Jehovap Nalunaajaasui immikkut upperusiortuuppat?
JESUS KRISTUS imerajuttuunerarlugu, nerrersuujuneralugu, sabbatinik unioqqutitsinerarlugu, ilumuunngitsumik nalunaajaasuunerarlugu, Guutimik mitallersuunerarlugu Satanimullu ikiortaanerarlugu unnerluutigineqarsimavoq. Aserornartutullu aamma unnerluutigineqarpoq. — Matîuse 9:34; 11:19; 12:24; 26:65; Juánase 8:13; 9:16; 19:12.
Jesusip toqunerata makinneratalu kingorna ajoqersugai taamatut ajortunik unnerluutigineqartarsimapput. Ukiuni hundredelinni siullermi kristumiorpaaluit inunnit ima nilliasunit uniarneqarlutik illoqarfiup naalagaanertaanukartitaasimapput: ’Inuit najugaata tamarmi inuinik killormoortitsisut.’ (apustilit suliait 17:6) Pisimasumi allami apustili Paulus angalaqataalu Silas naalagaanernut pisinneqarput illoqarfimmiullu Filippimiut aalassaatigeqisaannik unnerluutigineqarlutik. — apustilit suliait 16:20.
Kingusinnerusukkut Paulus ’toqorarnertut ajoqutaatigisutut, juutinillu tamanik inuit najugaanni tamarsuarmi pikitsitsisunngortitsisutut’ unnerluutigineqarpoq aamma ’naalaffimmik nalinginnaatitsisutut’. (apustilit suliait 24:5, 6) Romami juutit siuttuisa Jesusip malittaasa atugarisaat miserratiginagit eqqortumik oqaatigisimavaat: ’Immikkooqatigiit [immikkut upperusiortut] taakku tamaginni assortorneqartut ilisimagatsigik.’ — apustilit suliait 28:22.
Peqatigiit nutaat taakku Jesus Kristusimik aallartinneqarsimasut nalinginnaasumik akuerisaasumit akerliusumik immikkut isumalittut ileqqulittullu isiginiarneqarsimapput. Qularnanngitsumik ullumikkut amerlasuut kristumiut aserornartutut isiginiarpaat. Unnerluussisut inuiaqatigiinni nuimasuusarput ataqqisaasarlutillu, tamannalu unnerluutaannik sakkortusisitsisarunarpoq. Jesusimik ajoqersugaanillu unnerluussinerit amerlasuut upperaat. Taamaakkaluartoq nalussanngilat unnerluussutit tamavimmik eqqunngitsuusut! Imaanngilaq unnerluussutit inunnit oqaatigineqaannarnertik ilumuulissutigissagaat.
Ullumikkummi? Jehovap Nalunaajaasui allamik isumalittut ileqqulittullu nalinginnaasumik akuerisaasumut akerliusumik upperisalittut oqaatigineqarsinnaappat? Jehovap Nalunaajaasui immikkut upperusiortuuppat?
Uppernarsaatit suna takutippaat
St. Petersborgimi, Ruslandimi naalagaaffimmi atorfilik oqarsimavoq: „Jehovap Nalunaajaasui immikkut upperusiortutut isertortutut taarsiortutut meeqqaminnik imminnullu toqutsisartutut isigaavut.“ Qanittukkulli nalunaajaasut pissusivii russit paasisimavaat. Nunarsuaq tamakkerlugu suliniuteqarnermi Jehovap Nalunaajaasuinik suleqateqareerluni atorfilik taanna nassuiaavoq: „Maannakkut inuit nalinginnaasut qungujalasullu, nalunngisannik pitsaanerusut, takuvakka. Eqqissisimasuupput nipaatsuullutillu asaqatigeeqalutillu.“ Nangipporlu: „Paasisinnaanngivippara sooq inuit taama salluliuutigitigigaat.“
Jehovap Nalunaajaasui ataatsimiikkaangamik ileqqulersuutilersorneq ajorput, guutisiorneralluunniit isertortuunngilaq. Atuakkiortoq nalunaajaasuunngitsoq Julia Mitchell Corbett allappoq: „Rigssalimi (ataatsimmiittarfii oqaluffinnik taaneqarneq ajoramik) ataatsimmiikkangamik, sapaatip akunneranut ataasiaannaratik, piffissaq annertooq atorlugu Biibilimik atuaqqissaartarput oqaloqatigiissutigalugulu.“ Ataatsimiinneri ammasuusarput inuillu tamarmik tililluaqqusaasarlutik. Nalunaaqqaaratik isertut tikilluaqquneqangaartarput.
