Apriili

Uagummi? Jehovatut silarsuarmiittutulluunniit eqqarsartarpugut? Guutimit iluarisaajumalluta iliuutsitsigut ilungersortarpugut. Eqqarsartaaserpummi? Jehovatut eqqarsarniarluta, taassumatut isiginnittaaseqalerniarluta, ilungersortarpugut? Silarsuarmiittutulli eqqarsalernissaq ajornanngitsuararsuuvoq. Silarsuummi anersaava avatangiiseraarput. (Ef 2:2) Aamma silarsuarmiittut imminuinnaq eqqarsaatiginerusarput, taakkunatullu eqqarsarusulersinnaavugut. Aap, Jehovatut eqqarsarniarneq ilungersornarluni silarsuarmiittutut eqqarsarnissaq ajornanngitsuararsuuvoq. Eqqarsartaaserput silarsuarmit sunnerneqartikkutsigu namminissarsiulerlutalu suna eqqortuusoq eqqunngitsuunersorlu nammineq aalajangerusulissavarput. (Mark 7:21, 22) Taamaammat inuit eqqarsartaasiat pinnagu ‘Guutitut eqqarsarnerup’ ilinniarnissaa pingaaruteqangaarpoq. w18.11 qupp. 21 § 1; qupp. 22 § 3-4

Jehovap pingasoriarluni qilammit toqqaannartumik oqalulluni ernini paasitippaa asallugu. Tamanna Jiisusip qiimmaallaatigingaarsimassavaa! Jiisusi kuussuarmi Jordanimi kuisinnerata kinguninngua Jehova ullormut allassimaffimmiittutut oqarpoq. Oqaatsinik taakkuninnga Johannesi Kuisisoq kisimi tusaaqataagunarpoq. Taava Jiisusip toqunissaa ukiup ataatsip missaa sioqqullugu apustilit pingasut tusaatillugit Jiisusi pillugu Jehova ima oqarpoq: “Tassa ernera asasara nuannarisara. Taanna tusarsiuk!” (Matt 17:5) Kiisalu Jiisusip toqunissaa ullualuit sioqqullugu Jehova ernini pillugu qilammiit oqaloqqippoq. (Joh 12:28) Jiisusip nalunngilaa Guutimik mitaatiginnittuunerarneqarnissani kanngunarsaataasumillu toqunissani. Taamaakkaluartoq nammineq piumasani pinnagu Guutip piumasaa pissasoq qinnutigaa. (Matt 26:39, 42) Ataataminit, silarsuarmiunngitsoq, iluarisaarusukkami nappagaq anniartitaaffik “naammagalugu atorpaa kanngunarsaataanera soqutiginagu”. – Hebr 12:2. w18.07 qupp. 7-8 § 15-16

Naalakkap unnukkorsiortitsinera Jiisusip pilerseqqammerlugu sapiissuseqangaarnini ersersippaa. Qanoq? Ataatami imminut piumasaa akueraa, naak nalunngikkaluarlugu taamaalioruni Guutimik mitaatilliisutut kanngunartumik pinerluttuliorneq pillugu toqutaasussaalluni. (Matt 26:65, 66) Jehovap aqqa ataqqiumallugu, Guutip kisimi oqartussaanera tapersersorumallugu inuillu peqqissimisut naassaanngitsumik inuuneqalernissamut periarfissikkumallugit Jiisusi aalajaalluinnarpoq. Tamatuma saniatigut Jiisusip ajoqersukkani qanittukkut pisussanut piareersarpai. Jiisusi aamma annilaanganini eqqarsaatiginagu apustilimi aalajaatsut pisariaqartitaasa eqqarsaatiginerisigut sapiissusermik ersersitsivoq. Persuarsiunngitsumik unnukkorsiorneq, Judasi anisereerlugu pilersitaa, iluaqutigalugu ajoqersugaasa tanitanngortussat Jiisusip aavata kuineqarnerata iluaqutissartaanik angerusisaamullu ilaasinnaanerminnik eqqaasitsissutigissavaat. – 1 Kor 10:16, 17. w19.01 qupp. 22 § 7-8

Jiisusip ataataa qilammiit ima akivoq: “Naalannarsisereerpara, naalannarsiseqqikkumaarparalu.” Jiisusi ernumavoq Jehovamut aalajaannissani akisussaafferujussuartut isigigamiuk. Nalunngilaa naalliutsinneqarluni iperartugaasussaalluni peqqarniitsumillu toqutaasussaalluni. (Matt 26:38) Jiisusip Ataatami aqqata naalannarsisinnissaa sunit tamanit pingaartinneruaa. Jiisusi Guutimut mitalliisutut unnerluussaavoq, toqutaanissamilu Guutimut kanngunarsaataanissaa ernumassutigaa. Jiisusitut aamma uagut Jehovap aqqata kanngunarsarneqarnissaa ernumassutigisinnaavarput. Imaassinnaavoq Jiisusi assigalugu naapertuilluanngitsumik pineqartartugut, imaluunniit akerlilersuisut eqqunngitsunik oqaluuserinerluineri anersaaruluutigigivut. Eqqarsarsinnaavugut taakkua salluliuutaat Jehovap aqqanut nikanarsaataasut. Taamaattoqartillugu Jehovap oqaasii uagutsinnut tuppallersaataangaarput. Jehovap atini naalannarsisittuaannassavaa. – Tuss 94:22, 23; Es 65:17. w19.03 qupp. 11-13 § 14-16

