Maaji

Jiisusi ilisarisimaler­nias­sagatsigu Jehovap asan­nil­luni iivangkiiliut sisamat allatsip­pai. Jiisusip inuunera kif­far­tor­neralu iivangkiiliuni oqalut­tuarineqar­put. Taak­kunani Jiisusip oqaasii, iliuusii misigis­susiilu allaatigineqar­put. Taakku iluaqutigalugit Jiisusip maligas­siuinera ‘eqqarsaatigisin­naavar­put’. Iivangkiiliuni atuaraangatta Jiisusip tumai isigisar­pagul­lusooq. Taak­kua atuaq­qis­saar­nerisigut Jiisusimik ilisarisiman­nin­nerujar­tus­saagut taamaalil­lutalu tumai atuarsin­naalis­sal­lugit. Iivangkiiliut iluaqutigil­luas­sagutsigit atuapal­laan­nar­nagit atuaq­qis­saarlugillu eqqarsaatigeq­qis­saar­tariaqar­pagut. (Jos 1:8) Takorlooruk pisimasut takusin­naal­lugit, tusaasin­naal­lugit misigisin­naal­lugillu. Jehovap peqatigiis­sor­taasa atuaq­qis­saarutaanni misis­sueq­qis­saarit. w21.04 4-5 § 11-13

Jiisusip inun­ngor­nis­saa sioq­quterujus­suarlugu Jehovap oqaatsimini allaatsip­paa Mis­siarsi sølvinik 30-nik kil­luutigineqas­sasoq. (Zak 11:12, 13) Siulit­tuutigineqar­poq Jiisusi ikin­ngutiminit kil­luutigisaas­sasoq. (Tuss 41:10) Aamma pruf­fiiti Zakaria ima allap­poq: “Paarsisoq persut­taruk savat paarisai siam­mar­til­lugit.” (Zak 13:7) Inuit eqqor­tuliorusut­tut pisimasut tamakku naak­kius­sutiginagit siulit­tuutit Jiisusimut eqquun­nerat upper­nik­kut nakus­satsis­sutigisus­saavaat. Aamma nalitsinni Nalunaajaasut ilisimaneqarluar­tut ilaat sal­lusuis­sut qimal­lugu tunus­sisun­ngorsimap­put allanillu tunus­sisun­ngor­titsiniaasarlutik. Jehovap Nalunaajaasui pil­lugit tusagas­siuutitigut inter­netik­kullu oqalut­tuat nuan­niitsut, tam­mar­titsiniutit sal­luliuutillu siam­mar­ter­tar­paat. Inuilli eqqor­tuliorusut­tut tam­mar­tin­neqar­neq ajor­put, nalun­ngilaammi taamaat­toqar­tarumaar­nera Biibilimi siulit­tuutigineqar­toq. – Mat 24:24; Pet 2. 2:18-22. w21.05 11 § 12; 12-13 § 18-19

Biibilimi allas­simavoq pif­fis­sap ingerlanerani eqqorluar­nerusumik ilisimasaqalis­sasugut. (Kol 1:9, 10) Jehovap ilumoor­toq tamaat ataatsik­kut paasitin­ngilaa, uagullu ilumoor­tup qaam­maris­siar­tuler­neranut utaq­qisin­naas­suseqar­tariaqar­pugut. Siulersuisoqatigiit paasin­nit­taatsitsin­nik iliuuserisar­tak­katsin­nil­luun­niit allan­nguisariaqar­ner­put paasigaangamikku ingerlaan­naq aaq­qiisar­put. Upperisarsioqatigiit kristumiuunerar­tut allan­nguigaangamik ilaasor­tamin­nit silarsuarmil­luun­niit iluarineqarumal­lutik taamaalior­tar­put, Jehovalli peqatigiis­sor­tai allan­nguigaangamik Guutimut qanil­linerujumal­lutik Jiisusillu guutisior­nermut najoq­qutas­siaa maleruarluar­nerujumal­lugu taamaalior­tar­put. (Jaak 4:4) Imaan­ngilaq silarsuarmi inuit isumaat pis­sutigalugit allan­nguisar­tugut, Biibilimilli paasin­nin­neruler­ner­put pis­sutigalugu taamaalior­tar­pugut. Ilumoor­toq nuan­naraar­put! – Tes 1. 2:3, 4. w21.10 22 § 12

Kiserlioruit qanoq iliorsin­naavit? Jehovap ilin­nik anner­toq­qusersuisar­nera eqqarsaatigisaruk. (Tuss 55:23) Tamanna kiserlior­tutut misigin­ngin­nis­san­nut iluaqutigis­savat. Aamma uppeqatitsin­nik kiserlior­tunik Jehovap ikiuisar­nera eqqarsaatigisaruk. (Pet 1. 5:9, 10) Hiroshi, ukior­pas­suarni ilaqut­tamini kisimi Nalunaajaasuusimasoq, ima oqar­poq: “Tamatta Jehova sapin­ngisatsin­nik kif­far­tuup­par­put, taman­nalu ilaqut­taminni kisimiil­lutik Nalunaajaasuusunut tup­pal­ler­nar­tar­poq.” Aamma anersaak­kut ileq­qulius­satit ajun­ngitsut aal­lut­tuak­kit. Tassa qanor­piaq misiginin­nik Jehova oqalut­tuut­tas­savat. Biibilip ullut tamaasa atuar­tar­nis­saa, allas­simaf­fiillu Jehovap ilin­nik asan­nin­neranik ersersitsisut eqqarsaatigeq­qis­saar­tar­nis­saat pingaaruteqar­poq. Kristumiut ilaasa allas­simaf­fiit immik­kut tup­pal­lersaatigisar­tak­katik, soorlu Tus­siaat 27:10 aamma Esaja 41:10, alan­ngaar­talersimavaat. Allat immius­sanik tusar­naaraangamik kiserliorun­naamisar­put. w21.06 9-10 § 5-8

