Kayadi

O kwila Jihova wala ni kutena kwa kufukununa o athu afu? Sé phata mwene wala! Mukidi, mwene “o Muteni-a-Yoso.” (Dij. 1:8) Mwene wala ni kutena kwa kubwisa o jinguma joso, kate mwene o kalunga. (1 Ko. 15:26) Kwala dingi kima kya mukwa ki tubhangesa kuxikina kwila, Nzambi utena kufukununa o athu afu: O kilunji kyê ki kyala ni disukilu. Mu kifika, mwene wixana o jithéthembwa joso mu majina mâ. (Iza. 40:26) Mwene we ulembalala o athu afu kya. (Jobe 14:13; Luk. 20:38) Phala Jihova, ki kibhonzo kulembalala o ima yoso yalungu ni athu anda fukununa, kikale o pholo yâ, o idifwa yâ, o ima yabhiti ku mwenyu yâ, ni kulembalala o ima yejidile ande dya kufwa. Tutena kudyelela ni kidi kyoso mu kikanenu kya Jihova kyalungu ni difukunukinu, mukonda twejiya kwila mwene wala ni hanji, ni kutena phala kukikumbidila. Kwala dingi kima kya mukwa ki tubhangesa kudyelela mu kikanenu kiki: Jihova wa fukunwine kya athu, mu ukulu mwene wabhanene kya o kutena ku jiselevende jê katé mwene ni kwa Jezú phala kufukununa o athu afwile. w23.04 9-10 §7-9

Twamono kwila o kukala muthu wabatama kwala ni valolo yavulu. Samba kwa Jihova mu kumubhinga o nguzu iwabhindamena phala usuluke mu kukala muthu wabatama, kyoso kikumoneka muthu o kwibhwidisa mba ukutatela mukonda dya kixikanu kye. Lembalala kwila, o kutambwijila ni kubatama kwoso, kitena kufidisa o kuzoka. O kutambwijila ni kuxila kwoso ni kubatama, kitena kubhangesa amoxi kumesena kutwivwa ni kulungulula o ixinganeku ya yalungu n’etu ni Bibidya. ‘Kala jinga polondo phala kuzokela o kixikanu kye,’ mu kukibhanga “ni kubatama ni kuxila kwoso. (1 Ph. 3:15) Bhanga jinga yoso phala kukala u muthu wabatama ni kulondekesa kwila eye u muthu waswina! w23.09 19 §18-19

Tala maukexilu awana ututena kulondekesa mwanyu. Kyadyanga, o muthu mukwa mwanyu ka thathamana ni lusolo. Kyoso o athu kya mukwatesa njinda, mwene utululuka, ka abhakela we phonzo. Mwene we ka talatala kyayibha akwa kyoso kya mudibhana ni ibhidi yabhonzo. (Mak. 34:6) Kayadi, o mukwa mwanyu utena kukingila ni kutululuka. O mukwa mwanyu ka kala ni njinda se o kima kya mukingila kyamulaleka kyavulu. (Mat. 18:​26, 27) Katatu, o mukwa mwanyu ka bhange o ima se kuxinganeka. Kyoso o muthu mukwa mwanyu kyabhinga kubhanga kima, mwene ka kibhange se kuxinganeka mba ni lusolo, phala kukizubha selu. Muveji dya kiki, mwene ukatula kithangana phala kuxinganeka kyebhi kyanda kibhanga. Mu kusuluka mwene ukatula kithangana kya soko phala kukibhanga kyambote. Kawana, o mukwa mwanyu ubhanga nguzu phala kudibhana ni ibhidi se kudikalanganza. O mukwa mwanyu wanda dikwatenena mu ima yambote ya mubhita ku mwenyu we, ni kubhanga yoso yatena phala kusuluka mu kusidivila Jihova ni kisangusangu. (Kol. 1:11) O jiselevende ja Jihova a bhingi kulondekesa mwanyu mu maukexilu oso enya. w23.08 20-21 §3-6

Kima kimoxi kitubhangesa kulanga o muxima, o kwijiya kwila Jihova utonginina o mixima. Kiki kilombolola kwila Jihova ka difu ni athu atena kutala ngo o kidifwa kya kanga, maji mwene wejiya kyebhi kitwala moxi dyetu. Se tuzalesa o muxima wetu ni itendelesu ya Jihova mwene wanda tuzola dingi ni kutubhana o mwenyu wakalelaku. (Nzw. 4:14) Se tubhanga kiki Satanaji ni mundu we, kanda tena kutukwata mba kutufwinyisa ni ukexilu we wayibha ni makutu me. (1 Nz. 5:​18, 19) Kyoso kituya ni kuzukama dingi kwa Jihova, o henda yetu kwa mwene ni kuxila kwetu kwanda dibandekesa. Etu twazolo kyavulu Tata yetu Jihova, mukonda dya kiki, twazembe kate mwene ngo o kixinganeku kya kuta kituxi. Malata phange ya muhatu mu ixi ya Croácia, wadibhanene ni tendasa ya kuta undumbu, wasoneka: “Kya ngibhonzele kyavulu kuxinganeka kyambote, ni kutolola o hanji ya kubhanga kima kyayibha kyeji ngisangulukisa ngo kakithangana. Maji o woma wa Jihova wa ngilange.” Maji kyebhi o woma wa Jihova wa kwatekesa Malata? Malata wambe kwila wa xinganeka mu ibhidi yeji dibhananayu mukonda dya kubhanga kima kyayibha. Etu twatokala kubhanga we kala kya bhange Malata. w23.06 20-21 §3-4

