nalliummat Jiisusi sapiilluni Guutip akeraanut, naalliunnangaartumik kanngunarsaataasumillu toqutsisissaminut, imminut tunniuppoq. Jiisusi assut nanertisimangaaraluarluni naalliukkaluarlunilu maniguulluni Guutip piumasaatut iliorpoq. Qulanngilluinnarluta oqarsinnaavugut Jiisusi nanertisimanermi maniguunnermut tunngatillugu maligassaalluarnerpaasoq! – Es 53:10. w19.02 qupp. 11 § 14-15

Ataatsimiigiartuartarumalluta pisuni unamminiarnartuni sapiissuseqartariaqarpugut. Qatanngutitta ilaat aliasukkaluarlutik, nikallungagaluarlutik imaluunniit peqqiilliuuteqaraluarlutik ataatsimiigiartarput. Allat ilaquttaminnit naalakkersuisunilluunniit ingasattumik akerlilersorneqaraluarlutik sapiillutik ataatsimiinnernut najuuttarput. Eqqarsaatigikkit qatanngutivut uppernertik pissutigalugu parnaarussaaqqasut uagut maligassiuinerput qanoq killinneqaatigisaraat. (Hebr 13:3) Misilinneqaraluarluta Jehovamut kiffartortuarnerput tusaraangamikku uppernertik, sapiissusertik assuarnaassusertillu attattuinnarnissaannut nakussatsinneqartarput. Paulusi Romami parnaarussaaqqanermini qatanngutit Guutimut aalajaallutik kiffartortut tusaraangamiuk nuannaartarpoq. (Fil 1:3-5, 12-14) Iperagaanermi nalaani Paulusi Hebræerinut allappoq. Allakkamini kristumiut aalajaatsut taakku kajumissaarpai ilagiittut ataatsimiittarnertik peqataaffigisassagaat. – Hebr 10:25; 13:1. w19.01 qupp. 28 § 9

Saatanip – pikitsitsisup Jehovap najoqqutassiaanik sumiginnaasup namminissarsiornermillu pissutiginiagaqartup – assigilissagitsinni kissaatigaa. Inunnik ajortumik sunnersimasaminik avatangiiseqartippaatigut. Eqqarsartaaserput iliuutsivullu ikinngutipalaanit ‘aseruutissinneqartartut’ nalunngikkaluarlutigu ikinngutipalaat ilagisassagigut neriuutigaa. (1 Kor 15:33) Saatanip aamma Jehovap eqqarsartaasia pinnagu inuit ilisimassusiannik tutsuiginnilersitsiniarnikkut uummaterput ajortumik sunnerniartarpaa. (Kol 2:8) Saatanip isuma siammarsagaasa ilaat ataasiinnaq – pisuunngornissamik inuunermi pingaarnerpaatitsineq – eqqarsaatigiuk. Inuit taama eqqarsartartut imaassinnaavoq pisuunngortut pisuunngunngitsulluunniit. Qanorluunniit ikkaluarpat navianartorsiorput. Sooq? Imaassinnaavoq anguniagartik anguniaannarlugu aningaasarsiorusungaaramik peqqissusertik, ilaquttanut attaveqarnertik allaallu Guutimik ikinnguteqarnertik sussakkeeraat. (1 Tim 6:10) Ataatatta qilammiusup ilisimassuseqartup aningaasanut eqqortumik isiginnittaaseqaqqulluta ikiortarmatigut qujamasuutigisinnaavarput. – Oqal 7:12; Luk 12:15. w19.01 qupp. 15 § 6; qupp. 17 § 9

Jiisusip nunarsuarmi qiimmassaanermik maligassiuinera allaat sioqqullugu Jehovap kiffaasa nalunngilaat allanik qiimmassaasariaqarlutik. Hizkija eqqarsaatigiuk. Taassuma Assyriamiut Jerusalemimik saassussilermata sakkutuut naalagaanertaat inuillu katersortippai qiimmassarniarlugit, inuillu Hizkijap oqaasii ‘nakussatsissutigaat’. (2 Nal 32:6-8) Qiimmassaaneq pillugu aamma Jobi ilinniarfigisinnaavarput. Qiimmassarneqarnissani pisariaqartikkaluarlugu allat qanoq qiimmassaanissaannik ilinniartippai. Jobip angutit imminik tuppallersaajartortut oqarfigai nammineq tuppallersartussaasuugunigit nikallussutigisaannik oqarfiginagit nakussatsissutigisaannik nuannaalissutigisaannillu oqarfigissallugit. (Job 16:1-5) Naggataatigulli Jobi Elihumit Jehovamillu qiimmassarneqarpoq. – Job 33:24, 25; 36:1, 11; 42:7, 10. w18.04 qupp. 16 § 6; qupp. 17 § 8-9