Asasan­nik toquk­kut annaasaqar­nikuuit? Toqusunit makititaasut pil­lugit oqalut­tuat Biibilimeersut atuar­tar­nerisigut makititaanis­samik neriuutit nakus­satsiguk. Ilaqut­tavit ilaata ilagiin­nut ilaajun­naarsin­neqarsimanera pis­sutigalugu aliasup­pit? Guutip perorsaatis­siisar­nerata pitsaaner­paajuar­nera upperil­luin­nalerumal­lugu atuaq­qis­saar­tarit. Ajor­nar­torsiutit suugaluar­pataluun­niit upper­nik­kut nakus­satsis­sutiginis­saan­nut periarfis­satut isigisak­kit. Uum­mam­miutit Jehovamut aniatit­tak­kit. Kisimiin­niar­pal­laar­nak uppeqatitit qanit­tumik attaveqarfigisak­kit. (Uss 18:1) Piner­tusaar­nis­san­nut iluaqutigisin­naasan­nik iliuuseqar­tarit, qiaatigalutil­luun­niit taamaalior­tariaqaraluaruit. (Tuss 126:5, 6) Anersaak­kut iliuuserisar­tak­katit, tassa ataatsimiigiar­tar­nerit, oqaluus­sisar­nerit Biibilimillu atuar­tar­nerit, unitseqinagit. Siunis­samilu Jehovamit pil­luaq­quneqangaar­nis­sat eqqarsaatigiuaruk. Jehovamit ikior­neqar­tar­nitit maluginiar­taruk­kit tatiginerulis­savat. w21.11 23 § 11; 24 § 17

Jiisusip ajoqersugai qanoq ‘min­nin­nguatut’ ippat? Eqqarsaatigiuk Saatanip silarsuaani kik­kut pingaar­tin­neqar­tar­tut. Tassa pisuut, tusaamasat pis­saanil­lillu. Jiisusilli ajoqersugai amerlanerit taamaat­tuun­ngin­namik ‘min­nin­nguatut’ isigineqar­tar­put. (Kor 1. 1:26-29) Jehovalli taamatut isigin­ngilai. Sooq Jiisusip “min­nin­nguit” eqqar­tor­pai? Taamaalior­poq ajoqersuk­kaminit ima aperineqarami: “Kina qilaap kun­ngeqarfiani anner­paava?” (Mat 18:1) Jiisusip nalaani juuter­pas­suit allanit pingaar­tin­neqarusup­put. Taakku pil­lugit Biibilimik ilisimatooq ima allap­poq: “Allanit ataq­qineqar­neq tusaamasaanerlu inuunerminni pingaar­ner­paatip­paat.” Jiisusip nalun­ngilaa juutit akor­nanni unam­mil­ler­neq nalingin­naasuusoq ajoqersuk­kallu allan­nguiniarlutik ilungersor­tariaqar­tut. w21.06 20 § 2; 21 § 6, 8-9

Apustili Paulusi utoq­qaaner­tanut maligas­saal­luar­poq. Assersuutigalugu qatan­ngutit Tes­saluunikamiut siun­nersor­neqar­nis­samik pisariaqar­titsigaangata siun­nersor­tar­pai. Taak­kunun­ngali allak­kamini aalajaal­lutik asan­nil­lutillu kif­far­tor­nerat piner­tusaar­nerallu allaatigeq­qaar­pai. Aamma pis­sutsit atugaat eqqarsaatigalugit allaf­figai nalunagu inuunerat imaan­naan­ngitsuusoq malersugaanermin­nilu piner­tusaar­tut. (Tes 1. 1:3; Tes 2. 1:4) Allaat kristumiunut allanut maligas­saal­luar­nerar­pai. (Tes 1. 1:8, 9) Paulusimit nersualaar­neqar­ner­tik nuan­naarutigisimas­saqaat! Paulusip uppeqatiminut asan­nin­nera ersareqaaq. Asan­nin­nini pis­sutigalugu Tes­saluunikamiunut allak­kamini marlunni siun­nersuil­luarsin­naavoq. – Tes 1. 4:1, 3-5, 11; Tes 2. 3:11, 12. w22.02 15 § 6

Saatanip upperisarsior­nik­kut siut­tut atorlugit inuit isumaqalersin­niar­tar­pai Jehova peq­qar­niitsuul­lunilu naal­liuutinut pisuusoq. Allaat meeq­qat toqugaangata oqar­toqar­tar­poq Guuti inngilinik pisariaqar­titsigami qilaliar­tik­kai! Ila Jehovamut nikanarsaataangaas­susia! Uagulli nalun­ngilar­put Jehova asan­nit­tuusoq. Nap­parsimaleraangatta toqusooraangat­taluun­niit pisuutin­neq ajor­par­put, upperil­luin­nar­par­pulli ajor­tut tamaasa atuuk­kun­naarsik­kumaarai. Jehovap asan­nit­tuunera tusar­naarumasunut tamanut tul­luusimaarluta oqalut­tuarerusup­par­put. Taamaalior­ner­put Jehovap mital­lersiminut akis­sutitut atorluar­tar­paa. (Uss 27:11) Jehova Guutiuvoq misigin­neqataasoq. Malersor­neqar­neq, nap­parsimaneq naam­mal­luin­nan­ngitsuuner­pullu ilaatigut pis­sutigalugit naal­liuk­kaangatta aliasungaar­tar­poq. (Tuss 22:24, 25) Anniaatigut anniaatigisar­pai, taamatullu atugaqar­nis­sar­put kis­saatigin­ngin­namiuk atuuk­kun­naarsik­kumaar­pai. – Naleq­qiuk­kit Mosesimik 2. 3:7, 8; Es 63:9; Zak 2:12. w21.07 10 § 9-10

