Maaji

Inuppassuit nunaminnit qanittukkut qimaasariaqarsimapput maannalu nunani allani qimaasutut inuullutik. Taakkua oqaasii atorlugit ilassinissaat ilinniarsinnaavat. Aamma oqariartaatsinik ilinnik oqaloqateqarusulissutigisinnaasaannik ilinniarsinnaavutit. Taava filmit atuagassallu jw.org-imiittut taakkua oqaasii atorlugit isiginnaarneqarlutillu atuarneqarsinnaasut takutissinnaavatit. Jehovap sunniuteqarluartumik oqaluussinissamut pisariaqartitarpiatsinnik tunisarpaatigut. Assersuutigalugu Inuuneq kiffartornerlu pillugit ataatsimiinnerni ilinniakkavut pulaaqqiinissamik Biibilimillu atuaqqissaaqateqartalernissamik merserinninnginnerulernissatsinnut iluaqutigisarpavut. Illit meeqqatit namminneq isumartik atorlugu akisarnissaannut ilinniartissinnaavatit. Inuit ilaasa meeqqat naatsumik ilumoorlutik uppernerminnik ersersitsinerat sallusuissummut kajungilissutigisarpaat. – 1 Kor 14:25. w18.06 qupp. 22-23 § 7-9

Pitsaassaaq eqqaamagutsigu tamatta Guutimut ungasissimagaluartugut. (Ef 2:12) Jehovap “asanninneq pituutaralugulusooq” imminut qanillisippaatigut. (Hos 11:4, Testamentitoqaq; Joh 6:44) Kristusillu tikilluaqquaatigut. Guutip ilaqutariissortaanut ilaalersinnaanngortippaatigut. Naammalluinnanngitsuugaluartugut Jiisusip ajunngisaarluni akuerimmatigut kinaluunniit ajattussanngilarput! Pissutsit aaqqissuussaanerat ajortup matuma naggatissaa qanilliartortillugu inuit avissaartuukkiartuinnarlutillu isummiussereernerujartorlutillu uumissuinerujartuinnassapput. (Gal 5:19-21; 2 Tim 3:13) Jehovamulli kiffaagatta ‘ilisimassuseq pavannga pisoq’, kinaassusersiortuunnginnissatsinnut eqqisseqatigiinnermillu siuarsaanermut iluaqutigisartagarput, ujartorparput. (Jaak 3:17, 18) Nunanit allaneersunik ikinngutitaartarneq, taakku eqqarsartaasiannik akuersinerput immaqalu oqaasiannik ilinniarneq nuannaarutigaarput. Taamaalioraangatta eqqisseqatigiinnerput “kuussuartut” ittarpoq naapertuilluarnerpullu “immap malingisut”. – Es 48:17, 18. w18.06 qupp. 14 § 18-19

Sakkutooq Romamioq kamillaangalluni sorsugiarsinnaanngilaq. Kamippaat amernik pingasunik qallersimasarmata ninngusuujupput. Aamma atoruminartuullutillu quaannaveersaartitsisarput. Sakkutuut Romamiut kamippaat sorsunnermi ajugaanissamut iluaqutigisaraat uagut kamippaat assersuutaasut ‘eqqissinerup iivangkiiliuanik ingerlassinissamut’ iluaqutigisarpavut. (Es 52:7; Rom 10:15) Oqaluussiumallutali ilaannikkut sapiilluinnartariaqartarpugut. Bo, 20-nik ukiulik, ima oqarpoq: “Atuaqatinnut nalunaajaanissaq annilaanngatigisarpara. Immaqa kanngusukkama. Pisut eqqarsaatigigaangakkit nalunngilara sooq taamaattussaanngikkaluarlunga. Maanna ukioqatinnut nalunaajaanissaq nuannaraara.” Kristumiut inuusuttut amerlasuut misigisarput piareersarsimatillutik oqaluussigaangamik toqqissisimanerusarlutik. w18.05 qupp. 23-24 § 9-11

Jiisusip toqussi aqaguttoq unnukkiartuleraa apustilini ima oqarfigai: “Eqqissinermik uanga pinnik tunivassi.” (Joh 14:27) Eqqissineq Jiisusip pigisaa qanoq oqaluussiuarnissatsinnut iluaqutigisinnaavarput? Oqaluussiuarnitsinni eqqissineq misigisarparput nalunnginnatsigu Jehova aamma Jiisusi nuannaartillutigit. (Tuss 149:4; Rom 5:3, 4; Kol 3:15) Jiisusip apustilit nuannaartuarnissaat kissaatigalugu oqarfigereerlugit namminissarsiorani asanninnermik ersersitsinissap pingaaruteqarneranik nassuiaappai. (Joh 15:11-13) Taava ima oqarpoq: “Ikinngutinik taavassi.” Jiisusimik ikinnguteqarnerup tunissutaanera nuanningaarami, ilaa? Apustililli Jiisusi qanoq ikinngutigiuarsinnaavaat? Inerititaqartuarnikkut.’ (Joh 15:14-16) Tassa oqaluussiuartariaqarput. Ukiut marluk tamatuma siornatigut Jiisusip apustilini ima oqarfigai: “Oqaluussiartoritsi ima: Qilaap Naalagaaffia qanillivoq!” (Matt 10:7) Taamaattuminguna unnukkut toqussi aqaguttoq Jiisusip ajoqersukkani oqaluussinerminni nikallujuinnissamik kajumissaarai. – Matt 24:13; Mark 3:14. w18.05 qupp. 13 § 15-16