Jehovap innuttaminik nakussatsitsinissaa Esajap nassuiareernikuuaa oqarluni: “Guuti Naalagaq aggerpoq pissarsuulluni, taliminik naalakkersuivoq.” (Es 40:10) ‘Taleq’ Biibilimi eqqaaneqaraangat pissaanermut assersuusiarineqarnerusarpoq. Taamaammat oqaatsit ‘taliminik naalakkersuinera’ Jehovap pissaanilissuartut kunngiuneranik eqqaasitsissutigaarput. Pissaanini nalissaqanngitsoq atorlugu itsaq innuttani tapersersorlugillu illersortarpai, aamma nalitsinni tatiginnitsini nakussatsillugillu illersortuarpai. (5 Mos 1:30, 31; Es 43:10) Pingaartumik akerlilersuisunit malersugaatilluta Jehovap neriorsuutini eqqortittarpaa: “Nakussatsippakkit.” Nunat ilaanni oqaluussisarnerput peqatigiiffippulluunniit akerlilersuisutta inerteqqutiginiarsaraat. Taamaaliortoqaraluartorluunniit saassunneqarnerput ingasattumik ernumassutiginngilarput. Jehovap neriorsuutaa nukissaqalissutigalugulu isumallualissutigaarput. Neriorsuivoq: “Sakkut ilinnut sakkuaatissatut saffiukkat atorsinnaassuseqassanngillat.” – Es 54:17. w19.01 qupp. 5-6 § 12-13

Uumasut assiginagit illit anersaakkut pisariaqartitaqarputit, Pinngortitsisivillu kisimi tamanna matussusersinnaavaa. (Matt 4:4) Guuti tusarnaaraangatsigu paasisimasaqalertarpugut, ilisimassuseqalerluta pillualerlutalu. Biibili aamma “inussiaq aalajaallunilu silatooq” aqqutigalugit Biibililersaarutinik upperluarnerulernissatsinnut iluaqutissatsinnik pilersitsisarpoq. (Matt 24:45, NW) Anersaakkut inuussutissat assigiinngisitaartorpassuit ilumut nuannaarutigaavut! (Es 65:13, 14) Anersaakkut inuussutissat ilisimassuseqalissutigalugillu eqqarsarluarsinnaanissamut iluaqutigissavatit, tamannalu arlalitsigut illersuutigisinnaavat. (Uss 2:10-14) Assersuutigalugu taakku piginnaasat salluliuutinut, soorlu pinngortitsisoqannginneraanermik aningaasalluunniit pisuussutillu pillualersitsisarnerannik, upperinninnginnissamut iluaqutigissavat. Aamma taamatut pissuseqarnerit pilerissutsinut ileqqunullu ajoqutaasunut itigartitsinissamut iluaqutigissavatit. Taamaammat ilisimassuseqalerumallutit eqqarsarluarsinnaajumallutillu sapinngisannik iliuuseqarit. w18.12 qupp. 16 § 6-7

Maluginiaruk siulittuut naapertorlugu “orpiup pisoqaassusiatut” utoqqaatigilissasugut. Orpiit ilaat ukiuni tuusintilinni piusarput. Inuit taama sivisutigisumik inuussagunik peqqilluinnartariaqarput. Esajap siulittuineratut eqqissilluni alianaatsunillu avatangiiseqarluni inuuneq nuanningaassaaq. Aap, paratiisitut issaaq! Siulittuullu taanna piviusunngussaaq! Neriorsuutinit eqqartukkatsinnit siunissami paratiiseqalerumaarnera qanoq ersersinneqartoq eqqarsaatigiuk. Nunarsuaq tamarmi inunnik Guutimit pilluaqquneqartunik ulikkaassaaq. Kialuunniit uumasumit inunnilluunniit nakuusertunit saassunneqarnissani ernumassutigissanngilaa. Tappiitsut, tusilartut tusiattullu ajorunnaassapput. Inuit namminneq inigisassaminnik illuliussallutillu nerisassaminnik naatitsinertik nuannaarutigissavaat. Orpinnit uummartunerussapput. Aap, paratiisip taamaattup pilersinneqarnissaa Biibilimi uppernarsarneqarpoq. Inuilli ilaat immaqa oqassapput siulittuutit taakkua nunarsuarmi paratiiseqarnissaatut paasisariaqanngitsut. Nunarsuarmi paratiisip piviusup qilanaarinissaanut sunik pissutissaqarpit? Inuit inuusimasut pingaarnerpaartaata, Jiisusip, pissutissaqartippaatigut. – Luk 23:43. w18.12 qupp. 5-6 § 13-15