Qanit­tuk­kut inuit naalat­tut Jehovamik naas­saan­ngitsumik asan­nis­sin­naaner­tik guutisiorsin­naaner­tillu ataq­qinaatigilis­savaat. Adamip Evallu Jehovap ilaqutaariis­sor­taanit qimagun­nerat pis­sutaal­luni pis­sutsit ajor­tun­ngorsimasut Jiisusip atuuk­kun­naarsis­savai. Jehovap toqusimasut mil­lionil­lit makitis­savai nunarsuarmilu paratiisiusumi peq­qil­luin­narlutik naas­saan­ngitsumik inuunis­saan­nik periarfis­sil­lugit. (Luk 23:42, 43) Jehovamut kif­far­tor­tut nunarsuarmiit­tut naam­mal­luin­nar­tun­ngorunik Daavip allaatigisaatut tamarmik immik­kut ‘naalan­naat ataq­qinaal­lu’ ersersis­sin­naalis­savaat. ‘Inup­pas­suar­nut’ ilaaguit nuan­ningaar­tumik neriuuteqar­putit. (Saqq 7:9) Guutip asal­lutillu ilaqutariis­sor­taminut ilaatik­kusup­paatit. Taamaat­tumik sapin­ngisan­nik nuan­naar­tin­niar­tuaruk. Ullut tamaasa Guutip neriorsuutai eqqarsaatigisak­kit. Ataatatta qilam­miusup asasatta guutisiorfigisin­naanera qujamasuutigalugulu naas­saan­ngitsumik unnersiutigisin­naanera pingaar­tiguk! w21.08 7 § 18-19

Pruf­fiiti Jeremia ukior­pas­suarni tusar­naarusun­ngitsunut akerlilersuisunullu oqaluus­sisarsimavoq. Akerlilersuisunit ‘mitaatigineqar­nini’ nikal­lus­sutigingaaramiuk allaat suliamini uniin­narusuk­kaluar­poq. (Jer 20:8, 9) Uniin­nan­ngilarli! Nikal­lungajun­naarluni oqaluus­sinermini qanoq nuan­naaleq­qippa? Pingaarutil­lit marluk eqqaamaniarsarigamigit. Siul­ler­tut, oqariar­tuutimi Jehovameersup ‘siunis­saqar­titsil­lunilu neriuutis­saqar­titsinera’ eqqaamavaa. (Jer 29:11) Aap­paat­tut, Jehovamit oqariar­tor­titatut toq­qar­neqarsimanini eqqaamavaa. (Jer 15:16) Aamma uagut tusarlius­sar­put neriuuteqalersitsivoq, Jehovallu toq­qarsimavaatigut imminik nalunaajaasus­satut. Taakku eqqaamasarutsigit qanorluun­niit qisuariar­toqaraluar­pat oqaluus­sinitsinni nuan­naarsin­naavugut. Taamaat­tumik ilin­niar­titat neriuutigisat­tut siumukapal­lan­ngip­pat nikal­lorlutit uniin­naqinak. Ajoqersugan­ngor­titsior­tor­nermi naam­magit­tar­tariaqar­pugut. – Jaak 5:7, 8. w21.10 27 § 12-13

Qanorluun­niit sivisutigisumik Jehovamut kif­far­torsimagaluarutta upper­ner­put nakus­sas­sar­tuar­tariaqar­par­put. Sooq taamaappa? Mianersun­ngik­kutta upperun­naariar­torsin­naagatta. Eqqaamajuk upper­neq tas­saasoq takun­ngisamik qularuteqan­ngin­neq. Takusin­naan­ngisagut puigupal­las­sin­naasar­pagut. Paulusip upperun­naariar­tor­neq tas­saanerar­paa ‘ajor­tulior­neq uagutsin­nut nermutiasoq’. Taamaap­pat qanoq upperluar­tuujuarsin­naavugut? (Tes 2. 1:3) Siul­ler­tut, anersaaq iller­nar­toq Jehovamut qin­nutigikulasaruk. Sooq? Anersaaq iller­nar­toq iluaqutigalugu upper­nerulersin­naasaratta. (Gal 5:22, 23) Taamaat­tumik anersaaq iller­nar­toq Jehovamut qin­nutigiuar­tariaqar­par­put. (Luk 11:13) Allaal­lumi ‘upper­nermik annerusumik tuneq­qul­luta’ qinusin­naavugut. (Luk 17:5) Aap­paat­tut, Biibilimik misis­sueq­qis­saar­tar­neq ileq­quliuguk. – Tuss 1:2, 3. w21.08 18 § 16-18

Utoq­qaat sior­natigutulli nukis­saqar­tigin­ngik­kaluarlutik misilit­tagaqar­ner­tik pis­sutigalugu iluaqutaangaarsin­naap­put. Jehoval­lumi assigiin­ngitsor­pas­suar­nik sulias­saqar­tit­tuar­pai. Assersuutigalugu utoq­qalereer­nerminni allaat Jehovamut kif­far­tor­tut Biibilimi allaatigineqar­put. Taak­kua ilagaat Mosesi. Taanna pruf­fiititut kif­far­tulerami inuiaqatigiin­nullu Israelik­kun­nut siut­tun­ngor­tin­neqarami 80-it mis­saan­nik ukioqar­poq. Aamma Danieli 90-it sin­nerlugit ukioqalereeraluar­toq Jehovap pruf­fiitimisut kif­far­tor­tip­paa. Kiisalu apustilip Johan­nesip 90-it sin­nerlugit ukioqarluni Saq­qum­mersitat isumas­sarsitin­neqarluni allap­pai. Sim­miuut Biibilimi eqqaaneqar­pian­ngilaq, Jehovalli upperluar­tuunera maluginiar­paa immik­kullu ittumik misigisaqar­til­lugu. Taamaalil­luni Sim­miuup toqutin­nani Jiisusi naalungiarsuusoq takusin­naasimavaa, aamma Jiisusi anaanaalu pil­lugit siulit­tuisin­naatitaasimavoq. – Luk 2:22, 25-35. w21.09 3-4 § 5-7

