Nalunngeqatiginnissutsit qanoq sungiusarsinnaagit

„ILERASUUTEQANNGINNEQ tassaavoq akiseq pitsaanerpaaq.“ Ussat tamanna ilumoortumut pingaartumut matumunnga ersiutaalluarpoq: Nalunngeqatiginnissuserput maleruaraangatsigu qamuuna eqqissisimallutalu toqqissisimasarpugut.

Inuilli tamakkeratik taamaaliorumapput. Adolf Hitler nalunaarsimavoq inuit ’takorluukkamit piviunngitsumit nalunngeqatiginnissutsimik taaneqartumit’ aniguisinniarlugit. Taassuma peqqarniitsumik naalakkersuinerata amiilaarnartumik takutissimavaa inuit nalunngeqatiginnissusertik naqisimagaangamikku qanoq naakkittaatsuliortigisinnaasut. Ullutsinni pinerluttuliortartut peqqarniitsut amerlasuut aamma taama naakkittaatsigisarput — ilerasuuteqaratik pinngitsaaliillutik atoqateqartarput inuartarlutillu. Pinerluttuliortut ilaat amerliartuinnartut inuusuttuaraapput. Ajornartorsiut tamanna pillugu atuagaq ima qulequtaaraqarpoq: Children Without a Conscience (Meeqqat nalunngeqatiginnissuseqanngitsut).

Inuit amerlanerit peqqarniitsumik pinerluttuliorumasanngillat, amerlasuulli kanngunartuliorneq, salluneq peqquserlunnerlu peqataaffigissallugit nangaassutiginngilaat. Nunarsuaq tamakkerlugu ileqqussatigut ajortunngorneq siuariartorpoq. Pallorfiginninnermit ilumoortumit tunussinersuaq eqqarsaatigalugu apustili Paulus allassimavoq kristumiut ilaat silarsuarmit sunnerneqaramik ’tarnimik nalunngissusiagut pinerluttutut nalunaaqqutserneqarsimasut’. (1 Timûtiuse 4:2) ’Ulluni kingullerni’ makkunani taamatut ajortunngornissaq aarlerinartoqarneruvoq. (2 Timûtiuse 3:1) Taamaattumik kristumiut ilungersortariaqarput nalunngeqatiginnissusertik illersorniarlugu. Taamaaliorsinnaavugut sungiusarlugu ineriartortillugulu.

Isuma, uummat illillu nalunngeqatiginnissutsit

Apustili Paulus oqarsimavoq: ’Ilumoorlunga oqarpunga Kristusimi sallunangalu tarnima nalunngissusiata nalunaajaaqatigimmanga anersaakkut illernartukkut.’ (Rûmamiut 9:1) Nalunngeqatiginnissuseq taamaalilluni nalunaajaasinnaavoq. Ilioriaaseq aalajangersimasoq misissorsinnaavaa iluaralugulu assuaraluguluunniit. Ajunngitsumik ajortumillu sianissutsip tamatuma ilarujussua Pinngortitsisitsinnit pigiliutitinneqarsimavoq. Kisianni nalunngeqatiginnissuserput nammineq ineriartortissinnaavarput sungiusarsinnaallugulu. Qanoq ililluta? Guutip oqaasianit eqqorluartumik ilisimasaqalernitsigut. ’Silap matuma inui ileqqoqatigeqinasigik, allanngoritsili isumassigut nutaanngorlusi, sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ (Rûmamiut 12:2) Guutip eqqarsaatai piumasaalu isumatsigut pigiliukkiartortillugit nalunngeqatiginnissuserput Guutip iluarisaatut sunniuteqartaleriartussaaq.

Jehovap nalunaajaasuisa nunarsuaq tamakkerlugu inuit millionilikkuutaat Jehova Guutimik Jesus Kristusimillu ’ilisarsinissaannik’ ikiorsimavaat. (Juánase 17:3) Akeqanngitsumik Biibilimik atuaqqissaaqatiginnittarlutik inuit peqqusersuitsut ilinniartittarpaat atoqatigiinneq, imigassat, aappariinneq, niuerneq allallu assigiinngitsorpassuit pillugit Jehova Guutip najoqqutassiaanik.a (Ussatit 11:1; Mákorse 10:6-12; 1 Korintumiut 6:9, 10; Evfisumiut 5:28-33) Guutip iluarisaanik nalunngeqatiginnissuseqalerniaraanni eqqortumik ’ilisarsineq’ immikkut pingaaruteqarpoq. (Filípimiut 1:9) Biibilimik paasisimasaqarlualereeraluaruniluunniit kristumiup soorunami isumani eqqarsaatinik Guutip oqaasianeersunik immertuartariaqarpaa peqqissumik sunniuteqarluartumillu nalunngeqatiginnissuseqartuarumalluni. — Tussiaat 1:1-3.