Isumarput allanngoriartorsinnaavoq. Sunillu eqqarsaateqarniarnerluta aalajangikkavut apeqqutaanerusarput. Jehovap eqqarsartaasia eqqarsaatigeqqissaarutsigu taassuma isiginnittaasia eqqortuujuaannartoq uppernarsissavarput. Taamaalilluta taassumatut isiginnittaaseqarusulersinnaavugut. Jehovatut eqqarsartaaseqalerniarluta isumarput nutaanngortikkumallugu ‘silarsuarmit matumannga ilusilersortikkunnaartariaqarpugut’. Isiginnaartakkavut, atuartakkavut tusarnaartakkavullu Guutip eqqarsartaasianut akerliusut tamaasa unitsittariaqarpavut. Tamatuma pingaaruteqassusia nerisassanut assersuunneqarsinnaavoq. Arlaat peqqinnerorusuttoq inuussutissaqarluartunik nerisalerniarluni aalajangersinnaavoq. Oqunnikunilli nerisaruni ilungersuutai asuliinnassapput! Taamatuttaaq silarsuup isumaliutersuutaanik isumarput immersortarutsigu Jehovap eqqarsartaasianik ilinniarnivut iluaqutaassanngillat. w18.11 qupp. 24-25 § 14-15

Sallusuissutip ulluinnarni maleruarnissaa aalajangiusimasariaqarparput. Biibilimi sallusuissut qiteqummut sakkutuup atugaanut assersuunneqarpoq. Biibilip nalaani sakkutuup qitequtini sukassimajuartillugu sorsunnermi illersuutigisarpaa. Sukassimanngippat illersuutiginavianngilaa. Sallusuissut qitequtitut qanoq illersuutigaarput? Sallusuissut Biibilimeersoq tamatigut maleruarutsigu eqqunngitsumik eqqarsarnissamut illersuutigissavarput silatusaartumillu aalajangiinissamut iluaqutigalugu. Ilungersunartumik ajornartorsioraangatta eqqunngitsuliornissamulluunniit ussernartorsioraangatta sallusuissutip Biibilimeersup eqqortuliornissamut aalajangiusimanninnerulersissavaatigut. Soorlu sakkutuup sorsugiassaguni qitequtini qimanngisaannassagaa aamma uagut sallusuissut qimanngissaannassavarput. Qulakkiissavarput sallusuissut inuunitsinni sutigut tamatigut maleruarnerlutigu. w18.11 qupp. 13 § 15

Sallusuissut Biibilimeersoq ilinniassagutsigu ilungersortariaqarpugut pilliuteqartariaqarlutalu. ‘Sallusuissut pisiarereerutsigu’, tassa ilinniareerutsigu, qaqugumulluunniit ‘akiginnginnissaa’, tassa annaannginnissaa, eqqumaffigisariaqarparput. Sumilluunniit akeqanngitsumik piumasoq pilliuteqarsinnaasariaqarpoq. Ussatit 23:23-mi hebræerit oqaasiat “pisiariniaruk”-mik nutserneqartoq aamma “pissarsiariniaruk”-mik nutserneqarsinnaavoq. Oqaatsini taakkunani marlunni erserpoq inuk arlaannik nalilimmik piumasoq pilliuteqartariaqartoq. Sallusuissut qanoq pisiarisinnaagipput paasiumallugu assersuusioriarta. Takorlooruk aqqusinermi ima allagartarsuaqartoq: ‘Bananit akeqanngitsut.’ Bananit angerlarsimaffitsinniileriataartut naatsorsuutigisinnaavarput? Naagga, aasariaqarpavut. Tassa bananit akeqanngikkaluartut pissarsiariumallugit iliuuseqartariaqarpugut. Aamma sallusuissut ilinniarumallugu aningaasanik akiliisariaqanngikkaluarluta iliuuseqartariaqarpugut pilliuteqarlutalu. w18.11 qupp. 4 § 4-5

