Juuni

Jiisusip neriorsuutaa apustilinut nakusatsinnarsimassaaq! Apustilit paasilluanngilaat Jiisusip toquffissaa nalliutingajalersoq. Imaanngilarli toquppat ikioriarfissaarutissasut. Jehovap qinnutaasa akinissaat piareersimaffigaa oqaluussinerannillu ikioriaannaallugit. Taamaaliorporlu. Jiisusi toqoreersoq apustilit Jehova qinunikkut sapiilliseqqullutik kimigiiserfigaat, Jehovallu qinnutaat akivaa. (ApS 4:29, 31) Ullumikkut aamma taamaappoq. Oqaluussinitsinni nikallujuikkutta Jiisusi ikinngutigiuassavarput. Upperilluinnarsinnaavarpullu oqaluussinerput sapernartillugu qinunikkut ikioqqugutta Jehovap qinnutivut akissagai. (Fil 4:13) Jehovap qinnutivut akisarmagit aamma Jiisusi ikinngutigigatsigu qujamasungaarpugut. Tunissutit taakku Jehovameersut nakussatsissutigalugit inerititaqartuarsinnaavugut. – Jaak 1:17. w18.05 qupp. 14 § 17-18

Ukiut tallimat ingerlanerinnaani kristumiut hebræerit siulliit Jehovap ulloq Jerusalemimik eqqartuussiffiata nalliutingajalernera takuaat. Paasivaat Jiisusip oqarsimaneratut illoqarfimmit qimaasariaqarlutik. (ApS 2:19, 20; Luk 21:20-22) Jehovap ullua ukiumi 70-imi, Romamiut Jerusalemi piujunnaarsimmassuk, nalliuppoq. Uaguttaaq Jehovap ‘ulluata angeqisup siooranaqisullu’ nalliutingajalernerata upperinissaanut pissutissaqarluarpugut. (Joel 2:11) Pruffiitip Sefaniap allatai aamma nalitsinnut tunngapput: “Qanillivoq Naalakkap ullussarsua; qanilliartulertoqaaq!” (Sef 1:14) Tamanna pissutigalugu ‘asaqatigiinnissamut ajunngitsuliornissamullu kajumissaaqatigiinniassagatta isumassoqatigiittariaqarpugut’. (Hebr 10:24, NW) Qatanngutivut pisariaqartitsigaangata qiimmassarsinnaaniassagatsigit suli annerusumik soqutigisariaqarpavut. w18.04 qupp. 21 § 1-2

Jehovap Josva nunamut neriorsuutigisamut innuttaminik siulersuisussaq taama qiimmassarpaa. Jehovap innuttani eqimattatut aamma qiimmassarpai. Assersuutigalugu nalunnginnamiuk juutit Babylonimi aallarussaaqqanerminni qiimmassarneqartariaqartut qiimmaallannartumik ima siulittuivoq: “Siooraqinak ilagigakkit, erseqinak, uangaagama illit Guutit. Nakussatsippakkit ikiorlutillu, assannik ajugaasartumik najummivakkit.” (Es 41:10) Kingusinnerusukkut Jehovap kristumiut siulliit qiimmassarpai, aamma taamatut uatsinnik qiimmassaasarpoq. (2 Kor 1:3, 4) Jehovap aamma ernini qiimmassarpaa. Jiisusip kuisereerluni nipi qilammit ima tutsiuttoq tusarpaa: “Tassa ernera asasara, nuannarisara.” (Matt 3:17) Oqaatsit taakkua Jiisusip nunarsuarmi kiffartornermini qanoq nakussatsissutigitiginerai takorloorsinnaaviuk? w18.04 qupp. 16 § 3-5

Inuit ilaat isumaqarput Jehovap Adami piumasamisut iliornissaanut kiffaanngissusilinngikkaa. Paasinngilaalli nammineq qanoq iliorniarnerluni aalajangiisinnaatitaanerup suup eqqortuuneranik suullu eqqunngitsuuneranik aalajangiisinnaatitaaneq assiginngikkaa. Adamip Evallu namminneq aalajangersinnaavaat Guutimut naalanniarlutik naalannginniarlutilluunniit. Jehovali kisimi suup eqqortuuneranik suullu eqqunngitsuuneranik aalajangiisinnaatitaavoq. Tamatumunngalu ‘orpik ajunngitsumik ajortumillu ilisimalersitsisoq’ assersuutaavoq. (1 Mos 2:9) Jehovap orpimmit nereqqusinnginnermigut Adami Evalu qanoq piviusumik kiffaanngissuseqarsinnaasut asannittumik ilinniartippai. Ajoraluartumik Adami Evalu Jehovamut naalannginniarlutik aalajangerput. Saatanip oqarneratut Adamip Evallu aalajangiinerat kiffaanngissuseqarnerulersitsiva? Naamik. Adamip Evallu suup ajunngitsuunera suullu ajortuunera namminneerlutik aalajangeriaraluaramikku kiffaanngissuseqarnerulernatik kiffaanngissuseq piviusoq Jehovamit pisartik annaavaat. w18.04 qupp. 5-7 § 9-12