Jezú wejidile kwila o vondadi ya Tat’e, o kuzelesa o dijina dye ku makutu oso ene muzwela yalungu ni mwene. Kiki kyene kyabhangesa Mesene yetu, kulonga o akayedi’e kusamba: “Tat’etu wene mu dyulu dijina dyé adizelese.” (Mat. 6:9) Jezú wejidile kwila, ya ene o maka abeta dingi kota amudibhana nawu o athu oso, kikale ku dyulu mba mu ixi. (Ize. 36:23) Seku muthu mu ngongo wazelesa o dijina dya Jihova kala kyabhange Jezú. Maji ne kiki, kyoso Jezú kyamwambata phala kumukuta, kituxi kyahi kyamutatela o jinguma je? Amutatela kwila waxongwena Nzambi! Se phata, phala Jezú o kuxongwena o dijina dya Tat’e kyexile kituxi kyonene. Mwene waluwalele kyavulu mu kumutatela ni kumubalakala mukonda dya kikuma kiki. Kiki kyene kyabhangesa Jezú kukala ni “kikote kyadikota” mu ji ola ande dya kumukuta.—Luk. 22:​41-44.w24.02 11 §11

Mu kulenga kwetu phala kutambula o mwenyu, twatokala kuzola dingi Jihova ni Jezú, o jindandu jetu ndenge. (Mat. 10:37) Maji kiki, ki kilombolola kwila ki twabhingi kukumbidila o ikalakalu yetu ku mwiji. Mu kidi, se twamesena kusangulukisa Jihova ni Jezú, twatokala kudikila o ibhindamu ya mwiji wetu. (1 Ti. 5:​4, 8) Se kyene kitubhanga, o kusanguluka kwetu kwanda dibandekesa. Jihova wejiya kwila o miji isanguluka ngo, kyoso o munumi ni muhatu aditalatala ni henda ni kudixila, o jitata a zola o twana ni kwalonga, anga o twana we abelesela o jitata. (Efe. 5:33; 6:​1, 4) Kikale se u munumi, muhatu mba mona, kayela o itendelesu ya unjimu itusanga mu Bibidya. Kana kudyelela mu unjimu we, mba kukayela o ima ibhanga o athu oso mu dyembu mu watungu. Kana kukayela o jindunge jibhana o athu amba kwila ala jingijiye. Kalakala kyambote ni madivulu m’etu alungu ni Bibidya. Ene ala ni jindunge javulu jitukwatekesa kumona kyebhi kitutena kukayela o itumu ya Bibidya. w23.08 28 §6-7

O ahatu Jikidistá atokala kukala ni mauhete. Sayi mauhete adilonga o kilumba mu undenge, andasuluka mu kumukwatekesa ku mwenyu we woso. Mu kifika, dilonge kutanga ni kusoneka kyambote. Sayi jixi, o uhete wa kutanga ni kusoneka a umona kala ki wafwama phala o ahatu kudilongawu. Maji kima kyambote phala o Jikidistá joso, kudilonga kutanga ni kusoneka. (1 Ti. 4:13) Mu kiki, kana kwehela kima kyosokyoso ku kufidisa kudilonga, kutanga ni kusoneka kyambote. Mbote yebhi iwandakatula? O mauhete ya atena kukwatekesa kusanga salu ni kunangenenamu. Kiki kyandakukwatekesa we kudilonga kyambote o Bibidya ni kulonga we akwenu. O kyabeta dingi kota, kyoso ki uya ni kutanga o Bibidya ni kuxinganeka mu ima i utanga, wandazukama dingi kwa Jihova. —1 Ti. 4:15. w23.12 20 §10-11

Bhinga o kikwatekesu kya Jihova phala kulenga o jitendasá. Etu twakwa ituxi, mu kiki twatokala kubhanga nguzu phala ki tubhange o ima ya ibha. Maji Satanaji wanda bhanga yoso ni yoso phala kubhonzesa o mwenyu wetu. Ukexilu umoxi wa Satanaji kututendala, o itonokenu ya undumbu mba ya ufusa. O itonokenu kala yiyi itena kwizalesa o kilunji kyetu ni ixinganeku yayibha, itena we kutubhangesa kuta kituxi ni kudibotesa o ukamba wetu ni Jihova. (Mál. 7:​21-23; Tiy. 1:​14, 15) Se twamesena kutolola o jitendasá, twabhingi o kikwatekesu kya Jihova. Jezú watumbula o izwelu yiyi mu musambu wê: “Ku twehele kudibhala mu jitendasá, maji tu bhulule kwa kadya-phemba.” (Mat. 6:13) Jihova wamesena kutukwatekesa, maji etu twatokala ku mubhinga o kikwatekesu kiki. Twatokala we kukumbidila o ima itwabhingi mu misambu yetu. w23.05 6-7 §15-17

