Kamoxi

Se eye wala ni twana wa akwatekesa kusokejeka itambwijilu yambote kala kyafwama mu kitala kya. Sayi ithangana tudilonga milongi itena kubhonza bhofele phala o ana ndenge kala maka alungu ni ukaza ni milongi yamukwa yazongo, maji ne kiki, nange kutena kukala hanji kaxi imoxi mba jiyadi ki janda bhonza kyavulu phala o twana kubhana itambwijilu. Ku mbandu yamukwa kwatekesa mon’ê kutendela kwila katokala ku kingila kwila amusola mu ithangana yoso yaleka o lukwaku. Mu kubhanga kiki kyoso o mwendexi kyanda sola athu engi phala kutambwijila muveji dya kumusola, mwene kanda thathamana.(1 Ti. 6:18) Etu enyoso tutena kupelepalala itambwijilu yambote ibhana kijingu kwa Jihova, ni iswinisa o jiphange jetu. (Jisa. 25:11) Sayi bhabha tutena kubhana kitambwijilu kyalungu ni kima kyabhiti kumwenyu wetu, maji twatokala kudilanga phala ki tuzwele kyavulu yalungu n’etu. (Jisa. 27:2; 2 Ko. 10:18) Muveji dya kiki, mu itambwijilu yetu twatokala kudikwatenena mu kuzwela yalungu ni Jihova, ni maka mê o Bibidya ni mundu wê. —Dij. 4:11. w23.04 24-25 §17-18

Etu twabhindamena kyavulu o henda phala kusuluka mukukala ku mesu azele. (Mat. 22:​37-39) O henda yetu kwa Nzambi itukwatekesa kukolokota mu kuboka, ne mwene se o kubhanga kiki kitubhekela ibhidi. (2 Ti. 1:​7, 8) Twene we mulondekesa o henda kwa yo ka musidila Jihova, kiki kyene kitubhangesa kusuluka mu kuboka, kate mwene bhukaxi ka mitelembe ni mikanda. Etu twadyelela jinga kwila, kupholo dyakwenda o athu atena kulungulula o mwenyu wa, ni amateke kubhanga o ima yambote. (Ize. 18:​27, 28) O kuzola akwetu kwalungu we ni kuzola o jiphange jetu mu nzumbi. Etu tulondekesa o henda yiyi, “mu ku dikolokotesa ni kudiswinisa mudyetu.” (1 Te. 5:11) Kala o masoladi atokala ku mbandu imoxi adiswinisa mudya mu ita, etu tudikolokotesa ni kudiswinisa mudyetu. Etu nuka tweji kwama phang’yetu mu lwelu mba ku muvutwila phulu mu phulu. (1 Te. 5:​13, 15) Tulondekesa we o henda yetu mu kuxila o jiphange ala ni kikalakalu kya kwendesa o kilunga. —1 Te. 5:12. w23.06 10 §6; 11 §10-11

Ukexilu umoxi wa kukolesa o kixikanu kyetu, o kuxinganeka mu sata yakukula. O sata yakukula itudyelelesa kwila, Jihova wanda kumbidila o ikanenu yê yoso. O kuxinganeka se mukonda dyahi Jihova wabhana o sata yakukula, ni mu yoso yabhange phala kutubhana mon’ê, kyanda kolesa o kixikanu kyetu mu kikanenu kya Jihova kyalungu ni mwenyu wakalelaku ku mundu wa ubhe. Mukonda dyahi tutena kuzwela kiki? Phala kutubhana o sata yakukula, Jihova wa tumikisa Moné wadyanga o Moné wa kazola, phala kumuvwala kala muthu wayuka mu ixi. Kyoso Jezú kyexile mu ixi, wa dibhanene ni ibhidi yabhonzo kyavulu. Mu kusuluka amutalesa hadi yavulu kate kyafu. Se phata o sata ya kukula kima kyakatunda kyabhange Jihova! O tata yetu ya henda keji kwehela kwila Moné kutala hadi ni kufwa phala kutubhana mwenyu wambote mu mivu yofele ngo. (Nzw. 3:16; 1 Ph. 1:​18, 19) Kuma Jihova wabhana moné wa kazola phala kutukwatekesa, mwene wanda bhanga yoso phala tukale ni mwenyu wakalelaku ku mundu wa ubhe. w23.04 27 §8-9

O kwila Jihova wala ni hanji ya kufukununa o athu afu? Sé phata, mwene wala. Phala kulondekesa o kidi kiki, mwene wabhangesa kwila o asoneki avulu a Bibidya azwela yalungu ni kikanenu kiki. (Iza. 26:19; Dij. 20:​11-13) Kyoso phe Jihova ubhanga kikanenu, mwene ukikumbindila. (Josu. 23:14) Mukidi, Jihova wala ni hanji yavulu ya kufukununa o athu afu. Mu kifika, xinganeka mu izwelu ya Jobe. Mwene wejidile kwila kyoso kyeji fwa Jihova wejikala ni ngunzu ya mwene ni hanji ya kumubheka dingi ku mwenyu. (Jobe 14:​14,15) Jihova wala we ni ngunzu ya jiselevende jê joso jafu kya. Mwene wamesena kyavulu kwafukununa, kwabhana mwenyu, sawidi yambote, ni kusanguluka. Maji ihi itwamba yalungu ni mazunda ni mazunda a athu afu sé kukala ni kithangana yakudilonga yalungu ni Jihova? O Nzambi yetu ya henda wamesena we kwafukununa. (Ika. 24:15) Jihova wamesena kwabhana kithangana kya kukituka makamba mê, ni akale ni mwenyu wakalelaku mu ixi mumu. —Nzw. 3:16. w23.04 9 §5-6