Jehova kiffaminik misiginneqataaginnarnani ikiorniarlugit iliuuseqartarpoq. Assersuutigalugu Israelikkut Egyptenimi inussiaataagallarmata Jehovap erloqinerat paasivaa tamannalu killinneqaatigalugu iliuuseqarluni. Jehova Mosesimut ima oqarpoq: “Innuttama Egyptenimi naalliunnerat takusimavara, ... nimaarlutik nillianerat tusarpara. Erloqissutaat nalunngilakka. Taamaattumik aqqarpunga Egyptenimiut assaannit aniguisikkumallugit.” (2 Mos 3:7, 8) Jehovap innuttani misiginneqatigigamigit inussiaataanermit aniguisippai. Ukiut hundredillit qaangiuttut nunami neriorsuutigisami Israelikkut akeqqanit saassunneqartarput. Jehova qanoq iliortarpa? Jehovap “naakkigisarpai annikilliortitaanertik nanertugaanertillu pillugit kappialagaangata”. Aammaarluni misiginneqataanini killinneqaatigalugu Jehova innuttani ikiorniarlugit iliuuseqarpoq. Israelikkut akeqqaminnit aniguisinniarlugit eqqartuussisunik siulersuisoqalersippai. – Eqq 2:16, 18. w19.03 qupp. 15 § 4-5

Inassutini siullerni marlunni Israelikkut guutipiluit allat pallorfiginagit taamaallaat Jehovamik pallorfiginninnissamik peqquneqarput. (2 Mos 20:3-6) Inassutit taakku Jehovap iluaqutiginavianngilai, innuttaasali iluaqutigissavaat. Taakkumi inuiaat allat guutipiluinik pallorfiginnikkaangamik naalliuttarput. Paarlattuanilli innuttani ilumoorfiginnitsini imminnullu naapertuilluartumik pisartut pilluaqqusarpai. (1 Kng 10:4-9) Jehovamut kiffartornerarlutik najoqqutassiaanik soqutiginninngitsut innuttaanillu ajortumik pinnittut pillugit Jehova pisuutinneqartussaanngilaq. Jehovalli asavaatigut naapertuilluanngitsumillu pineqaraangatta naluneq ajorpaa. Anaanaasup naalungiarsuutimi naalliuutaanik misiginneqataaneranit suli annerusumik naalliuutitsinnik misiginneqataasarpoq. Ingerlaannaq iliuuseqanngikkaluarpalluunniit piffissanngorpat ajortuliortut peqqissiminngitsut allanut ajortuliatik pillugit eqqartuunneqassapput. w19.02 qupp. 22 § 13-15

Eqqaaniaanissap qanilliartornerani ataatsimiinnitsinni Jiisusip maligassiaa maniguullunilu inuunerminik utertitsissutissatut pilliuteqarnera samminerusarpavut. Maniguunnerata ilaarnissaanut Jehovallu piumasaatut iliornissamut, allaat ajornakusoortikkaluaraangatsigu, killinneqaatigisarparput. Ullualuit toqussi sioqqullugu sapiissusermik ersersitsinera eqqarsaatigiuk. Nalunngilluinnarpaa akeqqami nikanarsassagaanni, unatassagaanni kiisalu toqussagaanni. (Matt 20:17-19) Taamaattorli toqunissani akueraa. Piffissanngormat apustilini aalajaatsut naatsiivimmi Getsemanemeeqatini oqarfigai: “Nikuillusi aallarniarta! Takuat, uannik killuussisoq tikiutereerpoq [qanillivoq, tastamantitâĸ].” (Matt 26:36, 46) Inuit sakkulisarlutik tigusariniarluni takkummata sassarpoq sakkutuunullu oqarluni apustilini qimagutitiinnassagaat. (Joh 18:3-8) Jiisusi sapiissusermik ersersitsingaarami, ilaa? Nalitsinni kristumiut tanitat savallu allat Jiisusip sapiinnermik maligassiaa ilaarniartarpaat. w19.01 qupp. 27-28 § 7-8

Eqqumiitsuliortup qalipaanermini qalipaatinik arlalinnik atuisarneratut maniguukkumalluta nuannersunik arlalinnik pissuseqartariaqarpugut. Naalanneq, qanilaarneq sapiinnerlu pissutsit taakkua ilagaat. Inuk maniguuttoq Guutip piumasaanut naalattarpoq. Qanilaartuunissarput Guutip piumasaata ilagaat. (Matt 5:5; Gal 5:23) Guutip piumasaatut ilioraangatta Saatani assut kamatsittarparput. Taamaattumik maniguukkaluarluta qanilaaraluarlutalu inuppassuarnit Saatanip silarsuaanut ilaasunit uumigineqartarpugut. (Joh 15:18, 19) Taamaattumik Saatani akerlilersorumallugu sapiittariaqarpugut. Inuup maniguuttup akerleraa inuk makitasooq, imminut aqussinnaanngitsumik kamattartoq Jehovamullu naalanngitsoq. Saatani taamatorpiaq ittuuvoq. Maniguuttut uumigimmagit tupinnanngilaq. Maniguuttut pissuserinnermikkut Saatanip qanoq ajortiginera ersersittarpaat. Allaallu suli Saatanimut ajornerusumik sallutuujunera uppernarsartarpaat. Sooq? Qanorluunniit oqaraluaruni ilioraluarunilu inuit maniguuttut Jehovamut kiffartorunnaarsissinnaannginnamigit! – Job 2:3-5. w19.02 qupp. 8-9 § 3-5

