Nalunngeqatiginnissuseq ajoqut imaluunniit iluaqut?
’ILERASOQAANGA!’ Tamatta ilaannikkut ilerasuuteqartarpugut. Tassaasinnaavoq isumakkut nuanniilliulaarneq imaluunniit annikilliorujussuarneq. Ilerasuuteqarneq allaat isumatsangaarnermik naammanngivissutullu misigilernermik kinguneqarsinnaavoq.
Taamaammat nalunngeqatiginnissuseq ajoqutaannartut isigineqarsinnaanngila? Ilaat taama isumaqarsinnaapput. Siornatigut isumaliutersortartut amerlasuut isumaqarsimapput nalunngeqatiginnissuseq inunnguusaasoq. Tassaasorineqarsimavoq ileqqussatigut najoqqutassaq Guutimit toqqaannartumik tunniunneqartoq. Taamaattumik nalunngeqatiginnissuseq „Guutip inummi najuunnera“-nik, „aallaqqaataaniilli pissuserput“-mik aamma allaat „Guutip nipaa“-nik taaneqarsimavoq.
Ukiunili kingullerni nalunngeqatiginnissuseq tassaanerarneqartalerpoq piginnaassuseq pigiliunneqarsimasoq — angajoqqaat innuttaaqatigiillu sunniinerata kingunerisaannik. Assersuutigalugu, psykologit ilaat oqartarput meeqqap pillarneqarnissani siooragigamiuk ileqqut iluarineqanngitsut iliuuserinaveersaarnissaat ilikkartaraa, nalunngeqatiginnissutsimillu taaneqartoq tassaaginnartoq angajoqqaat namminneq inuttut naleqartitaannik isumaannillu pigiliussineq. Allat innuttaaqatigiit naleqartitaasa najoqqutassaasalu uatsinnut sunniuteqarnerat tikkuartarpaat. Ilaat isumaqarput ilerasuuteqarneq tassaaginnartoq iliuusererusutaraluatta inuiqatigiillu naqisimannittut piumasarisaata imminnut assortuunnerat!
Naak nalunngeqatiginnissuseq pillugu taama ittunik isumaliuteqartoqaraluartoq ilaannikkut inoqartarpoq angajoqqaatik, ilaquttatik inuiaqatitilluunniit akerliugaluartut nalunngeqatiginnissusertik pissutigalugu isummaminnik aalajangiusimannilluinnartunik. Ilaat allaat nalunngeqatiginnissusertik pissutigalugu inuunertik pilliutigissallugu piareersimapput! Aamma naak silarsuarmi kulturit assigiinngikkaluaqisut iliuutsit soorlu inuarneq, tillinneq, allasiorneq, salluneq qanigisamillu atoqateqarneq tamatigorluinnangajak eqqunngitsuliornertut isigineqartarput. Tamatuma takutinnginnerpaa nalunngeqatiginnissuseq inunnguusaasoq?
Nalunngeqatiginnissuseq — Biibili naapertorlugu
Tamanna pillugu oqaasissaqartoq tassaavoq Jehova Guuti. Tassami, „taassuma [Guutip] pinngortippaatigut, taassumalu pigaatigut“. (Tussiaat 100:3) Taassuma qanoq pinngortitaasugut nalunngilluinnarpaa. Guutip oqaasiani Biibilimi nassuiarneqarpoq inuk Guuti ’assilillugu’ pinngortinneqarsimasoq. (1 Moses 1:26) Inuk ajunngitsumik ajortumillu immikkoortitsisinnaassusilittut pinngortitaavoq; aallaqqaataaniilli nalunngeqatiginnissuseq inuup inunnguuseralugu pigaa. — Naleqqiuguk 1 Moses 2:16, 17.
Apustili Paulusip Romamiunut allakkamini taamaannera uppernarsarpaa ima allassimagami: ’Guutimimmi nalusut [Guutimeersunik] inatsiseqanngitsut inatsisit peqqusaat isumaminnik naammassisaramikkik, taava inatsiseqanngitsut taakku imminnut inatsisitut ipput, inatsisit suliareqqusaat uummatiminni allassimasut nalunaaramikkik, tarnimik nalunngissusiata nalunaajaaffigimmatik, eqqarsaataallu paarlaattarmata imminnik pasillersarlutik illersortarlutilluunniit.’ (Rûmamiut 2:14, 15) Malugiuk inuppassuit Inatsisit Guutip juutinut tunniussimasai piginagit peroriartorsimagaluartut allanit tatineqarnatik ’isumaminnik’ Guutip inatsisaani najoqqutassiat ilaat maleruartaraat!
Aap, nalunngeqatiginnissuseq ajoqutaannaanani tunissutaavoq Guutimeersoq iluaqutaasorlu. Erloqisissinnaavaatigut, eqqortumilli maleruarutsigu nalerisimaangaarnermik ilutsinnilu eqqissinermik akilersinnaavaatigut. Siulersorsinnaallutalu, illersorsinnaallutalu kajumissaarsinnaavaatigut. The Interpreter’s Bible-mi allassimavoq: „Inuk isumakkut misigissutsikkullu peqqissuusinnaavoq aatsaat iliuuserisartakkani iliuuserisariaqakkamisullu misigisimasani imminnut naapertuuttuutinniarsarigunigit.“ Qanoq ililluni taamaaliorsinnaava? Nalunngeqatiginnissuserput ilusilersorneqarsinnaallunilu sungiusarneqarsinnaava? Apeqqutit tamakku allaaserisami tulliuttumi sammineqassapput.