Disambelyenu Mudyenu

1. Kyebhi kitwejiya kwila o misambu yetu yala ni valolo yavulu phala Jihova?

O MUSAMBU ujitu wa katunda. Xinganeka: Jihova wabhana ikalakalu ku jianju. (Jisá. 91:11) Mwene we wabhana ikalakalu yavulu kwa Mon’ê. (Mat. 28:18) Maji o kwila mwene wasolo muthu phala kwivwa o misambu yetu? Kana. Jihova o “mukwa kwívwa o kusamba.” Mwene utwivwa kyoso kitusamba.—Jisá. 65:2.

2. Phangu yebhi yatuxila Phawulu yalungu ni kusambela akwetu?

² Tutena kudivwa kyambote mu kuzwela ni Jihova o ibhidi yoso itwamudibhana nayu. Maji twatokala we kusambela akwetu. Poxolo Phawulu wabhana phangu yambote yalungu ni maka enya. Mwene wasonekena o jiphange ku Efezu: “Ngene mu mitumbula jinga mu misambu yami.” (Efe. 1:16) Phawulu wexile we mutumbula o majina a athu mu misambu ye. Mukifika mwene wambe kwa Timote: “Ngisakidila Nzambi, . . . kingene mufula ku kutumbula mu misambu yami suku ni mwanya.” (2 Ti. 1:3) O mwenyu wa Phawulu wabhonzele, mwene wexile mu dibhana ni ibhidi yavulu, yu wexile musamba yalungu ni maka enya. (2 Ko. 11:23; 12:​7, 8) Maji ne kiki mwene wexile mukatula kithangana phala kusambela akwa.

3. Ihi itena kutubhangesa kujimba kusambela akwetu?

³ Sayi bhabha twene mudijimba kusambela we akwetu. Mukonda dyahi? Phange Sabrinaa utumbula kima kimoxi. Mwene wambe: “O mwenyu ku mundu yu wabhonzo kyavulu. Mukonda dya kiki tudikwatenena ngo ku ibhidi yetu anga tusamba yalungu netu ni ima itutandanganyesa.” O kwila kiki kyabhitile kya neye? Se kyene, o milongi yiyi yanda kukwatekesa (1) kudilonga se mukonda dyahi kima kyambote kusambela akwetu (2) kumona jidunge jitena kukukwatekesa kubhanga kiki.

MUKONDA DYAHI KIMA KYAMBOTE KUSAMBELA AKWETU?

4-5. Kyebhi o ku sambela akwetu “kwala ni kutena kwadikota”? (Tiyaku 5:16)

⁴ O kusambela akwetu kwala “ni kutena kwadikota.” (Tanga Tiyaku 5:16.) O misambu yetu itena kufwinyisa o ima yanda bhita ku mwenyu wa muthu? Jezú wejidile kwila o misambu itena kulungulula o mwenyu wa muthu. Mukwijiya kwila poxolo Phetele weji mudituna, mwene wambe: “Eme ngene mu kusambela, phala o kixikanu kyé ki kizoze.” (Luk. 22:32) Phawulu wejidile we o kutena kwala naku o misambu. Kyoso kyexile mu kaleya ku Loma se kikuma, mwene wasonekena Filimone: “Ngadyelela kwila, bhukaxi ka misambu yenu anda ngibhana o ufôlo.” (Filim. 22) Kiki kyene mwene kyabhiti. Mukubhita kithangana, Phawulu amujituna mu kaleya yu wavutuka mu kikalakalu kya kuboka.

⁵ Kidi kwila o misambu ye ki itena kujijidika Jihova kubhanga kima kiyala mu vondadi ye. Jihova utonginina o ibhidi ya jiselevende jê sayi bhabha mwene usola kubhanga o kima kyabhingi ene. O kwijiya o kidi kiki kitena kutukwatekesa kusamba jinga kwa Jihova yalungu ni maka utwamudibhana nawu ni kumudyelela, ni kuxisa o maka mu maku mê.—Jisá. 37:5; tanga 2 Kolindu 1:11 ni notas de estudo na Bíblia de estudo, mu dimi dya phutu.

