Sangesa o Ajitu!
1. Kithangana kiebhi kiambote ki tuala na-kiu, kia ku bhana umbangi ni mukonda diahi?
1 Ki bhuala kithangana kiambote kia ku bhana umbangi, kala o kithangana kia Lembalasa ia kufuá kua Jezú, kiene mu bhita lumoxi ngó ku muvu. Xinganeka ngó: Ku muvu iú dikuinhi dia mazunda a athu ndenge, a-nda kuíza mu Lembalasa ni kuívua o diskursu dia-nda zuela o maukexilu aiadi a henda, a londekesa mu ku kula. (Nzu. 3:16; 15:13) Ene a-nda kuijiia o mabesá a-nda tambula ku hádia mukonda dia ujitu ua Jihova. (Iza. 65:21-23) Mu kiki, o mulongixi ki muene ngó ua-nda bhana o umbangi mu kithangana kieniókio. O aboki oso a-nda tena ku bhana umbangi mu ku sangesa o ajitu.—Lom. 15:7.
2. Kiebhi ki tu tena o ku sangesa o ajitu ni kisangusangu?
2 Mu veji dia ku sota ngó o kididi kiê phala ku xikama ni ku kingila o milongi ku mateka, mukonda diahi kuzuela ni ajitu ala bhu mbandu iê, mu kua tangela o dijina diê ni kuijiia o majina mâ? Sumbala o ajitu a kala ni jisonhi, ka divu kiambote kala kia mesenene. O kua sangesa ni kisangusangu, kia-nda kua kuatekesa o ku divua kiambote. Phala kuijiia se muene uéza mukonda dia ku tambula o kamukanda, eie u tena ku mu ibhuidisa se lelu kiene o kizuua kia dianga kia kuíza mu kiônge kietu, mba se uejiia muthu mu kiônge. Sumbala u tena ku mu ixana phala ku xikama n’eie ni ku tanga o Bibidia, ni kuimba kumoxi mu divulu diê dia kuimba. Se o Kididi kia ku Bheza, mua-nda bokona kilunga kiéngi, nange mu iila kumoxi. Kia-nda kuila o diskursu dia bhu, ua tokala u tambuijila o ibhuidisu iê ia bhanga. Se o kilunga kiê kia tokala ku tunda kiá ni lusolo phala ku bokona kilunga kia mukuá, nange eie u tena kuzuela né kiki: “Nga-ndala kuijiia se ua uabhela ioso i uevu. O kuila ngi ku sota kubhata diê?” Bhanga ioso phala ku sota o muthu mu kizuua kia mukua. Bhenge-bhenge o tufunga, a tokala ku tala kiambote phala ku mona o aboki a zoza mu nzumbi ejile mu kiônge phala kua suínisa.
3. Mukonda diahi tua tokala ku sangesa o ajitu mu Lembalasa?
3 Phala o ajitu a mukua, sumbala o kizuua kieniókio kiene o kizuua kia dianga mu ku mona o ku sanguluka, o kutululuka ni ukamba ua mundu ua Jihova. (Jisá. 29:11; Iza. 11:6-9; 65:13, 14) Ihi ia-nda lembalala o ajitu kioso kia-nda zubha o kiônge kia Lembalasa? Se tua a tambulula kiambote ene a-nda lembalala ioso ia mono.