Biibilimi nalunngeqatiginnissuseq uummammut assersuutaasumut misigissutsitta inissisimaffiannut attuumassuteqartinneqarpoq. (Rûmamiut 2:15) Isuma uummallu suleqatigiilluartariaqarput nalunngeqatiginnissuseq sunniuteqarluassappat. Isumap paasissutissarpassuarnik immertarnissaa naammanngilaq. Aamma uummat — ilorlikkut misigissutsit, kissaatigisat kipisagisallu — sulissutigisariaqarpoq. Ussatit-ni allassimavoq ’uummat siuneqarnermut saatsissagipput’, ’uummat ingerlatinniassallugu aqqutissaq eqqorlugu’, aamma uummat arlaannut ’saatsissagipput’. (ússatit 2:2; 23:19, nutsigaq nutaanngitsoq; Ussatit 27:23, NV) Uummaterput sulissutigisinnaavarput Guutip oqaasia eqqarsaatigeqqissaartarlugu. „Isumaliutigaara piliarsuit tamaat, eqqarsaatigaakkalu suliatit,“ Tussiaat 77:13-imi allassimavoq. Guutip oqaasiata eqqarsaatigeqqissaarneratigut ilorlikkut misigissutsivut pissutiginiakkavullu misissorsinnaavavut.

Oqarta minguttuumik ileqqoqartutit, soorlu pujortartarlutit. Inuttut allatulli nalunngilluarpat tamanna peqqissutsimut navianaateqartoq. Taamaattorli naak ikinngutivit ilaquttavillu ilungersorlutik kajumissaarsimagaluaraatsit pujortassaarsinnaanngilatit. Qanoq ilillutit Biibilimi allassimasut eqqarsaatiginerisigut tamatumunnga tungatillugu nalunngeqatiginnissutsit sungiusarsinnaaviuk?

Assersuutigalugu Paulusip Korintumiunut agdlagkat áipait 7:1-imi oqaasii eqqarsaatigisinnaavatit: ’Taamaattumik unnersuutit tamakku pigigatsigik, asasakka, immitsinnik eqqiarniarta uinngullu anersaallu mingui tamaasa piiarlugit; iluarsinissarlu Guuti mianeralugu naammassiniartigu.’ Oqaatsit tamakkua siunertaat paasiniaruk. Imminut apereriarit: ’„Unnersuutit“ suunuku Paulusip pigai?’ Versit ataqatigisaat atuarukkit malugissavat versini siulianiittuni qanoq allassimasoqartoq: ’„Taamaattumik akornannit anigitsi avissaarlugillu,“ oqarpoq Jehova; „mingunnartorlu attoqinasiuk; taava ilassiumaarpassi,“ „Ataatagissavassingalu, uangalu erneralusilu panigissavassi,“ oqarpoq Jehova Ajugaqanngitsoq.’ — 2 Korintumiut 6:17, 18.

Oqaatsit tamakkua takutippaat Paulusip oqaasii ’immitsinnik eqqiarniarta’ qanoq pingaartigisut! Guuti taamaaliornissatsinnut kajumissaangaarluta neriorsuivoq ’ilassiumaarluta’, tassa isumagalutalu sernissussalluta. Imminut apereriarit: ’Guutimut qanimut attaveqarneq nuannaarutigissagaluarpara — ernerup paniulluunniit ataataminut attaveqarneratut?’ Guutimit asannittumit ilisimatuumillu ’ilassineqarnissaq’ asaneqarnissarlu nuannissagaluaqaaq, ila? Eqqarsaat tamanna ilinnut takornartaappat taava maluginiarsinnaavat ataataasut isumassuisut meeqqaminnut asanninnertik tunniusimanertillu qanoq ersersittaraat. Taava takorlooriaruk Jehova illillu taama qanitsigisumik attaveqartusi. Tamanna eqqarsaatiginerujartortillugu Guutimut taamatut attaveqarnissat kissaatiginerujartussavat.

Malugiulli Guutimut qanittumik attaveqarsinnaassagutta ’mingunnartoq attorunnaartariaqarparput’. Imminut apereriarit: ’Tupamut uerisimaneq „mingunnartut“ Guutip assuarisaasa ilaginnginnerpaat? Pujortartarnera „uinimmut mingunnartuunnginnerpa“ peqqissutsinnut navianaaterpassuarnik kingunilimmik? Jehova Guutiugami minguitsoq „illernartorlu“ akuerissanerpaa taamaalillunga timiga mingutsittuarukku?’ (1 Pîtruse 1:15, 16) Malugiuk Paulusip aamma inuup ’anersaavata mingui’ eqqaagai, tassa eqqarsaatinut mingunnartut. Imminut apereriarit: ’Tupamut uerisimanera eqqarsaatinnut assut sunniuteqarpa? Uerisimanera pissutigalugu iliuuseqangaartarpunga, allaat peqqissutsima, ilaquttama Guutimulluunniit attaveqarnerma ajoqutissaannik? Akuerinerpara inuunerma uerisimaninnit aserorneqariartornera?’ Apeqqutit imminut killisiornartut taamaattut eqqarsaatigigukkit pujortassaarnissannut nakussatsissinnaavutit!

