O Kuila Tua Tokala ku Dielela ku Jingeleja mu Maka Alungu ni ku Kala ni Ukexilu Uambote?

Silvia u langa o sauidi ia adiakimi a kuka kiá, uambe: “Nga kexile múia mu xikola ni athu avulu akexile mu zuela kuila akua ngeleja.” Maji ene akexile mu bhanga ji kabula mu jipolova ni ku tambula ji droga. Ene ka kexile mu belesela o ijila ia ngeleja iâ.

Saí diiala, dijina diê Lionel, uambe: “Koleka jami a tanga makutu, a zuela kuila a mu kata, mbe makutu. Ene ka belesela o itumu ia ngeleja—edi kala imbamba a i sumbu phala ku ilondekesa ngó ku athu.”

O ngeleja kene mu bhangesa o athu ku kala ni ukexilu uambote. Athu avulu lelu, ‘a kala ni kídifua kala kia ku xila Nzambi, maji kene mu bhangesa o vondadi ia Nzambi.’ (2 Timote 3:5) O atuameni a jingeleja jâ, kene mu bhana phangu iambote; katé muene ni jimesene jâ, kene mu longa o milongi ia Bibidia ia lungu ni ukexilu uambote ua bhindamena o athu. Kienhiki, athu avulu a banza kuila Nzambi ka tala o ima ia bhanga ku mienhu iâ.

IHI I LONGA O BIBIDIA?

O Bibidia ilondekesa kuila Nzambi u divua ué ni kuila muéne u tala o ima i tu bhanga. Kioso akua Izalaiele kia bhukumukina Nzambi, ‘ene akexile ku mu bhekela lamba ku muxima.’ (Jisálamu 78:40) Maji, o ‘ku sanguluka kuvula ku diulu,’ kioso muthu kia diela o ituxi iê ni ku lungulula o ukexilu uê ua iibha. (Luka 15:7) Kioso muthu kiéza mu kuijiia kiambote o ídifua iambote ia Tat’etu ia diulu, o henda iê kua Nzambi, i kula dingi, i mu suínisa dingi ku zola o ima ia zolo Nzambi ni ku zemba o ima ia zembe muéne.—Amoji 5:15.

KIEBHI O JIMBANGI JA JIHOVA KIENE MU KUMBIDILA O KIJILA KIKI?

Saí jurnale ia Estados Unidos de América, iambe kuila o Jimbangi ja Jihova, “a suínisa o ukamba ku muiji, a kuatekesa akuâ ni ku kala athu ambote ku ixi.” O jurnale iambe dingi: O Jimbangi ja Jihova, a kaiela o ijila ia Bibidia ia lungu ni ku kala ni ukexilu uambote. Ene a xikina kuila o ku buakula makanha, ku nua kiavulu, ku tambula ji droga, ku bhanga undumbu ni diiala ku zeka ni diiala ni mukua, ku tena ku zanga o ukamba ua muthu ni Nzambi.

Kiebhi o ku di longa ia lungu ni ídifua ia Nzambi, kuene mu kuatekesa o Jimbangi ja Jihova? Silvia u tua mu tange kiá u zuela: “Athu avulu ene mu a nganala mu kididi mu ngene mu kalakala. Ki kieji bhonza ku kaiela o ukexilu iú ua iibha. Maji o kuijiia kiambote kiebhi ki divua Jihovaa ku ngi kuatekesa ku bhanga o ima ia tokala. Nga sanguluka mukonda nga tululuka ku muxima.” Silvia ua xikina kuila o ku belesela o itumu ia Bibidia iene mu di longa, iene ku mu kuatekesa kiavulu.