Jesusip naalaffik minguiaraa

JESUS kamangaarami! Sooq taama kamatsigisoq nalunngiliuk? Angutit uku Guutip naalaffianiittut piumatoqimmata. Taakkua inuit Guutisioriartortut iluanaarniapiluffigisarpaat.

Ussigit savallu tuillu tamaasa takusinnaavigit? Angutit naalaffiup eqqaaniipput uumasullu tuniniarlugit. Sooq? Guutimut pilliinissaminnut Israelikkut uumasut atussammatigit.

Guutip inatsisaani allassimavoq Israelikkuusoq eqquunngitsulioraangami Guutimut pilliisassasoq. Allatiguttaaq Israelikkut Jerusalemimi naalaffimmi maani Guutimut pilliuteqartartussaapput. Israelikkulli uumasut pilliutissat sumit pisarpaat?

Israelikkut ilaat namminneq timmiaateqarput uumasuuteqarlutillu. Taakku pilliutigisinnaavaat. Amerlasuulli uumasuuteqanngillat. Ilaallu Jerusalemimit taama ungasitsigisumi najugaqaramik uumasuutiminnik naalaffimmut nassarsinnaanngillat. Taamaattumik maanga naalaffimmukartarput uumasullu timmissallu atorfissaqartitatik pisiaralugit. Tuniniaasulli taakkua uumasuutitik akisuallaamik tunisarpaat. Inunnik uukapaatitsisarput. Aammami maani Guutip naalaffiani tuniniaasussaanngikkaluarput.

Taamaattumik Jesus taama kamatsigaaq. Nerriviit aningaasiviusut uppitippai aningaasat kuillugit. Aamma allunaasanik iperaatsiorpoq uumasullu tamaasa naalaffimmit anisillugit. Tuinik nioqqutillit oqarfigai: ’Tamakku annissigik! Ataatama illua aningaasannanniarfigiunnaarniarsiuk!’

Jesus ajoqersugaasa ilaasa maani Jerusalemimi naalaffimmi ilagaat. Taamaaliornera takullugu tupigusupput. Taava Guutip ernera pillugu Biibilimi allassimasoq eqqaavaat: ’Guutip illuanut asanninnera iluani innertut ikualassaaq.’

Jerusalemimi maani poorskisiorneq najuuffigitillugu Jesus amerlasuunik tupinnartuliortarpoq. Kingornagut Judæamit aallarpoq Galilæamullu uterluni. Angalanermini nuna Samaria aqqutigaa. Tassani pisimasut paasiniariartigik.