Jiisusip ajoqersugaasa tusakkatik upperiuminaatsippaat. Isumaqaraluarput Jiisusip Israelimi naalagaaffik pilerseqqissagaa, Jiisusili oqarpoq qanittukkut naalliuttussaallunilu toqussalluni. Apustili Petrusi siulliulluni oqaaseqarpoq: “Naalagaq, imminut ajunngisaarfiginiarit; taama pineqanngisaannassaatit.” Jiisusip akivaa: “Tununnut pigit, Saatani! Uannut akornutaavutit Guutitut eqqarsarnak inuttut eqqarsaravit.” (Matt 16:22, 23, NW; ApS 1:6) Jehovap eqqarsartaasiata silarsuullu Saatanimit aqunneqartup eqqarsartaasiata assigiinnginnerat Jiisusip taama oqarnermigut ersersippaa. (1 Joh 5:19) Petrusip silarsuarmi inuppassuit namminissarsiornerattut Jiisusi namminissarsioqqullugu kajumissaarpaa. Jiisusip akissutaanit erserpoq nammineq Jehovap eqqarsartaasia akueralugulu silarsuup eqqarsartaasia akuerinngilluinnaraa. w18.11 qupp. 21 § 1-2

Eqqarsaatigiuk inuit millionillit nunarsuaq tamakkerlugu Naalakkap unnukkorsiortitsinerani najuunniarlutik katersuukkaangata Jehovap suna maluginiartarneraa. Inuppassuit takuinnarnagit inuit ataasiakkaat tamaasa maluginiartarpai. Assersuutigalugu, ukiut tamaasa aalajaallutik najuuttartut takusarpai. Taakkua ilaat immaqa malersugaagaluarlutik najuuttarput. Allat ataatsimiinnernut najuunneq ajoraluarlutik eqqaaniaaqataanissartik pingaartippaat. Jehovap aamma siullermeerlutik eqqaaniaaqataasut, immaqa paasiniaarusuttut, maluginiartarpai. Qularnanngitsumik eqqaaniaanermi najuuttorpassuit takugaangamigit Jehova nuannaartarpoq. (Luk 22:19) Jehovalli sooq najuunnersut pingaarnerutippaa. Aap, pissutiginiagaq Jehovamut pingaaruteqarpoq. Uagulli Jehovamit peqatigiissortaanillu ilinniartinneqarnissarput kissaatigingaarparput? – Es 30:20; Joh 6:45. w19.01 qupp. 26 § 1-3

Jiisusip ajoqersukkani pillugit toqorusuinnarnani ullut tamaasa inuunermini taakku imminit pingaarnerutippai. Assersuutigalugu ajoqersukkani qasugaluarluni annikillioraluarlunilu ilagai. (Luk 22:39-46) Aamma allat iluaqutissaat nammineq iluaqutissaminit pingaarnerutippaa. (Matt 20:28) Qatanngutigiinnut kristumiunut ilumoortutuamut ilaagatta nutaat ilaalernissaannut piffissaq atorlugu qaaqqusisarnerput nuannaarutigisarparput. ‘Uppeqativulli’ unittoorsimasut ikiorniarnissaat pingaartinneruarput. (Gal 6:10) Taakkununnga asanninnerput ersersittarparput ataatsimiigiartalernissaannik, ingammik eqqaaniaaqataanissaannik, kajumissaaraangatsigit. Jehova Jiisusilu ilaarlugit killitsittarpugut unittoorsimasut Jehovamut uteraangata. – Matt 18:14. w19.01 qupp. 29 § 12, 14; qupp. 30 § 15

Jiisusip toqunerminik eqqaaniaaneq pilersikkamiuk poorskimi atorneqartartut nerrivimmiittut, timiusaq seernarsaateqanngitsoq viinnilu, taamaallaat atorpai. Jiisusip apustilini oqarfigai illussat pingaarnerit taakkua timiminut aamminullu naammalluinnartumut, apustilini sinnerlugit qanittukkut pilliutigisassaminut, assersuutaasut. Apustilit unnukkorsiortitsinerup nutaap persuarsiortuunnginnera immaqa tupaallaatiginngilaat. Sooq? Qaammatit arlalialuit tamatuma siorna ikinngutigilluakkaminut – Lazarusimut, Marthamut Mariamullu – pulaarami Jiisusi ajoqersuilerpoq. Martha najuuppoq, pulaartuminilli ataqqisaminik nerersuartitsinissaminik piareersaanini puussaarutigaa. Jiisusip tamanna takugamiuk Martha amerlasuunik nerisassiornissap ilaannikkut pisariaqarneq ajorneranik paasinninnissaanut ikiorlugu inussiarnersumik naqqippaa. (Luk 10:40-42) Kingusinnerusukkut Jiisusip pilliutitut toqunissani nalunaaquttap-akunnialui sioqqullugit nammineq siunnersuutini malippaa. Eqqaaniaalluni unnukkiorsiortitsineq pisariitsuutippaa. w19.01 qupp. 20-21 § 3-4