Kyebhi ki utena kukolesa o kidyelelu kye? Se wala ni kidyelelu kya kutambula o mwenyu wa kalelaku mu ixi, tanga o misoso ya Bibidya izwela yalungu ni palayizu, anga uxinganeka mu maka enya. (Iza. 25:8; 32:​16-18) Xinganeka kyebhi kyandakala o mwenyu ku mundu wa ubhe. Se tu katula jinga kithangana phala kuxinganeka kyebhi kyandakala o mwenyu ku mundu wa ubhe, twandamona kwila o ibhidi yetu “ki yanda nangenena, ya bhebhuluka.” (2 Ko. 4:17) O kidyelelu kyatubhana Jihova kyene kyanda tukolokotesa. Mwene utubhana yoso itwabhindamena phala kutamabula o nguzu itunda kwa mwene. Kyenyiki, kyoso ki ubhindamena kikwatekesu phala kukumbidila kikalakalu mu kilunga, kudibhana ni kibhidi mba kusuluka ni kusanguluka, jikula o muxima kwa Jihova mu musambu, anga usota o itendelesu ye bhukaxi ka kudilonga ubheka. Xikina o kikwatekesu ni kiswinisu kya jiphange. Katula jinga kithangana phala kuxinganeka kyebhi kyanda kala o mwenyu ku hadya. Mu kubhanga kiki eye wanda ‘swina ni nguzu yoso bhukaxi kakutena kwa Nzambi, phala u kolokote ni mwanyu ni kusanguluka.’ —Kol. 1:11. w23.10 17 §19-20

Twala ni ima yavulu itubhangesa kumusakidila bhukaxi ka misambu yetu. Tutena kusakidila Jihova mu ima yambote itwala nayu, mukonda o maujitu moso atunda kwa mwene. (Tiy. 1:17) Mu kifika, tutena kumusakidila mukutubhana o ixi ni ima yoso yambote yabhange mwene. Tutena we kumutangela kwila tusakidila kyavulu mukutubhana o mwenyu, o jindandu jetu, o makamba metu, ni kidyelelu kya ima yanda bhita ku hadya. Tusakidila we Jihova mukutubhana o ujitu wakukala tu makamba mê. Nange kubhinga nguzu phala kuxinganeka mu ima yoso itubhangesa kusakidila Jihova. Mu izuwa ya lelu athu avulu kene mulondekesa kisakidilu. Ene abhita ithangana yavulu mu kusota o ima yamesena, muveji dya kulondekesa o kisakidilu mu ima yala nayu kya. Se atufunyisa ku ukexilu yu, o misambu yetu yandakala yakubhinga ngo ima. Phala kiki ki kibhite, twabhingi kulembalala ni kusakidila Jihova mu ima yoso yene mubhanga phala etu. —Luk. 6:45. w23.05 4 §8-9

Kala Tata yetu ya henda, Jihova ka mesena kwila tutala hadi. (Iza. 63:9) Ne kiki, mwene kene mufidisa o ibhidi yetu yoso, itutena kusokesa ni jingiji mba mulengu wa tubhya. (Iza. 63:9) Maji mwene wakanena kutukwatekesa kudibhana nayu. Ku mbandu yamukwa, kabasa kibhidi kitudibhana nakyu kindala, Jihova wandabhanga jinga yoso phala kutukwatekesa, ni tusuluke mu kumusidivila. Mwene we utubhana o nzumbi ye ikola phala kutukwatekesa kukolokota. (Luk. 11:13; Fil. 4:13) Mukonda dya kiki, tutena kudyelela kwila mwene wandatubhana jinga yoso itwabhindamena phala kukolokota, ni kusuluka mu kumukala fiyele. Jihova ukinga kwila tumudyelela. (Jih. 11:6) Sayi ithangana nange tudivwa kwila o ibhidi yetu yabhonzo kyavulu, ki twandatena kudibhana nayu. Kate nange tutena kumateka kudibhwidisa se Jihova wandatukwatekesa mwene. Maji o Bibidya itudyelelesa kwila mu nguzu ya Nzambi, tutena ‘kutuka imbaka.’ (Jisá. 18:29) Kyenyiki, muveji dya kukala ni jiphata, twatokala kusamba ni kixikanu kyoso, mu kudyelela kwila Jihova wandatambwijila o misambu yetu. —Tiy. 1:​6, 7. w23.11 22 §8-9

