Meeqqamik piuminaatsumik isumassuineq

„ULLUMI nuannisarpit?“ Susanip ernini Jimmy atuarfimmit aareerlugu biilimut ikeqatigigamiuk aperaa. Akinngilaq annullunili. „Aa, nuannisarsimanngilatit,“ misiginneqataarpasilluni oqarfigaa. „Oqaluttuukkusuppinga?“

„Naamik,“ Jimmyp anaanani saapiloorpaa.

„Isumakuluutigiinnarikkinuna nuannaarpasinnginnavit, ikiorusukkakkillu.“

„Ilinnit ikiorneqarusunngilanga!“ suaarpoq. „Apersorunnaarniannga. Uumigaakkit. Toqorusuppunga.“

„Jimmy!“ Susan anersaaruluppoq, „taamatut oqaluffigissanngilarma, pateqinavakkit. Ajunngitsumik piniaraluarpakkit. Suinuna? Qanorluunniit oqalukkaluaraangama ilioraluaraangamaluunniit kamaattarparma.“

Paatsiveerulluni, sulereernerminilu qasulluni, angallattut akornisigut Susan ingerlarsorpoq eqqarsaatigiitigalugu qanoq ililluni taama ittumik meerartaarsimanerluni. Pakatsisimavoq, ikioriarfeeruttutut misigaluni kamallunilu, aammali ernini ugguaatigalugu, imminullu pisuutittutut misigaluni. Susanip siooragaa ernini angerlamut apuukkuni qanoq qisuariassanersoq — nammineq ernini. Atuarfimmi qanoq pisoqarsimanera paaserusuppianngilaa. Immaqa aamma ilinniartitsisua sianeqqissaaq. Ilaannikkut saperluinnalersutut misigisarpoq.

Taamatut suunngitsunnguusaaraluit annernartumik saqitsaanninnguussinnaapput isumakulutsitsilerlutik. Meeqqat ADD/ADHD-rtut imaluunniit meeqqat arlaatigut „piuminaatsut“ ajornartorsiutinik naapitaqaraangamik amerlasuutigut sakkortuumik qisuariartarput. Kamassarissuupput angajoqqaaminnillu kamatsitsiasuullutik, nalornisoortitsiasuullutik qasutitsiasuullutillu.

Pissutsit nalilikkit akuliullutillu

Meeqqat taama ittut amerlanertigut silassorissuupput, nassaarniallaqqissuullutik misigissutsikkullu attortiasuararsuullutik. Pingaarpoq paasissallugu meeraammata peqqissut immikkulli ittumik pisariaqartitaqartut, taamaattumillu annerusumik itinerusumillu paasineqarnissartik pisariaqartikkaat. Isumassarsiat meeqqanut taama ittunut angajoqqaajusut iluaqutigisimasaat matuma kingulianiipput.

Siullermik pissutsit sunniinerillu suut meeqqamik paatsiveerutitsisarnersut paasiniartariaqarpoq. (Naleqqiuguk Ussatit 20:5.) Pingaartorujussuuvoq meeqqap misigissutsikkut aalassatsinneqannginnermini qanoq pissusilersornera angajoqqaat maluginiartarpassuk, akuliutipallassinnaajumallutik. Pissutsini aalajangersimasuni ikioriarfissaarunneq puffakkiartornerlu kiinnakkut takuneqarsinnaasarput. Taamaalinerani meeraq nununissaanik eqqaasissallugu iluaqutaasinnaavoq, imaluunniit pisariaqarsinnaavoq meeraq allamut saasassallugu. Unillatsiarneq iluaqutaasinnaavoq, pillaanertuunngitsoq, kissaammernerulli qaangernissaanut eqqarsarluareerlunilu ingerlaqqinnissamut angajoqqaanut meeqqamullu periarfissatut.

Pisumi taaneqareersumi Jimmy apeqqutinut soqutaanngitsutut ittunut qisuariapiloorpoq. Taamatut qisuariartarnini ileqqoraa. Angajoqqaajusut meeqqamik taama ittup kamarujussuartarneri imminnut tunngasutut isigigajuppaat, kisianni pingaartorujussuuvoq paasissallugu meeqqat tatineqartutut misiginertik ingasagilluinnaleraangamikku imminnut aqussinnaajunnaarluinnartartut. Taamaattumik siuneqarsuseqarluni iliuuseqarnissaq pingaartorujussuuvoq. (Ussatit 19:11) Susanip oqaatsinik annernartunik aniatitsinissaq pinngitsoortissinnaasimagaluarpaa oqaloqatigiinneq unitsissimasuuguniuk meerarlu eqqissinissaanut piffissalerlugu, immaqalu ullormut pisimasut ullup ilaa kingusinnerusukut oqaloqatigiissutigineqarsinnaasimassagaluarput.

