Oqaluussinerput — asanninnerup ilumoortup ersiutaa
1 Inatsisinut annerpaanut marlunnut naalannerput oqaluussinitsigut takutittarparput. (Mat. 22:37-39) Jehovamut asanninnitta taanna pillugu allanik oqaloqateqarnissatsinnut kajumissisittarpaatigut. Guutip piumasaa siunertaalu suunersut paasiniaqqullugit inunnik kajumissaarinissatsinnut tullermut asanninnitta killittarpaatigut, taakkua aamma Jehovamut asannilersinnaaqqullugit naassaanngitsumillu inuulersinnaaqqullugit. Oqaluussinitsigut Jehovap aqqa ataqqinartittarparput Guutillu naalagaaffia pillugu neriuut allanut ilisimalersillugu. Taamaattumik oqaluussinerput Guutimut tullermullu ilumoortumik asanninnermut ersiutaavoq.
2 Asanninnerup inuit qanoq ittulluunniit sumiluunniit naapitavut oqaluunnissaannut kajumissisittarpaatigut. (1 Kor. 9:21-23) Assersuutigalugu qatanngutip utoqqaanertap timmisartumi katuullit palasiat sanilerisimavaa. Qatanngutip pissuserissumik apeqquteqarluni oqaloqatigiinneq aallarnersimavaa, taavalu oqaloqatigiinneq Naalagaaffik pillugu apeqqummut sangutillugu. Palasip timmisartumit niugami atuagaatitta ilaat marluk pisimavai. Tullermut ilumoortumik asanninneq kinguneqarluarpoq.
3 Asanninnerup ilumoortup oqaluussinissatsinnut kajumissisittarpaatigut: Ersarippoq ikiorti-pioneeriusut nalinginnaasumilluunniit pioneeriusut Guutimut tullermullu ilumoortumik asannittuusut. Pioneerit piffissartik nukitillu annertuut inuit allat anersaakkut ikiorniarlugit atortarpaat. Suup kajumissisittarpai? Pioneerit ilaat oqarsimavoq: „Nalunngilara asanninneq Guutip anersaavata inerititaasa ilagigaat. Asanninneq tamanna piunngikkaluarpat sallusuissummiissimassanngikkaluarpunga, ingammillu pioneerioqqajarsimassanngikkaluarlunga. Asanninnerup allat pisariaqartitaannik soqutiginnitsippaanga, nalunngilaralu tullermut asanninnermik nittaavigineqarnertik ajunngitsumik qisuariarfigisaraat.“ Jesus asanninnermik assingusumik ersersitsisarsimavoq. Ilaanni ajoqersukkanilu ’qasuersaallatsiarniarlutik’ asimukarniarput. Inuppassuilli siulliullutik ornitaannut tikipput. Jesus qanoq iliorpa? ’Nalligingaalerpai’, namminerlu pisariaqartitani isumaginagit ’amerlasuunik ajoqersulerlugit’. — Mák. 6:30-34.
4 Allaat inunnit ilassiumaneqartanngikkaluarluta tusarliunniagarpullu tusarumaneqartanngikkaluartoq, allanut asanninnerput pissutigalugu sapinngisarput tamaat atorlugu annannissaannut ikiorniarsimallugit nalunnginnatsigu ilorlikkut nuannaarneq misigisarput allanngorneq ajorpoq. Naggataagut Kristusimit eqqartuunneqalerutta, ’kiffartuutigisarput naammatsillugu kiffartorsimanitsigut’ ilumoortumik asanninnermik ersersitsimanerput pillugu pilluassaagut. — 2 Tim. 4:5.