Katutu

Jihova wabhana o kutena kwa Jezú, phala kuzubha o maka oso mu ngongo. O madiwanu abhange mwene alondekesa kwila, Jezú wala ni kutena kwakuzubha o maka oso kitwejitena kwazubha mu nguzu yetu. Mu kifika, mwene wala ni kutena kwa kutubhulula ku ituxi ni ku ibhidi yê yetu yoso, kala o mauhaxi ni kufwa. (Mat. 9:​1-6; Lom. 5:​12, 18,19) O madiwanu abhange Jezú alondekesa kwila mwene utena “kusaka o mauhaxi moso” kate mwene ni kufukununa o athu afu. (Mat. 4:23; Nzw. 11:​43, 44) Mwene wala we ni kutena kwa kufidisa itembwe yamakota, ni kukwatekesa o athu ene mwazukutisa ku madimonyo. (Mál. 4:​37-39; Luk. 8:2) Tusanguluka kyavulu mu kwijiya kwila Jihova wabhana o kutena kwoso kuku kwa Mon’ê Jezú! Tutena kudyelela kwila, o Utuminu wa Nzambi wanda zubha o hadi yoso mu ixi. O madiwanu abhange Jezú kyoso kyexile mu ixi, alondekesa o ima yandabhanga mwene kala Sobha ya Utuminu wa Nzambi mu ukexilu wabeta dingi kota o yabhangele mu ukulu ndenge. w23.04 3 §5-7

Se wala mu kilunga kyadikota anga udivwa kwila uleka o lukwaku phala kutambwijila, maji ka mu kusola,. nange eye ki umesena dingi kubhana itambwijilu. Maji kana kubhwila mu kusota kubhana itambwijilu. Pelepalala itambwijilu yavulu phala o kyônge. Se ka kusolo kudimatekenu dya milongi, wanda kala hanji ni kithangana kya kubhana itambwijilu yengi. Mu kupelepalala o milongi ya mulangidi, xinganeka kyebhi kala kaxi ka lungu ni dyambu dya milongi. Mu kubhanga kiki eye wanda tena kubhana itambwijilu yambote kabasa mbandu ya milongi. Ku mbandu yamukwa, eye utena kudisokejeka kyambote phala kubhana itambwijilu mu jikaxi ji jimbulula milongi yazongo. Milongi yazongo sayi bhabha ibhonza kyavulu phala ku ijimbulula Mukonda dyahi? Mukonda nange athu ofele ngó anda leka o lukwaku mu mbandu yenyiyi. Abhaphe se, umona kwila kwa bhiti kya yônge yavulu ka kusolo phala kutambwijila? Zwela ni mwendexi ande dya kumateka o kyônge ni umulondekese o mbandu i wamesena kutambwijila. w23.04 21-22 §9-10

Zuze kexile mulaleka phala kubelesela o itendelesu ya Jihova, o kiki kyamukwatekesa kukala munumi wambote. Mu veji jitatu jitumbula o Bibidya, mwene watambula itendelesu ya Nzambi yalungile ni mwiji we. Mu ithangana yiyi mwene wabelesela ni lusolo lwoso ne mwene kyoso ima yabhonzele kyavulu phala ku ibhanga. (Mat. 1:20; 2:​13-15, 19-21) Mu kubelesela o itendelesu ya Nzambi, Zuze wakwatekesa ni walange Madiya. Se phata, kiki kya bhangesa Madiya kuzola ni kuxila dingi Zuze! Anumi, enu mutena kukayela o phangu ya Zuze mu kusota o itendelesu ya Bibidya mu kulanga o miji yenu. Kyoso ki ubelesela o itendelesu ya Bibidya ne mwene se kubhinga kulungulula kima ku mwenyu we, eye ulondekesa henda kwa muhatu we ni kukolesa o ukamba wenu mu ukaza. Sayi phange ya muhatu ku ixi ya Vanuatu, wala kya mu ukazala mu 20 a mivu ndenge, wambe: “Kyoso mwadi wami kyasota o itendelesu ya Jihova ni ku ikayela, o kuxila kwami kudibandekesa dingi. Ngidivwa kwila ngala kididi kyakondama anga ngidyelela dingi mu ukexilu we wa kubatula o maka.” w23.05 21 §5

O Jijudé atundu ku Babilonya eji kituka ngo athu ‘angene a Jihova.’ (Mat. 7:6) Maji phe phala kusangulukisa Jihova ene a bhingile kulungulula ima yavulu. Jijudé javulu a avwalela kya mu mbanza ya Babilonya, amoxi mudya exile mubanza kala o akwa Babilonya. Mu kubhita mivu yavulu tunde kyavutuka o kibuka kya dyanga kya Jijudé mu ixi ya Izalayele, o Nguvulu Nehemiya wa futuluka mukwijiya kwila, o ana jindenge avwalela mu ixi ya Izalayele katenene kudilonga o dimi dya jitata ja. (Mat. 6:​6, 7; Neh. 13:​23, 24) Mu thembu yenyoyo jimbandu javulu ya Mikanda Ikola a jisonekene mu dimi dya Hebalayiku. Kyenyiki phe, kyebhi o ana jindenge ejitena kuzola ni kubheza Jihova se ene kejidile kuzwela o dimi didi? (Eji. 10:​3, 44) Tutena kumona kwila o Jijudé jojo a bhingile kulungulula ima yavulu ku myenyu ya. Maji ki kyeji kwabhonza kyavulu kulungulula o ukexilu wa myenyu ya, mu ixi ya Izalayele. Mukonda o ubhezelu wa kidi kwenyoko avutukile mu ku ubhanga dingi. —Neh. 8:​8, 9. w23.05 15 §6-7

