O Lembalasa ia Jezú i tu Bhana Kithangana kia ku Bandekesa dingi o Kikalakalu Kietu!

1. Ima iebhi i tu bhangesa ku bandekesa o kikalakalu kietu mu jimbeji ja Katanu, Kasamanu, ni Kasambuadi?

¹ O kuila u tena ku bandekesa o kikalakalu kiê, mu kithangana kia lembalasa ia Jezú? Saí aboki, a-nda kala ni kithangana kia ku nhoha mu sidivisu iâ, ni bhu xikola, ene a tena ku katula mbote mu kithangana kiki, mu ku kalakala mu sidivisu ia kuboka. Mu kizuua kia 2 kia mbeji ia Kasamanu, ku mundu uoso kua-nda boka o kikalakalu kia ku bhana o njimbu ia lungu ni lembalasa ia Jezú phala kuixana o athu, phala ku kala n’etu mu kizuua kia 17 kia lembalasa ia Jezú, ia mbeji ia Kasamanu. Kioso kia-nda bhita o kiônge kiki, tua-nda bhanga ioso phala ku a kuatekesa dingi kuijiia o maka enhá, ni ku a exana phala kuívua o diskursu dia katunda, dia-nda bhita mu semana ia 25 ia mbeji ia Kasamanu. Mu kidi, kuene ima iavulu i tu bhangesa ku bandekesa o kikalakalu kietu mu jimbeji ja Katanu, Kasamanu, ni Kasambuadi.

2. Uebhi o ukexilu uambote phala ku bandekesa dingi o ukunji uetu?

² Aboki a ithangana ni ithangana: O ukexilu uambote phala ku bhanga dingi, o ku kala muboki ua kithangana ni kithangana. Kuijiia kuila tuala ni ikalakalu ietu, ku bhinga ku kala ni kithangana kia soko, phala ku bhanga o kikalakalu kiki. (Jisabhu 21:5) Nange eie u tena kueha o ikalakalu i ku katula kithangana kiavulu. (Filipe 1:9-11) Mukonda diahi kuzuela ni jiphange mu kilunga, ku vondadi iê ia ku kalakala kála muboki ua kithangana ni kithangana, nange ene a tena ué ku kalakala kála aboki a ithangana ni ithangana?

3. Kiebhi o miji a tena ku bhanga ioso phala ku bandekesa o ukunji uâ?

³ Mu usuku uenu ua ubhezelu ku muiji, kima kiambote kuzuela se ihi i mua-nda bhanga mu muiji. (Jisabhu 15:22) Nange bhu kala athu ku muiji, a tena ku kalakala kála aboki a ithangana ni ithangana, mu mbeji imoxi, mba jimbeji, ni kikuatekesu kia muiji. Ihi i ua-nda bhanga se u mona kuila ki ua-nda tena? O muiji u tena ku kalakala kumoxi mu usuku, mba ku kalakala dingi ku disukilu dia semana.

4. Mabesá ahi, u tu tambula mu ku bandekesa o kikalakalu kietu kia ukunji, mu kithangana kia lembalasa ia Jezú?

⁴ Jihova ua uabhela kiavulu ioso i tu bhanga phala ku mu sidivila, ni ku bhana valolo mu nguzu ietu. (Jihebeleu 6:10) O kisangusangu, kijila mu ku bhana kua Jihova, ni ku akuetu. (1 Malunda 29:9; Ikalakalu 20:35) O kuila ueji tena ku bandekesa dingi o kikalakalu kiê, mu kithangana kiki kia lembalasa, ni ku katula o mbote ijila mu ku bhanga kiki?