Angajoq­qaat qitor­nar­tik meeq­qanut allanut sanil­liut­tas­san­ngilaat sapigaan­nil­luun­niit piumaf­figisar­nagu. Taamaalior­tarunimmi qitor­nar­tik nikal­lor­tis­sin­naavaat. (Ef 6:4) Qatan­ngut arnaq Sachikomik atilik ima oqar­poq: “Anaanama kis­saatigaa misilitsin­nermi kuk­kuneqan­ngil­luin­nas­sasunga, taman­nali ajor­nar­poq. Qangarsuarli atuarun­naareeraluarlunga ilaan­nik­kut suli eqqarsaatigisar­para sapin­ngisan­nik iliuuseqar­tar­nera Jehovap naam­magisar­neraa.” Kun­ngi Daavi oqar­poq ‘angisuumik imminut tupin­nar­pal­laar­tunik’ anguniagaqar­tar­nani. Maniguut­tuugami anneruniajuitsuugamilu ‘qasuersin­neqarlunilu eqqis­sisin­neqar­poq’. (Tuss 131:2) Daavip oqaasii taakku angajoq­qaat qanoq ilin­niarfigisin­naavaat? Angajoq­qaat imminut qitor­namin­nullu piumaf­figin­nin­nerminni maniguut­tuul­lutillu anneruniajuitsuusariaqar­put. Angajoq­qaat qitor­natik anguniagas­sik­kaangamik­kit nukit­tuf­fiisa san­ngiif­fiisalu eqqumaf­figinerisigut ikiorluarsin­naavaat. w21.07 21-22 § 5-6

Jehovap inuit tamaasa piumasamit­tut iliorsin­naatip­pai. Tamanna isumaqar­poq Jehovamut naalak­kusun­nerluta nam­mineq aalajangersin­naagip­put. Inuit ilaat angajoq­qaamin­nit ilin­niar­tin­neqarluarsiman­ngik­kaluarlutik aalajangersimap­put Jehova kif­far­torfigalugulu ilumoorfiginiarlugu. Allat angajoq­qaamin­nit Jehovamik asan­nin­nis­samin­nik ilin­niar­tin­neqarluaraluarlutik aalajangersimap­put Jehova qiman­niarlugu. Tassa tamatta Jehovamut kif­far­torusun­nerluta nam­mineq aalajanger­tariaqar­par­put. (Jos 24:15) Taamaat­tumik angajoq­qaajususi aliasut­tusi, qitor­nassi Jehovamik qimatsinera pil­lugu imminut pisuuteqinasi! Angajoq­qaajusut ilaasa sal­lusuis­sut allaallu ilaqut­tatik qimat­tar­paat. (Tuss 27:10) Qitor­naasut angajoq­qaamin­nik ataq­qin­nit­tut tamanna aliasuutigingaar­tar­paat. Inuusut­tuusutit, ilaajun­naarsin­neqarsimasumik angajoq­qaaqaruit qularutigis­san­ngilat Jehovap anniaateqar­nerit ilisimal­luaraa. Asavaatit ilumoorfigin­nin­nerillu pingaar­til­lugu. Eqqaamajuk angajoq­qaavit aalajangigaanut pisuun­ngitsutit. w21.09 27 § 5-7

Kristumiu ilaajun­naarsin­neqar­tariaqar­toq savamut nap­parsimasumut tunil­laas­suisin­naasumut assersuun­neqarsin­naavoq. Anersaak­kummi nap­parsimavoq. (Jaak 5:14) Anersaak­kut nap­paat timik­kut nap­paatitulli tuniluus­sin­naavoq, anersaak­kummi nap­parsimasoq allanik sun­niinerlus­sin­naavoq. Taamaat­tumik ilagiin­nit avis­saar­tin­neqar­tariaqarsin­naavoq. Taamaalior­neq Jehovap kif­faminut aalajaatsunut asan­nin­neranut ersiutaavoq, aamma ajor­tulior­tup peq­qis­simineranik kinguneqarsin­naavoq. Ilaajun­naarsitaasoq suli ataatsimeeqataasin­naavoq aamma atuagas­siaatigut atuarlugillu JW Broadcasting^® isigin­naarsin­naavaa. Anersaak­kullu siuariar­tor­nera utoq­qaaner­tat malugigunikku Jehovamut attaveqarluaq­qiler­nis­saanut ikiorsin­naavaat. w21.10 10 § 9, 11