Jehovap Jiisusi ilimaginngisaatut ataqqinarsisippaa. Jehovap Jiisusi makitikkamiuk qilammi “toqujuissusermik” tunivaa. Aamma anersaatut naassaanngitsumik inuunermik, kialluunniit siornatigut pisimanngisaatut, tunivaa! (Fil 2:9; 1 Tim 6:16) Jiisusip aalajaalluni kiffartornera pillugu Jehovamit akissarsisinneqarnerata tupinnassusia! Jehovamit, silarsuarmiunngitsoq, iluarisaaniarnitsinnut suna iluaqutigissavarput? Jehovap kiffani aalajaatsut tamatigut iluarisaanermik ersersitsivigisarai amerlanertigullu ilimaginngisaattut akissarsisittarai eqqaamajuartariaqarparput. Siunissami Jehovap qanoq akissarsisikkumaaraatigut takorluuinnarsinnaavarput. Maannakkulli, silarsuarmi ajortumi matumani ajornartorsiuteqartilluta, eqqaamasariaqarparput silarsuaq manna peeruttussaasoq. (1 Joh 2:17) Ataatattali qilammiusup, Jehovap, “iluaatsuunnginnami” suliavut aqqanillu asanninnerput puiunngisaannassavai. – Hebr 6:10. w18.07 qupp. 8 § 17-18

Jiisusip apustilini naggammik nereqatigigamigit ataasiussuseqarneq isumakuluutigaa. Qinoqatigigamigit qinnummini oqarpoq kissaatigalugu ajoqersukkani ataasiussasut, tassa ataasiussuseqassasut, soorlu nammineq ataatanilu ataasiussuseqartut. Jiisusip ajoqersugai ataasiussuseqarunik allanut uppernarsaataassaaq Jehovap Jiisusi nunarsuarmut aallartissimagaa. Jiisusip ajoqersugai ilumoortut asaqatigiinnermikkut inunnit kinaassusersineqarsinnaassapput, asanninnerlu tamanna allanit tamanit ataasiussuseqaatigissavaat. (Joh 13:34, 35) Jiisusip unnummi tamatumani ataasiussuseqarneq eqqartungaatsiaraa paasisinnaavarput, apustilinimi ataasiussuseqavinngitsut malugaa. Assersuutigalugu apustilit “kina arlartik ilaminit annerusutut naatsorsuunneqassanersoq” oqqassutigeqqippaat. (Luk 22:24-27; Mark 9:33, 34) Pisumi allami Jaakup Johannesillu Jiisusi Guutip naalagaaffiani qilammiittumi nuimanernut, tassa sanianut, piseqqullutik qinnuigaat. – Mark 10:35-40. w18.06 qupp. 9 § 1-2

Jehovap kissaatigaa aappariit asaqatigiinnertik inuunertik tamaat atasussatut ineriartortissagaat. (Matt 19:3-6) Allasiorneq aapparisamut iliuuserineqarsinnaasut ajornerpaartaasa ilagaat. Inassutini Quliusuni arfineq-aappaanni allasiorneq inerteqqutigineqarmat tupinnanngilaq. (5 Mos 5:18) Taamaaliorneq ‘Guutimut ajortuliorneruvoq’ aapparisamullu annernangaartarluni. (1 Mos 39:7-9) Allasiorsimasumik aappallip ilumuunngitsuliorfigineqarnini ukiorparpassuarni anniaatigisinnaavaa.Jehovap aamma kissaatigivaa meeqqat nuannaarlutillu toqqissisimassasut. Angajoqqaat piumasaqarfigai meeqqamik timikkut pisariaqartitaannaat pinnagit anersaakkulli pisariaqartitaat aamma matussusissagaat. Periarfissatik tamaasa atorlugit Jehovap inatsisaanik pingaartitsinissamut asanissaanillu meeqqatik ilinniartittussaavaat. (5 Mos 6:6-9; 7:13) Angajoqqaat meeqqatik sumiginnaannagassatut ajortumilluunniit pineqartussatut isigisussaanngilaat, Jehovamilli tunissutitut kingornussatullu pingaartittariaqarpaat. – Tuss 127:3. w19.02 qupp. 21 § 5, 7

