Kuatekesa o Mukua Dibhata ku Xinganeka
1. Mu ukunji uetu, ihi ia beta-kota?
1 Mu ukunji uetu—etu ngó tu zuela, inga tu kuatekesa ué o mukua dibhata ku xinganeka? O poxolo Phaulu, ua xinganeka ni jingivuidi jê kioso kia zuela ni Jijudé mu Tesalonika, mu ku bhanga kiki, “amoxi-mu anga etaia.” (Ikalakalu 17:2-4) Ihi ia bhingi mu ku xinganeka ni athu?
2. Kiebhi ki tu tena ku kaiela o phangu ia Phaulu mu ku boka o njimbu iambote?
2 Ejiia o Athu: Phala ku kuatekesa o athu ku mbambe iê ku xinganeka, eie ua tokala kuijiia o ima iala ku mixima iâ. Phaulu ua mateka ku bhanga o diskursu ku Jingeleku ki abhezi a Nzambi ku Mulundu ua Hamba-dieta, mu kuzuela ima iejidile ene ni a xikinine. (Ikalakalu 17:22-31) Mukonda dia kiki, mu ku di iudika phala o ukunji, ejiia o ima i xikina ni ka i xikina ku athu mu mbambe. (1 Kol. 9:19-22) Se o mukua dibhata u dituna kuívua, sota ku zuela o ima i mu uabhela kuívua.
3. Kiebhi o ku bhanga ibhuidisu iambote, i tena ku kuatekesa ku xinganeka ni athu?
3 Bhanga Ibhuidisu ni Uhete: Ki tu tena kulondekesa o njila ku muthu phala ku mu kuatekesa ku bhixila kua múia, se ki tu ijiia kuebhi kuala muéne. Kiene kimoxi ué, ki tu tena ku kuatekesa o mukua dibhata ku xinganeka, se tu kamba kuijiia o ibanzelu iê. Ande dia ku xinganeka ni muthu, Jezú uexile mu bhanga ibhuidisu phala kuijiia o ibanzelu ia muthu. Mu kifika, kioso muthu kiebhula Jezú “ngi bhanga kiebhi mù lundula muenhu ki uábhua?,” Jezú ua soto kuijiia ihi ia kexile mu banza o muthu, ande dia ku mu tambuijila. (Luka 10:25-28) Mu kithangana kia mukua, kioso Phetele kia tondala, Jezú ni uhete uoso, ua bhange ibhuidisu phala ku kuatekesa o ixinganeku iê. (Mat. 17:24-26) Kienhiki, se o mukua dibhata u bhanga kibhuidisu, mba ka tambuijila kiambote, tu tena ku bhanga ibhuidisu phala ku mu kuatekesa ku xinganeka mu maka enhá.
4. Mukonda diahi tua tokala ku kuatekesa o mukua dibhata ku xinganeka?
4 Kioso ki tu kuatekesa mukua dibhata ku xinganeka, tua mu kaiela o Mulongexi Uonene Jezú, ni alongexi a mukua mu hama ia dianga. Tu bhana valolo ku mukua dibhata, ni ku mu xila. (1 Phe. 3:15) Mu ku bhanga kiki, muéne ua-nda xikina ku mu kunda dingi.