6. Kala kitwamono mu ifika, ihi itena kubhita kyoso kitusambela akwetu? (1 Phetele 3:8)

⁶ O Kusambela akwetu kitukwatekesa kukala tu akwa “henda.” (Tanga 1 Phetele 3:8.) O mukwa henda umona o hadi ya akwa anga umesena kubhanga kima phala kukwatekesa. (Mál. 1:​40, 41) O kusambela akwetu kubhekela mabesá avulu. Mukifika, kafunga kamoxi amwixana Mingyedi wambe: “Kyoso ki ngi samba yalungu ni ibhindamu ya akwetu, ngitendela kyambote o ibhidi yâ, kiki ki ngikwatekesa kubandekesa dingi o henda yami kwa ene. Eme ngizukama dingi kwa ene ne mwene se ene kejiya.” Kafunga ka mukwa amwixana Richard, wambe: “Kyoso kitusambela muthu, tukala ni hanji ya kumukwatekesa. Kyoso kitubhanga kima phala kukwatekesa o muthu yu tubhanga mbandu ya kitabwijilu wa musambu yu.”

7. Kyebhi o kusambela akwetu, kitukwatekesa munona o ibhidi yetu mu ukexilu watokala? (Filipe 2:​3, 4) (Tala we o jifoto.)

⁷ O kusambela akwetu, kutukwatekesa kumona o ibhidi yetu mu ukexilu watokala. (Tanga Filipe 2:​3, 4.) Twatungu ku mundu yala bhu maku a kadya-phemba. Mukonda dya kiki etu enyoso twene mudibhana ni ibhidi. (1 Nz. 5:19; Dij. 12:12) O kukala ni kidifwa kya kusambela akwetu, itukwatekesa kulembalala “kwila o jiphaxi ji mwa mudibhana naju, jene jimoxi ni ja mudibhana naju o jiphange jenu mu ngongo yoso.” (1 Ph. 5:9) Sayi muboki wa thembu yoso amwixana Katidi wambe: “O kusambela akwetu ingilembalesa kwila keme ngo ngene mudibhana ni ibhidi. Kiki ki ngikwatekesa kukamba kudikwatenena mu ibhidi yami.”

ENE ABHINDAMENA O MISAMBU YETU

8. Ananyi twatokala kwa atumbula mu misambu yetu?

⁸ Ananyi twatokala kwa atumbula mu misambu yetu? Tutena kusamba phala kibuka kya athu. Mukifika yo ahaxila, minzangala amudibhana ni tendasá mu xikola ni yo amudibhana ni ibhidi mukonda dya kukuka. Jiphange jetu javulu ene mwazukutisa ku jindandu jâ mba kujinguvulu. (Mat. 10:​18, 36; Ika. 12:5) Mukonda dya ita, jiphange javulu axisa o jinzo jâ. Amukwa amutala hadi mukonda dya mavuwa. Nange kitwejiya o jihange jiji ja mala ni ja ahatu. Maji kyoso kitwa asambela, tulondekesa kwila twamu belesela o kitendelesu kya Jezú kya “dizolyenu mudyenu.”— Nzw. 13:34.