Jobi Guutimit akissarsisinneqarnissaminik neriuutini eqqarsaatigiuaramiuk assuarnaappoq. Upperaa assuarnaannini Guutip pingaartikkaa. Jobi misilinneqartaraluarluni Jehovamit akissarsisinneqarumaarnini qularinngilaa. Tamanna assuarnaannissamut iluaqutigigaa ilimanarluinnarpoq. Jobip assuarnaannera Jehovap iluaringaaramiuk suli naammalluinnanngitsuusoq akissarsisingaarpaa. (Job 42:12-17; Jaak 5:11) Jobi suli annerusumik akissarsisinneqartussaavoq. Guuterput allanngorsimanngilaq. (Mal 3:6) Jehovap assuarnaatsunik akissarsisitsisarnera eqqaamajuarutsigu nuannersumik siunissaqarumalluta sapinngisatsinnik assuarnaattuassaagut. (1 Th 5:8, 9) Immaqa ilaannikkut kisimiittutut misigisassaatit, kisimiinngisaannarputilli. Silarsuarmi inuit aalajaallutik assuarnaatsut millionillit ilagissavaatsit. Aamma itsaq angutit arnallu allaat toqumik siorasaarneqaraluarlutik upperlutik assuarnaatsut ilagilissavaatsit. – Hebr 11:36-38; 12:1. w19.02 qupp. 7 § 15-16

Eqqaaniaanerup nalaani pitsaassaaq imminut ima aperigutta: ‘Asannittuliornermut tunngatillugu Jiisusi qanoq ilaarluarnerusinnaavara? Nammineq pisariaqartitakka pinnagit uppeqatima pisariaqartitaat eqqarsaatiginerusarpakka? Qatanngutikka sapinngisaat sipporlugit piumasaqarfigisarpakka, imaluunniit pisinnaasaasa killeqarnerat eqqumaffigaara?’ Qanortoq Jiisusi ilaarlugu ‘misiginneqataanermik’ ersersitsiuarisa. Kristusip toquneranik eqqaaniaasarnissamik piumasaqaat atuukkunnaangajalerpoq. Jiisusip annikilliornartussarsuarmi ‘tikiukkuni’ ‘qinikkani’ kinguleruttut qilammut katersussavai, eqqaaniaanerlu nalliussineqartarunnaassaaq. (1 Kor 11:26; Matt 24:31) Eqqaaniaalluni unnukkorsiorneq nalliussineqartariaarukkaluartoq qularinngissinnaavarput Jehovap innuttaasa persuarsiunngitsumik unnukkorsiorneq inuup maniguunnermik, sapiinnermik asanninnermillu ersersitsinerisa annerpaartaat nuannaarlutik eqqaamajuassagaat. w19.01 qupp. 25 § 17-19

Qamuuna ilukkut qanoq ittuunitta pingaaruteqassusia timikkut peqqissutsitsinnit qanoq ersersinneqartoq eqqarsaatigiuk. Siullertut, timikkut peqqissuujumalluta peqqinnartunik nerisariaqarlutalu timersukulasariaqarpugut. Taamatuttaaq anersaakkut peqqissuujumalluta anersaakkut nerisassat peqqinnartut toqqartariaqarlugillu Jehovamut uppernerput ersersikulasariaqarparput. Ilikkakkatsinnik maleruaanikkut upperisarpullu pillugu oqaluttuartarnikkut Jehovamut uppernerput ersersittarparput. (Rom 10:8-10; Jaak 2:26) Aappaattut, qallikkut qanoq ittuunerput tunngavigalugu eqqarsarsinnaavugut qamuuna napparsimagaluarluta peqqilluta. Taamatuttaaq ileqquvut anersaakkut ittut tunngavigalugit eqqarsarsinnaavugut uppernikkut nukittulluta, pilerissusipiluilli ilutsinni naajartorsinnaapput. (1 Kor 10:12; Jaak 1:14, 15) Eqqaamasariaqarparput Saatanip immisut eqqarsartaaseqalernissarput kissaatigimmagu. w19.01 qupp. 15 § 4-5

Imminut ima aperisinnaavugut: ‘Uanga taamaaliortarpunga? Samariamiu tullerminik asannittoq ilaartarpara?’ (Luk 10:30-35) ‘Allat naalliukkaangata ikiorumallugit iliuuseqarsinnaavunga? Assersuutigalugu ilagiinniittut utoqqaat, uillarnerit meeqqalluunniit Jehovamik kiffartortuunngitsunik angajoqqaallit ikiorsinnaavakka? Nikallungasut tuppallersarsinnaavakka?’ (1 Th 5:14; Jaak 1:27) Allanut nallittuigaangatta tunniussisarpugut, Jiisusilu oqarpoq tunisineq pillualissutigisaripput. Pissutaasoq alla tassaavoq nalunnginnatsigu Jehovap iluarisaatut iliorluta. (ApS 20:35; Hebr 13:16) Inuk nallittuisoq pillugu kunngi Daavi ima allappoq: “Naalakkap sernigissavaa inuutillugulu, pilluartissavaa nunami.” (Tuss 41:2, 3) Allanut nallittuillutalu misiginneqataagutta Jehovamit nallittorneqassallutalu naassaanngitsumik pilluarsinnaavugut. – Jaak 2:13. w18.09 qupp. 18 § 11-12