Inuusuttuusutit, Jehovamit iluarisaanissamik anersaakkullu ittunik anguniagaqarnissamik aallussigit. Peqaterpassuavilli nuannisarnissartik taamaallaat eqqarsaatigaat. Aamma immaqa ilaserissavaatsit. Siusinnerusukkut kingusinnerusukkulluunniit anguniakkatit qanoq pimoorutsiginerlugit ersersittariaqassavat. Anguniagaqarninni peqatinnit allamut saasarteqinak. Allanit tatineqaraangavit nakkaannannginnissamut suut iluaqutigisinnaavigit? Ussernartorsiorfigisinnaasatit ingalassimasakkit. (Uss 22:3) Ajortuliornerup kingunipilorisinnaasai eqqarsaatigikkit. Aamma maniguullutit siunnersorneqartariaqarnerit nassuerutigiuk. Angajoqqaavit ilagiinnilu qatanngutivit misilittagallit siunnersuutaat tusaaniakkit. (1 Petr 5:5, 6) Ima maniguutsigivit siunnersuutit pitsaasut akuerisinnaallugit? w18.04 qupp. 31 § 14-16

Ilagiit ilaannut Asiaaqqamiittunut tusarliussamini Jiisusip ajoqersukkami suliaasa qujamasuutiginerat ersersippaa. Assersuutigalugu Thyatirami ilagiinnut tusarliussani ima aallarnerpaa: “Ilisimavakka suliatit asannissutsillu unneqqarissutsillu kiffartornerillu nikallujuissutsillu, suliavillu kingulliit siulliit akimorpaat.” (Saqq 2:19) Jiisusip iliuuseqarnerunerat eqqaaginnarnagu ajunngitsuliornissamut kajumississutigisaminnik pissuseqarnerat pillugu nersualaarpai. Jiisusip Thyatiramiittut ilaat oqaaqqissaartariaqaraluarlugit tusarliussani qiimmassaataasumik aallarnerlugulu naggaserpaa. (Saqq 2:27, 28) Jiisusi ilagiinnut niaquusutut oqartussaasuummat suliavut pillugit qujasariaqanngikkaluarpoq. Taamaattorli qujamasuttuunissamik ersersitsivoq. Utoqqaanertanut maligassaalluangaarami! w19.02 qupp. 16 § 10

Kristumiut siulliit nalaanni siulersuisoqatigiit ilagiinni siulersuisunik kristumioqatiminnillu qiimmassaasarput. Ilaasortaqatitik marluk, Petrusi Johannesilu, kristumiunngorlaat anersaamik illernartumik peqaleqqullugit qinnussiniassammata aallartippaat. (ApS 8:5, 14-17) Filipi qatanngutillu kuiserlaat siulersuisoqatigiinnit tapersersorneqarnertik assut qiimmaallaatigaat! Nalitsinni Jehovap Nalunaajaasuisa Siulersuisoqatigiivi Betelimi kiffartortunik, immikkut ittumik piffissaq tamaat kiffartortunik tamatsinnillu qiimmassaasarput. Kristumiut siulliit pisimanerattut qiimmassarneqarneq nuannaarutigisarparput! Taamaattumik aamma sallusuissummik qimatsisimasut uternissamut kajumissaarniarlugit Siulersuisoqatigiit 2015-imi quppersagaq Jehovamut uterit saqqummersippaat. w18.04 qupp. 20 § 18-20

Inuit ilaat isumaqarput killeqanngitsumik kiffaanngissuseqarneq pitsaanerpaassasoq. Tamannali ilumoorpa? Suut tamarmik killeqanngitsuuppata silarsuaq qanoq issagaluartoq takorloorsinnaaviuk? The World Book Encyclopedia-mi allaqqavoq inuiaqatigiinni aaqqissuussaasuni inatsisit inuit kiffaanngissusiannik illersuillutillu killiliisussaagamik pisariusut. Tamannalu ajornaatsuujuaannanngilaq. Taamaattuminguna taama amerlatigisunik inatsiseqarlunilu taama amerlatigisunik inatsisinik taakkuninnga nassuiaaniartartunik maleruaaniartartunillu inatsisileritooqarlunilu eqqartuussisoqartoq. Piviusumik kiffaanngissuseqarusukkutta marluk iliuuserisariaqarpavut. Siullertut, sallusuissut Jiisusip ilinniartitsissutaa akuerisariaqarparput. Aappaattut, taassumunnga ajoqersuganngortariaqarpugut. Taamaaliorutta piviusumik kiffaanngissuseqalissaagut. Sumilli aniguisinneqassagatta? Jiisusi ima oqarpoq: “Ajortuliortoq kinaluunniit ajortip inussiaatigaa.” Imalu nangippoq: “Ernerup inussiaajunnaarsippasi inussiaajunnaavissaasi.” – Joh 8:34, 36. w18.04 qupp. 7-8 § 13-14