Menya né-mbe a vula, ka tena kujima o henda yiyi, né-mbe jingiji ja menya ji kunguluka, ka tena ku i bobesa. O izwelu yiyi ibhana kidyelelu phala o makaza: Enu mutena kukala ni henda yakidi mudyenu. O dikaza atokala kubhanga nguzu kiyadi kya, phala o henda ya itene kunangenena kate ku hadya ni hadya. Mu kifika, xinganeka ku tubhya twowike ni jihwinyi. Phala twene ki tujime eye watokala kusuluka mu kutabhu o jihwinyi, se ukamba kukibhanga, o tubhya twanda jima. Kyene kimoxi we, o henda ya diyala ni muhatu a kazala, itena kusuluka kate ku hadya, maji kiki kyandabhita ngo se ene asuluka ni ku ikolesa. Sayi bhabha, o makaza atena kudivwa kwila o henda ya yamuzoza, bengebenge kyoso kyadibhana ni maka alungu ni kitadi, uhaxi, mba o ibhidi ya kusasa o twana. Phala o ‘mulengu wa Jihova’ mu ukaza ki ujime, o diyala ni muhatu atokala kubhanga nguzu phala kukala ni ukamba wambote ni Jihova. w23.05 20-21 §1-3

Phala kukala ni kuswina, ihi i twabhingi kubhanga? O jitata jetu a mesena kwila tu kala tu athu a swina, maji ene ka tena kutubhitisa o kudifwa kiki kala undundu wa mwiji. O kukala ni kuswina kwedi kala o kudilonga ufunu. Ukexilu umoxi wa kukala hete mu ufunu yu, o kutonginina kyambote kyoso o mulongexi kyaya ni kukalakala, ni kukayela o phangu ye. Kyene kimoxi we, tutena kukala ni kuswina, mu kutonginina kyambote kyebhi akwetu kyene mulondekesa o kidifwa kiki ni kukayela o phangu ya. Kala Daniyele, twabhingi kwijiya kyambote o Mak’a Nzambi. Twatokala kukala ni ukamba wambote ni Jihova mu kuzwela ne ithangana yoso ni kumutangela kyebhi kitwamudivwa. Twabhingi we kudyelela kwila Jihova wanda tukwatekesa ithangana yoso. Kyenyiki kyoso kitwanda dibhana ni ibhidi ilola o kixikanu kyetu, twanda swina. Muveji javulu o athu a swina a axila ku akwa. Ene atena we kukwatekesa yo ala ni mixima yambote kwijiya Jihova. Se phata, twala ni ima yavulu itubhangesa kukala tu athu a swina. w23.08 2 §2; 4 §8-9

Mu Ngeleku o kizwelu “kutongolola” kya lungile ni ukexilu wexile mu kalakala nawu o athu exile mulola o ima kala o phalata ni ulu, phala kwijiya se yexile mwene ya kidi. Mu kiki etu twabhingi kulola phala kwijiya se o ima itutanga ni itwivwa ya kidi mwene. O kiki kima kitwatokala kubhanga etu bengebenge kyoso kituya ni kuzukama dingi mu kithangana kya hadi yadikota. Muveji dya kuxikina ngo mu ima yoso izwela akwetu, twatokala kukalakala kyambote ni kitongolwelu kyetu, mu kusokesa o ima itutanga mba itwivwa, ni ima izwela o Bibidya ni kilunga kya Jihova. Kanda tunganala ni njimbu ya makutu ya madimonyo. (Jisa. 14:15; 1 Ti. 4:1) Twejiya kwila, o jiselevende ja Nzambi anda bhuluka ku hadi yadikota. Maji ki twejiya ihi yanda bhita ni muthu ni muthu mudyetu. (Tiy. 4:14) Kikale se twanda kala ku mwenyu mba kana, kyoso kyanda kwiza o hadi yadikota, Jihova wanda tubesowala ni mwenyu wakalelaku se tukolokota fiyele kwa mwene. Kyenyiki tudikwatenyenu mu kidyelelu kyetu kyalungu ni hadya, tukalyenu polondo phala o kizuwa kya Jihova! w23.06 13 §15-16

Sayi ikanenu ya Bibidya etu ki twejiya kyebhi kiyanda dikumbidila. (Dan. 12:​8, 9) Maji o kukamba kwijiya kyambote kyebhi kyanda dikumbidila o kikanenu, ki kilombolola kwila ki kyandabhita. Tutena kudyelela kwila mu kithangana kyatokala, Jihova wanda tujimbulwilakyu, kala kyabhangele m’ukulu.. Anda bhanaku o ngolokela ya kwila “kwatululuka, kwabatama.” (1 Te. 5:3) Kwakambe ngo, o jinguvulu ja ngongo janda lungulukila o jingeleja ja makutu ni kujibhwika. (Dij. 17:​16, 17) Mu kusuluka ene anda lungulukila o mundu wa Nzambi. (Ize. 38:​18, 19) Bhenyobho o ita yasukidilaku, o Alumajedone, yandamateka. (Dij. 16:​14, 16) Tutena kuxikina ni kidi kyoso kwila, kwakambe ngo bhofele phala o ima yiyi kubhita. Kate kibhixila o kithangana kiki, tusulukyenu mu kulondekesa o kisakidilu kyetu kwa Tata yetu ya dyulu, mu kutonginina o ikanenu ya Bibidya ni kukwatekesa akwetu kubhanga we kyenyiki. w23.08 13 §19-20

