Bhana o Madivulu ni Unjimu

Jezú uambe: “Mua tambula ngoho, bhanenu ngoho.” (Mat 10:8) Tu xikina o kitendelesu kiki kioso ki tu kamba kubhinga kitadi ku athu mukonda dia ku a bhana Bibidia mba madivulu. (2Ko 2:17) Maji né kiki, mu madivulu metu muala milongi iavulu, i tanga o kidi kia Mak’â Nzambi. Kua bhingi nguzu ni kitadi, phala kubhanga o madivulu ni ku a tumikisa mu ilunga ioso ku mundu. Mu kiki, tua tokala kukatula mba kubhinga ngó o madivulu u tua mesena.

Londekesa unjimu mu kubhana o madivulu ku athu, né muene mu ididi mu bhongolokela athu avulu. (Mat 7:6) Mu veji dia kubhana ngó o madivulu ku athu a mu bhita, bhanga ioso phala kuzuela nau bhofele ni kumona se a mesena muene. O kuila u tena kutambuijila xé, mu kusola kitambuijilu kimoxi mu kaxa iala ku luiji? Se kua mu tena kumona se o muthu ua mesena, mu bhane kamukanda. Mu kidi, se muene u bhinga mulangidi mba kadivulu koso-koso, tua-nda mu bhana ni kisangusangu kioso.​—Ji 3:27, 28.