Marsi

Mosesimik allakkani siullerni kapitalit siulliit marluk atuaratsigit paasivarput Adami Evalu nalitsinni inuit takorluuinnarsinnaasaannik kiffaanngissuseqartut. Pisariaqartitatik tamaasa pigalugillu qunugisassaqaratillu naqisimaneqanngillat. Nerisassat, suliffik, nappaatit toquluunniit pillugit isumakuluuteqanngillat. (1 Mos 1:27-29; 2:8, 9, 15) Jehovalli kisimi naammalluinnartumik killeqanngitsumillu kiffaanngissuseqarnera eqqaamassallugu pingaaruteqarpoq. Sooq? Sunik tamanik Pinngortitsisuullunilu qilammi nunamilu Kisimi Oqartussaasuugami. (1 Tim 1:17; Saqq 4:11) Qilammili nunamilu pinngortitat tamarmik kiffaanngissusiat killeqarpoq. Jehovap Guutip kissaatigaa kisimi naapertuilluartumik, pisariaqartumik ingasaassinngitsumillu killiliisinnaatitaanini akuerissagipput. Pileqqaarneranniilli Jehovap pinngortitani killilerpai. w18.04 qupp. 4 § 4, 6

Silarsuarmi matumani Jehovap ikiuineratiguinnaq pinertusaarsinnaavugut. (2 Kor 4:7, 8) Inuilli silarsuarmi matumani Jehovamik qanimut ikinnguteqaratik ilungersortut eqqarsaatigikkit. Jiisusitut taakku nalligaavut ‘pitsaanerusullu pillugit nutaarsiassanik nuannersunik’ oqaluussiffigerusullugit. (Es 52:7, NW) Ilinniartitatit erinitsajuiffigikkit. Eqqaamajuk sallusuissutit Biibilimeersut nalunngilluakkavut imaassinnaasoq eqqarsaatiginikuunngikkaat. Inuppassuillu upperisartik pingaartingaarlugulu upperilluinnarpaat. Imaassinnaavoq misigisut ilaquttaminnut, kulturiminnut inuiaqatigiinnullu ataqatigiisitsisuusoq pingaarutilik. Ilinniartitatta “upperisatoqqamik” pingaartitamik taamaatitsinissaat kissaatigigutsigu sallusuissutinik “nutaanik” – Biibilimi ajoqersuussutinik aallaqqaammut ilisimanikuunngisaannik – pingaartitseqqullugit ikioqqaartariaqassavavut. Aatsaat taamaaliornikkut upperisatoqqamik taamaatitsinissaannut piareersimasutut misigilissapput. Taamatut allannguinissaminnut inunnik ikiuiniarnerput sivisusinnaavoq. – Rom 12:2. w19.03 qupp. 22 § 10; qupp. 23 § 12-13

Jehovap asanninnermik iluarinninnermillu ersersitsinera allanut qiimmassaasarnissatsinnut periarfissarsiortarnissamik eqqaasitsissutigaarput. (Joh 5:20) Nuannaarutigisarparput asasatta asanninnermik ersersitsivigalutalu ajunngitsuliavut pillugit nersualaaraangatigut. Taamatuttaaq ilagiinni qatanngutitta ilaquttattalu uagutsinnit asanninnermik kajumissaarneqarnermillu ersersitsivigineqarnissartik pisariaqartippaat. Allat nersualaaraangatsigit uppernikkut nakussatsittarpavut Jehovamullu aalajaallutik kiffartorsinnaanerannik ikiorlugit. Ingammik angajoqqaat meeqqatik kaammattortariaqarpaat. Angajoqqaat meeqqatik ilumoorlutik kaammattorlugillu asanninnermik ersersitsivigigaangamikkit ingerlalluarnissaannut ikiortarpaat. “Nuannarisaraakkit!” Oqaaseq taanna atoramiuk Jehovap ersersippaa Jiisusip aalajaalluni Ataatami piumasaanik naammassinninnissaa tatigalugu. Jehovap ernerminik tatiginninnera pissutigalugu uaguttaaq Jehovap neriorsuutaanik tamanik Jiisusi eqquutsitsiumaartoq tatigilluinnarsinnaavarput. (2 Kor 1:20) Jiisusip maligassiaa eqqarsaatigigaangatsigu taassuma ilinniarfiginissaa maligassiaatalu maleruarnissaa aalajangiusimanerulertarparput. – 1 Petr 2:21. w19.03 qupp. 8 § 3; qupp. 9 § 5-6

Erlinnangaartumik tunineqarsimagaangatta tunniussisumut qujamasuttarpugut. Israelikkulli kiffaanngissuseq Jehovamit pisartik qujamasuutiginngilaat. Egyptenimit aniguisitaareerlutik qaammatialuit qaangiuttut Egyptenimi nerisarisartakkatik amigaatiginerarpaat. Jehovap mannanik pilersuinera naammagittaalliuutigaat allaallu Egyptenimut uterusulerlutik! ‘Aalisakkat, agurkit, melonit, porrit uanitsullu’ Jehovap pallorfiginiassammanni kiffaanngissuseqartitsineranit pingaarnerutippaat. Tupinnanngilaq Jehovap kamaatingaalermagit. (4 Mos 11:5, 6, 10; 14:3, 4) Tamanna pingaarutilimmik ilinniutigaarput. Paulusip kristumiut tamaasa oqaaqqissaarpai Jehovap ernini Jiisusi Kristusi aqqutigalugu kiffaanngissuseqalersitsinera taamaattussaannartut isigeqqunagu. – 2 Kor 6:1. w18.04 qupp. 4 § 6-7