Kyoso poxolo Phawulu kyexile muzwela yalungu ni kixikanu, kidyelelu, ni henda, mwene wasuku mu kuzwela kwila, mu idifwa yoso yiyi ‘o kya betakota o henda.’ (1 Ko. 13:13) Mukonda dyahi Phawulu wazwela kiki? Ku hadya ki twandabhinga dingi kukala ni kixikanu ku ikanenu ya Nzambi yalungu ni mundu wa ubhe, mukonda o ima yiyi itwene mu kingila yanda dikumbidila kya. Maji mu ithangana yoso twandabhinga kukala ni henda kwa Jihova ni ku athu. Mu kidi, o henda yetu kwa Jihova ni ku akwetu yanda suluka ni kudibandekesa kate ku hadya ni hadya.Mukiki, o henda ku jiphange jetu, yene ilondekesa kwila tu Jikidistá já kidi. Jezú wambela o jipoxolo je, wixi: “Athu oso anda mijiya kwila mu maxibulu mami, se mudizola mudyenu.” (Nzw. 13:35) Ku mbandu yamukwa, o kudilondekesa henda mudyetu kutukwatekesa kukala ni muxima umoxi. Poxolo Phawulu wambe kwila o henda yene “o dijikita dibhangesa o athu kukala bhwamoxi.” (Kol. 3:14) Poxolo Nzwá wasonekena o jiphange, wixi: “Woso wazolo Nzambi watokala we uzola phang’yê.” (1 Nz. 4:21) Kyoso kitudilondekesa o henda mudyetu, tulondekesa kwila twazolo Nzambi. w23.11 8 §1, 3

O Bibidya isokesa o mwenyu wa Jikidistá ni kulenga. Oso alenga kate bhu kididi kya axindi anda tambula o mwenyu wakalelaku. (2 Ti. 4:​7, 8) Twatokala kubhanga yoso phala kusuluka ni kulenga, bengebenge mu kwijiya kwila twazukama kya bhu kididi kyatuxindi. Poxolo Phawulu wazwela ihi itena kutukwatekesa ku bhanga kiki. Mwene wa tutendelesa ‘kutula o ima yoso ya tunemena . . . ni tu lenge ni kukolokota o dikanga dya tukala kupholo.’’ O kwila Phawulu wexile muzwela kuma o Jikidistá katokala kwambata kima kyoso kyoso kyaneme? Kana. Muveji dya kiki, mwene wexile muzwela kwila ki twatokala kwambata o imbamba yaneme ki twayibhindamena. O imbamba yaneme kala yiyi, itena kututohokesa. Phala kukolokota twatokala kuditonginina ni lusolo, ni kuxisa kimbamba kyoso kyoso kyaneme, kyeji tuzozesa. Maji sayi imbamba yaneme itwatokala kwambata. Mukonda se ki tukibhange kyanda londekesa kwila ki twamesena dingi kulenga. —2 Ti. 2:5. w23.08 26 §1-2

O kukala tu athu atetuluka, kitena kutukwatekesa kuxila o ima izwela akwetu. Mu kifika, sayi jiphange ja ahatu awabhela kyavulu kudipindala maji amukwa kana. Sayi Jikidistá awabhela kunwa bhofele o uholwa, maji amukwa ka xikina ne ngo bhofele. Jikidistá joso amesena kukala ni sawidi yambote, maji asota maukexilu ka difu phala kulanga o sawidi ya. Mu ithangana yoso se tuxinganeka kwila, o ibanzelu yetu yene yafwama ni kujijidika akwetu kuyixikina, tutena kutondalesa akwetu ni kuwana o jiphange mu kilunga. (1 Ko. 8:9; 10:​23, 24) Mu kifika muveji dya Jihova ku tutangela se izwatu yebhi itwatokala kuzwata, maji watubhana itumu itwatokala kukayela. Twatokala kuzwata mu ukexilu ulondekesa kwila twa akunji a Nzambi, mu kuzwata kyambote, ni kuxila kwoso “ni kilunji.” (1 Ti. 2:​9, 10) Etu ki twamesena kwila akwetu atutonginina kyavulu mukonda dya ukexilu wetu wa kuzwata. O itendelesu ya Bibidya itena kukwatekesa we o tufunga phala ka bhane itumu ya, yalungu ni kuzwata ni kuyudika o ndemba. w23.07 23-24 §13-14

Jihova utulondekesa kyebhi kitutena kukala ni kisangusangu kya kidi kumwenyu wetu. O yo axikina o kixanu kya muhatu “wa dilaji” a dikwatenena mu kusota o ima “ya towala” mba yosweke kala o undumbu. O ukexilu wa, wayibha wanda kwabhekela “kalunga.” (Jisa. 9:​13, 17, 18) Maji ki kyene kyanda bhita ni yo axikina o kixanu kya muhatu wa unjimu, kifwa “o unjimu wa kidi”! Mukubhanga kiki twamudilonga kuzola o ima ya zolo Jihova ni kuzemba ya zembe mwene. (Jisá. 97:10) Tusanguluka we kyavulu mu kwixana akwetu phala kudilonga ni “unjimu wa kidi.” Kyedi kala, “twa mwa exana tunde bhu thal’elele ya dyembu, mu kwamba: ‘Woso wakambe unjimu eze kuku.’” O mbote phala etu mba yo axikina o kixanu kiki, ki ya kindala ngo, maji yanda nangenena kate ku hadya ni hadya. O mbote yiyi itukwatekesa kukala ni “mwenyu wakalelaku ni kusuluka mukwenda “mu njila ya kilunji.”—Jisa. 9:​3, 4, 6. w23.06 24 §17-18