Ne mwene se twala ni vondadi yavulu mba tubhanga nguzu phala kukumbidila o jimbambe jetu, tutena hanji kudibhana ni ibhidi. Mu kifika, kutena kumoneka kima ki twakifikile kitukatula o kithangana kitwabhindamene phala kukumbidila o mbambe yetu. (Ndo. 9:11) Mba phe kutena kumoneka maka atuluwalesa ni kutuzozesa. (Jisa. 24:10) Mukonda dya kukala tu akwa ituxi, tutena kubhanga kima kitubhonzesa kukumbidila o mbambe i twaxindi. (Lom. 7:23) Mba nange tutena kubhwila. (Mat. 26:43) Ihi itena kutukwatekesa kutolola o ibhidi yiyi? O ibhidi imoneka mu kukumbidila o jimbambe je, ki yatokala kukufidisa kusuluka. O Bibidya izwela mu veji javulu kwila, twejidibhana ni ibhidi. Maji we ilondekesa ni kidi kyoso kwila tutena ku itolola kyoso kitukolokota sumbala ni ibhidi, tulondekesa kwa Jihova kwila twamesena kumusangulukisa. Jihova usanguluka kyavulu kyoso kyamona kwila eye wamubhanga nguzu phala kukumbidila o mbambe i waxindi! w23.05 30 §14-15

O kukala muboki wathembu yoso kukwatekesa o minzangala ya mala kudibhana kyambote ni athu amaukexilu oso. Kiki kya akwatekesa we kungastala ni unjimu o kitadi kyanganyala ni kudilanga phala kate makongo. (Fil. 4:​11-13) Ukexilu umoxi wambote wakumateka o sidivisu ya thembu yoso, o kusidivila kala muboki wa ithangana ni ithangana, kiki kya akwatekesa kukala polondo phala kumateka kala aboki a thembu yoso. O kukala muboki wa thembu yoso kujikula o njila phala maukexilu amukwa a thembu yoso, kala o kudibhakula mu sidivisu ya kutunga, mba kukalakala ku Betele. O mayala atokala kusuwa o mbambe ya kusidivila o jiphange, kala tufunga mu kilunga. O Bibidya yamba kwila o mayala asota kukumbidila o mbambe yiyi, a “musota kikalakalu kyambote.” (1 Ti. 3:1) Kyadyanga, o phange ya diyala watokala ukala hanji ni idifwa imukwatekesa kusidivila kala mukwatekexi wa tufunga. O akwatekexi a tufunga, akwatekesa o tufunga mu maukexilu avulu. Kikale o tufunga mba o akwatekexi a tufunga, ni kulenduka kwoso asidivila o jiphange, anga akalakala ni kuswina kwoso mu ukunji. w23.12 28 §14-16

Kyoso kyamateka kuzukama kwa Jihova, Sobha Joziya wexile ni 16 a mivu. Mwene wamesenene kudilonga dingi yalungu ni Jihova ni kubhanga o vondadi Ye. Maji, sayi ithangana o mwenyu wabhonzele kyavulu phala o munzangala yu wexile sobha. Mu izuwa yenyoyo, athu avulu exile mubheza jinzambi jamakutu. Kyenyiki Joziya wabhingile kuswina phala kuzokela o ubhezelu wakidi. Kiki kyene mwene kyabhange! Kyoso kyamateka kukatula o ubhezelu wamakutu mu ixi ya, Joziya kexile luwa ne ngo ni 20 a mivu. (2 Mal. 34) Ne mwene se umunzagala hanji, utena kukayela o phangu ya Joziya ni kudilonga yalungu ni Jihova ni idifwa Ye. O kubhanga kiki, kwanda kuswinisa kubhakula o mwenyu we kwa Jihova. Ihi iwandabhanga ni mwenyu we kyoso kiwanda dibhakula? Phange Luke amubatizala mu kitala kya 14, wambe: “Tunde mu kithangana kiki, ngandata o sidivisu ya Jihova kupholo ni kubhanga yoso phala kumusangulukisa.” (Mál. 12:30) Ejiyakyu kwila, se kyene we ki ubhanga, wandatambula mabesá avulu! w23.09 11 §12-13

