KYEBHI KITUTENA KUTOLOLA O UKEXILU WAKUDIZEMBA

2 | Kana Kusota Kuvutwila Phonzo

O Bibidya Yamba:

“Kanenu kuvutwila athu oso phulu mu phulu. . . . Bhangenu yoso i mwa tena, phala mu kale ku paze ni athu oso. Kanenu kuvutwila phonzo, . . . Mukonda o Mikanda Ikôla yambe: ‘“Jihova wambe, ‘o phonzo ya ngi tokala eme, éme mwene nganda ivutwila.’”—LOMA 12:17-19.

O Kiki Kilombolola Kwila:

Sumbala tukala ni njinda kyoso kyatubhanga kima kyayibha, Nzambi kamesena kwila tuvutwila phonzo ku muthu. Muveji dyakiki, mwene ututendelesa kukingila kwamwene, mukonda kwakambe ngó bhofele, mwene wandazubha o ima yoso yayibha.—Jisálamu 37:7, 10.

Ihi i Utena Kubhanga:

Kyoso o athu kyavutwila phonzo, kiki kibandekesa dingi o ukexilu wa kudizemba. Kyenyiki, se sayi muthu wakuxingi mba wakubhange kima kyayibha, kana kumuvutwila phonzo. Sota kulanga o njinda yé ni kumutambwijila mu ukexilu watululuka. Sayi ithangana, kota o kujimba o kima kyakubhange. (Jisabhu 19:11) Maji mu ithangana yamukwa, kota kuzwela o ima yabhiti. Mukifika, se akubhanga kima kyayibha kinene, eye utena kusola kutangela o maka kwa axiku dya ngoji mba ku athu engi ala ni ungana.

O kudivutwila phonzo kubhekela ngó ibhidi yavulu

Abha se umona kwila séku ukexilu wakubatula o maka ni kutululuka? Mbaphe, se wabhange kya yoso iwatena phala kubatula o maka mu ukexilu watululuka? Kana kuvutwila phonzo. Mukonda o kubhanga kiki, nange kyandabandekesa dingi o maka. Maji se udituna kuvutwila phonzo, eye wandakwatekesa phala o ukexilu wakudizemba ki udibandekese. Eye utena kudyelela mu ukexilu wa Jihova wakubatula o maka. ‘Mu dyelele mwene, abhange-bhu kyoso kya tokala.’—Jisálamu 37:3-5.

Musoso wa kidi—ADRIÁN

Watolola o Ukexilu Wakuvutwila o Phonzo

Kudimatekenu dya unzangala wê, Adrián wexile ni unguma wavulu kumuxima, yu wamesenene kuvutwila phonzo ku athu oso amubhangele kyayibha. Mwene wambe: “Muveji javulu twexile mubhânga ni mawuta, mu ithangana yavulu ngexile mubhubha manyinga avulu, exile mungixisa mu kikoka phala kufwila bhenyobho.”

Adrián wamateka kudilonga o Bibidya kyoso kyexile ni 16 amivu. Mwene wixi dingi: “Kyoso kingayi ni kudilonga o Bibidya, ngamono kwila ngabhingile kulungulula o ukexilu wamwenyu wami.” Mwene wabhingile kukatula kumuxima o ukexilu wakuzemba ni kweha o usweya. Yalungu ni kukamba kuvutwila phonzo, mwene wakatula mbote bengebenge mu ima yadilongo mu mukanda kwa akwa Loma 12:17-19. Mwene wambe: “Eme ngaxikina kwila Jihova wandazubha o kukamba o kuyuka mu ukexilu wê ni mukithangana kyaxindi mwene. Bhofelebhofele, ngatolola o ukexilu wami wa usweya.”

Sayi kizuwa mu usuku, Adrián amukwata ku kibuka kyengi kya jibandi exile jinguma ja kibuka kyatokalele, ya amateka kumubeta. O mutwameni wakibuka wadikola: “Dizokele!” Adrián wambe: “Ku muxima wami, ngamesenene kyavulu kubhânga nawu.” Maji muveji dya kubhanga kiki, mwene wasambe kwa Jihova yu waye.

Adrián wambe: “Mukizuwa kya kayelaku, ngadisange ni mutwameni wakibuka kyokyo, mwene wexile ubheka wê. Kyoso kingamumono, njinda yangikwata, ngamesenene kubhânga nê, maji ngasambe kumuxima, ngabhingi kwa Jihova phala kungikwatekesa kutululuka. Ngaxinganeka kwila, mwene wexile we ni njinda, maji ngadiwana kyoso mwene kyazukama, yu wangambela: ‘Ngiloloke mu yoso yabhiti maza mu usuku. Mukidi, eme ngamesena we kukala kala eye. Ngamesena we kudilonga o Bibidya.’ Ngasanguluka kyavulu mu nguzu ingabhange phala kulanga o njinda yami! Mukonda dya nguzu ingabhange, ngamateka kumulonga o Bibidya.”