Naammagittarlutit utaqqigit

NUKAPPIAQQAP nersutaatinik paarsisup amaroqanngikkaluartoq amaqqumik takkuttoqalernerarlugu suaartartuartarsimasup kiisami amaqqumik takkuttoqarmat ikioqqulluni suaartaraluarnera tusaajumaneqanngilaq. Ullumikkuttaaq Jehovap ullussaata qanillineranik tusarliussat inuppassuarnit tusaajumaneqanngillat, mianersoqqussutinik ilumuunngitsunik amerlaqisunik tusarliisoqartarsimanera pissutigalugu. Inuppassuit mianersoqqussutinik ilumoortunik mianersoqqussutinit ilumuunngitsunit immikkoortitsiuminaatsitsinerat Guutimut akerarsuup, Satanip, ’qaamasup inngiliusuusaartartup’, atorluarniartarpaa. — 2 Korintumiut 11:14.

Allaat sivisungaatsiartumik Jehovamut kiffaasimasut sinnassarneqarumanatik mianersortariaqarput. Sooq? Apustili Peterip ukiuni hundredelinni siullerni mianersoqqussutaa malugeriaruk.

’Ilumoortumik isumaqarit’

Peterip allagaasa isumassarsiarititaasut aappaat kristumiunut siullernut uagutsinnullu ullumikkut inuusunut assigiimmik eqqaasitsissutaapput. ’Tassa, asasakka,’ allappoq, ’aappassaanik allaffigeriilerpassi, allakkakka eqeersaatiginiarlugit eqqaasitsisarlunga ilumoortumik isumaqaqqullusi.’ (2 Pîtruse 3:1) Peterip isumaalunneranut suna tunuliaqutaava? Eqqartorpai mitallersut piffissap sivikissusianik malussarnermik, Guutip kiffaasa pigisariaqagaannik, sanngiillisitsisumik illaruaatiginnittut. Mitallersunit tammartitaannginnissartik sianigisariaqarpaat. Taamaattumik Peterip allaffigisani kajumissaarpai ’pruffiitit iluartut siulittuutigisaat eqqaamaqqullugit’. (2 Pîtruse 3:2; apustilit suliait 3:22, 23) Pruffiitit qanoq siulittuisimagamik?

Guutip kiffaasa aalajaatsut taassuma eqqartuussutaasa ajussutsimik nungutitsisimanerannik inuit arlalippassuartigut eqqaasittarsimavaat. Peterip allaffigisani eqqaasippai Noap nalaani nunarsuaq ajussutsimik ulikkaarmat Guutip ulersuaqartitsinermigut qanoq ililluni akuliussimaneranik. Ulersuup silarsuaq taamanikut atuuttoq piuneeruppaa, Guutilli Noa ilaqutaalu ’uumasut assigiinngitsukkuutaat’ ilanngullugit umiarsuarmi aniguisippai. Ulersuaqarsimaneranik oqaluttuatoqqat nunarsuarmit sumit tamaneersut Biibilimik oqaluttuaq uppernarsarpaat.a — 1 Moses 6:19; 2 Pîtruse 3:5, 6.

Peterip oqaatigaa Guutip akuliunnera tamanna inuit ilaasa ’arajutsisuusaaraat’. Allat taamani mitallersunit sinnassagaapput. Uagulli Jehovap iliuuserereersimasai puiunngisaannassavavut. Peter allappoq: ’Qilaalli nunalu maannakkut ittut taassuma oqaasiagut uninngagallartitaapput, ikuallattussaallutik toqqorsimasut ulloq inuit iluaatsut eqqartuutiffissaat aserorfissaallu nalliutserlugu.’ (2 Pîtruse 3:7) Aap, Guuti akuliuteqqissaaq.

Guuti arriitsuunngilaq

Maanna ukiut tuusintilikkuutaat qaangiussimapput. Sooruna Guuti inuit ajornartorsiutaasa aaqqinnissaannut taama sivisutigisumik utaqqisimasoq? Peter allappoq: ’Mannali ataaseq arajutsinaveersiuk, asasakka, imaattoq: ulloq ataaseq Jehovami ukiutut tuusintilittut ippoq ukiullu tuusintillit ullortut ataatsitut.’ (2 Pîtruse 3:8) Jehova uagutsinnit allaanerusumik piffissamik isiginnittaaseqarpoq. Guutimummi naassaanngitsuusumut piffissaq Adamip pinngortinneqarneranit ingerlasimasoq sapaatip-akunneraanngitsutulluunniit ippoq. Qanorluunniilli piffissamik isiginnittaaseqaraluarutta ukiut tuusintilikkuutaat ullullu ingerlasut qaangiussorneranni Jehovap siunertaata naammassineqarfissaa qanilliartuinnarparput.