Kyoso o dikaza dibhana valolo ku ukamba wa ni Jihova, ene abelesela o itendelesu Ye, o kiki kyakwatekesa kulenga ni kutolola o ibhidi yejitena kuzozesa o henda ya. O muthu wakulu mu nzumbi, ubhanga yoso yatena phala kukayela o idifwa ya Jihova kala o kubhanga o mbote, o mwanyu ni kuloloka. (Efe. 4:32–5:1) Kyoso o dikaza dilondekesa o idifwa yiyi, o henda ya idibandekesa dingi. Sayi phange ya muhatu amwixana Lena, wala kya mu ukaza mu 25 a mivu ndenge, wambe: “Ki kibhonzo kuzola ni kuxila o muthu wakulu mu nzumbi.” Tumone phangu imoxi mu Bibidya. Kyoso Jihova kya mesenene kusola o jitata ejivwala o Mexiya, mwene wasolo Zuze ni Madiya, sumbala kwexile athu avulu amukwa atokalele ku mbutu ya Davidi. Mukonda dyahi mwene wabhange kiki? Mukonda kiyadi kya, exile ni ukamba wambote ni Jihova, Nzambi wejidile kwila ene ejita kupholo o henda ya kwa mwene mu ukaza. w23.05 21 §3-4

Sumbala o Mutwameni wetu, Jezú, muthu wayuka, o yo asolo mwene phala kukala kupholo akwa ituxi. Kitena kutubhonza ku abelesela, bengebenge se atubhingi kubhanga kima maji etu ki twandala kukibhanga. Sayi kizuwa poxolo Phetele kudimatekenu ka mesenene kubelesela o kitendelesu kyamubhele. Kyoso o anju yamutangela phala kudya o xitu ya yama yafidisile mu Kijila kya Mozé, Phetele waditunu ki lumoxi ngo, maji lutatu! (Ika. 10:​9-16) Maji mukonda dyahi waditunu? O itendelesu yoyo ya ubhe, wayimwene kala ki kyawabhele. Kumbandu yamukwa, o poxolo Phawulu wabelesela kyoso phange yadiyala mwadyakime mu Jeluzaleme, wamutendelesa phala kwambata mayala atatu mu tembulu, ni kudizelesa phala kulondekesa kwila mwene wexile mu kumbidila o Kijila. Phawulu wejidile kwila o Jikidistá ka bhingile dingi kukayela o Kijila kya Mozé. Ku mbandu yamukwa, mwene ka bhangele kima kyayibha. Maji Phawulu “mu kizuwa kya kayela wambata o mayala, yu wa dizelesa kumoxi ni ene.” (Ika. 21:​23, 24, 26) O kubelesela kwa Phawulu kwabhangesa o jiphange kukala ni muxima umoxi. — Lom. 14:​19, 21. w23.10 10 §15-16

Eye nange ki wejixinganeka kwila o woma kidifwa kyala ni valolo mu ukamba. Maji kala, o yo amesena kukala ni ukamba wambote ni Jihova atokala kumukwatela “woma.” Kikale se twamusidivila kya Jihova mu mivu yavulu mba kana, etwenyoso twabhingi kumukala ni woma mu ukexilu wambote. Maji ihi ilombolola kukala ni woma wa Nzambi? O kukala ni woma wa Nzambi kilombolola kumuzola kyavulu, ni kukamba kubhanga kima kyosokyoso kyeji zanga o ukamba wetu ni Mwene. O yu wene o woma wexile nawu Jezú. (Jih. 5: 7) Ki kyalungile ni woma wa ku mubhana kaxitiku mba kumubhanga kyayibha kwa Jihova, kana. (Iza. 11: 2, 3) Mu kidi mwene wazolele kyavulu Jihova ni kwila wamesenene kumubelesela. (Nzw. 14: 21, 31) Kala Jezú etu tuxila kyavulu Jihova ni kumuximana, mukonda twejiya kwila mwene Nzambi ya henda, njimu, wayuka, wala ni kutena kwavulu. Twejiya we kwila Jihova watuzolo, ni kwila o ima itubhanga itena kumusangulukisa mba kumuluwalesa.—Jisá. 78:41; Jisa. 27: 11. w23.06 14 §1-2; 15 §5

Kyoso Sobha Uziya kyeza mukukala ni kutena kwavulu, wadijimbi o mbote yoso yamubhangele Jihova. Kiki kitulonga ihi? Ithangana yoso twatokala kulembalala o maujitu ni mabesá moso atubhana Jihova. Muveji dya kudizangeleka mukonda dya ima itwatena o kubhanga, twatokala kubhana o kijingu kyoso kwa Jihova. (1 Ko. 4:7) Ku mbandu yamukwa, twabhingi kulenduka ni kuxikina kwila tu akwa ituxi, ni kwila twabhindamena itendelesu. Sayi phange wala ni 60 a mivu, wasoneka: “Ngadilongo kwila ki ngatokala kuluwala mba kuzoza kyoso akwetu kyamona o itondalu yami. Kyoso kya ngibazela mba angibana itendelesu mukonda dya itondalu ingabhange, ngisota kukatulaku mbote ni kusuluka mukubhanga yoso ingitena mu ubhezelu wami kwa Jihova.” Kyoso kitubelesela Jihova anga tulenduka, tusanguluka mu kidi. —Jisa. 22:4. w23.09 10 §10-11

