Jiphange Jiyadi ja Ubhe mu Kibuka Kya Utuminu

MU KIZUWA kya 5 kya mbeji ya Kamusasadi wa 2024, abhana ngolokela ya katunda mu kyonge kya muvu ni muvu: Phange Jody Jedele ni Jacob Rumph a asolo phala kubhanga mbandu mu Kibuka Kya Utuminu Kya Jimbangi ja Jihova. O jiphange jiji amusidivila Jihova ni ufiyele woso mu mivu yavulu.

Phange Jedele amuvwala mu mbanza ya Missouri, mu ixi ya Estados Unidos, o jitata jê Jimbangi ja Jihova. Ene atungile mu kididi mwexile aboki ofele. Mukonda dya kiki, mwene wejidile jiphange javulu exile muya-ku phala kuboka. O henda ya jiphange jiji yamutula ku muxima. Phange Jedele amubatizala mu unzangala wê, mu kizuwa kya 15 kya Kamusasadi wa 1983. Mwene wawabhelele kyavulu kuboka. Kyoso kyazubha o xikola ya kaxi, wakituka muboki wa thembu yoso mu mbeji ya Katutu wa 1989.

Kyoso manu Jedele kyexile hanji munzangala, o jitata jê exile mukunda Betele kumoxi ni mwene ni ndeng’yê ya muhatu. O kima kiki kya abhangesa kusuwa o mbambe ya kusidivila ku Betele, kyene kyabhange ene kyoso kyakulu. Manu Jedele wayi musidivila ku Betele ya mbanza ya Wallkill, mu mbeji ya Katutu wa 1990. Kyadyanga wakalakala mu kibuka kya akwa kukomba, mukusuluka wayi mu kibuka kya akwa kusaka.

Mu kithangana kyenyokyo, o ilunga mu dimi dya Espanhol yazukamene ku Betele yexile mukula kyavulu, mukonda dya kiki mwabhindamene jiphange javulu ja mala. Manu Jedele wadibhakula mu kilunga kimoxi, yu wamateka kudilonga o dimi dya Espanhol. Koko wejiya-ku phange wexile muboki wathembu yoso amwixana Damaris. Mana Damaris wexile musidivila mu kilunga kyengi kya dimi dya Espanhol. Ku pholo dya kwenda ene akazala, anga mwene wayi we musidivila ku Betele.

Ku muvu wa 2005 ene atundu ku Betele phala kulanga o jitata jâ. Mu kithangana kiki ene akituka aboki a thembu yoso. Manu Jedele wexile mulongexi mu Xikola ya Aboki a Thembu Yoso, wakwatekesa mu kibuka kya jiphange akwatekesa o jiphange ala mu jinzo ja kusaka ni mu kibuka kya kutunga.

Ku muvu wa 2013, manu Jedele ni mana Damaris a exana dingi ku Betele phala kukwatekesa kutunga o Betele mu mbanza ya Warwick. Tunde mu kithangana kyenyokyo, ene asidivila ku Betele ya mbanza ya Patterson ni ku Betele ya mbanza ya Wallkill. Manu Jedele wasidivila mu kibuka kya kutunga ni mu kibuka kya akwa kusaka. Mu mbeji ya Katanu wa 2023, mwene wamateka kukwatekesa mu Kibuka Kya Sidivisu. Mwene wambe kiki yalungu ni ikalakalu yoso yatambula: “Kyoso ki utambula kikalakalu kya ubhe, sayi bhabha utena kutandanganya. Maji mu ithangana kala yiyi, eye wabhingi kudyelela kwa Jihova mukonda mwéne ngo utukwatekesa kubhanga yatutumu mwene.”

Phange Rumph amuvwala mu mbanza ya Califórnia, mu ixi ya Estados Unidos. Mu undenge wê, o mam’â wazozele mu nzumbi maji wabhangele nguzu phala kumulonga o Bibidya. Mivu yoso, manu Rumph wexile mukunda kukw’ê ya muhatu, wexile musidivila Jihova ni ufiyele woso. Kukw’ê wamukwatekesa kukala ni vondadi ya kudilonga o Bibidya, mukonda dya kiki kyoso kyexile ni 13 kya mivu, mwene wabhingi phala kudilonga o Bibidya. Mu kizuwa kya 27 kya mbeji ya Katutu wa 1992, amubatizala, mwene wexile hanji munzangala. Ku pholo dya kwenda, mam’â wakolele kya mu nzumbi, anga o jiphange jê a abatizala we.

Mu unzangala wê, manu Rumph wamono kwila o aboki athembu yoso asangulukile kyavulu. Mu mbeji ya Katutu wa 1995, kyoso kyazubha o xikola ya kaxi, mwene wakituka muboki wa thembu yoso. Ku muvu wa 2000, wayi musidivila mu ixi ya Ecuador, mu kididi mwabhindamene dingi aboki. Koko wejiya-ku phange muboki wathembu yoso amwixana Inga, mwene mukwa Canadá. Mu kubhita thembu, akazala. Ene asuluka mu kusidivila mu mbanza imoxi mu ixi ya Ecuador. Mu mbanza yiyi mwexile ngo kibuka kyofele mwexile aboki ofele. Lelu o kibuka kiki kyakituka kilunga kyadikota.

Mu kubhita thembu, manu Rumph ni mana Inga a asolo kala aboki a katunda, mu kusuluka amateka mu kukunda o ilunga. Ku muvu wa 2011 a exana phala kudilonga mu xikola ya 132 ya Ngiliyade. Kyoso kyatundu-mu, asidivila mu jixi javulu ni ididi yavulu kala, ku Betele, kukunda o ilunga ni kukala akunji a jixi jengi. Manu Rumph wexile we mulongexi mu Xikola ya Akunji a Utuminu.

Mukonda dya uhaxi wa COVID-19, manu Rumph ni mana Inga ayi ku Estados Unidos. Koko a exana phala kukalakala ku Betele ya Wallkill, manu Rumph amulongo mu Kibuka Kya Sidivisu. Anga a atumikisa dingi mu ixi ya Ecuador. Koko manu Rumph wasidivila mu Kibuka Kya Filiyale. Ku muvu wa 2023, a atumikisa ku Betele ya Warwick. Mu mbeji ya Katatu wa 2024, manu Rumph amusolo phala kukala mukwatekexi wa Kibuka Kya Sidivisu. Mwene wambe kiki yalungu ni ikalakalu yatambula: “Kwoso-kwoso kwatutumikisa, o kikalakalu kikyene o kima kyabeta-kota kana, maji o athu.”

Etu tusakidila kyavulu o ikalakalu yene mubhanga o jiphange jiji. Tukolokotyenu “mu kubhana valolo ku” jiphange ala ni ikalakalu yavulu mu kilunga kya Jihova.—Fil. 2:29.