KYEBHI KITUTENA KUTOLOLA O UKEXILU WAKUDIZEMBA

4 | Tolola O Ukexilu Wakudizemba Ni Kikwatekesu Kya Nzambi

O Bibidya Yamba:

“O ibundu ya nzumbi yenyiyi: O henda, kusanguluka, paze, mwanyu, kulenduka, kubhanga o mbote, kixikanu, kubatâma, ni kuditumina jihânji.”—NGALÁSYA 5:22, 23.

O Kiki Kilombolola Kwila:

Tutena kutolola o ukexilu wakudizemba ni kikwatekesu kya Nzambi. O nzumbi ikôla ya Nzambi, itena kutukwatekesa kukala ni idifwa nuka twejitena kukala nayu mu nguzu yetu. Kyenyiki, muveji dyakusota kutolola o ukexilu wakuzemba mu nguzu yetu, kota o kudyelela mu kikwatekesu kibhana Nzambi. Se tudyelela kwa Nzambi, etu twandadivwa kala kyadivu poxolo Phawulu. Mwene wasoneka: “Mu ima yoso ngala ni nguzu, mukonda dya yó u ngibhana o kutena.” (Filipe 4:13) Mukiki, twandatena kuzwela: “Kubhanduluka kwami ku tunda kwa Jihova.”—Jisálamu 121:2.

Ihi i Utena Kubhanga:

“Eme ngexile kindanda, maji Jihova wangikitula muthu watululuka.”—WALDO

Samba kwa Nzambi ni muxima woso, mubhinge o nzumbi yê ikôla. (Luka 11:13) Mubhinge phala akukwatekese kukala ni idifwa yambote. Dilonge izwela o Bibidya yalungu ni idifwa ikwatekesa kweha o ukexilu wakudizemba, kala o henda, paze, mwanyu, ni kuditumina jihânji. Sota maukexilu andakukwatekesa kukala ni idifwa yiyi kumwenyu wé. Dilunge ni yó amusota kukala we ni idifwa yiyi. O makamba yá, andakukwatekesa ‘kuzola ni kubhanga ima yambote.’—Jihebelewu 10:24.

Musoso wa kidi—WALDO

Watolola o Ukexilu Wakuzemba

Sayi diyala amwixana Waldo, kyexile mukula, wadibhanene ni ibhidi yavulu kumwenyu wê. Mwene wambe: “Ngexile mubhanga jimvunda muveji javulu ni akwa kusumbisa jidroga . . . Sayi kizuwa, o kibuka kyajibandi utwadikwatele unguma, afutu kitadi ku diyala wexile kijibhanganga phala kungijibha, angikwama ni phoko maji ngatena kulenga.”

Waldo kakiwabhelele kyoso muhatu wê kyamateka kudilonga o Bibidya ni Jimbangi ja Jihova. Mwene wambe: “Eme ngazembele o Jimbangi ja Jihova, muveji javulu ngexile mwaxinga jindaka. Maji mu ithangana yoso, ene exile mungitambwijila ni kubatâma kwoso.”

Mukubhita kithangana, Waldo wamateka we kudilonga o Bibidya. Mwene wambe: “Kyangibhonzele kukumbidila o ima ingexile mudilonga. Eme ngaxinganekene kwila, kingejitena kweha o njinda yami ni usweya.” Maji sayi kima kyadilongo mu Bibidya kyamukwatekesa kyavulu phala kulungulula o ukexilu wê.

Waldo ujimbulula: “Sayi kizuwa, o phange wexile kungilonga o Bibidya, Alejandro, wangibhingi phala kutanga o mukanda kwa akwa Ngalásya 5:22, 23. . . . Alejandro wajimbulula kwila o kukala ni idifwa yiyi, kikwijila mu nguzu yami, maji bhukaxi ka nzumbi ikôla ya Nzambi. O kwijiya o kidi kiki, kwalungulula o ukexilu wami wakuxinganeka!”

Waldo weha o ukexilu wakuzemba akwa, mukonda dyakudyelela mu kikwatekesu kya Nzambi. Mwene wambe: “O jindandu ni makamba mami okulu, kya abhonzele kuxikina kwila, eme ngalungulwile o ukexilu wami.” Mwene wambe dingi: “Eme ngexile kindanda, maji Jihova wangikitula muthu watululuka.”