Tamatta asaneqarnissarput naapertuilluartumillu pineqarnissarput kissaatigisarparput. Asanninngitsumik naapertuilluanngitsumillu pineqaqattaarutta naleqanngitsutut misigilersinnaavugut. Jehovap nalunngilaa asannittumik naapertuilluartumillu pineqarusuttugut. (Tuss 33:5) Qularutiginngissinnaavarput Guutitta qamannga pisumik asangaaraatigut eqqortumillu pineqarnissarput kissaatigigaa. Tamanna Jehovap inatsisit Mosesi aqqutigalugu Israelikkunnut tunniussai misissortillugit paasinarsissaaq. Mosesip inatsisai atuaqqissaaraangatsigit Guuterput Jehova qanoq asannitsigisoq paasisarparput. (Rom 13:8-10) Jehovap iliuutsimini tamani asanninneq tunngavigisarmagu oqarsinnaavugut Mosesip inatsisai tamarmik asanninnermik tunngaveqartut. (1 Joh 4:8) Inassutit marluk tunngaviusut najoqqutaralugit – Guutimik tullermillu asanninnissamik inassutit – Jehovap Inatsisit pilersippai. (3 Mos 19:18; 5 Mos 6:5; Matt 22:36-40) Inatsisini inassutit 600-nit amerlanerusut Jehovap asanninneranik ersersitsipput. w19.02 qupp. 20-21 § 1-4

Jobip arnanut pissusilersoriaatsini eqqumaffigiuaannarpaa. (Jobi 31:1) Nalunngilaa arnamut nuliarinngisaminut kimulluunniit ajuutiginnilluni soqutiginninneq naleqqutinngitsuusoq. Nalitsinni silarsuarmi atoqateqarnissamut ussernartunik ulikkaartumi inuuvugut. Jobi ilaarlugu katissimanngisatsinnut naleqqutinngitsumik soqutiginninnermik ersersitsinnginnissarput aalajangiusimassavarput? Aamma assinik tiingarusulersitsisunik pornografiimilluunniit isiginnaannginnissarput aalajangiusimassavarput? (Matt 5:28) Ulluinnarni taamatut imminut aqussinnaasarutta assuarnaannissarput aalajangiusimanerulissavarput. Jobip aamma pigisanut isiginnittaatsimut tunngatillugu Jehova naalappaa. Jobip paasivaa pigisat isumalluutigigunigit pillarneqaataasussamik ingasattumik ajortuliussalluni. (Job 31:24, 25, 28) Ullumikkuttaaq silarsuarmi pigisalerituumi inuuvugut. Biibilimi kajumissaarneqarnitsitut aningaasanut pigisanullu oqimaaqatigiissumik isiginnittaaseqarutta assuarnaannissarput aalajangiusimanerulissavarput. – Uss 30:8, 9; Matt 6:19, 20. w19.02 qupp. 6-7 § 13-14

Jehovap uagutsinnik asanningaarnera Jiisusip iliuutsimigut tamatigut ersersilluartarpaa. (1 Joh 4:8-10) Pingaarnertut, Jiisusi uagut pilluta inuunerminik pilliuteqarnissamut uummammit pisumik kajumissuseqarpoq. Tanitaagutta imaluunniit ‘savanut allanut’ ilaagutta pilliut taanna aqqutigalugu Jehovap Erneratalu uagutsinnik asanninnerminnik ersersitsinerat iluaqutigaarput. (Joh 10:16; 1 Joh 2:2) Aamma eqqaaniaalluni unnukkorsiornermi atorneqartut eqqarsaatigikkit, taakkunannga Jiisusip ajoqersukkaminik asanninnera isumassuineralu ersersinneqarpoq. Qanoq? Jiisusip pisariusumik ileqqulersuummik pilersitsinani persuarsiunngitsumik unnukkorsiorluni eqqaaniaasarnissamik pilersitsinermigut ajoqersukkaminik anersaakkut tanitanik asanninnini ersersippaa. Piffissap ingerlanerani ajoqersukkat tanitat taakku ukiut tamaasa pissutsini assigiinngitsuni, aamma parnaarussaaqqanerminni, eqqaaniaasariaqarsimapput. (Saqq 2:10) Jiisusi naalassinnaavaat? Aap! Taamanimiilli kristumiut ilumoortut Jiisusip toqunera eqqaaniarniarlugu sapinngisaminnik iliuuseqartarput. w19.01 qupp. 24 § 13-15