Immaqa pujortarusussuseq ajugaaffigissallugu allanit ikiorneqartariaqarputit tapersersorneqartariaqarlutillu. Biibililli oqaasii eqqarsaatigeqqissaartarukkit nalunngeqatiginnissutsit ilusilersorneqarsinnaassaaq nakussatsinneqarsinnaassallunilu uerisimajunnaarnissannik kinguneqartumik.

Eqqunngitsuliorutta

Naak eqqortumik iliorniarluta tamaviaaraluarluta naammalluinnanngissuserput pissutigalugu ilaannikkut unioqqutitsisoorsinnaavugut. Taamaakkaangat ilerasuuteqartarpugut, tamannalu sumiginnarniarsarinarusussinnaagaluarpoq. Immaqa ima nikallortigisinnaavugut Guutimut kiffartornerput taamaatikkusulerlugu allaat. Kunngili David eqqarsaatigiuk. Batseba allasiorfigigamiuk ilerasuuteqartorujussuusimavoq. Erloqinini ima allaatigaa: „Nanertungaarmanga assavit ullukkullu unnuakkullu inuussutiga sakkukilliartorpoq aasap kiassuanit.“ (Tussiaat 32:4) Tamanna aliasuutigaa? Aap! Guutip kissaatigisaatut aliasukkami David peqqissimivoq. Guutimullu saammaannartitaaqqilluni. (Naleqqiuguk 2 Korintumiut 7:10.) Isumatsassimalluni isumakkeerfigineqarnissamik qinnutaata takutippaa ilumoorluni peqqissimisoq. Nalunngeqatiginnissutsini qisuariarfigaa. Taamaattumik allamut saanniarnermini ikiorneqarpoq piffissallu ingerlanerani nuannaaleqqilluni. — Tussiaat 51.

Ullumikkuttaaq taama pisoqarsinnaavoq. Inuit ilaasa Jehovap nalunaajaasui ilagalugit Biibili atuaqqissaarsimavaat, taamaatissimalluguli paasileramikku Guutip najoqqutassiaanut qutsissunut akerliusumik inooriaaseqarlutik. Immaqa minguuttumik ileqqoqarput imaluunniit aapparinngisaminnik inooqateqarlutik. Taamaattumik ilerasuuteqarput.

Illit taamatut atugaqaruit apustilip Peterip ullormi Piinsimi oqaaserisimasaa eqqarsaatigiuk. Juuteqatimi ajortuliarisimasai qulaarmagit taakku ’uummatikkut killinneqarput’. Nakkaannaratik Peterip unnersuussutaa malillugu ajortuliatik peqqissimissutigaat Guutimullu iluarisaaqqilerlutik. (apustilit suliait 2:37-41) Illittaaq taamaaliorsinnaavutit! Ilerasuuteqaraluarlutit sallusuissut qimanngikkukku nalunngeqatiginnissutsinnit ’allamik isumataarnissannut saanniarnissannullu’ killinneqarsinnaavutit. (apustilit suliait 3:19) Aalajangersimalluinnaruit ilungersorlutillu Guutimut iluarisaajumallutit allanngorsinnaavutit.

’Ilerasuutissaqarnaveersaarit’

Jehovap aqqutigeqqusaanik ilinnialeqqammeraluaruit imaluunniit ukiorpassuarni kristumiutut inersimalluartutut misilittagaqarluaraluaruit apustili Peterip siunnersuutaa manna tulluarpoq: ’Ilerasuutissaqarnaveersaaritsi.’ (1 Pîtruse 3:16) Taamaaliorneq ajoqutaanani iluaqutaavoq. Uummatit isumallu ilisimassutsimit Guutip oqaasianeersumit sunnertillugit nalunngeqatiginnissutsit ineriartortiguk. Nalunngeqatiginnissutsit tusarnaartaruk mianersoqqugaangaatit, maleruaraangakkulu ilorlikkut eqqissineq nuannaarutigisaruk.

Miserratigineqarsinnaanngilaq nalunngeqatiginnissutsimik sungiusaaneq ineriartortitsinerlu oqitsuunngimmata. Jehovali qinnuigisinnaavat ikioqqullutit. Guuti ikiortigalugu ’ilerasuutissaqarnatit uppernikkullu pisuusaarnatit’ kiffartorfigisinnaavat. — 1 Timûtiuse 1:5. (wE 1/8 97)

[Quppernerup ataani ilanngussaq]

[Qupp. 6-imi assiliartaq]

Guutip oqaasia atuartarlugulu eqqarsaatigeqqissaartarutsigu nalunngeqatiginnissuserput sungiusarsinnaavarput