Kamusasadi

O kwila sayi ithangana kikubhonza kubelesela? Kiki kyabhitile ni Sobha Davidi, kyenyiki wasambe kwa Nzambi: “Ngi fikidile ni vondadi ya ku ku tumaka.” (Jisá. 51:12) Davidi wazolele Jihova. Maji sayi ithangana, kyexile mumubhonza kumubelesela, kyene we kimoxi n’etu. Maji mukonda dyahi? Kyadyanga, mukonda twalundula o ukexilu wa kuxibhaka. Kayadi, Satanaji usota kutufwinyisa kubhukumukina Jihova, kala kyabhange mwene. (2 Ko. 11:3) Katatu, twatungu ku mundu wezala ni “athu abhukumuka.” (Efe. 2:2) Kyenyiki, phala tutene kubelesela Jihova ni yo a abhana o ungana wa kutumina kwa mwene, twatokala kubhanga nguzu yavulu phala kudibhana kana ngo ni ukexilu wetu wa ituxi, maji we ni ijijidiku ya Dyabhu ni mundu we. w23.10 6 §1

Ihi itutena kudilonga ku madiwanu a Jezú alungu ni ku abhangesa o menya kukituka vinyu ? Tudilonga disá dyakulenduka. Jezú kadizangeleka ni madiwanu abhangele; mu kidi mwene nuka wadizangeleka mu ima yoso yexile mubhanga. Muveji dyakiki Jezú wexile muthu walenduka, mwene wexile mubhana o kijingu kyoso kwa Tat’ê. (Nzw. 5:​19,30; 8:28) Se tukayela o phangu ya Jezú mu kukala tu athu alenduka, kitwanda dizangeleka mukonda dya kima kyoso kyoso kitubhanga. Ki twatokala kudisotela kijingu, muveji dyakiki tubhana o kijingu kyoso kwa Nzambi yetu Jihova. (Jel. 9:​23, 24) Mwéne watokala kutambula o kijingu. Ki tweji bhanga kima kyoso kyoso se o kikwatekesu kya Jihova. (1 Ko. 1:​26-31) Se tukala tu athu alenduka, kitwanda sota kutambula kijingu mu ima yambote itubhanga phala akwetu. Muveji dya kiki twanda sanguluka mu kwijiya kwila Jihova umona o ima itubhanga ni kwila uyibhana valolo. (Sokesa ni Matesu 6:​2-4; Jih. 13:16) Sé phata etu tusangulukisa kyavulu Jihova kyoso kitukayela o phangu ya Jezú ya kulenduka.—1 Ph. 5:6. w23.04 4 §9; 5 §11-12

Poxolo Phawulu waswinisa o jikidistá phala kuta kupholo o mbote ya akwa. Kyebhi kitutena kukumbidila o kitendelesu kiki mu yônge? Mu kulembalala kwila akwetu amesena we kubhana itambwijilu. Kyoso ki wa mudizwelesa ni makamba mé, o kwila eye uzwela mu kithangana kyoso se kwa ehela we kuzwela? Kana! Eye wamesena kwila ene we abhanga mbandu mu maka u mwa muzwela. Se ku kibhange ene anda divwa kwila eye ki wa mwabhana valolo. Kyene kimoxi we, mu yônge etu twamesena kwila jiphange javulu abhana itambwijilu. Mu kidi, ukexilu umoxi wabetakota wa kuswinisa o jiphange jetu, o kwabhana we o ujitu wa kulondekesa o kixikanu kyala nakyu. (1 Ko. 10:24) Bhana itambwijilu yofele mba ki yalebha kyavulu. Mu kubhanga kiki, akwetu anda kala we ni kithangana kya kutambwijila. Ne mwene kyoso ki ubhana itambwijilu mu izwelu yofele, bhanga yoso phala ki uzwele jipondo javulu. Se uzwela yoso yalungu ni kaxi, ki kwanda subhuka ima yavulu phala akwenu kuzwela. w23.04 22-23 §11-13

Twatokala kulembalala kwila kima kyambote kukwatekesa akwetu bengebenge mu kikalakalu kya kuboka. Mu ukunji wetu twatokala kusota jindunge phala kubokela kabasa muthu. O athu utwene mwabokela kala ni ibanzelu imoxi yalungu ni Nzambi ni kwila ene atokala mu ididi yavulu, ala we ni ijila ki idifu. Poxolo Phawulu wa soto jindunge phala kubokela o athu, etu tutena kudilonga ni phangu ye. Jezú wasolo Phawulu kala “poxolo phala o athu akwa jixi jengi.” (Lom. 11:13) Mu kyenyiki, poxolo Phawulu wa bokela o Jijudé, Jingeleku, athu adilongele kyavulu ni yo ka dilonge kyavulu, ni jinguvulu. Phala kubhixidisa o njimbu ku mixima ya athu avulu, Phawulu wabhange “yoso phala kukwatekesa athu a idifwa yoso.” (1 Ko. 9:​19-22) Mu kuboka, Phawulu wexile mutonginina o idifwa ya athu, o ima ya akondolokele ni ima ya kexile muxikina. Etu we tutena kubandekesa o uhete wetu wa kuboka, se tu tetuluka ni kusota o ukexilu wabetakota wa kukwatekesa muthu ni muthu. w23.07 23 §11-12