Kristumiut siul­liit guutisioriaasiat ilaar­tar­par­put. Assersuutigalugu peqatigiis­sor­tatsinni aaq­qis­suus­siner­put kristumiut siul­liit aaq­qis­suus­sineran­nut apustilinit pilersin­neqar­tumut assinguvoq. Taak­kunatulli ilagiin­nik nak­kutil­liisoqar­pugut, utoq­qaaner­taqar­pugut ilagiin­nilu kif­far­tor­toqarluta. (Flp 1:1; Tit 1:5) Aamma kristumiut siul­liit pisar­nerat­tut atoqatigiin­neq aap­pariin­nerlu pil­lugit Jehovap inatsisai akuerisar­pagut, aap iller­nar­tuunera ataq­qisar­par­put ilagiillu ajor­tulior­tunit peq­qis­simin­ngitsunit illersorusut­tarlugit. (ApS 15:28, 29; Kor 1. 5:11-13; 6:9, 10; Hebr 13:4) Biibilimi allas­simavoq ‘upperisaq ataaseq’ Guutimit iluarineqar­toq. (Ef 4:4-6) Jehovap innut­taanut ilaaner­put aamma Jehovap piumasaanik ilisimasaqar­ner­put ataq­qinaatigaar­put. Qanor­toq upperluarluta ilumoor­toq aalajangiusimajuar­tigu! w21.10 22-23 § 15-17

Kun­ngi Joshafati ajor­nar­torsiungaaler­poq. Ammonik­kut, Moabik­kut nunallu qaq­qar­tuup Se’irip sak­kutoor­pas­suinit innut­tanilu navianar­torsior­tin­neqaler­put. (Nal 2. 20:1, 2) Joshafati qanoq iliorpa? Jehovamut ikior­tis­sarsior­poq. Joshafatip Jehovamik tatigin­nil­luin­nar­nera maniguul­luni qin­nutaanit, Nalunaarsuutit aap­paat 20:5-12 allas­simasumit, ersersin­neqar­poq. Jahazieli Levik­kuusoq aqqutigalugu Jehovap Joshafati oqaluup­paa, ullormut allas­simaf­fimmi allas­simasutut oqarfigalugu. Guuti tatigil­luin­narlugu Joshafati ilitsersor­neqar­nermisut ilior­poq. Akeq­qatik naapik­kiar­toramik­kit sak­kutuut pik­koris­sut saarliutin­nagit erinarsor­tar­tut sak­koqan­ngitsut saarliutip­pai. Jehovallu Joshafati pakatsisin­ngilaa. Akeq­qat ajorsar­tip­pai. – Nal 2. 20:18-23. w21.11 15-16 § 6-7

Ajor­nar­torsior­nitsinni aalajaat­tuarsin­naaq­qul­luta Jehovamit ikior­neqar­nis­sar­put upperisin­naavar­put. (Kor 2. 4:7-9) Tus­siaasior­tup allaatigisaatut ‘Jehovap isai sam­mim­mata ajun­ngis­susianik utaq­qisunut’ ilumoorfigin­nil­luni asajuas­sagaatigut upperisin­naavar­put. (Tuss 33:18-22) Jehovamut kif­far­tun­ngik­kal­laratta taas­suma inun­nut tamanut asan­nin­nera misigisarsimavar­put, kif­far­torfigileratsiguli aamma ilumoorfigin­nil­luni asan­nin­nera iluaqutigiler­par­put. Ilumoorfigin­nil­luni asan­nin­nini pis­sutigalugu Jehovap taliminik najum­misarlutalu illersor­tar­paatigut. Qanimut attaveqarfigiuas­savaatigut uagutsin­nullu neriorsuutini eqquutitis­sal­lugit. Kis­saatigaa pil­luas­sasugut! (Tuss 46:2, 3, 8) Taamaat­tumik qanorluun­niit misilin­neqaraluarutta aalajaat­tuarsin­naaq­qul­luta Jehovap ikius­savaatigut. w21.11 7 § 17-18

Suleqatiminik, atuaqatiminik ilaqut­taminil­luun­niit – immaqa allaat ukior­pas­suarni – put­tarsisaqarfigin­nit­toqar­nera amerlanersatta tusarsimas­sagunar­paat. Assersuutigalugu Josefip qatan­ngutaasa qulit taanna kamaatingaaramikku ajor­tumik pivaat. (Mos 1. 37:2-8, 25-28) Josefi taak­kunan­nga allaanerul­luin­nar­tumik ilior­poq! Qatan­ngutini nal­lit­tor­pai akiniaaf­figinis­saan­nut oqar­tus­saas­suseqalereeraluarluni. Josefip put­tarsinani siun­nersuut kingusin­nerusuk­kut Mosesimik allak­kat pingajui 19:18-imi allan­neqar­toq maleruar­paa. (Mos 1. 50:19-21) Kristumiut Guutimit iluarisaarusuk­kamik Josefi ilaarlugu inoqater­tik akiniaaf­figinagu isumak­keerfigis­savaat. Jiisusi isumak­keerfigin­nit­taq­qusivoq. (Mat 6:9, 12) Paulusip aamma uppeqatini ima siun­nersor­pai: “Asasakka, akiniaas­san­ngilasi.” – Rom 12:19. w21.12 11 § 13-14

Ukiumi 33-mi nisanip 14-ianni unnuak­kut Jiisusi naatsiivim­mut Getsemanemukar­poq. Tas­sani Jehovamut qinul­luni uum­mam­miuni aniatip­pai. (Luk 22:39-44) Allas­simavoq nil­lingaarluni qul­lilil­lunilu qinusoq. (Hebr 5:7) Aqagumut toqusus­saal­luni Jiisusip suna qin­nutigaa? Jehovamut aalajaat­tuarsin­naajumal­luni piumasaatullu ilior­tuarsin­naajumal­luni nukis­saqar­teq­qul­luni qinuvoq. Jehovap ernermi ilungersorluni qinunera tusar­paa, nakus­satsin­niarlugulu inngili aal­lar­tip­paa. Jiisusip nalun­ngilaa akisus­saaf­fini, Ataatami aqqata naalan­narsisin­neqar­nis­saa, pingaaruteqangaar­toq. Jehova Jiisusip qin­nutaanut tusar­naar­poq. Sooq? Jiisusip Ataataminut ilumoorfigin­nit­tuar­nis­sani aqqatalu naalan­narsisin­neqar­nis­saa pingaar­ner­paatim­magit. Uagut­taaq tamakku pingaar­ner­paatik­kutsigit ikioq­qul­luta qinugaangatta Jehovap akisas­savaatigut. – Tuss 145:18. w22.01 17-18 § 15-17