9. Mukonda dyahi twatokala kusambela yo ala ku pholo mu kilunga kya Jihova ni ahatu’â?

⁹ Tutena we kusambela yo ala ku pholo mu kilunga kya Jihova. O jiphange atokala mu kibuka kya utuminu ni akwatekexi’â, jiphange ala kupholo mu kibuka kya filiyale ni jiphange jengi ala ni ungana ku filiyale, tufunga twa ilunga, tufunga mu ilunga ni akwatekexi atufunga. O jiphange jiji akalakala kyavulu phala kutulanga, amoxi mudya amudibhana ni hele. (2 Ko. 12:15) Mukifika, sayi kafunga ka ilunga amwixana Máluku, wambe: “O kibhidi kyami, o kukala dikanga dya jitata jami. Ene akuka kya amudibhana ni mauhaxi. Ngejiya kwila o phangyemi ya muhatu ni mwadi we amulanga kyambote o jitata jami. Maji ngiluwala kyavulu mukonda ki ngitena kubhanga yoso ni yoso phala ku akwatekesa.” Sayi bhabha etu ki twene mukwijiya o ibhidi yene mudibhana nayu o jiphange jiji. Maji kima kyambote kwatumbula mu misambu yetu. (1 Te. 5:​12, 13) Maji tutena we kusambela o ahatu wâ mukonda, o kikwatekesu kyâ kyene mukwatekesa o jiphange jiji kusuluka mu sidivisu yâ.

10-11. Kyebhi kitwejiya kwila o kusamba sé lusolo phala kibuka kya jiphange kusangulukisa Jihova? Jimbulula.

¹⁰ Kala kitwamono twene musambela phala kibuka kya jiphange ja mala ni ja ahatu. Mu kifika ne mwene se kitwatumbula o dijina dya muthu mu musambu wetu, maji sayi bhabha twene mubhinga phala Jihova kukwatekesa yo ala mu kaleya ni yo afundu muthu wakazola. Sayi kafunga amwixana Xiku, wambe: “Twala ni jiphange javulu amudibhana ni ibhidi, sayi bhabha tusamba sé lusolo mukubhinga kikwatekesu phala o athu oso amudibhana ni ibhidi.”

¹¹ O kwila o misambu yiyi isangulukisa Jihova? Kyene! Kidi kwila etu kitwejiya ni kidi kyoso o ima yabhindamena o jiphange jetu. Kyenyiki, ki kituxi kusamba sé lusolo phala kibuka kya jiphange. (Nzw. 17:20; Efe. 6:18) O misambu yiyi ilondekesa kwila twazolo o “jiphange joso mu ngongo.”—1 Ph. 2:17.

KUSAMBELA YO TWA EJIYA

12. Ihi ibhita ni misambu yetu se tukala ni ukexilu wa kutonginina?

¹² Tonginina kyambote. Twene musambela phala kibuka kya jiphange ja mala ni ja ahatu, maji tutena we kusambela yo twa ejiya. O kwila sayi muthu mu kilunga kyé wamudibhana ni uhaxi wabonzo? O kwila sayi munzangala waluwala mukonda dya kudibhana ni jitendasá mu xikola? Wejiya phange ya muhatu mba ya diyala wamukolokota mu kusasa an’ê ubheka wê, mu kwa akwatekesa kwijiya o itumu ya Jihova? (Efe. 6:4) Se utonginina kyambote, wanda tena kulondekesa hende ku akwetu. Kiki kyanda kukwatekesa kwatumbula mu misambu yé.b—Lom. 12:15.

13. Ihi itena kutukwatekesa kutumbula o majina a yo kitwa ejiya pholo ni pholo?

¹³ Sambela phange mu kutumbula o dijina dyê. Tutena kubhanga kiki kate mwene ku jiphange jojo nuka twa amwene pholo ni pholo. Mu kifika jiphange javulu ku Cingapura, ku Criméia, ku Eritreia ni ku Rússia ala mu jikaleya. Tutena kusanga o majina a jiphange jiji ku sayite jw.org.c Sayi kafunga ka ilunga amwixana Bruno, wambe: “Nga mono kwila o kusoneka o dijina dya phange wala mu kaleya ni kutumbula o dijina didi ni dizwi dya swina, kingikwatekesa kulembalala o phange yu ni kumutumbula mu misambu yami.”

14-15. Ihi yanda tukwatekesa kubhinga o ima itwamesena?