Jehovap nalunngilaa Babylonimi najugallit ersilissasut. Babyloni Medo-Persiap sakkutuuinit pissarsuarnit saassunneqartussaavoq. Sakkutuut taakku atorlugit Jehovap innuttani Babylonimi tigusaaqqanermit aniguisissavai. (Es 41:2-4) Babylonimiut inuiaallu allat akerartik takkutilersoq paasigamikku imminnut sapiillisinniarsaripput oqarfigalutik: “Nikalloqinak!” Aamma illersorneqarnissartik neriuutigalugu allanik guutilialiorput. (Es 41:5-7) Jehovalli juutit aallarussaaqqasut eqqissisarlugit oqarfigereersimavai: ‘Israeli illit [allat pinnagit] kiffara’ “erseqinak, uangaagama illit Guutit.” (Es 41:8-10) Maluginiaruk Jehova oqarmat: “Uangaagama illit Guutit.” Taama oqarnermigut Jehovap pallorfiginnitsiminik aalajaatsunik puiuisimannginnerminik eqqissisarpai sulilu imminit innuttarineqarnerannik eqqaasillugit. Oqarfigai: “Kissumiassavassi isumannanngitsumullu pisillusilu.” Qularnanngilaq juutit aallarussaaqqasut oqaatsit taakku nakussatsissutigigaat. – Es 46:3, 4. w19.01 qupp. 4 § 8

Jehova pingasoriarluni qilammiit oqaluppoq. Markusi 1:9-11-mi Jehovap siullermeerluni oqalunnera allaatigineqarpoq, ima oqarpoq: “Illit tassaavutit ernera asasara, nuannarisaraakkit!” Ataatami asanerarlunilu akuerinninnera tusaramiuk Jiisusi killitsingaarsimassaaq! Jiisusi pillugu ilumoortut pingasut Jehovap oqalunneranit uppernarsarneqarput. Siullertut, Jehovap Jiisusi erneraa. Aappaattut, ernini asavaa. Pingajuattullu, Jehovap ernini akueralugu nuannaraa. Jehova oqarmat “Illit tassaavutit ernera” ernini asasani, Jiisusi, attaveqaqatiginerani allatut inissisimaffeqalernera ersersippaa. Jiisusi qilammiikkallarami anersaajuvoq Guutimit pinngortitaasoq Guutillu erneranik taaneqarsinnaasoq. Kuisikkamili anersaamik illernartumik taninneqarpoq. Pisumi tamatumani Guuti paasisitsivoq Jiisusi ernermisut tanitatut qilammut uternissamik kunngitut palasiunertullu toqqarsimasamisut neriuuteqalersoq. (Luk 1:31-33; Hebr 1:8, 9; 2:17) Taamaattumik Jiisusi kuisimmat Ataataa pissutissaqarluarluni ima oqarsinnaavoq: “Illit tassaavutit ernera.” – Luk 3:22. w19.03 qupp. 8 § 3-4

Ajortumik siunnersuinerit itsarli atuutilerput. Saatanip siulliulluni inuit ajortumik siunnersorpai. Adami Evalu oqarfigai qanoq inuuniarnerlutik namminneq aalajangerunikku pilluarnerussasut. (1 Mos 3:1-6) Saatanili namminissarsiorpoq! Adamip Evallu, qitornassaat ilanngullugit, imminik naalatsigitillutillu pallorfiginninnissaat piumasaraa, Jehovamuunngitsoq. Kisianni suut tamaasa pigisaat Jehovap tunniunnikuuai. Imminnut tunissutaapput, naatsiivik kusanartoq angerlarsimaffigisinnaallugulu naassaanngitsumik naammalluinnartunik timeqarlutik inuusinnaapput. Ajoraluartumik Adamip Evallu Guuti naalanngilaat. Taamaaliornikkut inuunermik tunniussisumut attaveqarunnaarput. Kinguneri alianangaarput. Naasutut kipineqarsimasutut Adami Evalu utoqqaliartorlutillu toqupput. Qitornaat aamma naalliupput, uagut ilanngulluta. (Rom 5:12) Nalitsinni inuit amerlanersaat Guutimut naalatsigitikkumanatillu namminneq piumasamittut inoorusupput. (Ef 2:1-3) Kinguneranit erserpoq ullormut allassimaffimmi allassimasut ilumoortut. w18.12 qupp. 16 § 3-4

