Tamatta sorsunnernit qanoq sunnerneqartartugut

“Sorsunnersuup kingulliup kingorna nunarsuarmi aatsaat taama amerlatigisunik sakkulersortunik akiuuttoqarpoq. Inuillu 2 milliardit – tassa nunarsuarmiut 25 procentii – akiuuttoqarfiusuni najugaqarput.”

FN-ip generalsekretæriata tullersortaa Amina J. Mohammed, januaarip 26-at, 2023.

Eqqissisimaffiugaluartuni sorsuttoqaleriataarsinnaavoq. Allaallu sorsuffiunngitsuni najugaqartut sunnerneqarsinnaapput. Aamma sorsuttoqarunnaareeraluartorluunniit kingunipiluit sivisuumik atorneqartarput, soorlu makku:

Nerisassaaleqineq. FN-ip nunarsuarmi kaattunik ikiuiniarluni suliniuteqarfia (WFP) naapertorlugu “sorsunneq nerisassaaleqinermut pissutaanerpaavoq. Inuit kaattuaannartut 70 procentii sorsuffiusuni najugaqarput.”a
Timikkut eqqarsartaatsikkullu ajoquserneq. Najugaqarfigisami sorsuttoqaleriaannaarpasippat inuit assut uippallerlutillu annilaangalersinnaapput. Sorsuffiusuni najugaqartut ajoquserneqariaannaasarput eqqarsartaatsikkullu peqqiillioriaannaasarlutik. Ajoraluartumilli amerlanertigut katsorsarneqarnissaminnut periarfissaqarpiarneq ajorput.
Qimaasariaqarneq. FN-ip qimaasunik nakkutilliisoqarfia (UNHCR) naapertorlugu nunarsuaq tamakkerlugu inuit 114 millioninit amerlanerusut 2023-mi septembarimi angerlarsimaffimminniit qimaareersimapput.b Tamatumunngalu sorsunnerit pissutaanerpaat ilagaat.
Aningaasaqarnikkut ajornartorsiutit. Sorsunnerit akit qaffakkiartornerannik aningaasaqarnikkullu allatigut ajornartorsiuteqalernermik kinguneqarsinnaasarput. Napparsimmavinnut ilinniagaqarnermullu aningaasat atorneqarunnaarlutik sorsunnermut atorneqaleraangata inuit naalliussinnaasarput. Sorsunnermilu aserugaasunik sanaqqiineq akisoorujussuusarpoq.
Avatangiisit ajoquserneqarnerat. Nuna aserorneqarujussuaraangat inuit tassani najugaqartut naalliuttarput. Imeq, silaannaq nunalu mingutsinneqarsimasut nappaateqalersitsisinnaasarput, allaallu sorsuttoqarunnaareeraluartoq qaartartut nunamiittut suli navianartorsiortitsisarput.

Sorsunneq aseruisarlunilu annaasaqartitsisarpoq.

Sorsunnerit Biibilimi siulittuutigineqarput

Biibilimi siulittuutigineqarpoq ilaatigut sorsunnerit ‘naggatissap nalaanut’, tassa piffissamut inuuffigisatsinnut, ilisarnaataassasut. (Matiusi 24:3) Jiisusi Kristusi ima oqarpoq:

“Sorsuttunik sorsuttullu pillugit nalunaarutinik tusartarumaarpusi. … Inuiaqatigiimmi inuiaqatigiinnik allanik saassussisassapput naalagaaffillu naalagaaffimmik allamik saassussisassalluni.” – Matiusi 24:6, 7.
“Sorsuttunik perulluliortoqartarneranillu tusarussi annilaangalissanngilasi.” – Lukkarsi 21:9.

Oqaatsimi ‘perulluliornermik’ nutserneqartumi eqqissiviilliornerit, pikitsitsinerit politikkilu pissutigalugu akiuunnerit pineqarsinnaapput.

Paasisaqarnerorusukkuit allaaserisaq una jw.org-imiittoq atuaruk: “‘Naggatissamut’, imaluunniit ‘ullunut kingullernut’, suna ilisarnaataava?”

a “A global food crisis”, wfp.org.

b “Over 114 million displaced by war, violence worldwide”, news.un.org.