Qatanngut arnaq kristumiu aalajaatsoq Yoshikomik atilik nuanninngitsumik tusarlerneqarpoq. Nakorsaminit oqarfigineqarpoq inuuffissani qaammatialuinnanngortut. Qanoq qisuariarpa? Yoshikop Biibilimi allassimaffik nuannarisani, ullormut allassimaffik, eqqaavaa. Taava eqqissisimalluni nakorsaminut oqarpoq ernumanani, Jehovammi tasiormani. Versimi allassimasut tuppallernartut qatanngutitta Jehovamik tatiginnilluinnarnissaminut iluaqutigai. Allassimaffik taanna sakkortuunik misilinneqaraluarluta eqqissisimaannarnissamut aamma uagut iluaqutigisinnaavarput. Aallaqqaammut juutit Babylonimut aallarussaasussat tuppallersarniarlugit Jehovap Esaja tamatuminnga allatsippaa. Aamma juutit aallarussaaqqasut kisiisa pinnagit taamanerniilli innuttani tamaasa pillugit tusarliussaq allatsippaa. (Es 40:8; Rom 15:4) Maanna ‘ullut atugarliungaarfiit’ inuuffigivavut, Esajallu allagaani tuppallersaatit aatsaat taama pisariaqartitsigivavut. – 2 Tim 3:1. w19.01 qupp. 2 § 1-2

Taamatut averuserniarlutik aalajangerunik suli aappariiupput, marluullutillu immikkut unamminiagaqassapput. Apustili Paulusi aappariiginnarnissamut pissutissaqalersitsivoq. Allappoq: “[Angut] uppertuunngitsoq illernartitaavoq nuliamigut, arnarlu uppertuunngitsoq illernartitaavoq qatanngutikkut. Taamaanngippat qitornasi minguttuussagaluarput, maannali illernartitaapput.” (1 Kor 7:14) Kristumiorpassuit aappartik Jehovamut kiffartunngikkaluartoq najuinnarniarlugu aalajangersimapput, naak pissutsit unamminiarnaraluartut. Taamatut pilliuteqarnertik nuannaarutigaat pingaartumik aappartik Jehovap Nalunaajaasuinut ilanngummat. (1 Kor 7:16; 1 Petr 3:1, 2) Silarsuaq tamakkerlugu kristumiut ilagiivini aappariilluartorpassuaqarpoq. Nammineq ilagiinni immaqa aappariit pilluartut amerlasuut takusinnaavatit, uiusut ilumoorfiginnittut nuliatik asagaat nuliaasullu asannittut uiminnik ataqqinnittut. Taakkua tamarmik aappariinnerup ataqqinartuusinnaanera ersersippaat. – Hebr 13:4. w18.12 qupp. 14 § 18-19

Oqaaseq “Eden” ‘nuannaarnermik’ isumaqarpoq, naatsiivimmi taanna nuannerluinnarmat. Tassani alianaalluinnartumi nerisassarpassuaqarlunilu inuit uumasullu eqqisseqatigiipput. (1 Mos 1:29-31) Hebræerisut oqaaseq “naatsiivik” oqaaseq grækerisuumit para’deisos-imit nutserneqarpoq. Cyclopaedia-mi M’Clintockip Strongillu allataanni eqqaaneqarpoq grækeriusup oqaaseq para’deisos tusaraangamiuk takorloortaraa naatsiiviliarsuaq alianaatsoq isorartoorlu ajoqusiisinnaasunut sunulluunniit illersorneqartoq, orperujussualik assigiinngitsorpassuarnik inerittulinnik akisuttunillu kuulik qattunilillu ivigalinnik nersutaatit antelopet savallu mangiarfigisagaannik. (1 Mosesi 2:15, 16 naleqqiuguk). Jehovap Adami Evalu naatsiivimmut taamaattumut, paratiisimut, inissippai. Taakkuli Jehovamut naalanngikkamik kinguaatillu paratiisimi inuunissamik immikkut pisinnaatitaaffitsik annaavaat. (1 Mos 3:23 24) Paratiisi taanna inunnit najorneqanngikkaluartoq Noap nalaani ulersualernissaanut piusimagunarpoq. w18.12 qupp. 3-4 § 3-5