Inussiaajunnaarneq tamanna tassaavoq upperisarsiornermit eqqunngitsumit, soqutigittaannermit upperisapalaaqarnermillu inussiaajunnaarsinneqarneq, imaluunniit kiffaanngissuseqarneq. Siunissami “kiffaanngissuseq Guutip qitornaasa naalannarsiffissami pisassaat” qilanaaringaarparput. (Rom 8:21) Maannangaaq taamatut kiffaanngissuseqarsinnaavutit Kristusip ajoqersuussutaanik maleruaanikkut taassuma ‘oqaasia aalajangiusimajuarukku’. (Joh 8:31) Taamaaliornikkut ‘sallusuissut’ ilinniaannarnagu inooriaaserineratigulli ‘ilisimalissavat’. Pissutsit maanna aaqqissuussaaneranni allaat inuit inuuneq ajunngitsuuneragaat sivikippoq. Inuup kialluunniit aqagu susoqassanersoq naluaa. (Jaak 4:13, 14) Taamaammat pitsaanerpaajuvoq “inuunivik pigilersinnaaqqullugu” silatusaartumik aalajangiisaruit. (1 Tim 6:19) Jehovap kiffartorfigeqqulluni kinaluunniit pinngitsaalineq ajorpaa. Tamatta suniarnerluta nammineq aalajangissavarput. Ullut tamaasa taassumunnga qaninnerulernikkut Jehova ‘pisassarileruk’. (Tuss 16:5) Ajunngitsorpassuit tunniussai nuannaarutigikkit. (Tuss 103:5) Upperiullu Jehovap naassaanngitsumut nuannaartissinnaallutillu pilluartissinnaagaatit! – Tuss 16:11. w18.12 qupp. 26 § 19, 21

Jehovap Jiisusillu pinerattut kristumiut tamarmik aappariinneq ataqqisariaqarpaat. Ilaannikkulli naammalluinnanngissuseq pissutigalugu ilaat taamaaliorneq ajorput. (Rom 7:18-23) Taamaattumik kristumiut siulliit nalaanni ilaat aappariinnerminni ingasattunik ajornartorsiuteqarnerat tupaallaatigissanngilarput. Paulusi allappoq “nuliap uini qimassanngikkaa”. Ilaannikkulli taama pisoqartarpoq. (1 Kor 7:10) Taamatut averusernermut pissutaasut Paulusip nassuianngilai. Nalunngilarpulli ajornartorsiut tassaanngitsoq assersuutigalugu uiusoq, nuliami avinnissamut kateqqinnissamullu pissuteqalissutigisaanik, kinguaassiuutitigut inuunerlussimasoq. Paulusi allappoq nuliaasoq uiminik qimatsisimasoq ‘aappaqanngitsuujuassasoq uiniluunniit isumaqatigalugu uterfigissagaa’. Tassa Guutip aappariittut suli isigai. Paulusi allappoq aappariit qanorluunniit ajornartorsiuteqaraluarunik, kinguaassiuutitigut inuunerluttoqarsimanngippat, uternissartik anguniagarissagaat. Utoqqaanertanut ikioqqusinnaapput. w18.12 qupp. 13 § 14-15

Nalitsinni, Jehovap ikinngutigissagitsinni sapinngisatsinnillu oqaluusseqataanissarput kissaatigaa. (Matt 28:19, 20; Jaak 4:8) Inunnilli ajunngitsumik isumaqartunit nangartarneqarsinnaavugut. Assersuutigalugu qaffasinnerusumik akissarsiagissaarnerusumillu atorfimmik ittuppit neqeroorfigippatit, ataatsimiigiartarninnulli oqaluusseqataasarninnullu ajoqutaasumik? Atuartuuguimmi, angajoqqaannit nuullutit ilinniagaqaqqinnissannut periarfissinneqaruit? Taamatut pisoqarpat aalajangiinnginninni qinoqqaartariaqarpit, misissueqqissaarlutit allanik oqaloqateqarlutit? Pitsaanerussaaq maanna tamakku pillugit Jehovap isiginnittaasia paasiniarlugulu nammineq pigiliunniarukku. Siunissami taamatut neqeroorfigineqassagaluaruit ussernartorsiorpallaarnak Jehovamik kiffartornissat aallunniarlugu aalajangiussimagakku qanoq iliorniarnerlutit ilisimassavat. w18.11 qupp. 32 § 18

Salomo inuusuttunnguulluni Israelimi kunnginngorpoq. Kunnginngoqqammerluni sinnattukkut Jehovamit saqqummerfigineqarpoq oqarfigineqarlunilu: “Oqaannarit sumik tunissanerikkit.” Salomo akivoq: ‘Inuusuttunnguuvunga misilittagakitsuullungalu. Taamaattumik kiffat uummateqartikkiuk malussarissumik illit innuttannut naalagaasinnaatillunga.’ (1 Kng 3:5-10) ‘Uummammik malussarissumik’, tassa naalattumik, qinugami assut maniguuppoq! Paasinarpoq Jehovap Salomo asammagu. (2 Sam 12:24) Kunngip inuusuttup akissutaa Guutitta iluaringaaramiuk Salomo ‘uummammik ilisimasumik silaqassuseqartumillu’ tunivaa. (1 Kng 3:12) Salomo aalajaannermini amerlasuunik pilluaqqussutisivoq. Immikkut pisinnaatitaaffigalugu Jehovap “Guutiata aqqa” naalaffiliuuppaa. (1 Kng 8:20) Guutimeersumik ilisimassuseqarnini tusaamasaalissutigaa. Guutimillu isumassarsisitaalluni oqaasii Biibilimi atuakkani pingasuni allanneqarput. Ussatit atuakkat taakkua ilagaat. w19.01 qupp. 14 § 1-2