O Jikidistá ja dyanga abhingile kukolokota. Kala o athu amukwa mu thembu yenyoyo, o Jikidistá exile mudibhana we ibhidi. Maji mukonda dya kukala Jikidistá, ene exile ni ibhidi yamukwa dingi. Avulu mudya a azukutisile kana ngo ku atwameni a jingeleja ja Jijudé ni ku jinguvulu ja Loma, maji we ni ku jindandu ja. (Mat. 10:21) Mu kilunga we sayi ithangana ene abhingile nguzu yavulu, phala ka afwinyise ku ilongesu ya makutu ya akwa kulungulukila o kidi exile musota kuwanuna o kilunga. (Ika. 20:​29,30) Ne kiki o Jikidistá jojo akolokota mwene. (Dij. 2:3) Kyebhi kyatena kubhanga kiki? Ene exile muxinganeka mu phangu ya athu akolokotele a atumbula mu Bibidya, kala Jobe. (Tiy. 5:​10, 11) Ene a sambe mu kubhinga nguzu. (Ika. 4:​29-31) Ene we adikwatenena mu mabesá ejitambula mukonda dya kukolokota kwa. (Ika. 5:41) Etu we tutena kukolokota se tudilonga o phangu ya athu a atumbula mu Bibidya ni kuxinganeka mu misoso itusanga mu madivulu metu. w23.07 3 §5-6

Jihova ni Jezú, nuka andatubhana dikunda. Kyoso poxolo Phetele kyaditunu Jezú, mwene wabhingile kusola kima ni ujimu. O kwila weji kweha kukayela Kidistu, inga wejisuluka mu kukolokota? Jezú wadyondo kwa Jihova phala o kixikanu kya Phetele ki kizoze. Jezú watangela Phetele yalungu ni musambu wenyo, yu walondekesa kwila wadyelele kuma Phetele weji swinisa we o jiphange. (Luk. 22:​31, 32) Nange Phetele wexile muswina kyavulu, kyoso kyexile mulembalala o izwelu ya Jezú! Kyoso kitumesena kusola kima ku mwenyu wetu, Jihova utena kutukwatekesa kukala fiyele. Mwene utena kubhanga kiki bhukaxi ka tufunga twa henda. (Efe. 4:​8, 11) Kala Jihova kya dikila o ibhindamu ya Phetele ni jipoxolo jamukwa, Mwene we wandadikila o ibhnidamu yetu, se tuta o utuminu kupholo. w23.09 24-25 §14-15

Jihova umona kate mwene o ima yofele itubhanga phala kulondekesa o henda ku akwetu. Mwene umona ima yiyi kala dikongo ni kwila wanda tufutanadyu. Se mu ukulu wasidivila kya kala mukwatekexi wa tufunga mba kafunga, Jihova ulembalala o kikalakalu kyoso kiwabhange kya ni henda ya kuswinisa kukibhanga. (1 Ko. 15:58) Mwene we umona o henda iwamulondekesa kate kindala. Jihova wamesena kwila etwenyoso tubandekesa o henda yetu kwa mwene ni ku akwetu. Etu tutena kukolesa o henda yetu kwa Jihova mu kutanga o Maka me, kuxinganeka mu ima itutanga ni kusamba kwa mwene ithangana yoso. Tutena kukolesa o henda yetu ku jiphange mu kubhanga yoso phala ku akwatekesa. Kyoso o henda yetu idibandekesa, tuzukama dingi kwa Jihova ni ku mwiji wetu mu nzumbi. O henda yetu kwa Jihova ni ku jiphange yanda nangenena kate ku hadya ni hadya! w23.07 10 §11; 11 §13; 13 §18

Kala Kidistá watokala kusola kyebhi kyatokala kulanga o sawidi ye. Kyoso o Jikidistá kya sola o ukexilu wa kwasaka, atokala kubelesela o itumu ya Bibidya yalungu ni manyinga, ni maka alungu ni wanga. (Ika. 15:20; Nga. 5:​19, 20) Katuku o maukexilu ayadi ya, kala Kidistá watokala kusola o ukexilu we wa kumusaka. Sayi ya asola kwasaka ni milongo ya phutu, amukwa asola kwasaka ni milongo ya kimbundu. Etu twatokala kuxila kabasa ukexilu u sola akwetu walungu ni kwasaka, ne mwene se twakiwabhela mba kana. Mu kyenyiki twatokala kulembalala o jipondo jiwana jiji: (1) O Utuminu wa Nzambi wene ngo wanda zubha o mauhaxi moso. (Iza. 33:24) (2) Kala Kidistá watokala kwijiya kyebhi o kima kyabeta kota phala mwene. (Lom. 14:5) (3) Ki twatokala kufundisa akwetu mba kubhanga kima kyeji kwabhangesa kudibhala. (Lom. 14:13) (4) O Jikidistá alondekesa o henda, ene ejiya kwila o kukala ni muxima umoxi mu kilunga kwabeta dingi kota o ibanzelu ya, ndenge. —Lom. 14:​15, 19, 20. w23.07 24 §15