Angajoqqaat qitornatik pingaartitassaannik ilinniartinniartarpaat. Qitornaasut aalajangerunik angajoqqaami pingaartitaat malillugit inuuniarlutik ajunngitsunik aalajangiinerussallutillu ajornartorsiuterpassuit, isumakuluutit peqqissimissutillu pinaveersaarsinnaavaat. Ataataalluartutut Jehovap qitornani ajunnginnerpaamik inuunissaannik kissaappai. (Es 48:18) Taamaammat najoqqutassianik ileqqussatigut allanillu qanoq pinnittarnissatsinnik ilinniartippaatigut. Namminermisut isiginnittaaseqaleqqullutalu pingaartitani malillugit inooqqulluta kajumissaarpaatigut. Tamanna ingasattumik killilersuinerunngilaq. Ilisimassuseqalissutigaluguli ajunnginnerusunik aalajangiinissamut iluaqutigaarput. (Tuss 92:6; Uss 2:1-5; Es 55:9) Nammineq nuannarisaqarsinnaavugut pillualissutigisatsinnilli aalajangiisassalluta. (Tuss 1:2, 3) Aap, Jehovatut eqqarsarneq iluaqutaallunilu ajunngilluinnarpoq! w18.11 qupp. 22-23 § 7-8

Sallusuissummiittuarumalluta Jehovamut kiffartortuunngitsut uatsinnut sunniuteqartissanngilavut. Sallusuissut ilikkaratsigu ikinngutinut ilaquttanullu Nalunaajaasuunngitsunut attaveqarnerput allanngorpoq. Immaqa ilaasa upperisartaarput ataqqivaat, allalli immaqa akerlilersorpaat. Ilaquttatta, suleqatitta atuaqatittaluunniit nalliuttorsiornerminnut peqataatinniarsinnaavaatigut. Ileqqunik nalliuttunillu Jehovap iluarinngisaanik peqataatinniarneqarneq qanoq akiorsinnaavarput? Jehovap nalliuttunik tamakkuninnga iluarinninnginneranut pissutaasut puiunngisaannartariaqarpavut. Nalliuttut ilaat qanoq naggueqarnersut pillugu atuagassiaatitsinni misissuisinnaavugut. Nalliuttunik tamakkuninnga nalliussinnginnissamut pissutaasut Biibilimeersut eqqarsaatigeqqissaaraangatsigit “Naalakkap iluarisaa” naapertorlugu inuulluta qularutigiunnaartarparput. (Ef 5:10) Jehova taassumalu oqaasia tatigigutsigit inuit qanoq isumaqarfigineraatigut isumakuluutigissanngilarput. – Uss 29:25. w18.11 qupp. 12 § 10, 12

Inuunitsinni tassanngaannaq allanngortoqaraangat isumakululluta ajornartorsiutivut kisiisa eqqarsaatigilersinnaasarpavut. Josefi taama misigisimasinnaagaluarpoq, pissutsinili atukkamini isumalluartuuniarsarivoq. Josefip Potifarimi sulilluarsimanermisulli parnaarussivimmi parnaarussiviup naalagaata suliassiissutai tamaasa suliarilluarniartarpai. (1 Mos 39:21, 22) Uaguttaaq Josefitut pissutsini aqussinnaanngisatsinnik nalaataqarsinnaavugut. Erinitsajuikkuttali sapinngisatsinnillu iliuuseqarutta Jehovap pilluaqqussavaatigut. (Tuss 37:5) Paatsiveerusimaalissagaluarutta imaluunniit ernumalissagaluarutta ‘neriuutissaarunnavianngilagut’. (2 Kor 4:8) Jehovap najortuassavaatigut pingaartumik kiffartornerput pingaartittuarutsigu. w18.10 qupp. 24 § 11; qupp. 25 § 13

Nalunngisavit ataqqisavillu arlaata ilisarinngippatit atilluunniit puiorpagu qanoq misigissavit? Taamaanneqarneq nikallornarsinnaavoq. Sooq? Tamatta allanit iluarineqarnissaq inunnguuseralugu kissaatigisaratsigu. Kinaassusersiinnaratali aamma inuttut qanoq ittuunersugut qanorlu angusaqarsimanersugut nalussanngikkaat kissaatigaarput. (4 Mos 11:16; Job 31:6) Mianersunngikkuttali inunnguuseralugu kissaaterput ajortumik sunnerneqarsinnaavoq. Saatanip silarsuaata tusaamasaarusulernissarput pingaaruteqarusulernissarpullu kissaatigitikkusuppaa. Taama kissaateqaleraangatta Ataatarput qilammiusoq, Jehova Guuti, ataqqinaasernagulu pallorfigineqartariaqarneratullu pallorfigineq ajorparput. – Saqq 4:11. w18.07 qupp. 3 § 1-2

Saatanip anersaapiluisalu inuit “salluliortut” sunnertarmatigit tamanna tupiginngilarput. (1 Tim 4:1, 2) Ingammik upperisarsiornikkut siuttut sallugaangata ajornerusarpoq. Sooq? Arlaata taakkua ajoqersuutaat eqqunngitsut upperalugillu Guutip uumigisaanik iliuuseqaruni naassaanngitsumik inuunissaraluani annaasinnaavaa. (Hos 4:9) Jiisusip nalimini upperisarsiornikkut siuttut inunnik uukapaatitsisarnerat nalunngilaa. Sapiilluni oqarfigai: “Eqqanaq ilissi allakkanik ilisimasut farisiiarillu, ilumoortuusaartusi! Immakkummi nunakkullu angalasarpusi ataatsimik malitsissarsiniaannarlusi. Malitsigiligarsilu Anniarfimmut [Gehennamut, NW] qitornaasussanngortittarparsi.” (Matt 23:15) Jiisusi oqarpoq upperisarsiornikkut siuttut ilumoortuusaartut taakkua ataatartik, Diaavulu ‘toqutsisuusoq’, assigilluinnaraat. – Joh 8:44. w18.10 qupp. 4 § 5-6