Apustili Paulusi silatuujullunilu ilinniagaqqortuujuvoq hebræerisut grækerisullu oqalussinnaasoq. (ApS 5:34; 21:37, 39; 22:2, 3) Ileqqussatigulli najoqqutassanut tunngatillugu silarsuup ilisimassusia itigartippaa. Guutip oqaasia tunngavigalugu aalajangiisarpoq. (ApS 17:2; 1 Kor 2:6, 7) Kingunerisaanik iluatsilluartumik kiffartorlunilu naassaanngitsussamut akissarsisitaanissani qilanaaraa. (2 Tim 4:8) Erseqqippoq Guutip eqqarsartaasia silarsuup eqqarsartaasianit qutsinnerungaartoq. Guutip najoqqutassiai malikkutsigit pilluarlutalu ingerlalluassaagut. Jehovalli immisut eqqarsartaaseqalersinniarluta pinngitsaalinavianngilaatigut. ‘Inussiap aalajaallunilu silatuup’ utoqqaanertalluunniit eqqarsaativut aqunneq ajorpaat. (Matt 24:45, NW; 2 Kor 1:24) Jehovap eqqarsartaasiatut isiginnittaaseqalernissaq tamatta immikkut akisussaaffigaarput. w18.11 qupp. 24 § 12-13

Pruffiiti Esaja aqqutigalugu Guutip siulittuutigaa Israelikkut nunaminnut uterunik nunaat eqqissineqarfiussasoq. Kialluunniit uumasunit inunnillu saassunneqarnissani siooragissanngilaa. Inuusuttut utoqqaallu toqqissisimassapput. (Es 11:6-9; 35:5-10; 51:3) Esaja aamma allappoq Jehovamik ilisimasaqarnerup Israeli tamakkiinnarnagu ‘nuna tamakkerumaaraa, soorlu ermit matoqqagaat immap naqqa’. Maluginiaruk Esajap erseqqissarmagu Israelikkut Babylonimit uterunik uumasunit inunnilluunniit saassunneqassanngitsut. Allappoq naatsiiviup Edenip imeqarluarneratut nuna imeqassammat nunaataat nerisassarpassuarnik inerititaqassasoq. (1 Mos 2:10-14; Jer 31:12) Siulittuut taamaallaat Israelikkut nalaanni eqquutissava? Maluginiaruk siulittuummi aamma eqqaaneqarmat tappiitsut, tusiattut tusilartullu ajorunnaassasut. Israelikkunnulli Babylonimit utertunut taama pisoqanngilaq. Guutilli oqaatigimisaarpaa siunissami nappaatillit tamaasa ajorunnaarsissallugit. w18.12 qupp. 5 § 11-12

Neriuutigaarput naassaanngitsumut sallusuissummi inuunissarput. Sallusuissummiittuarumanerput aalajangiusimanerulerumallugu suna iluaqutigisinnaavarput? Biibilimik atuaqqissaartuartariaqarputit ilikkakkatillu eqqarsaatigeqqissaarlugit. Atuaqqissaarnissamut pilersaarusiortarit. Atuaqqissaarnerujartortillutit sallusuissut nuannarinerujartussavat qimanngisaannarnissaalu aalajangiullugu. Ussatit 23:23-mi ima allassimavoq: “Pisiariniaruk sallusuissuseq. ... Pisiarikkittaaq ilisimassuseq, ajoqersuussut paasisimasaqassuserlu!” Sallusuissutip Biibilimeersup ilisimaannarnissaa naammanngilaq. Inuunitsinni maleruartariaqarparput. Paasisimasaqassuseqaleraangatta ilisimariikkatsinnut ataqatigiissitsisarpugut. Ilisimassutsip ilisimasatsitut iliuuseqarnissamut killittarpaatigut. Ilaannikkut sallusuissummit ajoqersortittarpugut, tassa perorsartittarpugut, qanoq allannguisariaqartugut paasitilluta. Taamatut perorsarneqarnerput qisuariarfigipallattariaqarparput, Biibilimimi allassimavoq tamanna sølvimit erlinnarnerusoq. – Uss 8:10. w18.11 qupp. 10 § 3; qupp. 13 § 13-14

Illit inuuninni suna naleqarnerpaava? Jehovap innuttaatut taassumunnga attaveqarnerput inuunitsinni naleqarnerpaavoq. Sumilluunniit taarsinngisaannassavarput. Aamma sallusuissut Biibilimeersoq pissutigalugu Jehovamut ikinngutaalersinnaagatta sallusuissut uagutsinnut naleqarpoq. (Kol 1:9, 10) Jehova tassaavoq uagutsinnik Ajoqersuisorsuaq, oqaatsimini, Biibilimi, sallusuissuterpassuarnik erlinnangaartunik ilinniartitsiserput. Atermi pingaaruteqarneranik ilinniartippaatigut pissusinilu nuannersut pillugit oqaluttuulluta. Oqaluttuuppaatiguttaaq asangaaramisigut Ernermi asasami inuunera uagut pilluta tunniukkini. Naalagaaffik Missiarsimit kunngiuffigineqartoq pillugu oqaluttuuppaatigut. Siunissamut neriuutissippaatigut nunami paratiisiusumi inuunissamik. Qanoq inuussanersugut ilinniartippaatigut. Pinngortitsisitsinnut qanillinissamut iluaqutigigatsigit inuunitsinnillu siunertaqalersitsimmata sallusuissutit taakku erlinnartutut isigaavut. w18.11 qupp. 3 § 1-2

