Jehovap ullussaa ilimagiuaruk
’Ullussani kingullerni tikiukkumaarput mittatilliillutik mitallersut.’ — 2 PÎTRUSE 3:3.
1. Nalitsinni kristumiut ilaat inuunini tamaat qanoq isumaqarsimava?
QATANNGUT angut ukiut 66-it sinnerlugit piffissaq tamaat kiffartorsimasoq ima allassimavoq: „Ukiuni 70-init amerlanerusuni eqqaamasanni tamani misigiuaannarsimavunga piffissaq sivikitsoq. Takorloortuaannarsimavara Harmagedoni aqaguagu nalliutissasoq. (sarĸúmersitat 16:14, 16) Ataatattut aatattullu [apustilip Peterip] ’Jehovap ullussaata nalliuffissaanik ilimasunnissamik’ kajumissaarutaa malittuarsimavara. Silarsuassaq nutaaq piviusutut takussaanngitsutut inuunera tamaat isigisimavara.“ — 2 Pîtruse 3:11, 12; Eprîarit 11:1; Jesaja 11:6-9; sarĸúmersitat 21:3, 4.
2. ’Jehovap ullussaanik ilimasunneq’ sumik nassataqarpa?
2 ’Jehovap ullussaanik ilimasuttuarnissatsinnik’ Peterip kajumissaarmatigut isumaqarpoq eqqarsaatitsigut kinguartitertassanngikkipput. Puiussanngilarput ulloq Jehovap silarsuassamik nutaamik pilersitsinnginnermini aaqqissuussaanermik maannakkut atuuttumik aseruiffissaa qanittuararsuusoq. Tamanna uagutsinnut ima piviusuutigisariaqarpoq siuninnguatsinniittutullusooq erseqqissumik takusinnaallugu. Itsaq Guutip pruffiitiisa taama piviutigisutut isigisimavaat qanittuararsuusutullu eqqartortarsimallugu. — Jesaja 13:6; Joel 1:15; 2:1; Obadja 15; Sefanja 1:7, 14.
3. Suna pissutigigunarlugu Jehovap ullussaa pillugu Peter unnersuussisimava?
3 Sooq Peterip kajumissaarpaatigut Jehovap ullussaa qaningaarami ’aqaguagulusooq’ nalliutilersutut isigeqqullugu? Kristusip najuinissaa neriorsuutaasoq, ajortuliortut pillarneqarfissaat, pillugu eqqarsaammik illaruaatiginnittoqalersimagunarmat. (2 Pîtruse 3:3, 4) Allakkami aappaata kapitaliisa pingajuanni Peterip mitallersut tamakkua oqaasii akerlilerpai. Kapitali tamanna atagu misissulaariartigu.
Itsaq pisimasunik sakkortuumik eqqaamanneqqusineq
4. Suna eqqaamassagipput Peterip kissaatigaa?
4 Peterip qatanngutini ’asasaminik’ taaqattaarpai, taakkuninnga asanningaarnini ersersillugu. Aallarniilluni kajumissaarpai ilikkarsimasatik puiornaveersaaqqullugit: ’Tassa, asasakka, aappassaanik allaffigeriilerpassi, allakkakka eqeersaatiginiarlugit eqqaasitsisarlunga ilumoortumik isumaqaqqullusi, eqqaaqqullusigik pruffiitit iluartut siulittuutigisaat apustilertassilu Naalakkamit Annaassisumit inassutigisaat.’ — 2 Pîtruse 3:1, 2, 8, 14, 17; Jûtarse 17.
5. Jehovap ullussaa pillugu pruffiitit ilaat qanoq oqarsimappat?
5 Suunuku ’pruffiitit iluartut siulittuutigisaat’ Peterip allakkaminik atuartussanut eqqaamaqqugai? Siulittuutit Guutip naalagaaffiata pissaanerani Kristusip najuinissaanut guutiitsunillu eqqartuussinissamut tunngasut. Siulittuutit tamakku Peterip siusinnerusukkut innersuussutigereersimavai. (2 Pîtruse 1:16-19; 2:3-10) Judasip innersuussutigaa Enok, pruffiitit Guutip ajortunut eqqartuussutissaanik mianersoqqusisut ilisimaneqartut siullersaat. (Jûtarse 14, 15) Enokip kingorna pruffiitit allat saqqummertarsimapput, Peterillu kajumissaarpaatigut taakkua allassimasaat puioqqunagit. — Jesaja 66:15, 16; Sefanja 1:15-18; Sakarja 14:6-9.