Kyoso poxolo Phawulu kya soneka o mukanda ku akwa Tesalonika, ki kwabhitile lwa muvu tunde kyamateka o kilunga kyenyokyo. Nange o jiphange ja mala exile mu kwendesa o kilunga, kexile luwa ni uhete wavulu ni kwila exile we mulweza. Maji ne kiki atokalele kwaxila. Kyoso kituya ni kuzukama ku kithangana kya hadi yadikota, twanda bhindamena kudyelela dingi ku tufunga mu kilunga ni kukayela o itendelesu yatubhana. Nange mu kithangana kyenyokyo ki twanda tena kutambula itendelesu itunda ku mbonge yetu ni ku filiyale. Kyenyiki kima kyambote kudilonga kya kindala kuzola ni kuxila o tufunga twetu mu kilunga. Kabasa kima kibhita, twanda kala ku mesu azele, ki twanda dikwatenena ku itondalu ya jiphange jetu. Muveji dya kiki twatokala kudikwatenena mukwijiya kwila Jihova ni Jezú amukwendesa o jiphange jiji ja fiyeleKala o kapasete kexile mulanga o mutwe wa disoladi, o kidyelelu kyetu kya kubhuluka kilanga o ixinganeku yetu. Etu tumona kwila, seku kima kibhana o mundu yu kyala ni valolo yadikota. (Fil. 3:8) O kidyelelu kyetu kitukwatekesa kutululuka ni kukolamena. w23.06 11-12 §11-12

O yo evwa o kixanu kya “muhatu wa dilaji,” atokala kusola se anda xikina kumukayela mba kana. Kwala ima yavulu itubhangesa kulenga o undumbu. O “muhatu wa dilaji,” wamba kwila: “Menya ma kunyana ma towala kyengi.” (Jisa. 9:17) Maji o “Menya ma kunyana” ihi? O Bibidya isokesa o ukexilu wa dyala ni muhatu a kazala kuzeka kumoxi kala menya a talala. (Jisa. 5:​15-18) O diyala ni muhatu a kazala kala kitendelesa o itumu, atena kukatula mbote mu ujitu wa kuzeka kumoxi kyadikya. Maji o “menya ma kunyana” a difu kyengi. Ene atena kulombolola diyala ni muhatu kuzeka kumoxi se kukazala kala kitendelesa o itumu. O athu abhanga kiki muveji javulu asota kudisweka, kala kibhanga o mwiyi unyana se kumumona ku akwa. Kyoso ene afika kwila seku muthu wanda tungula o kima kyabhange, o “menya ma kunyana” ya, mba o undumbu a umona kala wabeta o kutowala. Kilwezu kyadikota kubanza kiki! Jihova umona o ima yoso. Seku “kutowala” mukubhanga kiki, mu kidi o kudibotesa o ukamba we ni Jihova kima kyalulu kinene. —1 Ko. 6:​9, 10. w23.06 22 §7-9

Ihi i watokala kubhanga se udivwa kwila kiwamubhanga dingi misambu ni muxima woso kala m’ukulu, mba kiwawabhela dingi kyavulu o kikalakalu kya kuboka? Kana kubanza kwila k’wala dingi ni kikwatekesu kya nzumbi ikola ya Jihova. Eye u mukwa ituxi, o ibanzelu yé itena kulunguluka mu ithangana ni ithangana, lelu kiki mungu kiki. Se o kuswina kwe kumateka kuzoza, xinganeka mu phangu ya poxolo Phawulu. Sumbala wexile musota kukayela Jezú, maji wejidile kwila sayi ithangana weji kala ni vondadi yavulu maji mu ithangana yamukwa, kana. Kiki kilombolola kwila, Phawulu wexile mubhanga nguzu phala kukumbidila o ukunji we kikale se mu kithangana kyenyokyo wexile ni vondadi mba kana. Kyene kimoxi we, kana kusola mba kubhanga kima, mukonda ngo dya ukexilu u wamudivwa. Diswinise phala kubhanga o kima kyatokala, ne mwene se udivwa kwila kiwala ni vondadi ya ku kibhanga. Se usuluka mu kubhanga o kima kyatokala, ku pholo dya kwenda, o ixinganeku ye itena kulunguluka.—1 Kol. 9:16. w24.03 11-12 §12-13

Tutena kulondekesa henda ku jiphange jetu mu kwaxikina kala makamba m’etu. (2 Ko. 6:​11-13) Avulu mudyetu ala mu ilunga mwala jiphange javulu a asase mu ukexilu wengi mba ala ni idifwa ki yadifu ni yetu. Tutena kukolesa o henda yetu kwa ene mu kudikwatenena mu idifwa yambote yala nayu. Kyoso kitudilonga kumona akwetu kala kya amona Jihova, tulondekesa kwila twa azolo. Twanda bhindamena o henda mu kithangana kya hadi yadikota. Xinganeka ngo. Kyoso kyanda mateka o hadi yadikota, kyebhi Jihova kyanda tulanga? Tala ya tendelesele Jihova ku mundu we, yeji bhanga kyoso kyeji kwalungulukila ku akwa Babilonya: “Enu mu mundu wami, ndenu, mu bokone mu jinzo jenu, mu dijikile momo, mu swame ngó kathangana, katé ki somboka o njinda.” (Iza. 26:20) O izwelu yiyi nange yanda dikumbidila we kokwetu mu kithangana kya hadi yadikota.w23.07 6-7 §14-16

