IBHUIDISU IA BIBIDIA IO TAMBUIJILE
Ihi ia-nda bhangesa Kristu kuíza dingi?
Ande dia Jezú Kristu kuia ku diulu ku muvu 33 K.K., muéne ua kanena kuila ueji kuíza dingi. Muéne ua di sokesa ni diiala ngenji uendele njila mu thembu iavulu iu ua vutuka ni kutena kua ku tumina kála sobha. Jezú ua-nda kuíza dingi phala kutumina o athu.—Tanga Luka 19:11, 12.
Jezú ua-nda bheka unguvulu uambote phala o athu
Kristu ua-nda kuíza dingi ni mukutu uebhi? Muéne a mu fukununa kala muthu mu nzumbi. (1 Phetele 3:18) Uai ku diulu, iu ua xikama ku mbandu ia kadilu ka Nzambi. (Jisálamu 110:1) Mu ku bhita thembu, Jezú anga u kala bhu pholo ia Jihova Nzambi, o “Mukulu-a-Ndamba” ua bhana kua Jezú o kutena kua ku tumina o athu. Kienhiki, Jezú ka-nda kuíza kála muthu mu xitu, maji kála Sobha, muthu mu nzumbi.—Tanga Daniele 7:13, 14.
Ihi ia-nda bhanga Jezú kioso kia-nda bhixila?
Jezú ua-nda bhixila mu ukexilu ua nzumbi ni ji-anju jê, phala ku fundisa o athu. Muéne ua-nda buikisa o athu a iibha ni ku bhana muenhu ua iuka kua ió a mu xikina kala Sobha.—Tanga Matesu 25:31-33, 46.
O kikalakalu kia Jezú kala sobha, kia-nda bhangesa o ixi ku kala palaízu. Ua-nda fukununa o athu afú kiá phala ku kala ku muenhu mu Palaízu mu ixi.—Tanga Luka 23:42, 43.