Inuit sallutuut Jehova salloqqittarsinnaanngilaat. Biibilimi allaqqavoq ‘sumilluunniit taassumunnga ersinngitsoqanngitsoq’. (Hebr 4:13) Assersuutigalugu Anania Safiralu apustilinik uukapaatitseriaraluarput. Nunaatimik ilaat tunivaat aningaasallu ilaannaat apustilinut tunniullugit. Anania Safiralu ilagiinniittunit allanit nersorneqarusupput, apustilinut oqarput aningaasat tamaasa tunniussimallugit. Jehovalli sallunerat nalunngilaa, pillarpaalu. (ApS 5:1-10) Inuit sallusartut Jehovap qanoq isumaqarfigai? Inuit tamarmik mamarliillutik sallusartut peqqissiminngitsullu “tatsimut innerusumut” Saatanip pineqarnissaatut pisinneqassapput. Allatut oqaatigalugu naassaanngitsumut piuneerunneqassapput. (Saqq 20:10; 21:8; Tuss 5:6) Nalunngilarput Jehova ‘tassaanngitsoq inuk sallusartoq’, tassa ‘Guuti sallusinnaanngilaq’. (4 Mos 23:19; Hebr 6:18, NW) ‘Jehovap uumigaa oqaq sallutooq’. (Uss 6:16, 17) Taassuminnga iluarisaarusukkutta ilumoortoq oqaatigisariaqarparput. w18.10 qupp. 5-6 § 10-13

Upperisarsiornermut eqqunngitsumut tunngatillugu nalliuttorsiornermut ittuppit aningaasanik taperseeqquppatit qanoq iliussagaluarpit? Taamatut pisoqarnissaa utaqqiinnarnagu tamakku pillugit Jehovap isumaa maanna eqqarsaatigeqqissaassallugu silatusaarnerussaaq. Taamatullu pisoqassagaluarpat eqqortuliornissarput eqqortumillu akinissarput ajornannginnerussaaq. Aamma nakorsarnermut tunngatillugu pinartumik pisoqartillugu Jehovamut ilumoorfiginnittuarnissap pingaaruteqassusianik eqqarsaatiginneqqissaareerneq iluaqutigisinnaavarput. Soorunami aalersortinnissarput imaluunniit aap akui pingaarnerusut sisamat atorlugit aalersortinnissarput akuerinngilarput. (ApS 15:28, 29) Aammulli tunngatillugu nakorsaariaatsit assigiinngitsut kristumiut tamarmik immikkut nammineerlutik Biibilimi najoqqutassiat tunngavigalugit aalajangiisariaqarput. Suniarnerluni aalajangiinissaq qaqugukkut pitsaanerpaava? Napparsimmavimmi immaqa anniarluta aalajangiipallannissamullu tatineqartilluta? Soorunami naamik. Maanna piffissaqqippoq misissueqqissaarnissamut, nakorsarnermut tunngasutigut piumasavut pillugit erseqqissumik immersueqqissaarnissamut nakorsamillu oqaloqateqarnissamut. w18.11 qupp. 28 § 5; qupp. 30-31 § 15-16

Jehovap asannilluni innuttani toqqissisimatittarlugillu akeqqanut illersortarpai. Tamanna naggatissap qanilliartortillugu assut isumallualissutigalugulu toqqissisimalissutigaarput. Jehovap innuttani annikilliornartussarsuarmi nalliutingajalersumi aamma isumassorumaarpai. (Saqq 7:9, 10) Guutip innuttai, inuusuttut, peqqissut innarluutillillu annikilliornartussarsuup nalaani paatsiveerutissanatillu annilaangalissanngillat. Tamatuma akerlerluinnaanik qisuariassapput! Jiisusip oqaasii eqqaamassavaat: “Nikuigitsi niaqqusilu massitsillugit aniguisitaanissarsimi qanillimmat.” (Luk 21:28) Allaat Gogimit, inuiannit eqimattanit pissaaneqangaartunit, saassunneqarunik Guutip innuttaasa Jehovamit illersorneqarnissartik qularissanngilaat. (Ez 38:2, 14-16) Sooq? Nalunnginnamikku Jehova allanngorneq ajortoq. Innuttaminik asannittumik isumassuisumillu Annaassisartuulluni tamatigut uppernarsassavaa. – Es 26:20. w18.09 qupp. 26 § 15-16