Inuit misigissutsitsinnik soqutiginnittut ajunngitsumillu uagutsinnik kissaassisut akornanniinnissaq nuannarisarparput. Misiginneqataallutik qanoq eqqarsarnerluta qanorlu misiginerluta paasiniaasarput. Sunik pisariaqartitsinerluta maluginiartarpaat ilaatigullu suliluunniit ikioqqunngitsugut ikiortarluta. Uagutsinnik ‘misiginneqataasut’ qujamasuutigingaarpavut. Kristumiuugatta tamatta misiginneqataanermik ersersitserusuttaraluarpugut, ajornaatsuujuaannanngilarli. Sooq? Pissutaasut ilagaat naammalluinnanngitsuunerput. (Rom 3:23) Taamaattumik namminissarsioqqajaasarnerput akiorniartussaavarput. Aamma ilatta peroriartornerat siornatigullu misigisimasaat pissutigalugit misiginneqataanermik ersersitsinissaq unamminiarnartittarpaat. Kiisalu, silarsuarmi inuit isiginnittaasiannit sunnerneqarsinnaavugut. Ulluni kingullerni makkunani inuppassuit ‘namminissarsiortuugamik’ allat misigissusiinik soqutiginninneq ajorput. (2 Tim 3:1, 2) Uagulli Jehova Guuti erneralu Jiisusi Kristusi ilaarutsigit misiginneqataanermik ersersitsinerulernissamut iluaqutigisinnaavarput. w19.03 qupp. 14 § 1-3

Inassutit Quliusut kingullersaanni pileritsaassineq, imaluunniit allat pigisaannik pilerissusipiloqarneq, inerteqqutigineqarpoq. (5 Mos 5:21; Rom 7:7) Pingaarutilimmik ilinniartitsiniarluni Jehova taamatut inassuteqarpoq – innuttaasa uummatertik paarisariaqarpaat, tassa eqqarsaatitik misigissutsitillu sianigisariaqarpaat. Jehovammi nalunngilaa iliuutsit ajortut eqqarsaatipilunnit misigissusipilunnillu pilerfeqartartut. Assersuutigalugu kunngi Daavi kukkusoq eqqarsaatigiuk. Ajunngitsuugaluarluni ataasiarluni angutip allap nulia pileritsaappaa, tamannalu ajortuliornermik kinguneqarpoq. (Jaak 1:14, 15) Daavi allasiorpoq, arnap uia uukapaateriaraluarpaa kingornalu toqutaatillugu. (2 Sam 11:2-4; 12:7-11) Qallikkut qanoq isikkoqarnerput Jehovap maluginiaannarnagu aamma qamuuna qanoq ittuunerput, uummammiugut, takusinnaavai. (1 Sam 16:7) Eqqarsaativut, misigissutsivut iliuutsivullu tamaasa nalunngilai. Pissusivut ajunngitsut maluginiarnerusarlugillu taakkuninnga ineriartortitseqqulluta kajumissaartarpaatigut. Kissaatigaali eqqarsaatipiluit ajortuliornermik kinguneqannginnerini eqqumaffigalugillu aquttassagivut. – 2 Nal 16:9; Matt 5:27-30. w19.02 qupp. 21 § 9; qupp. 22 § 11

Biibilimi allassimavoq Mosesi “inunnit nunarsuarmiittunit tamanit anneruniajuinnerpaasoq”. (4 Mos 12:3) Taamatut pissuseqarami sanngiitsuua, nakimasuua akerliliiumanngitsuullunilu? Immaqa ilaasa maniguuttoq taamatut pissuseqarnerassavaat. Tamannali ilumuunngilaq. Mosesi Guutimut kiffaavoq nukittullunilu nakimaallunilu sapiitsoq. Jehovamit ikiorneqarnermigut Egyptenip naalakkersuisua pissaasoq sassarfigisarpaa, inuit immaqa 3.000.000-t inoqajuitsukkut siulersorpai inuiaqatigiillu Israelikkut akeqqaminnut ajugaanissaannut ikiorlugit. Mosesip unamminiarnartitai nalaannavianngilavut, ullulli tamaasa inuit pisulluunniit maniguunnissatsinnik sapernarnerulersitsisut naapillugilluunniit nalaattarpavut. Pissutsimilli tamatuminnga ineriartortitsinissamut pissutissaqarluarpugut. Jehova neriorsuivoq ‘qanilaartut nuna kingornutissagaat’. (Tuss 37:11) Illit maniguuttutut imminut oqaatigissavit? Allat taamatut pissuseqarnerassavaatsit? w19.02 qupp. 8 § 1-2

Jehovap nalunngeqatiginnissummik tunivaatigut. Qanoq nalunngilarput Adami Evalu nalunngeqatiginnissuteqartut? Ajortulioreerlutik Guuti isertorfigaat. Nalunngeqatiginnissutiminnit eqqartuunneqarput. Nalunngeqatiginnissuterput tassaavoq suup eqqortuuneranik suullu eqqunngitsuuneranik qamuuna naliliisinnaassuseq inuunitsinni siulersuisinnaasoq. Inuup sungiusagaanngitsumik nalunngeqatiginnissutillip assigaa umiarsuaq aserornikumik pujorsiutilik. Anorip sarfallu umiarsuaq sangusoortittarpaat. Pujorsiulli ajoquteqanngitsoq iluaqutigalugu umiarsuup aquttuata umiarsuaq apuuffissaanut sammitissinnaavaa. Tamatumunnga assingusumik nalunngeqatiginnissuterput eqqorluartumik ilinniartikkutsigu tamatuminnga siulersorneqarluarsinnaavugut. Nalunngeqatiginnissuterput eqqortumik ilinniartinneqanngikkuni ajortuliornissamut mianersoqqusisinnaanngilaq. (1 Tim 4:1, 2) Allaat ‘ajortumik ajunnginneraasinnaavoq’. w18.06 qupp. 15-16 § 1-3