Kala ni kidifwa wakutetuluka. Utena we kudibhwidisa: ‘O kwila o athu angijiya kala ngi muthu watetuluka, ngalenduka, ngala polondo phala kulungulula? O kwila ngijijidika akwetu kubhanga o ima mu ukexilu ungifika kwila wene watokala? Inga ngene mu kwivwa we akwetu ni kulungulula o ibanzelu yami se kibhana?’ Tulondekesa kwila twamukayela o phangu ya Jihova ni Jezú, kyoso kitubandekesa o kutetuluka kwetu. Kyoso o ima ku mwenyu wetu ilunguka, twabhingi kukala tu athu atetuluka. Kiki kitena ku tubhekela ibhidi ki twayifikile. Nange tutena kudibhana ni uhaxi wabhonzo. Tutena kudibhana ni ibhidi yalungu ni kitadi mba maka alungu ni jinguvulu, abhonzesa o mwenyu wetu. (Ndo. 9:11) Kate mwene kitena kutubhonza kukumbidila kikalakalu kitubhana o kilunga. Tutena kuditunda kyambote se tukumbidila o jindunge jiwana ja kayela: (1) Xikina kwila o ima yalunguluka, (2) xinganeka o ima ku hadya, (3) dikwatenene mu ima yambote iwalanayu ku mwenyu, ni (4) bhanga ima yambote phala akwenu. w23.07 21-22 §7-8

O polofeta Daniyele wexile munzangala kyoso kya mwambata ku Babilonya kala pelezu, dikanga dya ixi ye. Maji sumbala wexile munzangala, o masoladi a Babilonya amumono mu ukexilu wengi. Ene amono kwila Daniyele wawabhele o pholo, wexile njimu ni kwila watokalele ku mwiji wa athu akwa ujitu. (1 Sam. 16:7) Mukonda dya kiki, o akwa Babilonya a mulongo phala kusidivila mu inzo ya Sobha. (Dan. 1:​3, 4, 6.) Jihova wazolele Daniyele, ki mukonda dya kuwabha o pholo mba dya ujitu wexile nawu mu inzo ya Sobha, maji mukonda dya ukexilu wa mwenyu wa solele o munzangala yu. Mu kidi, kyoso Jihova kyazwela kwila Daniyele wexile kala Nowé ni Jobe, nange mwene wexile ngo ni 20 a mivu. Kyenyiki ku mesu ma Jihova, Daniyele wexile muthu wayuka mu wendelu we kala Nowe ni Jobe, exile athu a musidivile ni ufiyele woso mu mivu yavulu. (Dim. 5:32; 6:​9, 10; Jobe 42:​16, 17; Ize. 14:14) Jihova wasuluka mu kuzola Daniyele mu izuwa yoso ya mwenyu we. —Dan. 10:​11, 19. w23.08 2 §1-2

Xinganeka kwila wamesena kusumba inzo. Ihi i wejimesena kutonginina yene yoso kyebhi kyatungu o inzo ni kukomona we o muthu. Tutena we kubhanga kima kyadifu ni kiki kyoso kitutanga ni kudilonga o Bibidya. Se utanga o Bibidya ni lusolo lwoso, wanda tena ngo kudilonga tu ima twofele —kifwa ‘o ima yadyanga ya mak’â Nzambi.’ (Jih. 5:12) Kala kibhanga o muthu ande dya kusumba o inzo, udyanga hanji ku itonginina kyambote, kyene we kimoxi eye watokala kudilonga kyambote o Bibidya phala kutendela o milongi yalamu. Ukexilu umoxi wambote wakudilonga, o kumona kyebhi o njimbu itusanga mu mbandu imoxi ya Bibidya, yalungu ni njimbu itusanga mu jimbandu jamukwa. Sota kutendela yebhi o ima i uxikina, ni mukonda dyahi uxikina mu ima yeniyi. Phala tutene kutendela kyambote o Mak’a Nzambi, twabhingi kudilonga o ima yazongo yala mu Bibidya. Poxolo Phawulu watendelesa o jiphange na dilonge kyambote o Mak’a Nzambi phala atene ‘kwijiya kyambote kyebhi kikala o kuzanza, o kukula, o kulebha ni kuzonga,’ kwa kidi. Mu kubhanga kiki, ene ejitena ‘ku kola’ mu kixikanu kya. (Efe. 3:​14-19) Etu we kyene kitwatokala kubhanga. w23.10 18 §1-3

