Ua-nda Kala Muboki ua Ithangana ni Ithangana?
1. Mukonda diahi mu mbeji ia Lembalasa ia kufuá kua Jezú, kithangana kiambote phala ku sanzumuna o ukunji uetu?
1 Mu mbeji ia Lembalasa ia kufuá kua Jezú, kithangana kiambote phala ku sanzumuna o ukunji uetu. Kithangana kia ku xinganeka mu henda ia Jihova, mu ku bhana Mon’ê phala ku tu kula. (Nzu. 3:16) Tu sakidila Jihova mu ku tu londekesa o henda, kiki ki tu bhangesa ku longa o maka alungu ni Jihova ni ihi ia mu bhanga phala o athu. (Iza. 12:4, 5; Luk. 6:45) Kiene ué o kithangana kia ku ixana o athu mu mbambe ietu ni athu u tuejiia phala kuia mu Lembalasa ia kufuá kua Jezú. Tua tokala tu bhanga ioso phala ku suínisa o athu a-nda kala mu lembalasa. O kuila ua-nda sanzumuna o ukunji uê, mu ku kala muboki ua ithangana ni ithangana mu mbeji ia Katanu, Kasamanu ni ia Kasambuadi?
2. Mukonda diahi o mbeji ia Katanu mbeji ia katunda phala ku kala muboki ua ithangana ni ithangana?
2 Bhanga o Mbeji ia Katanu, kala Mbeji ia Katunda: O mbeji ia Katanu kithangana kiambote phala ku kalakala kala muboki ua ithangana ni ithangana. Jiphange joso a-nda kalakala, ala ni ufolo ua ku bhana 30 a ji ola mba 50. Se o kafunga ka ilunga ua mu kunda o kilunga mu mbeji ia Katanu, o aboki a ithangana ni ithangana a-nda kala mu kiônge kioso, kia-nda bhanga o kafunga ka ilunga ni aboki a thembu ioso ni aboki a katunda. Mu mbeji ia Katanu mu kizuua 1 tua-nda mateka ku bhana o tumikanda tua ku ixana o athu phala kuíza mu Lembalasa ia kufuá kua Jezú, ia-nda bhita kia Tersa, mu mbeji ia Katanu mu kizuua kia 26 kia muvu ua 2013, mu mivu uíza-mu tua-nda mateka ué selu mu ku bhana o tumikanda. O mbeji ia Katanu iala ni sukilu dia semana jitanu. O kuila u tena ku di sokejeka phala ku kalakala mu mbeji íii ia katunda?
3. Ihi i tua tokala o ku bhanga phala ku kalakala dingi mu ukunji uetu?
3 Disokejeke Kiá: Kiki kiene o kithangana kia ku di pelepalala, ni ku di sokejeka phala ku kala muboki ua ithangana ni ithangana. O muiji uoso ua tokala ku di sokejeka, mu kiki katula kithangana mu Ubhezelu ku Muiji phala ku zuela ni muiji o mbambe ia tokala o ku suua ni ku sokejeka kiambote. (Jisa. 15:22) Se ku tena ku kala muboki ua ithangana ni ithangana kana ku luuala. O kuila u tena ku di sokejeka phala ku kalakala dingi mu ukunji? Mu izuua ia semana u tena ku kalakala dingi?
4. Mabesá ahi u tua-nda tambula mu ku boka kiavulu mu mbeji ia Katanu, Kasamanu ni Kasambuadi?
4 Se tu boka kiavulu mu mbeji ia Katanu, Kasamanu ni ia Kasambuadi, tua-nda sanguluka dingi mu kuijiia kuila tua mu sidivila Jihova ni ku kuatekesa akuetu. (Nzu. 4:34; Ika. 20:35) O kima kia beta-kota o kuijiia kuila o nguzu ioso i tu bhanga mu ukunji uetu i sangulukisa Jihova.—Jisa. 27:11.