Kyebhi ki udivwa kyoso o koleka ye ya xikola mba ya salu ukubhanga ibhwidisu yalungu ni kixikanu kye? O kwila uthandanganya? Avulu mudyetu twene muthandanganya. Maji o ibhwidisu kala yiyi, itubhangesa kwijiya se ihi ixinganeka mba ixikina o muthu, itubhana we kithangana phala kuzwela yalungu ni njimbu ya mbote ya Nzambi. Sayi bhabha o athu abhanga ngo o ibhwidisu phala kuzoka. O kiki ki kima kya kudiwana. Avulu ene mukwivwa jinjimbu jamakutu jalungu ne’tu. (Ika. 28:22) Kala kitwakijiya twala “mu izuwa isukidilaku,” mu kithangana kya kwila athu avulu kene muxikina kuditendela ni akwa, kate mwene sayi ya “ijibhangânga.” (2 Ti. 3:1) Nange uxinganeka, ‘Kyebhi kingitena kulondekesa o kutululuka kyoso ki kumoneka muthu wamesena kuzoka n’eme yalungu ni njimbu ya Bibidya?’ Wejiya se ihi itena ku kukwatekesa? O kubatama. O muthu wabatama ka kala ni njinda ni lusolo, utululuka kyoso kya mulokalala, mba kyoso kya kamba kwijiya kyebhi kya tambwijila. w23.09 14 §1-2

Sayi ithangana, o kilunga kya Jihova kyene mutubhana itendelesu yene mutulanga. Mu kifika, ene mutudimuna ku kilwezu kya kuzola o kitadi ni kya kubhanga ima yeji tubhangesa kubhukumukina o itumu ya Jihova. (Iza. 48:​17, 18; 1 Ti. 6:​9, 10) Se phata kwila Jihova wanda suluka mu kwendesa o mundu we bhukaxi ka athu mu ixi, mu kithangana kya hadi ya dikota ni mu kithangana kya Utuminu wa Midi ya Mivu wa Jezú. O kwila twanda suluka mu kukayela o itendelesu yiyi? Kikyanda tubhonza kubhanga kiki, se tukala kya ni kifwa kya kukayela o itendelesu ya Jihova kindala. Mu kiki, twanda suluka jinga mu kukayela o itendelesu itubhana Jihova bhukaxi ka Bibidya ni ka jiphange jasolo mwene phala kutulanga. (Iza. 32:​1, 2; Jih. 13:17) Tutena kudyelela ni muxima woso kwa Mwendexi wetu, Jihova, mukonda mwene utwendesa mu njila ikolesa o ukamba wetu ni mwene, anga wanda twambata kate ku mwenyu wa kalelaku. w24.02 25 §17-18

O poxolo Phawulu wasangulukile kyavulu mu kusidivila Jihova, maji sayi ithangana kyamubhonzele. Mwene wabhingile kwenda njila ja makanga, mu thembu yenyoyo, kiki kyexile kima kyabhonzele kyavulu. Mu kwenda mu jinjila jiji, sayi ithangana Phawulu wabhiti “mu ilwezu ya jingiji” ni “mu ilwezu ya miyi.” Sayi ithangana kate mwene o jinguma a mubhana kibetu. (2 Ko. 11:​23-27) Sayi bhabha o jiphange kexile mulondekesa kisakidilu mu nguzu yoso yexile mubhanga Phawulu phala ku akwatekesa. (2 Ko. 10:10; Fil. 4:15) Ihi yakwatekesa Phawulu kusuluka mu kusidivila Jihova? Mwene wadilongo kyavulu yalungu ni idifwa ya Jihova bhukaxi ka Bibidya ni bhukaxi ka ima yabhitile ku mwenyu we. Mwene waxikinine ni kidi kyoso kwila Jihova wamuzolele. (Lom. 8:​38, 39; Efe. 2:​4, 5) Kiki kyamubhangesa we kuzola kyavulu Jihova. Phawulu walondekesa o henda ye kwa Jihova ‘mu kukwatekesa o jiphange ni mu kukolokota mu ku akwatekesa jinga.’—Jih. 6:10. w23.07 9 §5-6