O yo abatama, athu aswina ka azoza kana. Kubhinga nguzu phala kutululuka mu kudibhana ni kibhidi kyabhonzo. O kubatama kidifwa kibhanga mbandu ku “ibundu ya nzumbi.” (Nga. 5:​22, 23) O kizwelu mu dimi dya Ngeleku kyolungulule “kubatama,” sayi ithangana exile mu kitumbula phala kuzwela yalungu ni kabalu ka temene, maji akalongele kutululuka ni kubelesela. Sumbala o kabalu kindala, kalenduka, katululuka, maji o nguzu ye wala nayu hanji. Abha etu, kyebhi ki tutena kukala tu athu abatama, anga tukala hanji ni nguzu mba kuswina? Ki tutena kubhanga kiki mu nguzu yetu. Twabhingi kusamba mukubhinga o nzumbi ikola ya Nzambi phala kutukwatekesa kukala ni kidifwa kiki. Kwala jiphangu javulu jilondekesa kwila tutena kubhanga kiki. Jiphange javulu asuluka mu kulondekesa o kubatama kyoso kyexile mwalokalala. Kiki kyabhana umbangi wambote kwa yo ki Jimbangi ja Jihova. —2 Ti. 2:​24, 25 w23.09 15 §3

Bhukaxi ka kisumwa, poxolo Nzwá wamono 24 a tufunga ku dyulu exile mubheza Jihova. Ene a ximana Nzambi mukuzwela kwila kyamufwama o “kutambula o fuma, o kijingu ni kutena.” (Dij. 4:​10, 11) Ima yavulu ibhangesa we o jianju kubheza ni kubhana kijingu kwa Jihova. Ene ala ku dyulu kumoxi ni Jihova, ni kwila amwijiya kyambote. Ene amona o idifwa ya Jihova bhukaxi ka ima yoso ibhanga mwene. Kyoso ene kyamona o ukexilu wa Jihova wa kukalakala, akala dingi ni nguzu ya kumubheza. (Jobe 38:​4-7) Etu we twamesena kuximana Jihova bhukaxi ka misambu yetu, mu kumutangela se ihi itwawabhela kwa mwene ni mukonda dyahi tu muxila. Kyoso ki uya ni kutanga ni kudilonga o Bibidya, xinganeka se idifwa yebhi ya Jihova iwawabhela dingi. (Jobe 37:23; Lom. 11:33) Mu kusuluka, tangela kwa Jihova se mukonda dyahi wawabhela o idifwa yiyi. Tuximana we Jihova mukonda dya kikwatekesu kyene mubhana kokwetu, ni ku jiphange jetu ku mundu woso. —1 Sam. 1:27; 2:​1, 2. w23.05 3-4 §6-7

Ku muvu wa 1919, o Babilonya ya Dikota, ki yexile dingi ni kutena kwa kufidisa o mundu wa Nzambi. Ku muvu wenyo, Jezú wasolo o “kimbadi kya fiyele kya dimuka,” kyenyiki o athu akwa ujitu eji tena kwakwatekesa kumateka kwenda mu “Njila Ikola.” (Mat. 24:​45-47; Iza. 35:8) O kikalakalu kya kuyudika o njila kyabhangele mivu kudima, kyakwatekesa o athu yo amatekene kwenda mu njila ikola, kudilonga dingi yalungu ni Jihova ni vondadi ye. (Jisa. 4:18) Ene we atenene kulungulula o ukexilu wa mwenyu wa, phala kusangulukisa Jihova. Maji Jihova kexile mu kingila kwila o mundu we ulungulula o ima yoso ku kithangana kimoxi ngo. Muveji dya kiki, mwene wakwatekesa o mundu we kulungulula o ukexilu wa, bhofele bhofele. Ku hadya twanda divwa kyambote kyoso kitwandatena kusangulukisa o Nzambi yetu mu ima yoso itubhanga mu ukexilu watenena! Ithangana ni ithangana, njila yoso ibhinga ku iyudika phala ni ifwama dingi. Tunde ku muvu wa 1919, o “Njila Ikola” ene musuluka we ni ku iyudika, kiki kyene mukwatekesa athu avulu kutunda mu Babilonya ya Dikota. w23.05 17 §15; 19 §16

O jiphange a tokala ku Kibuka Kya Utuminu, ene mu sokejeka jixikola phala kulonga tufunga, tufunga twa ilunga, jiphange abhanga mbandu ku Kibuka kya Filiyale, jiphange phala kwendesa o ikalakalu ku Betele, ni jiphange jamukwa. Ene we akalakala ni akwatekexi abhanga mbandu mu ibuka yavulu ya Kibuka Kya Utuminu phala ku alonga. Ne mwene kindala, o akwatekexi enya, ene mulanga kya ikalakalu yavulu mu kilunga kya Jihova. Ene ala polondo phala kusuluka ni kikalakalu kya kulanga o jimbudi ja Kidistu. Kyoso o Jikidistá a undu a sukinaku kyandaya ku dyulu, ku disukilu dya kithangana kya hadi yadikota, o mundu wa Jihova mu ixi wanda suluka mu kumubheza ni ufiyele woso. Ni kikwatekesu kya Jezú kala mutwameni wa, o abhezi a Nzambi nuka anda kweha kumusidivila. Twejiya kwila mu kithangana kyenyokyo, o kibuka kya ifuxi a kixana mu Bibidya kala Ngôngo dya Mangongo, kyanda zukutisa o mundu wa Nzambi. (Ize. 38:​18-20) Maji o kizukutisu kyenyokyo kyanda lweza; kyene kikyanda fidisa o mundu wa Nzambi kubheza Jihova. Se phata mwene wanda bhulula o mundu we! Bhukaxi ka kisumwa, poxolo Nzwá wamono o “mundu wavulu” wa jimbudi jamukwa ja Kidistu. Nzwá a mutangela kwila o “mundu wavulu” yu, “watundu ku hadi yadikota.” (Dij. 7:​9, 14) Kiki kilondekesa ni kidi kyoso kwila, Jihova wanda ku abhulula! w24.02 5-6 §13-14