Silarsuarmi eqqarsartaatsit malunnarpianngitsumik saqqummiunneqartut paasillugillu itigartittariaqarpavut. Assersuutigalugu politikkikkut isummat arlaat iluarinartunngorlugit tusagassiuutitigut saqqummiunneqartarput. Inuillu anguniagaat naammassisaallu nutaarsiassani silarsuarmi nuannaartorinartutut siuarsarneqartarput. Filmit atuakkallu ilaasa isumaliutersuutit ‘uanga pingaarnerpaavunga’ aamma ‘ilaquttat pingaarnerpaajupput’ siuarsarlugillu tunngavissaqartutut, soqutiginartutut allaallu eqqortutut saqqummiuttarpaat. Isiginnittaatsilli taakkua Biibilimut naapertuutinngillat. Tassanimi allaqqavoq allanit tamanit Jehova asanerpaagutsigu uagut nammineq ilaquttavullu pilluassasugut. (Matt 22:36-39) Tamannali isumaqanngilaq aliikkutaqarneq ajortuusoq. Imminulli aperisariaqarpugut: ‘Silarsuarmi eqqarsartaatsit malunnanngitsumilluunniit siuarsarneqaraangata paasisarpakka? Qitornakka – uangalu nammineq – isiginnaartakkanut atuartakkanullu tunngatillugu illersortarpakka? Silarsuarmi eqqarsartaatsit nalaattagaannit sunnertinnginniassammata Jehovap isiginnittaasiatut eqqarsartaaseqaleqqullugit qitornakka ikiortarpakka?’ w18.11 qupp. 26 § 18-19

Uagutsinnik soqutiginninnermigut isumassuinermigullu Jehovap najorluta ersersippaa. Isumaginninnerminik misigissuseqangaarnerminillu qanoq ersersitsinera maluginiaruk. “Uanga isinni erlinnaravit”, oqarpoq Jehova. “Ataqqisaangaarlutit, asagakkillu.” (Es 43:4) Qilammi nunamilu suulluunniit Jehova kiffartortiminut asannikkunnaartissinnaanngilaa; uagutsinnut ilumoorfiginninnera patajalernavianngilaq. (Es 54:10) Inuunitsinni unamminiarnartut peerniarlugit Jehova neriorsuinngilaq, ajornartorsiutinilli ‘kuussuartut’ ittunit ipitinneqarnissarput misilinneqarnerillu ‘innertut’ ittut naassaanngitsumik ajoqusiinissaat akuerinavianngilaa. Neriorsuivoq najorumaarluta, unamminiarnartukkut ‘ingerlanitsinni’ ikiorumaarluta. Jehova qanoq iliussava? Assuarnaassinnaaniassagatta annilaangajunnaarsissavaatigut, allaat toqusussanngoraluaruttaluunniit. (Es 41:13; 43:2) Guutip ‘ilaginninnissaminik’ neriorsuutaa tatigigutsigu misilinneqartilluta uaguttaaq sapiillutalu nukittusinnaavugut. w19.01 qupp. 3 § 4-6

Inuusuttuuguit imaassinnaavoq ilinniartitsisut, ilinniagaqarnissamik siunnersuisartut allalluunniit qaffasinnerusumik ilinniagaqaqqullutillu akissarsiagissaartumik atorfeqarnissat siunnersuutigigaat. Jehovali allamik siunnersuuteqarpoq. Soorunami imminut pilersorsinnaaniassagavit atuarfimmi aallussinissat kissaatigaa. (Kol 3:23) Aammali nalunngilaa siunissamut sunniuteqartunik pingaarutilinnik inuusuttuuninni aalajangiisariaqarnerit. Taamaammat malitassannik ullussanilu kingullerni iluarisaatut inuusinnaaniassagavit najoqqutassiivoq. (Matt 24:14) Jehovap siunissami susoqarumaarnera nalunngilaa, naggatissallu qanorpiaq qanitsiginera nalunngilaa. (Es 46:10; Matt 24:3, 36) Aamma illit nalunngilaatit. Suna pillualissutigissanerit sunalu nuannaarunnaassutigissanerit nalunngilaa. Inuit siunnersuutigisaat ajunngippasissinnaapput, Guutilli oqaasianit tunngaveqanngippata silatusaarnerunngillat. w18.12 qupp. 15 § 1-2

Kisianni “qanilaartut nuna kingornutissavaat pilluangaarnertillu nuannaarutigissallugu”. Daavi aamma siulittuivoq: “Iluartut nuna kingornutissavaat najugaqassallutillu tassani naassaanngitsumik.” (Tuss 37:11, 29; 2 Sam 23:2) Neriorsuutit taakku inunnut Guutip piumasaatut iliorusuttunut qanoq sunniuteqarsimassasoraagit? Nunarsuarmi inuit iluartut kisimik inuulernissaasa nunarsuullu naatsiivittut Edenitut paratiisinngoqqikkumaarnerata naatsorsuutiginissaannut pissutissaqarput. Piffissap ingerlanerani Israelikkut Jehovamut kiffartornerartut Guuti pallorfiginninnerlu ilumoortoq tunuppaat. Taamaattumik Guutip Babylonimiut innuttaminik tiguaanissaat, nunaannik piuneerutsitsinissaat amerlasuunillu aallarussinissaat akueraa. (2 Nal 36:15-21; Jer 4:22-27) Guutilli pruffiitiisa siulittuutigaat Israelikkut ukiut 70-it qaangiuppata nunaminnut uterumaartut. Siulittuutillu taakkua eqquupput. Uagutsinnulli aamma pingaaruteqarput – siunissami nunarsuarmi paratiiseqalersussaammat. w18.12 qupp. 5 § 9-10