Mu Bibidya tusangamu phangu ya athu avulu exile akwa mwanyu. Ihi i uxinganeka kudilonga dingi yalungu ni athu ya? Mu kifika Davidi wexile hanji kamunzangala kyoso kyamusolo phala kukala sobha ya Izalayele. Kwabhiti hanji mivu kate kya mutumbika ku ungana. O phangu yamukwa yalungu ni Ximinyá ni Ana. Ene exile mubheza Jihova ni ufiyele woso, kyoso kyexile mukingila o wijilu wa Mexiya. (Luk. 2:​25, 36-38) Mu kudilonga o jiphangu jiji, sota kutambwijila o ibhwidisu yiyi: Ihi yakwatekesa o muthu yu kulondekesa mwanyu? Mbote yebhi yakatula mu kulondekesa mwanyu? Kyebhi kingitena kukayela o phangu ye? Eye utena we kukatula phangu kwa yo akambe kulondekesa mwanyu. (1 Sam. 13:​8-14) Utena kudibhwidisa: ‘Mukonda dyahi o muthu yu ka londekesa mwanyu? Ibhidi yebhi yadibhana nayu?’ w23.08 25 §15

O poxolo Phetele wexile fiyele; mwene kehela kima kimufidisa kukyela Jezú. Mu kifika, sayi kizuwa mwene walondekesa o ufiyele we, kyoso o maxibulu kya lembwele kutendela kima kyazwelele Jezú. (Nzw. 6:68) Avulu, muveji dya kukingila kwajimbulwila o maka, eha kukayela Jezú. Maji ki kyene kyabhange Phetele. Mwene watendela kwila Jezú ngo wexile ni “maka a mwenyu wakalelaku.” Jezú wejidile kwila Phetele ni maxibulu amukwa eji muxisa. Ne kiki, Jezú watangela Phetele kwila wejidile kuma mwene wejimukala fiyele. (Luk. 22:​31, 32) Jezú wejidile kwila “o muthu wamesena kubhanga o kima kyatokala, maji o mukutu-phe wabhwila.” (Mál. 14:38) Mukonda dya kiki, sumbala Phetele waditunu Jezú, maji mwene kaxisa poxolo ye. Kyoso kyamufukununa, Jezú wamutukulukila —nange kyoso Phetele kyexile ubheka. (Mál. 16:7; Luk. 24:34; 1 Ko. 15:5) Kiki se phata kyaswinisa kyavulu Phetele, waluwalele mukonda dya itondalu yatele! w23.09 22 §9-10

Nzambi uloloka o ituxi ya athu alondekesa kixikanu kwa mwene. Kyoso Jihova kyaloloka o ituxi ya muthu, mwene ka ilembalala dingi. (Jisá. 32:​1, 2) Jihova umumona kya kala muthu wayuka mukonda dya kixikanu kye kwa Mwene. Sumbala Nzambi wexile mumona Mbalahamu, Davidi, ni abhezi amukwa afiyele kala athu ayuka, ne kiki ene exile hanji akwa ituxi. Maji mukonda dya kixikanu kya, Nzambi wexile mu amona kala athu akambe kikuma, bengebenge se twa asokesa ni yo kexile mubheza Nzambi. (Efe. 2:12) Mu mukanda we kwa akwa Loma, poxolo Phawulu wajimbulula kwila twatokala kukala ni kixikanu phala tukale tumakamba a Nzambi. Kiki kyene kyabhangele Mbalahamu ni David. Kyene we kitwatokala kubhanga. w23.12 3 §6-7

Lelu o abhezi oso a Jihova ala ni ujitu wa kumubhana jisata mu kubhakula o kithangana kyâ, nguzu yâ, ni imbamba yala nayu, phala kukwatekesa o kikalakalu kya Utuminu wa Nzambi. Tulondekesa o kisakidilu kyetu ku ujitu wa kubheza Jihova, mu kubhanga yoso itutena mu sidivisu yê. Poxolo Phawulu wazwela yalungu ni ima yavulu itwatokala kubhanga phala kubheza Jihova. Mwene wazwela ima kala o kuzukama kwa Jihova bhukaxi ka musambu, kubokela akwetu yalungu ni kidyelelu kyetu, kudyongeka ni jiphange mu kilunga, ni kudiswinisa mudyetu “bengebenge mu kumona kwila o kizuwa kya Nzambi kyazukama.” Mu divulu dya Dijingunwinu, o anju ya Jihova yambe: “Bheza ngó Nzamb!” Mwene wabhitulula o izwelu yiyi mu luyadi phala kulondekesa kwila ki njimbu yakutonoka. (Dij. 19:10; 22:9) Tubhangyenu yoso phala ki tudijimbe o ima yoso itwadilongo yalungu ni tembulu yadikota ya Jihova mu nzumbi, ni ujitu wakatunda utwala nawu wakubeheza o Nzambi yetu! w23.10 29 §17-18