Meeqqat tatineqartut

Inuiaat ullumikkut aatsaat taama ajornartorsiuteqartigalutillu isumakuluuteqartigilersimapput. Pissutsit allanngorsimapput; piumaffiginninneq annertoqaaq, aamma meeqqanut. Atuakkami Good Kids, Bad Behavior-mi tamanna pillugu ima allassimasoqarpoq: „Ajornartorsiutit meeqqat nalaattagaasa ilarpassui immaqa inuttut atugarisatigut ilimasuffiginninnerit allanngorsimanerannik toqqaannartumik imaluunniit toqqaannanngitsumik pissuteqarput.“ Meeqqanut ADD/ADHD-rtunut atuarfik naalliutsitsivittut issinnaavoq. Namminneq amigaatiminnut akiuunnertik ilutigalugu avatangiisiminni akeqqersimasutut navianartutullu issinnaasumi teknologiimut tunngasutigut allanngorarnerpassuarnut sungiussiniarnissaminnut pinngitsaalineqartuartarput. Tamanna ernumanerannik allisaasarpoq. Aammalu meeqqat ajornartorsiutinik tamakkuninnga aniguiniarnissaminnut misigissutsikkut inersimanngilluinnarput. Angajoqqaaminnit ikiorneqarnissartik pisariaqartippaat.

Tatisisut killilersimaakkit

Meeqqat nuannaartuullutillu peqqissuussappata avatangiisinik torersunik allanngujaatsunillu pilersitsinissaq pingaaruteqarpoq. Immaqa inuuniarnermik pisariunnginnerulersitsinikkut tatineqarnissamut pissutaasut killilersimaarneqarsinnaapput. Meeqqat pineqartut tassanngaannariartartuummata, allamut saasaruminartuullutik sammisaqarumatuullutillu ingasattumik nuannaarniuteqartinnissaat pinngitsoorniartariaqarpoq. Meeraq ataatsikkut pinngussanik assigiinngitsorpassuarnik pinguartinnaveersaartaruk. Suliassat ataasiakkaarlugit sammitittakkit. Meeqqat amerlasuutigut tukassaarillaqqissuugamik torissuseq eqqissinartittarpaat. Aqutassatik ikinnerujartortillugit oqinnerujartortillugillu allamut saaqattaarnatik pingaaruteqartumik sammisaqarnissartik piuminarnerujartortittarpaat.

Tatineqarnermut pissutaasunik killilersimaarinnissinnaasoq alla tassa ullormut sammisassanik torersumik eqaatsumillu pilersaarusiornissaq, tamanna meeqqanik toqqissisimanermik misigititsisinnaammat. Pingaarnerpaaq tassaanngilaq pisussat piffissami aalajangersimalluinnartumi pinissaat, kisianni aalajangersimasumik tulleriiaarnilimmik pinissaat. Tamatumani siunnersuutit makku immaqa iluaqutaasinnaapput: Pitsaasunik allanngorartunillu nerisaqarnissaa isumagisiuk, piffissanilu aalajangersimasuinnarni mamakujuttutortittarsiuk; asannittumik qasukkarsimanartumillu pissusilimmik innalernerani aalajangersimasumik ileqqoqaritsi. Pisiniarfiliaqattaarnerit meeqqat aallaamasut suli aallaamanerulissutigisinnaavaat, taamaattumik pisiniarfinnut amerlavallaartunukannginnissarsi siumut pilersaarutigereertarsiuk. Asimukassagaangassi meeraq ilisimatereertarsiuk qanoq pissusilersornissaa naatsorsuutigigissi. Sammisartakkat aalajangersimasut meeqqat immikkut ittumik pisariaqartitaqartut tassanngaannariartarnerminnik aqutsinissaminnut iluaqutigisarpaat. Tamannalu iluaqutigalugu angajoqqaat pissutsit assigiinngitsut siumut naatsorsorsinnaasarpaat.