Ihi itutena kubhanga phala kutambula o nzumbi ikola? Tutena kusamba mu ku ibhinga, kudilonga o Mak’a Nzambi, ni kubhanga mbandu ya kilunga kyê. O kubhanga kiki kwanda tukwatekesa kukala ni “ibundu ya nzumbi.” (Nga. 5:​22, 23) Jihova ubhana ngo o nzumbi ye ikola kwa yo azele mu ixinganeku ni mu wendelu wa. Mwene kanda tubhana o nzumbi ye ikola se tusuluka mu kuxinganeka mu ima yayibha, mba tubhanga kima kya muyibhila. (1 Te. 4:​7, 8) Ku mbandu yamukwa, phala tusuluke mu kutambula o nzumbi ikola, ki twatokala “kukamba kubhana valolo ku ikanenu yatundu kwa Nzambi.” (1 Te. 5:20) Mu velusu yiyi, o “ikanenu”, ilombolola o njimbu yabhana Jihova bhukaxi ka nzumbi ye ikola, kala o njimbu yalungu ni kizuwa kya Jihova ni izuwa isukidilaku ya mundu yu. Etu ki tuxinganeka kwila, o Alumajedone yanda laleka phala kubhixila. Muveji dya kiki, tulondekesa kwila twaxikina kuma ki yandalaleka mu kwiza, mu kusuluka mu kubhanga o “ima iximanesa Nzambi,” ni mu kukala ni wendelu wazele.—2 Ph. 3:​11, 12. w23.06 12 §§13-14

Ihi yatokala kubhanga o Kidistá se mu mutelembe we mba komputadolo mu moneka foto, mba vidyu ya ufusa? Ni lusolo loso tutalela kwengi. Ki kyanda tubhonza kubhanga kiki se tulembala kwila o kima kyabeta kota ku mwenyu wetu, o ukamba wetu ni Jihova. Sayi jifoto ki ja ufusa kana, maji jitena kutubhekela jihanji ja undumbu. Mukonda dyahi twatokala kujilenga? Mukonda ki twamesena kubhanga kima ne wene kyofele ngo, kyeji tubhekela ixinganeku ya kubhanga o undumbu. (Mat. 5:​28, 29) Sayi kafunga a mwixana Davidi wala mu ixi ya Tailândia wambe: “Sumbala o jifoto jiji ki ja ufusa, maji o kwila Jihova wanda sanguluka se ngisuluka mu kujitala? O kubanza kiki kungikwatesa kusola ni unjimu.” O woma wa kubhanga kima kyosokyoso kiluwalesa Jihova, wanda tukwatekesa kubhanga o ima ni unjimu. “O woma wa Jihova dyene o dimatekenu dya unjimu.” w23.06 23 §12-13

O “jinzo” jotumbule bhabha nange jitena kulombolola o ilunga yetu. Mu kithangana kya hadi yadikota, twanda sanga o dilengelu dyatukanena Jihova mu kukala kumoxi ni jiphange jetu. Maji phe twatokala kya kubhanga nguzu yavulu kindala, phala kuzola o jiphange jetu ni muxima woso. Twanda bhuluka ngo se tubhanga kyenyiki! O “Kizuwa kyonene kya Jihova” kyandakala kithangana kyabhonzo kyavulu phala athu oso. (Sof. 1:​14, 15) O mundu wa Jihova wandatala we hadi. Maji se tudipelepalala kindala, twandatena kutululuka ni kukwatekesa we akwetu. Kabasa kibhidi kimoneka, twanda dibhana nakyu ni kukolokota. Kyoso o jiphange jetu kyakala mutala hadi, twanda suwa o ibhindamu ya, mukubhanga yoso itutena phala kwakwatekesa ni kwabhana o ima yabhindamena. Twanda suluka jinga mu kulondekesa o henda yetu ku jiphange mu kukala ku mbandu ya. Jihova wanda tu besowala ni mwenyu wa kalelaku ku mundu wa ubhe, kwenyoko o mavuwa moso ni ibhidi ki yandakalaku dingi. —Iza. 65:17. w23.07 7 §16-17