Silarsuarmi siunnersuutit Biibilip ilinniartitsissutaanut akerliupput. Nalitsinnulli naleqqunneruppat? Jiisusi oqarpoq: “Ilisimassuseq eqqortuutitaavoq suliamigut.” (Matt 11:19) Silarsuarmi atortorissaarutitigut siuariartoqarsimagaluartoq ajornartorsiutit annertuut pilluarnissamut akornutaasut, soorlu sorsunnerit, naggueqatigiinnik nikassaasarnerit pinerlunnerillu aaqqissinnaanngilaat. Aamma kinguaassiuutitigut inuunerlunneq silarsuarmi akuersaarneqartarpoq. Inuppassuilli nassuerutigaat tamanna ilaqutariinni ajornartorsiornermik, peqqiilliulernermik ajortunillu allanik kingunerlutsitsisartoq. Jehovammi siunnersuutaa? Kristumiut Jehovap isiginnittaasianik akuerinnittut pilluarnerusunik ilaqutaqarput, peqqinnerullutik nunarsuarlu tamakkerlugu uppeqatiminnut eqqisseqateqarnerullutik. (Es 2:4; ApS 10:34, 35; 1 Kor 6:9-11) Tamanna Jehovap eqqarsartaasiata silarsuup eqqarsartaasianit qutsinnerungaarneranik tamatumani erserpoq, ilaa? w18.11 qupp. 23 § 8-10

Ilaquttavut sapinngisamik pitsaanerpaamik inussiarnersumillu attaviginiarpavut. Taakkuli nuannaartinniarlugit Jehovap najoqqutassiai sumiginnarsinnaanngilavut. Aamma qanimut ikinngutigisavut tassaasariaqarput Jehovamik asannittut.Sallusuissummiissagutta Jehovap isaani illernartuusariaqarpugut, tassa minguitsuusariaqarpugut. (Es 35:8; 1 Petr 1:14-16) Sallusuissut ilikkaratsigu najoqqutassiat Biibilimeersut maleruarumallugit inuunitsinni allannguivugut. Allannguerujussuartoqarsimavoq. Minguitsumik inuujunnaarluta inuunerluleqqunata suli mianersortariaqarpugut. Inuunerlulernissamut ussernartorsiornerup akiornissaanut suna iluaqutigisinnaavarput? Jehovap uagut illernartooqqulluta tunniussaa eqqarsaatigiuk. Ernermi asasami Jiisusip Kristusip inuunera erlinnartoq tunniuppaa! (1 Petr 1:18, 19) Jehovap isaani minguitsuujuarsinnaaqqulluta Jiisusip utertitsissutitut pilliutaa qanoq naleqartigisoq eqqaamajuartariaqarparput. w18.11 qupp. 12 § 10-11

Piffissaq tamaat kiffartortorpassuit oqartarput naak atukkatik allanngoraluartut kiffartornerminnik pingaartitsinertik nuannaartuunissamut isumalluartuunissamullu iluaqutigisarlugu. Pissutsini atukkatsinni sapinngisatsinnik iliuuseqartarutta Jehovalu tatigilluinnarutsigu qanorluunniit pisoqaraluarpat isumakkut eqqissisimaannassaagut. Imaassinnaavoq piffissap ingerlanerani paasigipput atukkatsinnik allannguisarnitsinni Jehovamik attaveqarnerput nakussatsissimasoq. Silarsuarmi matumani inuunerput allanngoriaannaavoq. Imaassinnaavoq Jehovamik kiffartornitsinni allamik suliassinneqartugut, peqqiilliulersugut ilaquttavulluunniit allatut isumagisariaqalerivut. Qanorluunniilli pisoqassagaluarpat tatigiuaannaruk Jehovap piffissaq eqqorlugu isumagiumaaraatit ikiorlutillu. (Hebr 4:16; 1 Petr 5:6, 7) Maannakkullu pissutsini atukkanni sapinngisannik iliuuseqarit. Ataatannut Jehovamut qinusarit tatigilluinnarnissaalu ilinniarlugu. Taamaalioruit atukkatit qanoq ikkaluarpataluunniit Jehovamit pisumit isumakkut eqqissisimajuaannassaatit. w18.10 qupp. 26 § 17, 19; qupp. 27 § 22