Ullumik­kut inup­pas­suit politik­kik­kut akuliun­naveersaar­tuuner­put mamiatsaatigisar­paat. Isumaqar­put qinerseqataasariaqar­tugut. Nalun­ngilar­pulli inuk naalak­kersuisus­satsitut qinerutsigu Jehova naalak­katsitut itigar­tis­sagip­put. (Sam 1. 8:4-7) Aamma isumaqar­toqar­poq atuarfiliorlutalu nap­parsim­mavilior­tariaqar­tugut innut­taaqatigiin­nullu iluaqutaasus­sanik allanik iliuuseqar­tariaqar­tugut. Uagulli oqaluus­sineq pingaar­nerutik­katsigu silarsuarmilu ajor­nar­torsiutit ingerlaan­naq aaq­qiis­sutis­sarsior­tan­ngin­natsigit mamiatsat­tar­put. Upper­ner­put qanoq annaanaveersaarsin­naavar­put? (Mat 7:21-23) Jiisusip peq­qus­sutaata suliarinis­saa inuunitsinni pingaar­ner­paatin­nerusariaqar­par­put. Silarsuarmi matumani ajor­nar­torsiutinik aaq­qiiniarsarineq allamut saasaatigin­ngisaan­nar­tigu. Inoqatigut asal­lugillu ajor­nar­torsiutaat soqutigaagut, nalun­ngilar­pulli pitsaaner­paamik ikiorsin­naal­lugit Guutip naalagaaf­fia pil­lugu ilin­niar­tik­kutsigit Jehovamillu ikin­nguteqaler­nis­saan­nut ikiorutsigit. w21.05 7 § 19-20

Nalitsinni naalak­kersuisut Guutimut kif­far­tor­neraraluarlutik pis­saaner­tik oqar­tus­saas­suser­tillu iperarusun­ngilaat. Jiisusip nalaani naalak­kersuisut iliorsimanerat­tulli nalitsinni naalak­kersuisut Jehovap kun­ngin­ngor­titaa akerlilersor­paat malin­nit­taanik malersuinermik­kut. (ApS 4:25-28) Jehova qanoq qisuariarpa? Tus­siaat 2:10-12 ima allas­simavoq: “Ilissi kun­ngit silatusaaleritsi, siun­nersuutit akuersaar­tar­niarsigit nunarsuarmi eqqar­tuus­sisut ilissi: Naalagaq kif­far­torfigisiuk mianeralugu! Uul­luserlusi kunis­sigit isigai kamaleq­qunagu nungutitaaq­qunasilu; tas­san­ngaan­narmi kamalersin­naasar­poq. Pil­luar­poq kinaluun­niit taas­sumani qimar­nguf­fis­sarsior­toq.” Jehovap asan­nil­luni akerlilersuisut peq­qis­siminis­saan­nut periarfis­sip­pai. Allan­nguinis­samin­nut Jehovallu kun­ngeqarfianik akuerin­nin­nis­samin­nut suli periarfis­saqar­put. Pif­fis­saarutiler­pulli. (Es 61:2) Inuit ilumoor­tumik paasin­nin­nis­saat eqqor­tumillu aalajangiinis­saat aatsaat taama nukingin­nar­tigaaq. w21.09 15-16 § 8-9

Paulusi allap­poq pigisagut naam­magis­sagigut. (Flp 4:12) Pigisat pin­nagit Guutimut attaveqar­ner­put inuunitsinni pingaar­ner­paatis­savar­put. (Hab 3:17, 18) Israelik­kut ukiuni 40-ni inoqajuitsumi angalaareersut Mosesip qanoq oqarfigigai eqqarsaatigiuk: “Naalak­kap Guutivit qanoq ilior­ninni tamani pil­luaq­qusimavaatit. … Ukiuni 40-ni [najorsimam­matit] sumil­luun­niit amigaateqarsiman­ngilatit.” (Mos 5. 2:7) Ukiuni 40-ni taak­kunani Jehovap Israelik­kut man­nanik nerisas­saqar­tit­tarsimavai. Atisaat, Egyptenimit anigamik atugaat, nungul­larsiman­ngil­lat. (Mos 5. 8:3, 4) Jehovap iluaraa naam­magin­nit­tuuner­put, tassa tunis­sutiminik sumil­luun­niit qujamasuutigin­nin­ner­put pil­luaq­qus­sutitullu isigin­nin­ner­put. w22.01 5 § 10-11

Illit uiusutit, ilaqut­tatit isumas­sor­tus­saagak­kit ilungersorlutit isumagisar­patit tapersersor­tarlugillu. Ajor­nar­torsiuleraangavit imaas­sin­naavoq misigisutit ajor­nar­torsiut nam­mineerlutit aaq­qis­sin­naal­lugu. Imminulli tatigival­laaqinak, kisimiil­lutilli qinunik­kut Jehovamut ikioq­qugit. Aamma nuliat qaman­nga pisumik qinoqatigisaruk. Biibilip atuagas­siaatit­talu atuaq­qis­saar­nerisigut Jehovamut siun­nersor­tigit siun­nersuutillu malit­tarlugit. Biibili tun­ngavigalugu aalajangiigaangavit imaas­sin­naavoq allat isumaqatigin­ngik­kaatsit. Immaqalu oqarfigaatsit aningaasat pigisallu ilaqut­tavit isuman­naatsumik inooriaaseqar­nis­saan­nut iluaqutaaner­paajusut. Kun­ngilli Joshafatip maligas­siuil­luar­nera eqqaamajuk. (Nal 2. 20:1-30) Taas­suma iliuutsimigut ersersip­paa Jehova tatigalugu. Jehovap angut taanna aalajaatsoq imminiigin­nan­ngilaa, aamma illit imminiigin­nar­navian­ngilaatit. – Tuss 37:28; Hebr 13:5. w21.11 15 § 6; 16 § 8