O kwila eye ubhana valolo ku ukamba we ni Jihova? Se phata! Tunde ukulu athu avulu ene mu divwa we mu ukexilu yu. (Jisá. 104:​33, 34) Avulu ene mu xisa ima ku dima ni kubhanga nguzu phala kubheza Jihova. Kiki kyene we kyexile mubhanga o Jinazilé mu izuwa ya akwa Izalayele, dibhakula phala kubhanga sidivisu ya Katunda”. O kizwelu kiki kijimbulula kyambote o akwa Izalayele exile mu dibhakula ni kuswina kwoso phala kusidivila Jihova mu ukexilu wa katunda. Mu Kitumu kya Mozé, o diyala mba muhatu wexile ni ufolo wa kubhanga kikanenu kya katunda kwa Jihova mu kusola kubhita thembu mu ku musidivila kala Nazilé. (Dya. 6:​1, 2) Kyoso o muthu mukwa Izalayele kya solele kubhanga o kikutu kya kukala Nazilé, mwene wexile mu kayela itendelesu ya tokakale ngo ku Jinazilé o athu amukwa mu kifuxi ka Izalayele kana. Mukonda dyahi phe o mukwa Izalayele weji sola kubhanga o kikanenu kya kusidivila kala Nazilé? Nange o akwa Izalayele exile mu bhanga kiki mukonda dya henda ya yadikota kwa Jihova, ni phala kulondekesa o kisakidilu kya mu mabesá oso exile mu a bhana Jihova.—Mate. 6:5; 16:17. w24.02 14 §1-2

Mu Bibidya, o kizwelu mu dimi dya Hebalayiku phala kujimbulula o “ufiyele,” mba “henda ya ufiyele,” kyalungu ni kuzola kyavulu muthu ni kudikwatenena kwa mwene. Kyene a kitumbula phala kujimbulula o henda yala nayu Nzambi ku jiselevende je. Maji kyene kijimbulula we o henda idilondekesa o jiselevende ja Nzambi mudya. (2 Sam. 9:​6, 7) Kyoso o mivu iya ni kubhita, o ufiyele wetu utena kukola dingi. Tumone kyebhi o kidi kiki kyabhiti ni polofeta Daniyele. O ufiyele wa Daniyele a ulola mu ithangana yavulu ku mwenyu we. Maji kibhidi kimoxi kyadikota kyalola o ufiyele we, kyabhiti kyoso kyexile ni 90 a mivu ndenge. O athu a bhangele mbandu ku utuminu wa Sobha Ndala a zembele Daniyele, kexile we muxila o Nzambi yexile mubheza mwene. Kyenyiki, ene a soto ndunge phala kujibha Daniyele. Ene abhangesa o sobha kusoneka kitumu phala kumona se Daniyele weji kala fiyele kwa Nzambi inga kwa sobha. Phala kulondekesa o ufiyele we kwa sobha, ni kulenga o kumukaxtikala, Daniyele ka tokalele kubheza Jihova mu 30 a izuwa. Daniyele wasolo kukala fiyele kwa Jihova. —Dan. 6:​12-15, 20-22. w23.08 5 §10-12

Jihova wamesena kwila tusuluka mu kulondekesa henda ku jiphange jetu. Se phange katutalatala kyambote kala ki tendelesa o Bibidya, tutena kudyelela kwila mwene kakibhange mulwelu ni kwila wamubhanga nguzu phala kubelesela Jihova. (Jisa. 12:18) Jihova wazolo o jiselevende jê sumbala ni itondalu yâ. Sumbala twene mulweza, mwene kabatula o ukamba we n’etu; kene mu futuluka we n’etu. (Jisá. 103:9) Tu sanguluka kyavulu mu kwijiya kwila Jihova wene mu tuloloka. Mukonda dya kiki, twatokala we kukayela o phangu yê mu kuloloka akwetu. (Efe. 4:32–5:1).Lembalala we kwila, kuma o dizubhilu dya mundu yu dya zukama, twabhingi kuzukama dingi ku jiphange jetu. Tutena kukingila kwila o izukutisu yanda dibandekesa. Etu nange kate mwene anda tuta mu kaleya mukonda dya kixikanu kyetu. Se kiki kibhita, twanda bhindamena dingi o kikwatekesu kya jiphange jetu m’ukulu ndenge.—Jisa. 17:17. w24.03 15-16 §6-7

O Bibidya izwela we yalungu ni minzangala yamukwa azukamene kwa Jihova, atambula o mabesá me, ya asangulukile. Munzangala umoxi Davidi. Kyoso kyexile hanji mona’ndenge, mwene wasolo kukala dikamba dya Jihova, kupholo dya kwenda wakituka sobha ya fiyele. (1 Jis. 3:6; 9:4, 5; 14:8) Ihi i ubanza se udilonga dingi yalungu ni mwenyu wa Davidi? O kubhanga kiki kyanda ku kukolokotesa ni kukuswinisa kusidivila Jihova ni ufiyele woso. Utena we kudilonga dingi yalungu ni phangu ya Máluku ni Timote. Ene amateka kusidivila Jihova kyoso kyexile hanji tuminzangala, ya asuluka mu ufiyele wa kate kudisukilu dya myenyu yâ. Ene atena kukala ni ukamba wambote ni Jihova. O ukexilu uwamukwambata o mwenyu we kindala, wandafwinyisa o mwenyu we ku hadya. Se udyelela kwa Jihova, muveji dya kudidyelela mudye, Mwene wanda kukwatekesa kusola ni unjimu. Eye utena kusanguluka ku mwenyu ni kutambula mabesá avulu. Lembalala kwila Jihova ubhana valolo yavulu mu ima i ubhanga phala mwene. O kudibhakula mu kusidivila o Tata yetu ya henda, Jihova, wene o ukexilu wabetakota ku mwenyu. w23.09 13 §18-​19