Athu avulu axikina kwila twabhindamena kukala ni jinguvulu, ni kwila kwala itumu itubhana o “maungana” enya, itwatokala kubelesela. Maji nange ene ka xikina kubelesela o itumu kayiwabhela mba yafika kwila ki yafwama. O Bibidya itutangela kwila o jinguvulu ja ngongo jibhekela hadi ku athu, a mujitumina kwala Satanaji, ni kwila kwakambe ngo anda jibwika. (Jisá. 110:​5, 6; Ndo. 8:9; Luk. 4:​5, 6) Maji yene itutangela we kwila “woso ubhukumukina o maungana, wa mu bhukumukina Nzambi.” Kindala hanji, Jihova wamukwehela o jinguvulu kutumina phala ima yoso ki ikale mu kavwanza. Mwene phe ukingila kwila tujitumaka. Kyenyiki, twatokala ‘kubhana ku athu oso, yoso ya atokala,’ kala o malubhaku, o kuxila, ni kubelesela. (Lom. 13:​1-7) Nange sayi itumu tu imona kala ki yafwama, mba yabhonzo ku ibelesela. Maji ne kiki, etu tubelesela o maungana enya mukonda Jihova watubhingi phala kukibhanga. Tudituna ngo se atubhinga kubhukumukina o itumu ya Jihova.—Ika. 5:29. w23.10 8 §9-10

Kyoso Sasawu kyamuvwala, akwa Fidixa akexile mutumina akwa Izalayele ni ku a zukutisa. (Afun. 13:1) Akwa Izalayele atale hadi yavulu mukonda akwa Fidixa ayibhile kyavulu. Jihova wasolo Sasawu phala ‘kubhulula akwa Izalayele bhu maku akwa Fidíxa.’ (Afun. 13:5) Phala kutena kubhanga o kikalakalu kiki, Sasawu wabhingile kudyelela kwa Jihova. Sayi kizuwa, masoladi akwa Fidixa endele mu kwata Sasawu mu dyembu dya Leyi nange mu mbanza ya Juda. O mayala akwa Juda akexile ni woma, mukonda dya kiki abhana Sasawu ku jinguma. Sasawu amukutu kwala o mundu we ni jingoji jiyadi ja ubhe, ya amubheka ku akwa Fidixa. (Afun. 15:​9-13) Maji ‘o nzumbi ya Jihova ya bhana kutena’ kwa Sasawu, mwene wadijituna. Mu kusuluka “wasange lunganzwanza lwa jumendu” walukatula yu wa jibha nalu 1.000 ya mayala akwa Fidixa!—Afun. 15:​14-16. w23.09 2 §3-4

Jihova mu kutujimbulwila bhofele bhofele o “vondadi yê inangenena” itusanga mu Bibidya. Jihova utena kusola kukumbidila o vondadi ye mu maukexilu ka difu, anga uditunda kyambote ithangana yoso mukonda mwene ‘ubhangesa kwila ima yoso itunda kala kyamukala mu vondadi ye.’ (Jisa. 16:4) Yoso ibhanga Jihova inangenena kate ku hadya ni hadya. Maji yebhi phe o vondadi ya Nzambi ni ima yebhi yalungulula phala o vondadi ye idikumbidile? Nzambi watangela ku dikaza dya dyanga yebhi yexile o vondadi ye phala ene. Nzambi wa atangela, wixi: ‘Vwalenu, mu sokoloke, mu izalese ixi yoso, mu i tolole; mu tumine . . . ima yoso ya mwenyu yendela ku mavu.’ (Dim. 1:28) Kyoso Adá ni Eva kyabhukumuka athu oso akituka akwa ituxi, maji kiki ki kyejifidisa Jihova kukumbidila o vondadi ye. Kyoso Adá ni Eva kyabhukumuka athu oso akituka akwa ituxi, maji kiki ki kyejifidisa Jihova kukumbidila o vondadi ye. Mwene walungulula ngo o ukexilu wejikumbila o vondadi yiyi. Mu kithangana kyenyokyo, Jihova waxindi kutumbika Utuminu ku dyulu phala kukumbidila o vondadi ye phala o athu ni ixi. Matesu 25:34. w23.10 20 §6-7

Jihova utena kutukwatekesa kukolokota. Sayi ithangana kitena kubhonza kukolokota, bengebenge se twamudibhana ni kitondalu mu thembu yavulu maji ki twamutena ku kitolola. Nange tumona kala o itondalu yetu yabhonzo dingi o yadibhanene nayu poxolo Phetele ndenge. Maji Jihova utena kutubhana nguzu phala ki tubhwile. (Jisá. 94:​17-19) Mu kifika, tala o phangu ya phange ya diyala wexile ni kifwa kya kuzeka ni mayala ni akwa mu mivu yavulu, ande dya kukituka Mbangi ya Jihova. Mwene walungulula o mwenyu we, yu wamateka kubelesela o itumu ya Bibidya. Maji ne kki, sayi ithangana wene mudibhana luwa ni jihanji ja ibha. Maji ihi imukwatekesa kukolokota? Mwene wambe: “Jihova ungiswinisa. Ni kikwatekesu kya nzumbi ikola . . . , Ngadilongo kwila ngitena [kusuluka] mu njila ya kidi . . . Sumbala ni itondalu yami, Jihova wene musuluka mu kungibhana ikalakalu ni kungikolokotesa.” w23.09 23 §12