6. Jesusip apustilillu oqaasiisa suut Jehovap ullussaa pillugu oqaluttuuppaatigut?
6 Peterip atuartussat aamma kajumissaarpai ’Naalakkap Annaassisup inassutaa’ eqqaamaqqullugu. Jesus ilaatigut ima inassuteqarpoq: ’Mianersoritsi uummatisi . . . nanertorteqqunagit . . . ullup taassuma tassanngaannaq tikeqinavaasi nigatut.’ ’Misissoritsi, eqqumaniarlusilu qinugitsi, taammaaffissaa qaqugu nalliussasoq nalugassiuk.’ (Lúkarse 21:34-36; Mákorse 13:33) Peterip kajumissaarpaatiguttaaq apustilit oqaasii tusarnaaqqullugit. Assersuutigalugu, apustili Paulus ima allassimavoq: ’Jehovap ullussaa nalliukkumaarpoq soorlu tillittoq unnuakkut pisartoq. . . . Taamammat sininnaveerisa, ikkunatut pinnata, kisianni eqqumaniarta putumatsaalillutalu.’ — 1 Tásalûníkamiut 5:2, 6.
Mitallersut kissaatigisaat
7, 8. (a) Inuit qanoq ittut Guutip mianersoqqussutaanik illaruaatiginnittarpat? (b) Mitallersut taakkua qanoq oqarniartarpat?
7 Soorlu eqqaaneqareersoq Peterip oqaassutaanut tunuliaqutaavoq mianersoqqussutinik taama ittunik asissuerpaluttumik isiginnittoqalersimanera, itsaq Israelikkut Jehovap pruffiitiinik illaruaatiginnittarsimanerattut. (2 Israelikkut 36:16) Peter nassuiaavoq: ’Manna pingaarlugu nalussanngilarsi, ullussani kingullerni tikiukkumaartut mittatilliillutik mitallersut illigutsannitik malillugit ingerlasut.’ (2 Pîtruse 3:3) Judasip oqaatigaa mitallersut taakkua ’pileritsannipilutik’ guutiitsorpaluttut malillugit inuusut, aammalu ’tarnimut atasuusut, anersaamik ilumiugisaqaratik’. — Jûtarse 17-19.
8 Ajoqersuisooqqusersut Peterip oqarneratut ’uinik malillugu ingerlasut mingunnartut illigutsaallugit’ qularnanngitsumik mitallersunut anersaamillu ilumiugisaqanngitsunut ilaapput. (2 Pîtruse 2:1, 10, 14) Taakkua kristumiut aalajaatsut mitaatilliillutik ima aperisarpaat: ’Naammi-una tikiunnissamik unnersuut? Siuaasammi sinippaarmatali kingorna pinngortitat pileqqaarnerannit suut tamarmik taamaaginnarput.’ — 2 Pîtruse 3:4.
9. (a) Sooq mitallersut isumaqalersitsiniaasarpat piffissap sivikinnera Guutip oqaasiani pingaartinneqanngitsoq? (b) Jehovap ullussaanik ilimasuttuarnerput qanoq uagutsinnut sernissuutaassava?
9 Sooq taamatut mitaatiginnippat? Sooq oqaatigimisaarpaat Kristusip najuinissaa pinngisaannassasoq, Guuti inuit akornanni pissutsinut akuliutinngisaannarsimasoq taamaaliunngisaannassalunilu? Mitallersut taakkua piffissap sivikissusianik, Guutip oqaasiani erseqqissarneqaqattaartuartumik, nalornilersitsiniaanermikkut allanik anersaakkut sinnassaaniarput. Taamaalillutik ilaat pilerisaarutinut namminissarsiortunut imaaliallaannaq tiguartittarput. Tamanna anersaakkut eqqumanissatsinnik eqqaasitsissutaavoq sakkortooq! Taamaattumik Jehovap ullussaa ilimagiuaannartigu eqqaamajuarlugulu isigigaatigut. Taamaappat Jehova ilungersuussilluta kiffartuutissavarput ileqqussatigullu minguitsuutilluta. — Tussiaat 11:4; Jesaja 29:15; Hesekiel 8:12; 12:27; Sefanja 1:12.