„Nalunaajaasut inussiarnersutut, ilumoortutut suliumatuutullu tusaamasaalersimapput,“ Corbett atuakkiamini Religion in Amerika-mi allappoq. Nalunaajaasuunngitsut amerlasuut paasisarpaat Jehovap Nalunaajaasui eqqumiitsuunngitsut allakkajaajunngitsullu. Pissusiat nalinginnaasumik akuerisaasumut akerliunngilaq. The New Encyclopædia Britannica eqqortumik allappoq Nalunaajaasut „ileqqorissuuneq aalajangiusimagaat.“
USA-mi fjernsynimik aallakaatitsivimmi nutaarsiassanut immikkullu aallakaatitassanut ittuusoq TV-mi nutaarsiassani Nalunaajaasut pillugit paqumisulluni aallakaatitassiaq 60 Minutes („Minuttit 60-it“) pillugu Jehovap Nalunaajaasuinut allappoq: „Inuit amerlanerit upperisassitut inuugaluarpata, inuiaqatigiit ullumikkutut innavianngikkaluarput. Tusagassiortuuvunga nalunngilaralu peqatigiiffissi asanninnermik Pinngortitsisumullu upperluarnermik tunngaveqartoq. Ilisimatikkusuppassi tusagassiortut tamarmiunngitsut kinaassusersiortarmata.“
Upperisarsiortut naluneqanngilluartut
Jehovap Nalunaajaasui upperisarsiortutut ikittutut ingasaassiniartutullu taassallugit ilumoortuliornerussava? Ilumooraluarpoq Jehovap Nalunaajaasui upperisarsiortut ilaannut naleqqiullugit ikittuusut. Tamaakkaluartoq Jesusip oqaasia eqqaamajuk: ’Isertarfik nerukippoq, aqqusinerlu ameqaaq inuunartumut sammisoq, taassuminngalu nanisisut ikeqaat.’ — Matîuse 7:13, 14.
Qanorluunniit ikkaluarpat nalunaajaasut immikkut upperusiortunut ikittunut ingasaassiniartunullu ungaseqaat. 1993-mi upernaakkut nalunaajaasut Jesusip toquneranik eqqaaniaanerannut 11 millionit ilaasimapput. Pingaarnerusumilli ileqqussatigut pissusiisa maligassiuilluarnerisalu, silarsuarmi tamarmi unnersiutigineqalersippaat. Qularnanngitsumik tamanna pissutaasimassaaq upperisarsiortutut ilisimaneqarluartutut ilumoortutullu nunani pisortatigut akuerisaalersimanerannut.
Europami Inuit Pisinnaatitaaffii Pillugit Ataatsimiititat qanittukkut aalajangersagaat maluginiarnartuuvoq. Nalunaarput nalunaajaasut eqqarsaatimikkut ilerasuutissinneqartariaqanngitsut upperisarsiornikkullu kiffaanngissuseqassasut upperisartillu oqaluussissutigisinnaagaat allanullu ilinniartitsissutigalugu. Taamaattoqarsinnaassanngikkaluarpoq Jehovap Nalunaajaasui ilaasortassarsiornerminni tammartitsiniaasartuuppata ileqqorluttuliortarlutilluunniit ilaasortamilluunniit isumaat aqunniarlugit uukapaatitsiniartaraluarpata.
Nunarsuarmi tamarmi amerlasuut Jehovap Nalunaajaasuinik ilisarisimannilluarput. Nalunaajaasuunngitsut millionilikkuutaat nalunaajaasunik Biibilimik atuaqqissaaqateqartartut atuaqqissaaqateqartarsimasulluunniit aperigutsigik: ’Uukapaateriaraluarpaatsit? Nalunaajaasut isumannik aqutseriaraluarpat?’ qularnanngitsumik „nagga“-mik akissavaatigut. Ersarippoq, taamatut iliortoqartaraluarpat, Jehovap Nalunaajaasuinik illersuiniaraluartut imminut akerliusunik ajorsartitaasassagaluartut.
„Inuiannik soqutiginnittut“
Immikkut upperusiortut ilaasortaat ilaquttaminnit, ikinngutiminnit inuiaqatigiinniillumi avinngarusimaniartarput. Jehovap Nalunaajaasui taamaappat? „Jehovap Nalunaajaasuinut ilaasortaanngilanga,“ Tjekkiamiut Kunngiitsuuffianni tusagassiortoq allappoq. Nangipporlu: „Ersarippoq [Jehovap Nalunaajaasui] ileqqussatigut nukittoorujussuusut. . . . Naalakkersuisut oqartussaanerat akueraat upperivaalli Guutip Naalagaaffiata kisimi inuiaat ajornartorsiutaat aaqqissinnaagai. Takussagilli — ingasaassiniartuunngillat. Inuupput inuiannik soqutiginnittut.“
Ilaquttaminnit allanillu avinngarusimaniartuunngillat. Jehovamut nalunaajaasut ilaquttaminnik asanninnissartik isumaginninnissartillu Biibilimi peqqussutaasoq akueraat. Inuiaqatigiit upperisarsiortullu tamaneersut akornanni inuullutillu sulipput. Ajunaarnersuaqaraangat ikiuutissanik isumaginnikkasuartarput.