Inuit ilaat qanoq eqqarsassanerlutik kimilluunniit sunnerneqarusunngillat. Oqartarput, “Nammineq eqqarsarsinnaavunga”. Pisarunarpaat nammineq aalajangeerusuttarnertik tamatumunngalu pisinnaatitaaffeqarnertik. Allanit aqunneqarusunnatillu immikkuullarinniartarput. Ilisimassavarpulli Jehovatut isiginnittaaseqarneq nammineerluni eqqarsarsinnaannginnermik isumaqanngimmat. 2 Korinthimiut 3:17-imi allaqqavoq: “[Naalakkap] anersaavata najuuffigisaaniippoq kiffaanngissuseq.” Nammineerluta pissuseqarnissatsinnut Jehovap kiffaanngissuseqartippaatigut. Nammineq nuannarisaqarsinnaallutalu suut soqutigisarissanerlutigit aalajangersinnaavarput. Jehovap taamatut pinngortippaatigut. Imaanngilarli killeqanngitsumik kiffaanngissuseqartugut. (1 Petr 2:16) Suna eqqortuunersoq eqqunngitsuunersorlu paasiniaraangatsigu Biibilimit siulersorneqarnissarput Jehovap kissaatigaa. w18.11 qupp. 22 § 5-6

Sallusuissut ilikkaratsigu Jehovamut kiffartorneq nunap piininngarnit pingaarnerusoq paasivarput, pigisallu uagutsinnut pingaannginnerulerput. Piffissalli ingerlanerani inuit atortorissaarutinik elektroniskiusunik nutaanerpaanik allanilluunniit pisaartorsimasut takusaratsigit immaqa amigaateqartutut misigilerpugut. Pigisavut nalerisimaarutigiunnaarlugit Jehovamut kiffartorneq tunulliullugu nunap pii pingaarnerutilersinnaavavut. Tamanna Demasimik eqqaasinneqaatigaarput. Taassuma “silarsuaq manna” nuannaringaaramiuk imminut apustilimullu Paulusimut suliassiissutigineqartoq qimappaa. Immaqa Demasip nunap pii Jehovamut kiffartornermit nuannarineruai. Immaqaluunniit Paulusimik kiffartoqateqarnermini pilliuteqarusukkunnaarpoq. Suna ilinniutissartaraa? Immaqa siornatigut pigisaqarusuppallaarnikuusimavugut. Mianersunngikkutta taamaaleqqissinnaavugut allaallu sallusuissut nuannariunnaarlugu. w18.11 qupp. 12 § 9

Saatanip sallunera ajoqusiiniarluni mamarliineruvoq, nalunngilaami Evap upperalunilu orpiup paarnaanik neriguni toqussasoq. Taamatorpiarlu pisoqarpoq. Eva Adamilu Jehovap peqqussutaanut naalanngipput kingusinnerusukkullu toqullutik. (1 Mos 3:6; 5:5) Tamannaannaanngilarli, Adami ajortuliormat “toqu inunnut tamanut annguppoq”. Tassami “toqu ... naalagaavoq Adamip unioqqutitsinerata assinganik ajortuliorsimanngikkaluartunut”. (Rom 5:12, 14) Taamaammat naammalluinnanngitsuullutalu Guutip siunertarisaatut naassaanngitsumik inuuneq ajorpugut. “[Ukiulli] inuuffigisassavut 70-iusinnaapput imaluunniit 80-it, nukissaqassagutta” inuunerlu ‘naalliunnartunik ajunaarnernillu’ ulikkaartarpoq. (Tuss 90:10) Tamakku tamarmik pipput Saatanip salluliornera pissutaalluni! Saatani pillugu Jiisusi oqarpoq: “Sallusuissummiinngilaq, taassuminnga ilumiugisaqannginnami.” (Joh 8:44) Saatani allanngorsimanngilaq. Suli tassaavoq “silarsuarmik tamarmik tammartitsiniartoq”. (Saqq 12:9) Saatanimit uukapaatinneqarusunngilagut. w18.10 qupp. 3-4 § 1-4

Allanik eqqisseqateqarniarluta iliuuseqaqqaartuugaangatta pilluarsinnaavugut. Ajoqersugaq Jaaku ima allappoq: “Iluarneq eqqissinermi siaruartikkat inerititaraat, eqqissisitsisullu pisassaraat.” (Jaak 3:18) Taamaammat ilagiinni ilaquttanniluunniit arlaat isumaqatigiinngissuteqarfigigaangakku eqqisseqatigiissitsisuunissannik ikioqqullutit Jehova kimigiiserfigisaruk. Taava Jehovap anersaaminik illernartumik tunissavaatit, kristumiutullu pissuserineqartussanik ersersitsinissamut iluaqutigissavat nuannaarnerulissaatillu. Eqqisseqateqarniarluni iliuuseqaqqaartuunissap pingaaruteqassusia ersersinniarlugu Jiisusi oqarpoq: “Taamaattumik tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, taava tunissutissat pilliivimmut qimallugu qatanngutit saammaakkiartoqqaarallaak [eqqisseqatigiartoqqaarallaak, NW], taavalu aatsaat kingorna tunissutissat pilliutigiartorlugu.” – Matt 5:23, 24. w18.09 qupp. 19 § 17