Namminissarsiortut isornartullu
10. Peterip qanoq ililluni takutippaa mitallersut eqqunngitsumik oqaluttut?
10 Mitallersut taama ittut pingaarutilik piaaralutik sumiginnagartik arajutsisarpaat allanullu puiortinniarsarisarlugu. Sooq? Inuit ajornannginnerusumik tammartissinnaajumallugit. Peter ima allappoq: ’Mannami arajutsisuusaarpaat, itsarsuarli qilaqartoq nunaqarlunilu imermit imikkullu pilersumik Guutip oqaasiagut; taamaammallu silarsuaq taamani ittoq imermik qarsunneqarluni aserorpoq.’ (2 Pîtruse 3:5, 6) Aap, Jehovap ajussuseq peersimavaa Noap nalaani ulersuaq ikiortigalugu, tamannalu Jesusip erseqqissarsimavaa. (Matîuse 24:37-39; Lúkarse 17:26, 27; 2 Pîtruse 2:5) Tassa mitallersut oqaasiisa akerliannik ’pinngortitat pileqqaarnerannit suut tamarmik taamaaginnarsimanngillat’.
11. Ukiuni hundredelinni siullerni kristumiut ilimagisatik suut pissutigalugit inuit ilaannit illaruaatigineqartarsimappat?
11 Immaqa mitallersut ilisimagisatik eqquussimanngimmata kristumiunik aalajaatsunik ikasaatiginnittarsimapput. Jesusip toqunera sioqqutitsiarlugu ajoqersugai isumaqarsimagaluarput erniinnaq ’Guutip naalagaaffia ersersitaassasoq’. Toqusunit makinnerata kingorna aperisimavaat Guutip naalagaaffia ingerlaannaq pilersinneqassanersoq. Peterip allakkami aappaannik allannissaa ukiut qulit missaannik sioqqullugu ilaat ’oqaatsimut’ imaluunniit ’allakkanut’, apustili Paulusimeersuusorineqartunut imaluunniit taassuma suleqataaneersuusorineqartunut, ’Jehovap ullussaa maannakkut pissasoralugu’ allanneqarsimasunut, ’annilaarsimapput’. (Lúkarse 19:11; 2 Tásalûníkamiut 2:2, NV; apustilit suliait 1:6) Jesusilli ajoqersugai taamatut ilimasussagunik kukkussanngillat. Taamanikkut piffissanngorsimanngiinnarpoq. Jehovalli ullussaa nalliutissaqqaarpoq!
Guutip oqaasii tatiginartuupput
12. ’Jehovap ullussaa’ pillugu siulittuutit eqqarsaatigalugit Guutip oqaasiata tatiginassusia qanoq ililluni ersersimava?
12 Eqqaariikkatsitut kristumiussutsip siornagut pruffiitit ullup Jehovap akiniaaffissaata qanillinera mianersoqqussutigisarsimavaat. Ukiumi 607-imi u.n.s. ’Jehovap ullua’ annikitsumik pivoq innuttaminut uteriitsunut akiniaaneq tutsimmagu. (Sefanja 1:14-18) Aammattaaq kingusinnerukkut naalagaaffiit allat, ilaatigut Babylon aamma Egypten, ’Jehovap ulluanik’ taama ittumik misigisaqarput. (Jesaja 13:6-9; Jeremia 46:1-10; Obajda 15) Ukiuni hundredelinni siullerni juutit aaqqissuussaanerata naggatissaa aamma siulittuutigineqareersimavoq, ukiumilu 70-imi u.n.k. Romamiut sakkutuuisa Judæa suujunnaarsimmassuk tamanna eqquuppoq. (Lúkarse 19:41-44; 1 Pîtruse 4:7) Peterilli eqqartugaa tassaavoq ’Jehovap ullussaa’ siunissami pisussaq, annertungaarami allaat nunarsuaq tamakkerlugu ulersuaqarsimaneranik akimuisussaq.
13. Oqaluttuarisaanermi pisimasup suup takutippaa pissutsit aaqqissuussaanerat manna pinngitsoorani suujunnaarsinneqarumaartoq?