¹⁴ Bhinga o kima kiwamesena. Manu Mingyedi, twamutumbula kya kudima wabhana o ndunge yiyi: “Kyoso ki ngitanga misoso mu jw.org ya jiphange ala mu jikaleya, ngixinganeka se kyebhi ki ngeji divwa se ngexile mu kididi kyâ. Kidi kwila ngeji tandanganya ni muhatu wami, ngeji bhindamena muthu phala kumulanga. Kiki ki ngikwatekesa kusambela o jiphange akazala ala mu jikaleya.”—Jih. 13:​3, nota.

¹⁵ O kuxinganeka kyebhi kyala o mwenyu wa jiphange jetu mu kaleya, kutukwatekesa kutumbula o ima yabhindamena ene mu misambu yetu. Mu kifika, tutena kubhinga phala o alangidi a jikaleya atalatala kyambote o jiphange jetu ni kwila o jinguvulu a ehela kukala ni ufolo wa kubheza Jihova. (1 Ti. 2:​1, 2) Tutena we kusamba phala o phangu ya jiphange jiji afiyele itena kuswinisa o jiphange mu mbambe yenyoyo. (1 Ph. 2:12) O jindunge jiji jalungu we ni jiphange amudibhana ni ibhidi yamukwa. Kyoso kitutonginina phangyetu tutena kutumbula o dijina dyé ku musambu wetu ni kubhinga phala Jihova kumukwatekesa. Mu kubhanga kiki tulondekesa kwila ‘o henda yetu mudyetu’ yavulu.—1 Te. 3:12.

IHI ITWATOKALA KULEMBALALA KU MISAMBU YETU?

16. Ihi itwatokala kulembalala ku misambu yetu? (Matesu 6:8)

¹⁶ Kala kitwamono, o ima itubhinga mu misambu yetu itena kukwatekesa muthu. Maji twatokala kulembalala kwila, kyoso kitwamusamba kitwamuzwela kwa Jihova o kima kyakambe kwijiya mwene. Mwene we kabhindamena o itendelesu yetu phala kwijiya se kyebhi kyatokala kubatula o maka. Ande dya kumubhinga, Jihova wejiya kyá o ima itwabhindamena. (Tanga Matesu 6:8.) Mu kyenyiki mukonda dyahi twatokala kusambela akwetu? Kyoso kitusambela akwetu twamulondekesa we kwila twa azolo. Jihova usanguluka kyavulu kyoso kyamona o jiselevende jê kulondekesa henda kala mwene.

17-18. Kifika kyebhi kilondekesa kwila twatokala kusambela akwetu?

¹⁷ Ne mwene se tubanza kwila o musambu wetu ki wamukwatekesa muthu, wene ulondekesa o henda itwala nayu ku jiphange jetu, Jihova ubhana matwi ku musambu yu. Xinganeka mu kifika kiki: Jitata ala ni twana tuyadi, mona muhatu ni mona diyala, ene ana jindenge. O mona diyala wamukata kyavulu, anga o mona muhatu udyonda kwa tat’ê: “Papá ngakudyondo kwatekesa ngo phangyami, mwene wamukata kyavulu!” O tat’ê wamulanga kya mon’ê mukonda wamuzolo, maji mwene usanguluka kyavulu mukumona mon’ê watandanganya ni phang’yê yu wamumudyonda phala kukwatekesa phang’yê.

¹⁸ Jihova utuswinisa kubhanga kiki. Mwene wamesena kwila tutandanganya ni akwetu ni kwila tusuluke mu kudisambela. Kyoso kitubhanga kiki tulondekesa kwila kitwamutandanganya ngo netu, maji twazolo o jiphange jetu ni muxima woso. Jihova umona o ima yiyi itubhanga. (2 Te. 1:3; Jih. 6:10) Kala kitwamono o ima itubhinga mu misambu yetu itena kukwatekesa muthu. Mukiki tukolokotyenu mu kudisambela.