„Uunnaavik isigiinnavikkaanni qalannavianngilaq“ tassaavoq ussat isumaqartoq uniinnarluta arlaannut utaqqigutta piffissaq arriitsuararsuartut issasoq. Peterilli siunnersorpaatigut ’Jehovap ullussaata nalliuffissaa ilimagalugulu qilanaareqqullugu’, tassa eqqarsaatigiuaqqullugu. (2 Pîtruse 3:12) Qanoq ililluta Guutip akuliutingajalerneranut eqqumaffiginninnermik ineriartortitsisinnaavugut?

Iliuutsit oqaatsinit kimittunerupput

Iliuutsinik kristumiutut inooriaatsimut atasunik Peterip uparuuppaatigut. Iliuutsit imaluunniit ’ileqqut iluartut mianerinnittullu’ eqqaavai. (2 Pîtruse 3:11) Iliuutsit tamakku suuppat?

Guutip kiffai ilumoortut Taassuma iluarisaanik iliorniartarput. Uppernerat pissusilersornerisigut ersertarpoq, tamannalu Guutimut neriorsuutaanullu uppernerartunit tamanit allaanerussutigaat. Inuppassuit malugisimavaat Jehovap nalunaajaasuisa kikkunut tamanut oqaluussisarnertik allanit allaanerussutigigaat. Inuit Guutip neriorsuutaanik Biibilimi saqqummiunneqartunik oqaluttuunniarlugit angerlarsimaffiinut pulaartarpaat. Aammali inunnut sumiluunniit naapitaminnut upperisartik neriuutertillu nalunaajaassutigisarpaat.

Sallusuissut inunnut allanut oqaluussissutigalugu suliniarluaraangatta uppernerput nakussatsinneqartarpoq. Biibili pillugu inunnik oqaloqateqarnerujartortilluta Biibilimi allassimasut uummatitsigut pigiliunnerujartortarpavut, tamannalu ilutigalugu qamuuna nuannaarnermik nalerisimaarnermillu misigisaqartarluta. Guutip naalagaaffianik nutaarsiassaq pillugu oqaluussigaangatta aamma Jehova nuannaartittarparput, nalunngilarpullu taanna ’iluaatsuunngitsoq suliarpullu asanninnerpullu aqqa pillugu ileqqorisarput puiussanngikai’, soorlu Peterip apustileqataa Paulus oqarsimasoq. — Eprîarit 6:10; Rûmamiut 10:9, 10.

Pissutsit aaqqissuussaanerata ajortup matuma ullussaani kingullerni nutaarsiassamik nuannersumik siaruarterilluni sulineq qanoq kinguneqarsimava? Inuit peqqusersuitsut hundredetuusintilikkuutaat qanoq ilillutik Jehovamut qanimut attaveqalernissartik, ajunngissusianik pisassarinngisaraluatsinnik iluaqutiginninnissartik nunarsuarmilu paratiisiusumi naassaanngitsumik neriugisaqalernikkut pilluarnermik piviusumik nassaarnissartik ilinniarpaat.

’Taamaaliumaartumik nalorniunnaarneq’

Naak Biibili aallaavigalugu nalunngikkaluarlutigu Jehova Guuti piffissaq aalajangersimasani nalliuppat nunarsuarmi pissutsinut akuliukkumaartoq, Peterip mianersoqqussutaanik allamik eqqumaffiginninnissarput pisariaqarpoq. ’Ilissi taava, asasakka, taamaaliumaartumik nalorniunnaarassi, misissoritsi soqqusaatsut tammartarnerisigut ilageqqunasigik aalajaassutsissinnillu kataqqunasi.’ — 2 Pîtruse 3:17.

Taamanikkut Jehovap soorunami nalunngilaa uppernikkut sanngiitsut nikallorumaartut akuliunnissani mulusutut ilerpat. Aammattaaq nalunngilaa guutiitsut kiffaminik ilumoortunik ajortumik sunniisinnaasut, imaluunniit piffissap aterminik illernartitsiffissami qanillineranik upperinninnerannik sanngiillisitsisinnaasut. Ullussani kingullerni makkunani ’aalajaassutsitsinnit katassagaluarutta’ alianarluinnassaaq!