13 Aseruinissarsuarmik tamatuminnga eqqartuinini Peterip aallarneramiuk oqaatsini ima ilavai: ’Taassuma oqaasiagut.’ Taamatut oqanngitsiarluni oqarpoq nunarsuaq ulersuanngikkallarmat ’imermik imikkullu pilersumik Guutip oqaasiagut’ atasimasoq. Taamaannerata, pinngortitsineq pillugu Biibilimi oqaluttuami allaatigineqartup, ulersuaqarnissaa ajornarunnaarsippaa, ermit tamakkua Guutip akuliunneragut imaluunniit oqaasiagut kuimmata. Peter ima nangippoq: ’Qilaalli nunalu maannakkut ittut taassuma oqaasiagut uninngagallartitaapput, ikuallattussaallutik toqqorsimasut ulloq inuit iluaatsut eqqartuutiffissaat aserorfissaallu nalliutserlugu.’ (2 Pîtruse 3:5-7; 1 Moses 1:6-8) Tamatuma pinissaa Jehovap oqaasiinit tatiginartunit uppernarsaatissaqartipparput! Ullussarsuarmini kamannermini innertut ittumi ’qilaat nunalu’ — pissutsit aaqqissuussaanerat manna — suujunnaarsissavai! (Sefanja 3:8) Qaquguli tamanna pissava?
Naggatissaq ilungersuussilluni qilanaarisariaqarpoq
14. Sooq qularinngissinnaavarput ’ullussani kingullerni’ inuulluta?
14 Jesusip ajoqersugaasa naggatissap qaqugu nalliunnissaa paaserusussimavaat, taamaattumik ima aperisimapput: „Qaqugu tamakku taamaalissappat, sunalu najuinissannut pissutsillu aaqqissuussaanerata naggatissaanut nalunaaqutaassava?“ Qularnanngitsumik juutit aaqqissuussaanerat qaqugu aserorneqassanersoq apeqqutigigaluarpaat, Jesusilli akissutimini ’qilaat nunallu’ maannakkut atuuttut qaqugu suujunnaarsitaanissaat eqqartorneruaa. Jesus siulittuivoq sorsunnersuit, kaannersuit, nunap sajunneri, nappaassuit pinerlunniarlu atuukkumaartut. (Matîuse 24:3-14, NV; Lúkarse 21:5-36) Jesusip „pissutsit aaqqissuussaanerata naggatissaanut“ nalunaaqutassaaneragai, kiisalu Paulusip ’ullussanut kingullernut’ ilisarnaatissaaneragai 1914-imiilli eqquuttut takusalerpavut. (2 Timûtiuse 3:1-5) Pissutsit aaqqissuussaanerata matuma naggatissaani inuunitsinnut ilumut takussutissarpassuaqarpoq!
15. Jesusip mianersoqqussutaa puiorlugu kristumiut soqqajaasarsimappat?
15 Jehovap nalunaajaasuisa Jehovap ullussaata qaqugu pinissaa soqutigiuaannarsimavaat. Paaserusungaaramikku allaat qaqugu nalliunnissaa naatsorsorniartarsimavaat. Taamaalillutilli Jesusip ajoqersugai siulliit assigalugit ’taamaaffissaa qaqugu nalliussasoq nalugipput’ Naalakkamik oqaasii eqqumaffiginngitsoorsimavaat. (Mákorse 13:32, 33) Kristumiut aalajaatsut tuaviupilunnertik pillugu mitallersunit illaruaatigineqartarsimapput. (2 Pîtruse 3:3, 4) Peterilli erseqqissarpaa Jehovap ullussaa nalliutissaqqaartoq — Guutimut piffissanngorpat.
Jehovatut piffissamik isiginnittaaseqartariaqarpugut
16. Eqqaasitsissut suna malissagutsigu silatusaassaagut?
16 Jehovatut piffissamik isiginnittaaseqarnissatsinnik Peterip eqqaasippaatigut, ima oqarluni: ’Mannali ataaseq arajutsinaveersiuk, asasakka, imaattoq: ulloq ataaseq Jehovami ukiutut tuusintilittut ippoq ukiullu tuusintillit ullortut ataatsitut.’ Inuup ukiuni 70-80-ini inuusarnera tamatumunnga naleqqiullugu ila sivikik! (2 Pîtruse 3:8; Tussiaat 90:4, 10) Taamaattumik Guutip neriorsuutaanut erinitsalissagaluarutta Guutip pruffiitiisa eqqaasitsissutaat manna malittariaqarparput: „[Eqquuffissaa] nalliutiaanngikkaluarpat utaqqiinnarina, eqquutinngitsoorani piviusunngorumaarmat.“ — Habakkuk 2:3.