Ajoqersukkani naggammik unnussioqatigigamigit Jiisusip asanninneq 30-t pallillugit eqqaavaa. Ajoqersukkani oqarfigai ‘asaqatigiissasut’. (Joh 15:12, 17) Asanninnerat ima maluginiarnartigissaaq Kristusip ajoqersugaatut ilumoortutut ilisarnaatigilissallugu. (Joh 13:35) Asanninneq Jiisusip eqqaasaa misigissusiinnaanngilaq; imminut pilliutigeriaannaanermik pissusiuvoq. Jiisusi oqarpoq: “Annerusumik asanninneqanngilaq ikinngutini pillugit inuunerminik akiginnittup asanninneranit. Inassutikka malillugit iliorussi tassaassaasi ikinngutikka.” (Joh 15:13, 14) Nalitsinni Jehovap kiffai ilumoortumik imminullu pilliutigeriaannaasumik asanninnertik ataasiussuseqarluarnertillu ilisimaneqaatigaat. (1 Joh 3:10, 11) Inuiaassuserput, naggueqatigiissuserput, qanoq oqaaseqarnersugut, suminngaanneernersugut qanorluunniit tunuliaqutaqarnersugut apeqqutaanngilaq. Nunarsuaq tamakkerlugu Jehovap kiffai ilumoorlutik imminnut asaqatigiipput. w18.09 qupp. 8 § 1-2

Ilaquttatsinnik isumassuinissarput Jehovap piumasaraa. Assersuutigalugu ilaquttannik pilersuiniarlutit aningaasarsiortariaqarsinnaavutit. Anaanarpassuit meeqqatik mikisut paariniarlugit angerlarsimasarput. Angajoqqaavullu imminut paarisinnaajunnaarpata imaassinnaavoq isumagisariaqarivut. Isumagisassat tamakku pisariaqarput. Ilaquttannik akisussaaffeqaruit imaassinnaavoq kissaatigisattut Jehovamut iliuuseqartigisinnaanngitsutit. Nikalloqinalli! Ilaquttannik pilersuinerit Jehovap iluarisarpaa. (1 Kor 10:31) Ilaquttannut tunngatillugu annertuunik akisussaaffeqanngikkuit uppeqatit napparsimasut, utoqqaat imaluunniit allanik pisariaqartitallit ikiorsinnaavigit? Allalluunniit taakkuninnga isumassuisut ikiorsinnaavigit? Ilagiinni taamatut ikiorneqarnissaminnik pisariaqartitsisut eqqumaffigisakkit. Taamaalioruit imaassinnaavoq qinunermik akisinerani Jehova suleqatigigit. – 1 Kor 10:24. w18.08 qupp. 22 § 3, 5

Jaakup ernerminik tamanik Josefi nuannarinerpaavaa. Tamanna pissutigalugu qatanngutaasa taanna sinngagingaarpaat. Josefi 17-inik ukioqartoq inussiaatissatut tunivaat. (1 Mos 37:2-4, 23-28) Ukiut 13-it missaanni Egyptenimi atugarliortitaavoq, siullermik inussiaataalluni kingornalu parnaarussaalluni. Josefi ataataminit asangaakkaminit ungaseqaaq. Pissutsini atulikkaminit neriuutaarulluinnarlunilu kamassimasinnaagaluarpoq, taamaattoqanngilarli. Suna iluaqutigigamiuk? Josefi parnaarussivimmi atugarliortitaanermini Jehovamit ikiorneqartarnini eqqarsaatigisarsimassavaa. (1 Mos 39:21; Tuss 105:17-19) Aamma inuusunnerulluni siulittuutaasunik sinnattortitaasarsimanini eqqaasimassagunarpai Jehovamillu najorneqarnini qularutiginagu. (1 Mos 37:5-11) Jehovamut qinukulasarsimassaaq uummammiuminillu tamanik oqaluttuullugu. (Tuss 145:18) Jehovallu qanoq pisoqassagaluarpalluunniit Josefi ‘najorniarlugu’ qularunnaarsippaa. w18.10 qupp. 23 § 3-4

Pigisatigut pisuussutit isiginnittaatsitsinnut sunniuteqarsinnaapput. Allat pisuujunerat piitsuuneralluunniit qanoq isiginnittaatsitsinnut sunniuteqarsinnaagami? Salomop isumassarsisitaalluni ajoraluartumik ilumoortoq ullormut allassimaffimmi allassimasoq allappaa. Ussammit suna ilikkarparput? Mianersunngikkutta qatanngutit piitsut pinnagit pisuut ikinngutigerusulersinnaavavut. Allat pigisaat piginngisaalluunniit tunngavigalugit eqqartuussinissaq sooq taama navianaateqartigaa? Ilagiinni avissaartuutsitsilersinnaagatta. Kristumiut siulliit ilagiivisa ilaanni taama pisoqarmat Jaakup taakku tamanna pillugu mianersoqquai. (Jaak 2:1-4) Ilagiinni avissaartuuttoqarnissaa akuersaanngisaannassavarput allallu pigisaat tunngavigalugit eqqartuunnaveersaarlugit. w18.08 qupp. 11-12 § 8-10