O Bibidya mu veji javulu itumbula o mayala a fiyele m’ukulu kala athu aswinine, ezalele ni nguzu. Maji kate mwene yo bhukaxi kawu abetele o kuswina, sayi bhabha exile mudivwa kwila azozele. Mu kifika, sayi ithangana Sobha Davidi, wexile mudivwa kwila ‘wadifikidila kala mulundu,’ maji mu ithangana yamukwa ‘wa bhondalele.’ (Jisá. 30:7) O yalungu ni Sasawu, sumbala wexile ni nguzu yavulu mu mukutu mukonda dya nzumbi ikola ya Nzambi, maji mwene wejidile kwila se o kikwatekesu kya Nzambi, ‘weji zoza, ni kusokela ni athu oso.’ (Afun. 14:​5, 6; 16:17) O mayala ya afiyele aswinine ngo mukonda dya kutena kwa abhanene Jihova.O poxolo Phawulu wejidile we kwila wabhindamene o kutena kutunda kwa Nzambi. (2 Ko. 12:​9, 10)KMwene wexile mudibhana ni ibhidi yalungu ni sawidi. (Nga. 4:​13, 14) Sayi ithangana, kyamubhonzele we kubhanga o ima yambote. (Lom. 7:​18, 19) Sayi bhabha Phawulu wexile ni woma wa ima yejitena kubhita ni mwene. (2 Ko. 1:​8, 9) Ne kiki, kyoso Phawulu kyexile muzoza, wexile mudivwa kwila wala dingi ni nguzu. Maji kyebhi? Kiki kyexile mubhita, mukonda Jihova wexile mu mubhana o nguzu yabhindamene phala kudibhana ni ibhidi. w23.10 12 §1-2

Se sayi bhabha tudivwa kwila kitwala ni valolo, tutena kulembalala kwila Jihova watubheka kwa mwene. (Nzwá. 6:44) Mwene umona o idifwa yambote itwala nayu, o idifwa itukamba kumona kokwetu. Umona we o mixima yetu. (2 Mal. 6:30) Kyenyiki tutena kudyelela kwila mwene utubhana valolo yavulu. (1 Nz. 3:​19, 20) Ande dya kudilonga o kidi, sayi athu mudyetu twabhange ima katé lelu itubhangesa kudivwa kyayibha. (1 Ph. 4:3) Katé mwene ni Jikidistá jafiyele aluwala mukonda dya ituxi yâ. Abha eye? O kwila o muxima wé ukufundisa? Se kyene, kima kyambote kwijiya kwila katé mwene ni jiselevende ja fiyele ja Jihova mu ukulu adivwile we kiki. Mu kifika, poxolo Phawulu wexile mudivwa kyayibha kyoso kyexile mubanza mu ituxi yê. (Lom. 7:24) Sumbala Phawulu wadyela o ituxi yê, anga amubatizala, wazwela kiki yalungu ni mwene: “Ku jipoxolo joso, eme ngala ngi ndenge,” ni kwila “bhukaxi ka athu yá, eme nga betakota mu kukala ngi mukwa ituxi.”—1 Ko. 15:9; 1 Ti. 1:15. w24.03 27 §5-6

Kima kimoxi kitutena kudilonga ku ima yayibha yabhange Sobha Jowaji, ya kwila, twabhingi kubhanga ukamba ni athu atuswinisa kubhanga ima yambote —makamba azolo Jihova, amesena kumusangulukisa. O makamba metu atena kukala athu a itala ki idifu. Lembalala kwila Jowaji wexile munzangala hanji, maji o kamba dye Joyada wexile mwadyakime kya. Yalungu ni makamba me, dibhwidise: ‘O kwila ene angikwatekesa kukolesa o kixikanu kyami kwa Jihova? Ene angiswinisa kubelesela o itumu ya Bibidya? Ene azwela yalungu ni Jihova ni ilongesu ya Bibidya? Ene axila o itumu ya Nzambi? Ene angitangela ngo o ima ingawabhela kwivwa, inga alondekesa we kuswina mu kungibhana itendelesu se kwabhingi?’ (Jisa. 27:​5, 6, 17) Mu kidi, se o makamba me kazolo Jihova, eye ki wa abhindamena. Maji se wala ni makamba azolo Jihova, dikwatenene ku makamba enya—mukonda ene anda kukwatekesa ithangana yoso! —Jisa. 13:20. w23.09 9-10 §6-7

O Álafa kyene o kisoneku mba letala yadyanga mu alfabetu ya dimi dya Ngeleku, Omeka kyene o kisoneku kyasukina. Kyenyiki, mu kuzwela kwila “Éme ngi Álafa ni Omeka,” Jihova wamutukwatekesa kutendela kwila kyoso kyamateka kima, kala ukizubha. Kyoso Jihova kyabhange Adá ni Eva, Mwene wa tangela wixi: ‘“Vwalenu mu sokoloke, izalesenu o ixi ni ku itumina.’” (Dim. 1:28) Mu kithangana kyenyokyo, Jihova wazwela yebhi yexile o vondadi ye phala o athu ni ixi. Didi dyexile o dimatekenu mba “Álafa.” Kyoso kyandazubha kukumbidila o vondadi ye, ni kyoso o mbutu ya Adá ni Eva (o athu a belesela) kyandazalesa o ixi ni ku ikitula Palayizu, o kithangana kyenyokyo kyandakala o disukilu mba “Omeka.” Kyoso kyazubha kubhanga “o dyulu, o ixi ni ima yoso yala-mu,” Jihova wazwela kima phala kulondekesa kwila o vondadi ye se phata yandadikumbidila. Kiki kilombolola kwila, se phata Jihova wejikumbidila o kikanenu kye kyalungu ni athu ni ixi. Kiki kyejizubha kudikumbila kudisukilu dya kizuwa kya kasambwadi. —Dim. 2:​1-3. w23.11 5 §13-14