Jiisusip Petrusi, Jaaku Johannesilu qaqqamut portusoorsuarmut majuaqatiserai. Qaqqamiitillutik immikkuullarissumik takunnipput. Jiisusip kiinaa qaamaninilluni atisaalu qaamanertut illutik inngianarsipput. Taava Mosesimut Eliamullu assersuutaasut saqqummerput Jiisusillu toqunissaa makititaanissaalu pillugit taanna oqaloqatigilerlugu. (Luk 9:29-32) Taava nuissamik qaamasumik ulinneqarput nuissamiillu Guutip nipaa tusaalerlugu. Takorruugaq tamanna Guutip naalagaaffiani Jiisusip kunngitut naalannassuseqarnissaanut pissaaneqarnissaanullu qilanaartuutaavoq. Qularnanngitsumik Jiisusip tamanna naalliunnissamini toqutaanissaminilu aalajaannissaminut nakussatsissutigisimassavaa. Aamma ajoqersukkat takorruuisinneqarnertik uppernerminnik nakussatsissutigaat misilinneqarnissaminnilu assuarnaattuarnissamut suliassaminnullu piareersaatigalugu. Ukiut 30-t missaat qaangiuttut apustilip Petrusip takorruugaq tamanna eqqaavaa ersersillugu suli eqqaamalluarlugu. – 2 Petr 1:16-18. w19.03 qupp. 10 § 7-8

Kristumiut ilumoortut upperisarsiortunit eqqunngitsunit allanit suna allaanerussutigaat? ‘Ilumoortumik oqaluttarpugut.’ (Zak 8:16, 17) Inunnut ilisarisimanngisatsinnut, suleqatitsinnut, ikinngutitsinnut asasatsinnullu tamatigut ilumoortumik oqaluttarpugut. Inuusuttuuguit immaqa peqatinnit akuerineqarusuttarputit. Marloqiusamik inooriaaseqarniaqinak, ilaquttatit ilagiinniittulluunniit peqatigigaangakkit ileqqussatigut minguitsuusaartarlutit, internetikkulli attaveqatigiittarfinni Jehovamilluunniit kiffartunngitsut peqatigigaangakkit allaanerujussuusarlutit. Taamatut inuuneq angajoqqaanut, qatanngutinut Jehovamullu salluliorneruvoq. (Tuss 26:4, 5) Jehovalli nalunngilaa qaqugukkut ataqqisuusaarlugulu uumigisaanik iliortartugut. (Mark 7:6) Ussat malillugu inuuneq pitsaanerujussuuvoq: “Ajortuliortut sinngageqinagit, tamatigulli Naalagaq mianerilluinnartaruk.” – Uss 23:17. w18.10 qupp. 6-7 § 14-15

Nunarsuaq tamakkerlugu Jehovamik pallorfiginnittut ilaqutariiupput. Qatanngutaapput angutit arnallu asaqatigiittut. (1 Joh 4:21) Ilaannikkut qatanngutitik pillugit annertuunik pilliuteqartarput, amerlanertigulli iliuutsitigut annikitsutigut asannittuliortarput. Assersuutigalugu qatanngutitik qiimmaallannartumik oqarfigalugilluunniit inussiarnersumik pisarpaat. Allanut innimittarnikkut Ataatarput qilammiusoq ilaartarparput. (Ef 5:1) Jiisusip Ataatani ilaaqqissaarpaa. Allat inussiarnersumik piuaannarpai. Ima oqarpoq: “Ornissinga tamassi suleruluttusi nanertugaasusilu, qasuertissavassi.” (Matt 11:28, 29) Jiisusi ilaarlugu ‘sanngiitsut isumassorutsigit’ Jehova nuannaartissallugulu nammineq nuannaalissaagut. (Tuss 41:2) Taamaattumik ilaquttatsinnut, anersaakkut qatanngutitsinnut oqaluussiffigisatsinnullu innimittarisa. w18.09 qupp. 27 § 1-2

Pinngortitami ajunaarnersuaqartillugu qatanngutitsinnik ikiuinikkut Jehova suleqatigisinnaavarput. Assersuutigalugu aningaasanik tunissuteqarsinnaavugut. (Joh 13:34, 35; ApS 11:27-30) Iliuuserisinnaasarput alla tassaavoq ajunaarnersuup kingorna iluarsartuusseqataaneq. Gabrielap, qatanngutip arnap Polenimeersup, qarsutsineqarmat illua aseruatiterneqarpoq. Qatanngutit ilagiinnit allanit ungasinngisaaneersut ikiuukkiartornerat nuannaarutigingaarpaa. Misigisani eqqarsaatigigaangamiuk pigisani annaasani pinnagit pissarsiarisani eqqarsaatiginerusarpai. Ima oqarpoq: “Misigisaq tamanna kristumiut ilagiivinut ilaanerma immikkut ittumik pisinnaatitaaffiuneranik pilluarnarneranillu eqqaasitsissutigaara.” Ajunaarnersuaqartillugu ikiorneqarsimasut aamma taama misiginerarput. Qatanngutinillu taakkuninnga ikiuinikkut Jehovamik suleqateqartut nuannaarlutillu nalerisimaarput. – ApS 20:35; 2 Kor 9:6, 7. w18.08 qupp. 25 § 12