Enu mu jiphange ja mayala minzangala, ejiyenu kyu kwila kwabhingi kubhanga nguzu phala kukituka diyala wakulu mu nzumbi. Eye wabhingi kusola phangu jambote phala kujikayela, kukala ni kilunji kyambote, kukala u muthu atokala kukudyelela, kudilonga mauhete andakukwatekesa ku mwenyu, ni kudipelepalala phala o mwenyu we ku pholo. Eye nange utena kukala ni hele kyoso ki uxinganeka mu ikalakalu yavulu iwala nayu ku pholo. Maji eye utena kuditunda kyambote. Lembalala kwila Jihova wamesena kyavulu ku kukwatekesa. (Iza. 41:​10, 13) Se phata kwila o jiphange mu kilunga jandakukwatekesa we. Kyoso kiwandakituka u diyala wakulu mu nzumbi kala kyamesena Jihova, wandasanguluka kyavulu ku mwenyu. Twamizolo kyavulu enu mu minzangala yetu ya mala! Jihova abesowale o nguzu imwamubhanga kindala phala kukituka mu mayala mwakulu mu nzumbi. —Jisa. 22:4. w23.12 29 §19-20

Xinganeka kwila mwadyongeka mu kibuka kya jiphange ja mala ni ja ahatu. Enu mwasanguluka kyavulu mu kubhita kithangana kumoxi anga ku disukilu dya kyonge, muxabula foto ya kibuka kyoso. Mu kidi, eye uxabula dingi foto jiyadi, mu kuxinganeka kwila nange o foto yadyanga ki yandatunda kyambote. Mu kyenyiki, eye wala ni foto jitatu. Maji mu kujitonginina, umona kwila mu foto imoxi sayi phange yadiyala ka mukwolela. Eye wanda ijima mukonda wala hanji ni jifoto jiyadi mwala o jiphange joso amukwolela, kate mwene ni phange yadiyala kexile mukwolela mu foto yadyanga. Etu twene mulembalala ni kisangusangu kyoso o ithangana yambote itwabhiti ni jiphange jetu. Maji xinganeka kwila mu ithangana yeniyi sayi phange uzwela mba ubhanga kima kituluwalesa. Ihi itwejibhanga ni izwelu mba ima yabhange o phange yiyi? Tweji sota kujimba mba kujima o ima yiyi, kala kitubhanga ni foto yakambe kutunda kyambote? (Efe. 4:32) Tutena kujimba o itondalu ya jiphange jetu mukonda tulembalala o ithangana yambote itwabhiti kumoxi ni ene. Yiyi yene o ima itwamesena kubhaka ni kubhana valolo. w23.11 12-13 §16-17

O izwelu mu dimi dya Ngeleku yatumbula mwene, ilondekesa kwila o muhatu ithangana yoso watokala kuzwata kyambote ni kuxinganeka kyebhi kyandadivwa akwa mu kumona o uzwatelu we. Twasanguluka kyavulu mu kumona kwila o jiphange jetu ja ahatu jene mu kayela o kitendelesu kya kuzwata kyambote! O kidifwa kyamukwa kyabhingi kukala nakyu o jiphange ja ahatu phala akale athu akulu mu nzumbi, o kutongoloka. Maji o kutongoloka ihi? O uhete wa kwijiya kutungula o kima kyawabha ni kyayibha, phala tutene kusola o kima kyatokala. Tala o phangu ya Abingayíle. O mwadi we wabhangele kima kyayibha kyejibhekela divwa mu dibhata dya dyoso. Abingayíle wabhange kima ni lusolo lwoso. O kutongoloka kwe kwabhulula myenyu. (1 Sam. 25:​14-23, 32-35) O kutongoloka kutukwatekesa kwijiya o kithangana kitwatokala o kuzwela ni kithangana kitwatokala kudixibha. O kutongoloka kutukwatekesa we kusuwa ni kutalatala kyambote akwetu, sé kwabhangesa kudivwa kyayibha. —1 Te. 4:11. w23.12 20 §8-9

Poxolo Phawulu wasoneka o izwelu yiyi phala o kilunga ku Loma. O jiphange kwenyoko adilongele yalungu ni Jihova ni Jezú, alondekesele kixikanu, ya akitukile Jikidistá. Kyenyiki, Nzambi ‘wa amono kala athu ayuka mukonda dya kixikanu,’ yu wa undu ni nzumbi ikola. (Lom. 5:1) Ene ejitena kukingila ni hanji yoso phala kutambula o mabesá, ni kudyelela ni kidi kyoso kwila eji kwatambula mwene.Ku pholo dya kwenda, Phawulu wasonekena o Jikidistá ku Mbanza ya Efezu yalungu ni kidyelelu kya abhanene Nzambi. O kidyelelu kiki kyalungile ni kutambula o “mabesá akatunda anda bhana ku athu’ê akôla.” (Efe. 1:18) Phawulu wajimbulula we ku akwa Kolose se kwebhi kweji tambula o mbote ya. Mwene wexana o mbote yiyi kala, “kidyelelu kya mibhakela Nzambi ku dyulu.” (Kol. 1:​4, 5) Kyenyiki, o kidyelelu kya Jikidistá a undu, o kutambula o mwenyu wakalelaku ku dyulu ni kutumina kumoxi ni Kidistu. —1 Te. 4:​13-17; Dij. 20:6. w23.12 9 §4-5