Takorlooruk Israelikkut qanoq misiginersut Jehovamit taama oqarfigineqaramik. Tamatta immikkut Jehovamut erlinnartuunerput nalunngilarput. Biibilimi ima neriorsuuteqarpoq: “Guutivit najorpaatit, pissarsuaq annaassiumaartoq. Qiimmattarluni tipaatsuutigaatit.” (Sef 3:16, 17) Innuttani qanorluunniit ajornartorsiuteqaraluarpata nakussatsitsiumaarnerminik tuppallersaajumaarnerminillu Jehovap neriorsorpai. Ima oqarpoq: “Kivillusi kissumiassavaasi, seeqqumik qaasigut sarliassavaasi. Soorlu qitorni anaanaata tuppallersararaa, taama tuppallersarumaarpassi.” (Es 66:12, 13, tastamantitoĸaĸ) Naalungiarsuk anaanaminit kissumiarneqarlunilu pinnguaqatigineqaraangat qanoq toqqissisimasartigisoq takorlooruk! Jehovap asangaarpaatit toqqissisimanissallu kissaatigalugu. Jehovamut erlinnangaartuunerit qularutiginngisaannaruk. – Jer 31:3. w18.09 qupp. 9-10 § 6-7

Itsaq Israelikkut kajumissutsiminnik taperseeqataanissaminnut periarfissarpassuaqarput. (2 Mos 36:2; Neh 11:2) Aamma illit qatanngutinnik ikiuininni piffissannik, pigisannik piginnaaninnillu atuinissannut periarfissarpassuaqarputit. Taamaalioruit nuannaangaarlutillu Jehovamit pilluaqqusaassaatit. Sanaartornermi sulianut kajumissutsiminnik suleqataasut ikinngutitaartortarput. Qatanngut arnaq Margiemik atilik ukiuni 18-ini naalagaaffilersaarfilioqataasarsimavoq. Suliani taakkunani qatanngutit arnat inuusunnerit immikkut soqutigisarlugillu ilinniartittarpai. Oqarpoq suliat taakku kajumissutsimik suleqataasunut kajumissaaqatigiinnissamut periarfissatsialaasut. (Rom 1:12) Inuunermini artornartorsiorfimmini sanaartornernit ikinngutitaaminit qiimmassarneqartarpoq. w18.08 qupp. 24 § 9, 11

Paulusi taama allammat Timotheusi 30-t missaannik ukioqarpoq. Taamaattoq Paulusimit pingaarutilerujussuarmik akisussaaffilerneqarpoq. Tamanna qanoq ilinniarfigissavarput? Qatanngutit angutit inuusuttut ukiui tunngavigalugit eqqartuutissanngilavut. Jiisusip 33-innarnik ukioqarluni angusarpassui eqqarsaatigikkit! Kulturit ilaanni angutit inuusuttut ataqqineqarpiarneq ajorput. Tamanna pissutigalugu utoqqaanertat immaqa angutip inuusuttup piumasaqaatinik eqqortitsisup allaat ilagiinni kiffartortunngornissaa utoqqaanertanngornissaaluunniit inassutigineq ajorpaat. Biibilimili allassimanngilluinnarpoq qatanngut angut ilagiinni kiffartortutut utoqqaanertatulluunniit toqqarneqassaguni aalajangersimasumik ukioqqortussuseqartariaqartoq. – 1 Tim 3:1-10, 12, 13; Tit 1:5-9. w18.08 qupp. 13 § 15-16

Silatusaartumik aalajangiiumalluta paasissutissat tutsuiginartut ilisimasariaqarpavut. Taamaattumik suna atuarniarnerlugu mianersuuteqqissaartariaqarparput. (Fil 4:8, 9) Internetikkut nutaarsiassaqartitsiviit tutsuiginanngitsut imaluunniit e-mailit tusatsiakkanik siammarterisut piffissaajaatigissanngilavut. Pingaartumik nittartakkat tunussisut isummaminnik siammarterinermut atortagaat ingalassimasariaqarpavut. Taakkua Guutip innuttaasa uppernerat sanngiillisikkusuppaat sallusuissullu killormut saatikkusullugu. Paasissutissat tutsuiginanngitsut aalajangiinerlutsitsisarput. Isumminngisaannarit paasissutissanit eqqunngitsunit sunnerneqarnaviarnak. Mosesip nalaani angutit aqqaneq-marluk nuna neriorsuutigisaq alapernaarsoriartoramikku pisoq eqqarsaatigeriaruk. Alapernaarsuiartortitat qulit ajortumik nalunaarusiorput. (4 Mos 13:25-33) Paasissutissat ingasaassillutik ilaartoramikkit Jehovap innuttai ersilerlutillu qunulerput. (4 Mos 14:1-4, 6-10) Pissutsit piviusut paasinagit Jehovalu tatiginagu Israelikkut sianiilliorlutik aalajangerput ajortumik nalunaarusiortut upperiniarlugit. w18.08 qupp. 4 § 4-5