Etwenyoso twamesena ‘kukolokota mu kudizola.’ Maji phe, kima kyambote kulembalala o kidimwinu kya Jezú, kyoso kyambe kwila “avulu o henda yâ [yeji] zoza.” (Mat. 24:12) Jezú bhabha kexile muzwela kwila avulu ku maxibulu me, eji kweha kudilondekesa henda. Maji twatokala kudilanga phala o ukexilu wa kukamba o henda wa athu ku mundu, ki uzange o ukexilu wetu wa kudibhana ni jiphange jetu. Mu kuxinganeka mu maka enya, twanda tambwijila o kibhwidisu kiki: Ihi yandatukwatekesa kwijiya se o henda yetu ku jiphange yakolo mwene mba kana? Ukexilu umoxi wa kutonginina o henda yetu, o kwijiya ihi itwene mubhanga kyoso kikumoneka maka. (2 Ko. 8:8) Poxolo Phetele wazwela yalungu ni maka enya kyoso kyambe: “Mu ima yoso o henda yenu mudyenu ivule, mukonda o henda isweka nzungule dya ituxi.” (1 Ph. 4:8) Kyenyiki o ima itubhanga kyoso o jiphange jetu kyatondala mba abhanga ima ituluwalesa, kyanda tukwatekesa kwijiya se o henda yetu kwa ene yakolo mwene mba kana. w23.11 10-11 §12-13

Etu kitweji belesela o kitumu kya Jezú se tweji zola ngo amoxi mu kilunga, o amukwa kana. Kidi kwila, tutena kukala ni ukamba wakolo dingi ni amoxi, amukwa kana, kala wexile nawu Jezú ni amoxi ku jipoxolo je. (Nzw. 13:23; 20:2) Maji o poxolo Phetele watulembalesa kwila twatokala kubhanga nguzu phala kukala ni “henda ku jiphange joso mu ngongo.” Twamesena kuzola o jiphange jetu joso mukonda ene abhanga mbandu ku mwiji wetu. (1 Ph. 2:17) Phetele watuswinisa ‘kudizola mudyetu ni kufulujuka kwoso ni muxima woso.’ (1 Ph. 1:22) Bhabha o “kudizola mudyetu ni kufulujuka,” kulombolola kuzola muthu ne mwene kyoso kikubhonza kumulondeksa o henda. Mu kifika, ihi iweji bhanga se phange ukuxinga mba ukuluwalesa? Nange kudimatekenu, tweji mesenena kumubhanga kyayibha muveji dya kumulondekesa henda. Maji Phetele wadilongo ni Jezú kwila o ukexilu yu ki usangulukisa Jihova. (Nzw. 18:​10, 11) Phetele wasoneka: “Kanenu kuvutula phulu ni phulu, né ndaka ni ndaka. Muveji dya kiki, woso wa mibhange phulu, mu mubesowala.” (1 Ph. 3:9) Se uzola kyavulu o jiphange, wanda bhanga mbote kwa ene. w23.09 28-29 §9-11

Tudiwana kyavulu mu kumona kyebhi o kambonga kyakula ni lusolo anga ukituka mwadyakime. Kate tumona kala o kambonga wamukula sé kikwatekesu. Maji ki kyene kimoxi ni kukula mu nzumbi. O muthu phala kukala Kidistá wakulu mu nzumbi, wabhingi kubhanga nguzu. (1 Ko. 13:11; Jih. 6:1) Phala kukumbidila o mbambe yiyi, twatokala kukala ni ukamba wakolo ni Jihova. Twabhindamena we o nzumbi ikola phala kutukwatekesa kukala ni idifwa yambote, kukala ni mauhete, ni kudipelepalala phala o ikalakalu itutena kukala nayu ku hadya. (Jisa. 1:5) Mu kubhanga o athu, Jihova wabhange diyala ni muhatu. (Dim. 1:27) Ki kubhonzo kumona kwila o ukexilu wa mukutu wadiyala ki wadifu ni wa muhatu, maji ene we kadifu mu maukexilu engi. Mu kifika, o mayala, Jihova wa abhana o ikalakalu ya, kyene we kimoxi ni ahatu. Kyenyiki, kikale o mayala mba o ahatu, atokala kukala ni idifwa ni mauhete andakwakwatekesa kukumbidila o ikalakalu yeniyi.—Dim. 2:18. w23.12 18 §1-2

O kwila Jezú wamesenene kuma o athu amukwa atumbula we o dijina dya Tat’e? Kyene mwene. Sayi atwameni a jingeleja, nange axikinine kwila o kutumbula o dijina dya Nzambi, kulombolola kukamba kumuxila. Maji Jezú kehela kwila o ixinganeku yiyi ki yatundu mu Bibidya, imufidisa kujingisa o dijina dya Tat’e. Xinganeka mu kithangana kyoso Jezú kyasakele o diyala dyexile ni dimonyo mu mbanza ya Jelaze. Mu kumona o madiwanu enyo, o athu exile ni woma wavulu. Kyenyiki adyondo kwa Jezú phala kutunda. Mukonda dya kiki Jezú katokalele dingi kukala mu kididi kyokyo. (Mál. 5:​16, 17) Ne kiki, Jezú wamesenene kwila o athu mu kididi kyenyokyo ejiya o dijina dya Nzambi. Kyenyiki, watendelesa o diyala dya sakele phala kutangela o athu, kana o kima kyabhangele mwene Jezú, maji o ima yamubhangele Jihova. (Mál. 5:19) Kyene kimoxi we lelu—mwene wamesena kwila etu twijidisa we o dijina dya Tat’e mu ngongo yoso! (Mat. 24:14; 28: 20) Kyoso ki tubhanga kiki, tusangulukisa o muxima wa Sobha yetu, Jezú. w24.02 10 §10