Sammisartakkat aalajangersimasut saniatigut pitsaassaaq unioqqutitassaanngitsunik maleruagassaliornissaq nassuiarlugulu tamakkuninnga unioqqutitsineq qanoq kinguneqassasoq. Maleruagassat aalajangersimalluinnartut angajoqqaat tamarmik marluullutik aalajangersagaat meeqqanik paasititsisarput suut ileqqussaasut suullu ileqqussaanngitsuusut — taamaalillutillu akisussaassutsimik misigineq ilinniartarpaat. Immaqa peqqissaarnermi malittarisassat allattorlugit takuneqarsinnaasumut nivinngarsinnaavasi (taamaalilluni angajoqqaat meeqqallu tamarmik tamakkuninnga eqqaasinneqartaqqullugit). Angajoqqaat aalajangiussaminnik eqqortitsiuaannartut meeqqap misigissutsikkut toqqissisimanissaanut tunngaviupput.

Meeqqap nuannarisaanik nuannarinngisaanillu paasinninneq sungiussinerlu angerlarsimaffimmi sukanganartoqalernissaanik pinaveersimatitsisinnaavoq. Meeqqat taama ittut naatsorsoruminaatsuugamik tassanngaannariartartuullutillu meeqqanik allanik peqateqarnissartik ajornakusoortissinnaavaat. Assersuutigalugu pinngussatik meeqqanut allanut atortikkusunneq ajorpaat, angajoqqaalli meeraq isumaqatiginiarsinnaavaat pinngussat suut meeqqanut allanut atortittarsinnaagai. Angajoqqaat isumagisinnaavaat meeqqanik amerlavallaartunik pulaartoqannginnissaa pinnguaqatiminillu ingattarsertinneqalinnginnissaa — tamanna meeqqat imminnut aqunnissaannut iluaqutaassaaq.

Pingaartorujussuuvoq angajoqqaat meeqqamik nammineq pissutsini atorlugu ineriartortitsinissaat, pinngitsaalillugu aalajangersimasumik pissuseqalersinniarsarinagu. Nerisassat atisalluunniit aalajangersimasut meeqqap piumanngippagit tamanna maleruutiinnarfigisariaqarpaat. Suunngitsut taama ittut akerleriissutigissallugit pisariaqanngilaq. Suut tamaasa aqunniarsarissanngilatit. Eqqissisimallutillu nunusinnaassuseqarit, ilaqutariinnili kristumiuusuni suut akuerineqarsinnaasut suullu akuerineqarsinnaanngitsut eqqarsaatigalugit najoqqutassanik eqqortitsiuaannarit.

Perorsaaneq

Meeqqat naatsorsoruminaatsut meeqqanit allanit annerusumik perorsaatissinneqarnissamik perorsarneqarnissamillu pisariaqartitsinerusutut ittarput. Taamaattumik angajoqqaavi pisuusutut misigeqqajaasarput meeqqatik perorsaatissikulasariaqartaramikkik. Tamatumani pingaaruteqarpoq perorsaatissiinerup pinerliinerullu immikkoortinnissaat. Atuagaq A Fine Line — When Discipline Becomes Child Abuse naapertussagaanni meeqqanik timikkut pinerliinerit tamarmik 21 procentii meeqqat ingasattumik pissusilersorsimanerannik pissuteqartarput. Taamaattumik misissueqqissaartartut ilaat isummersimapput meeqqat ADD/ADHD-rtut „timikkut pinerlineqarnissaminnut imaluunniit isumaginngitsoorneqarnissaminnut navianartorsiornerusartut“. Meeqqanik immikkut ittumik pisariaqartitalinnik perorsaaniarneq piumaffigineqarnartorujussuusinnaavoq, pitsaasumilli oqimaaqatigiissumillu ingerlanneqartariaqarpoq. Meeqqat taama ittut silassorissuusarmata nassaarniallaqqissuullutillu tunngaveqartumik eqqarsalersinniarnissaat angajoqqaanut unamminiarnartuusinnaavoq. Angajoqqaat tunngavilersuutaat pitsaasut meeqqat kukkunersiorniartarpaat. Tamatumuunakkulli nakkaannartassanngilatit! Angajoqqaatut oqartussaassutsit aalajangiusimajuk.