Inuit amerlanerit ajunngitsunik pissuseqartarput. Jehovamillu pallorfiginninngitsut immaqa ajortuliortuaannarneq ajorput. Immaqa taamaattunik nalunngisaqarputit. Taava imaappa ajunngitsumik sunniuteqartartut? Jehovamut attaveqarninnut qanoq sunniuteqassappat? Guutimut qanillinissamut ikiortarpaatsit? Suut pingaartinnerpaavaat? Suut oqaluuserisarpaat? Atisat mutit, aningaasat, atortorissaarutit, aliikkutassat assigisaallu oqaluuserinerusarpaat? Allanik isornartorsiuigajuppat? Quiasaapiluttarpat? Jiisusi ima mianersoqqusivoq: “[Uummatip] ulikkaarutaanik qaneq utsersortarpoq.” (Matt 12:34) Paasigukku inuit peqatigisartakkatit Jehovamut attaveqarninnut ajoqutaasut iliuuseqarit! Peqatigisarnerat killilersimaaruk, pisariaqarpallu ikinngutigiunnaarlugit. – Uss 13:20. w18.07 qupp. 18 § 11

Mosesi 80-nik ukioqartoq Jehovap inuiaqatigiinnik Israelikkunnik Egyptenimi inussiaataanermit aniguisitsinissamik suliassippaa. (2 Mos 3:10) Mosesi arlaleriarluni utoqqatsissutissarsiorpoq. Jehovalli Mosesi kamagittarfigaa. Allaat tupinnartuliorsinnaatilerpaa. (2 Mos 4:2-9, 21) Jehova Ajugaqanngitsuugami pissaanini atorlugu Mosesi ersilersissinnaagaluarpaa naalatsilerlugu. Jehovalli kamagittarluni inussiarnerlunilu kiffani anneruniajuillunilu maniguuttoq neriorsorpaa najorumallugu. Periuseq taanna iluaqutaava? Aap! Mosesi Guutip innuttaanut siulersuisunngorpoq pikkorissoq. Jehovamit pineqarnermisut allat saamasumik innimittartumillu pissuseqarfiginiartarpai. Allanut oqartussaaffeqaruit innimittartuunikkut, inussiarnersuunikkut kamagittartuunikkullu Jehovamik ilaarsinissat pingaaruteqarluinnarpoq. (Kol 3:19-21; 1 Petr 5:1-3) Jehova Guuti aamma Jiisusi Kristusi, Mosesi anneq, ilaarukkit allanut oqaloqatikkuminartuullutillu qiimmassaataassaatit. – Matt 11:28, 29. w18.09 qupp. 23-24 § 7-10

Qatanngutitsinnut iluaallaataasinnaavugullusooq ilakkuminarlutalu inussiarnersuunitsigut. Tamanna ilagiinnik ataasiussuseqarnerulersitsissaaq. Illit qatanngutit ilagiinni ornittakkanniittut ilisarisimalluarnerulerniarlugit iliuuseqarsinnaavit? (2 Kor 6:11-13) Illit qaamanerit sumiikkaluaraangavilluunniit qaamasinnaavoq. Inussiarnernerit sanilivit Jehova pillugu paasisaqarnerunissamut kajumississutigisinnaavaat. Imminut ima aperigit: ‘Sanilima qanoq isumaqarfigaanga? Angerlarsimaffiga torerlunilu ipiippa? Najugaqarfinnik eqqaaniittunillu orniginarnerulersitsiva? Sanilinnut ikiuukkumatuvunga?’ Nalunaajaasut allat aperikkit inussiarnernerat maligassiuilluarnerallu ilaqutaannut, saniliinut, suleqataannut atuaqataannulluunniit qanoq sunniuteqarsimanersoq. – Ef 5:9. w18.06 qupp. 24 § 13-14

Stefanusimik toqutsisut taama isumaqarput. (ApS 6:8, 12; 7:54-60) Upperisarsiortorpassuit Guuti kiffartorfiginerarlugu ajungaartumik pinerluttuliortarsimapput, assersuutigalugu toqutsisarput. Taamaaliornermikkulli Guutip inatsisaanik unioqqutitsipput. (2 Mos 20:13) Ersarippoq nalunngeqatiginnissutiminnit kukkusumik siulersorneqarsimasut! Qanoq qulakkeersinnaavarput nalunngeqatiginnissutitsinnit eqqortumik siulersorneqarluta? Inatsisit najoqqutassiallu Biibilimiittut “iluaqutaapput ajoqersuinermut, uppernarsaanermut, ilitsersuinermut iluarnermullu perorsaanermut”. (2 Tim 3:16) Biibilimik atuaqqissaartariaqarpugut, atuakkatsinnik eqqarsaatiginneqqissaartariaqarpugut ilikkakkavullu inuunitsinni maleruarlugit. Taamaalilluta Jehovap eqqarsartaasiatut eqqarsartaaseqarnerulissaagut. Taamaaliornikkut nalunngeqatiginnissutitsinnit eqqortumik siulersorneqarnissarput qulakkeersinnaavarput. w18.06 qupp. 16 § 3-4