O njila ya kutunda mu Babilonya kate mu Izalayele, yeji bhonza, mukonda phala kubhixilaku kwejibhinga nange mbeji jiwana. Maji Jihova wakanene ku bhwika kabasa kima kyeji fidisa o mundu we kuvutuka. Phala o Jijudé ja fiyele, o mabesá ejitambula mu kuvutuka mu ixi ya Izalayele eji beta dingi kota, o ima yejixisa kudima ndenge. Ku mabesá ya, o dyabeta dingi kota, o ubhezelu wa kwa Jihova., Maji ki kwexile tembulu phala kubheza Jihova ku Babilonya. Kikwexile ne ngo kididi phala kusatela bhu o jisata kala kya tendelesele o Kitumu kya Mozé, ki kwexile we kibuka kya akunji kyosokejeke phala kusatela o jisata jenyojo. Ku mbandu yamukwa o jiselevende ja Jihova, a akondolokele ku mazunda a athu kexile muxila o itumu ya Jihova. Mu kiki phe, Jijudé javulu azolele Jihova, exile mu kingila ni hanji yoso, kuvutuka mu ixi ya phala kubhanga o ubhezelu wa kidi mu ukexilu watokala. w23.05 14-15 §3-4

Twabhingi o kikwatekesu kya nzumbi ikôla ni tusuluke mu kwenda kala tu “an’â mukengeji.” Mukonda dyahi? Mukonda kubhonza kukolokota fiyele, mu ngongo yiyi yezala ni undumbu. (1 Te. 4:​3-5, 7, 8) O nzumbi ikôla yanda tukwatekesa kutolola o ibanzelu ya athu kene mubelesela o itendelesu ya Nzambi. O nzumbi ikôla yanda tukwatekesa kubhanga o “ima yoso yambote, yayuka ni yakidi.” (Efe. 5:9) Ukexilu umoxi wa kutambula o nzumbi ikôla, o ku ibhinga bhukaxi ka musambu. Jezú wambe kwila Jihova wanda bhana o “nzumbi ikôla kwa yó a mubhinga.” (Luk. 11:13) Tutambula we o nzumbi ikôla kyoso kituximana Jihova mu yônge. (Efe. 5:​19, 20) O nzumbi ikôla yanda tukwatekesa kukala ni wendelu usangulukisa Nzambi. w24.03 23-24 §13-15

O kwila eye wabhindamena dingi kukala ni mwanyu? Se kyene, samba mu kubhinga o kidifwa kiki. O mwanyu ubhanga mbandu ku kibundu kya nzumbi ya Nzambi. (Nga. 5:​22, 23) Kyenyiki twatokala kusamba kwa Jihova mu kubhinga o nzumbi ikola ni kikwatekesu phala tutene kukala ni idifwa ya nzumbi. Se tudibhana ni kibhidi kilola o mwanyu wetu, twanda ‘kolokota mu kubhinga’ o nzumbi ikola phala itukwatekese kulondekesa o mwanyu. (Luk. 11:13) Tutena we kubhinga kwa Jihova n’atukwatekese kutala o ima mu ukexilu wa mwene. Kituzubha o kusamba, twabhingi kubhanga yoso itutena phala kulondekesa o mwanyu izuwa yoso. Se tusuluka mu kubhinga o mwanyu mu musambu ni kubhanga nguzu mu maka enya, Jihova wanda tukwatekesa kukala ni kidifwa kiki, ne mwene se m’ukulu ki twexile nakyu. O kuxinganeka mu misoso ya Bibidya yanda kukwatekesa. O Bibidya izwela yalungu ni athu avulu exile akwa mwanyu. Kyoso kituxinganeka mu misoso yiyi, tutena kudilonga maukexilu akulondekesa mwanyu. w23.08 22 §10-11

Jezú wadyelelesa o poxolo Phetele kwila Jihova weji mulanga. Kyoso Jezú kyamufukununa, wabhange dingi madiwanu a bhangesa Phetele ni jipoxolo jamukwa, kukwata ndumba dya jimbiji. (Nzw. 21:​4-6) O madiwanu enya, se phata adyelelesa Phetele kwila ki kyejibhonza phala Jihova kudikila o ibhindamu ye yoso. Nange mwene wadilembalala o izwelu ya Jezú kwila Jihova wejilanga o ibhindamu ya yo ‘adyanga kusota o Utuminu wa Nzambi.’ (Mat. 6:33) O ima yoso yiyi, yakwatekesa Phetele kuta o sidivisu ya kuboka kupholo, muveji dya kikalakalu kye kya kutamba o jimbiji. Mwene waboko ni kuswina kwoso mu kizuwa kya Pendekoxi kya 33 K.K., mu kukwatekesa athu avulu kuxikina o njimbu yambote. (Ika. 2:​14, 37-41) Kupholo dya kwenda, mwene wa kwatekesa akwa Samadiya ni yo kexile Jijudé, kudilonga dingi yalungu ni Kidistu. (Ika. 8:​14-17; 10:​44-48) Tutena kumona kwila, Jihova wakwatekesa kyavulu Phetele kubheka athu a maukexilu oso mu kilunga. w23.09 20 §1; 23 §11

