Kyebhi Kitutena Kusamba Kwa Jihova ni Muxima Woso?

1-2. (a) Mukonda dyahi kubhonza kujikula o muxima wetu kwa Jihova? (b) Kyebhi kitwejiya kwila Jihova wivwa o misambu yetu?

O KWILA wene mubhitulula jinga o izwelu mu misambu yé, mba kukubhonza kujikula o muxima we kwa Jihova? Se kyene, keye ngo. Kuma twala ni ima yavulu yakubhanga, sayi bhabha tusamba ni lusolo. Mba tumona kwila etu kitwafwama o ujitu yu, mukonda dya kiki, kitutena kuzwela kwa Jihova ni muxima woso se kyebhi kitwamudivwa ni ihi ituxinganeka.

² O Bibidya itudyelelesa kwila phala Jihova o kyabeta dingi kota ko izwelu kana, maji o kuzwela ni muxima woso. Mwene wivwa “kyoso kyala kwinda abelesela.” (Jisá. 10:17) Jihova ubhana matwi mu ima yoso ituzwela mukonda mwene utubhana valolo.—Jisá. 139:​1-3.

3. Ibhwidisu yebhi itwanda tambwijila mu milongi yiyi?

³ Mu milongi yiyi twanda tambwijila o ibhwidisu yiyi: Mukonda dyahi tutena kusamba kwa Jihova sé woma? Kyebhi ki tutena kusamba ni muxima woso? Kyebhi o misambu itusanga mu Bibidya itena kutukwatekesa kubhanga kiki? Ihi itwatokala o kubhanga se twatandanganya kyavulu anga kitwamutena kuzwela ni Jihova kyebhi kitwamudivwa? Tudilonge o itambwijilu ya ibhwidisu yiyi.

SAMBA KWA JIHOVA SÉ WOMA

4. Ihi itena kutukwatekesa kusamba kwa Jihova sé woma? (Jisálamu 119:145)

⁴ Jihova dikamba dya henda, mwene wamesena o mbote yetu. Kyoso kitutendela o maka enya, tudivwa kyambote phala kuzwela ni Jihova se kyebhi kitwamudivwa ni ihi ituxinganeka. O musoneki wa Jisálamu 119 wakexile muxinganeka mu ukexilu yu yalungu ni Jihova. O mwenyu we kiwayukile. O athu ayibha exile mumutatela makutu. (Jisá. 119:​23, 69, 78) Kumbandu yengi, o mukwa Jisálamu wakexile muluwala mukonda dya itondalu ye. (Jisá. 119:5) Ne kiki mwene kexile ni woma wa kujikula o muxima we kwa Jihova.—Tanga Jisálamu 119:145.

5. Mukonda dyahi kitwatokala kwehela o ixinganeku yayibha kutufidisa kusamba kwa Jihova? Bhana kifika.

⁵ Ki twatokala kwehela o ixinganeku yayibha kutufidisa kusamba kwa Jihova. Jihova wixana kate mwene yo ate ituxi yamakota kusamba kwa mwene. (Iza. 55:​6, 7) Xinganeka mu kifika kiki: Muthu wajimbidila mu muxitu, mwene umona athu kadikanga atena kumukwatekesa. O kwila o muthu wajimbidila wanda kala ni jisonyi ja kubhinga kikwatekesu ku athu ya? Kana ngana! Kyene we kimoxi, kyoso kitudivwa kwila twajimbidila mba twate kituxi, kikwa bhingi kukala ni woma wa kujikula o muxima wetu kwa Jihova.—Jisá. 119:​25, 176.

IHI YANDA TUKWATEKESA KUJIKULA O MUXIMA WETU KWA JIHOVA?

6-7. Ihi itena kutukwatekesa kusamba ni muxima woso? Bhana kifika. (Tala we kulwiji.)

⁶ Kyoso kitujikula o muxima wetu kwa Jihova, mu kumutangela se kyebhi kitwamudivwa ni ihi ituxinganeka, tumuzukama dingi. Ihi itena kutukwatekesa kubhanga kiki?