Uummaterput iluatsittumik paarissagutsigu navianartut takusinnaasariaqarlugillu imminut illersorniarluta iliuuseqapallassinnaasariaqarpugut. ‘Paarsinermik’ nutserneqartoq alapernaarsuisuutitap suliaanut eqqaanarpoq. Kunngip Salomop nalaani alapernaarsuisuutitat illoqarfiup qarmarsuani pigaartuusarput navianartunillu takusaqaraangamik kalerrisaarisarlutik. Assersuut tamanna Saatanip eqqarsartaatsitsinnik ajortumik sunniiniarneranik unitsitsiniarluta qanoq iliortariaqarnitsinnik paasinninnissamut iluaqutigivarput. Itsaq alapernaarsuisuutitat matumik paarsisut qanimut suleqatigisarpaat. (2 Sam 18:24-26) Akeqqat qanilligaangata isaaffiit matusarnerisigut suleqatigiillutik illoqarfimmik paarsisarput. (Neh 7:1-3) Nalunngeqatiginnissuterput Biibilimit ilinniartinneqarsimasoq alapernaarsuisuutitatut illuni Saatanip uummaterput tiguarniaraangagu – allatut oqaatigalugu eqqarsaativut, misigissutsivut, pissutiginiakkavut pilerissutsivullu sunnerniaraangagit – mianersoqqusisarsinnaavoq. Nalunngeqatiginnissuterput navianartoqarneranik kalerrisaarigaangat tusarnaartariaqarlugulu isaaffiit matusariaqarpavullusooq. w19.01 qupp. 17 § 10-11

Utoqqaanertat namminneq isummatik najukkaminniluunniit ileqqut tunngaviginagit Guutilli oqaasia tunngavigalugu angutit inuusuttut nalilersortassavaat. (2 Tim 3:16, 17) Ilagiinni kiffartortunik utoqqaanertanilluunniit toqqaanermut najoqqutassiat Biibilimeersut utoqqaanertat maleruanngippatigit qatanngutit angutit piumasaqaatinik eqqortitsisut toqqarneqarnissaat akornusersinnaavaat. Nunat ilaanni ilagiinni kiffartortup akisussaaffiit pingaarutillit ajunngitsumik isumagisarmagit utoqqaanertanngornissamut Biibilimi piumasaqaatinik eqqortitsinera utoqqaanertat isumaqatigiissutigaat. Utoqqaanertalli ukioqqortunerusut ilaat oqarput utoqqaanertanngornissamut inuusuppasippallaartoq, taamaattumik utoqqaanertanngornissaa inassutiginngilaat. Ajoraluartumik qatanngut taanna isikkuni pissutigiinnarlugu utoqqaanertanngortinneqanngilaq. Nunarpassuarni taamatut eqqarsartarneq nalinginnaarpasippoq. Nammineq isummavut pinnagit Biibilimik tutsuiginninnissarput pingaaruteqarluinnarpoq. Taamaaliorutta Jiisusi naalallugu qallikkut ittut tunngavigalugit allat eqqartuuttassanngilavut. – Joh 7:24. w18.08 qupp. 13-14 § 16-17

Eqqarsaqqaarnani e-mailinik SMS-inilluunniit ingerlatitseqqiineq navianartortaqarpoq. Nunat ilaanni sulinerput killilersorneqarpoq allaalluunniit inerteqqutaalluni. Nunani taakkunani qunulersinniarluta immitsinnulluunniit pasillertinniarluta akerlilersortivut piaaralutik oqaluttuanik siammarterisinnaasarput. Sovjetunioniusimasumi pisut eqqarsaatigikkit. Isertortumik politiit, KGB-tut ilisimaneqartut, qatanngutit ilisimaneqarluartut Jehovap innuttaanik killuussisimanerarpaat. Ajoraluartumik qatannguterpassuit oqaluttuat eqqunngitsut upperaat Jehovallu peqatigiissortaanik qimatsillutik. Amerlasuut kingusinnerusukkut uterput, ilaalli utinngisaannarput. Oqaluttuat eqqunngitsut pissutigalugit upperunnaarput. (1 Tim 1:19) Qanoq taamatut alianartumik aalajangiinaveersaarsinnaavugut? Oqaluttuat ajortut uppernarsaatissaqanngitsulluunniit siammarteqinagit. Tusakkatit tamarluinnaasa uppereqinagit. Pissutsilli piviusut ilisimanissaat qulakkeertaruk. w18.08 qupp. 5 § 8