Biibilimi paasivarput Jehova innuttaminut qanoq innimittartigisoq. Assersuutigalugu eqqarsaatigiuk Jehovap nukappiaraq Samueli palasiunermut Elimut eqqartuussummik tusarliussisoq qanoq inussiarnersumik ikioraa. (1 Sam 3:1-18) Jehovap inatsisai naapertorlugit meeqqat utoqqarnik, pingaartumik oqartussaassusilinnik, ataqqinnittussaapput. (2 Mos 22:27; 3 Mos 19:32) Taamaattumik nukappiaqqap Samuelip ullaakkut Eli orneriarlugu Guutip sukannersumik eqqartuussutaanik oqaluttuunnissaa sapernartissimassavaa. Biibilimi allassimavoq Samuelip ‘imminut takutitaasunik Elip nalunaarfiginissaa siooragigaa’. Guutilli Eli paasitippaa nammineq Samueli suaarlugu. Taamaattumik Elip peqquaa Guutip oqaatigisaanik sumilluunniit isertuusseqqunagu. Samueli naalalluni “oqaatsinik tusakkaminik tamanik” Eli oqaluttuuppaa. Siusinnerusukkullu Eli assingusumik tusarlerneqarpoq. (1 Sam 2:27-36) Oqaluttuamit paasivarput Jehova qanoq innimittartigalunilu ilisimassuseqartigisoq. w18.09 qupp. 21 § 2; qupp. 22 § 4-5

Nalitsinni inuit sallusarnerat nalinginnaavoq. Allaaserisami “Why We Lie”-mi, Y. Bhattacharjeemit allanneqartumi, allaqqavoq ‘sallusarneq inuit ileqqutut pigiliutiinnarsimagaat’. Tassa allatut oqaatigalugu inuit salluneq pissusissamisoortutut nalinginnaasutullu isigaat. Inuit imminut illersorniarlutik, immaqa kukkussutitik pinerluttuliatilluunniit toqqortorniarlugit, sallugajuttarput. Aamma aningaasarsiniarlutik allatigulluunniit imminut iluaquserniarlutik sallusarput. Allaaserisami aamma allaqqavoq inuit ilaasa sallunissaq ajorinngilluinnaraat “inunnut ilisarisimanngisaminnut, suleqatiminnut, ikinngutiminnut asasaminnulluunniit”. Sallusarnerit tamakkua tamarmik suna kinguneraat? Inuit tatigeqatigiikkunnaartarput attaveqatigiinnerillu sequminneqartarput. Daavi Jehovamut qinuvoq: “Ilumoorneq ilorlerpaakkut pisoq kajumigaat.” (Tuss 51:8, tastamantitoĸaĸ) Qamuuna qanoq ittuunitta pingaaruteqarnera Daavip nalunngilaa. Kristumiut ilumoortut tamatigut ‘imminnut ilumoortumik oqaluffigisarput’. – Zak 8:16, 17. w18.10 qupp. 4 § 4; qupp. 5 § 9-10; qupp. 8 § 19

Ukiumi 1513-imi Kr.in.si Israelikkut Egyptenimit aallarmata inuit 3 millioninit amerlanerusimasinnaapput. Meeqqat, utoqqaat, napparsimasut innarluutillillu taakkua ilagisimassavaat. Inuit taama amerlatigisut isumassuisumik paasinnittumillu Siulersorteqarnissartik pisariaqartippaat. Jehovalu Mosesi aqqutigalugu siulersuisuuvoq taamaattoq. Tamanna pissutigalugu Israelikkut angerlarsimaffittut isigiuarsimasartik qimakkamikku toqqissisimapput. (Tuss 78:52) Jehovap innuttani qanoq toqqissisimasutut misigilersippai? Inuiaqatigiit Israelikkut taassuma siulersuineratigut “sorsunnissamut inissititersimallutik Egyptenimit aallarput”. (2 Mos 13:18) Taamatut aaqqissuussaagamik takusinnaalluarpaat Guutip pissutsit aqukkai. Jehovap aamma imminit najorneqarnerannik, siulersorneqarnerannik illersorneqarnerannillu eqqaasinniarlugit ‘ullukkut nuiaqartippaa unnuakkullu innermik qaamatitsilluni’. – Tuss 78:14. w18.09 qupp. 24 § 11-12

Biibilip nalaani Guutip kiffaasa aalajaatsut ilaat ajornartorsiutitik ajussutigingaaramikkit toquinnarusupput. Assersuutigalugu Jobi ima naalliutsigigami oqarpoq: “Taamaannera qatsuteqaara, inuuinnarusunngilanga!” (Job 7:16) Jona pakatseqqangaarami ima oqarpoq: “Maanna toqutiinnarniannga, Naalagaq, toqunissara inuuginnarnissannit pitsaanerutippara.” (Jon 4:3) Pruffiiti Elia ima neriuutaarutsigivoq oqarluni: “Naalagaq, naammalerpoq! Toqutiinnannga.” (1 Kng 19:4) Jehovalli kiffani aalajaatsut taakku asavai inuuinnarnissaallu kissaatigalugu. Taama misiginerat pillugu eqqartuutinngilai. Aalajaallutilli imminut kiffartortuarniassammata inoorusussuseqaleqqinnissaannut ikiorpai. w18.09 qupp. 9 § 4

