Mukonda Dyahi Lelu Kwene Hanji Ita?
O Bibidya ilondekesa se mukonda dyahi kwene ita ni mukonda dyahi ya musuluka kate lelu.
O KITUXI
Nzambi wabhange o jitata jetu jadyanga Adá ni Eva mu kidifwanganu kye. (Dimatekenu 1:27) Phala ene kikweji kwabhonza kukayela o idifwa ya Nzambi, kala o paze ni henda. (1 Kolindu 14:33; 1 Nzwá 4:8) Adá ni Eva abhukumukina Nzambi ya ate kituxi. Mukonda dya kiki, etwenyoso twakwa ituxi, twene mukuka ni kufwa. (Loma 5:12) O kituxi kibhangesa o athu kukituka akwa usweya, ni kuluwa ita.—Dimatekenu 6:5; Máluku 7:21, 22.
O JINGUVULU
Katubhange ni kutena kwa kuditumina mudyetu. O Bibidya yamba: “O njila yenda o muthu ki yene bhu lukwaku lwa muthu-mwène, mba muthu kyenda, mwene u tongesa o makanda mê-mwène.” (Jelemiya 10:23) Mukonda dya kiki o jinguvulu kene mutena kuzubha o ita ni usweya.
SATANAJI NI MADIMONYO MÊ
O Bibidya ijimbulula kwila “o ngongo yoso yala bhu maku a kadya-phemba,” mba, mukutena kwa Satanaji. (1 Nzwá 5:19) Mwene kijibhangânga. Kumoxi ni madimonyo me ene mufwinyisa o athu kukala akwa usweya ni kubhanga ita.—Nzwá 8:44; Dijingunwinu 12:9, 12.
Etu kitwala ni kutena kwa kuzubha o ima ibhekesa o ita ni usweya, maji Nzambi wala ni kutena ni kwila mwene wanda izubha.