Mitallersut mianersorfigikkit!
Siulittuiniartarneq ullumikkut nalinginnaaqaaq, siunissamillu paasiniaaniartarneq niuerutigineqartaqaaq. Londonimi aviisimi The Daily Telegraph-imi ima allassimasoqarpoq: „Ukioq 2000 qanilliartortillugu nalinginnaanngitsumik tupaallannarpallaanngitsumilli pisoqaraluttualerpoq. Inuit tuusintilikkuutaat nunarsuarmi sumi tamaaniittut siunissami pisussanik eqqumiitsunik amerlasuutigullu amiilaarnartunik siulittuiniartarput.“ Inuit ilarpassui oqartarput siunissami pisussanik soqutiginninnerujussuaq tamanna tassaaginnartoq siornatigut allannguutaasussatut neriuutigineqarsimagaluartut piviusunngorsimanngitsulli uteqqinneqarnerat.
UKIUNI 1800-kkunni hestinik qimuttoqarluni aqqusinikkut angallanneq annertusiartortillugu siulittuisoqarsimavoq Europami illoqarfiit hestit anaannik ulikkaarumaartut. Soorunami siulittuut tamanna eqquutinngilaq. Siulittuutit amerlasuutigut eqquuttannginnerat erseqqissarniarlugu Londonimi aviisimi The Times-mi ima allassimasoqarpoq: „Siunissaq tassaannaavorlusooq hestit anaat qaleriiaat.“
Navianartumik pisoqarnissaanik mianersoqqusisut inuit ilaannit illaruaatigineqartarput. Assersuutigalugu, niuernermik ilisimatooq USA-mi universitetimi atorfillip avatangiisit aserorneqaraluttuinnarnissaannik mianersoqqussuteqartut unammillersimavai pissutsit ajornerulissanersut ajornerulissannginnersuulluunniit aningaasartalerlugit eqqorniarnissaannik. Atuagassiaq New Scientist naapertussagaanni taanna oqarsimavoq ’inuunitta pitsaassusia pitsanngoriartuinnartoq qaqugorsuarmullu pitsanngoriartuinnassalluni’.
Naak eqqoriaanerit assigiinngitsut amerlagaluaqisut inuppassuit isummertarput suut tamarmik allanngungaarnavianngitsut. Ukiuni hundredelinni siullerni mitallersut assigalugit Guutip inuit akornanni pissutsinut akuliunnissaanik eqqarsaat illaruaatigisarpaat.
Suut tamarmik taamaaginnarpat?
Apustilip kristumiuusup Peterip allagaasa isumassarsiarititaasut aappaanni, ukiup 64-ip u.n.k. missaani allanneqarsimasuni, ima mianersoqqussuteqarpoq: ’Ullussani kingullerni tikiukkumaarput mittatilliillutik mitallersut illigutsannitik malillugit ingerlasut.’ — 2 Pîtruse 3:3.
Mitallersut illaruaatigisartik tissinaannartutut isikkoqalersinniartarpaat. Namminissarsiortuupput, tusarnaartut immissulli isummertinniartaramikkik. Immaqa mitallersut Peterip mianersoqqussutigisaasa — ’illigutsannitik malillugit ingerlasut’ — ilaat taamaapput. Peterip atuartussat mianersoqquniarlugit oqaatsini qalleqqissarpai, oqarluni ’mittatilliillutik mitallersut’ tikiukkumaartut.
Ukiuni hundredelinni siullerni mitallersut taakkua Kristusip ’tikiunnissaanik’ neriorsuutip pinissaa qularaat, ima oqarlutik: ’Naammiuna tikiunnissamik unnersuut? Siuaasammi sinippaarmatali kingorna pinngortitat pileqqaarnerannit suut tamarmik taamaaginnarput.’ (2 Pîtruse 3:4) Pissutsit taakkununnga taama isikkoqarput. Ukiumili 33-mi Jesusip siulittuutigisimavaa Jerusalem ajunaarnersuarmik eqqorneqarumaartoq. ’Ullut ilinnut nalliukkumaarput, taava qinngarsortitit kaajallallutit ungaluliorumaarput ilujumaarlutillu tamaginnillu annikilliortillutit, suerullutillu illit qitornatillu ilinniittut ujaqqanillu qaleriissuerullutit.’ Mianersoqqussummik tamatuminnga illaaruaatiginnittut kukkorujussuarput! Ukiumi 70-imi Romamiut sakkutuuisa Jerusalem unguaat illoqarfillu piuneerullugu inuppassuit amiilaarnartumik toqutaanerannik nassatalimmik. Sooruna illoqarfiup inuisa amerlanersaat ajunaarnersuarmut tamatumunnga piareersimasimanngitsut? Guutip ernini, Jesus Kristus, ikiortigalugu imminnik ’takusaanissaa’ upperiumasimannginnamikku. — Lúkarse 19:43, 44.
Apustili Peterip siunissami Guutip Ajugaqanngitsup akuliunnissaa eqqartorpaa, ima mianersoqqusilluni: ’Jehovap ullussaa tillittutut nalliukkumaarpoq.’ (2 Pîtruse 3:10) Taamanikkussamut Guutip guutiitsut nunarsuarmit piiassavai naapertuilluartutullu nalilerneqartut asattuullugit. Atuagassiami matumani erseqqissarneqartuartartutut Jesus Kristusip ’tikiuffissaa’ 1914-imi aallartippoq. Guutilli eqqartuussummik naammassinnitsitsisaatut ajussutsimik piiaaffissaa suli pinngilaq. Taamaattumik apustili Peterip mitallersunut mianersoqqussutaa ullumikkut aatsaat taama pingaartigaaq.
Immaqa illit Guutip inuit akornanni pissutsinut akuliunnissaanut sivisuumik utaqqisimasunut ilaavutit. Naammagittarlutit suli utaqqiuarnissannut mitallersunullu nakkaannannginnissannut suna iluaqutigisinnaaviuk? Akissut allaaserisami tulliuttumi atuaruk. (wE 1/6 98)
[Qupp. 4-mi issuagaq]
’Ullut ilinnut nalliukkumaarput, taava qinngarsortitit kaajallallutit ungaluliorumaarput ilujumaarlutillu tamaginnillu annikilliortillutit, suerullutillu illit qitornatillu ilinniittut ujaqqanillu qaleriissuerullutit.’ Mianersoqqussut tamanna illaruaatissaasimanngilaq, Romamiummi sakkutuuisa Jerusalem piuneeruppaat inuppassuit amiilaarnartumik toqutaanerannik nassatalimmik.