Inussiarnersumik aalajangersimasumilli meeraq nassuiaattaruk; takivallaamik nassuiaanaveersaarit, maleruagassallu aalajangersimasut ’isumaqatiginninniassutiginaveersaakkit’. „Aap“ aappimik isumaqartittaruk aammalu „naagga“ naaggamik isumaqartittaruk. (Naleqqiuguk Matîuse 5:37.) Meeqqat naalagaanngillat; taamaattumik ’isumaqatigiinniarneq’ oqqannermik, kamannermik, pakatsinermik immaqaluunniillu allaat ilaannikkut suaartaannermik tikivilluniluunniit akiuunnermik nassataqartarpoq. (Evfisumiut 4:31) Aamma sioorasaarikulavallaassanngilatit. Meeraq perorsaatissinneqartariaqarpat ingerlaannaq taamaaliortariaqarpoq. Atuakkami Raising Positive Kids in a Negative World-imi ima oqaatigineqarpoq: „Oqartussaassuseq eqqissisimanermut, tatiginassutsimut aalajangersimalluinnarnermullu attuumassuteqarpoq.“ Aammalu The German Tribune-mi siunnersuutit pitsaasut malugikkit: „Allamut saaqqajaananngitsumik meeqqamut oqaluttarit: atia taakulasaruk, isaasigut isigiuarlugu oqaatsinillu paasiuminartunik atuillutit.“

Angajoqqaat imminnut naalakkersinnaanertik katakkaangassuk pinerliineq pisarpoq. Angajoqqaat nilliappata paasinartarpoq imminut naalakkersinnaanertik katareersimagaat. Ussatit, kapitali 15, meeqqanik perorsaanermut perorsaatissiisarnermullu tunngasoq atuarlugu ilikkagaqarnartorujussuuvoq. Assersuutigalugu versimi 4-mi ima allassimavoq: „Sallaatsumik oqalunneq orpittut inuunartutut ippoq, pisuusaarlunili oqalunneq tarnimut aseruutaasarpoq.“ Versimilu 18-imi allassimavoq: „Kamajasup isumaqatigiinnginneq saqitsaannerlu pilersittarpai, kamajaatsulli isumaqatigiinnginneq sallangersikkiartortarpaa.“ Kiisalu versimi 28-mi allassimavoq: „Iluartoq oqalulersinnani eqqarsaqqaartarpoq.“

Nersualaarineq isornartorsiuinermut taarsiullugu

Meeqqat perorsaruminaatsut eqqumiitsunik, aap, allaat silaatsumik, iliortarput, suliumatoorujussuuppullu; taamaattumik isornartorsiornissaat, quiassuaatiginissaat, mamarlernissaat imaluunniit saassutarinissaat angajoqqaanut ajornanngitsuararsuusinnaavoq. Kisianni Evfisumiut 6:4-mi, Phillips-ip nutsigaa naapertorlugu, allassimavoq meeqqat perorsarneqassasut „kristumiutut ilinniartitsinikkut kristumiutullu perorsaatissiisarnikkut“. Jesusip unioqqutitsisut qanoq perorsaatissittarsimavai? Ilikkagaqarnartumik, nakerisarsiunngitsumik aalajangersimalluinnartumillu unnersuussutaasumik perorsaatissittarsimavai. Perorsaaneq allanngoriartorneruvoq, ilinniartitseriaasiulluni — ingammik meeqqanut — uteqattaarneqartuartussaq.

Eqqortumik perorsaatissiisarneq avatangiisinik allanngujuitsunik, asannittunik tatiginartunillu pilersitsisarpoq, siunertaasorlu naapertorlugu sunniuteqassappat nassuiaanertaqartariaqarpoq. Meeqqat alliartortillutik ilikkariartortarmata aaqqiissutissamik ataasiaataasumik nassaassaqanngilaq. Aap, meeqqamik perorsaanermi isumassuineq asanninnerlu annertuut kiisalu piffissaq suliniuteqarnerlu annertuut pisariaqarput — ingammik meeqqat piuminaatsut pineqaraangata. Oqariaaseq manna eqqaamassallugu immaqa iluaqutaassaaq: ’Isummat oqaatigiuk oqaatigisatillu ilumoorutikkit, iliuuseriumaarnerakkatillu iliuuserikkit.’