Romamiut sakkutuui panat 50 centimeterit missaanni takitigisut atortarpaat. Sakkutuut ullut tamaasa sungiusartaramik panamik atuillaqqissuusarput. Guutip oqaasia panamut Jehovamit pisatsinnut apustilip Paulusip assersuuppaa. Upperisattali illersornissaanut eqqarsartaatsittaluunniit allanngortinnissaanut atorluarnissaa ilinniartariaqarparput. (2 Kor 10:4, 5; 2 Tim 2:15) Saatani anersaapiluillu ersigisariaqanngilavut. Pissaaneqarput, Jehovamilli pissaaneqarnerunngillat. Aamma naassaanngitsumik piunavianngillat. Parnaarunneqassapput Kristusillu ukiuni 1.000-ni naalakkersuinerani ajoqusiisinnaassanatik, tamatumalu kingorna suujunnaarsitaassapput. (Saqq 20:1-3, 7-10) Akerarput, taassuma pilersaarutai anguniagaalu ilisimavavut. Jehovap ikiuineratigut aalajaalluta akiorsinnaavarput! w18.05 qupp. 25 § 15; qupp. 26 § 19-21

Adamip nalunngilaa pulateriaarsuit oqalussinnaanngitsut. Taamaattumik pulateriaarsuup Evamik oqaloqateqarsimanera tusaramiuk immaqa Adamip paasivaa anersaaq oqaluttoq. (1 Mos 3:1-6) Adamip Evallu naluaat anersaaq taanna kinaasoq. Adamili nalusani iligilerniarlugu Ataataminullu qilammiusumut asannittumut pikitsitsiniarluni aalajangerpoq. (1 Tim 2:14) Jehova ingerlaannaq akeraq ajortoq taanna pillugu paasissutissiivoq neriorsuillunilu naggataatigut suujunnaarsinneqassasoq. Tamannali nalliutserlugu anersaap pulateriaarsuk atorlugu oqaluttup Guutimik asannittunik tamanik akerlilersuiumaarnera Jehovap mianersoqqussutigaa. (1 Mos 3:15) Inngilip imminut pikitsitsisup atia Jehovap uagutsinnut oqaatiginngisaannarpaa. Edenimi pikitsitsinerup kingorna aatsaat ukiut 2.500-t qaangiummata pikitsitsisup kinaanera Jehovap oqaatigaa. – Job 1:6. w18.05 qupp. 15 § 1-2

Illit oqaluussiffigisartakkanni inuit Guutip naalagaaffia pillugu nutaarsiassamik nuannersumik tusarusunnginnerat pissutigalugu nikallornikuuit? Taamaappat apustili Paulusi qanoq misiginersoq paasisimassavat. Ukiut 30-t missaat oqaluussivoq inuillu amerlasuut kristumiunngornissaannik ikiorlugit. (ApS 14:21; 2 Kor 3:2, 3) Taamaattorli juutit ikiugai kristumiunngortut amerlanngillat. Juutit amerlanersaasa Paulusi tusarusunngilaat, allaat ilaasa malersorpaat. (ApS 14:19; 17:1, 4, 5, 13) Akuersiumannginnerat Paulusip qanoq misigilissutigaa? Ima allappoq: ‘Angisuumik aliasuuteqarpunga uummatikkut naalliuutigiuakkannik.’ (Rom 9:1-3) Sooq taama misigiva? Oqaluussineq nuannarilluinnaramiuk inuillu asagamigit. Paulusip juutit soqutigingaaramigit taakkua Guutip nallittuineranik itigartitsinerat aliasuutigaa. Paulusi assigalugu inuit soqutigigatsigit ikiorusukkatsigillu oqaluussiffigisarpavut. – Matt 22:39; 1 Kor 11:1. w18.05 qupp. 4 § 4-5

Paulusi erseqqissumik allappoq allaat allanik qiimmassaanissamik akisussaaffillit qiimmassarneqartariaqartut. Qatanngutini Romamiut ima allaffigai: “[Takorusukkaluaqaassi] ilangiisikkumallusi Anersaap tunissutaanik, nakussatsitaaqqullusi, tassa: ilissi uangalu upperisaqaqatigiinnitsigut ilissinni kajumissaaqatigiissinnaaqqulluta.” (Rom 1:11, 12) Aap, allaat apustilip Paulusip qiimmassarneqarnissani pisariaqartittarpaa. (Rom 15:30-32) Ullumikkut piffissaq tamaat Jehovamut kiffartortut qiimmassarsinnaavavut. Qatannguterpassuit angutit arnallu Jehovamut naalakkusunnertik aamma “Naalakkami” taamaallaat katikkusunnertik pissutigalugit aappaqarniarnatik aalajangersimasut qiimmassarsinnaavavut. (1 Kor 7:39) Aamma kristumiut malersorneqarnerminni napparsimanerminniluunniit pinertusaartut aamma qiimmassarneqartariaqarput. – 2 Th 1:3-5. w18.04 qupp. 22 § 3-5