Guutip suleqataasa inoroorsaartuunertik ilisimaneqaatigaat. Oqaaseq grækerisooq Biibilimi ‘inoroorsaarnermik’ nutserneqartoq isumaqarpoq “takornartanut inussiarnisaarneq”. (Hebr 13:2) Qanoq taamatut inussiarnisaarnissatsinnik ilinniarfigisinnaasatta maligassiaat Guutip oqaasiani atuarsinnaavavut. (1 Mos 18:1-5) Ikiuinissamut periarfissarsiorluta allat, ‘uppeqatigigutsigit’ uppeqatiginngikkaluarutsigilluunniit, ikiortariaqarpavut. (Gal 6:10) Piffissaq tamaat kiffartortut tikeraartut inoroorsaarfigalugit Jehova suleqatigisinnaaviuk? (3 Joh 5, 8) Taamaalioraangatta ‘kajumissaaqatigiinnissamut’ amerlanertigut periarfissaasarpoq. (Rom 1:11, 12) Angutit ilagiinniittut ilagiinni kiffartortutut utoqqaanertatulluunniit kiffartornikkut Jehovamik suleqateqaqqullugit Guutip oqaasiani kajumissaarneqarput. (1 Tim 3:1, 8, 9; 1 Petr 5:2, 3) Taamaaliortut allanik anersaakkut allatigullu ikiuukkumasarput. (ApS 6:1-4) Qatanngutit angutit ikiuuttartut ilagiinni pisariaqartunik suliaqarnertik nuannernerartarpaat. w18.08 qupp. 23 § 6-7; qupp. 24 § 10

Timotheusi qatanngutinut angutinut utoqqarnut oqartussaassuseqartunut ilaagaluarluni misiginneqatiginnittumik ataqqinnittumillu pissuseqartuartariaqarpoq. Taavami utoqqaq piaaraluni ajortuliorpat Jehovalluunniit iluarinngisaanik siammarterippat? Jehovap piaaraluni ajortuliortoq, utoqqaagaluarpat ataqqisaagaluarpallu, soqutiginngitsuusaarnavianngilaa. Najoqqutassiaq Esajap allataa maluginiaruk: ‘Ajortuliortoq, 100-nik ukioqaraluaruniluunniit, perloqquneqassaaq.’ (Es 65:20, NW) Najoqqutassiaq tamatumunnga assingusoq Ezekielip takorruugaani atuarneqarsinnaavoq. (Ez 9:5-7) Taamaattumik Jehovap, ittuinnartup, ataqqinissaa pingaarnerpaavoq. (Dan 7:9, 10, 13, 14) Jehovamik ataqqinninneq ikiortariaqartumik, qanorluunniit utoqqaatigigaluartumik, naqqiinissamut sapiissuseqalissutigissavarput. – Gal 6:1. w18.08 qupp. 13 § 13-14

Tamatta eqqortumik inerniliiumalluta paasissutissanik nalilersuinissaq ilinniartariaqarparput. (Uss 3:21-23; 8:4, 5) Taamaaliunngikkutta eqqarsartaaserput Saatanimit silarsuaanillu allanngortinneqariaannaassaaq. (Ef 5:6; Kol 2:8) Soorunami eqqortumik inerniliiumalluta pissutsit piviusut ilisimasariaqarpavut. Nalitsinni assigiinngitsorpassuit – soorlu interneti, oqarasuaat imaluunniit tusagassiuuteqarfiit – aqqutigalugit paasissutissinneqartarpugut. Aamma immaqa ikinngutitsinnit amerlasuunik e-mailisisarpugut, allagarsisarpugut oqaluttuunneqartarlutaluunniit. Ilaannikkut paasissutissat imaaginnavippasittarput. Taamaattumik mianersortariaqarpugut. Ilimanarpoq ikinngutivut ajunngitsumik pissutiginiagaqartut, kisianni inoqarpoq piaaralutik paasissutissanik eqqunngitsunik ilaannakuusunilluunniit ilumoortunik siammarterisartunik. w18.08 qupp. 3 § 1, 3

Jehovap arnaq inuusuttoq maniguuttoq Mariamik atilik ernerminut, Jiisusimut, anaanassatut toqqarpaa. Maria, Jerusalemi tassanilu naalaffik alutornartoq ungasillugu, illoqarfeeqqami Nazaretimi najugaqarpoq. (Luk 1:26-33) Kingusinnerusukkut eqqarliminut Elisabethimut oqaasiinit erserpoq Mariap Jehova ikinngutigilluaraa. (Luk 1:46-55) Jehovap Maria maluginiarsimavaa aalajaaffigimmanilu ilimaginngisaannik pilluaqqullugu. Jiisusi inunngormat Jehovap tamanna kimut oqaluttuaraa? Jerusalemimi Betlehemimilu atorfilinnut naalagaatitanulluunniit pingaarutilinnut oqaluttuarinagu Betlehemip avataani narsaammi savanik paarsisunut maniguuttunut inngilit aallartippai. (Luk 2:8-14) Taava savanik paarsisut taakku inoorlaaq pulaarpaat. (Luk 2:15-17) Jiisusi taamatut ataqqineqartoq takullugu Maria Josefilu tupaallassimassaqaat. w18.07 qupp. 6 § 11-12