Grækerit allagatoqaataanni nutaannginnerpaani killiffilersuutit atorneqartuaannanngillat. Taamaattumik immaqa eqqarsarpugut: Jiisusi ima oqarpa: “Ilumut oqarfigaakkit: Ullumi Paratiisimeeqatigiumaarparma.” Imaluunniit oqarpa: “Ilumut oqarfigaakkit ullumi: Paratiisimeeqatigiumaarparma.” Jiisusip toqunissani pillugu ajoqersukkamut oqaasii eqqaamakkit. Ima oqarpoq: “Inuup Ernera ulluni pingasuni unnuanilu pingasuni nunap iluaniissaaq.” (Matt 12:40; 16:21; 17:22, 23; Mark 10:34; ApS 10:39, 40) Taamaattumik Jiisusi pinerluttorlu ulloq taanna toquffimminni paratiisilianngillat. Biibilimi allassimavoq Jiisusi Guutimit makitinneqarnissami tungaanut ulluni pingasuni ‘toqusut inaanniittoq’. (ApS 2:31, 32) Jiisusip qilammi naalakkersueqateqarnissaq pillugu apustiliminik aalajaatsunik ‘angerfigeqateqarnera’ pinerluttup ilisimanngilaa. (Luk 22:29, NW) Aamma pinerluttoq kuisinnikuunngilarluunniit. (Joh 3:3-6, 12) Taamaattumik Jiisusip pinerluttoq neriorsoramiuk nunarsuarmi paratiisi kingusinnerusukkut piviusunngortussaq pisimassavaa. w18.12 qupp. 6 § 17-18; qupp. 7-8 § 20-21

Sivitsunngitsoq Israelikkut nersuteeraasaliaq kuultiusoq pallorfigilerpaat! Jehovap peqqussutai unioqqutikkaluarlugit imminut salloqittarlutik eqqarsarput Jehova suli naalallugu. Aronip allaat nersuteeraasaliamik pallorfiginninneq ‘Jehovamut nalliussivittut’ taavaa. Jehova qanoq iliorpa? Mosesimut oqarpoq Israelikkut ‘ajortumik iliuuseqartut’ aamma ‘aqqummit atuaqqusaraluaminit nigorsimasut’. Jehova kamangaarami allaat inuiaqatigiit tamaasa suujunnaarsinniarlugit eqqarsaraluarpoq. (2 Mos 32:5-10) Jehovali Guutiugami nallittuisoq inuiaqatigiit suujunnaarsinniarnagit aalajangerpoq. Aroni kuultiusumik nersuteeraasalioraluarluni peqqissimivoq Levikkullu pinerattut Jehova naalanniarlugu aalajangerluni. Kuultimik nersuteeraasaliamik pallorfiginnittut tuusintillit toqugaluartut Jehovamut naalanniarlutik aalajangertut aniguipput Guutimillu pilluaqquneqarnissamik neriorsorneqarlutik. – 2 Mos 32:26-29. w18.07 qupp. 18-19 § 13-16

Kimit iluarisaaneq pitsaanerpaava? Tassaanngilaq inuppassuit isumaqarnerattut qaffasissumik ilinniarsimaneq, niuernermi ingerlalluarneq aliikkusersuinerulluunniit silarsuaani tusaamasaaneq. Paulusip kimit iluarisaaneq pitsaanerpaajunersoq ima allalluni nassuiarpaa: “[Maanna] Guuti ilisimalerassiuk – eqqornerusumik oqarlanga: Guutip ilisimalermasi – taava qanoq ilillusi pissaanerit taakku sanngiinnermit nallinnaannartut uterfigisinnaavisigit? Kingumut inussiaataasutut kiffartorfiginiarpisigit?” (Gal 4:9) Qilammi nunamilu naalakkersuisumit qutsinnerpaamit ‘Guutimit ilisimaneqarneq’ immikkut pisinnaatitaaffiuvoq nuanningaartoq! Jehovap kinaasugut nalunngilaa, asavaatigut ikinngutigissagitsinnilu kissaatigaa. Jehovap ikinngutigisinnaaniassagamisigut pinngortippaatigut. – Oqal 12:13, 14. w18.07 qupp. 3-4 § 3-4