Mivu iyadi kupholo kyoso akwa Babilonya kyabhwika o mbanza ya Jeluzaleme. O Sobha ya Babilonya Nabukodonozolo, waloto nzoji ikwatesa woma yalungu ni kiteka kyonene. Mwene wambe kwila weji jibha o jinjimu joso, kate mwene ni Daniyele, se a lembwa kumutangela o nzoji ni dilombolwelu dye. (Dan. 2:​3-5) Daniyele wabhingile kulenguluka, se ka kibhangele, avulu eji fwa. Mwene ‘wayi mu zwela ni sobha; yu wamubhingi, wixi: Ngi bhane kithangana, nda ngi ku jimbwile nzoji yê.’ (Dan. 2:16) Phala kubhanga kiki kwabhingile kuswina ni kixikanu. Mu Bibidya ki mwala mbandu izwela kwila Daniyele wajimbulwile kya jinzoji m’ukulu. Mwene wabhingi ku makamba me ‘phala a dyonde o henda ya Nzambi ya dyulu, yalungu ni kikutu kiki.’ (Dan. 2:18) Jihova watambwijila o misambu ya. Ni kikwatekesu kya Nzambi, Daniyele walombolola o nzoji ya Nabukodonozolo. Daniyele ni makamba me ka ajibha. w23.08 3 §4

Xinganeka mu mabesá a kukala mukwa mwanyu. O muthu mukwa mwanyu ukala dingi ni kisangusangu ni kutululuka. Ku mbandu yamukwa, o mwanyu utena kutukwatekesa kukala ni sawidi yambote mu xitu ni mu kilunji. Kyoso kitukala tu akwa mwanyu, tukala ni ukamba wambote ni akwetu. Tukwatekesa o kilunga kyetu kukala ni muxima umoxi. Se kukala muthu utukwatesa njinda, etu tubhanga yoso mu kudilanga phala ki tuvudise dingi o maka. (Jisá. 37:8; Jisa. 14:29) O kyabeta dingi kota, tukayela o phangu ya Tat’etu ya dyulu ni kukolesa dingi o ukamba wetu ni mwene. Se phata, o mwanyu kidifwa kitubhekela mbote yavulu! Sumbala sayi ithangana kibhonza kukala mukwa mwanyu, maji ni kikwatekesu kya Jihova, tutena kusuluka mu kulondekesa o kidifwa kiki. Kyoso kituya ni kukingila o mundu wa ubhe, tutena kudyelela kwila o ‘mesu ma Jihova ala kwa yo amukala ni woma; ni kwa yo a kingila mu henda yê.’ (Jisá. 33:18) Kyenyiki, etwenyoso tusulukyenu mu kukala tu akwa mwanyu. w23.08 22 §7; 25 §16-17

Tiyaku walondekesa kwila, o diyala didi ne mwene se uzwela kwila wala ni kixikanu, o ibhangelu ye ilondekesa kwila wamuzwela makutu. (Tiy. 2:​1-5, 9) Tiyaku wazwela yalungu ni muthu wamono ‘phange ya diyala mba ya muhatu wabhindamena izwatu mba kudya,’ maji ka bhange kima phala kumukwatekesa. Sumbala o muthu yu uzwela kwila wala ni kixikanu, mwene ka mukilondekesa bhukaxi ka ibhangelu; mu kidi, o kixikanu kye ki kyala ni valolo. (Tiy. 2:​14-16) Tiyaku watumbula Lahaba kala phangu yambote ya muthu walondekesa o kixikanu kye bhukaxi ka ibhangelu. (Tiy. 2:​25, 26) Mwene wevu yalungu ni Jihova, yu watongolola kwila Jihova wexile mukwatekesa akwa Izalayele. (Josu. 2:​9-11) Lahaba walondekesa o kixikanu kye bhukaxi ka ibhangelu, mwene walange o alondi ayadi akwa Izalayele exile mu kilwezu. Mukonda dya kiki, Lahaba sumbala wexile mukwa ituxi, ni kwila kexile we mukayela o Kijila kya Mozé, maji amumono kwa Nzambi kala muthu wayuka, kala kyabhitile ni Mbalahamu. O phangu ya Lahaba itulonga kwila twatokala kulondekesa kwila twala ni kixikanu bhukaxi ka ibhangelu. w23.12 5-6 §12-13

Kuma tu Jikidistá, ki twamesena kutendela ngo o ima yofele yala mu Bibidya. Ni kikwatekesu kya nzumbi ikola ya Jihova, tukala ni hanji ya kudilonga “katé mwene o ima ya zongo ya Nzambi.” (1 Ko. 2:​9, 10) Ihi i uxinganeka se uxinda o mbambe ya kutokwesa phala kuzukama dingi kwa Jihova? Mu kifika, utena kutokwesa phala kwijiya kyebhi Jihova kya londekesa henda ku jiselevende je m’ukulu, ni kyebhi kiki kilondekesa kwila mwene wakuzolo we. Utena we kutokwesa kyebhi kyasokejekele o ubhezelu wa Jihova mu izuwa ya akwa Izalayele, ni kyebhi Jihova kyamesena kwila tumubheza we lelu. Mba phe nange utena kudilonga dingi kyambote o ikanenu yakumbidila Jezú kyoso kyexile mu ixi. Eye utena kutokwesa ni kikwatekesu kya Kadivulu ka Kutokwesa Phala o Jimbangi ja Jihova. Wandamona kwila o falamenda yiyi yanda ku kukwatekesa kukatula dingi mbote. O kudilonga o Bibidya mu ukexilu yu, kwanda kukwatekesa kukolesa o kixikanu kye ni “ku d’ijiya kyambote ni Nzambi.” —Jisa. 2:​4, 5 w23.10 18-19 §3-5