Pingaarnerusumilli ilinniartitsineq asseqanngitsoq ingerlappaat. Upperisarsiortut qassit inuiaqatiminnut ilaasut tamaasa pulaarneqartarnissaat aaqqissugaasumik isumagaat? Jehovap Nalunaajaasui nunani 200-nit amerlanerusuni oqaatsillu 200-nit amerlanerusut atorlugit taamaaliorput! Ersarippoq Jehovap Nalunaajaasui ’inuiannik soqutiginnittuusut.’
Biibilimik upperinnilluarneq
Miserratigisassaanngilaq Jehovap Nalunnaajaasuisa ilinniartitsinerat ilagiit oqaluffeqarfillit iliuusaannit allaanerusoq. Jehovap Nalunaajaasuisa upperaat Jehova Guutiusoq ajugaqanngitsoq Jesusilu ernerigaa, pingasuullunilu ataasiusumut ilaanngitsoq. Guutip naalagaaffia kisimi inuiaat naalliuutaannik aaqqiisinnaasutut upperilluinnarpaat. Aaqqissussaanerit ileqqorluttut aserorsaanerinut inuit mianersoqqusarpaat. Inunnut naalattunut nunami paratiisimik Guutip neriorsuutaanik oqaluussisarput. Sanningasulik ataqqiniagassatut isiginngilaat. Juullisiorneq ajorput. Tarnip toqusarnera upperaat, anniarfeqarnera upperinngilaat. Aattorneq ajorput, aalersortinerlu akuerissanagu. Politikkimut akuunngillat sorsuttunullu peqataasaratik. Imminut apererusussimavit sooq Jehovap Nalunaajaasui ajoqersuutaat taama allaanerutigisoq?
Massachusettimi aviisip Daily Hampshire Gazette-p nassuiaanera naapertorlugu Jehovap Nalunaajaasui „Biibilip inerteqqutaanik maleraaqqissaartuusut uffa allat sumiginnaraat . . ., taamaaliortarput ukiuni hundredelinni kristumiut maligassiaat Biibilillu oqaasii maleqqissaarniarlugit.“ The Encyclopedia of Religion isumaqataalluni allassimavoq: „Upperisaat tamarmi Biibilimik tunngaveqarpoq. ’Uppernarsaatit’ (Biibilimit issuakkat) upperisartik eqqartoraangamikku tamatigungajak ilaatittarput, Biibililu inaarutaasumik oqartussatut isigaat, ileqquusut peersillugit.“ Atuagaq Religion in America allappoq: „Biibilimik atuaqqissaarnermik sammisaqarneq nalornisiginngisaannarpaat, ilinniartitaanerallu Allakkanut Illernartunut unnersuussisunik peqqissaartumik aaqqissuussavoq.“
Kina siulersortigaat?
Inummik siulersuisumik ataqqinninnginnissamik pingaartitsinnginnisamillu Biibilip ajoqersuutaanik malinneqqissaarniartuunertik pissutigalugu Jehovap Nalunaajaasuisa akornanni taamaattunik nassaassaqanngilaq. Oqariaaseq ’palaseqarneq-inuinnaat’ akuerinngilaat. The Encyclopedia of Religion-ip tulluartumik Jehovap Nalunaajaasui allaatigai: „Palaseqarneq immikkullu taaguutilersorneq inerteqqutaavoq.“
Jesus Kristus Naalakkamittut kristumiullu ilagiivisa qullersaattut malippaat. Jesus imatut oqarsimavoq: ’Ilissi ajoqersuisunik taaqqussanngilasi, ataaseq ajoqersortigigassiuk, Kristus; ilissili tamassi qatanngutigiippusi. Nunamiusorlu ataatassinnik taassanngilarsi, ataaseq ataatagigassiuk, qilammiittoq. Tasissersuisunillu taaqqussanngilasi, ataaseq tasissersortigigassiuk, Kristus.’ — Matîuse 23:8-12.
Ersarippoq Jehovap Nalunaajasui immikkut upperusiortunut ungasissut, soorlu Jesus nerrersuunit imerajuttunillu ungasissoq. Oqaatigisariaqarpoq Jesusimik ajoqersugaanillu ajortisaariniaraluartut tamatigut iluatsitsineq ajormata. Ilaat paasinerluiinnarsimassapput. Jehovap Nalunaajaasui upperisaallu pillugit apeqqutissaqaruit, soormi ilisarisimanerulerniarsarigukkit? Rigssalimut matuat sallusuissumik ujarlertunut tamanut ammavoq.
Biibilimit ilisimassummik peqqissaartumik ujarlertarnerat iluaqutigisinnaavat Guutimillu pallorfiginninneq Jesusip oqaasiinut naleqquttoq ilikkarsinnaavat: ’Ullut nalliukkumaarput, maannakkummi nalliussimapput, taava pallorfiginnittut ilumoortut ataataq pallorfigissavaat anersaakkut ittumik ilumoortumillu; pallorfigisinimi taamaattut ataatap piumavai.’ — Juánase 4:23. (wD 15/2 94)