Guuti assilil­lugu pin­ngor­titaagatta inuit eqqor­tumik pineqar­tar­nis­saat kis­saatigaar­put. (Mos 1. 1:26) Naam­mal­luin­nan­ngitsuugat­tali kuk­kusumik naliliisin­naasar­pugut; aamma pis­sutsit tamaasa paasisimasorigaluaraangatsigit. Juuna assersuutigeriar­tigu. Jehovap Ninevemiunik asat­tuus­siniarluni aalajanger­nera Juunap nuan­narin­ngilaa. (Jon 3:10–4:1) Jehovalli aalajanger­nerata kingunera eqqarsaatigiuk. Inuit peq­qis­simisut 120.000-nit amerlanerusut annaan­neqar­put! Suna paasivar­put? Juuna naliliinerlup­poq, Jehovaan­ngitsoq. Jehovap aalajangik­kaminik nas­suiaat­tariaqan­ngilaatigut. Ilumoor­poq Jehovap aalajangiigaangami aalajangiiniaraangamiluun­niit kif­fami isumaat itsaq tusar­naar­tarsimagai. (Mos 1. 18:25; Jon 4:2, 3) Aamma aalajangik­kaminut pis­sutaasut ilaan­nik­kut nas­suiar­tar­pai. (Jon 4:10, 11) Iliuuseqalin­ngin­nermini uagutsin­nit akuerineqaq­qaar­tariaqan­ngilaq. – Es 40:13, 14; 55:9. w22.02 4 § 5-6

Nukarler­tut pis­suseqar­tar­pugut allat uagutsin­nit annerutik­kaangatsigit. (Flp 2:3) Allat annerusutut isiginerujar­tor­til­lugit mamiatsatsitsian­ngin­nerujar­tus­saagut. Uppeqatigut tamarmik arlaatigut uagutsin­nit pigin­naaneqar­nerup­put. Tamanna maluginiar­nas­saaq taak­kua pis­susii nuan­nersut eqqumaf­figigutsigit. Apustilip Paulusip Korinthimiunut siun­nersuutaa una uum­mam­miuliut­tariaqar­par­put: “Sooq allanit pingaar­nerusorivit? Suut tamaasa Guutimit pisiman­ngin­ner­pigit? Suut tamaasa taas­suman­nga pisimaguk­kit sooq taava nam­mineq nukitit atorlugit pis­sarsisimasutut oqarataar­pit?” (Kor 1. 4:7) Allanit pingaar­nerusutut misiginaveersaarlutalu malugeq­qusaar­naveersaar­tariaqar­pugut. Qatan­ngut angut oqalugial­laq­qik­kuni qatan­ngutil­luun­niit arnap Biibilimik atuaq­qis­saaqateqar­taler­neq pik­korif­figiguniuk tamanna ingerlaan­naq Jehovamut ataq­qinaataatit­tariaqar­paa. w21.06 21-22 § 9-10

Illumiit illumut oqaluus­sineq Nalunaajaasor­pas­suar­nut unam­miniar­nar­neruleralut­tuin­nar­poq. Nalunaajaasut ilaasa oqaluus­sif­figisar­tagaanni iserfigiuminaatsunik inis­siaqarfis­suaqar­poq. Ilaat isaariami nak­kutil­liisoqar­tar­put, taamaat­tumillu qaaq­quneqaq­qaarani iser­toqarsin­naaneq ajor­poq. Nalunaajaasut allat oqaluus­sigaangata angerlarsimasut ikit­tuin­naasar­put, avin­ngarusimasuniluun­niit inoqar­pian­ngitsunilu oqaluus­sisar­put. Taakku illun­nguaq ataaseq tikik­kumal­lugu sivisuumik angalasariaqar­tar­put ilaan­nik­kullu ornitatik angerlarsiman­ngitsoorutigisarlugit. Oqaluus­sininni assingusunik unam­miniagaqaruit nikal­loqinak. Pif­fis­sani assigiin­ngitsuni oqaluus­sisarit. Inuit angerlarsimanis­saat ilimagigaangakku oqaluus­sisarit, taava amerlanerusut naapit­tas­savatit. Allaammi inuit ulapin­ner­paat angerlar­tariaqar­tar­put! Qatan­nguter­pas­suagut ualik­kut unnuler­neraniluun­niit oqaluus­sigaangamik naapitaqar­nerusar­put. Aamma ullup taamaasinerani inuit ulapin­ngin­nerusaramik oqaloqatigiuminar­nerusar­put. w21.05 15 § 5, 7