Guutip inatsisai iluaqutigissagutsigit nuannaralugillu maleruartariaqarpavut. (Am 5:15) Qanoq taamaaliorsinnaavugut? Jehovap isiginnittaasiatut isiginnittaaseqartariaqarpugut. Takorlooruk sinnarluttartutit. Nakorsap siunnersorpaatit peqqinnarnerusunik nerisaqartassasutit, timigissartassasutit inuuninnilu allatigut allannguissasutit. Siunnersuutai malikkakkit iluaqutigaatit! Nakorsap siunnersuutai qanoq igaagit? Tamatumunnga assingusumik Pinngortitsisitta inatsisinik ajortip kingunipiluinut illersuutaasunik inuunerinnerulissutigisassatsinnillu tunivaatigut. Eqqarsaatigiuk sallunermik, peqquserluttuliornermik, tillinnermik, kinguaassiuutitigut inuunerlunnermik, nakuusernermik anersaarsiornermillu inatsisit Biibilimiittut maleruarnissaat qanoq iluaqutaatigisoq. (Uss 6:16-19; Saqq 21:8) Jehovamut naalannitta kinguneri ajunngitsut misigigaangatsigit Jehova asanerulertarparput inatsisaalu nuannarinerulertarlugit. w18.06 qupp. 16 § 5-6

Pilatusip annilaangagisimasinnaavaa Jiisusip inuit Romamiunut pikitsitsisissagai. Jiisusili ima akivoq: “Naalagaaffiga silarsuarmit matumannga pinngilaq.” (Joh 18:36) Jiisusi politikkimut akuliukkusunngilaq naalagaaffini qilammiittussaammat. Oqarpoq nunarsuarmi suliassani tassaasoq “sallusuissut nalunaajaassutigissallugu”. (Joh 18:37) Uagut suliassarput ilisimagatsigu politikkikkut kattuffimmik – eqqarsaatitsigulluunniit – tapersersuissanngilagut. Tamanna oqitsuujuaannanngilaq. Nakkutilliisoq angalasartoq oqarpoq inuit nunani nakkutilliiffigisaminiittut ingasaassinerugaluttuinnartut. Inuiaassusertik tulluusimaarutigisorujussuuaat isumaqarlutillu namminneq nunaqqatiminnit naalakkersorneqarunik atugarissaarnerussallutik. Ima nangippoq: “Qujanartumik qatanngutivut Guutip naalagaaffia pillugu nutaarsiassap nuannersup oqaluussissutigineranik aallussilluarnermikkut kristumiutut ataasiussuseqartuarput. Guutip naapertuilluanngitsuliornernik ajornartorsiutinillu allanik aaqqiinissaa tatigaat.” w18.06 qupp. 5 § 6-7

Diaavulu ‘Saatanimik’, ‘akerlilersuisumik’ isumaqartumik, taaguuteqarpoq. Allakkani Hebræerisuuni taamaallaat atuakkani pingasuni – Nalunaarsuutini siullerni, Jobimik allakkani Zakariallu allagaani – Saatani eqqaaneqarpoq. Sooq Missiarsip tikiunnera sioqqullugu akeraq taanna pillugu paasissutissiissutigineqartut taama annikitsigaat? Jehovap Saatani pillugu annikitsualuppassuit iliuusiilu Allakkanut Hebræerisuunut ilanngutitinngilai. Allakkanimi Hebræerisuuni Missiarsip inunnit ilisarineqarsinnaanissaa malinneqarnissaalu siunertaavoq. (Luk 24:44; Gal 3:24) Missiarsi tikiummat Jehovap taanna taassumalu ajoqersugai Saatani inngilillu taassumunnga ililiuttut pillugit paasissutissiinissamut atorpai. Jehovap Jiisusi tanitallu Saatanimik taassuminngalu malinnittunik suujunnaarsitsinissamut atussammagit tamanna naleqquppoq. (Rom 16:20; Saqq 17:14; 20:10) Diaavulu killilimmik pissaaneqarmat ersigisariaqanngilarput. Jehovamit, Jiisusimit inngilinillu aalajaatsunit illersorneqarpugut. Ikiuinerisigut akerarput akiorsinnaavarput. w18.05 qupp. 15-16 § 2-4