Jehovap iliuusissai eqqarsaatigalugit nalornilernissamut qulalernissamullu piffissaanngilaq. (Eprîarit 12:1) Kisianni Jehovap naammagittassusiata nassatarisaanik — inuit millionilikkuutaat ’amerlangaartunut’ nunarsuarmit tamaneersunut ilaalersimasut annikilliornartussarsuarmilu aniguinissaminnik qilanaarisaqartut annaanneqarnissaminnut periarfissaqalersimanerannik — pingaartitsinitta alliartortinniarnissaanut piffissaavoq. (sarĸúmersitat 7:9, 14) Peterip ima kajumissaarpaatigut: ’Naalagarput Annaassiserput Jesus Kristus ilisimajartorlugulu saammaanneqarfigiartorsiuk. Taassuma naalannassuseq pigaa maannalu ullorlu naassaanngitsoq tikillugu.’ — 2 Pîtruse 3:18.

’Guutimut asanartittuinnaritsi’

Oqaluussinermik ulapputeqarneq Guutillu oqaasia atuaqqissaarniarlugu kristumiut ataatsimiinnerinut najuuttarneq uagutsinnut illersuutaapput. Taamaakkutta pissutsit aaqqissuussaaneranni matumani pissutsit ajorsiartuinnarnerat ingasattumik isumakuluutiginavianngilarput. Siooraneq isumakulunnerlu kristumiup ilumoortup inuunerani inissaqarujussuartariaqanngillat. (1 Korintumiut 15:58) Jehovamut kiffartornitsinni ulapputeqarnerujartortilluta piffissaq sukkanerusutut misinnarnerujartussaaq.

Judasip, Peterip nalaani inuusup Jesusillu affarmik qatanngutaata, ima kajumissaarpaatigut: ’Ilissili, asanartusi ukorsii, upperisassigut illernangaartukkut ineriartorteqatigiigitsi, qinusarlusi anersaakkut illernartukkut. Guutimut asanartittuinnaritsi Naalakkatta Jesus Kristusip naakkinninnera ilimasuutigalugu inuunermut naassaanngitsumut.’ (Jûtarse 20, 21) Qinujuarneq isumalluarnermik siuarsaasarpoq. (1 Tásalûníkamiut 5:17) Judas ima nangippoq: ’Inuillu ilaat saqitsaattut inertersigik. Ilaallu annatsissigik innermit nutsullugit, ilaallu nallittorsigik [mianerinnillusi, NV], annoraaq uinngup mingutsitaa allaat uuminaralugu.’ (Jûtarse 22, 23) Piffissami ajornakusoortumi matumani nukittorsaqatigiinnissarput pingaartorujussuuvoq! Pingaartorujussuuvortaaq ussernartumut nakkannginnissarput ’ullullu annaassiviup’ matuma ’kanngunartuliornissamut’, silarsuarmi ajortunngorsimasumi maani nalinginnaaqisumut, patsisiginiannginnissaa. Jûtarse 4; 2 Korintumiut 6:1, 2.

Peterip, Paulusip Judasillu asannittumik unnersuussutaat maleruarutsigik Guutimullu kiffartornitsinni ulapputeqarutta Jehovap akuliunnissaa naammagittarluta utaqqisinnaassavarput. Tamatumungali piumassuseqarpit?

Pinngortitsisup inuunermik naassaanngitsumik neriorsuutaa paasisaqarfiginerorusukkukku Jehovap nalunaajaasuinut najukkanniittunut saaffiginninnissannut tikilluaqqusaavutit. Nunarsuaq tamakkerlugu oqaluussilluni sulinermut tamatumunnga uteqqinneqanngisaannartussamut, annikilliornartussarsuarmili naammassineqartussamut, peqataaniaraanni suut piumasaqaataanersut paasiniaruk. (Mákorse 13:10) Taava silarsuarmi nutaami naapertuilluartumi Peterip neriorsuutigisaani inuulernissat qilanaarisinnaassavat. (2 Pîtruse 3:13) Taassuma eqqaasitsissutai eqqumaffigikkit! Naammagittarlutit utaqqigit! Eqqortunik ulapputeqarit! (wE 1/6 98)

[Quppernerup ataani ilanngussaq]

[Qupp. 7-imi assiliartaq]

Paratiisimik Guutip neriorsuutaa maanna ilinniaruk

[Qupp. 6-imi suminngaanneernerat]

Amaroq: Animal/Jim Harter/Dover Publications, Inc.; nersutaatinik paarsisoq: Children: A Pictorial Archive from Nineteenth-Century Sources/Grafton/Dover Publications, Inc.