O kizwelu “kulanga,” exile mu kitumbula phala kuzwela yalungu ni masoladi exile mulanga o mbanza phala ki mubokone jinguma. O athu atungile mu mbanza a tenene kuzeka ni kutululuka, mukonda ejidile kwila o masoladi exile mu alanga kyambote. Kyene we kimoxi, kyoso o kutululuka kwa Nzambi kulanga o muxima ni kilunji kyetu, etu tu ximbakata, tudivwa kala twala mu kididi kya kondama. (Jis 4:8) Kala kya bhitile ni Ana, ne mwene se o ima ku mwenyu wetu ilunguluka ni lusolo, tutena hanji kukala ni kutululuka. (1 Sam. 1:​16-18) Kala kitwene mumona, ki kitubhonzo kuxinganeka kyambote ni kusola ni unjimu, se twatululuka. Ihi itutena kubhanga? Kyoso ki ukala ni ibhidi, exana o ‘mulangidi.’ Kyebhi ki utena kubhanga kiki? Samba kate ki udivwa kwila wala ni kutululuka kwa Nzambi. (Luk. 11:9; 1 Te. 5:17) Mu kubhanga kiki wanda tena kumona o kutululuka kwa Jihova kulanga o muxima ni kilunji kye. —Lom. 12:12. w24.01 21 §5-6

Phala kuzokela o dijina dya Tat’e, Jezú wabhitile mu ima yavulu yayibha kala o kumubeta, kumuxongwena ni kumutatela. Mwene wejidile kwila wabelesele Tat’e mu ima yoso; mwene we kabhingile kukala ni jisonyi ja kima kyoso-kyoso. (Jih. 12:2) Mwene wejidile we kwila Satanaji wexile mumuzukutisa mu kithangana kyenyokyo kya ibhidi. (Luk. 22:​2-4; 23:​33, 34) Se phata Satanaji wamesenene kwila Jezú uzoza mu kulondekesa o ufiyele we kwa Jihova; maji Satanaji walweza! Jezú walondekesa ni kidi kyoso kwila Satanaji mukwa makutu ni kwila, Jihova wala ni jiselevende ja fiyele, atena kusuluka mu kumubheza ne mwene mu kudibhana ni ibhidi yonene! O kwila eye wamesena kusangulukisa o Sobha ye, Jezú? Suluka mu kuximana o dijina dya Jihova, mu kukwatekesa akwenu kudilonga yalungu ni idifwa ya katunda ya Nzambi yetu. Mu kubhanga kiki, eye wamukayela o phangu ya Jezú. (1 Ph. 2:21) Kala Jezú, eye wamusangulukisa o muxima wa Jihova, ni kulondekesa kwila o nguma Ye, Satanaji, mukwa makutu, wakambe o sonyi! w24.02 11-12 §11-13

Mu mivu itanu ya bhiti, kazunda kamoxi ka athu ndenge, a abatizala kala Jimbangi ja Jihova. Kyoso ki udibhakula kwa Jihova, eye usola kukituka dixibulu dya Jezú Kidistu ni kubhangesa kwila o vondadi ya Nzambi ikale o kima kya betakota ku mwenyu we. O ku dibhakula kuku kwa lungu ni ihi? Jezú wambe: “Se muthu wamesena ku ngi kayela, aditune mwene mudyê.” (Mat. 16:24) O izwelu mu Ngeleku yolungulule “aditune mwene mudyê” itena we kulombolola “kudituna kwambata o mwenyu kala kyamesena o muthu.” Kyoso ki udibhakula kwa Jihova, watokala kudituna kima kyoso-kyoso ki muluwalesa. (2 Ko. 5:​14, 15) Kiki kya lungu ni kudituna “o ibhangelu ya xitu,” kala o undumbu. (Nga. 5:​19-21; 1 Ko. 6:18) O kwila o kubelesela o itumu kwanda bhonzesa o mwenyu we? Kana. Kiki kikyanda bhita se uzola Jihova, ni kuxikina kwila, o itumu ibhana mwene phala o mbote ye. —Jisá. 119:97; Iza. 48:​17, 18. w24.03 2 §1; 3 §4

Jihova ubhana o nzumbi ikôla kwa yó wa axikina. (Mat. 12:18) Twatokala kudibhwidisa: ‘O kwila ku mwenyu wami ngene mulondekesa o idifwa yatokala ku ibundu ya nzumbi ikôla?’ O kwila kindala eye wene mulondekesa dingi mwanyu ku akwenu, o ki wamateka kusidivila Jihova ndenge? Kyoso ki uya ni kulondekesa dingi o idifwa yatokala ku ibundu ya nzumbi ikôla, wanda dyelela kwila Jihova wa kuxikina! Jihova ubhana o valolo ya sata ya kukula kwa yó wa axikina. (1 Ti. 2:​5, 6) Ihi itwatokala o kubhanga se tudivwa kwila Jihova katuxikina, nemwene twala ni kixikanu mu sata ya kukula ni kwila atubatizala kya? Lembalala kwila, kitutokala kudyelela ku muxima wetu, maji twatokala kudyelela kwa Jihova. Phala mwene, woso yo waxikana ku sata ya kukula kifwa muthu wa yuka, mwene u mubesowala. —Jisá. 5:12; Lom. 3:26. w24.03 30 §15; 31 §17