Ullumik­kut aamma taamaat­toqarpa? Aap. Jehovap Nalunaajaasuisa ileq­qutoq­qat Biibilimut naaper­tuutin­ngitsut, soorlu inuuis­sior­neq juul­lisior­nerlu, peqataaf­figisan­ngim­matigit inup­pas­suit narrujuum­misar­put. Allat inuiat­tut ullorsior­nerminni ilisinermiluun­niit ileq­qumin­nut Biibilimut naaper­tuutin­ngitsunut Jehovap Nalunaajaasuisa peqatigerusun­ngik­kaangatsik kamaler­tar­put. Taamatut mamiatsat­tut immaqa isumaqavip­put Guutip akuerisaatut guutisiorlutik. Guutimilli iluarisaasin­naan­ngil­lat silarsuarmi ileq­qutoq­qat Biibilimi ilin­niar­titsis­sutigineqar­tunit pingaar­nerutik­kunik­kit. (Mak 7:8, 9). Upper­ner­put qanoq annaanaveersaarsin­naavar­put? Jehovap inatsisaanik najoq­qutas­siaanillu nuan­narin­ningaar­nermik ineriar­tor­titsisariaqar­pugut. (Tuss 119:97, 113, 163-165) Jehova asagutsigu ileq­qutoq­qat suul­luun­niit taas­suma iluarin­ngisai itigar­tis­savagut. Sunaluun­niit Jehovamik asan­nin­nitsin­nit pingaar­nerulis­san­ngilaq. w21.05 6 § 15-16

Qanoq Paulusip siun­nersuutigisaatut iliorsin­naavugut? Qinujuar­nik­kut, atuaq­qis­saar­tar­nik­kut Jehovallu sulias­siis­sutigisaanik ulap­putigin­nit­tuar­nik­kut upper­ner­put nakus­sas­sar­tuar­tariaqar­par­put. (Tim 2. 4:4) Uppersuseqarutta tusak­kagut nuan­niitsut paatsiveerus­sutigisas­san­ngilagut. (Es 28:16) Aamma Jehovamik uppeqatitsin­nillu asan­nik­kutta Biibilimillu nuan­narin­nik­kutta sal­lusuis­sum­mit qimagut­tunit tam­mar­tin­neqar­navian­ngilagut. Jiisusi nalimini inuusunit naak­kius­sutigineqarlunilu assuarineqar­poq. Inun­nilli allar­pas­suar­nit upperineqar­poq. Upper­tun­ngor­tut ilagaat juutit Kil­lisiuisoqatigiivini ilaasor­taasoq aamma palasit amerlaqisut. (ApS 6:7; Mat 27:57-60; Mak 15:43) Ullumik­kut­taaq inuit mil­lionilik­kuutaat upperluar­tuujuar­put. Sooq? Ilumoor­tut Biibilimeersut ilisimal­lugillu nuan­narigamik­kit. Guutip oqaasiani ima allas­simavoq: “Pil­luangaas­sap­put inatsisin­nik nuan­narin­nit­tut, naak­kiuf­fis­saqan­ngilarlu taak­kunun­nga.” – Tuss 119:165. w21.05 13 § 20-21

Apustilip Paulusip paasivaa Jehovamit nakus­satsin­neqan­ngik­kuni kif­far­torsin­naanani. Paulusi malersugaasaraluarluni, par­naarus­saasaraluarluni allanillu unam­miniagaqar­taraluarluni Jehovap anersaavanit nakus­satsin­neqar­nermigut kif­far­tor­tuarsin­naasimavoq. Paulusip suleqataata, Timotheusip, aamma nalun­ngilaa kif­far­tor­tuas­saguni Guutimit nakus­satsin­neqar­tariaqarluni. Paulusi oqaluus­siar­torluni sivisuumik angalagaangat angalaqatigisar­paa. Aamma ilagiin­nik qiim­mas­saajar­tor­tin­neqarluni Paulusimit aal­lar­tin­neqar­tar­poq. (Kor 1. 4:17) Timotheusili imminut ajuk­kut­tarsimagunarmat Paulusip ima oqarfigaa: “Inuusun­nerit pil­lugu nikas­saasoqan­ngik­kili.” (Tim 1. 4:12) Aamma Timotheusi peq­qiil­lior­tarsimavoq. (Tim 1. 5:23) Nalun­ngilaali oqaluus­sinis­saminut qatan­ngutiminillu kif­far­tuus­sinis­saminut Jehovap anersaani iller­nar­toq aqqutigalugu pisariaqar­tumik nakus­satsik­kumaaraani. – Tim 2. 1:7. w21.05 21 § 6-7

Siun­nersuiniar­tut najoq­qutas­siaq Jaaku 1:19-imiit­toq atorluarsin­naavaat. Ima allas­simavoq: “Kinaluun­niit tusaaniapal­lat­tas­saaq, oqalun­niapal­lat­tas­san­ngilaq kamajasuujus­sananilu.” Utoq­qaaner­taq isumaqarsin­naavoq pisimasut tamaasa ilisimal­lugit, ilumulli taamaappa? Ussatit 18:13-imi ima eqqaasin­neqar­pugut: “Oqaaserineqar­tut naalaarluaq­qaar­nagit akis­suteqar­neq sianiitsor­pal­lan­neruvoq kan­ngunarsaataal­lunilu.” Pitsaanerus­saaq pisimasut pil­lugit pineqar­toq aperigaanni. Taamaat­tumik utoq­qaaner­taq oqalulin­ngin­nermini tusar­naaq­qaar­tariaqar­poq. Utoq­qaaner­taq aperisin­naavoq: “Inuuninni susoqarpa?” “Qanoq ikiorsin­naavak­kit?” Utoq­qaaner­tat pisimasut paasiniaq­qaarunik­kit uppeqatitik qiim­mas­sar­nerusin­naal­lugillu ikior­nerusin­naavaat. Siun­nersuil­luas­sagaanni allas­simaf­fin­nik atuaanis­saq siun­nersuuteqar­nis­sarlu naam­man­ngil­lat. Qatan­ngutigulli misigitit­tariaqar­pagut uagutsin­nit asaneqar­tut, paasineqar­tut ikior­neqariaan­naasullu. w22.02 17 § 14-15