Jehovap piumasaatut iliorput

Eliasip Guuti ilumoortoq qutsissisikkaa

ISRAELIMI tamanit malersorneqarnersaavoq. Kunngimit nanineqaruni toqunneqariaannaavoq. Angut persarineqartoq taanna kinaana? Jehovap pruffiitia Elias.

Kunngi Akab nulialu Guutimik nalusuneersoq, Jesabel, pisuullutik Ba’alisiorneq Israelimi assut atugaalersimavoq. Taamaattumik Jehovap nuna tamanna panernersuaqartilersimavaa, maanna ukiut sisamassaanni atuuttumik. Jesabelip kamaqisup Jehovap pruffiitii toqutaatinniarsarai, Akabilli ingammik Elias toqutaatikkusuppaa. Elias ukiut pingasunit amerlanerusut tamatuma siorna Akabimut ima oqarsimavoq: „Ukiuni tulliusuni isugutaqassanngilaq sialoqassananiluunniit uanga peqquseqqaartinnanga.“ (1 Kunngit 17:1) Taamanernillu panernersuaq suli ingerlajuarsinnarpoq.

Elias navianartorsiuleruttornerani tamatumani Jehovap ima oqarfigaa: „Akab orniguk, maannami nunami siallersitsinialerama.“ Imminut assut navianartorsiortilluni Elias Jehovap peqqussutaa malillugu iliorpoq. — 1 Kunngit 18:1, 2.

Illua’tungeriit naapipput

„Aa, tassa illit Israelimik ajunaartitsisoq!“ Elias saallugu Akabip oqarfigaa. „Uanga Israelimik ajunaartitsisuunngilanga, illilliuna eqqarlitillu ajunaartitsisuususi [Jehovap] peqqussutai naalakkunnaarassigit illillu nammineq Ba’alit malikkakkit,“ Elias qunusuilluni akivoq, siunnersuillunilu Israelikkut tamarmik qaqqamut Karmelimut katersuutissasut „Ba’alip pruffiitii 450-it Asjerallu pruffiitii 400-t“ ilagalugit. Taava katersuuttut Eliasip ima oqarfigai: „Qanoq sivisutigisumik kina malissanerlugu aalajangerniarusaartuassavisi?a [Jehova] Guutiuppat taava taanna malissiuk, Ba’alilu Guutiuppat taanna malissiuk.“ — 1 Kunngit 18:17-21.

Inuit akinngillat. Immaqa Jehovamut tamakkiisumik tunniusimasussaagaluarlutik taamaaliorsimannginnertik paasilerpaat. (2 Moses 20:4, 5) Immaqaluunniit nalunngeqatiginnissutaat ima misikkarlutsigilersimapput Jehovamik Ba’alimillu ataatsikkut pallorfiginninnertik ajortuliornertut isigiunnaarsimallugu. Qanorluunniilli ikkaluarpat, Eliasip inuit peqquai ussinnik angutivissanik marlunnik aggiussissasut — ataaseq Ba’alip pruffiitiinut ataaserlu imminut. Ussigit marluk tamarmik pilliutissatut piareersarneqassapput, ikinneqassanatilli. „Taava Ba’alisiortut guutertik torlorfigissavaat, uangalu Guutiga torlorfigissavara. Guuti innermik akissuteqartoq tassaassaaq kisimi Guutiusoq.“ — 1 Kunngit 18:23, 24.

Jehova qutsissisinneqarpoq

Ba’alip pruffiitii ’pilliiviup sanasimasamik saani orraallutik qittaserput’. Ullaap’tungaa tamaat ima torlulapput: „Ba’al, tusartigut!“ Akineqaratilli. (1 Kunngit 18:26) Taava Eliasip mitaatigilerpai oqarfigalugit: „Nipitunerusumik torlulaniaritsi, torlorfigisarsimi guutiuvoq!“ (1 Kunngit 18:27) Ba’alip pruffiitii allaat panamik qalugiusamillu imminnut kilersitilerput — Guutimik nalusut guutiminnit nalligineqarumallutik pisarnerattut.b — 1 Kunngit 18:28.

Maanna ullup-qeqqa qaangerpaa, Ba’alisiortullu „pruffiitit ileqquattut“ pissusilersortuarsinnarput — tassa imminnut sianigiunnaarlutik imminnullu aqussinnaanatik. Taava Elias inunnut tamanut oqarpoq: „Maanga ornissiginga!“ Inuit tamarmik isikkuttut Eliasip Jehovap pilliivia ingutserneqarsimasoq sanaqqippaa, kaajallallugu kussiorluni ussillu angutiviaq aggoriarlugu pilliivimmi qisussat qaavannut ilillugu. Taava ussik, pilliivik qisussallu masattuinnanngorlugit imermik kuerarneqarput kussiarlu imermik immerneqarluni (qularnanngitsumik Immap Akullersuup ernganik). Eliasilu Jehovamut qinulerpoq: „Ullumi misigineqarli illit Israelikkunnut Guutiusutit uangalu kiffarigimma, illillu oqaatsitit malillugit makku tamaasa suliarigikka. Qinnutiga tusaruk, [Jehova]. Tusaannga inuiannut ukununnga paaseqqullugu [Jehova] illit kisivit Guutiusutit innuttatillu illit aqqutigeqqusakkut ingerlateqqilerniaritit.“ — 1 Kunngit 18:29-37.

Tassanngaannaq inneq qilammit nakkarluni „pilliutissaq qisussallu ujaqqallu eqqaatalu nunataa ikuallappai allaallu imeq kussialiamiittoq tissortillugu“. Inuit isiginnaartut nunamut pallorasuarput oqarlutillu: „[Jehova] Guutiuvoq! [Jehova] Guutiuvoq!“ Taava Eliasip peqqussineratut Ba’alip pruffiitii tiguneqarput kuunnguamullu Kisjonimukaanneqarlutik, tassanilu toqorarneqarlutik. — 1 Kunngit 18:38-40.

Uagutsinnut ilinniutissaq

Elias inuit pisinnaasaat qaangerlugu sapiissuseqarsimasorinarsinnaavoq. Biibilimilli allaqataasut ilaata Jakobip oqarsimaneratut ’inuusimavoq uatsitut misigisaqartartoq’. (Jâko 5:17) Ersinngivittarsimanngilaq isumakulunngivittarsimananiluunniit. Assersuutigalugu, Jesabel Ba’alip pruffiitiinik akiniussiniarluni sioorasaarimmat Elias ersilerluni qimaavoq Jehovamullu torlulalluni: „[Jehova], inuunera naammalerpoq! Toqutiinnannga.“ — 1 Kunngit 19:4.

Jehovap Elias toqutiinnanngilaa. Naakkinnillunili ikiorpaa. (1 Kunngit 19:5-8) Ullumikkut Guutip kiffai isumalluarsinnaapput ernumangaarfimminni, immaqalu allaat malersorneqarnerminni, aamma Jehovap taamatut iliorfigissagaatik. Tassami Jehova ikioqqullutik qinnuigigunikku ’pissaanermik angingaartumik’ tunineqarsinnaapput, ’tamatigut naalliukkaluarlutik nikallunnginnissaminnut’ iluaqutissaminnik. Taamaalillutik Eliasitut nikallujuinnissaminnut ikiorneqassapput. — 2 Korintumiut 4:7, 8. (wE 1/1 98)

[Quppernerup ataani ilanngussat]