Jehovap ikinngutiginerata qujamasuutiginera qatanngutitsinnut pissusilersoriaatsitsinnit ersertarpoq. Taakku aamma Jehovap pigai. Tamanna eqqaamagutsigu inussiarnersumik asannittumillu pisassavavut. (1 Th 5:15) Jiisusimmi ajoqersukkani ima oqarfigai: “Asaqatigiikkussi tamatumuuna tamarmik paasissavaat ajoqersugarigissi.” (Joh 13:35) Malaki allappoq Jehovap innuttami imminnut qanoq oqaluuttarlutillu pisarnerat eqqumaffigalugulu ‘naalaaqqissaartaraa’. (Mal 3:16) Jehovap “pigisani ilisimavai”. (2 Tim 2:19) Iliuutsivut oqaatsivullu tamaasa nalunngilluinnarpai. (Hebr 4:13) Qatanngutitsinnut inussiarniikkaangatta Jehovap maluginiartarpaa. Ilimagilluinnarsinnaavarpulli inoroorsaarnerput, tukkornerput, isumakkeerfiginninnerput inussiarnernerpullu aamma maluginiartarai. – Hebr 13:16. w18.07 qupp. 24 § 15; qupp. 25 § 17

Jehovamut qanittuarneq silatusaarneruvoq. Taanna tamanit pissaaneqarnerpaallunilu ilisimassuseqarnerpaallunilu asanninnerpaavoq! Soorunami ilumoorfigiuarusullugulu naalattuarusupparput. (Tuss 96:4-6) Guutimilli pallorfiginnittut ilaat aalajaakkunnaarsimapput. Kaini eqqarsaatigiuk. Guutipilunnik pallorfiginninngilaq, taassumali pallorfiginninnera Jehovap akuerinngilaa. Sooq? Jehovap takusinnaagamiuk Kainip uummataa ajortunngoriartortoq. (1 Joh 3:12) Jehovap Kaini ima mianersoqquaa: “Ajunngitsulioruit nakimanak niaqqut makitissimasinnaavat, ajunngitsuliunngikkuilli ajorti matup killingani qamavoq. Pilerigigaluarpaatit, illilli taassumunnga naalagaassaatit.” (1 Mos 4:6, 7) Jehovap erseqqissumik oqaatigaa Kainip peqqissimilluni naalappani tapersersussallugu. Kainilli Guuti tusarnaanngilaa. w18.07 qupp. 15 § 1, 3; qupp. 16 § 4

Oqaluussineq ajoqersuganngortitsiortornerlu qaamanermik qaamatitseriaasiupput pingaarutillit. (Matt 28:19, 20) Tamatuma saniatigut pissusilersornerput Jehovamut naalannaataassaaq. Oqaluussigaangatta inuppassuarnit maluginiarneqartarpugut. Qungujulluta ilassigaangatsigit uagut pilluta Guutilu pallorfigisarput pillugu ajunngitsumik eqqarsalertarput. Jiisusip ajoqersukkani ima peqquai: “Illumut iseraangassi eqqisseqqusisaritsi.” (Matt 10:12) Sumiiffimmi Jiisusip oqaluussiffigisaani ileqquuvoq inunnik ilisarisimanngisanik angerlarsimaffimmut iseqqusisarneq. Ullumikkut sumiiffiit ilarpassuini tamanna nalinginnaajunnaarnikuuvoq. Inuit nalusaminnik silatiminniittoqaraangat eqqissisimajunnaartarput paamisuttarlutilluunniit. Inussiarnisaaruttali qasukkarsimaarnerulersinnaapput. Angallattakkamik atuagaasivilisarlutit oqaluussininni maluginiarnikuuiuk inuit qungujullutit ilassigaangakkit atuagassaminnik tigusinissaminnut ittuunnginnerusartut? w18.06 qupp. 22 § 4-5

Petrusip juutit kisiisa peqatigisarpai. Taava Guutip kristumiut kinaassusersiortuussanngitsut erseqqissarmagu Petrusi Corneliusimut, Romamiut sakkutuuanut, oqaluussivoq. (ApS 10:28, 35) Tamatuma kingorna Petrusip kristumiut juutiunngitsut peqatigisalerlugillu nereqatigisalerpai. Ukiulli arlallit tamatuma kingorna illoqarfimmi Antiokiami kristumiut juutiunngitsut nereqatigisarunnaarpai. (Gal 2:11-14) Paulusip Petrusi naqqippaa, Petrusillu naqqinneqarnini akueraa. Tamanna qanoq nalunngilarput? Petrusip kristumiunut juutiusunut juutiunngitsunullu Asiaaqqamiittunut allakkamini siullerni qatanngutinik tamanik asanninnissap qanoq pingaaruteqartiginera eqqartorpaa. (1 Petr 1:1; 2:17) Erseqqippoq Jiisusip maligassiaa pissutigalugu apustilit ‘inunnik tamanik’ asanninnissaq ilikkarsimagaat. (Joh 12:32; 1 Tim 4:10) Ilikkarumaataaraluarlutik inunnut isiginnittaatsiminnik allannguipput. Kristumiut taakku inuttut pissuseq nutaaq atigamikku inuit tamarmik naligiissutut, Guutip isiginnittaasiatut, isigilerpaat. – Kol 3:9-11. w18.06 qupp. 13 § 15-16