Jiisusimuna suna pigaa? Ima nangippoq: “Tipaatsugitsi nuannaarlusilu akissarsiassarsi qilanniittoq angeqimmat; taamatuttaarmi pruffiitit qinugisarpaat ilissi siunissigut.” (Matt 5:12) Apustilit persuttarneqarlutillu oqaluussiunnaarnissamik peqquneqaramik “killisiuisarfik qimappaat nuannaarlutik”. Soorunami persuttarneqarnertik nuannaarutiginngilaat. Kisianni nuannaarput “Jiisusip aqqa pillugu narrunarsagaanissamut qinngaqqunnartitaannginnamik.” (ApS 5:41) Ullumikkut Jehovap innuttai aamma Jiisusip aqqa pillugu malersorneqaraangamik nuannaarlutik pinertusaartarput. (Jaaku 1:2-4) Apustilit assigalugit naalliunneq malersorneqarnerluunniit nuannaarutigineq ajorpavut. Jehovali ilumoorfigiuarutsigu pinertusaarnissatsinnut pisariaqartitatsinnik sapiissusermik taassuma tunissavaatigut. Malersugaagaluarutta, ilaquttatsinnit akerlilersorneqaraluarutta, napparsimaleraluarutta utoqqaligaluaruttaluunniit Jehovap, ‘Guutip pilluartup’, iluarigaangatigut pilluarsinnaavugut. – 1 Tim 1:11. w18.09 qupp. 20 § 18-20

‘Ulluni atugarliungaarfiusuni’ inuugatta inuunermi ‘naalliunnartut ajunaarnerillu’ imaaginnavipput. Inuppassuit ima naalliutsigipput allaat tunniutiinnarusullutik. (2 Tim 3:1-5) Ukiut tamaasa inuit 800.000-t sinnerlugit imminortarput, tassa 40 sekundikkaarlugit inuk ataaseq. Ajoraluartumik allaat qatanngutivut ilaat taama misigigamik imminorsimapput. Ullumikkut qatannguterpassuavut pissutsit atugaat imaannaanngillat, uagutsinnillu asaneqarnissartik pisariaqartippaat. Ilaat illaruaatigineqarlutilluunnit malersorneqarput. Allat suliffimminni uumissugaaneq oqaluuserinerlunneqarnerluunniit naammagalugit atortariaqarpaat. Immaqaluunniit sivisuumik sulisariaqartarlutillu qasunartunik suliffeqaramik qasupput. Aamma allat ilaqutariinni ajornartorsiungaarput. Immaqa Jehovamik kiffartortuunngitsumik isornartorsiuiuartumillu aappaqarput. Tamakkunannga allanillu nanertisimaneqarnertik pissutigalugu amerlasuut nukissaaruttutut misigalutillu allaat naleqarnertik qularutigilertarpaat. w18.09 qupp. 9 § 3, 5

Angajoqqaat kristumiut qitornatik kiffartornermi anguniagaqaqqullugit ikiorneranni Jehovamik suleqateqarsinnaapput. Angajoqqaarpassuit taamaaliorput. Kingunerisaanik taakkua qitornaat piffissaq tamaat Jehovamut kiffartorniarlutik aalajangerput, allaat ilaat ungasissumut nuussimapput. Ilaat ajoqersuiartortitaapput, allat oqaluussisartunik pisariaqartitsiffiusumut nuussimapput ilaallu Betelimi kiffartorlutik. Soorunami qitornat ungasissumi najugaqaraangata angajoqqaat taakku kissaatigisamittulli ilagisarsinnaanngilaat. Qitornatilli sumiikkaluarpataluunniit Jehovamut kiffartortuaqqullugit namminissarsioratik kajumissaartarpaat. Sooq? Qitornamik inuunerminni Jehovamik salliutitsinerat nuannaarutigingaaramikku. Angajoqqaat taakkua ilarpassui Hannatut misigipput, taanna oqarpoq ernini Samueli ‘Naalakkamut pigititaasoq’. Taamatut Jehovamik suleqateqarnertik ataqqinaatitut isigaat. – 1 Sam 1:28. w18.08 qupp. 22 § 4