O kizwelu kyatumbula poxolo Phetele phala kujimbulula “kuvula,” kilombolola “kusununa.” O mbandu yakayadi ya velusu ilondekesa ihi itwandabhanga se o henda yetu ku jiphange ivula. O henda yiyi isweka o ituxi ya jiphange jetu. Tutena kujimbulula o maka enya mu ukexilu yu: Xinganeka kwila wala ni meza ala ni jimbandu javulu jaxidi, ki jamuzela dingi. Se ukwata mulele, u uzala ku meza, anga u usununa mwene kyambote, wandatena kuxita mba kusweka kana ngo kididi kimoxi mba iyadi yaxidi, maji ididi yavulu. Kyene kimoxi we, se o henda ku jiphange jetu ivula, tutena kuxita mba kuloloka kana ngo kituxi kimoxi mba iyadi, maji, “nzungule dya ituxi.” O henda yetu ku akwetu yatokala ikola kyavulu phala itene kutukwatekesa kuloloka o ituxi ya jiphange jetu, ne mwene se kyabhonzo kyavulu. (Kol. 3:13) Kyoso kituloloka akwetu, tulondekesa kwila o henda yetu yakolo, tusangulukisa we Jihova. w23.11 11-12 §13-15

Kyoso Sobha Joziya kyexile ni 26 a mivu, wamateka kutungulula o tembulu. Mu kubhanga o kikalakalu, asange ‘o Divulu dya kitumu kya Jihova, kya bhanene bhukaxi ka Mozé.’ Kyoso o Sobha kyevu o kitangelu kya divulu, ni lusolo lwoso wabhange nguzu phala kukumbidila o ima yosonekenemu. (2 Mal. 34:​14, 19-21) O kwila wafikisa kya kutanga o Bibidya izuwa yoso? Se kyene, o kwila wa muditunda kyambote? O kwila wene musoneka jivelusu jitena ku kukwatekesa? Kyoso Joziya kyexile ni 39 a mivu, wate kitondalu kyamubhekela kalunga. Muveji dya kudyelela kwa Jihova, mwene wadyelela mu unjimu we. (2 Mal. 35:​20-25) Ihi itwadilongo? Ne mwene se tu adyakime kya mba twamusidivila kya Jihova mu mivu yavulu, twatokala kusuluka mu kuzukama kwa Jihova. Phala kubhanga kiki, twatokala kusamba jinga kwa Jihova mu kumubhinga o itendelesu ye, kudilonga o Bibidya ni kubhana matwi ku itendelsu ya Jikidistá jakulu mu nzumbi. Mu kubhanga kiki, eye wandatena kusosolola ku itondalu ni kusanguluka dingi. —Tiy. 1:25.w23.09 12 §15-16

O Bibidya itumbula ahatu avulu azolele Jihova, ya exile mu musidivila. Ene alondekesele o idifwa yotumbule mu velusu yetu ya milongi: Exile akwa “kulanga kyambote o wendelu wâ, ni jifiyele mu ima yoso.” (1 Ti. 3:11) Ku mbandu yamukwa o minzangala yetu ya ahatu, atena we kusanga jiphange ja ahatu jakulu mu nzumbi, mu ilunga mwatokala. Ene atena kudilonga kyavulu ni phangu ya. Enu mu minzangala ya ahatu, o kwila mwejiya adyakime a ahatu ene mubhana phangu yambote imutena kukayela? Tala o idifwa ya yambote. Mu kusuluka, xinganeka kyebhi ki utena kulondekesa we o idifwa yiyi. O kulenduka kidifwa kyakatunda phala kukala Kidistá wakulu mu nzumbi. Se o muhatu muthu walenduka, wandakala ni ukamba wambote ni Jihova, wandadibhana we kyambote ni akwa. Mu kifika, o phange ya muhatu wazolo Jihova, ni kulenduka kwoso wandasola kukayela o kitendelesu kitusanga mu divulu dya 1 Kolindu 11:3. Mu divulu didi, Jihova wajimbulula se nanyi amubhana o kikalakalu kya kukala ku pholo mu kilunga ni ku mwiji. w23.12 18-19 §3-5

Jihova ukingila kwila o munumi uzola o muhatu we, anga ulanga o ibhindamu ye, ukala dikamba dye dya kazola, ni kumukwatekesa kukala ni ukamba wambote ni Jihova. O kukala ni kilunji kyambote, kuxila o ahatu, ni kukala u muthu atokala kukudyelela, yandakukwatekesa kukala u munumi wambote. Kyoso ki wandakazala, nange utena kukituka tata. Ihi i utena kudilonga ku phangu ya Jihova yalungu ni kukala tata yambote? (Efe. 6:4) Ni muxima woso, Jihova wazwela kwa Mon’e, Jezú, kwila wamuzolele ni wamuxikinine. (Mat. 3:17) Se ukituka tata, bhanga nguzu ithangana yoso phala kulondekesa kwa mon’e kwila wamuzolo. Mu ximane jinga mu ima yoso yambote yabhanga. O jitata jikayela o phangu ya Jihova, jikwatekesa o twana twa kukituka mayala ni ahatu akulu mu nzumbi. Utena kudipelepalala kindala phala kukala tata yambote, mu kulondekesa henda ku mwiji we, ku jiphange mu kilunga, ni kwalanga kyambote. Dilonge kwatangela kwila wa azolo, ni kwila ene ala ni valolo yavulu phala eye.—Nzw. 15:9. w23.12 28-29 §17-18