Meeqqat piuminaatsut pissusiisa qasunarnerpaartaasa ilaat tassa sammineqartuarnissaminnik pisariaqartitsinerat annertooq. Sammineqartarnerat amerlavallaartutigut ajunngitsumik pinnani ajortumik aallaaveqartarpoq. Ajunngitsumik pissusilersoraangat ajunngitsumillu naammassisaqaraangat maluginasuartaruk nersualaarasuartarullu imaluunniit akissarsitillugu. Taamaaliorneq meeqqamik assut nuannaalersitsisarpoq. Aallaqqaataani immaqa tassuunakkut suliniutitit ingasattajaalaarsinnaagaluarput, qularnanngitsumilli kinguneqassapput. Meeqqat annikitsumik piareersagaanngitsumilli akissarsisinneqartarnissartik pisariaqartippaat.

Greg — ataatap misigisai

„Ernerput Greg tallimanik ukioqarluni meeqqanillu paaqqinnittarfimmiitilluni ADHD-rtutut paasineqarpoq. Taamani meeqqat nakorsaannut saaffiginnippugut, taassumalu uppernarsarpaa Greg ADHD-rtoq. Oqarpoq: ’Taassuma kukkussutiginngilaa, aamma ilissi kukkussutiginngilarsi. Nammineq iliuuseqarfigisinnaanngilaa, ilissili iliuuseqarfigisinnaavarsi.’

Oqaasii taakku akulikitsumik eqqarsaatigisarpavut, eqqaasittarmatigut ernitta ADHD-rnini atorlugu inuusinnaanissaanik ikiornissaanut angajoqqaatut annertuumik akisussaaffeqartugut. Ulloq taanna nakorsap atuagassianik tunivaatigut, isumaqarpugullu ukiuni pingasuni kingullerni ilisimalikkavut angajoqqaatut akisussaaffitsinnik naammassinnissinnaanissatsinnut assut sunniuteqarsimasut.

ADHD-rtumik meeraqaraanni pingaartorujussuuvoq ajunngitsumik pissusilersornissaanut kajumissaartarnissaa aammalu iliuutsinut ajortunut mianersoqqusarnissaa, pisariaqaraangallu pillartarnissaa. Aalajangersimalluinnarnerujartortilluni angusat pitsaanerujartortarput. Najoqqutassat pisariitsut tamakku ADHD-rtumik meraqaraanni iluaqutissarujussuupput. Ajornartorsiutilli ullup ataatsip ingerlanerani takkuttuartarmata iliuuseqarnissaq oqaannarnermit artornarnerusinnaasarpoq.

Paasisimavarput unillatsiartarnerit sunniuteqarluartartut. Ajortumik pissusilersoraangat oqaaqqissaarniarlugu unillatsiaraangatta aamma isumagisarparput taassumunnga asanninnitta ersersinnissaa, taamaalillutalu ajunngitsumik pissusilersornissaanut kajumissaartarlugu. Asanninnermik ersersitsineq tamanna tassaasinnaavoq oqaatsit iluarinnippaluttut, pakkutaarineq immaqaluunniit allaat tunissutimininnguaq imaluunniit immikkut pisinnaatitaaffik. Ullut ilaanni nipputtartunut nippussuiffissamik pisivugut. Qulaani allapparput ajunngitsumik pissusilersorneq sunaanersoq. Greg ajunngitsumik pissusilersoraangat tamatigut nipputtartumik tunisarparput nippussuiffimminut nipputsitassaanik. Nippussuiffillu, oqarta, 20-nik nipputsitsivigineqareeraangat akissarsitittarparput. Nuannarilluinnagaanik akissarsitikkajunnerusarparput, soorlu pisuttuaqatigiinnermik. Aaqqissuussinerup tamatuma pissuserissaarnissaanut kajumissisippaa. Nipputtartut nipputsittarpai namminerlu takusinnaasarlugu akissarsiassani qanoq qanitsigisoq.

Aamma paasisimavarput qinigassaqartinnissaa pitsaasuusoq. Naalakkernissaanut taarsiullugu qinigassittarparput. Ajunngitsumik pissusilersorsinnaavoq imaluunniit taamaaliunnginnerup kinguneri atorsinnaavai. Taamaalilluni akisussaaffimmik misigineq silatuumillu aalajangiineq ilinniarpai. Ajornartorsiut nangeqattaartuartoq pineqarpat, soorlu pisiniarfimmi neriniartarfimmiluunniit naalaalliorpat, nipputtartunik periaaseq atorsinnaavarput. Taamaalilluni ajunngitsumik pissusilersornerup iluaqutaassusia takusinnaasarpaa, uagullu ersersittarparput siumukarnissaa eqqumaffigigipput.