⁷ Xinganeka mu idifwa ya Jihova.a Kyoso kituya ni kuxinganeka mu idifwa ya Jihova, ki kwanda tubhonza ku mutangela yoso itwamudivwa ni ihi ituxinganeka. (Jisá. 145:​8, 9, 18) Tala o phangu ya phangyetu mana Kristina, tat’e wexile mukwa jimvunda. Mwene wambe: “Kwangibhonzele kumona Jihova kala Tata ni kumutangela yoso ingexile mudivwa. Ngafikile kwila mukonda dya itondalu yami mwene weji ngibwazeka.” Idifwa yebhi ya Jihova yakwatekesa mana Kristina? Mwene wambe: “O henda yakalelaku ya Jihova ingidyelelesa kwila Jihova wa ngizolo. Eme ngejiya kwila mwene kanda kweha o lukwaku lwami. Ne mwene se ngi dibhala mwene wanda ngitalatala ni henda ni kungi balumuna. O kwijiya o kidi kiki kingikwatekesa kumutangela o ima ingisangulukisa ni ima ingiluwalesa.”

8-9. Mukonda dyahi kima kyambote kuxinganeka mu ima itwanda bhinga ku musambu? Bhana phangu.

⁸ Xinganeka mu ima iwanda zwela. Ande dya kusamba eye utena kudibhanga ibhwidisu. Mu kifika: ‘Makebhi ungamudibhana nawu kindala? O kwila ngabhingi kuloloka muthu? O kwila ngamudibhana ni kibhidi kya ubhe ni kwila ngabhindamena o kikwatekesu kya Jihova?’ (2 Jis. 19:​15-19) Tutena we kukayela o phangu ya Jezú, mu kusamba yalungu ni dijina dya Jihova, o Utuminu wê ni vondadi yê.—Mat. 6:​9, 10.

⁹ Phange ya muhatu amwixana Aliska amutangela kwila o mwadi we wexile ni uhaxi kiwivu milongo. Kudimatekenu kwa mubhonzele kusamba kwa Jihova. Mwene ulembalala: “Eme ngaluwalele kyavulu, kate mwene kwangibhonzele kyavulu kuxinganeka mu ima ingeji zwela mu musambu.” Ihi yamukwatekesa? Mwene ujimbulula: “Ande dya kusamba ngene mukatula kithangana phala kuxinganeka mu ima inganda bhinga ku musambu, kiki kyene mu ngikwatekesa phala kingizwele ngo yalungu neme ni uhaxi wa mwadi wami. Kiki kyene mungikwatekesa kutululuka kyoso kingamusamba.”

10. Mukonda dyahi ki twatokala kusamba ni lusolo? (Tala we o jifoto.)

¹⁰ Kana kusamba ni lusolo. Kidi kwila tutena kuzwela ima yofele ku musambu ni muxima woso. Maji kyoso kitusamba sé lusolo, tutena kuzwela o ima yoso itwamudivwa ni ima ituxinganeka. b Manu Elija, mwadi wa mana Aliska, wambe: “Eme ngene musamba veji javulu mu kizuwa, kyoso kingikatula kithangana phala kubhanga musambu wa lebha, ngidivwa kwila o ukamba wami ni Jihova ukola dingi. Jihova mukwa mwanyu, kyoso kingamu samba mwene kakingila kwila ngisamba ni lusolo, mu kiki ngejiya kwila ngitena kuzwela yoso ingandala.” Fikisa o ndunge yiyi: Sanga ola ni kididi bhu utena kusamba sé kima kitena kukulandukisa, nange ni dizwi dya swina. Izuwa yoso sota kusamba mu ukexilu yu.

XINGANEKA MU MISAMBU ITUSANGA MU BIBIDYA

11. Mukonda dyahi kima kyambote kuxinganeka mu misambu itusanga mu Bibidya? (Tanga we o kaxa “O Kwila Eye Udivwa Kala Ene?”)

¹¹ O kima kitena kutukwatekesa, o kuxinganeka mu misambu ni mimbu itusanga mu Bibidya. O kumona kyebhi o jiselevende ja Nzambi mu ukulu azwela ni muxima woso, yoso yexile mu banza, kwanda kukwatekesa kujikula o muxima we kwa Jihova. O kumona o izwelu ya tumbula ene phala kubheza Jihova itena kukukwatekesa kusanga izwelu ya ubhe phala kutumbula mu misambu ye. Eye nange usanga misambu ya jiselevende ja Jihova, abhiti we mu ibhidi yadifu ni ibhidi i wamudibhana nayu.

12. Ibhwidisu yebhi itwatokala kudibhanga kyoso kituxinganeka mu misambu yosoneke mu Bibidya?

¹² Kyoso ki utanga musambu wosoneke mu Bibidya, xinganeka: Nanyi wabhange o musambu yu ni ihi yexile mubhita ku mwenyu wa muthu yú? O kwila ngitena kutendela o ima yazwela mwene? ihi ingitena kudilonga ni musambu yú?’ Nange kwanda bhinga kutokwesa dingi bhofele phala kutambwijila o ibhwidisu yiyi, maji o kubhanga kiki yanda kukwatekesa. Tumone ifika.

