Nalunngiliuk?

Sooq Jiisusip naalaffimmi Jerusalemimi uumasunik tuniniaasartut ‘ujajaasunik’ taavai?

MAT­THÆUSIP iivangkiiliuani ima al­las­simavoq: “Jiisusi naalaf­fiup silarlianut iser­poq, tas­sanilu tuniniaasut pisiniar­tul­lu tamaasa anisip­pai, aningaasanil­lu nioq­quteqar­tut nerrivii tuinil­lu nioq­quteqar­tut is­siavii up­pitip­pai oqarlunilu: ‘Al­las­simavoq: “Il­luga qinusarfim­mik taaneqar­tas­saaq.” Ilis­sili ujajaasunut inis­san­ngor­tip­parsi.’” – Matt 21:12, 13.

Oqalut­tuarisaanermit erser­poq naalaf­fim­mi niuer­tut pisiniar­tunut naaper­tuil­luan­ngitsumik akisunaarerujus­suar­tar­tut. Tuit as­sersuutigeriar­tigit. Akikingaarmata piitsut pil­liutis­samin­nik tuisisin­naasarsimagaluar­put. Juutil­li itsaq al­lagaan­ni al­las­simavoq kristumiut siul­liit nalaan­ni marlun­nik tuisis­sagaan­ni denarimik kuultiusumik akiliisoqar­tariaqar­toq. Sulisar­toq denarimik kuultiusumik akis­sarsis­saguni ul­luni 25-ni sulisariaqar­poq. Tuit akitsungaarmata piitsut tuisinis­samin­nut akis­saqan­ngil­lat. (3 Mos 1:14; 5:7; 12:6-8) Rabbinerip Simeon ben Gamalielip taman­na kamaatigingaaramiuk juutit pil­liutigisar­tagaan­nik ikilisaas­simavai. Ingerlaan­naq tuit marluk denarip kuultiusup hundrederar­terutaanik akikil­lip­put.

Soorlu paasisin­naagip­put naalaf­fim­mi niuer­tut piumatuujusimap­put pisiniar­tul­lu iluanaarfigisarsimal­lugit. Taamaat­tuminguna Jiisusip taak­ku ‘ujajaasunik’ taagai.