Jiisusi oqanngilaq ajornarluinnartoq. Oqarpoq: “Pilluarpusi piitsuususi, Guutimmi naalagaaffia ilissi pigaarsi.” (Luk 6:20) Isumaqanngilarli piitsut tamarmik Jiisusimut tusarnaassasut immikkullu ittumik pilluaqquneqassasut. Piitsorpassuit Jiisusimik malinninngillat. Tassa inuup qanoq pigisaqartiginera tunngavigalugu Jehovamut attaveqarnera nalilersorsinnaanngilarput. Nalitsinni Jehovap innuttaasa ilaat pisuujupput allallu piitsuullutik. Tamarmilli Jehova asavaat uummatikkullu iluunngarlutik kiffartorfigerusullugu. Allakkani Illernartuni pisuut kajumissaarneqarput “pisuussutitilluunniit allanngujasut isumalluutigeqqunagit, isumalluutigeqqulluguli Guuti”. (1 Tim 6:17-19) Guutip oqaasiani Jehovap kiffai tamarmik, pisuut piitsullu, aningaaserituujuneq pillugu mianersoqquneqarput. (1 Tim 6:9, 10) Qatanngutivut Jehovatut isiginnittaaseqarfigigutsigit sunik pigisaqarnerat sunilluunniit pigisaqannginnerat tunngavigalugu eqqartuutissanngilavut. w18.08 qupp. 12-13 § 11-12

Jehovamit innuttatut pigineqarnerput qujamasuutigalugu taassumunnga ersersikkusupparput. Inuunerput taassumunnga tunniulluinnaratsigu silatusaarnerpaamik aalajangiilluta nalunngilarput. Jehovap uumigisaanik sumilluunniit iliuuseqannginnissarput aalajangiusimavarput. Aamma qatanngutivut Jehovamit pigineqarmata asallugillu ataqqivavut. (Rom 12:10) Biibilimi ima neriorsuuteqarpoq: “[Ajattussanngilai] Naalakkap innuttani.” (Tuss 94:14) Tamanna qularnaveeqqutaavoq. Susoqaraluarpalluunniit Jehovap qimannavianngilaatigut. Allaat toqugaluarutta puiornavianngilaatigut. (Rom 8:38, 39) “Inuugutta toquguttaluunniit Naalakkap pigaatigut.” (Rom 14:8) Jehovap ikinngutiminik tamanik ilumoorfiginnittunik toqusimasunik makititsinissaa qilanaaraarput. (Matt 22:32) Aamma maannangaaq Ataatatsinnit tunissuterpassuit nuannaarutigaavut. Biibilimi allassimaneratut “pilluarput inuiaat Naalakkamik Guuteqartut, inuiaat pigisassamisut qinigai”. – Tuss 33:12. w18.07 qupp. 26 § 18-19

Ilaat immaqa misigipput ilinniagaqarnermut suliffeqarnermullu tunngatillugit nammineq aalajangiisinnaatitaagamik ilerasuutiginngikkunikku qanorluunniit aalajangiinissamut kiffaanngissuseqarlutik. Immaqa Paulusip allatai uku eqqarsaatigaat: “Soormi uanga kiffaanngissusera allap tarnaata nalunngissusianit eqqartuunneqassava?” (1 Kor 10:29) Tamakku pillugit nammineq aalajangiisinnaatitaagaluarluta eqqaamasariaqarparput kiffaanngissuserput killeqarmat aalajangikkavullu tamarmik kinguneqartarmata. Taamaammat Paulusi ullormut allassimaffimmi allassimasutut allappoq. Tassa nammineq aalajangiisinnaatitaagaluarluta kissaativut pingaarnerpaajunngillat. w18.04 qupp. 5 § 10

Kristumiu Jehova pallorfigineraraluarlugu Jehovap uumigisaanik iliortarsinnaavoq. (Jud 11) Immaqa oqaluussisarlunilu ataatsimiigiartarpoq. Tamatumali saniatigut immaqa kinguaassiuutitigut inuunerlunnermik takorluuisarpoq, piumatuutut eqqarsartarpoq kristumioqanniluunniit uumigalugu. (1 Joh 2:15-17; 3:15) Taamatut eqqarsarneq ajortuliornermik kinguneqarsinnaavoq. Inuit allat immaqa naluaat qanoq eqqarsartugut iliortugulluunniit, Jehovalli nalunngilaa. Naalalluinnarnersugut nalunngilaa. (Jer 17:9, 10) Kukkusaraluartugut Jehovap ingerlaannaq immineerneq ajorpaatigut. Guutimit ungasilliartorutta Jehovap ima kimigiiserfigaatigut: “Uannut saanniarniaritsi, taava uanga ilissinnut saassaanga.” (Mal 3:7) Akiortariaqakkatsinnik sanngiissuteqarnerput Jehovap paasisinnaavaa, kissaatigaali ajortoq akiortuassagipput. (Es 55:7) Taamaaliorutta neriorsorpaatigut ikiussallutalu pilerissusipiluit ajugaaffiginissaannut pisariaqartitatsinnik nakussatsissalluta. – 1 Mos 4:7. w18.07 qupp. 16 § 5-6