Sanguluka mu Kithangana Kia Lembalasa ia Kufuá Kua Jezú
1. Kiebhi ki tu tena ku bandekesa o ku sanguluka kuetu, mu kithangana kia Lembalasa?
1O kuila ua mesena ku bandekesa o ku sanguluka kuê, mu mbeji ia Katanu, Kasamanu ni Kasambuadi? U tena ku sanguluka dingi mu ku sanzumuna o ukunji uê, mba ku kala muboki ua ithangana ni ithangana. Kiebhi o ku kala muboki ua ithangana ni ithangana, ku bandekesa o ku sanguluka kuê?
2. Kiebhi o ku sanzumuna o ukunji uetu, ku bandekesa dingi o kusanguluka kuetu?
2 Bandekesa o ku Sanguluka Kuê: Jihova ua tu bhange phala tu kale ni ku sanguluka mu ku mu bheza ni ku dikila o ibhindamu ietu mu nzumbi. (Mat. 5:3) Muéne ua tu bhange ué phala tu kale ni kisangusangu kia ku kuatekesa akuetu. (Ika. 20:35) O sidivisu ia ku boka, i tu bhangesa ku bheza Jihova ni ku kuatekesa akuetu. O ku bhanga kiki, ku bandekesa o ku sanguluka kuetu mu ukunji. Tu kala dingi ni uhete ua ku boka, kioso ki tu di bhakula mu ukunji uetu. Se tu kala dingi ni uhete, tua-nda tena ku boka sé hele mba uôma. Tua-nda kala dingi ni kithangana kia ku bhana umbangi ni ku mateka ku longa o Bibidia. O ku boka mu ukexilu iú, ku bandekesa dingi o ku sanguluka kuetu.
3. Mukonda diahi o mbeji ia Katanu ni ia Kasamanu, kithangana kiambote, phala ku kalakala kála muboki ua ithangana ni ithangana?
3 O mbeji ia Katatu ni Kasamanu, ithangana iambote phala ku kalakala kala muboki ua ithangana ni ithangana, mukonda tu tena ku sola ku bhana 30 mba 50 a ji ola. Tua-nda mateka kuixana o athu phala o Lembalasa ia kufuá kua Jezú kia Sábhalu, mu kizuua kia 22 kia mbeji ia Katanu katé kia Sekunda, kizuua kia 14 kia mbeji ia Kasamanu. O jiphange, a-nda sanguluka mu ku kalakala ni “muxima umoxi” phala ku boka mu mbambe ioso mu kithangana kia tokala.—Sof. 3:9.
4. Ihi i tua tokala o ku bhanga, se tua mesena ku kalakala kála muboki ua ithangana ni ithangana?
4 Di Pelepalale Kiá Kindala: Se ku di sokejeka luua, phala ku kala muboki ua ithangana ni ithangana, tonginina kiambote o kithangana kiê, phala ku mona se ihi i ua tokala o ku bhanga, phala ku sanzumuna dingi o ukunji uê, mu ku kalakala mu mbeji imoxi mba javulu. Samba ia lungu ni maka enhá. (Tiia. 1:5) Zuela ni muiji uê ni jiphange mu kilunga. (Jisa. 15:22) Ua-nda mona kuila, né muene ua kate mba o kithangana kiê kia tolo, u tena ku sanguluka mu ku kalakala kála muboki ua ithangana ni ithangana.
5. Ihi ia-nda bhita se tu sanzumuna o ukunji uetu, mu kithangana kia Lembalasa?
5 Jihova ua mesena kuila, o jiselevende jê a sanguluka. (Jisá. 32:11) Mu ku sanzumuna o ukunji uetu, mu kithangana kia Lembalasa, ki kia-nda bandekesa ngó o ku sanguluka kuetu, maji kia-nda sangulukisa ué o Tata ietu ia diulu.—Jisa. 23:24; 27:11.