17. Ullut kingulliit inuppassuit ilimagisaannit sivisunerugaluartut suna qularinngissinnaavarput?
17 Sooruna pissutsit aaqqissuussaanerata matuma ullui inuppassuit ilimagisaannit sivisunerusimasut? Tamatumunnga pissutissaqarluarpoq, Peterimi ima nangippoq: ’Jehovap unnersuutigisani mullutinngilaa, soorlu qassiit mullussisorigaat, kamajuillunili pivaasi tammarsimasoqaqqusinnginnami, tamaasali allamik isumataaqqullugit.’ (2 Pîtruse 3:9) Jehovap inuiannut tamanut ajunnginnerpaaq eqqarsaatigisarpaa. Inuup inuuneranik soqutiginnittuuvoq, imami oqarpoq: „Piumasarinngilara guutiitsoq toqussasoq, kisiannili piumasaraara ileqqorisani ajortut tunullugit uannut saassasoq inuuginnaqqulluni.“ (Hesekiel 33:11) Taamaattumik tatigilluinnarsinnaavarput naggatissaq nalliukkumaartoq piffissakkut Pinngortitsisup nalusaqanngitsup asannittulu siunertaanut naleqqunnerpaakkut.
Suut peerutissappat?
18, 19. (a) Pissutsit aaqqissuussaanerata matuma suujunnaarsinnissaa sooq Jehovap aalajangiusimavaa? (b) Pissutsit aaqqissuussaanerata matuma naggaserneqarnissaa Peterip qanoq allaatigaa, aamma suunuku peerneqartussaasut?
18 Jehovap imminut kiffartortut tamaasa asavai, taamaattumillu taakkuninnga erloqisitsisut tamaasa suujunnaarsissamaarpai. (Tussiaat 37:9-11, 29) Peterip Paulusitut erseqqissarpaa aseruinissaq tamanna ilimaginngisakkut takkutissasoq, imami allappoq: ’Jehovap ullussaa tillittutut nalliukkumaarpoq; nalliuppallu qilaat perpaluttorsuarmik nungukkumaarput, pinngoqqaartullu ikuallallutik aakkumaarput, nunalu tassanilu suliarisaasut ikikkarumaarput.’ (2 Pîtruse 3:10; 1 Tásalûníkamiut 5:2) Qilavik nunavillu ulersuaqarnerani suujunnaanngillat, aamma Jehovap ullussaani suujunnaarnavianngillat. Suulliuku ’nungukkumaartut’, tassa suujunnaarsinneqarumaartut?
19 Naalakkersuisut inuit pilersitaat ’qilattut’ inunnut naalagaasimasut nungussapput, taamatuttaaq nungussaaq ’nuna’, tassa inuiaqatigiit guutiitsut. ’Qilaat perpaluttorsuarmik nungussasut’ oqaatigineqarmat immaqa qanoq sukkatigisumik aserorneqarnissaat pineqarpoq. ’Pinngoqqaartut’, tassaasut nalitsinni inuiaqatigiit sanngiillisimasut, ’aakkumaarput’ imaluunniit suujunnaarsinneqarumaarput. ’Nunalu’, ilaatigut ’tassani suliarisaasut’, ’ikikkarneqarumaarput’, imaluunniit „qulaarneqarumaarput“ (NV). Silarsuarmi aaqqissuussaaneq tamaat pisassaanik pillugu suujunnaarsikkuniuk Jehovap inuit iliuusii guutiitsorpaluttut qulaarluinnassavai.
Neriugisarput siunnerfigiuaruk
20. Qanoq pisoqarnissaanik ilisimanninnerput inuunitsinnut qanoq sunniuteqartariaqarpa?
20 Pisussat ilungersornartut tamakku ungasigunnaarmata, Peter oqarpoq ’Guutip ullussaata nalliuffissaa ilimagalugulu qilanaaritillugu iluartumik ileqqoqarlutalu Guutimut mianerinnittariaqartugut’. Qularutissaanngitsumik ’qilaat nungukkumaarput pinngoqqaartullu ikuallallutik aakkumaarput’. (2 Pîtruse 3:11, 12) Pisussat ilungersornartut tamakku aqagu aallarteriaannaanerannik ilisimanninnerput iliuutsitsinnut iliuuserilersaakkatsinnullu sunniuteqartariaqarpoq.