Romamiut sakkutuuata saattuaasaa saviminernik sanimukartunik sakissamut naammattunngorlugu sukanneqartartunik sananeqartarpoq. Savimerngit iluamik inissisimanersut misissukulaarneqartariaqartarput uummat erlaviillu illersorneqartariaqassammata. Jehovap najoqqutassiai iluartut, imaluunniit naapertuilluartut – ‘uummatitsinnik’, tassa ilukkut kinaassutsitsinnik – illersuisartut saattuaasamut assersuunneqarsinnaapput. (Uss 4:23) Sakkutuup saattuaasani savimineq arlaannik ninnguinnerusumik taarsernavianngilaa. Taamatuttaaq Jehovap suut eqqortuunerannut najoqqutassiai uagut eqqortuusorisatsinnik taarsernavianngilagut. Uummatitta illersornissaanut ilisimassuserput amigarpoq. (Uss 3:5, 6) Taamaattumik uummaterput ‘saattuaasamit’ illersorneqarnersoq misissukulasariaqarparput. Guutip oqaasiani sallusuissutit nuannarinerulerutsigit Guutip najoqqutassiaasa maleruarnissaat, imaluunniit ‘saattuaasap’ atornissaa, ajornannginnerulissaaq. – Tuss 111:7, 8; 1 Joh 5:3. w18.05 qupp. 22 § 3-4, 6; qupp. 23 § 7

Mosesi ukiorpassuarni namminissarsiorani siulersuigaluartoq inuiaqatigiit imissaaleqinertik piinnarnagu aamma Mosesi, qilannerminnut pisuutillugu naammagittaalliuutigilerpaat. (4 Mos 20:1-5, 9-11) Mosesi kamangaarami saamasumik pissuseqarunnaarpoq. Upperluni qaarsumut oqalunnissamik Jehovamit peqquneqaraluarluni Mosesi narrutsaqqalluni inuit oqarfigai tupinnartuliorniarluni. Taava qaarsoq marloriarluni anaammagu imeq tissalulerpoq. Makitalerami kamalerlunilu ingasattumik ajortuliorpoq. (Tuss 106:32, 33) Maniguukkunnaatallannini pillugu Mosesi nunamut neriorsuutigisamut iseqqusaajunnaarpoq. (4 Mos 20:12) Pisoq taanna pingaarutilimmik ilinniarfigaarput. Siullertut, maniguuttumik isiginnittaaseqartuarnissarput sulissutigiuartariaqarparput. Maniguukkunnaarutta makitalerlutalu sianiitsorpallattumik oqalulersinnaallutalu iliuuseqalersinnaavugut. Aappaattut, nanertisimanerput sanngiillissutigisinnaagatsigu, allaat tatineqarnermi, maniguunniartariaqarpugut. w19.02 qupp. 12-13 § 19-21

Oqaluussisarnerput uagutsinnut nanertuutaava? Naamerluinnaq. Jiisusip viinnequt pillugu assersuusioreerluni eqqaavaa oqaluussigaangatta tipaatsunnera misigisassagipput. (Joh 15:11) Tamanna qanoq pisinnaagami? Jiisusip assersuusiamini imminut viinneqummut ajoqersukkanilu avalequtinut assersuuppai. (Joh 15:5) Avalequtit viinneqummut aatsaat atajuarunik qilalernatillu toquliussanngillat. Taamatuttaaq aatsaat Jiisusimut atajuarutta tumaalu maleqqissaarutsigit taassumatut nuannaarsinnaavugut. Taava Guutip piumasaatut iliornermi nuannaarneq misigisaa aamma misigissavarput. (Joh 4:34; 17:13; 1 Petr 2:21) Hanne ukiut 40-t sinnerlugit pioneriusoq oqarpoq: “Oqaluussinerup kingorna nuannaarneq misigisartagara Jehovamut kiffartortuarnissannut kajumississutigisarpara.” Naak inuit amerlanerit tusarnaarusunngikkaluartut nuannaarneq oqaluussiuarnissatsinnut nakussatsissutigisinnaavarput. – Matt 5:10-12. w18.05 qupp. 9 § 2; qupp. 13 § 14

Apustili Paulusi qatanngutinik qiimmassaanermut tunngatillugu maligassaalluarpoq. Anersaap illernartup Paulusi grækerinut, Romamiunut allanullu guuterpassuarnik pallorfiginnittunut aallartippaa. (Gal 2:7-9) Paulusi nunami maanna Tyrkiamik taaneqartartumi aamma Grækenlandimi Italiamilu angalavoq juutiunngitsunut oqaluussillunilu kristumiut ilagiivinik pilersitsisarluni. Kristumiunngorlaat inuunerat imaannaanngilaq. Nunaqqatiminnit malersorneqaramik qiimmassarneqartariaqarput. (1 Th 2:14) Ukiup 50-ip missaani Paulusip Thessalonikami ilagiit pilersinneqaqqammersut qiimmassarniarlugit ima allaffigai: “Tamassi Guutimut qujassutigisaannarpassi qinulluta taagaangassi kipisuitsumillu ... eqqaaniartarlugit uppernermi suliasi, asanninnermi assoroornersi nikallujuinnersilu.” (1 Th 1:2, 3) Aamma imminnut nakussatsittaqquai ima allaffigalugit: “Tuppallersaqatigiigitsi ineriartorteqatigiigitsilu.” – 1 Th 5:11. w18.04 qupp. 19-20 § 16-17

