Ilerasuutissaqarnaveersaarit

1. Ukiumi kiffartorfiusumi 2013-imi immikkut ittumik ataatsimeersuaararnissami suna qulequtaava, sammisassanilu suna siunertaava?

¹ Ullut tamarluinnaasa nalunngeqatiginnissutitsinnik innarliisinnaasumik nalaataqartarpugut. Taamaattumik ukiumi kiffartorfiusumi 2013-imi, septembarip aallaqqaataani 2012-imi aallartittussami, immikkut ittumik ataatsimeersuaararnissamut qulequtaritinneqarpoq: “Ilerasuutissaqarnaveersaarit”. (1 Tim 1:19) Pinngortitsisorsuatsinnit tunissutip maluginiarnartup tamatta immikkut qanoq atornissaa eqqumaffigeqqullugu sammisassat piareersarneqarsimapput.

2. Apeqqutit pingaarutillit suut sammisassani akineqassappat?

² Makku maluginiakkit: Sammisassani nalunngeqatiginnissummut tunngasut apeqqutit pingaarutillit arfineq-marluk akineqassapput:

• Nalunngeqatiginnissummut suut navianaataappat?

• Nalunngeqatiginnissuterput qanoq sungiusarsinnaavarput?

• Qanoq ililluta allap aavanut pinngitsuusinnaavugut?

• Biibilip najoqqutassiaanut eqqarsartaasitta iliuusittalu qanoq nalunaarpaatigut?

• Qanoq ililluta allanut ilerasuuteqalersitsinaveersaarsinnaavugut?

• Ilissi inuusuttuususi, qanoq ilillusi eqqunngitsuliornissamut tatineqarnissinni aalajaaniarsinnaavisi?

• Nalunngeqatiginnissut anersaamit siulersorneqartoq qanoq pilluaqqusaangaarumaarpa?

3. Sammisassat qanoq iluaqutigisinnaavavut?

³ Jehovap ikiuineratigut nalunngeqatiginnissutitsinnik Saatanip ajoqusiiniaraluarnera akiorsinnaavarput. Oqaatsini peqatigiissortanilu aqqutigalugit Ataatarput qilammiusoq asannittoq oqarpoq: “Aajuna aqqusineq, taanna ingerlavigissavarsi!” (Es 30:21) Ilaatigut sammisassat taakku aqqutigalugit Jehova siulersuisuusoq ataatsimeersuaararnissami tamatumani erserpoq. Taamaammat sammisassanut tamanut najuunnissat qulakkeeruk. Tusarnaarluarit paasissutissallu illit nammineq qanoq atorsinnaanerlugit eqqarsaatigiuk. Sammisat ilaqutariillusi oqaloqatigiissutigisigit. Ilikkakkatta atortarnerisigut ‘ilerasuuteqalinnginnissatsinnut’ nukissaqartittuassavaatigut nuannaarniutinullu nunguttussanut Saatanip silarsuaaniittunut ingalassimatissalluta. — 1 Petr 3:16.