O poxolo Phawulu wejidile kwila o jiphange jê mu nzumbi exile akwa ituxi. Mu kifika, amoxi mu kilunga mu Jeluzaleme exile ni woma wa kudilunga-ne mukonda kaxikinine kwila wexile dixibulu. (Ika. 9:26) Ku pholo dya kwenda, sayi athu a zwela ima yayibha yalungu ni mwene, phala kubhangesa akwa kukamba kumudyelela. (2 Ko. 10:10) Phawulu wa mono kafunga kubhanga kima kya bhangesa akwa mu kilunga kutondala. (Nga. 2:​11, 12) Ku mbandu yamukwa, Máluku, dikamba dye dya kazola, wamuluwalesele kyavulu. (Ika. 15:​37, 38) Phawulu weji tena kwehela kwila o ima yiyi i mubhangesa kudisandula ku athu oso a muluwalesele. Maji muveji dya kiki, mwene wasuluka mu kukala ni ixinganeku yambote yalungu ni jiphange je mu nzumbi, yu wa kolokotele mu kusidivila Jihova ni ufiyele woso. Ihi ya kwatekesa Phawulu o kukolokota? Phawulu wazolele o jiphange je. O henda ya Phawulu ku akwa, yamukwatekesa kudikwatenena mu idifwa yâ yambote, muveji dya kudikwatenena mu itondalu yâ. O henda yakwatekesa we Phawulu kukumbidila o izwelu ya soneka mu velusu ya lelu. w24.03 15 §4-5

Mu Bibidya mwala misoso yavulu ilondekesa kwila o kubatama kidifwa kyakatunda. Tala o phangu ya Izake. Kyoso kyayi mu tunga mu mbanza ya Jelale, o jivizinyu je akwa Fidíxa, a mukwatela lwimbi ya axiti o ixima yoso ya kandele tat’e. Muveji dya kuzoka phala ku itambula, Izake ni mwiji we ayi mutunga dikanga, ya akande ixima yengi. (Dim. 26:​12-18) Ne kiki o akwa Fidíxa ambe kwila o menya a ixima yeniyi ya ubhe, a atokalele we. Maji ne kiki, Izake walondekesa o kubatama. (Dim. 26:​19-25) Kyebhi Izake kyatena kudibhana ni ibhidi yiyi ni kubatama, ne mwene kyoso kyexile mu mulokalala mulwelu? Se phata mwene wadilongo kyavulu ni phangu ya kutululuka ya tat’e Mbalahamu, ni ukexilu wa ‘kulenduka ni kubatama’ wa Sala. —1 Ph. 3:​4-6; Dim. 21:​22-34. w23.09 15 §4

Jihova mu henda ye watumikisa o Mon’e wadyanga, mu ixi. Mu kubhanga kiki, Jezú wejitena kulonga o athu yalungu ni Utuminu ni kubhana o mwenyu we phala kutukula ku kituxi ni kalunga. Mu kusuluka, Jihova wafukununa Jezú phala kuvutuka ku dyulu ni kukituka Sobha ya Utuminu wa Nzambi. O njimbu ya betakota ya Bibidya ya kwila, o dijina dya Jihova anda dizelesa. Kiki kyandabhita kyoso Jihova kyandaya ni kukumbidila o vondadi ye phala o ixi bhukaxi ka Utuminu, wala bhu maku a Kidistu. O vondadi ya Jihova ka tena ku ilungulula. Jihova wakanena kwila ima yoso yandabhita kala kyazwela mwene. (Iza. 46:10; Jih. 6:​17, 18) Mu kusuluka, o ixi yanda kituka palayizu, anga o ana a Adá anda kala athu ayuka, ni kutunga mwenyomo ‘kate ku hadya ni hadya.’ (Jisá. 22:26) Maji kiki ki kyene ngo kyamesena Jihova phala etu. O vondadi ye yabeta kota ya kwila o jiselevende je joso, kikale ku dyulu mba mu ixi, amubheza ni muxima umoxi. Kyenyiki athu oso andakala fiyele mu kubelesela Jihova kala Nguvulu ya Ngongo yoso. (Efe. 1:​8-11) Kyebhi ki udivwa mu kumona o ukexilu wa Jihova kukumbidila o vondadi ye? w23.10 20 §7-8

