’Qujasaritsi’
1 Amerlanersatta meeraanitsinnik ilinniarsimavarput inuit inussiarnisaarfigigaangatigut ajunngisaarfigigaangatigulluunniit qujasarnissarput. Paulusip kajumissaarpaatigut ’qujasarnissatsinnik’ ingammillu Jehovamut qujamasuttuusariaqarpugut. (Kul. 3:15, 16, NV.) Pinngortitsisitsinnulli qujamasunnerput qanoq takutissinnaavarput? Aamma sumik immikkut qujamasunnissatsinnut pissutissaqarpugut?
2 Apustili Paulus allappoq: ’Guutili qujanarsili ajugaatikkamisigut Naalakkatigut Jesus Kristusikkut.’ (1 Kor. 15:57) Ukiut tamaasa eqqaaniaalluni nalliuttorsiornermi eqqaasinneqartarpugut Guutip Kristusillu killeqanngitsumik asanninnerannik utertitsissummik akiliuteqarnermikkut naassaanngitsumik inuunissamik neriulersitsisumik. (Juá. 3:16) Amerlanerusugut ikinngummik qanigisamik toqukkut annaasaqarsimagatta, Jesusip makititaanissamik neriorsuutaa qujamaasuutigisarparput. Uummaterput qujamasunnermik killinneqartarpoq eqqarsaatigileraangatsigu aaqqissuussinerup matuma atorunnaarsinneqarnerani aniguisinnaalluta toqunngisaannarlutalu inuusinnaalluta. (Juá. 11:25, 26) Jehovap assaani pilluaqqussuterpassuit nunami paratiisissami nuannaarutigisinnaasavut pillugit qujamasunnermik oqaasissaarunnarpoq. (sar. 21:4) Guutimut ’qujasariaqarnitsinnut’ sunik allanik pitsaanerusunik pissutissaqarpugut?
3 Guutimut qujamasunneq qanoq ersersinneqartartoq: Tamatigut Jehovamut qinunitsinni ajunngissusia pillugu qutsavigissallugu tulluarpoq. (Tus. 136:1-3) Allatiguttaaq qujamasuffigissallugu kajumissaarneqarpugut. Assersuutigalugu sapaammi marsip 23-ani Kristusip toquneranik eqqaaniaalluni nalliuttorsiornermut najuuteqataasinnaavugut. Ilagiinni nunarsuarlu tamakkerlugu suliniarnermut aningaasartuutigineqartunut matuseqataaniarluta ’Jehova pigisatsinnik ataqqinaasernera’ nuannaarutigaarput. (Uss. 3:9) Utoqqaanertat tapersersorluarnerisigut suleqatiginerisigullu Jehovamut qujamasunnerput ersersissavarput, taakku aqqutigalugit ikiortarmatigut. (1 Tás. 5:12, 13) Ullut tamaasa ileqqorissaarnissarput noqqaassutigisarparput Guutip aqqa naalannarsisikkumallugu. (1 Pît. 2:12) Jehovap tamakkua qujamasunnermut ersiutit nuannaarutigisarpai. — 1 Tás. 5:18.
4 Qujamasunnermut ersersitsineq pitsaanerpaaq: Uummatikkut iluunngarluta Naalagaaffimmik oqaluussinermut peqataaneq, Jehovap aqqanik naalannartitsineq, qinunikkut qujamasunnermik ersersitsineq, ilumoorlunilu sallusuissummik illersuineq Pinngortitsisitta iliuuserisimasarpassuinut ilumoorluta qujamasunnitsinnut ersiutaasut pitsaanerpaat ilagaat. Jehovap piumasaa naapertorlugu ’inuit tamarmik annannissaat’ pillugu illernartumik kiffartornerput iluarisarpaa. (1 Tim. 2:3, 4) Taamaattumik oqaluussisartut amerlasuut Naalagaaffimmut Kiffartorneq-mi februaarimoortumi kajumissaarut, qaammami ataatsimi arlalinniluunniit marsimi, apriilimi maajimilu ikiorti-pioneeriunissamut malissimavaat. Oqaluussinermi immikkut ittumik sulissuteqarnikkut Guutimut ’qujanermut’ ersersitsineruvoq pitsaasoq. Apriilimi maajimiluunniit ikiorti-pioneerit ilaaqquffigisinnaassavigit?
5 Naassaanngitsumik inuunissamik qularnaatsumik neriugisaqarpugut. Neriugisaq tamanna piviusunngortinneqartoq takugutsigu suli amerlanerusunik pissutissaqassaagut ullut tamaasa Jehova qujamasuffigiuartarnissaanut. — Tus. 79:13.