Dibesá dya dikota kubhanga mbandu ku kilunga kya Jihova mu izuwa yiyi yabhonzo ya sukidila-ku ya mundu yu. O mwenyu ku mundu yu, wamuya ni kubhonza dingi kala kizuwa kibhita, maji Jihova watubhana jiphange jetu ja mala ni ja ahatu phala kutukwatekesa. (Jisá. 133:1) Mwene utukwatekesa kusanguluka ku mwiji. (Efe. 5:33–6:1) Mwene utubhana o unjimu ni kutongoloka ku twabhindamena phala kukala ni kutululuka kwa kidi ku muxima wetu.Maji-phe, twatokala kubhanga nguzu phala kusuluka mu kusidivila Jihova ni ufiyele woso. Mukonda dyahi? Mukonda sayi ithangana akwetu atena kuzwela mba kubhanga kima ki tuluwalesa. Tutena we kuluwala mukonda dya itondalu yetu, benge-benge se twamutondala mu veji javulu. Twabhingi kukolokota mu sidivisu ya Jihova (1) kyoso o jiphange jetu kya tuluwalesa, (2) kyoso kaza dyetu kya tu luwalesa, ni (3) kyoso ki tuluwala mukonda dya itondalu yetu. w24.03 14 §1-2

Sayi ithangana, eye wanda kwivwa misoso ya jiphange a suwu o mbambe ya kusanzumuna o ukunji wa. Ene nange a bhange o Xikola ya Akunji a Utuminu mba ayi mu sidivila mu ididi mwa bhindamena dingi aboki. Se kikwala kima ki kufidisa, eye utena we kusuwa o mbambe yiyi. O mundu wa Jihova a wabhela kusota maukexilu a kusanzumuna o ukunji wa. (Ika. 16:9) Maji ihi i twamba se kindala k’utena hanji kusuwa o mbambe yiyi? Kana kuxinganeka kwila o akwenu yó asuwu o mbambe yiyi, a beta-dingi-kota, eye ndenge. O kima kya beta-kota, o kukolokota. (Mat. 10:22) Kana kudijimba kwila eye usangulukisa kyavulu Jihova, kyoso ki ubhanga yoso i utena phala kumusidivila. Yu ukexilu wambote wa kusuluka mu kukayela Jezú kyoso kya kubatizala.—Jisá. 26:1. w24.03 10 §11

Se tudyela o ituxi itwatele mu ukulu, o Tat’etu ya dyulu ukanena kutuloloka. (Jisá. 86:5) Tutena kudyelela mu ima izwela Jihova mu maka mê. Lembalala kwila Jihova katubhingi ima kitutena ku ibhanga. Se tubhanga o ima yabetakota mu sidivisu yê, mwene wanda iwabhela. Xinganeka we mu phangu ya yó a atumbula mu Bibidya asidivila Jihova ni muxima woso. Xinganeka mu phangu ya poxolo Phawulu. Mu mivu yavulu wakalakala ni nguzu yoso, wende jinjila javulu, wakwatekesa we kubhanga ilunga yavulu. Kyoso o ima yalunguluka ku mwenyu wê, yu katenene dingi kuboka kyavulu, o kwila Jihova kamuxikinine dingi? Kana ki kyene. Mwene wasuluka ni kubhanga yejitena o kubhanga, anga Jihova wexile mu mubesowala. (Ika. 28:​30, 31) Kyene we kimoxi, o ima itubhana kwa Jihova kiyadifu. O kyabetakota o kuxinganeka se mukonda dyahi twamubhanga kiki. w24.03 27 §7, 9

Yalungu ni misambu yetu kwa Jihova, Jezú watuxila phangu yambote phala ku ikayela. Mu kithangana kya ukunji we, mwene wexile musamba ithangana yoso. Jezú wexile ni kikalakalu kyavulu kya kulonga, ni kwila o athu exile muya kwa mwene avudile. Ne kiki, mwene wexile mukatula kithangana phala kukala ubheka phala kusambe. (Mál. 6:​31, 45, 46) Mu kamenemene, kyoso kuma kwa vundile hanji, mwene wexile mu balumuka phala kukala ubheka n’a sambe. Sayi kizuwa, Jezú wabhiti usuku woso ni kusamba phala kusola kima kyakatunda. (Luk. 6:​12, 13) Mu usuku ande dya kufwa, kuma wejidile kwila weji tala hadi yavulu, mwene wasambe veji javulu. (Mat. 26:​39, 42, 44) O phangu ya Jezú itulonga kwila, ne mwene se twala ni ima yavulu phala kubhanga, twabhingi kukatula kithangana phala kusamba. Kala kyabhange Jezú, etu tutena kukatula kithangana phala kusamba, nange mu kamenemene, mba ande dya kuya mu zeka. Kyoso kitubhanga kiki, tulondekesa kwa Jihova kwila tubhana valolo yavulu ku ujitu wa kusamba. w23.05 3 §4-5.