Kyoso o Jijude kyabhixila ku Babilonya mu mbanza ya Jeluzaleme, adibhanene we ni ibhidi ku mbandu ya Unguvulu wa Pelesa, ni izukutisu ya ifuxi ya akondolokele. Ku mbandu ya mukwa, amoxi kya abhonzele kudikwatenena mu kikalakalu kya kutunga o tembulu ya Jihova. Mukonda dya kiki, Jihova watumikisa polofeta jiyadi, Ajewu ni Zakadiya, phala kukwatekesa o mundu kukala dingi ni kuswina mu kikalakalu kya Jihova kyabhekela mbote yavulu. (Aje. 1:1; Zak. 1:1) Maji phe, mu kubhita 50 a mivu, o Jijudé avutukile mu Jeluzaleme, abhindamene dingi kiswinisu. Kyenyiki Ejidala, muthu wexile ni uhete wakusoneka o Kitumu, watundu ku Babilonya yu wayi ku Jeluzaleme phala kuswinisa o mundu wa Nzambi, kuta o ubhezelu wa kidi ku pholo, ku myenyu ya. (Eji. 7:1) O ikanenu ya Ajewu ni Zakadiya, ya kwatekesa o mundu wa Nzambi m’ukulu kusuluka mu kudyelela kwa Jihova mu ithangana ya ibhidi. Yene we itena kutukwatekesa lelu kudyelela kwila Jihova wanda tukwatekesa, ne mwene se tudibhana ni ibhidi yabhonzo ku mwenyu wetu. — Jisa. 22:19. w23.11 14-15 §2-3

Kyebhi kitulondekesa o henda yetu ku jiphange jetu? Ukexilu umoxi wakubhanga kiki, o kwa akonda o malamba. Se tuzola akwetu, twandatena ‘kudikonda o malamba mudyetu.’ (1 Te. 4:18) Kyebhi kitutena kukolesa jinga o henda yetu mudyetu? Mu kuloloka o itondalu ya jiphange jetu ne mwene se kyabhonzo kubhanga kiki. Mukonda dyahi twabhindamena kudilondekesa henda mudyetu bengebenge lelu? Phetele watambwijila se mukonda dyahi, mwene wambe: “O dizubhilu dya ima yoso dya zukama. Kyenyiki-phe, . . . o henda yenu mudyenu ivule.” (1 Ph. 4:​7, 8) Kyoso o dizubhilu dya mundu yu wayibha ki diya ni kuzukama dingi, ihi itutena kukingila? Mu kuzwela yalungu ni akayedi’e Jezú wambe: “Anda mi zemba kwala akwa jixi joso, mukonda dya dijina dyami.” (Mat. 24:9) Phala kukala fiyele kwa Jihova sumbala ni kutuzemba, twatokala kukala ni muxima umoxi. Se tuzola o jiphange jetu, Satanaji nuka wandatena kutuwanuna mukonda dya henda. Fil. 2:​1, 2. w23.11 13 §18-19

O kidi kya Mak’a Nzambi kyala ni kutena kwavulu. Mu kulonga o athu yalungu ni Jihova ni idifwa ye yoso, twene mumona ima yakatunda kubhita ku myenyu ya. O athu kene mu akwata dingi ku makutu a Satanaji, ene mutena kumona o idifwa ya Tat’etu. Ene adiwana mu kumona o kutena kwa Nzambi kikwene dizubhilu. (Iza. 40:26) Ene adilonga kumudyelela mukonda dya kuyuka kwe. (Mate. 32:4) Ene akatula mbote yavulu mu unjimu wa Nzambi. (Iza. 55:9; Lom. 11:33) Ene asanga kuswina mu kudilonga kwila Nzambi henda. (1 Nz. 4:8) Adivwa kwila ana a kazola a Nzambi, ni kwila anda tambula mwenyu wa kalelaku. Ujitu wadikota phala etu kukwatekesa o athu kuzukama kwa Tata ya! Mu kubhanga kiki, Nzambi utumona kwila twa “mu kalakala kumoxi” ni mwene.—1 Ko. 3:5. w24.02 12 §15

Se eye wamudilonga o Bibidya mba o amukusasa ku jitata jê ene Jimbangi Ja Jihova, o kwila wamuxinganeka kya kudibatizala? Se kyene, kiki kixinganeku kyambote! Maji ande dya kudibatizala, eye watokala kudibhakula kwa Jihova. Kyebhi ki utena kudibhakula kwa Jihova? Bhukaxi ka musambu, eye ukanena kwa Jihova kwila wanda musidivila ngo Mwene, ni kwila wanda ta ku pholo o vondadi ya Jihova ku mwenyu we. Mu kidi, eye ukanena kwa Jihova kwila wanda suluka ni ku muzola “ni muxima wé woso, ni mwenyu wé woso, ni kilunji kyé kyoso ni nguzu yé yoso”. (Mál. 12:30) O kudibhakula kwe wa tokala ku kubhanga eye ngo ni Jihova. Ku mbandu yamukwa, o batizu a tokala ku ibhanga ku pholo dya athu phala kulondekesa kwila eye wa dibhakula kya kwa Jihova. O kudibhakula kwe kikutu kikola, watokala kubhanga yoso ni yoso phala ku kikumbidila, kiki kyene we kyamesena Jihova.—Ndo. 5:​4, 5.w24.03 2 §2; 3 §5