13. Ihi i utena kudilonga mu musambu wa Ana? (1 Samuwele 1:​10, 11) (Tala we o yakapa.)

¹³ Tanga 1 Samuwele 1:​10, 11. Kyoso Ana kyabhange o musambu yu, mwene wexile mu dibhana ni ibhidi iyadi yonene. Mwene kexile muvwala, o muhatu wengi wa diyala dyê wexile mumutalesa hadi yavulu. (1 Sam. 1:​4-7) Maji Ana wasambe se lusolo, yu wajikula o muxima we kwa Jihova. Mu kiki mwene wadivu kyambote. (1 Sam. 1:​12, 18) Se wamu dibhana ni ibhidi yamu kutandanganyesa kyavulu, ihi i utena kudilonga ni musambu wa Ana? Kyoso kitujikula o muxima wetu kwa Jihova anga tumutangela o ibhidi yetu yoso ni kyebhi kitwamu divwa, twanda divwa we kyambote.—Jisá. 55:22.

14. (a) Ihi dingi itutena kudilonga mu phangu ya Ana? (b) Mukonda dyahi o kutanga ni kuxinganeka mu Bibidya kitukwatekesa kwijiya se ihi itwanda zwela mu misambu yetu? (Tala ku lwiji.)

¹⁴ Ana wavwala mona yu wamuluku o dijina dya Samuwele. Mu kubhita tumivu wamwambata ku mukunji wadikota Elí. (1 Sam. 1:​24-28) Mu kusamba ni muxima woso, mwene wasakidila Jihova mukonda dya kulanga o jiselevende jê ja fiyele ni kwadikila.c (1 Sam. 2:​1, 8, 9) Sumbala Ana wexile hanji mudibhana ni ibhidi, maji ne kiki mwene wadikwatenene mu mabesá a Jihova. Ihi i tutena kudilonga? Twanda tena kuswina mukudibhana ni ibhidi se tudikwatenena mu ima yabhange kya Jihova kokwetu mu ukulu ni ima yamubhanga kindala.

15. Ihi itutena kudilonga mu musambu wa polofeta Jelemiya? (Jelemiya 12:1)

¹⁵ Tanga Jelemiya 12:1. Sayi kizuwa o polofeta Jelemiya waluwalele kyavulu mukonda mwene wamonene kwila o athu ayibha exile ni mwenyu wambote ni kwila asangulukile. Mwene we waluwalele kyavulu mukonda dya kumutalatala kyayibha ku jiphange jê akwa Izalayele. (Jel. 20:​7, 8) Mwene katatela Nzambi mukonda dya ima yayibha yexile mubhita ni mwene. Mu veji dya kiki mwene wazwela kwa Jihova kyebhi kyexile mudivwa. Mukusuluka Jelemiya wamono kyebhi Jihova kyabazela o akwa Izalayele yo abhukumukine. Kiki kyabandekesa dingi o kidyelelu kyê kwa Jihova mu ukexilu we wa kufundisa. (Jel. 32:19) Etu we tutena kudivwa kala Jelemiya kyoso kitumona athu ayibha kuditunda kyambote ku mwenyu ni kyoso kyatutalatala kyayibha. Ne kiki, kala kyabhiti ni mwene tutena kuzwela ni muxima woso kwa Jihova o ima yamu tutandanganyesa mu kudyelela kwila mu kithangana kya tokala, Jihova wanda batula o maka oso utwene mudibhana nawu ku mwenyu.

16. Ihi itutena kudilonga ku musambu wa mukwa Levi kexile mutena kubheza Jihova mu tembulu? (Jisálamu 42:​1-4) (Tala we o jifoto.)

¹⁶ Tanga Jisálamu 42:​1-4. O musoneki wa Salamu yiyi wexile mukwa Levi, mwene kexile mutena kubheza Jihova mu tembulu kumoxi ni akwa Izalayele. O izwelu yê yalondekesa kyebhi mwene kyexile mudivwa. Se twala mu kaleya mukonda dya kixikanu kyetu mba twala ni uhaxi wamu tufidisa kutunda kubhata, nange tudivwa kala o mukwa Levi. Ne mwene se twatandanganya kyavulu, kima kyambote kuzwela ni Jihova kyebhi kitwamu divwa. Kiki kyanda tukwatekesa kumona o ima mu ukexilu wengi. Mu kifika o mukwa Levi wamono kwila kwexile hanji ukexilu wengi wa kubheza Jihova. (Jisá. 42:5) Mwene we wakatula kithangana phala kuxinganeka kyebhi Jihova kyamukwatekesa. (Jisá. 42:8) O kusamba kwa Jihova ni muxima woso, kutukwatekesa kutendela kyambote o ixinganeku yetu ni kukala dingi ni nguzu phala kukolokota.