Aatsaat inerititaqarutta Jehovamut kiffaasinnaavugut. (Matt 13:23; 21:43) Taamaattumik assersuusiami Johannesip iivangkiiliuani kapitali 15-imi allassimasumi inerititaqarneq tassaasinnaanngilaq ajoqersuganngortitsiortorneq. (Joh 15:1-5; Matt 28:19) Taamaakkaluarpat Nalunaajaasut aalajaatsut Jiisusimut ajoqersuganngornissamik allamik ikiuisimanngitsut avalequtit inerititaqanngitsut assigissagaluarpaat. Tamannali ilumoorsinnaanngilaq! Sooq? Inuit ajoqersuganngornissaannik pinngitsaalisinnaannginnatsigit. Jehovap asannittuusup sapikkatsinnik piumaffiginavianngilaatigut. Taamaallaat sapinngisatsinnik iliuuseqaqquaatigut. (5 Mos 30:11-14) Taavami inerititaqarneq qanoq paasisariaqarami? Tamatta iliuuserisinnaasarput pineqartariaqarpoq. Suna? Guutip naalagaaffia pillugu nutaarsiassamik nuannersumik oqaluussineq. – Matt 24:14. w18.05 qupp. 5 § 8-9

Nalitsinni upperisarsiornikkut siuttut amerlapput. Immaqa palasinik, rabbinik allatulluunniit taaguuteqartarput. Farisiiaritulli taakku Guutip oqaasianit sallusuissut ilinniartitsissutiginagu “Guutip sallusuissusia sallumik taarserpaat”. (Rom 1:18, 25) Salluliuutigisartagaasa ilaat tassaapput ‘inuit annaanneqareersut’, inuit toqujuitsumik tarneqartut, toqusut ernioqqittartut, aamma arnaqammik anguteqammilluunniit katittarnerit Guutip akuerigai. Politikerit aamma inunnik uukapaatitsiniarlutik sallusarsimapput. Taakkua salluliuut annerpaat ilaat qanittukkut nalunaarutigisassaat tassaavoq nunarsuarmi ‘sumilluunniit aarlerinartoqannginneraaneq’. Kisianni “perlussap tassanngaannaq tikikkumaarpai”. Taamaammat politikkikkut siuttut taakku pissutsinik pitsanngorneraasut upperissanngilavut. Ilumoortormi tassaavoq ilisimalluaratsigu Jehovap “ullussaa nalliukkumaartoq unnuami tillinniatut”. – 1 Th 5:1-4. w18.10 qupp. 4-5 § 6-8

Piffissami erloqinartumi inuugatta isumatsariaannaallutalu nikalloriaannaavugut. Jiisusip Kristusip ‘naalagartat’ aalajaatsut, utoqqaanertat angutit tanitat savanullu allanut ilaasut, atorlugit qiimmassartarpaatigut. Ilagiinni utoqqaanertat taakku ‘uppernitsinnut naalagaanngillat, nuannaartuarnissarpulli suleqataaffigaat’. Nuannaaqqulluta aalajaaqqullutalu ikiorusuppaatigut. (Es 32:1, 2; 2 Kor 1) Utoqqaanertat apustili Paulusi, qatanngutiminik qiimmassaaniartuartoq, ilaarsinnaavaat. Paulusip Thessalonikami kristumiut malersugaasut ima allaffigai: “Asallusi kissaatigisimavarput Guutip iivangkiiliuanik tuniinnarasi aammattaaq inuunerput tunniutissallugu, nuannarisarilersimagassimi.” (1 Th 2:8) Utoqqaanertat oqaatsimikkut qiimmassaangaarsinnaapput. Tamannali tamatigut naammattarpa? Tamanna Paulusip Efesosimi utoqqaanertanut oqaasiinit ullormut allassimaffimmiittumit erserpoq. w18.04 qupp. 22-23 § 6-8

Kiffaanngissutsip tamatuma iluaqutissartai nuannaarutigissagutsigit ‘Jehovamut saattariaqarpugut’, tassa taassumunnga qanimut attaveqartariaqarpugut. (2 Kor 3:16) Israelikkut inoqajuitsumiitsillutik Jehovatut isiginnittaaseqanngillat. Eqqarsartaasiat uummataallu ulissimasutut ipput. Inussiaajunnaarsitaaqqammerlutik kiffaanngissusertik namminneq pilerissutsiminnik matussusiiniarnermut atorusuppaat. (Hebr 3:8-10) Jehovap anersaavata kiffaanngissuseqalersitsinera tassaaginnanngilaq inussiaajunnaarsitaaneq. Inuit sapigaannik Jehovap anersaavata ajortimut toqumullu inussiaataanermit aamma upperisarsiornermit eqqunngitsumit ileqqulersuutinillu aniguisissinnaavaatigut. (Rom 6:23; 8:2) Kiffaanngissutsip tamatuma ila asseqanngissusia! Allaat inussiat parnaarussaaqqasullu taamatut kiffaanngissuseqarsinnaapput. – 1 Mos 39:20-23. w18.04 qupp. 4 § 3-5