21. ’Qilaat nunalu’ ullumikkut atuuttut sunit taarserneqasssappat?
21 Peterip tulliullugu oqaluttuuppaatigut aaqqissuussaanitoqaq sumit taarserneqarumaartoq, ima oqarluni: ’Unnersuutaali naapertorlugu ilimagisaqarpugut qilassanik nutaanik nunassamillu nutaamik iluarsuseqarfissanik.’ (2 Pîtruse 3:13; Jesaja 65:17) Ila oqiliallannaq! Kristus naalakkersueqatissaalu tassaassapput ’naalakkersuisut qilattut ittut nutaat’, silarsuullu naggatissaani tamatumani aniguisussat tassaassallutik ’nunassaq nutaaq’. — 1 Juánase 2:17; sarĸúmersitat 5:9, 10; 14:1, 3.
Ilimasuttuarit ilequssatigullu minguittuarit
22. (a) Anersaakkut ’innarluillutalu assuarnaannissatsinnut’ suup ikiussavaatigut? (b) Peterip suna mianersoqqussutigaa?
22 ’Taamaattumik, asasakka,’ Peter nangippoq, ’tamakkuninnga ilimagisaqarassi ilungersorniaritsi taassumunnga naapeqqullusi innarluitsusi assuarnaatsusilu eqqissillusi, Naalakkattalu kamajuissusia annassutissaatissiuk.’ Ilungersuussilluta Jehovap ullussaa utaqqigutsigu kinguaattoornertullu issinnaasut suulluunniit Guutip kamagittassusianut ersiutitut isigigutsigik, anersaakkut ’innarluillutalu assuarnaassinnaassaagut’. Navianartoqarporli! Peter mianersoqqussivoq ’Paulusip qatanngutitta asanartup’ allassimasai ’paasineq ajornartunik ilaqarmata, ilinniarsimanngitsut aalajangersimanngitsullu mumitaannik allassimasoqataallu tappullugit namminneq aseruutissaminnik’. — 2 Pîtruse 3:14-16.
23. Peter allakkani naggaserlugit qanoq oqaaqqissaariva?
23 Guutip saammaannera pillugu Paulusip allagai ajoqersuisooqqusersunit muminneqarsimagunarput, kanngunartuliornissamullu patsisissatut atorneqarsimallutik. Peterip tamanna eqqarsaatigisimagunarpaa naggataamik ima oqaaqqissaarigami: ’Ilissi taava, asasakka, taamaaliumaartumik nalorniunnaarassi, misissoritsi soqqusaatsut tammartarnerisigut ilageqqunasigik aalajaassutsissinnillu kataqqunasi.’ Allakkani naggaserpai ima kajumissaarilluni: ’Naalagarpulli Annaassiserput Jesus Kristus ilisimajartorlugulu saammaanneqarfigiartorsiuk.’ — 2 Pîtruse 3:17, 18.
24. Jehovap kiffai tamarmik qanoq isumaqarniartariaqarpat?
24 Qatanngutimi nakussatsinnissaat nalunanngitsumik Peterip kissaatigaa. Kissaatigaa tamarmik Jehovap nalunaajaasuatut 82-inik ukiulittut aallaqqaataani eqqartorneqartutut isumaqassasut ima: „[Apustilip Peterip] ’Jehovap ullussaata nalliuffissaanik ilimasunnissamik’ kajumissaarutaa malittuarsimavara. Silarsuassaq nutaaq piviusutut takussaanngitsutut inuunera tamaat isigisimavara.“ Uaguttaaq inuunerput taamatut atorniartigu. (wE 1/9 97)
Uteqqiilluni apeqqutit
□ ’Jehovap ullussaanik ilimasuttuarneq’ sumik nassataqarpa?
□ Mitallersut suna sumiginnartarpaat, sooq?
□ Sooq ilaasa kristumiut aalajaatsut illaruaatigisarsimavaat?
□ Qanoq isumaqartuartariaqarpugut?
[Qupp. 24-mi assiliartaq]
Jehovap ullussaa . . .
[Qupp. 25-mi assiliartaq]
. . . silarsuassarlu nutaaq eqqarsaatigiuakkit