Inuusuttoq Jehovamit iluarisaanissaminik aallussisoq oqaluussinermik pingaartitsisarpoq. Oqaluussineq nukinginnarmat inuunitsinni pingaarnerpaatitatta ilagisariaqarpaat. Oqaluusseqataanerunissat anguniagarisinnaaviuk? Pionerinngorsinnaavit? Taavami oqaluussineq nuannarerpianngikkukku? Aamma upperisannik qanoq nassuiaallaqqinnerulersinnaavit? Tunngaviusut marluk iluaqutigissavatit: Piareersarluarneq ilisimasavillu ingerlateqqinnissaannut tunngatillugu tunniutiinnannginneq. Oqaluussineq qanoq nuannaritigilernerlugu immaqa tupaallaatigissavat. Atuaqativit apeqqutigisinnaasaasa akinissaannut piareersarneq aallartissutigisinnaavat, immaqa ima aperisinnaapput: “Sooq Guuti upperaajuk?” Nittartakkatsinni jw.org-imi apeqqutip tamatuma akinissaanut iluaqutissannik allaaserisaqarpoq. Immersugassaq ima qulequtalik nassaarisinnaavat: “Sooq Guuti upperaara?” Immersugassaq taanna qanoq akinissannik piareersarninni iluaqutigisinnaavat. w18.04 qupp. 29-30 § 10-11

Adami Evalu annertuumik kiffaanngissuseqaraluarlutik kiffaanngissusiat killeqarpoq. Killiliissutit ilaat taakkua pissusissamisoortutut isigaat. Assersuutigalugu inuuinnarumallutik anersaartortariaqarlutillu nerisariaqarlutillu sinittariaqarput. Kiffaanngissuseqanngitsutulli misigippat? Naamik, taamaaliornermikkut pillualernissaat nalerisimaalernissaallu Jehovap isumagaa. (Tuss 104:14, 15; Oqal 3:12, 13) Jehovap Adami Evalu paatsuugassaanngitsumik peqquai nunarsuaq qitornaminnik ulikkaaqqullugu isumageqqullugulu. Peqqussut tamanna kiffaanngissuseerussutigaat? Naamerluinnaq! Tamanna pissutigalugu nunarsuup paratiisinngortinnissaanut, inuiannut naammalluinnartunut qaqugorsuarmut angerlarsimaffinngortinnissaanut, periarfissaqalerput. Tamanna Guutip siunertarivaa. (Tuss 127:3; Es 45:18) Adamip Evallu Jehova naalassimasuugunikku aappariinnertik ilaqutariinnertillu naassaanngitsumik nuannaarutigisimassagaluarpaat. w18.04 qupp. 4-5 § 7-8

Inuit oqaluussiffigisavut erinitsajuiffigigutsigit Biibilimi sallusuissutit tusaannarlugit ingerlaannaq paasinnissasut akuerinnissasullu ilimagissanngilarput. Assersuutigalugu nunami paratiisiusumi naassaanngitsumik inuulersinnaanermik neriuut qanoq tunngavilersorsinnaagipput eqqarsaatigiuk. Inuppassuit isumaqarput toqusimasut inooqqissinnaanngitsut, imaluunniit inuit ajunngitsut tamarmik qilaliassasut. Qatanngutip angutip periuseq sunniuteqarluartoq oqaluttuaraa. Siullertut Mosesimik allakkat siulliit 1:28 atuartarpaa. Taava pulaakkani ima aperisarpaa: “Guutip inuit sumi pissutsinilu qanoq ittuni inuunissaat siunertaraa?” Amerlanerit akisarput: “Nunarsuarmi, pissutsini nuannersuni.” Taava Esaja 55:11 atuartarpaa aperalunilu Guutip siunertaa allanngorsimanersoq. Pulaakkallu naaggaartarput. Naggasiullugu Tussiaat 37:10, 11 atuartarpai aperalunilu inuit siunissaat pillugu qanoq allassimasoqarnersoq. Biibili atorlugu taama tunngavilersuinermini inuppassuit paasitissimavai Guutip inuit ajunngitsut nunarsuarmi paratiisiusumi naassaanngitsumik inuunissaat suli kissaatigigaa. w19.03 qupp. 24 § 14-15; qupp. 25 § 19

Jehovap erseqqissarpaa kissaatigalugu ernermi oqaasii tusarnaarlugillu maleruassagivut. Jiisusip ajoqersukkani nutaarsiassamik nuannersumik qanoq oqaluussisinnaanerannik asannilluni ilinniartippai eqqaasittaqattaarlugillu eqqumajuaqqullugit. (Matt 24:42; 28:19, 20) Aamma ‘ilungersoqquai’ pinertusaartuarnissaannillu kajumissaarlugit. (Luk 13:24) Ajoqersukkami asaqatigiittariaqarnerat, ataasioqatigiittariaqarnerat inassutiminillu maleruaasariaqarnerat Jiisusip ilinniartitsissutigaa. (Joh 15:10, 12, 13) Siunnersuutai aamma nalitsinni atorluarneqarsinnaapput. Jiisusi ima oqarpoq: “Sallusuissummit pisup kialluunniit nipiga tusartarpaa.” (Joh 18:37) ‘Kamageqatigiilluta isumakkeerfigeqatigiikkaangatta’ uppernarsartarparput Jiisusip nipaa tusarnaarlutigu. (Kol 3:13; Luk 17:3, 4) Aamma “qanoq ilisukkulluunniit” aallussilluarluta oqaluussisarnikkut nipaanut tusarnaarnerput ersersittarparput. – 2 Tim 4:2. w19.03 qupp. 10 § 9-10