17. (a) Ihi itutena kudilonga mu musambu wa polofeta Jona? (Jona 2:​1, 2) (b) Mukonda dyahi kima kyambote kwijiya o jivelusu ja Bibidya kala o jivelusu ja Jisálamu? (Tala ku lwiji.)

¹⁷ Tanga Jona 2:​1, 2. O polofeta Jona wabhange o musambu yu kyoso kyakexile mu mala dya mbiji. Mwene wabhukumukine Jihova, maji ne kiki mwene wexile ni kidyelelu kya kwila Jihova weji mwivwa.d Mu musambu we mwene watumbula izwelu yavulu itusanga mu divulu dya Jisálamu. Kiki kilondekesa kwila mwene wejidile kyambote o jivelusu jiji. O kuxinganeka mu jivelusu jiji kyamukwatekesa kudyelela kwa Jihova kwila weji mukwatekesa. Etu we twatokala kwijiya o jivelusu ja Bibidya. Kyenyiki kyoso kitusamba mu ithangana ya bhonzo, tutena kulembalala o jivelusu jiji ni kusanga kikwatekesu.

SULUKA MUKUZUKAMA KWA JIHOVA BHUKAXI KA MISAMBU

18-19. Kidyelelu kyebhi kitusanga mu divulu dya Loma 8:​26, 27? Bhana phangu.

¹⁸ Tanga Loma 8:​26, 27. Sayi bhabha tutandanganya kyavulu, kitutena kujimbulula kwa Jihova kyebhi kitwamu divwa. Maji sayiku kikwatekesu, o nzumbi ikola ya Nzambi. Kiki kibhita kyebhi? Bhukaxi ka nzumbi ye ikôla, Jihova watumina o asoneki a Bibidya kusoneka misambu yavulu mu Bibidya. Mu kiki kyoso kyamu tubhonza kujimbulula kwa Jihova kyebhi kitwamu divwa, mwene utena kumona o misambu yala mu Bibidya kala misambu yetu. Mwene utena kutambwijila o misambu yiyi kala etu mwene twa ibhange.

¹⁹ O kwijiya o kidi kiki kyakwatekesa phange ya muhatu ku Russia amwixana Yelena. Mwene amute mu kaleya mukonda dya kusamba ni kutanga o Bibidya. Mana Yelena waluwalele kyavulu kate mwene kwamubhonzele kubhanga misambu. Mwene wambe: “Eme ngalembalala kwila kyoso ki ngiluwala anga ngikamba kwijiya o ima inganda bhinga mu misambu, Jihova utena kuxikina o misambu ja jiselevende jê mu ukulu, kala misambu yami. Kiki kyangikolokotesa kyavulu mu kithangana kiki kyabhonzo.”

20. Kyoso kitukala ni hele, kyebhi kitutena kutululukisa o muxima wetu?

²⁰ Kyoso kitukala ni hele, tutena kulanduka kyoso kituya ni kusamba. Phala kutululukisa o muxima wetu, tutena kwivwa o kitangelu kya Bibidya kyongalavale, kya divulu dya Jisálamu. Tutena we kusoneka o ima itwamu divwa kala kyabhange Sobha Davidi. (Jisá. 18; 34; 142; izwelu ku thandu dya ibatulu.) Mu kidi kikwala ijila itwatokala kukayela phala kudisokejeka ni tutene kusamba. (Jisá. 141:2) Kyenyiki sota kwijiya se ihi itena kukukwatekesa.

21. Mukonda dyahi tutena kusamba kwa Jihova ni muxima wetu woso?

²¹ Kima kyambote kwijiya kwila Jihova wejiya o ima yoso itubhita nayu ande mwene dya kumutangela. (Jisá. 18; 34; 142) Ne kiki mwene usanguluka kyavulu mu kwivwa o misambu yetu itubhanga ni kidyelelu kyoso. Kyenyiki kana kukala ni woma wa kusamba kwa Tat’ê ya dyulu Jihova. Dilonge ni misambu itusanga mu Bibidya. Samba ni muxima we woso. Mutangele o ima ikusangulukisa ni ima ikuluwalesa. Jihova dikamba dyé dya kidi, mwene wanda kala jinga kumbandu yê!