Inuppassuit naluaat ADHD meeqqap pissusilersornerminik qisuariartarnerminillu aqutsisinnaassusianut sunniuteqartartoq. Amerlasoorpassuillu isumaqarput meeqqat taama ittut ilungersornerulaartuugunik uninnganeq pissusilersornerminnillu aqutsisinnaaneq sapissanngikkaluaraat; iluatsinngikkaangallu angajoqqaat pisuutinneqartarput.

Ilagiit naalagaaffilersaartarfimmi nalunaaquttap-akunnerini marlunni ataatsimiinneranni meeqqamut ADHD-rtumut uninngaqqissaarluni issianissaq timikkut pissutsit pissutigalugit ajornarluinnarpoq. Puiunngisaannarparput Gregip tallimaannarnik ukioqarluni ataatsimiigialeraangatta aperisarnera: ’Ataatsimiinneq sivisussava imaluunniit sivikissava?’ Oqarfigigaangatsinni nalunaaquttap-akunnerinik marlunnik sivisussuseqassasoq qiarsuataalertarpoq nalunnginnamiuk taama sivisutigisumik uninngalluni issianeq saperlugu. Nappaatip tamatuma killissaqartitsineri naammagalugit atortariaqarpavut. Nalunngilarput Jehovap nappaat tamanit paasisimanerpaagaa, tamannalu tuppallernartuuvoq. Greg maanna pissusissamisoortumik ineriartorpoq, nakorsaatitornerlu ajorpoq.

Jehovamik neriuffiginninnerput silarsuassamillu nutaamik siumut isiginninnerput iluaqutigaarput. Neriuut Gregimut assut pingaaruteqalereerpoq. Nuannaartaqaaq, ilami allaat qullilisarpoq, eqqarsaatigigaangamiuk nappaatini Jehovap silarsuassami nutaami peerumaaraa.“

[Qupp. 9-mi ungalusaq]

Ajunngitsumik pissusilersornermut akissarsiaq tassaasinnaavoq:

1. NERSUALAARINEQ — pitsaasumik naammassisaqaraangat iluarinninnermik oqaatsikkut ersersitsineq; ajunngitsumik pissusilersorneranik pingaartitsinermik ersersitsineq tunniusimanermik, asannittumik eqitaarinermik saamarpaluttumillu kiinnerfiginninnermik ilalik.

2. NIPPUTTARTUNIK PERIAASEQ — ersarissumut ilillugu, nipputtartut kusanartut ullorissalluunniit ajunngitsumik pissusilersornissamik kajumissaarisut.

3. PISSUSERISSAARNERIT ALLATTORLUGIT — naammassisat pitsaasut nersortariallillu. Meeraq arlaannik ajunngitsumik ilioraangat tamatigut, qanorluunniit annikitsigigaluarpat, allaguk ilaquttannullu nipituumik atuarlugu.

4. ’PISSUSERSIUT’ — Meeqqap pissusilersornera apeqqutaatillugu akissarsiassanik mamartunik ’nakkaatitsivimmut nakkartitsisoqartarsinnaavoq’ meeraq nersortarialimmik ilioraangat (tigussaasumik akissarsisitsineq). Siunertaasoq tassa pointilersuinertut ittumik atuutitsinissaq, akissarsiassat tassaasinnaallutik ilaqutariit pisassareriigaat, soorlu filmeriarneq, sukuutseriarluni aneerneq imaluunniit neriniartarfimmut neriartorneq. Sussa meeqqamut ima oqarnak: „Naalanngikkuit anissanngilagut,“ ima oqarsinnaavutit: „Naalakkuit anissaagut.“ Tassa ajortumik eqqarsarneq ajunngitsumik taarserniartariaqarpoq, eqqaamasariaqarporli tamanna sivisusinnaammat.

[Qupp. 7-mi assiliartaq]

Oqaloqatigiinnerit suaartaanninnguussinnaasarput

[Qupp. 8-mi assiliartaq]

Aalajangiigaanni nassuiartariaqarpoq suna siunertaanersoq, aalajangikkallu aalajangiusimasariaqarput

[Qupp. 10-mi assiliartaq]

Tulluusimaarluni nipputsitsivoq