Tala o kizwelu kyotumbule mu velusu ya lelu Bibidya phala kulondekesa o henda ya Jihova ku Jikidistá a undu. Yene yamba kwila Jihova ‘wezalesa’ o mixima ya ni henda. Sayi divulu disokesa o henda ya Nzambi ni menya a ngiji a mu kunguluka. O kizwelu kiki, kilondekesa kyambote o henda ya Jihova ku Jikidistá a undu! O Jikidistá a undu ejiya kwila ‘a azolo kwa Nzambi.’ (Jud. 1) O poxolo Nzwá walondekesa kyebhi kyexile mudivwa, kyoso kyasoneka: “Talesenu o henda yadikota ya tukwatela o Tata, mu kutubhana o ujitu wa ku twixana tu an’ê!” (1 Nz. 3:1) O kwila Jihova wazolo ngo o Jikidistá a undu? Kana, Jihova wene mulondekesa kwila watuzolo etwenyoso.Mu ukexilu webhi wakatunda Jihova walondekesa o henda ye kokwetu? Bhukaxi ka sata ya kukula. Séku muthu walondekesa kya henda kala yiyi! —Nzw. 3:16; Lom. 5:8. w24.01 28 §9-10

O velusu yiyi ilondekesa kima kyamukwa kyakwatekesa Davidi kyoso kyexile ni woma. Sumbala o mwenyu we wexile hanji mu kilwezu, mwene waxinganeka mu ima yejibhanga hanji Jihova ku pholo phala kumukwatekesa. Davidi wejidile kwila Jihova wejimubhulula mu kithangana kyatokala. Ku mbandu yamukwa, Jihova wambele kwila Davidi wejikala o Sobha wejibhingana ku ungana mu Izalayele. (1 Sam. 16:​1, 13) Phala Davidi, kabasa kikanenu kya Jihova, kyejidikumbidila ni kidi kyoso. Ihi yakanena Jihova phala eye? Etu ki tukingila kwila Jihova utubhulula ku ibhidi yetu yoso. Maji lembalala kwila, ibhidi yoso-yoso itudibhana nayu ku mundu yu, Jihova wanda itolola ku mundu wa ubhe. (Iza. 25:​7-9) Se phata o Mubhangi wetu wala ni kutena kwasoko, wa kutusaka ku mauhaxi m’etu, ni kubwika o jinguma jetu joso. —1 Nz. 4:4. w24.01 6 §12-13

Xinganeka se mukonda dyahi wabhakula o mwenyu we kwa Jihova ni kudibatizala. Eye wabhange kiki mukonda wamesenene kukala ku mbandu ya Jihova. Lembalala o ima ya kuxikinisa kwila wa sange o kidi. Weza mukwijiya Jihova, eye wamateka kumuxila ni kumuzola kala Tat’e ya dyulu. O kixikanu kye kwa Nzambi, kya kubhangesa kudyela o ituxi. O henda ye kwa Jihova ya kubhangesa kuxisa o ima yayibha ni kwambata o mwenyu mu ukexilu umusangulukisa. Wadivu kyambote mukwijiya kwila Nzambi wa kuloloka. (Jisá. 32: 2) Wamateka kuya mu yonge ni kutangela akwenu o ima iwexile mudilonga. Kuma Ukidistá wadibhakula, ya akubatizala, kindala wa mukwenda mu njila ya mwenyu, wanda bhanga yoso i utena phala kusuluka mu njila yiyi.(Mat. 7:​13, 14) Eye utena kukolokota mu ufiyele we kwa Jihova ni mu kubelesela o itumu ye. w23.07 17 §14; 19 §19

Mu kuxinganeka mu musambu we wa kudibhakula kwa Jihova, wanda sanga nguzu phala kudibhana ni tendasá yoso-yoso. Mu kifika, o kwila weji londekesa kwila wa muwabhela muhatu mba diyala dyangene? Mu kidi, kana! Eye wakanena kya kwa Jihova kwila, nuka weji bhanga kima kala kiki. Se ubhanga yoso phala o jihânji jayibha kijikule ku muxima we, kupholo dya kwenda, kiwanda bhinga kubhânga phala kujitolola. Eye wanda ‘lenga’ o “njila ya akwa ituxi.”(Jisa. 4:​14, 15) Ande dya kumoneka o salu yiyi, eye wasolo kya kudituna salu yoso-yoso yeji ku kufidisa kuya mu yonge. Kyenyiki, eye kiwanda xikina salu kala yiyi ni kuxinganeka kwila wanda tena hanji kuta o vondadi ya Jihova ku pholo ku mwenyu we. O kuxinganeka mu phangu ya Jezú kutena kutukwatekesa. Mwene wa swinine mu kusangulukisa Tat’e. Kala Jezú, swina we mu kudituna kabasa kima ki luwalesa Jihova. (Mat. 4:10; Nzw. 8:29) O ibhidi ni jitendasa, ikubhana kithagana phala kulondekesa kwila eye wala polondo phala kukayela o phangu ya Jezú. Mukubhanga kiki dyelela kwila Jihova wanda kukwatesa jinga. w24.03 9-10 §8-10