Utuminu ua Nzambi ihi i ua Tokala o ku Bhanga

Nange ua tange mu milongi ku dima kuila, o Utuminu ua Nzambi, uala ni valolo ia dikota phala o Jimbangi ja Jihova. Nange ua sanguluka mu ku di longa o mabesá a-nda bheka o Utuminu ua Nzambi. Nange ua mu dibhuidisa se o ikanenu íii ia-nda di kumbidila muene, inga nzoji ngó.

Unjimu ku bhanga kiki, mu veji dia ku xikina ngó mu ima ioso i uivua. (Jisabhu 14:15) O ukexilu ué a tena ku u sokesa ni ukexilu ua akua Beleia m’ukulu.a Kioso kiévu o njimbu iambote ia Nzambi mu veji ia dianga, ene a i xikina, maji ka xikina ngó mukonda a mesenene kuijiia o kidi. Mu veji dia kiki ene a tonginina o Mikanda Ikola, phala ku mona “se o ima iii kia mu i tanga Phaulu, kiene ki ia tokala.” (Ikalakalu 17:11) Kiki kilombolola kuila akua Beleia a sokesa o ima ia kexile mu kuívua ni ilongesu ia Mikanda Ikola. Mu ku bhita kithangana, a xikina kuila o njimbu iambote ia tundile muene mu Mak’â Nzambi.

Lelu o Jimbangi ja Jihova a ku suínisa ué ku bhanga kála kia bhangele akua Beleia. Se u di longa o Bibidia ni Jimbangi ja Jihova, ua-nda tena ku sokesa o milongi ia xikina ene ia lungu ni Utuminu ua Nzambi, ni ihi i longa o Bibidia.

O ku di longa ia lungu ni Utuminu ua Nzambi, kua-nda ku kuatekesa ué ku sanga o itambuijilu ia ibhuidisu ia beta-kota ku muenhu.

• Kuebhi ku tua tundu?

• Mukonda diahi tuala ku muenhu?

• Mukonda diahi Nzambi uehela o hadi?

• • Ihi i bhita n’etu kioso ki tu fua?

• O kuila o ixi a-nda i buika?

• Ihi i bhangesa o muiji ku zediua?

O kima kia beta-kota mu ku di longa o Bibidia, o ku ku kuatekesa ku ‘zukama kua Nzambi.’ (Tiiaku 4:8) Kioso ki uia ni ku zukama kua Nzambi, ua-nda tena ku mona dingi o valolo ia Utuminu ua Nzambi ku muenhu uê, lelu ni ku hádia. Jezú ua zuela ni Tat’ê mu musambu, uixi: “O muenhu ki uábhua uenhú: Kuila oso a ku ijiie eie u Nzambi ia kidi imoxi-èlele, ni kuijiia ue Jezú Kristu, ió ua mu tumu eie.”—Nzuá 17:3.