Sumbala tu jiselevende ja fiyele ja Jihova, ne kiki twene mudibhana hanji ni ibhidi ni kukata, kala kibhita ni athu oso mu ngongo. Tutena we kudibhana ni izukutisu ijila ku athu a zembe o mundu wa Nzambi. Sumbala Jihova kafidisa o ima yiyi kubhita n’etu, mwene wakanena kutukwatekesa. (Iza. 41:10) Ni kikwatekesu kye, tutena kusuluka mu kukala ni kisangusangu, kusola kyambote, ni kumukala fiyele ne mwene mu kubhita mu ithangana yabeta o kubhonza. Jihova ukanena kutubhana “o kutululuka kwa Nzambi.” (Fi 4:​6, 7) O kutululuka kuku, kulombolola o kuximbakata kutukala naku ku muxima ni mu kilunji, mukonda dya ukamba wakolo utwala nawu ni Jihova. O kutululuka kuku, “kusomboka o kitongolwelu kyoso,” kiki kilombolola kwila, kwa beta dingi kota kima kyosokyoso kitutena kuxinganeka ndenge. Mu kifika, o kwila eye wa sambele kya kwa Jihova ni kuswina kwoso, anga wa diwana mu kumona kwila mu kubhita ithangana wa tululukile kya? Eye wadivu kiki mukonda dya “kutululuka kwa Nzambi.” w24.01 20 §2; 21 §4

O athu azolo Jihova aximana o dijina dye ni muxima woso. Davidi wejidile kwila, o kuximana o dijina dya Jihova kyene kimoxi ni kuximana Jihova wavu o dijina didi. Kyoso ki twivwa o dijina dya Jihova tuxinganeka ku ukexilu we, o idifwa ye yambote ni ikalakalu ye ya madiwanu. Davidi wamesenene kutalatala o dijina dya Tat’e kala dikola ni kudiximana. Mwene wamesenene kubhanga kiki ni muxima we woso. Kyene kimoxi we, o Jilevita exile mubhana phangu ku akwa yalungu ni kuximana Jihova. Ni kulenduka kwoso, ene axikinine kwila, seku izwelu yeji jimbulula kyambote o kiximanu kyatokala kubhana ku dijina dya Jihova. (Neh. 9:5) Se phata, o kulenduka kuku kwabhekela kisangusangu ku muxima wa Jihova. w24.02 9 §6

Se ki watena kukumbidila o mbambe i waxindi mukonda yatundu o nguzu ye, Jihova kandakumona kala ki wala dingi ni valolo. (2 Ko. 8:12) Katula mbote mu ima yabhiti ku mwenyu wé. Xinganeka mu jimbambe ji watena kya kukumbidila. O Bibidya yamba kwila “Nzambi wayuka, kyenyiki mwene kanda jimba o kikalakalu kyenu.” (Jih. 6:10) Mu kiki, kana kujimba yoso i wabhange kya —kala o kubhanga ukamba wambote ni Jihova, kubokela akwenu yalungu ni mwene ni kudibatizala. Kala kiwakumbidila o jimbambe mu nzumbi ji waxindile m’ukulu, wandatena we kukumbidila o jimbambe ji wamusuwa kindala. Ni kikwatekesu kya Jihova, eye utena kukumbidila o mbambe i waxindi. Maji phe, kana kujimba kukatula mbote mu njila i wambubhanga. Kifwa, kyoso ki uya ni kudisunga phala kukumbidila o jimbambe je mu nzumbi, sanguluka mukumona kyebhi Jihova kya mukukwatekesa ni kubesowala o nguzu i wamubhanga. (2 Ko. 4:7) Se ukamba kubhwila, wandatambula mabesá avulu. —Nga. 6:9. w23.05 31 §16-18

Jihova wawabhela kulondekesa kwila wazolo o mundu wê. Luyadi o Bibidya yamba kwila, Jihova wambe kuma Jezú mwéne o Mon’ê wakazola ni kwila wamuxikina. (Mat. 3:17; 17:5) O kwila eye wamesena kwila Jihova ukutangela kuma wakuxikina? Jihova kazwela n’etu tunde ku dyulu, maji uzwela n’etu bhukaxi ka Bibidya. Kyoso kitutanga o izwelu ya Jezú ya zwela ku maxibulu mê, kyedi kala Jihova wamututangela kwila watuzolo. Jezú wakayela ni kuyuka kwoso o idifwa ya Tat’ê. O maxibulu a Jezú exile akwa ituxi, né kiki amukayela ni ufiyele woso. O Bibidya yamba kwila Jezú wa ambela kwila wa azolele. Kyoso kitutanga o izwelu yiyi ya Jezú, tutena kuxinganeka kwila Jihova wamuzwela kiki phala etu.(Nzw. 15:​9, 15) Kyoso kitubhita mu ibhidi, ki kilombolola kwila Nzambi katuxikina dingi. O ibhidi itukwatekesa kulondekesa o henda yetu kwa Nzambi ni kwila twamudyelela.—Tiy. 1:12. w24.03 28 §10-11