Ukaza woso wala ni ibhidi. O Bibidya izwela ni kidi kyoso kwila o athu a kazala anda bhita ni “ibhidi ku mwenyu.” (1 Ko. 7:28) Mukonda dyahi? Mukonda o diyala ni muhatu akwa ituxi, kiyadi kyâ ala ni idifwa ki idifu, ni kwila kawabhela ima imoxi. Nange kala muthu a musase mu ukexilu wengi mba ni ijila ki idifu. Sayi ithangana, ene atena kulondekesa idifwa kexile mu ilondekesa kyoso kyexile muditangesa. O ima yiyi itena ku bheka maka mu ukaza. Muveji dya kulembalala kwila kiyadi kyâ a tondala, mukonda dya kiki atokala kubhanga yoso phala kubatula o maka, ene nange a ditatela. Ene kate atena kumateka kubanza kwila phala kuzubha o maka, atokala kudisenga mba kubatula mwene o ukaza. Maji o kwila o kudisenga mba kubatula o ukaza kwene kwanda zubha o maka? Kana. Jihova utendelesa o makaza phala atene kudixila ni kubhana valolo ku ujitu alanawu, né mwene se kwabhonzo kyavulu kudizwelesa ni kaza dyé. w24.03 16 §8; 17 §11

Ne mwene kyoso kyakubatizala, eye wasuluka mu kudilonga yalungu ni Jihova ni kumuzola dingi. Kiki, kyakuxikinisa dingi kwila o ima iwamukingila se phata yandadikumbidila. (Jih. 5:13–6:1) Eye nange wamono o kidi kitusanga mu divulu dya Loma 5:​2-4 kudikumbidila ku mwenyu we. Eye wabhiti mu jiphaxi javulu, maji wakolokota, anga Jihova walondekesa kwila wasanguluka n’eye. Mukonda dya kwijiya kwila Jihova wakuzolo anga wasanguluka n’eye, kindala ki wala dingi ni phata kwila wandatambula o ima yakanena mwene. O kidyelelu kye kindala kyakolo dingi o kiwexile nakyu kudimatekenu ndenge. Wala mwene ni kidyelelu kya kidi. Kyene kibhanga mbandu ku mwenyu we. O kidyelelu kiki kifwinyisa o ukexilu woso wa mwenyu we, kilungulula o ukexilu u utalatala o mwiji we, o ukexilu u usola o ima, kate mwene kyebhi ki ukalakala ni kithangana kye.O poxolo Phawulu watumbula dingi kima kyamukwa kyakatunda ki ukala nakyu kyoso kya kuxikina kwa Nzambi. Nzambi ukuxikinisa kwila o ima iwamukingila yandadikumbidila.—Lom. 15:13. w23.12 12-13 §16-19

Kyoso kitudibhana ni kibhidi kyabhonzo, nange kitutena kuxinganeka, kudivwa ni kubhanga o ima kala kitwexile mu ibhanga. Kala o naviyu mu musanza wa kalunga a ilundula ku mabuku ni ku kitembu, etu we kyoso ki tukala ni ibhidi tutena kudivwa kala amutulundujula ku kitembu kya nguzu. Kyebhi Jihova kyatukwatekesa kyoso kitudibhana ni ibhidi kala yiyi? Mwene utudyelelesa kwila wanda tufikidila. Kyoso kikumoneka kitembu kyadikota mu kalunga, o naviyu atena ku izambesa ni nguzu yoso. Phala kukwatekesa kudibhana ni ibhidi yiyi, jinaviyu javulu jala ni ifikidilu ku mbandu jiyadi, yedi kala mabhebhe a mbiji. O ifikidilu yiyi iboba mu menya. O ifikidilu yiyi ikwatekesa o navyu phala ki idizambese kyavulu. Kyenyiki o athu amukwendelamu adivwa kyambote anga abhanga o njila ni kutululuka. Maji, ifikidilu yavulu ikalakala dingi kyambote, se o naviyu yamuya kupholo. Kyene kimoxi, Jihova wanda tufikidila we kyoso kitusuluka mu kumusidivila ni ufiyele woso, mu ithangana ya ibhidi. w24.01 22 §7-8

Kyoso ki ukala ni woma, dibhwidise, ‘Ihi yabhange kya Jihova?’ Xinganeka mu ibhangelu ya Jihova. Mu kifika, ‘talesa kyambote’ kyebhi Jihova kyene mulanga o jinjila ni itulu, sumbala o ima yiyi ka ibhange mu kidifwanganu kya Nzambi, ni kwila ki yene mu mubheza. Kiki kitukwatekesa kumona kwila Jihova wanda beta kutulanga dingi etu. O kuxinganeka mu maka ya, kutena kubandekesa dingi o kidyelelu kyetu. (Mat. 6:​25-32) Xinganeka we mu ima yene mubhanga Jihova phala o abhezi’e. Eye utena kudilonga phangu imoxi ya muthu amutumbula mu Bibidya walondekesa kixikanu kya kyadikota, mba utena kutanga musoso wa jisevelende ja Jihova mu izuwa yetu. Ku mbandu yamukwa, xinganeka kyebhi Jihova kyene mu kulanga kya. Kyebhi mwene kyakukwatekesa kwijiya o kidi kya Bibidya? (Nzw. 6:44) Kyebhi kyene mutambwijila o misambu ye? (1 Nz. 5:14) Mbote yahi iwene mu katula izuwa yoso mu sata ya Mon’e wa kazola? —Efe. 1:7; Jih. 4:​14-16. w24.01 4 §6; 7 §17