Sooq Jehovap Salomo kamaatilerpaa? Salomo ikiorniartaraluarpaa. Jehova ‘marloriarluni imminut takutippoq peqqusillunilu allanik guuteqassanngitsoq; Salomolli Jehovap peqqusinera naalanngilaa’. Tamanna pissutigalugu Guutip iluariunnaarlugulu tapersersorunnaarpaa. Salomop kinguaavisa inuiaqatigiinnut Israelikkunnut tamanut naalakkersuinissaat Jehovap akuerinngilaa, ukiunilu hundredilinni annertuunik ajornartorsiuteqarput. (1 Kng 11:9-13) Guutip najoqqutassiaanik paasinninngitsunik ataqqinnissuseqanngitsunilluunniit ikinnguteqalerutta eqqarsartaaserput sunnerneqarsinnaallunilu Jehovamut ikinngutaanerput ajoquserneqarsinnaavoq. Imaassinnaavoq ilagiinnut ilaasut, taakkuli Jehovamut attaveqarluanngillat. Aamma imaassinnaavoq ilaqutarigivut, sanilerigivut, suleqatigigivut atuaqatigigivulluunniit Jehovamik pallorfiginninngitsut. Inuit ilagisartakkatta Jehovap najoqqutassiai maleruanngippatigit ima sunnertigisinnaavaatigut allaat Guutimut attaveqarluarunnaarsilluta. w18.07 qupp. 17 § 9-10

Saatanip isiginnaagassiat aallakaatitassiallu atorlugit immisut eqqarsalersinniartarpaatigut. Nalunngilaa oqaluttuat aliikkutaannaanatik qanoq eqqarsarnissamik, misiginissamik iliuuseqarnissamillu ilinniartitsisartut. Jiisusi oqaluttuarnikkut ilinniartitsilluartarpoq. Assersuutigalugu Samariamiumik naakkinnittumik ernermillu tammaraluartumik assersuusiat eqqarsaatigikkit. (Matt 13:34; Luk 10:29-37; 15:11-32) Inuilli Saatanimit ajortumik sunnerneqarsimasut oqaluttuat atorlugit sunnerniarsinnaavaatigut. Oqimaaqatigiissaarisariaqarpugut. Isiginnaagassiat aallakaatitassiallu ajortumik uagutsinnut sunniuteqanngitsut aliikkutaasinnaallutillu ilinniarfiusinnaapput. Mianersortariaqarpugulli. Aliikkutassanik toqqaaniarnermi pitsaassaaq imminut ima aperisarutta: ‘Isiginnaagassiami aallakaatitassiamiluunniit ilinniartitsissutigineqarpa uinikkut pilerissutsinut nakkaannarneq ajunngitsuusoq?’ (Gal 5:19-21; Ef 2:1-3) Isiginnaagassiami Saatanip eqqarsartaasia siammarterneqartoq paasigukku qanoq iliortariaqarpit? Nappaatitut tuniluuttutut nigorsimaniartariaqarpat! w19.01 qupp. 15-16 § 6-7

Niaqorornaveeqqutip sakkutuup qarasaanut illersuutaasarneratut ‘annaanneqarnissamik neriuutitta’ eqqarsartaaserput illersortarpaa. (1 Th 5:8; Uss 3:21) Niaqorornaveeqquterput peerniassagatsigu Saatani susarpa? Jiisusimut qanoq ilioriaraluartoq eqqarsaatigiuk. Saatanip nalunngilaa Jiisusi inuiannut naalakkersuisunngortussaasoq. Jiisusili naalliulluni toqoqqaartariaqarpoq. Aamma kunnginngornissaminut Jehovap piffissarititaa utaqqeqqaartariaqarpaa. Taamaattumik Saatanip naalakkersuisunngujaarnissamik neqeroorfigaa. Neriorsorpaa Jiisusip ataasiaannarluni pallorfigippani ingerlaannaq silarsuarmut naalakkersuisunngortissallugu. (Luk 4:5-7) Saatanip aamma nalunngilaa Jehovap silarsuarmi nutaami nuannersunik neriorsoraatigut. Neriorsuutilli tamatuma eqquunnissaa utaqqeqqaartariaqarparput utaqqinitsinnilu ajornartorsiuterpassuaqarsinnaalluta. Taamaattumik Saatanip maanna ilorrisimaarnartumik inuuneqarnissamik neqeroorfigisarpaatigut. Kissaatigaa Guutip naalagaaffia tunulliullugu ilorrisimaarnissarput salliutissagipput. – Matt 6:31-33. w18.05 qupp. 25 § 15-17

Inuusuttuuninni pilluarnissat Jehovap kissaatigaa. Anersaakkut ittunik anguniagaqarnermik aallussinikkut aamma pilersaarutinni aalajangikkannilu tamani Jehovap siunnersuutaanik maleruaanikkut pilluarsinnaavutit. Sapinngisamik siusissukkut taamaalioruit Jehovap siulersuinera, illersuinera pilluaqqusineralu misigiaarnerussavatit. Oqaatsimini siunnersuutitsialai eqqarsaatigikkit unalu uummammiuliullugu: “Pinngortitsisit eqqaamaniaruk inuusuttuunerpit ulluini.” (Oqal 12:1) Ilissi inuusuttuususi inuunissinni Jehovamut kiffartorneq aallukkassiuk nersualaarneqartariaqarpusi. Anersaakkut ittunik anguniagaqarlusilu oqaluussineq inuunissinni pingaartingaarparsi. Aamma anguniagaqarnissinni silarsuaq allamut saassutiginngilarsi. Ilungersornissi asuliinnaannginnera qularinngissinnaavarsi. Ilissinnik asannittunik tapersersuerusuttunillu qatannguteqarpusi. Taamaattumik ‘suliarisassasi Jehovap assaanut tunniussigit, taava pilersaarutisi piviusunngorumaarput’. – Uss 16:3. w18.04 qupp. 32 § 17, 19